الصلح

الفصل الأول: الخطيئة

الجزء 12

الغالي: بصح! أنا فسبيطار نتي شوهتي بيا و هدرتي ديك الهضرة بدوك الكلمات؟

نهال صافي هنا تأكدات بلي باها عرف غرغرو عيناها خايفة

نهال: با غير خليني نشرح ليك

غير كملات هضرتها فهم بلي صحيح داكشي لي قال ليه فؤاد و هو يصرفقها حتى دار وجهها مصدومة.. حنكها عمر بدمو حيت ضربها بيدو لي كان شاد بيها الجرح..

الغالي بصوت محروق: يا خسارة تعبي فيك!!

شدها من دراعها مزير عليها

الغالي بحزن: شنو درت ليك لي ديري فيا هكا؟؟ دوي أ قليلة لحيا!! متتحشميش مخلية الناس كاملة تتسمع لداكشي لي تتقولي !! ديك الهضرة لي متتقالش؟
نهال بدات تتبكي: با عفاك غير سمع ليا أنا
الغالي بالغوات: أااااااش غنسمع؟؟؟ شنوووو عندك متقولي أ قليلة لعفة؟ هااا داااكشيييي لي خفت منووو حياااتي كاملة طحت فيه.. أنااااا بنتي تقول ديك الهضرة؟ بنتييييي أنااااا !! بنت الغالي ليمار.. بلا حشمة بلا حيا دير ديك الشوهة
نهال تتبكي: أنا ديك النهار خفت عليك بزااف أ با أنا نسيت راسي ديك النهار مكنتش ناوية نديرها تنحلف ليك تيق بيا..

الغالي دفعها على الناموسية معصب تيغلي خصوصا ملي تيدوز ليه فبالو بلي گاع الناس سمعو بنتو شنو قالت صافي تيبغي يجهل..

الغالي بعتاب: أنا بنتي لي ربيت و تقت فيها متديرش هكا!! أنا بنتي ماشي هكا!! خسارة كنت ناوي ندخل بيك لجنة.. حياتي كاملة وأنا مقابلك غير نتي نسيت حياتي على قبلك و فلخر تخرج بنتي هكا؟؟

نهال هضرتو جرحاتها بقا فيها الحال هي تتبغي باها ولكن مبغاتوش يكرهها بدات تتبكي و تتشهق قربات منو ناوية تشد يديه بعد منها..

الغالي بغضب: صافي سالينا من هادشي كامل من ليوم معنديش بنت سميتها نهال مبغبتش نشوف كمارتك مزال.. غتجمعي حوايجك و غترجع منين جيتي!!
نهال حركات راسها بلا: با مديرش فيا هادشي عافاك!!
الغالي: نرجع مبغيتش نشوفك فهاد الدار
نهال حركات راسها بلا: أنا بنتك متقدرش دير فيا هاكا
الغالي: أنا بنتي لي تعدبت على قبلها ماشي قليلة العفة..

غير قال هضرتو خرج من عندها لقاهم مجمعين قدام لباب خنزر فيهم.. عائشة ردات لبال للجرح لي بدا تيهبط بالدم و هي تشهق قربات منو

عائشة بخوف: الدم !! الغالي الدم

الغالي من قبيلة و هو تيحس بالدوخة هبط راسو بان ليه بلي حوايجو عمرو بالدم من جهة الجرحة تنهد و مشا قاصد بيتو تبعاتو مو.. باغا تعرف شنو واقع.. اما نهال فبقات تتبكي و تتشهق بزز ناضت بدات تتجمع حوايجها.. دخلات عندها حياة لي غير شافتها تلاحت عليها معنقاها وهي تتبكي..