عيناكِ ولاية لغربتي

💕الحـلقة الثاني و الـعشـرون💕

رواية '' عيناكِ ولاية لـغربتي "

للكاتبة: مـلاك محـمد

💕الحـلقة الثاني و الـعشـرون💕

_____________________________

فات ليل كئيب علي الكل بين مُحب و بين عاشق وبين من حاسس بذنب كبير من يلي سواه ..

و أولهم واحدة من بطلات الرواية يلي وقفت قدام المرايا في الحمام و عيونها كانو مرهقات و جفناها حمراويات من كمية الدموع يلي سكبتهم ..

قربت وجهها وهيا تشوف لي الخطوط الحمراء يلي أنطبعو علي خدها من الكف يلي خداته و أصابعها نزلو لمسو طرف شفتها يلي كان واضح الجرح فيهم وجعدت وجهها بألم ..

فتحت الميه بـ قوة وشكلت يديها لعند تعبو بـ الميه وحدفتها علي وجهها و غمضت عيونها بهدوء لما نزلت باردة علي ملامحها الجميلة وشعورها المزدحم و مليان خوف من يلي حـ يديره قاصي ..
هل أذت كرامته لي هده درجة .. درجة أنه يثور كل هده الثورة و يمد إيده عليها ..

سكرت الصنبور وخدت المنشف بـ غضب ونشفت بيه بشوية و هيا تغمض في عيونها بألم وهمست لي نفسها ..

:" لا نستاهل و أكتر من هكي! "

وفاضو عيونها بـ دموع و حاجة خنقتها بتخليها تبكي و بعدت بـ خطواتها لين وصلت لي الحيط يلي وراها ونزلت معاه بهدوء وقلبها كان حـ ينفطر من الألم ..

ضمت رجليها لي صدرها و نزلت راسها علي ركبيها و شعارها يلي أنساب مع حركتها و غطى ملامحها و بكت بـ حرقة و هيا حاسة روحها وحيدة في هذا العالم ..

هيا كانت دور علي شوية حنان و أحتواء لي قلبها يلي يرجف من الخوف ..
كانت تتمنى أنه تلقى الشخص يلي يعاملها بـ لين أنه يحس بيها يتحمل تعلقها في حاجات ممكن نشوفوها تافهه في عيوننا لكن عندها لا ..
تمنت تلقى الشخص يلي حتى لما يعرف أنها مش كويسة حتى لو هيا قالتله العكس ..

لكن الذئاب و الوحوش يلي برا مترحمش و كانت ضحية لي أول شخص حباته نفس الأشخاص يلي جدها كان يحمي فيهم منهم هادم يلي ينتهكو في الأعراض ..
قداش كانت تكره قوانين جدها أنه ممنوع الأختلاط مع أي جنس من بني آدم ما عدا أهلها ..
بس هيا ما كانتش عارفة أنه خايف عليهم من مواقف زي هده ..

ضمت روحها وصوت صراخها المكتوم يلي كان يطلع وكأنها ضبية مجروحة ..
خلت يلي طق علي الباب و خش بهدوء لي الدار و قعمز علي كرسي المكتبة لما ما لقاش حد ...
و عيونها دور في تفاصيل غرفتها الراقية وهوا يشوف لي طابع الأنثوي يلي يغلب أكتر تفاصيلها .. ومحتار ليش بس ساوت هكي شن الفضيحة يلي كانت حتتسبب فيها ..
شاف لي ساعة يلي كانت تأشر علي العشرة الصُبح هوا من بعد ساعة تقريباً حـ يعقد عليها و تصير مرته وخطيبته قدام الكل .. اي مش يلي يحب يضحي .. هوا ضحى بـ كرامته علي خاطر أسم العيلة و لو جزء بس يطلع من القصة يمشو فيها ..
حاول يخفي كل شي وميخليش وراه أي شيء حتى سبب ضربه ليها برره بسبب أنه طلعت في سيارة صديقتها ..
هكي الحُب يخلينا نديرو حاجات غريبة و يطلع أفعال الرجال ..