قاطعهم نايف اللي ركض من انتبه لـ اخته اللي عند الالعاب وصارخ بأسمها واللي خلى رنيم تفز من مكانها .. خوف من صوته اللي خرق اذنها فجأه او من الاسم اللي قاله ؟
"نـجـلاء"
انتبه لها سطام ومد يده لذراعها يهديها من ارتياعها وصدمتها .. بلع ريقه وهو يشوف انظارها ماتعدت الطفله اللي صارت تتهاوش مع اخوها على الالعاب!
رنيم وسعت عيونها من مدت نونو يدها على اخوها نايف بدفاشه وتبعده عن الالعاب ، لفت على سطام: رح باعدهم.
انتبه سطام لهم ومشى بملامحه اللي احتدت لاشعورياً ويسمع لـ نايف اللي يردف بثقه: ماما قالت انا رجال وانا أقول اتركي الالعاب.
نونو بصراخ حااد: ووخخخرر ، كيفي ألعابي وخر.
سطام بحده: بس انتِ وياه !
تمسكت نونو بأحد الالعاب وناظرت نايف بحده ومشت بثقه وهي تتعدأ سطام لـ رنيم وتمسك بيدها: اقعدو هنا مانبيكم واحنا بنروح الخيمه ويارب يجيكم الحرامي ياكلكم.
نايف ناظرها بغضب: لا تدعين ياحماره.
نونو صارخت بغضب: انت الحمار.
سطام حس براسه اللي يضغط عليه من قو الصداع وبحده: خلااص !
أبعد بخطواته الغاضبه لـ الباب الخلفي للبيت وفتحه وهو يناظر وجيهم المخروشه والساكته خوف من غضبه ! اردف: يلا للخيمه وان سمعت شكوى من حد عن إزعاجهم بطردكم كلكم.
أبعدت نجلاء الصغيره يدها عن رنيم ومشت متمسكه في لعبتها لبرا وتناظر سطام بخوف وبجمبها نايف.
عيون سطام عليهم لين دخلو لـ الخيمه ولف على رنيم اللي تناظره وقربت: حرام عليك يالشرير وش هالتهديد ؟ خوفتهم.
سطام:وين أهلهم عنهم ذول ؟ غابت الشمس وتاركينهم !!
رنيم: مسافرين وتاركتهم امهم عند عمتك هنوي.
سطام ارتخت ملامحه وماعلى باله الا وجيهم الخايفه من تهديده ! رفع نظره على ابتسامة رنيم الساخره: حسيت بتأنيب الضمير ؟
انظاره الجامده عليها وماسك الباب للان ! قربت منه وهمست قبل تتعداه: احسن.
اطلقت ضحكاتها الساخره وابعدت بخطوات رايقه للخيمه بكل ثقه تاركه سطام اللي ماقدر يخفي ابتسامته على ضحكتها الناعمه وسكر الباب ومشى ياخذ الدوه "المشب" للخيمه.
« مـلـك »
بعد ماأخذت لها شور دافئ طـويـل يفرغ كل طاقتها السلبيه .. واقفه قدام المرايه الطويله وانظارها على بطنها اللي بان بروزه ،، بشعرها المُبلل وبجامتها الثقيله !
حست بحركه في بطنها واتسعت ابتسامتها وهي تمرر يدها برقه: ها ياحبيبي ؟ وش صاير لك شيطان الليله ؟ الله يتممك يارب وتقر عيوني.
زاد ضربه وتضحك أكثر بحُب وترقب كل نبضه وحركه غير آبه فالألم كثر ابتهاجها في اول ركلاته!
تردف ملك بحنانها: مشتاق لـ بابا ؟ غرت على خواتك راحو وخلوك ؟ حتى انا اشتقت بس بابا مايستاهل ياعين امك .. خلاني وراح ! تدري وش مطمني ؟ يوم قال لي في المستشفى "ان كانك ماتبين اللي في بطنك ، انا ابيها" وصفك فالبنت وهو مايدري وش جنسك ؟ بس يدري وش انا علتي ! يدري اني خايفه لو طلع البيبي بنت ،، وهذا كان زمان! انا راضييه فيك المهم تطلعين بالسلامه وبعافيه ياروحي.
قاطع حكيها دارين اللي دخلت ووجها يشير لعلامة الاستفهام وتتلفت: من تحكين انتِ ؟
ضحكت ملك وهي تمرر يدها لبطنها: لحبيبي.
قربت دارين بلهفه: يتحرك ؟
ملك هزت راسها بالايجاب ومشت تقعد: ايه حركاته زادت ارهقني اليوم !
دارين بنص عين: من هالحلاويات المدسوسه! شفتي بناتك راحو طلعتيهم واكلتيهم مره وحده ، اللي يشوفك يقول مشفوحه!
ملك خزتها: كل ذا لان ماعطيتك حبه ؟
دارين مشت تقعد بجمبها: حسوده من يومك.
ملك سكتت بتجاهل وانظارها على بطنها .. دارين: عاد يقولون كل ما زاد حركة الجنين زاد حظه.
ملك بتباهي: يكفي ان انا امه.
دارين ضحكت على غرورها: شين الثقه اللي في محلها !
بوسط ضحكاتهم داهمتهم حور اللي تلهث بسبب الركض .. وسعت ملك يدينها: هلا والله بدنيتي يامرحبا.
تقدمت حور وتوسطت حضنها بسرور وابتعدت بعد ثواني: بابا تحت يقول يلا بنرجع البيت.
اختفت ابتسامة ملك وكلامها يتردد وقفت تخفي غضبها بملامحها الجامده! ومشت بخطوات معدوده بتطلع وقاطعها دارين: وين رايحه ؟
ملك: اشوف وش عنده.
دارين: شايفه شعرك انتِ ؟ بتطلعين يلفحك الهوا لا تمرضين.
ملك ناظرت بـ حور: نادي ابوك للمجلس.
حور بأحباط ضربت رجلها بالارض: ماما مراح نرجع بيتنا يعني ؟
ملك بحده: لا أعيد كلامي اخلصي.
حور بوزت بزعل ومشت بطواعيه تنفذ كلامها.
وقفت دارين وبتردد: ملوك اكسري الشر وش ناويه تسوين ؟
ملك ناظرتها بحنق: والله لو معي خيزرانه رايحه اجلده ؟ امسي علينا بروح اشوفه بس.
دارين ابتسمت غصب وهي صايدتها: تبين تذوبينه ؟ ويقعد يتحسر! حراام عليك ، ان كابرتي اكثر ذبحتك.
ملك شتت نظرها تلبس شبشبها: اص بس.
