أثناء م انا بدخل في الشنطة حقتي طرحتي وقعت..
جا فتحي طالع من الحمام مديت ليهو يدي عايزة اسلم عليهو
قشطني كف،جا مزمل من برا ولزاهو قال لي كيف تمد يدك عليها؟
امي جات من جوه وبتسأل في شنو وانا بعاين لفتحي ودموعي فعيوني، مزمل قال ليهو فشنو هسي؟ ضاربها لي؟
فتحي زحا يد مزمل منو وقال لي يازول انت ديوث؟
م شايف انو الطرحة دي نازلة من شعرها؟
مزمل قال ليهو طرحتها دي وقعت منها وهي جوه البيت، فتحي نزل راسو وعايز يمشي يدخل جوه، مزمل قال ليهو انت زول مريض صدقني، المرة دي مريتها ليك بس لو رفعت يدك عليها بكسرها ليك، وح انسى انك صحبي شديد، ويلا ياروان
قلتا ليها وين يامزمل؟ قال لي البيت دا م مفروض تقعدي معاهو في بيت واحد لانو مريض، قلتا ليهو امي م سلمت عليها، قال لي سلمي عليها وانا منتظرك برا، قلتا ليهو بس يامزمل... مشا وم خلاني أتم كلامي
سلمتا على امي وعايزة أقعد كدا قالت لي امشي مع راجلك كلامو صح، قلتا ليها أمس انا.. قاطعتني وقالت لي انا بجيك، انا وخالتك بنجيك ونقعد معاك يلا امشي..
مرقتا وانا ببكي وركبتا فالعربية، وبقيت متكلة على الشباك وببكي، قال لي روان؟
م رديت
تاني ناداني لمن م رديت وقف العربية وقال لي م تبكي انا م بستحمل اشوف دموعك
قلتا ليهو مزمل انا لي حياتي كدا؟ رغم البحصل والحصل انا لسة متمنية فتحي يسمعني كلمة طيبة، لا اتعمل لي عرس زي الناس بسببو، ولا رحول زي اي بت، برحلوها من بيت أهلها كمان بسببو..
انا يامزمل.. قاطعني ببوسة فخدي وقال لي الحلو دا م يستاهل يبكي، وم تشيلي هم، امك حتجي وتقعد معاك المدة الانتي عايزاها، قش لي دموعي وقال لي انا تاني م عايز اشوف دموعك، وفتحي خسران هو، انتي اختو مفروض يفتخر بيك بس هو خسران خلينا منو، نحنا من يوم الليلة عايزين نبدأ حياة جديدة عشان عايزين ينورنا بيبي حلو وشايل من ملامحك وملامحي، خجلتا ونزلتا راسي وقلتا ليهو مزمل اتحرك..
دور العربية وشغل اغنية ل ود الأمين بتقول 💛
" ياريتني لو اقدر اقول فيك الكلام الما انكتب
واجلي المقاطع بالذهب
وافرد صباح حسنك وشاح
يمسح عذاب عمري المسطر باللهب
بريدك"
هنا قبل علي وقالها وفتح يدينو وكورك انا كنت مقبلة عليهو وغازة كوعي في قزاز العربية وبكورك فيهو ببعمل بينا حادث..
لحدي م وصلنا بيت كدا عادي شديد وقدامو شجر
عاينتا ليهو نظام دا البيت، قال لي صح بسيط وم زي بيت ابوي بس بنيتو بحب والله 💜💜
