عاين يامزمل امك ساقتني معاها و عملت عمل ب الروح ل روان، وأنها تكره اي زول فحياتها.. الفكرة كانت فكرتها، انا وبتي م عندنا ذنب، ومها زاتها م عارفة بالقصة دي للان
مزمل كان واقف صنم وبعاين ل امو قال ليها انا ولدك الوحيد.. بدل م تفرحي لفرحي وتكون مبسوطة عشان انا مبسوط تمشي ياامي تضري مرتي؟
انتي عارفة انا قدر شنو بحبها، مع ذلك مشيتي ضريتيها وعملتي ليها عمل فالروح؟ انتي بتكرهيها للدرجة دي؟ عملت ليك شنو هي عشان م ولدت يعني؟
يعني هي الماعايزة تولد ياامي، امي انتي عارفة انو روان م عندها ذنب فالكلام دا كلو، المشكلة كلها من فتحي اخوها..
امو كانت منزلة رأسها ع الارض وم بتتكلم، ضحى قالت ياخالتو جليلة ورح نفك العمل
ردت ليها ب انو هي م ماشة ولا حتفكو ولا عندها شغلة وران لو عايزة تموت خليها تموت
مزمل ختا يدينو فراسو وبقا يدور وكان بكورك
مشكلتك معاها انتي شنو؟ كنتي ف الاول متقبلاها الحصل شنو ياامي، عيب زاتو بعدا اقول ليك امي
انت م ام
هنا جليلة اتصدمت بكلام مزمل، وقالت ليهو متقبلاها لاني كنت مفتكراها بت ناس وعالمين، بت عندها أسرة زي اي زول وم مقطوعة من شجرة
متقبلاها لاني كنت مفتكراها انضف بت فالدنيا
بس بعدين اكتشفت انها لابت ناس ولا عندها أسرة ومقطوعة من شجرة، وطلعت اكتر بت وسخة وانانية
عايزة تحرمك من انك تكون ابو..
مزمل قال ليها عيدي !
عيدي الكلام القلتيهو؟ م عندها أسرة كيف؟
هنا ضحى اتدخلت وقالت ليهو، فتحي جا يوم شرب معانا شاي المغرب وورانا انو روان دي اصلا م اختو ابوهو كان لقاها مشردة ودايما بتقعد قدام شغلو لحدي م جابها البيت ورباها وتقريبا م كان اسمها روان، بس جابها البيت وغير ليها اسمها وكدا
مزمل اتصدم صدمة تانية الولد مسكين م عرف يعمل شنو بس نزل بركبو على الأرض وكورك ب أعلى صوت عندو، وكان بفكر لو روان عرفت الكلام دا حيحصل ليها شنو..
حنسهم وقال ليهم روان م تعرف بالموضوع دا قال ليهم إذا عندي خاطر عندك ماف زول يوريها..
مسك امو من يدها وركبها العربية وقال لي تفكي العمل العملتيهو دا...
وصلو محل الدجال وقال لي مزمل انو العمل دا م بتفك ب الساهل كدا جيبو جدادة سودا وامك دي اصلا مجدداهو تلاتة مرات يعني شهرين حتى يتفكا..
مزمل قال ليهو شهرين؟
عاين ل امو مسافة وبعداك قال للدجال م ممكن أقل.. طيب روان حتحصل ليها حاجة؟
قال ليهو م معروف انا بفكو زي م قلت ليك وطلعو..
مزمل مشا جاب الجدادة وادها للزول ووصل امو على البيت وقبل م تنزل قال ليها العملتيهو فيني العدو م بعملو خلي انتي امي نزلت ودموعها فعيونها..
مزمل حرك العربية سريع وجاني فالبيت، لقا حالتي ب البلا وخالتي فالبيت ماف، لقاني كلي عبارة عن دم طالع من اي محل فجسمي حتى اضاني سايلة دم
قام بس وجرا بي الدكتور، والدكاترة كلهم مستغربين من الحالة دي ماحصل جاتهم قبل كدا، وقفو لي النزيف الطلق فيني دا وبعد يومين رجعتا البيت..
شوية كدا حسيت اني رجعت احب مزمل تاني بعد م عديت شهور اكرهو، هو كان زي الداسي مني حاجة وانا م عارفاها هي شنو، فيوم وانا راقدة قال لي شوفي منو الجاك......
كانت رؤى اختي واولادها الفرحة الدخلت فيني نستني اي حاجة حصلت لي فالدنيا دي
حضنتها على وبكينا على امي، وسلمتا على اولاد الكتايكت الحلوين ديل..
قعدنا اتونسنا كدا وبعد شوية خالتي جاتنا وتاني فتحنا لينا بيت بكا
مسكتا حضنتا روان بت اختي الصغيرة وحضنتها علي وقلتا عاينو العسل بتشبه خالتها كيف، حسيت ملامحهم كلها اتغيرت كانو فشي غلط بس م اهتميت بالموضوع كتير
بقينا عايشين حياتنا ضحك وونسة، رؤى م وروها بمرضي لانو انا طلبت ماف زول يوريها، بقيت بحس روحي اني كل يوم ماشة فتحسن اكتر من الاول
في يوم وانا قاعدة مع رؤى وخالتي...
بنشرب فقهوتنا قالت لي احكي لي عن مزمل، انا م بعرفو حق المعرفة، عايزاك تحكي لي عنو
ابتسمت، قالت لي شايفاك ابتسمتي😏😉
قلتا ليها هو الزول الوحيد فالدنيا دي البحس معاهو ب الاطمئنان بالسعادة بالفرح ب الأمان 🧡🧡
حتى وانا معاهو بحس روحي مشتاقة ليهو♥️♥️
بحبو حب قدر الحروف الحايمة في بطن الكتب 💛💛💛💛💛💛💛💛💛💛💛!
قلتا ليها مزمل دا الزول الوحيد الوصفو ود الأمين 💛
وقال عنو
اسمر جميل فتان ما بجود بمثله زمان
ملاك في شكل انسان سبحان من صور
عيونه نعسانه فتانه فتاكه
وقامته كالبانه يتهادى لو يخطر
اسمر فى طبعه فريد فات حسنه كل حدود
وسهام عيون السواد عليها مين يقدر
اسمر ياساحر المنظر♥️♥️♥️♥️
....
رسالة من سلوان🧡
لما تجو تحبو حبو ناس بتعرف ربنا، حبو ناس م يقولو وعد غير لما يكونو عارفين إنهم حينفذوه، حبو ناس شايفين روحكم فيها، وتاني وتالت وللمرة المليون حبو ناس بتخاف من ربنا وقريبين من ربنا عشان البخاف ربو مابيعرف يكسر بخاطر زول، ومابيعرف يكذب ومابيعرف يوعد ويخلف ❤️
يتبع ♥️
