١٠:٠٠ص
مد سطام يده على الكومدينه ومسك جواله سكر المنبه اللي أزعجه ! فتح عينه ناظر السقف لثواني يستوعب ويحس بخيالها بجمبه ، لف ببطئ يتأكد وفز من شافها بالفعل نايمه بعمق ! تنح يحاول يتذكر أمس ماجت معه ! نام أمس بدونها !
مالت ابتسامته وتنهد يتأملها بلا شعور ! الواضح انها جت الفجر ونامت بجمبه بدون لا تصحيه ، بيعجز يشبع من تأملها .
ضغط على عيونه بتعب ونعاس وقام مشى لـ دورة المياه.
بـعـد نص ساعه وبعد ما تجهز ولبس متوجه لـ الشركه ، وجه لها نظره قبل يطلع ! على حالها نايمه بالهنا ، ودعها بعيونه وطلع بهدوء .
وقف لثواني يستوعب الصراخ اللي بـ غرفة شوق ! ويسمع صوت رياض عندها ! قرب بخطوات هاديه يتأكد انهم يتلاعبون كعادتهم .. واحتدت ملامحه من استوعب صوت شوق الباكي وركض بسرعه لـ غرفتها والغضب اعتراه من شاف رياض رافع يده بيمد يده عليها ويضربها ، هجم عليه سطام بسرعه ودزه عنها.
-نرجع الوقت لبعض دقايق-
بغرفة شوق .. منشغله مع السواره اللي عيت تثبت وعجزت تلبسها ! سمعت صوت الباب يندق وأردفت: تعال.
اتسعت ابتسامتها وبان الفرح بعينها من شافت رياض وقربت سلمت عليه : الحمدالله على السلامه ! متى جيت ؟
ابتسم بخفه ونزل عينه يتفحصها : تو جيت ! بتروحين مكان ؟
شوق عطته سوارتها: لبسني اياه ، ادارة الجامعه مناديني.
رياض : ليه !
شوق ابعدت تعدل شعرها قدام المرايه: مدري.
رياض قعد على الكراسي : سمعت شي يا شوق .
تناظره انعكاسه بالمرايه وبأستغراب من بروده وظنته تعبان من الطريق : وش سمعت ؟
رياض : تقدم خالد لخطبتك و رفضتيه !
ناظرته لثواني ونزلت راسها بتنهيده تخرج زفير وجعها دفعه واحد ، رجعت رفعت عيونها له وبهدوء : صح .
رياض وقف بعدم استيعاب : منجدك انتِ ؟ ترفضين خالد ؟
شوق تأففت بعدم تحمل لـ هالمسأله ! وكأنها ارتكبت جريمه ولا كأنه حياتها وقرارها ! أردفت بعدم تحمل: رياض سكر هالموضوع ! ندري انه صاحبك وتعزه بس مو على قفاي .
رياض بنرفزه: يا بنت الناس وش قفاك ! خالد يبيك تقومين ترفضينه !
شوق لمعت عيونها: لا تظلمه معي .. !
رياض قاطعها وقرب: والله انه ييحبك .. !
شوق قاطعته و بتنجن ! غرقت دموعها بعيونها بلا سيطره : ييياا ريياض تكفى ما قال احبك انتم اللي تقولون ! لا تغصبونه موب كيفكم يعشق اللي انتم تبونه !
رياض صد عنها واخذ نفس يهدي نفسه وتجمد لثانيه من تذكر يوم كانو بالمول والسر اللي قاله لـ شوق ! ولف عليها بشك: ليه رفضتيه ؟
شوق طاحت دموعها وبنرفزه : انت اكثر واحد تدري ليه رفضته ! متخرج ويشتغل هناك سنتين وتاركنا وتارك ديرته ! ٦ سنين ما جاء ولا زار أهله !! وش أفهم من هذا كله ؟ ، وانت بعظمة لسانك قايل انك تسمعه يكلم وانك شاك انه متزوج او طايح بغرام هالشقر والبنات !! وانه يسولف لك عن حُبه العظيم ! لا تجي تسوي غبي على راسي يا رياض ! ذا خان دينه قبل ما يخوني.
رياض بغضب : اي زواج تتكلمين عنه !! وش خيانته ؟ شوقوه لا تطلعيني من طوري ، صاحيه تربطين المواضيع على كيفك !
شوق دزته ببكاء بعدم تحمل : اطلع برا .
رياض ابعد وبحده : اصبري ! مو بكيفك خليني أفهمك .
شوق دزته من صدره بقوه وتكرر هالفعل ببكي: مابي اسمعك اطلع برا ، ااطللع.
رفع رياض يده بيوقفها ويهديها وماحس الا بـ سطام اللي هجم عليه ودز يده ! تعثر رياض وتمسك قبل يطيح ومصدوم من فعله !
سطام والغضب يعتريه وشوق وراه وبصدمه: ابـو سـعـود ! اعقب يا ذا الوجه تفرض عضلاتك عليها ! على الحرام ان مانقلعت عن وجهي ان يجيك شي مايسرك .
تأففت شوق وصدت تغطي وجها ببكي ! مين داعي عليها اليوم ! وهي هالفتره بالذات مطلبها حنيه وطبطبه !
رياض فقد أعصابه ! هو ناقص لجل يجي سطام ويفهمه غلط بعد ! أردف: لا تهدد على راسي ! مامديت يدي يا بن الحلال .
شوق لفت عليهم ودزتهم بغضب : اطلعو برا كلكم ، اطلعوو.
رياض لف على سطام اللي يناظر دموع شوق بصدمه : ها شفت ؟ اختك بزر موب صاحيه .
شوق صارخت بغضب: اطلعو والله لا انادي ابوي عليكم.
رياض ابتسم بسخريه: وصلي له سلامي.
طلعتهم وسكرت الباب بوجيهم وقفلته !
