في يوم وانا قاعدة فجأة كدا حسيت روحي زهجانة شديد.. قرفانة من الدنيا دي حاسة روحي مخنوقة.. دايرة اصرخ م قادرة، م عارفة اعمل شنو.......
فجأة بقيت ابكي بدون سبب وادعك في حلقي،
زي الفي حاجة خانقاني، م قادرة ياربي، م قادرة امسك التلفون واتصل ل مزمل بقيت بكورك وحاسة صوتي م طالع مني..
بقيت بقرا في أية الكرسي في سري لانو خشمي خلاص تقل، قريتها مرة ومرتين وتلاتة
ف النهاية الخنقة راحت.. حسيت ب كانو كان خانقني زول وفكاني،بقيت بتلفت زي المجنونة وبستغفر وجسمي كلو برجف، مسكتا التلفون وقلتا لمزمل تعال قال لي انا حاليا في اجتماع برجع ليك، كوركتا فيهو وقلتا ليهو تعال اسي!!!!!
فعلا جاني وقال لي في شنو ؟
قلتا ليهو مالي، قال لي حاسة بحاجة انتي، لونك دا مالو مخطوف كدا؟ يبت مالك بترجفي..
قلتا ليهو مزمل انا م تمام، وحكيت ليهو بالحصل لي وم صدق قال لي دي هلوسة منك لأنك براك.. ع العموم عشان انا اصلا من زمان م داير اقعدك براك بنيت الاوضة والبرندا ديل لخالتك وراجلها، تجي تكون ليك زي امك، و تقعدي معاها النهار كلو تتونسو مع بعض..
ابتسمتا ليهو بس جواي م مبسوطة، لي ياروان م مبسوطة دي خالتك اخت امك يابت..
قمنا من جمبو ودخلتا استحميت وطلعت، قلتا ليهو مزمل وديني الدكتور انا والله م كويسة، قال لي عندك شنو..
تاني كوركتا فيهو وقلتا ليهو مزمل انت لي كلامك كتير كدا، وديني الدكتور يعني وديني، انا بعرف اقول ليهو شنو..
سكت مسافة قال لي لا بالجد انتي عيانة البسي ورح
قفلنا البيت وطلعنا دخلتا الدكتور وبقيت بشكي ليهو عن الحصل لي قبيل، قال لي شكلك زعلانة جاتك غضة قلتا ليهو لا بالعكس طولت م زعلت قال لي كدي طيب افحصي اشوف عندك، فحصتا وجيت والنتيجة كانت نضيفة، الدكتور اتحير، ومزمل قال لي يمكن دي أوهام منك.. اتجاوزت كلام مزمل، وقلتا للدكتور يعني انا هسي م عندي شي
قال لي والله شوفي والله ياها النتيجة نضيفة..
قال لي والله ياروان انتي م عندك اي حاجة شكلها دي أوهام منك، مرات الزول لمن يمر بفترة مشاكل وكدا بتأثر عليهو وكدا
قال لي حاولي ابعدي من التوتر وكدا واقري قرأن وم بتجيك الا العافية تاني
قمنا منو وركبت فالعربية، أول م ركبت حسيت بصداع ماقادرة افتح عيوني ماعارفة الحاصل لي شنو، وسامعة صوت مزمل بعيد وهو بنادي فيني ياروان وم قادرة افتح خشمي..
بعد مسافة رجعتا كويسة والصداع كأنو م جاني
مزمل قال لي نمتي ف المسافة دي، قلتا ليهو صاحية
قال لي عيونك مغمضة وبنادي فيك مافي رد، قلتا ليهو انا سمعتك بس م قدرتا ارد
قال لي سمعتي شنو؟ قلتا ليهو ياروان
قال لي انتي مالك ياروان عليك الله م تخوفني، قلتا ليهو مزمل انا زاتي م عارفة مالي من الصباح حاسة روحي م طبيعية
قال لي نمشي دكتور تاني..
وفعلا مشينا كم دكتور وكلهم بقولو نفس الشي انو انا م عندي اي شي..
جات خالتي وسكنت معانا، بقيت م بطيقها وم كنت عايزاها،
بقت خالتي كل يوم بتسوء اكتر من الاول
بقيت كل مرة تحصل لي حاجة زي دي بستشهد وبقول دا آخر لي يوم فالدنيا، كنت ببعد من مزمل، بقيت بكرهو...
م بحب اشوفو ولااقرب منو، هو كان دايما بقول لي مالك اتغيرتي.. كان بزعل شديد وانا م جمبو
بقيت بكره البيت كلو وم طايقة زول بقيت بطلب الطلاق من مزمل كتتير وهو كان برفض.. حياتي اتقلبت رأس على عقب، بقيت م عارفة الصح من الغلط...
يوم مزمل هايج وزعلان شديد، شالني وركبني فالعربية بالغصب، ومعانا خالتي، وانا بسأل فيهم موديني وين؟
وكنت بصرخ وبكورك في العربية ف النهاية وصلنا بيت كدا.. دخلنا لقينا نسوان كتار متقعدات في كراسي وجوه في صوت رقية
انتظرنا لحدي م الدور جانا وخشينا.. أول ما الشيخ شافني كان بقول لا إله إلا الله...
انا عايزة اطلع مسكوني وقعدوني في الأرض والشيخ كان برقي انا هنا دخلت في حالة تانية بقيت م طبيعية اشيل واستفرغ، وبكورك، بعد م الشيخ انتها وانا رجعت لوعيي، الشيخ قال ل مزمل الزولة دي عاملين لي عمل فالروح..
مزمل بعاين ل خالتي، وخالتي بتعاين لمزمل..
مزمل وهو بقطع الكلام قال ليهو كيف فالروح ي ياشيخنا؟
قال ليهو يعني لو طلعنا العمل روحها حتطلع معاو.....
يتبع
