أختطاف ولكـن / مكتملة

حلقة ثالثة

للكاتبة: العنود

طبيت كعدت يم باجي وماما وصافنة افكر بالمجهول وشلون راح اكمل وشحيصير

نهلة: عيني والله بناتج درة مال الله خاصة دعاء بهيج عمر وتسوي كل هل شغل ونادرة ومؤدبة
نادية:من ذوقج عيوني ام نصر بس هية ماسويت شي عادي الي بعمرها يسون هيج وأكثر
نهلة:يياا وين الي بعمرها ولج دادة بنتي وبنات خواتي وبنات ام نذير كُلشي ما يسون بس موبايلات وكاعدات بيضة مايعرفن يطكن
نادية:لا مستحيل بيضة ميعرفن
نهلة:اي وداعتج هسة بنتي بالخارج مكضيتها هية ورجلها بس مطاعم ودليفري
دعاء:باجي كُل انسان الة اشياء يحبها هسة اني احب الطبخ من اني وصغيرة وية ماما بالمطبخ فحبيتة واعتبرة هواية من هواياتي ما الة علاقة الندارة والشطارة بهيج مواضيع
نادية: مثل ما كالت دعاوي
نهلة:دامج تحبين الطبخ انتِ اليوم سوي الغدة من ايدج الحلوة
دعاء:تدللين باجي اسوي مقلوبة؟
نهلة:سوي واني راح اسوي مركة دجاج وتمن

كمت بديت اسوي بالأكل وماما تسوي بالخضرة
وباجي تشتغل وتسولف على جيرانها واهلها ونسوان اخوتها
نهلة:اني ما متعبني غير نصر يتأخر انصاص الليالي
نادية:عادي كل الولد بهيج عمر يسهرون نفس ولدي
نهلة:خية شفايتلج يسهر لا يخلصها بس شغل ما عندة شي غير الشغل
نادية:والله يا ام نصر المفروض تفتخرين بابنج عقلة جبير وواعي وحوك
نهلة: ولج عيني اني ادري بيج حوك وخوش زلمة بس انقهر الف مرة من اشوفة مووت روحة بالشغل
نادية:هوة شيشتغل وشيدرس
نهلةيشتغل حماية وسايق عند لواء وخريج كلية عسكرية ينتظر تعينة
نادية: خلي ما دام هوة مرتاح بهل شي
نهلة:الله كريم
ما شاركت بحديثهم عنة لان ما يهمني واعتبر سالفتهم تافهة عنة
نادية:دعاء حضري روحج امي العصر اخذج ونروح للسوك
دعاء:ليش ماما ما احتاج شي
نادية:لا تحتاجين شكو شي جبتي من بيت جدج تذبي واشتريلج انتِ وريام ملابس جديدة
دعاء: اوك مثل ما تردين
كملت الغدة وطبيت سبحت وصليت ولبست فستان مرتب وخلتلي باجي مسكارا وحمرة
نهلة:يي عيوني ترتبي هسة يجن بنات ام نذير كل وحدة تكول للكمر كوم واني اكعد بمكانك
للوحدة تقريباً اجة خالي وورا بشوية جتي خالتي ام نذير وضلن متحاضنات هية وماما ويبجن
لحد ما خالي كاللهن بس سلمت عليها والبنات
ام نذير:ياا هاي دعاء يا ماشاء الله كبرانه بعد خالتج صايرة مرة هاي رؤى وهاي صبا
سلمت عليهن عادي ورحت حتى اقدم مي الهن كعدنة شوية نسولف
وامي رجعت عادت سالفتهة هية وبيت جدو للمرة المدري شكد
ام نذير: يمة الله لايوفقهم ولا ينطيهم شمسوين بيج جنتي وردة مفتحة بنص
بستان وهسة جنج عاكول
كوة لزمت ضحكتي ع التشبيه وكمت
دعاء:باجي راح اصب غدة
نهلة:تمام ياعمري
رحت اصب ولحكني رؤى وصبا
رؤى حضنتني حيل
رؤى:دعاويييي صديقة الطفولة والله مشتاقتلج كومة
دعاء:يروحي والله اني اكثر شلونج  متغيرة هواي عن أول صايرة تخبلين
صبا:اي طبعاً تتغير الواحد يكبر ما يصغر
باوعتلها بطرف عيني وما حجيت
بهل أثناء اجة نصر
نصر:ها بنات شلونجن
اباوع صبا انكلب حالها وذبت الشال وطلعت كذلة
صبا:هلا نصوري الحمدالله
رؤى:تمام انتَ شلونك
نصر باوع علية كال تمام وصعد
دعاء:باجي وين السفرة
نهلة:هسة اجي اطلعها
ما شاء الله كلشي صبيتي
دعاء:اي خالة بقت بس المقلوبة يكلبها خالو
رؤى:لا نصر اختصاص مقلوبة
نصر:سمعت اسمي
نهلة: اي يمة تعال اكلب المقلوبة وانتن بنات شيلن المواعين
هنة بدن يشيلن وهوة اجة يكلبها
نصر:على فكرة بدون مكياج انتِ احلى بهواي
دعاء:عفواً؟
نصر:اتوقع سمعتي
دعاء:واتوقع انتَ محد طلب رأيك
اخذت الخواشيك ورحت كعدت جاب المقلوبة وكعد بس وجهة محتقن
مقداد: عاشت ايدها الي سوت المقلوبة
نهلة:هاي دعاوي سوتها
مقداد:عاشت ايدج باباتي حيل طيبة
ام نذير:اي والله فد طيبة
دعاء:بالعافية
اندك الباب وكام نصر يفتح
نذير:سلام عليكم
الكل:عليكم السلام
نذير:شلونجن خالاتي شلونج خوية
نادية:هلا بيك يبعد كلبي
نذير:اويلييي مقلوبة بطني بعد متقاوم
نصر:اكعد اكل يلا شمحتاج عزيمة
نذير:باجييي عاشت ايدج خلاص راح ابقى عايش يمكم حتى كل يوم اكل مقلوبة
نهلة:ههههه الف عافية حبيبي بس مو اني مسويته دعاء سوتها
التفت علية نذير:انتِ؟
دعاء:شنو ما مقتنع اني
نذير:لا بس هل كدوتج وين تكدرين تسوين مقلوبة
ما رديت علي وكملت اكلي
نذير:ما تتعلمن تسون اكل بدال المطاعم
صبا:اوي نذير تدري بية ما اسوي شي اخاف على بشرتي تتأثر وعلى اضافري
نذير:بشرتج؟ دشوفي بشرتها جنها كمر و ما بيها شي هم تشكي مثلج
اني ضحكت ودنكت
نصر ضربة على راسة خفيف : اكل واسكت
نذير:حاضر سيدي
كملنا غدة والبنات غسلن المواعين واني سويت جاي ووديتة الهم
دعاء:ماما حصعد انام
نادية:روحي امي
صعدت فوك من وصلت للغرفة جان نصر يريد ينزل
نصر:دعاء لحظة
دعاء:نعم
نصر:ترة اني من كتلج بدون مكياج احلى بس لان حاسبج مثل اختي صغيرة واحاول انسيج الصارلج لان شفتج بس تصفنين لا أكثر بس مو صوجج صوج اليشفق عليج
دعاء: تشفق عليه ليش؟
نصر:اي كلت خطية اكيد ضايجة على ابوها وامها ومحبوسة لا طلعة ولا طبة وماعدهم مكان غيرنا اكيد بيها حالة نفسية وحاولت اغير شوية من مودج بس انتِ لسانج طويل متساهلين هل شي
ايدة بجيوبة ويباوعلي بنظرة استهزاء
دعاء:ع فكرة انتَ مو صاحي وتفكيرك يدل على انو انتَ انسان جداً سطحي
نصر:سطحي لان حاولت الطف عليج الجو بس من نذير يكول جنها كمر تتمضحكين لان شفتي يتضحك وخفيف صدك مو مال واحد ينطجن وجه
اختنكت حيل من كلامة دعاء: قليل أدب
طبيت للغرفة وقفلتها وبقيت ابجي بدون صوت حيل انهضمت من كلامة شلون يكلي هيج اشفق عليج شكد تفكيرة سطحي ولو عليش أتعجب همة الزلم كلهم نفس الصنف فليت شعري ولبست تراكي ونمت ودموعي على خدي
فزيت على صوت دك باب قوي اباوع ع الشباك صارت دنيا ليل
كمت وكفت اعدل بوجهي واسمعهم يسولفون
نادية:دعاء ماما فتحي الباب ياربي بنتي بس لا صار عليها شي
نهلة:كولي يالله يجوز من تعب الشغل
نادية:يا شغل بس لا متخربطة
نصر:كولي يا الله عمة ليش تتخربط
نادية:بيها فقر دم حاد وعلى أي ساعة تكوع
فتحت الباب دعاء: شبيج ماما ليش تبجين
حضنتني نادية:عبالي متخربطة مال الوجع
دعاء:لا تدرين بية من اتعب انام نومة مو طبيعية
مقداد:خرعتينة عليج يا خالي
نادية:اني الخرعتكم والله مو هية
نصر:دعاء انتِ باجية
باوعتلة بخزرة دعاء: لا شكو حتى ابجي
نهلة:لعد اعوفكم على راحتكم ما دام ما بيها شي البنية
طبينة جوة ونزلت الحجاب
نادية:متستحين طالعة بالتراك
دعاء: شمدرين نسيت من خبصتكم ساعة بيش
نادية :ب 11 يضرتي
دعاء:ييححح ولا ادري
نادية:طبعاً متدرين اذا مخلصتها نوم كلساع اصعد ادك الباب ومتفتحين وانزل لحد ما اجة نصر وصعدت ويا وشافج ما تفتحي كال خاف بيها شي
دعاء:اي حنين اسم الله علي
نادية: اي والله شلون ولد راد يكسر الباب
تثاوبت وباوعتلها دعاء:الله يحفظة لأهلة
نادية:حترجعين تنامين
دعاء:اي راسي صاير طبل
اسمعها تحجي شلون نايمة هلكد وارجع انام بعد حضنت ريام ونمت
كعدت ب 6 تقريباً كمت غسلت وصليت ونزلت لكيت خالو مقداد كاعد بالحديقة ومشغل قرءان ويشرب جاي
دعاء: صباح الخير خالو
مقداد:ياصباح الورد والياسمين
دعاء:اشرب ويا خالي جاي لو ميقبل؟
مقداد:افا اكعدي واني وخالج
صبيتلي جاي وكعدت احجي وياا ع الدراسة وهوة يحجيلي على ايامة وشلون حب باجي
مقداد:جانت مثل البطة بالكلية وشعرها طويل وكصيرونة شلعت كلبي بحسنها وخطبتها وتزوجنا
دعاء:شكد حلو خالو وانتَ تحجي قصة حبكم حتى عيونك تلمع
ضحك خالو مقداد:عن اذنج خالو اكوم اروح للدوام
دعاء:الله وياك خالو دير بالك على نفسك

كمت شلت الكلاصات غسلتهن ورجعت كعدت وصافنة افكر
كطع صوت شرودي نصر:احم صباح الخير
باوعتلة وما رديت
نصر:متريكة؟
هم ما رديت
نصر:مو سألنة متريكة؟
دعاء:لا
نصر:ليش مو بيج فقر دم
دعاء: والله مو بيتي حتى اتصرف براحتي واسويلي اكل
نصر:اهاا
راح مدري شيسوي بالمطبخ يحوس
رجع بيدة صينية
نصر:يلا اكلي
دعاء:شاكل
نصر:اكليني شتاكلين بعد من البارحة الظهر مماكلة شي
دعاء:ما اريد شربت جاي وية خالو
نصر:هلا بيها فقر دم وتشرب جاي
دعاء:انتَ شجلبت وية فقر الدم ياخي كتلك ما اريد
نصر:براحتج كومي طبي جوة يلا اريد اطلع وصديقي واكف بالباب
كمت اريد اطب
نصر:دعاء لحظة ترة اني ما اقصد الكلام الي كلتة الج البارحة بس انتِ نرفزتيني اعتذر ما انتظرني ارد وطلع
اني شفتة طلع ما صدكت وكعدت اكل بطني موتتني من الجوع
ورة دقايق انفتح الباب اباوع نصر واني اللكمة تارسة حلكي تمنيت الكاع تنشك وتبلعني ع الفشلة
هوة باوعلي وكمل طريقة عادي اخذ فونة وطلع واني من الفشلة انسدت نفسي

================================
للكاتبة : العنود

In:al_a0nod