أوهام الحب الوردية

الفصل الثلاثون

ذهب محمد إلى منزل زوجة أبيه وسلم عليها واحتضن شقيقته قائلا:

-"أنا عايزك تخلي بالك من نفسك ومن طنط جميلة لحد ما أرجع من السفر".

سألته سمية باستغراب شديد مستنكرة فكرة سفره إلى العاصمة "القاهرة" أثناء فترة علاج شقيقة زوجته حيث إنه من المفترض أن يقف بجانب شمس في هذه الفترة الصعبة:

-"هو أنت يا محمد لازم تسافر؟ يعني شمس دلوقتي محتاجاك تكون جنبها وأظن أن الأولى عدم سفرك للقاهرة الفترة دي وخصوصا أنك ناوي تقعد هناك لفترة''.

تجهمت ملامح محمد بعدما جلبت أخته سيرة شمس ولكنه سيطر على انفعالاته ورد بهدوء:

-"أنا لازم فعلا أسافر القاهرة يا سمية؛ لأن خالتي اتصلت بيا وطلبت مني أساعدها في المشكلة اللي أحمد واقع فيها وكمان أنا لازم أشوف عمرو صاحبي لأنه هو كمان عنده شوية مشاكل مش راضية تحل عنه من ساعة موت أخوه الكبير".

مطت سمية شفتيها هاتفة بعدم رضا:

-"وهو مفيش حد غيرك هو اللي يحل مشاكل ابن خالتك المدمن؟ المفروض أصلا يتحجز في مصحة أو يتحبس بعد ما فضح واحدة وفبرك ليها صور عشان رفضت تكمل معاه بعد ما كشفته".

هتف محمد بحدة وهو يرمق شقيقته شذرا:

-"أحمد مهما عمل هيفضل في الأول وفي الأخر ابن خالتي وفي مقام أخويا الصغير وأنا هساعده عشان يخرج من الورطة اللي هو فيها لأني عارف كويس أوي أنه برئ ومفبركش لهبة صور ولا حاجة ولكن فيه طرف تالت هو اللي عمل فيهم كده عشان يوقعهم في بعض".

قررت سمية عدم مجادلة محمد في مسألة ابن خالته؛ حتى لا يغضب منها، فهي تعلم جيدا بمدى حبه لأحمد وحرصه على مصلحته وكأنه أخيه الذي لم تنجبه والدته الراحلة.

عاد محمد إلى شقته وبدأ في تجهيز حقيبته من أجل السفر متجاهلا اتصالات كل من شمس وآدم فهو لا يريد أن يتواصل مع أي منهما طوال هذه الفترة حتى يرتب أفكاره ويصل إلى القرار الذي يتوجب عليه أخذه.

صعد محمد على متن القطار وألقى على مدينته نظرة أخيرة قبل أن يغمض عينيه تزامنا مع تحرك القطار نحو وجهته.

▪▪▪▪▪▪▪▪▪

أطلقت "منى" عدة أغاريد بعدما أخبرتها نادين عبر الهاتف أنها حامل، وقررت أن تذهب برفقة شقيقتها إلى منزل ابنتها حتى تزورها وتهنئها وجها لوجه.

وصلت كل من إلهام ومنى إلى شقة نادين وهما تحملان الكثير من الهدايا وقد رحبت بهما نادين بشدة وجلست بجوار والدتها قائلة:

-"مكانش فيه داعي يا ماما أنك تكلفي نفسك بالشكل ده، أنا كفاية عليا شوفتك ومباركتك ليا".

احتضنت منى ابنتها وربتت على خصلات شعرها بخفة وقالت:

-"وهو أنا لو مكلفتش نفسي عشان خاطر بنتي الوحيدة هكلفها عشان مين؟! أهم حاجة دلوقتي هي أنك تخلي بالك أوي من نفسك طول فترة الحمل وإن شاء الله ربنا هيجعل ابنك سبب في أن أمورك تنصلح مع آدم".