Unicode
"သခင်လေး...ထတော့"
လူးဝစ်၏ အခန်းထဲသို့ဝင်လာသည့် ကျောက်ခဲတယောက် အိပ်ရာထက်နှစ်ခြိုက်စွာအိပ်မောကျနေသည့်လူအား ခြေထောက်နားမှကိုင်ကာ အသာအယာလှုပ်နှိုးလိုက်လေသည်။
"သခင်လေး"
"ကျောင်းသွားရတော့မယ် ထပါတော့ဆို"
သုံးကြိမ်မြောက်ခေါ်ပြီးသောအခါ နေ့စဥ်လုပ်နေကျ ဝတ္တရားအတိုင်း သခင်ဖြစ်သူထလာသည့်အချိန် မျက်နှာသစ်လျှင်အဆင်သင့်ဖြစ်နေစေဖို့ရာ သွားတိုက်တံတွင် သွားတိုက်ဆေးအသင့်ထည့်ပေးပြီး သဘက်နှင့် ရေကိုပြင်ဆင်ပေးနေတော့သည်။
"သခင်လေးရေ"
အလုပ်လုပ်နေစဥ်တွင်လည်း ရေချိုးခန်းထဲမှနေ၍ အပြင်ဘက်မှလူအား လှမ်းအော်နေပြန်ရသည်။
မနက်ခင်းပိုင်းတွင် ကျောက်ခဲ၏အသံသည်ကား အပေါ်ထပ်တခုလုံး၌ပျံ့လွင့်လို့နေ၏။ သို့သော်ငြား ထိုအသံပိုင်ရှင်နှိုးနေသည့်လူမှာတော့ တုပ်တုပ်ပင်လှုပ်မလာသေး။
သေချာပေါက်နိုးနေလောက်ပြီဖြစ်သော်လည်း မထသေးသည့် သခင်ဖြစ်သူ၏အကြောင်းကို ကျောက်ခဲမှာသိနှင့်နေပြီးဖြစ်သည်။
ကြည့်ရတာ ကျောင်းတက်ချိန်မီဖို့ဆိုရင် ဒီနေ့လည်း သူကပဲစက်ဘီးကိုအသည်းအသန်နင်းရဦးမယ်ထင်ပါတယ်။
"သခင်လေးရေ အခုမသွားရင်မမီတော့ဘူးနော်"
အိပ်ခန်းဆီသို့ခေါင်းထုတ်ပြီး အသံကိုပို၍အသံမြှင့်ကာခေါ်လိုက်သည့်အခါမှ ခပ်ဆတ်ဆတ်အသံကိုကြားလိုက်ရလေသည်။
"ထပြီ!"
ရေချိုးခန်းထဲမှသူထွက်လာသည့်အခါ အိပ်မှုန်စုံမွှားဖြင့်ကုတင်ပေါ်တွင်ထိုင်နေသည့်လူမှာ ယခုအချိန်အထိ ကုတင်ပေါ်မှဆင်းဖို့အစီအစဥ်ရှိသေးသည့်ပုံမပေါ်။
"သခင်လေး"
သူခေါ်လိုက်သည့်အခါ မျက်လုံးများကိုလှန်ကြည့်လာသည့်လူက မည်သည့်စကားကိုမှတော့ဆိုလာခြင်းမရှိ။
"ကျောင်းမတက်ချင်တော့ဘူးလား"
"---------"
"ကျွန်တော်တို့ အိမ်မှာပဲသင်ကြမလား"
