عذاب الروح

15

قعدنا في الصفرة وكان بعاين لي خاتي يدينو تحت حنكو ومايل راسو وبعاين لي بس انا من الخجل ما عرفت امشي وين ، قلتا ليهو مزمل بطل حركاتك دي الناس بعاينو لينا..

قال لي خليهم يعاينو راجل ومرتو.. قلتا ليهو والله انت

طلبنا بيتزا نسبة لاني بحبها شديد، وبديت اكل لاني جعانة😂 م اتغديت

اكلتا اكل، مزمل وقف اكل وبقا يعاين لي، قال لي دقيقة خليك في الوضعية دي، فخشمي في اكل وماسكة فيدي برضو، طلع التلفون وصورني قال لي كل م اشوفها اضحك..

قلتا ليهو مزمل

قال لي خلاص معلش تاني م بصورك اها أكلي براحتك..

اكلتا لمن حسيت م قادرة اتنفس الحمدلله،

مزمل م اكل كتير لانو هو اصلا شبعان من البيت، مشا حاسب الكاشير وجاني قال لي تاني نمشي على وين..

قلتا ليهو البحر، قال لي بالليل دا قلتا ليهو ايوا ورح هناك نتونس..

مشينا وصلنا وأول حاجة عملتها قلعتا الفلات من وانا في العربية..

وشنطتي كمان ختيتها فالعربية، نزلنا انا ومزمل كان ماسكني وانا متكلة في كتفو وماشين..

قعدنا في كراسي ف البحر كدا، في المياه السطحية دي رجلينا نصهم في البحر وانا كنت بلعب بالموية زي الشافعة..

قال لي عقبال م نجي هنا ب أولادنا قلتا ليهو أولادي م بدخلهم البحر بري بغرقو

ضحك فيني وقال لي تفكيرك دايما د بقع ودبغرق وم بعرف اتفائلي شوية

ضحكنا مسافة وقلتا ليهو ماشاء الله في ناس..

قال لي انتي قايلة البحر دا محجوز ليك براك😂

صريت وشي وعملتا روحي زعلتا من احراجو قام وقف على حيلو وقرب علي وباسني كالعادة..

جا زول من ناس الأمن ديل😂😂 قال ليهو يااستاذ حاجات زي دي ممنوعة وفي محل عام زي دا الحاجات دي سكتها طويلة وبتوديكم للحرام وغير كدا محاكم وحاجات تانية ،

مزمل قال ليهو بتقول في شنو يااخونا دي مرتي، ، قال ليهو معلش بس حتى لو مرتك د مكان عام

بقيت بعاين لمزمل وانا الخجل كاتلني من الحصل،

قلتا لمزمل ورح انا م قاعدة ولا ثانية،

قال لي انتي عويرة؟ لو قمنا كدا حيقول انو بالجد فشي غلط، قلتا ليهو مزمل انا تاني م بقدر اقعد اكتر من كدا يلا روح..

قمنا وبتاع الأمن كان بعاين لينا لحدي م ركبنا العربية، مزمل نزل قزاز العربية وداس بوري لمن بتاع الأمن أتلفت علينا باسني، ورفع ليهو يدو الفيها دبلة، نظام مرتي وببوسها في اي محل، بتاع الأمن رفع يدو لمزمل وضحك لانو مزمل حركاتو حقات شفع 😂😂