مزمل بعاين ل خالتي، وخالتي بتعاين لمزمل..
مزمل وهو بقطع الكلام قال ليهو كيف فالروح ي ياشيخنا؟
قال ليهو يعني لو طلعنا العمل روحها حتطلع معاو وكمان عاملين ليها سحر تفريق وكره، يخوانا البت دي الحقوها بتموت والله .. مزمل قال روان حتبقى كويسة وم حتجيها اي عوجة
الشيخ قال ليهو ايوا لكن الا اذا الزول العمل، العمل فكاهو، كدا روان حتبقا كويسة
رجعنا البيت وانا لاطايقة خالتي ولاطايقة مزمل قرفانة منهم الاتنين..
مرت الايام وشهر واتنين وتلاتة وماف علاج وانا خلاص بقا مافيني حيل سافرنا اي ولاية قالو فيها علاج والحال في حالو.... وأي شيخ بقول كلام براهو تعبتا من الحياة وحسيت خلاص دي اخر ايام لي فالدنيا بقيت بستغفر وبدعي ربنا يرزقني حسن الخاتمة.. وانا قاعدة في مصلايتي جاني مزمل قعد جمبي وباسني فراسي قال لي انا عرفت العمل ليك العمل منو، ضربتها فراسي ولقيتها دي ضحى..
ختيت يدي فخشمو وقلتا ليهو م تسئ الظن فالناس ربنا بحاسبك، م عشان كم موقف حصل معاها يبقى خلاص دي هي... م تتعلم تسيء الظن فالناس يامزمل، وبعدين دا الربنا كاتبو لي وانا راضية بقضاء ربنا..
فجأة مزمل قام على حيلو وقال لي انا م مسيء الظن في زول لا انا متأكد تماما انو دي الوسخة دي، مسك التلفون اتصل على ضحى قال ليها اجهزي انا جاي اسوقك..
بقيت بعاين لمزمل وبحاول افهم هو بفكر فشنو..
طلع ولاحتى قال لي طالع..
جا بعد ساعة وداخل معاهو ضحى، قمتا عليهم وكان ماسكها شديد عاصرها من يدها، هي بتقول ليهو مزمل انتي بتوجعني، فكني يامزمل 💔
زحيت يدو من يدها وقلتا ليهو مزمل بطل، ماف داعي تعاملها بالطريقة دي
مزمل قال لضحى شايفة؟؟
شايفة البت الانت ضريتيها وخربتي ليها حياتها، لسة راتية عليك
م قادر اصدقك، انتي قلبك دا شنو؟ وريني هسي
كان بمشي وبجي فوقها وهي وخاتي يدو فراسو ودموعو نزلو.. قال ليها عليك الله ياضحى لو عملتي العمل دا انتي فكيهو عليك الله انا و بقدر اعيش من دون روانن والله، والله م بقدر
ونزل رجلينو على الأرض وبقا يبكي، شالت شنطتها ودخلت جوه.. عاينتا لمزمل ودخلت جوه انا كمان..
مرت الايام وانا مع ضحى فبيت واحد كنت بعاملها احسن معاملة لاني بقول خلاص اني مفارقة الدنيا...
هي شوية شوية بقت تاخد وتدي معي فالكلام..
يوم قاعدين انا وهي ومزمل وراجل خالتي، وخالتي، بنتونس كلنا...
عايزة اقوم اجيب ليهم القهوه، وقعت من طولي،وم وعيت على نفسي الا وانا مرقدة فالمستشفى وبسأل
عندي شنو؟ وبسأل مزمل وين؟
جاني مزمل وزي الكأنو ببكي قال لي حمدلله على سلامتك، لو كان حصلت ليك شي م كنت ح اعرف اعيش كيف، الحمدلله انو هي دوخة عادية وم حصل ليك شي
خرجوني فنفس اليوم.. وانا راقدة في الغرفة كدا جاتني ضحى وكانت منزلة رأسها وقعدت فالأرض، قالت لي روان انا لو طلبت منك تعفي لي بتعفي لي؟
قلتا ليهو على شنو ياضحى؟
قالت لي انا والله م عملت عمل لزول والله انا م كعبة للدرجة دي صح انا كرهتك لانو شلتي مزمل مني وكمان حباك شديد، مع انو انا بحبو اكتر مما تتصوري بس كنت بعمل ليك مشاكل عمري م فكرت اعمل ليك عمل.. ياروان انا عايزاك تعفي لي لاني م منعت امي وخالتو جليلة وهم المشو ضروك...
قعدتا فنص السرير، وبقيت بعاين ليها مصدومة، والصدمني اكتر مزمل كان فالباب
جا مسكها من شعرها وقال ليها انتي لسة م خليتي كذبك دا؟
قلتا ليهو مزمل اقيف م تهبشها، لأول مرة ضحى لزت مزمل وقالت ليهو ماف شي بخليني اكذب.. انا هسي بوري فيها عشان تلحق نفسها، العمل عملوهو عند فلان الفلاني، وانا بمشي معاكم لو شنو وشنو ونفكو...
مزمل ختا يدينو فراسو وقال م قادر أصدق، م قادر والله،
مزمل مشا مع ضحى محل الزول العملو عندو العمل، وحنسو عشان يفك العمل، مزمل م قدر يتفاهم مع الزول نسبة لانو لغتو م مفهومة بس الفهمتو ضحى انو السوا العمل يجي يفكو، وم حيتفكا الا بضبيحة روح...
مزمل جري مشا بيت امو وكان بكورك ليها من الباب، جاتو جارية وقالت ليهو فشنو مالك بتكورك المات منو!!
قال ليها انتي منتظرة يعني اجي اقول ليك روان ماتت صح؟؟
خالتو جليلة كان بتعاين ل ضحى نظام وريتيهو؟!!
قال ليها تلبسي توبك دا وتمشي معاي للزول العملتي ليهو عمل لروان وتفكيهو..
خالتو جليلة ضربت صدرها وقالت ليهو تتهم امك؟
مرتك خربتك وخلتك تشك ف امك يامزمل؟، ربيتك وتعبت فيك لحدي م كبرت وكملت نص دينك جاي هسي تقول انا عايز ادمر مرتك؟
مزمل بقا مخو جايط يعاين ل ضحى ويعاين ل امو، مسك ضحى وخنقها وقال ليها عارفك كذابة، وخنقها لحدي م خالتو جليلة ختت يدينها فخشمها، اما جميلة أم ضحى جات تكورك من جوه وتضرب في جضومها، وبتقول لمزمل عايز تقتل لي بتي؟
فكها، اصلا انت حياتك وحيات مرتك دي معكسة بسبب امك الواقفة دي بتي م عندها دخل فالحكاية..
جميلة عاينت ل اختها وقالت ليها، عايزين يقتلو بتي قدامك وم عايزة تتكلمي وتقولي الحقيقة، بس انا ح اقول..
عاين يامزمل امك ساقتني معاها و عملت عمل ب الروح ل روان، وأنها تكره اي زول فحياتها.. الفكرة كانت فكرتها، انا وبتي م عندنا ذنب، ومها زاتها م عارفة بالقصة دي للان
مزمل كان واقف صنم وبعاين ل امو..
يتبع
