Unicode
“ကလင် ကလင် ကလင်”
လမ်းပေါ်သွားလာနေကြသောလူအများအား အင်္ဂလန်ထုတ် အနက်ရောင်စက်ဘီးလေးမှာ သတိပေး ဘဲလ်သံပေးရင်း ဦးတည်ရာသို့အရှိန်တခုဖြင့်မောင်းနှင်နေတော့လေသည်။
“မြန်မြန်နင်းလေ နောက်ကျတော့မယ်”
“အိပ်ရာထနောက်ကျတာဘယ်သူလဲ”
“ဘာပြောတာလဲ”
ခပ်တိုးတိုးပြောလိုက်သည့်စကားသံအား ကြားဖြစ်အောင်ကြားသည့် နားကောင်းလွန်းသည့်အနောက်ထိုင်ခုံက သခင်လေးကြောင့် ကျောက်ခဲသူ၏နှာခေါင်းကိုအသာလေးရှုံ့ပြစ်လိုက်ကာ စကားပြောင်းပြောလိုက်သည်။
“နင်းနေတယ်လို့”
မနက်ခင်းတိုင်း သူနှိုးသည့်အချိန်မျိုးတွင် ဘယ်တော့မှထလေ့မရှိသည့်သခင်လေးကြောင့် နှစ်ယောက်သားမှာ အမြဲလိုလိုနောက်ကျလေ့ရှိသည်။
ယခုလည်းကျောင်းနောက်ကျလျှင် အဆူခံရမည်ကိုစိတ်ပူသောကြောင့် ထိုသို့ပြောနေခြင်းမျိုးမဟုတ်ဘဲ တမင်သပ်သပ်သူ့အားရစ်နေခြင်းသာဖြစ်သည်ကို ကျောက်ခဲမှာအတပ်သိ၏။
သို့သော်လည်းသိကြောင့်မပြရဲဘဲ သခင်ငယ်လေးစိတ်တိုင်းကျသာ စက်ဘီးကိုအားစိုက်နင်းနေရတော့သည်။
နွေရာသီမဟုတ်သည့်တိုင် မန္တလေးသည်ကား မနက်မိုးလင်းသည်နှင့် နေမင်း၏အပူရှိန်ကိုသိသာစွာခံစားရသည်ဖြစ်ရာ စက်ဘီးနင်းနေသည့်ကျောက်ခဲ၏နဖူးစတွင် ချွေးများဝေ့သီနေပြီဖြစ်သော်လည်း အရှိန်မလျော့စေရဘဲ သခင့်စိတ်တိုင်းကျဖြစ်စေဖို့ရာလုပ်ဆောင်နေတော့လေသည်။
“သခင်လေး သေချာကိုင်ထားနော်”
မနက်ခင်းတိုင်း သူ့မှာ စက်ဘီးအား ရင်တထိတ်ထိတ်ဖြင့်နင်းနေရခြင်းသာဖြစ်သည်။ မည်မျှပင် စက်ဘီးစီးကျွမ်းကျင်နေပါသည်ဆိုသော်များ သူမတရားနင်းလိုက်မိလျှင် မတော်တဆများ သခင်လေးသာပြုတ်ကျသွားရင် ခက်ပေဦးမည်မဟုတ်လား။ လမ်းပေါ်၌လည်း ချိုင့်များ ခဲများကနေရာအနှံ့ရှိနေတတ်သေးသည်။
