Affair with her Bodyguard

28

Hindi niya alam bakit pa siya tinulungan ni Lloyd. Medyo hindi pa rin siya nagtitiwala rito dahil alam niyang galit ito sa kapatid, sa asawa niya. Pero hindi naman siya nakaramdam ngayon na mapanganib ang lalaki. Pumunta siya sa kusina para kumuha ng maiinom.

Kasalukuyang nasa baguio siya, sa bahay bakasyunan ni Lloyd. Nagpalipas sila ng gabi sa isang hotel bago tuluyang umalis at tumungo sa baguio. Naawa pa nga siya rito dahil kulang ang tulog nito. Nang maihatid kasi siya nito ay binilinan lang siya ng mga kailangan niya malaman sa bahay at umalis na rin ito.

Simple lang ang bahay pero may kalakihan pa rin. Kailangan niya munang mag-isip isip at ikalma ang utak niya. Masiyadong maraming gumugulo ngayon sa isipan niya. Nasaktan siya dahil parang pinaglaruan siya nito. Hindi pa rin siya makapaniwalang ito talaga ang asawa niya.

Ilang beses niyang nabanggit sa binata ang tungkol sa asawa niya pero napakagaling nitong umarte na parang hindi ito ang asawa niya. Nag mukha siyang tanga sa harapan ng binata at isa iyong malaking kahihiyan.

"Ang tanga mo, Aj," bulalas niya sa sarili.

Pagkatapos niya uminom ay pumunta siya sa sala at humiga roon sa sofa. Nagulat pa siya nang tumunog ang cellphone niya. Napatitig siya nang makitang si Xion ang tumatawag. Marahil nakauwi na ito at nagtatakang hinahanap siya.

Pinindot niya ang airplane mode para wala siyang matanggap na tawag. Ayaw niya munang isipin ang binata. Ayaw niya munang problemahin pa ang problema.

Nilapag niya ang cellphone sa tabi niya at binuksan ang tv. Wala siyang magawa at wala pa rin siya sa mood lumabas ng bahay. Nanood lang siya ng palabas sa telebisyon hanggang sa makaramdam siya ng gutom dahil ala-sais na ng gabi.

Dederetso na sana siya sa kusina nang may kumatok kaya agad siyang tumungo sa pintuan at binuksan iyon.

"Neng, pagkain oh, birthday kasi ng apo ko," sambit ng matandang babae na nakilala niya kanina. Ito ang caretaker ng bahay ni Lloyd.

"Ay, maraming salamat po nay. Happy birthday po sa apo niyo," nakangiting sambit niya rito.

"Wala iyon! Basta pag may iba ka pang kailangan 'wag kang mahiya na kumatok sa bahay namin," ani nito at tinuro ang kabilang bahay. "Siya nga pala, hindi ba uuwi ang nobyo mo?"

"Nobyo po? Si Lloyd? Ay nako nay, hindi ko po siya boyfriend," wika niya at nailing-iling pa.

"Totoo ba hija? Akala ko'y nobya ka niya dahil ngayon lang siya nagpapunta rito ng ibang tao at babae pa!" halakhak nito. "Akala ko pa naman ay mayroon na siyang makakasama," dagdag pa nito at ngumiti ng tipid.

Hindi niya alam kung ano ang ire-react niya sa matandang babae. Wala siyang masabi sa kinwento nito pero kita niya ang lungkot sa mat anito.

"Oh siya, mauuna na ako hija ah? Siya nga pala, itatanong ko lang din kung pwede ba magkaraoke ang mga bisita ng anak ko? Hanggang 10pm lang naman, kung okay sa'yo na medyo maingay."

"Wala pong problema nay, mag-enjoy lang po kayo," sagot niya kaagad. Hindi naman kasi sobrang dikit ang bahay ng mga ito kaya ang tugtog na naririnig niya kanina pa ay mahina lang kung nasaan siya.

"Maraming salamat! Kumain ka na at 'wag magpalipas." Tumango lang siya at nagpaalam na sa matanda. Dumeretso siya sa sala at doon niya pinatong ang dalawang paper plate na may laman na iba't ibang putahe. Bumalik siya sa pinto para mai-lock ang screen at mismong pintuan na rin.

Kumuha siya ng tubig sa ref at bumalik sa sala. Doon na siya kakain habang nanonood ng palabas. Magliliwaliw muna siya para hindi mag-isip ng kung ano-ano.