صحيت الصباح وكان السبت لقيت نفسي تعبانة شديد، صحيت مزمل وقلتا ليهو الليلة النسوان ديل حيجوني وانا والله م قادرة حاسة نفسي تعبانة شديد، قال لي نمشي الدكتور؟ قلتا ليهو لا م بحتاج عايزة انوم بس، خايفاهم يجو والله..
وعاين البيت م مرتب قال لي ماف مشكلة، مشا ضاير البيت كلو وظبطو قلتا ليهو تعال ارقد انا بقوم على المطبخ بعد شوية..
رقدنا حبة وقدرتا امشي على المطبخ ونظمتو وغسلتا العدة، بعد مسافة كوركت لي خالتي خديجة بالحيطة وقالت لي عندنا جارتنا هنا راجلها اتوفى والله ورح معانا ليها.. قلتا ليها خير
جيت وريت مزمل، قال لي بتقدري ؟ قلتا ليهو بقدر ايوا فشنو هو😂😂😂😂
، مشيت دخلتا الحمام استحميت ولبستا لي عباية عادية بللون الاسود
طبعا شعري م طويل لكن لمن كويتو ف الكوفير راق شوية، المهم لميتو لورا وجيت قعدت جمب مزمل،
لقيتو بعاين لي مسافة قلتا ليهو يااخونا هويي انا ح امشي ل خالتو خديجة عشان نمشي بيت البكا
بعد مسافة لقيتو م منتبه معايي قلتا ليهو سارحح وين انت😂💛
قال لي احساسك شنو وانتي خلاص بقيتي مرتي، قلتا ليهو اجي م اصلي مرتك من قبل شهر، قال لي يعني الحصل أمس دا، قلتا ليهو انت قليل ادب بالمناسبة انا قايمة منك، مسكني من يدي وجراني عليهو، قال لي تفوتيني وين ياحبي وريني بس، وقعدنا في الوضعية دي نتونس كدا لحدي م خالتي خديجة كوركت لي تاني، قلتا ليهو عاين يامزمل جيب فول وطعمية ومِش من الدكان، في سلطة هنا انا بقطعها بالدكوة لمن اجي، قال لي بالمناسبة انا عندي حساسية من الفول السوداني عشان تكوني عارفة، قلتا ليهو خير بعملها بالزيت عادي،
طلعتا ومشيت لخالتو خديجة، وقالت لي انتظري تسنيم دي تلبس، تسنيم جات وبقيت متنحة فيها بس ماشاء الله لون وجسم، انا حقيقي م ركزتا فيها لمن جاتنا لانو كان تركيزي فمحل تاني😂
قالت ل امها البس توب ولا عباية، امها قالت ليها ريحة الدخان دي طاقة فالسماء، حيقولو قمتي من حفرتك وجيتيهم، قلتا ليها م ظاهرة شديد والبسي ليك عباية احسن،
لبست عبايتها وطلعنا عزينا وجينا،
جيت عملت الفطور، وفطرنا انا ومزمل واتونسنا للضهر كدا ونمنا صحينا قريب للمغرب أكلنا قلتا ليهو يامزمل انت م خايف على مها من فتحي؟
ضحك وقال انا خايف على فتحي من مها، قلتا ليهو كيف يعني؟
قال لي كدي قومي اكوي لي قميصي البني عايز البسو بكرة
وكويت لمزمل هدومو
جا الصباح ومشا الشغل.. وانا ياهو بقيت في فترة البكون مزمل ماف بمشي لتسنيم ونتونس العرفتو منها انو راجلها مغترب لكن بجي قريب،
مرو شهرين بالطريقة دي، وانا عندي زي تلاتة يوم حاسة روحي م طبيعية م قادرة افهم مالي طمام على صداع على كسير جسم
فيوم وانا راقدة حسيت ب اني فعلا مشتاقة ل امي لاني طولتا منهاوعايزة اشوفها، بدون م احسن لبستا عبايتي وقفلتا البيت وطلعتا أوقف لي ركشة امشي ل امي اسلم عليها واجي سريع كدا كدا فتحي فالشغل ومزمل بجاي فالشغل، اجي قبل م مزمل يجي
لاقتني تسنيم ف الشارع قالت لي وين ياصحبتي، قلتا ليها ل امي، قالت لي استني، دخلت جو وجات قفلت الباب وقالت لي ورح قلتا ليها ماشة معي قالت لي اي في مانع، انبسطت وقلتا ليها ابدا بس خالتو خديجة، قالت لي أمي سافرت اول امس اختي عايزة تولد وامي عايز تنفسها قلتا ليها خير، وقفنا ركشة وركبنا ووصلنا البيت، حاسة روحي دايرة أجرى ل امي وصلتا البيت، بكورك ياامي، ياامي ماف رد، دخلتا البيت كلو م لاقية زول، دا شنو امي وين؟؟
بكورك لسة، طلعت لي مرت الجيران وسلمت على قالت لي امك دي تعبت والله ودوها الدكتور قلتا ليها كيف يعني، مالا امي؟؟ قالت لي والله سامعة كواريك فتحي كالعادة بعد شوية خالتك جات دقت الباب ل حامد ووداهم المستشفى قلتا ليها ياتو مستشفى قالت لي مستشفى...
اتصلت لمزمل ووريتو، طلعتا ركبتا ركشة ووصلتا المستشفى، اتصلت ل فتحي لأول مرة قلتا ليهو انتو وين فياتو طابق!! اول كلمة قالها لي الجابك شنو يابت الناس، انتي سبب البلاوي دي كلها
خالتي مسكت منو التلفون ووصفت لي، مشيت مع تسنيم ولاقيت خالتي ومسكتها وانا ببكي، قلتا ليها الحصل شنو على امي، واناببكي امي دي كانت كويسة ياخالتو، قالت لي والله يابتي.. قاطعها فتحي وقال لي يازولة الجابك شنو، زحيت يدو مني وقلتا ليها كيف بتسأل الجابني شنو، ناسي انو دي امي زي امك، قال لي م تكوركي عايني الناس ديل بعاينو كيف، خالتي قالت ليهو خليها تكورك وتلم الدنيا دي كلها، لانو من حقها تكورك، إذا اخوها هو السبب في حالة امها، بقيت بعاين ليها وبعاين لفتحي، قلتا ليها خالتو فهميني، قالت لي امك كانت جاياك وفتحي حماها وكورك فيها، وامك فجأة بدون مقدمات وقعت وم عرفنا الحاصل عليها،
قبلتا على فتحي ومسكتو من هدومي قلتا ليهو انت انسان ولا حيوان؟الحيوان م بعامل امو بالطريقة دي، ياخ ربنا بحاسبك يافتحي خاف الله في امك وبقيت بضرب فيهو جو الناس مسكوني منو وقالو لي خالتي دي مستشفى في مرضى هنا م بتحملو الازعاج ممكن تحلو مشاكلكم دي برا، أثناء م مالممرضة بتتكلم وانا بعاين وبنصت لكلامها فتحي وقع فيني ضرب بيدينو، وانا بقيت م عارفة اخت يدي وين في وشي ولا في جسمي عشان احميهو من الضرب، لزاني على الأرض، ووقعتا، لقيت بطني بتألمني بطريقة خيالية، فجأة خالتي بقت تكورك وتقول دم....
يتبع..
