عيناكِ ولاية لغربتي

💕الحـلقة الخامـسة و الـعشـرون💕

رواية "عيناك ولاية لي غربتي "

للكاتـبة: مـلاك محـمد

💕الحـلقة الخامـسة و الـعشـرون💕

___________________________________

صوت مزامير السيارت العالي .. و أضوائهم يلي كانت برازة في الطريق .. وسيارت العرسان يلي أختارو يركبو مع بعض في نفس سيارة ..
إبتسم قاصي وهوا يشوف لي خوه وصاحبه وكل عيلته بنسبة ليه كيف مبتسم و الفرحة يلي معبية عيونه ..

:" خيرك تتأمل فيا !"

تكلم عُمر بـ إبتسامة وهوا يشوفله ويرجع يشوف لي طريق قدامه بين ما قاصي أرتفعت زاوية فمه بإبتسامة مشاكسة ..

:" فرحانلك ولا ميجوزش! "

ضحك عُمر بقهقهة رجولية وشاركة فيها قاصي يلي خبط علي كتفه ..

:" اااه .. قداش كنت متمني لحظة يلي تجمعني بـ حور!"

تنهد عُمر تنهيدة طلعت بكل عمق وشافله قاصي بهدوء عكس الضجة و ضحك يلي داروه من دقائق بسيطة ..

:" ربي يهنيك عمورة تستاهل ترتاح بعد شقاء يلي شقيته "

شافله عُمر لي لحظة ورد شاف لي طريق وتمتم ..

:" أمين يارب .."

وشوية وقص عليهم غيهم وجواد يلي كان طالع من روشن ويضرب في الألعاب نارية و إبتسامته معبية وجهه ..

وأنحرفو السيارات علي طريق ترابي ومتجهين لي القصر وكانت دنيا مقلوبة وليل تحول لي نهار من كمية الألعاب نارية يلي ضربوهم ..

ودقائق و وصلت سيارة العرسان البيضاء يلي مزينة بـ شرائط بنفسجية ..
وكانت الموسيقى ليبية القديمة (زكرة) تعزف و صوتها معبي الأرجاء و الهتاف رجولي و الغناء يلي زاد الأجواء متعة كان غير ..

نزل قاصي و عُمر مع بعض وتخطو ساحة الأمامية  و وقربو من الخيمة الكبيرة هلبا و رفعو يديهم في تحية للكل وقعمزو علي الكرسيين يلي كانو مخصصينهم ليهم ..

كان لبسهم عربي .. تقليذي قديم بـ زبون البني يلي مخدوم طرازة يدوية لي جَرد الأبيض يلي ملفوف علي أكتافهم العريضة بطريقة زادتهم وقارة وهيبة و القبعة سوداء يلي زينت رؤوسهم .. كانو مثال ساحر لي تجسيد الزي لليبي وكأنه تخيط عشان يليق علي أجسادهم ...

قعمزو و جا قرب منهم آدم وتكلم بصوت يسمعوه من ضجة يلي حوليهم ..

:" جدك يبي يعاود قرايت الفاتحة قدام ناس وبـ يوثق العقود تمام! "

هزله عُمر رأسه بـ تمام بين ما قاصي كانو عيونه يمشطو في المكان من أي خلل أو مشكلة همس عُمر جنبه ..

:" نبهت الشباب لو جاء هداكا ضايع ميخلوش يخش! "

هز قاصي رأسه بـ الموافقة و رد عليه ..