عذاب الروح

4

جانا تاني قال لينا بكرا حيجيبو ليكم حاجات العرس كلها كاملة مكملة..

خالتي قالت ليهو دا شنو العرس الكشا مشا دا

قال ليها انتي م دخلك انا بتكلم مع امي واختي

..

خالتي قالت استغفر الله ياربي صبرني..

وفعلا م كذب الصباح قشت عينا من النوم كدا، اشوف مزمل مع فتحي بنزلو في حاجات والشوالات من البوكسي..

مشيت بتكلم مع امي قالت لي عايزة اتكلم مع مزمل

امي ولا كضبت لفحت توبها ونادت مازن على جنب، قالت ليهو يولدي الكلام دا كتير علينا، وانا عايزة اقول ليك عابزين نأجل العرس اسبوع شوية، عندها عمتها وحبوبتها واختها حيجو من البلد الأسبوع الجاي وانا دايراهم يحضرو عقدها، قال ليها خير ياخالتي العقد يكون الجمعه الجاية

مشا ورا فتحي جا عيونو حمر قال ل امي انا قلتا العقد بكرة يعني بكرة م تتطلعو زيتنا بالفارغة..

نادا مزمل قال ليهو العقد بكرة ياها امي وافقت..

امي سكتت وبقت تعاين ل فتحي.. طبعا خالتي من ما سكتوها أمس م فتحت خشمها بحاجة تاني ..

تميت الخميس نهاية اليوم كدا خالتي كانت فالسوق وجات قالت لي م بتمشي مع راجلك غبشا مدي رجليك ديل النحننك...

قلتا ليها نعممممم؟؟

حنة يعني ياخالتي م جادة، امي قالت لي م فيها حاجة في النهاية انتي عروس..

قلتا ليهم يخوانا م تعصرو على كفاية الفيني مكفيني دخلتا جوه وسديت باب الغرفه...

الخميس عدا فلمح البصر.. وصبح الجمعة، كانو آخر يوم فحياتي، طلعت برا لقيت امي وخالتي فقعدت كل صباح خاتين يدينهم فوشوشهم وسارحين، فتحي جاي من الشارع وكان لابس جلابية..

قال لينا أهل العريس عاملين عزومة فطور وبعد الفطور مزمل حيجي يسوقا،

خالتي بعد فتحي مشا قالت اقسم بالله اكتر زول هجمي فتحي، وم منظم، وشغال على كيفو شخطتت بختتك، امي قالت لخالتي، هسي دا عرس شنو دا يخواني، وبعلي من البشتنة..

وانا قاعدة شكلي ولا شكل عروس ولا حاجة..

قاعدة بس وبعاين لابتلفت يمين ولاشمال

، قعدنا فقعدتنا دي لحدي زمن الفطور زول كدا قام يسوي حاجة عشان الفطور ماف، خالتي قالت انتو م جعانين، قلتا ليها شبعانين ذلة ياخالتو اكلي انتي،

بعد الصلاة حقت الجمعة عقدو، جانا فتحي وشكلو مبسوط شديد.. قال لينا مبروك خلاص عقدو بعد ساعة كدا مزمل حيجي يسوقها جهزوها..

امي شغالة تبكي وتقول انا كنت بحلم اعمل لبتي روان عرس يتكلمو فيهو سنة لقدام، بس فعلا هسي عرس بتي يتكلموا فيهو سنة لقدام،، سنة لقدام يافتحي اختك حتكون موضوع الحلة هنا، بكرة لمن يعرفو اننا عقدنا ليها، حيفهموا انو هي عملت غلط ونحنا صلحناهو، يخسي عليك..

مشيت جريت لي عباية وطرحة وسفنجتي حقت البيت زاتها ومشيت منتظرة مزمل يجي..

فتحي قال لي حتمشي كدا؟ قلتا ليهو عادي وين المشكلة ؟؟!

ضحك وقال لي شكلك عروس هظار ساي، قلتا ليهو العرس هو د من كلو زي الهظار كدا

ومشيت قعدتا فالسرير ومنتظرة الزفت التاني دا يجي يسوقني

دايرة اتخارج من البيت دا سريع ومن فتحي وخلقة فتحي

بعد شوية أصوات العربات برا في شكل سيرة ولا شنو...

فتحي طلع ليهو برا وابشر وحركات

جا جوه سلم على امي وخالتي

وعايز يحضني انا زحيت منو خطوتين لورا ومديت ليهو يدي..

نزل راسو وخالاني في اضاني وقال لي بعباية ياعروس؟؟

قلتا ليهو م عندي غيرها.. قال لي ماف مشكلة

مسكني من يدي وقال لي ودعي اهلك..

ودعتا امي وخالتي ولا اشتغلتا بفتحي...

مشيت طلعتا ركبتا فالعربية قال لي انتي عارفة مخططاتها لشهر العسل شنو؟

وانا ساكتة بس ومتكلة على شباك العربية وبعاين في الشارع، قال لي روان؟؟

قلتا ليهو مزمل عليك الله اسكت مني م عايزة كلام...

شايفاهو انصدم ومسك تلفونو وبقا شغال بيهو

وصلنا عمارة كدا وقال لي انزلي، قلتا ليهو هنا

قال لي اي انا مؤجر شقة هنا..

وصلتا ودخلتا جوه وبقيت واقفة فباب الشقة بعد مسافة جا مزمل وقال لي معلش وقفتي كتير وفتح باب الشقة وكانت تحفة مفروشة ب الأبيض مع الاسود

وعاكسين الألوان ب اللون الليموني..

بقيت بعاين وانا حالة ذهول، مزمل مسكني من يدي وانا نطيت، قال لي م تخافي م عايز اهبشك الا انتي ترضي..

زحيت يدي منو ومشيت قعدتا فالسرير قال لي نومي عشان المغرب كدا ننزل على السوق نشتري ملابس ليك.. قلتا ليهو خير

ختيت راسي على المخدة وانا خلاص ماقادرة افكر، نمتا لحدي م صحيت على مزمل وهو بنادي فيني..

صحيت ولقيتو مدنقر على وشي قال لي المغرب جا وفات..

قلتا ليهو بجد؟ قال لي اي والله كدي امشي الحقيهو سريع عشان المغرب زمنو ضيق

مشيت صليت وقال لي بعابيتك دي زاتها ورح يلا

مشيت وركبنا فالعربية ووصلنا المحل واشتري لي تلاتة جلباب كدا وبجامتين وتوب هزاز

ومشينا على جهه ملابس الطلعات، اشتريت فستاني، وأربعة تياب وطقمهم لي ود كلو وانا بعاين بعيوني..

آخر حاجة وداني على جهه ملابس النوم وانا مصدومة وبعاين ليهو قلتا ليهو مزمل نحنا جايين هنا لي.

يتبع