ما تخفيه الحروب

part21

بقلم:جنه بغداد

#ما تخفيه الحروب
.
.
.
_أنطينٌي حضنك ، هالوطن مآ بي أمان 🇮🇶♥️
.
.
.
الخوف سيطر عليه ما اعرف شنو اسوي بهذيج لحظة حد ما سمعت العضيد و هو يصيح
_طور اطلعي بسرع
_طور بخوف:راح ياخذوني و يقتلوني
_اسكتي اسكتي محد ياخذج اطلعي من هناك لان البيت راح ترحين اله قريب بس اطلعي
حاولت افتح الباب شكل ما ينفتح
_الباب ما ينفتح شنو اسوي ها شنو اسوي راح اموت
_افتحي الباب حيل راح يدخلون عليج بسرعه
نزلت الجنطه بالكاع و بديت افتح الباب ماكو كمت ادفر الباب مثل المخبله و هما مناك يردون يكسرون الباب
_يا علي حظرني
من دون ما ادري كلت هيج و فتحت الباب جان ينفتح بسرعه اخذت جنطه و تلفون و طلعت اركض بكل سرعتي كل هذا و العضيد على الخط
_وين اروح طلعت
_باعي اركض بإتجاه السوك مفهوم
_بس ما اندل السوك اني مره وحده رحت اله بس
_ابقي اركض حد ما توصلين المدرسه اخذي طريق وره مدرسه
_تمام
اركض و التفت ورايه ماكو احد بس صوت قريب و سيارات هم دنيا الليل و ما اشوف و كل شوي اعثر جان اشوف ضوء سياره كدامي مدري وين اروح يعني هسه على اي دقيقه يلزموني جان التفت و اشوف حاويه جبيره مالت زباله بدون وعي ركضت عليها و ذبيت غراضي بيها و بعدين ذبيت نفسي بيها من الخوف ما اهتيمت اي شي
خليت ايدي على حلكي حتى ما اطلع صوت لان سياره وكفت يم حاويه و اسمعهم يحجون
_انت مو شفتها من بعيد
_اي شفتها بس هسه مو كدامك ماكو
_خلي نفترق و ندور عليها
اسمعهم و دموعي تنزل من وره كلامهم افترقوا و بقى واحد يفتر قريب عليه خايفه على اي ثانيه يدك الجهاز لان بس شفت السياره سديته بقيت اردد ايه علمني عليها مسلم من جنت صغيره لان جنت اخاف من ظلام و بقيت كل ما اخاف من اي شي اكوله
_الله أقرب من حبل الوريد
بقيت اردد هاي الاية حد ما هديت شوي بقيت بنص ساعه كاعده بدون صوت حتى ما اخاف اتنفس عدل اخر شي اجه هذاك
_يلا نمشي من هنا
_ليش وين لكيتوها
_اي واحد جاي يدورون عليها كال لكيتها راح ياخذها ابو ميثاق
_خوش لعد شكله ابو ميثاق راح عيش الليله حمره اليوم
جان يضحكون بصوت عالي و مقرف لعبت نفسي من تفكيرهم بس بنفس الوقت فرحت لان راح اكدر اطلع من هنا اسمع خطواتهم و هما يبتعدون و شوي و اسمع صوت سياره اشتغلت انتظرت ربع ساعه ياالله طلعت من حاويه بس طلعت روحي لعبانه من نفسي لان استوعبت اني جنت خاتله بالحاويه بس الخوف يخليك تنسى كل شي لان الروح عزيزه ضحكت لان بس تخيلت راح اكول مسلم اني بقيت بحاويه الزباله ما راح يصدك لان يعرف بيه كلش زين تلعب نفسي من كل شي
باوعت على المكان ماكو احد جان ارجع اركض واني اركض جان اشوف مدرسه بس مهجوره اني شفتها لو حسيت شفت الجنه ركضت بكل قوتي وصلت وره المدرسه جان اطلع تلفون بسرعه و دكيت على اول رقم رقم العضيد بسرعه رد عليه
_ها وين صرتي هسه
_اني هسه وره المدرسه وين اروح
احجي ويه و جسمي كله يرجف و التفت يمنه و يسرى اخاف اكو احد موجود
_باعي اركض عشر دقائق راح تلكين صبات مفهوم ادخلي بدربونه لي بيها صبات
_تمام
سديت الخط منه و رجعت اركض مره ثانيه صدك عشر دقائق وصلت الصبات دخلت بدربونه مشيت اول خطوات جانت كلش ظلمه و صوت سيارت قريبه احس بعد ما بيه حيل مشيت خطوات ما حسيت اله واحد سحبني من ايدي و دخلني ممر ضيك جان اصرخ لان ما اعرفه منو و نضربت بحايط و اكو بالجنطه حديده دخلت بظهري
جان هو بسرعه يسد حلكي و يحجي بهمس
_اشش خيزرانتي اهدي هذا اني العضيد
رفعت عيني حتى اشوفه بس كلش شي ما شفت لان ظلمه بس صوت انفاسي عاليه خايفه و صوت أنفاسه هاديه رغم كل شي جاي صار بس من سمعت صوته احس رجعت روحي و رجع الأمان بكلبي حتى لو احنا وسط هذا القلق كله
واخر ايده من حلكي و حجيت بهمس:شلون طلعت مو جاي يدورون عليك
تقرب من يم اذاني وحجه بهمس نفسي:وعيونج روحي مو مهمه بكدج طلعت حتى اخذج وياي
_انت شنو ما تخاف على نفسك طبني مرض اني على وصفك بالجهاز اكدر اوصل بس انت
_ما اخاف على نفسي ترى لا تخليني اروح هسه اكتلهم كلهم و ارجع ما عندي مشكله
من كال هيج جان صوته بي نبره جديه واعرفه هو اذا كال شي يعني خاله باله و يريد يسوي جان لازمه من قميصه و هزيت راسي معنى لا عبالك يشوفني حجيت بهدوء
_لا فدوه لا تسويها حباب
ما حجه بس تذكرت الوضع لي احنا بيه واني قبل شوي وين جنت جان ادفعه من صدره و حممت
_ احمم وين هسه نروح
هو هم حس على نفسه و ابتعد عني
_العضيد بهمس:يلا نمشي
جان يلزمني من ايدي و طلع هو قبلي حتى يشوف الموضع جان ماكو احد بسرعه كام يمشي على سريع و يجر بيه
_يلا امشي على سريع شوي
هو بنسبة اله يمشي على سريع بس بنسبة لي جاي يركض كل شوي اتعثر لان ما اكدر اصير بنفس مستوى الخطواته و نفس الوقت كلش رأسي كام يوجعني حتى صرت اشوف مغوش
بقينه ندخل و نطلع من درابين كلش ضيكه