عذاب الروح

18

مع كلمة انتي م تتدخلي دي مزمل تاني ضربها كف قال ليها روان خط أحمر، تاني لو رفعتي يدك على روان قسما اكسرها ليك، وقال ليها ياضحى بت جميلة تلمي القزاز الكسرتيهو د وحدة وحدة، خلااها واقفة وجاني ضماني عليهو شديد قال لي انتي حياتي البهبشك معانا هبشني، مسكتو علي شديد ومشا جوه

غير ملابسو وطلع قال لي عندي مشوار بجي بعد المغرب، قلتا ليهو خير

طلع ومشيت دخلتا غرفتي وماسكة تلفوني ومركبة سماعتي

جاتني ضحى بقزازة كانت ماسكة قزازة فيدها..

بقيت كل مرة برجع خطوتين لورا وبقول ليها دا شنو يابت انتي جنيتي ؟

قامت شلخت يدينها ودا كلو وانا واقفة، بقيت بكورك فيها ودا شنو يابت وهي ولاشغالة بي الشغلة..

وانا خلاص بديت ارجف، وبعد شوية مسكت التلفون واتصلت ب امها قالت ليها الحقيني روان..

وبعداك قفلت تلفونها انا بقيت م فاهمه الحاصل دا كلو، وحاسة دا حلم مستحيل يكون حقيقة

انا واقفة اكتر من نص ساعة وهي واقعة قدامي.. بعد مسافة زول دقا الباب، مشيت جرى فتحتو كانت جميلة وخالتو جليلة ومها

دخلو جوه ولقو ضحى واقعة في الأرض ويدينها مشلخات اول حاجة مسكتني خالتو جليلة ضربتني اكتر من ٦ كفوف انا زاتي م قادرة افهم هي عملت كدا لشنو..

خالتو جليلة قالت لي انا اصلا عارفة انتي وحدة عقربة، يحليلها ضحى بت اختي المسكينة م قدرت تدافع عن روحها، خالتو جليلة قالت لي انا هسي ح اضرب لراجلك يجي ياطلقك يامشينا فتحنا فيك بلاغ..

اتصلت ل مزمل وجا في دقايق بس، اما ضحى فالمسافة دي عقمو ليها الجرح وانا كنت واقفة ف الحوش ومها تعاين لي ساي،

بعد شوية كدا مزمل جا فتح الباب وأول حاجة عملها جا علي وحضني لاني كنت متعصرة على الحيطة ، خلااهم كلهم مستغربين

وضحى مقعدنها ف السرير،

قال لي انتي كويسة؟ هزيت ليهو راسي قلتا ليهو انا م عملت شي والله قال لي يابت انتي م بتوريني انك عملتي ولا م عملتي.. زح مني ومشا على ضحى قال ليها دي شنو الدراما دي، خالتو جليلة قالت ليهو دا شنو يامزمل، م تنسى انو دي مرتك اسألها حصل فيها كدا كيف، قال لي م داير اعرف اي حاجة، لاني العارفو كفاية..

البت دي أكبر كذابة فالدنيا امو قالت ليهو ياولد احترم نفسك ضحى دي بت خالتك قبل م تكون مرتك..

قال ليها البت دي كذابة ودي كلها أمور منها اسألوني انا د،

امو قالت ليهو لو م طلقت روان دي هسي قدامي انا م عافية ليك..

قال لي ادمر بيتي يعني؟ يرضيك ولدك يتخرب بيتو، بعدين انا لو طلقت ح أطلق الرمة بتاعت الدرامات دي..

جميلة ام ضحى قالت ماشة تفتح فيني بلاغ ب إني اعتديت على بتها..

مزمل قال ليها انا ممكن هسي من هنا اوديها المصحة العقلية لانو البت دي الصباح مكسرة لي اوضة...

كلهم بلعو ريقهم، جميلة قالت ليهو انا ح اسوق معي ضحى وم لم تجي ترجعها م حترجع ولاتعتب البيت دا، اما انتي ياروان حسابك عندي قسما اندمك عيشتك وتقولي جميلة قالت..

قال ليها سوقيها احسن زاتو، بعدين شنو انتي بتهددي في روان دي كدا العايزة تعمليهو اعمليهو يازولة"

طلعو كلهم ومشو، جاني مزمل قال لي عملت ليك حاجة البت دي؟

قلتا ليهو لا..

دخلنا جوه ورقدنا وانا جسمي برجف من الحصل قال لي بالمناسبة ممكن تعمل اكتر من كدا البت دي مجنونة اقسم بالله اسأليني منها انا.. كلو بسببك ياروان

كلو بسببك

بعد كم يوم من الحصل رجعنا طبيعين..

عادي..

وعدا كم شهر وماف أخبار من ضحى وعايشين انا ومزمل سمنة على عسل لدرجة انو بنا لينا اوضة وقدامها برندا، قدر م اسألو ديل لشنو بقول لي مفاجأة ..

في يوم وانا قاعدة فجأة كدا حسيت روحي زهجانة شديد.. قرفانة من الدنيا دي حاسة روحي مخنوقة.. دايرة اصرخ م قادرة، م عارفة اعمل شنو.......

فجأة بقيت ابكي بدون سبب وادعك في حلقي..

يتبع