.سنة كاملة انا مرقدة في مستشفى ماف زول جا مرة على ساي
وغير كدا انا اجهضت ولد ولدهم، كان يجو ويشوفوني، امي ماتت لحدي هسي ماف زول رفع لي تلفون ساي
لي لي؟ انا عملتا ليهم شنو اصلا؟ وريني بس
وبكرة جايين لي اصلا لا يجو ولا يجو
ولابهموني اصلا..
زحا مني وقال لي لو م بهموك مالك لايماهم، على م اعتقد بقولو اللامك دارك ولاشنو
قلتا ليهو مزمل انت م شايفهم اتلومو؟
قال لي غلطانين والله وشديد كمان، بس هم م كعبين زي م انتي متصورة
قلتا ليهو مزمل اهلك كعبين
وختيت فتيل الريحة من يدي ومشيت على خالتي، قالت لي مالكم هايجين، قلتا ليهو اتخيلي بدافع ل اهلو وهو عارفهم غلطانين، قالت لي م تبقي كعبة رندا م ربتك كدا حتى لو غلطو عليك سامحيهم..
قلتا ليها أسامح منو ياخالتو؟؟
خالتو ديل هم اصلا بكرهوني، انا امشي اتعامل مع زول وعارفاهو بكرهني؟؟
قالت لي احترميهم عشان راجلك دا م مقصر منك
قعدتا اجوط واكورك، مزمل كان سامع كل جوطتي بس م قام علي، طلع جاب الخروف وجاب لينا معاهو اكل جاهز..
خالتي طلعت عزمت نسوان الحلة الكرامة
وجات طوالي أكلت ونامت..
نمتا في الصالة عشان انا زعلانة من مزمل، جاني زي الساعة ٢ صباحا كدا وكان قاعد في الأرض ومتكل على السرير، قال لي انا مشتاق ليك شديد ورح ننوم جوه، عاينتا ليهو وقبلتا منو الجهه التانية، قال لي روان انا بتكلم معاك وعندي كلام عايز اقولو ليك..
قلتا ليهو عندك كلام قولو هنا،، قال لي عيب خالتك بتسمع وغمز لي، ضربتو بالمخدة وقلتا ليهو بطل تفاهه..
شالني وانا بقول ليهو نزلني وهو م شغال بي الشغلة، وداني غرفتنا، وكان بتكلم معي كلام كتير وانا من الزعل سرحانة في محل تاني
كان بقول لي بكرة لمن يجو اتعاملي معاهم عادي..
عاينتا ليهو وقلتا ليهو بعد العملوهو دا؟
قال لي امسحيها لي في وشي..
بحركاتو الكان بعملها لي اتجاوزت اي حاجة وبقيت مركزة معاهو واتضحك واتبسم.....
صحيت الصباح متأخرة لأننا ساهرنا عاد، لقيت مزمل ضبح الخروف ومعاهو رجال الجيران..
وبعد مسافة جوني خالتو خديجة وتسنيم ونص نسوان الحلة، نضفو الخضار وعملو اي حاجة مفروض تتعمل...
"العز جيران" 💜
قريب الساعة ٢ كدا جو خالتو جليلة ومها ومعاهم ضحى جو...
جوني جوه وسلمو علي وكان لابسين الدهب الماخمج وضحى دي لابسة فستان سهره عديل..
خالتو جليلة قالت لي قالو لي امك اتوفت البركة فيكم..
عاينتا ليها بعد مسافة وقلتا ليها البركة في أمة محمد
ضحى قالت لي اجهضتي صحي؟
هسي مزمل لو كان عرسني كنت ح اكون محافظة وحيرصة على انو ولدنا م يجيهو شي..
قلتا ليها قدر الله وم شاء فعل
جاتني مها قعدت جمبي وقالت لي وجعني ليك والله ياروان وكانت ماسكة يدي، قالت لي طبعا انا سافرت من ٧ شهور عشان الشغل، انتي عارفة شغلنا سفراتو كتيرة كيف قالت لي لكن والله ولايوم زحيتي من بالي ودايما كنت بسأل منك مزمل وكان دايما بتصل لي فيديو وانتي بتكوني نايمة.. والعملو فتحي فيك بالغ فيهو والله.. قلتا ليها م بتقصري والله
خالتو جليلة مسكت مها من يدها وجرتها..
ضحى قامت تحوم فالبيت ودخلت غرفة النوم وانا ملاحظة ليها..
جاتني تسنيم وورتني في اضاني انو فتحي جا وقاعد برا، انا هنا قلبي بقا يضرب واتجمدت فمحلي
قلتا ليها انتي جادة قالت لي اي والله..
بعد مسافة جا مزمل وجا معاهو فتحي انا بقيت بعاين لمزمل وفي عيوني الف سؤال
جاني فتحي وقرب على شديد افتكرتو حيضربني بس باسني فراسي وقال لي حمدلله على السلامة...
بقيت بسأل و في نفسي وبعاين ل فتحي ومزمل ونهائي م أديت رد فعل..
فتحي جا قعد جمبي وقال لي اسف ياقلبي عارف روحي اتلومتا معاك كتير فالدنيا دي وانا هسي بعتذر ليك قدام الناس ديل كلهم، هسا بقا م عندنا غير بعض نسند بعض، نقوم ونقع مع بعض، خجلان اطلب منك السماح بس لو بتقدر...
من دون م احس مسكتو وحضنتو علي قلتا ليهو عشا البايتات اصلي من قمتا في الدنيا دي بريدك، ورغم العملتو فيني لسة بريدك، وزي م قلتا م عندنا غير بعض ياحبيبي يا اخوي
واصلي مسامحاك 💜
بكينا وقمنا وخيتنا للضيوف واتغدو طبعا م سلمت من مطاعنات خالتو جليلة وضحى، مها كانت بتحاول تسكت فيهم بس لا،
اتغدو وطلبو من مزمل يوصلهم مزمل قال ليهم بعد المغرب
فتحي ودعني وطلع
البيت شوية شوية بقا يفضااا مها والناس كلهم قامو يصلو..
عايزة اتكي على السرير اشوف تلفون بعمل زن زن
وانا متأكدة تلفوني جوه غرفتي، مسكتا التلفون وكانت رسالة من زول مسجل ب My Love
الرسالة كان مكتوب فيها
" رايك شنو فتمثيلي ياحبي حقو اخد جائزة نوبل فالتمثيل صح؟ ، والمتخلفين ديل صدقو 😂 كمان قال بكت قال عشا البايتات انا م قلتا ليك روان دي عويرة وبتصدق سريع يعني الحكاية م عايزة مجهود كتير، إن شاء الله تكوني مثلت زيي واحسن"
ختيت التلفون وبقيت م قادرة اتنفس حاسة بضيق شديد، اوريها لمزمل ولا اعمل شنو..
مها صلت وجات لقتني مضايقة قالت لي فشنو ياقلبي مالك مضايقة؟ في حاجة واجعاك قلتا ليها مها انتي.....
يتبع
