قلتا ليها قصدك شنو قالت لي قصدي واضح، الصباح كنتي فالدكتور شوف عيني دي وسمعت القالو ليك بالحرف الواحد.....
" يعني ضحى متبعاني ولاحقاني على أي مكان انا بمشيهو "
خالتو جليلة قامت وقالت لي الحقيني على غرفتي
مشيت ومشيت وراها وانا جسمي برجف، حاسة في حاجة حتحصل..
قعدت في السرير وخلتني اقعد جمبها، قالت لي يابتي ياروان، انا عايزة اقول ليك كلمتين، انا ام ونفسي جدا اشوف ولد ولدي، ومزمل ولدي واحد م عندي غيرو دايرة اشوف اولادو والعبهم، اي عارفاك بتحبيهو ويحبك، بس عرسي ليهو البتجيب ليهو اولاد، وبقت تبكي، قلتا ليها بس الطب إتطور وانا بسافر برا واتعالج ياخالتو، قالت لي ابوس يدك، دايرة اشوف اولاد مزمل بعيوني قبل م اموت العمر م فضل فيهو كتير هسي يمكن تسافري وتجي تلقيني متا وحتفضلي ندمانة طول عمرك ، اعتبريني امك ياروان..
من ما قالت لي اعتبريني امك مسكتها والدموع فعيوني وقلتا ليها حاضر طيب ياخالتو
يعرس منو؟ قالت لي ضحى.. ضحى البتقدر تجيب ليهو اولاد
انا عارفاهو بحبك وم حيقدر يخليك، بس انتي حاولي كرهيهو فيك
عاينتا ليها مسافة وقالت لي اعتبريني رندا
سكتا مسافة وقلتا ليهو خير بقنعو بإذن الله...
طلعنا برا ومزمل قال لي يلا ورح الزمن اتأخر، طلعتا ومشيت وانا في العربية ساكتة بس لحدي م وصلنا البيت..
مجرد م وصلنا مزمل حاول يتقرب من صديتو، وابعدتو مني هو استغرب فيني وقال لي خير؟
قعدنا ف السرير انا في جمبة وهو في جمبة... وانا مدياهو ضهري، قلتا ليهو بصوت قوي شديد انا م بلد يامزمل انا خلاص بقيت عاقر، طلقني وعرس المرا الحتولد ليك...
جا قعد قدامي ف الارض ومسك يديني وقال لي روان انتي واعية لكلامك؟
قلتا ليهو م تلمسني اول حاجة تاني حاجة دي شكل زول م واعي ولابهظر، وبديت اكورك واجوط
قدر م حاول يهدي فيني م قدر
فالنهاية قال لي جملة مستحيل انساها لحدي م اموت كان واقف جمب الباب وقبل علي وقال لي
" انا ح اعمل البريحك انتي، بس صدقيني م ح اكون مرتاح عمري كلو ياروان"
ودمعتو نزلت وطلع
هنا انا اقوم واقعد حاسة روحي مخنوقة، مسكت المخدة وعصرتها على وشي وصرخت صرخة م ليها نهاية، بكيت قدرتي،
انتظرت مزمل يجي داخل علي جوه الغرفة بس م جا، طلعت فتشت البيت كلو م لقيتو؟!
وين انت يامزمل
لبست توبي وطلعت الشارع، العربية قاعدة بس مزمل وين
دقيت الباب لتسنيم قلتا ليها مزمل دا جا لصابر
"صابر راجل تسنيم وطوالي بقعدو يتونسو"
قالت لي ابدا والله...
دخلت البيت قعدت ف الحوش، وانا منتظرة
الساعة ١٠.. ١١...١٢...١صباحا لسة مزمل م جا وتلفون م برد، الحاصل عليك شنو ياقلبي، وبقيت ببكي بعد مسافة جا داخل وكان ببكي
مزمل كان ببكي، قال لي انا م داير اولاد ياروان والله م داير، انا دايرك انتي تكوني معاي وجمبي، عليك الله م تقولي لي عرس فلانة الفلانية انا بدونك م بقدر اعيش، م بقدر اتخيل اني اكون مع وحدة غيرك، م تجيبي سيرة طلاق في خشمك..
النبي فيك ياروان، كان قاعد لي في الأرض ودموعو نازلة، عايزة امسكو واحضنو على، اتذكرت كلام خالتو واني لازم اقنعو ب اي طريقة واحاول اكرهو فيني
وقمتا منو ودخلت جوه رقدتا في الغرفة التانية...
طلعتا بعد مسافة عاينتا ب الشباك لقيتو لسة قاعد في قعدتو ديك ولسة ببكي، اااااااه ياربي، م بقدر اشوفو ببكي كدا، ياربي اعمل شنو انا..
وانا زاتي بديت ابكي..
ضغطت على قلبي ودخلتا الغرفة ونمت.. صحيت لقيتو مافيش، كان خاتي لي المصاريف حقت اليوم
دخلتا المطبخ عشان اشوفو عمل شايي شربو ولا لا.. لقيتو مشا بدون شاي..
بعد مسافة رسل لي رسالة، وقال لي انا ح أعقد على ضحى بناءاً على رغبتك انتي، بس صدقيني عمري م احبها، وبالنسبة لطلاقك، ولا تفكري اني اطلقك، وانا ح اعرف الزول الملا ليك راسك دا عاجلا غير اجلا استنى وشوفي"
حيعقد عليها خلاص ويجيبها ويسكنها معاي هنا...
اه ياابوي وامي، عاينو الدنيا عذبتني كيف من بعدكم
الحمدلله على كل حال
مشيت رتبتا البيت ونقلت هدومي الغرفة التانية..
وناديت تسنيم وحكيت ليها اي شي، قالت لي بيتك دا تاني انا م بعتبو، وانتي عويرة اقسم بالله م بتفهمي عديل ..
مرت الساعة بعد شوية الباب دقااا... نهائي م كنت خاتة انو دا مزمل لانو عندو نسخة من مفتاح البيت،
لمن المفاجأة انو كان هو وضحى جو، جابها عروس خلاص بقت مرتو وحلالو م قادرة اعاين ليهم مرتين، هي ماسكة يدو
عاينت لمزمل لقيت دمعتو نزلت وكان بحرك فراسو نظام كلو بسببك...
دخلو جوه وضيفتها ووريتها غرفتها، مزمل قال لي دي غرفتك انتي، قلتا ليهو معللش دي العروس الجديدة انا خلاص قدمت....
"يشبه الأمر أن ترفع رأسك عن كتف من تُحب، أن تتخلى مُجبرًا."
يتبع
