طوفان من العاطفة

الطوفان السادس

(لَا إِلَهَ إِلَّا أَنْتَ سُبْحَانَكَ إِنِّي كُنْتُ مِنَ الظَّالِمِينَ)

بقلم / رغد خليل🤍..

لاتنسوا التصويت بالنجمه 💙

—————

سرمد : احم رسن متصاوب وهساع هو بالمستشفى

من بعد ما كال هيج اثيلة ضلت تدك وتطلم
وتريد تروح للمستشفى

سرمد : ما اكدر اخذ اي احد الدنيا مكلوبه يمه

شهرة : شووون وضعه ؟؟

سرمد : بالعمليات انطيتكم خبر علمود يكون عدكم علم بكلشي ..

ورقاء : افهم من كلامك وضعه خطير ؟

هزز براسه ساكت ..

ورقاء : اخذني للمستشفى

سرمد: الفضل كال ممنوع اي احد يوصل للمستشفى

ورقاء : نسيتوا اني دكتورة ؟

سرمد : اعذريني خوية بس ماكدر ..

اخذت تليفوني واتصلت على الفضل اكثر من مره مايرد
شفت وضع اثيلة صار موزين وحتى ضغطها صعد

ورقاء : اهدي خالة هسه اروح والله واطمنج عليه لتخافين

اثيلة بدموع : يمه وليدي ..

شهرة : بس علكيفج امي ...

جاد وجواد واكفين على صفحة لازمين ايدين بعض
رغم صغر عمرهم بس فاهمين شكو وشنو صاير

جواد : يعني عمو راح يموت ؟

ورقاء : لا حبيبي اسم الله لا تحجي هيج

تقدمت ناحيتهم ولزمتهم ثنينهم احاجيهم

ورقاء : ادعوا لعمو يكوم بسلامه متفقين ؟

هزوا براسهم ثنينهم وركضوا للحمام يتوضون وكملوا فرشوا سجادتهم وكفوا يصلون ..

رجعت اتصل على الفضل ما يررد
وشهرة وسرمد طلعوا برا يحجون ..
اثيلة متمدده وتبجي

الى ان واخيراً رد الاستاذ الفضل عليه

-ها ورقاء

_ فضل كول لسرمد يجيبني للمستشفى

-لا ابقي بالبيت

_ فضل اريد اجي خلي يجيبني اصلا يحتاجون هذا شغلي شبيك انتَ ؟

-الوضع خطير مدتفتهمين ؟

_ موتتني بلوضع الخطير شيصير خل يصير طبني مرض
بس مال اعوف شغلي وهم بحاجتي لا فضل حباب خلي يجيبني

-استغفرالله سدي سدي طركاعة انتِ

سد الخط ثواني معدودة ودك تليفون سرمد
طفرت على سريع بدلت ونزلت وسرمد يدردم

سرمد : يلا  بوية امشي امشي .. النسوان بلوه وحك محمد ..

طلعت ويا ولزمتني شهرة وحجت
وهيه ترجففف ولدمعة بعيونها .. هواي تحب اخوانها ..
شهرة : عليج الله ورسوله تطمنيني وتكوليلي كلشي وماتضمين شغله وتبلغينا بوضعه