Unicode
အလုပ်လုပ်ရာတွင်သေသပ်ပြီး မခိုမကပ်တတ်သော ကျောက်ခဲအဖို့ ဟက်မင်တန်အိမ်တော်တွင်နေရသည်မှာအဆင်မပြေခြင်းမျိုးမရှိခဲ့။ မစ္စတာဟက်မင်တန်အပါအဝင် အိမ်တော်ရှိအခြားသောအလုပ်သမားများမှအစ ကျောက်ခဲအား သဘောတကျရှိကြသည်။
လူးဝစ်၏အမျိုးမျိုးသော အလိုမကျခြင်းများနှင့် အဓိပ္ပါယ်မရှိသောခိုင်းစေမှုများအား မငြီးမငြူလိုက်ကာလုပ်ဆောင်ပေးသော ကျောက်ခဲလိုလူမျိုးအား သူတို့မည်သည့်နေရာတွင်မှရှာ၍မရနိုင်သည်ကို သိနေကြသည်မဟုတ်ပါလား။ ကျောက်ခဲလောက် သခင်လေးအားသည်းခံနိုင်မည့်လူမျိုး နောက်တစ်ယောက်မရှိနိုင်ပါ။
တစ်လကြာပြီးနောက်တွင်တော့ ယခင်ကမသိခဲ့သောအရာတော်တော်များများအား ကျောက်ခဲသိလို့နေပြီဖြစ်သည်။
မနက်ခင်းအချိန်များ၌ သခင်လေးမကြာခဏစားတတ်သည့် မုန့်အဖြူရောင်ပွပွကြီးမှာပေါင်မုန့်ဖြစ်ပြီး အညိုရောင်အရည်များမှာ ကော်ဖီဟုခေါ်သည်။ သခင်လေးမှထိုပေါင်မုန့်များအား ကြက်ဥဖြင့်ကြော်၍သော်လည်းကောင်း ဘတ်တာ (butter) ခေါ် ထောပတ်ဟူသည့်အရာနှင့်သုတ်စားရသည်ကိုမျိုးကိုကြိုက်နှစ်သက်၏။
အင်္ဂလိပ်အခေါ်အဝေါ်များနှင့်ပတ်သတ်ပြီးလည်း ဒယ်ဒီဟူသည်မှာဖခင်ဖြစ်သူကိုခေါ်ခြင်းဖြစ်ကြောင်းနှင့် ဒင်နာ(Dinner)သည်ညစာဖြစ်ပြီး မနက်စာကို ဘရိတ်ဖက်စ် (breakfast) ဟုခေါ်ကြောင်း အစရှိသည်တို့အား နားလည်လာယုံမက ပြောပါပြောတတ်နေပြီဖြစ်သည်။
အလုပ်လုပ်ရာတွင်လည်း သခင်လေးစိတ်တိုင်းကျ အမှားအယွင်းမရှိရလေအောင် အတတ်နိုင်ဆုံးကြိုးစားလုပ်ဆောင်သဖြင့် စရောက်သည့်အချိန်တုန်းကလောက် သခင်လေးထံမှအဆူအငေါက်ကိုမခံရတော့သော်လည်း ရံဖန်ရံခါတွင်တော့ ခေါင်းခေါက်ခံနေရတုန်းပင်ဖြစ်သည်။ ယခင်ကထက်စာလျှင်တော့ သခင်လေးနှင့် အဆင်ပြေလာသည်ဟုတော့ပြော၍ရ၏။
“စက်ဘီးစီးမယ်”
“အပြင်မှာနေနည်းနည်းပူနေသေးတယ်။ ညနေစောင်းမှစီးပါလား သခင်လေးရဲ့”
