ختيت التلفون وبقيت م قادرة اتنفس حاسة بضيق شديد، اوريها لمزمل ولا اعمل شنو..
مها صلت وجات لقتني مضايقة قالت لي فشنو ياقلبي مالك مضايقة؟ في حاجة واجعاك قلتا ليها مها انتي.. قاطعني مزمل وهو بقول ليهم ورحكم يخوانا سريع عشان انا عندي مية شغلة تاني
مها حتى م جات وقالت لي عايزة تقولي شنو قلتي، مشت طوالي وداع م ودعتني
قمتا اقدمهم ف الشارع لقيت ضحى عايزة تركب قدام قلتا ليها مش مفروض خالتو جليلة تركب قدام لانها امو ولأنها الكبيرة، خالتو جليلة ردت علي بدلها وقالت انا مرتاحة ورا، مزمل كان بعاين وهزا لي راسو نظام م تزعلي، ودعتهم ودخلتا جوه
مشيت نظمت البيت من خالتي، وجاتني خالتي قالت لي انا بكرة بمش، قلتا ليها وين؟ قالت لي البيت يابت انا اصلا قعدتا احضر الكرامة، بعدين اخليكم انتي ومزمل على راحتكم قالت ليها خالتو م تمشي وبكيت، اصلا انا عايزة سبب ابكي بيهو، وقلتا ليها م تمشي عليك الله
م سمعت كلامي ولملمت هدومها ورقدت
مشيت دخلت غرفتي استحميت وقلعتا الهدوم الكنت لابساها ولبست لي بجامة تلت إربع مخططة ابيض ب اسود لفلفتا شعري قعدتا في السرير وانا بفكر في فتحي ومها وهم عايزين يصلو لشنو؟
لي هم عملو كدا؟؟
قعدتا فالسرير بفكر لحدي م نمتا صحيت بصوت مزمل وهو بهرج فالتلفون
وبقول والله م اخليك انت اصبر لي بس..
مشيت وقفت جمبو وبحاول اهدي فيهو قفل التلفون وجدعو مشيت جبتا ليهو موية
شربها وقلتا في شنو احكي لي سكت مسافة قلتا ليهو خير طيب تعال ارقد..
جبتو علي ورقدتو فرجليني وبقيت بمشي يديني على راسو، حسيت التوتر خف شوية.. نام
بقيت على الوضعية دي لحدي م بالجد حسيتو نام
رقدتو فالسرير، ورقدتا جمبو وحضنتو..
صحينا الصباح وخالتي قالت ماشة قدر م حاولت امنعها م قدرت، مزمل قال ليها اصلا انا طالع الشغل ورح اوصلك
ياروان اكوي لي قميصي الكبدي..
مشيت كويت ليهو قميصو الكبدي وودعتا خالتي وطلعو
بقيت قاعدة فالبيت وبفكر أوري منو بعاميل فتحي ومها..
اتصلت ل تسنيم وجاتني " طبعا تسنيم حامل في السادس"
حكيت ليها اي ي وقلت ليها مها دي دايرة أدب
أثناء م بنتكلم كدا جات ضحى ...
بعاين ل تسنيم وتسنيم بتعاين لي، قلتا ل تسنيم دي الجابها شنو ، ودخلت كيف اصلا؟
تسنيم قالت لي شكلي خليت الباب فاتح
مشيت قلتا ليها خير؟؟
قالت لي م بتقولي لي اتفضلي يعني يخسي عليك ياروناا وضربتني على كتفي ودخلت جوه
دخلت غرفتي ورقدت ف السرير ود كلو انا وتسنيم مصدومين فعمايلها دي
وقالت لي انا الكان مفروض اكون راقدة هنا بدلك بس انتي فررقتي بيني وبين مزمل عشان كدا م حتعيشي سعيدة عمرك كلو، انتي عارفة انو هو كان بحبني اكتر م تتصوري
لدرجة هو قال لي م ترجعي الدبلة
بقيت بعاين ليها وبعاين للدبلة الفي يدها وانا في راسي الف سؤال !!!!!!!!!!!
وتسنيم قالت ليها ضحى بطلي م تخربي للبت بيتها
ضحى قالت ليهل هي خربت حياتي كلها يعني شنو لو بيتها اتخرب.
وكانت بتشيل وترمي فالكلام وانا واقفة وبعاين ليها وبفكر في مزمل معقولة يكون بحبها للان، ولي م خلااها ترجع الدبلة
يعني هو لسة خاطبها؟!!
جاتني وقالت لي السعادة البتبني على حساب طرف آخر عمرها م بتدوم
وانتي بنيتي سعادتك على حسابي انا وصدقيني حيجي يوم وتفترقو ويكون مزمل من نصيبي..
طلعت وتسنيم كانت واقفة تعاين لي وقالت لي اهدي م تشتغلي بيها بتتكلم ساي
جات قعدتني وادتني موية قلتا ليها وانا صوتي مبحوح، يعني انا ياتسنيم، فرقت بين اتنين بحبو بعض؟
قالت لي انتي عويرة؟
مزمل لو بحبها كان اختارك انتي؟ كدي بالعقل كدا
قلتا ليها م رجعت ليهو الدبلة ولاحاجات الخطوبة معناها لسة مخطوبين؟
انا ماقادرة افهم ياتسنيم
أثناء م تسنيم بتهدي فيني جا مزمل داخل
الخلاني مستغربة م من عوايدو يجي بدري كدا
سلم علينا ودخل الحمام، تسنيم قالت لي خليك هادية واتكلمي بهداوة م تتنرفزي عشان انتي عارفة مزمل م بحب الكواريك، انا ح امشي اخليك م تعملي حاجة تخربي بيها بيتك
تسنيم طلعت وبقيت قاعدة وانا ظاهر اني مخنوقة، جا طالع من الحمام وظاهر على وشو انو غضبان شوية..
جاني قال لي مالك قاعدة كدا؟
قلتا ليهو ماف شي
قال لي تسنيم دي مالا مشت سريع؟
قلتا ليهو ماشة عندها كم شغلة
سكتنا مسافة
قال لي مالك ياروان م على بعضك؟
قلتا ليهو م عندي شي
قال لي م عندك شي م عندك يازولة من الصباح انا بسأل فيك وانتي بتجاوبي م عندك شي مع انو انا متأكد عندك، النكد دا انا م فاضي ليهو عندي مية مشكلة في راسي خلاص تعبت من الدنيا دي انا ياخخ
وقفتا عاينت ليهو مسافة وجري مشيت على الغرفة التانية وقفلتها علي بكيت قدرتي وقلتا مزمل اتغير م كان كدا ياربي كلام ضحى صاح وانو نحنا حنفترق...
يتبع
