#طوبى "جنة طوبى"
#جمان_فريد
#الجزء التاسع_والسبعين "مالكش حق "
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
🌙رمضان مبارك🌧رمضان الدعاء🌙
قال صَلَّى اللَّهُ عَلَيْهِ وَسَلَّمَ : (الدُّعَاءُ هُوَ الْعِبَادَةُ) رواه الترمذي
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 فإياك إياك أن تستطيل زمان البلاء ، وتضجر من كثرة الدعاء ؛ فإنك مبتلى بالبلاء ، متعبد بالصبر والدعاء ، ولا تيأس من روح الله ، وإن طال البلاء 🍃
__________________________________________
"خودي بوكس كامل"
طوبى وهي تشوف في ملابس الرضع بشغف..
/ايه بناخدلها واحد تاني غير اللي خداته غرفه بس هادم لازم ناخد منهم..
وقعدت تلم وتحط في السله اللي عندها واريج معاها..
جتهم آلاء وفي يدها حاجات وهي تقول..
/محلاهم هادم..
كانوا ستيرتشات يلتبسوا ع الراس..
اللي مزينه بورده..واللي بفيونكه..واللي بفرواله..
طوبى لما شافتهم قلبها فرفح وكل مالها تزيد شوق لجية جنة...قالت..
/حطيهم حطي..
وقعدوا يلموا هي الاء واريج تحاول تسيطر عليهم بش ماياخدوش فوق المعقول...
طوبى من فرحتها وحبها لبنتها اللي مازال ماجتش تمنت تاخدلها المحل كله..
اما الاء معروفه عينها واسعه..
🍃🍃
بعد ماخدوا اللي يبوه..
وقفوا ع الكاصة وحطوا الحاجات للبايع بش يحسب السعر..
الاء وهي تشوف في الألعاب..
/كان خديتيلها حتى دبدوب صغير..
اريج:ترا ريحينا بيبي صغيره هلبه شن يعرفها باللعب..
ضحكت طوبى ضحكة خفيفه..
شويه تكلم الراجل وقال..
/350..
تفاجئت طوبى بالسعر..
واريج ضايقت..
الاء كلمتها وقالت..
/اللي بيقعدوا مايسدوش حق السرير..
اريج :وشن نخرف من بكري اني..
"تفضل"
الزوز شافوا يمينهم وانفجعوا..
وين شافوا الجالي واقف جنب طوبى يدفع للبايع في.حق الحاجات اللي خدوهم..
غيروا نظرهم لطوبى لقوها تشوف للبايع وهو ياخد الفلوس بغضب وضيق..
الجالي بإبتسامه اشر عليهم وقال للراجل..
/جايين معاي..
البايع خدي منه الفلوس وحطله الحاجات في كيس خاص..
اريج شدت يد طوبى وقربتلها وقالت بصوت منخفض..
/هيا نطلعوا..
طوبى حركت راسها بالنفي بعدين قالت..
/راجي شويه..
وطلقت يدها وهي تشوف للجالي كيف خدي الكيسه..
رفعت عيونها فيه بنظرات حاده..
هو شافلها بإبتسامه استفزتها جدا..
غيرت عيونها عنه وخدت نفس..بعدين حطت يدها ع ذراعه اليسار وقالت..
/تعالى شويه..
هو عجباته الحركه اللي دارتها مشي معاها من غير اعتراض..
وقفت بيه بعيد عن الكاصه وشبحتله وهي تتكلم بطريقه غير ملفته للنظر وبصوت منخفض..
/ماتخلنيش نعيط ونلم عليك الناس..
الجالي بضحكه؛عيطي..استاحشت نسمع صوتك ان شاء الله عياط..
قعدت تشوفله بنظرات غضب وهي تحاول تتمالك نفسها..
وهو يشوفلها بنظرات يحاول يأثر بيهم عليهم بيها لكن هيهات..
شدت يده اللي فيها الكيسه وقعدت تحاول تفكها بدون ماتلفت الانتباه وهي تشوفله بنظرات كلها كره..
وهو بإبتسامه مستفزة قال..
/مش حتستفيدي شي باللي درتيه هادوا ماليا مش حيجوا معاك عليا في النهايه طلعتي انتي اللي ماتنفعيش راهو..
جبدت الكيسه بقوة من يده وقالت بطريقه متهكمه..
/الدوة هادي اضحك بيها ع اللي مايعرفكمش..
ولفت ومشت وخلاته واقف يتبع فيها بعيونه بنفس النظرات المستفزة..
واريج والاء طول لحقوها وطلعوا من المحل..
تبدلت ملامح وجهه للحده..شاف يمينه..
كان البايع يشوفله بنظرات غريبه لما شبحله غير عيونه طول..
رفع الجالي حاجبه وهو ممتعض بعدين مشي طلع من المحل..
🍃برا..
عند سيارة الاء..
اريج:نروحوا؟
طوبى بتحدي:نكملوا مشاويرنا بعدين نروحوا..افتحيلي الباب...
اريج هزت راسها وهي مضايقه وفتحت الباب..
حطت طوبى الكيس وبعدين ركبت..
واريج سكرت الباب ومشت ركبت القدام..
اريج:كان خلتيله البضاعه تقعد في رقبته..
طوبى:لا مانخليهاش..يردها بعدين ويرجع فلوسه..خله يصرف ويحط ملزوم ببنته..
الاء بضحكه؛تعجبيني..
اريج؛كان بديري هكي بعدين مش حيخليك في حالك ويديرها هي سبله..
طوبى:مش حنحرمه منها ولا نحرمها منه..لكن كل شي حيكون بالقانون..
الاء وهي تشوف من المرايه..
/قاعد ورانا..
طوبى:عارفاته..
اريج؛كان نروحوا خير..
طوبى:لامانرحوش يااريج ونخليه يحس اني خايفه منه هكي يوصل للي يبيه..
اريج بقلق..
/ماتعرفيش شن يدير ياطوبى..
طوبى:مايقدرش يدير اكثر من اللي داره بكري في المحل ماتخافيش..
🍃ووصلوا في محل تاني..
ونزلوا خدوا منه حاجاتهم وهو وراهم وين مايكونوا..
اريج كانت اكثر وحده خايفه فيهم ومستغربه هلبه في برود طوبى وتجاهلها لوجوده..
قعدت وراها وحواليها وماسيبتهاش لحظه وحده من خوفها عليها..
لعند ماطلعوا من المحل وهو وراهم..
ركب سيارته وقعد يستنى فيهم..
وهما حطوا الحاجات في السيارة..وبعد مااطمنت اريج ع طوبى انها ركبت..
مشت بتركب هي وتوزع في نظرها للشارع..
صدفه تشوف اسكندر..
كان واقف ع واحد يشرب معاه في "المكياطه" ويهدرزوا..
الاء:هيا اركبي دنيا ليلت..
هي خشت للسيارات وجت للدومان حطت يدها ع المنبه وولت طلعت..
الاء وطوبى تعجبوا من تصرفها..
الاء:خير بلاك!..
وهي لما طلعت شافت اسكندر انتبه لصوت المنبه التفت وهو يشوف للطريق..
جو عيونه عليها..
هي اشرتله براسها ع الجهة اللي فيها سيارة الجالي..
والجالي يشوفلها بإستغراب..
ولت ركبت وسكرت الباب وهي تقول .
/ان شاء الله يفهم..
طوبى:مني!؟
اريج:تونقولك..تحركي الاء..
الاء قعدت تشوف للشارع وهي مستغربه بعدين تحركت بالسيارة..
والجالي وراهم...
واسكندر شافه...طول مشي حط طاسة المكياطه ع مرشبيدي ومشي بدون مايستأذن من الراجل لسيارته طول..
ركبها وشغلها وتحرك بسرعه وهو يحرق في العجل..
🍃🍃🍃🍃🍃
"تفضلي دكتورة"
خدت اميمه القهوة وقالت..
/شكرا..
ومشت قعمزت ع طاوله في كافتيريا المصحه..
كانت بروحها بدت تشرب فيها وكانت حتسرح بتفكيرها..
لكن...
قطع عليها لما قعمز مقابلها وقال بهجوميه..
/من تحسابي روحك!؟
رفعت حواجبها بتعجب..
قصي بعصبيه..
/عطيتك اكبر من حجمك لما قدرتك وجيتك من الباب وانتي صدقتي روحك هلبه لدرجة تلزي ماليا وتنزلي من قدرهم..
هي ببرود:قصدك لاني رفضتك نولي لزيتهم وطيحت من قدرهم!! الحاجه هادي نصيب..
استفزاته ببرودها اللي شافه تعالي وتكبر وقال..
/مفروض تحمدي ربك اللي شبحتلك بعد اللي صار فيك غيرك يتمنوا نشبحلهم بربع عين..
اميمه؛خلاص اختار وحده فيهم واخطبها بسيطه..
وصلاته لأقصى مراحل الغضب بس هو تمالك نفسه وقال بوعيد..
/باهي يااميمه..باهي..
وناض ومشي بعصبيه..
هي ابتسمت تهكما وحركت راسها يمين ويسار بعدين رجعت تشرب في قهوتها بهدوء..
🍃🍃🍃🍃🍃🍃
واقفين في محل كبير لمستلزمات الاطفال..
كانوا يتفرجوا ع سرير لونه أبيض جميل..
طوبى:هدا احلى..
اريج؛وسعره احلى..
ضحكت طوبى..
الاء:خلاص تاخديه؟
طوبى بإبتسامه؛خلاص ..
واريج التفتت تشوف الجالي وين مالقتاش لكن لقت اسكندر
اللي ابتسملها وغمض عيونه بعدين فتحهم..
هي هزت راسها بعدين ولت لهت معاهم..
مشوا دفعوا حق السرير وطلبوا من المحل يوصلوه بخدمة التوصيل..عطوهم العنوان بعدين مشوا طلعوا..
الاء:صدقت عمتي طرف خو خالتي سميره..
طوبى وهي تشوفلها بربع عين:تحشمي..
واريج دور في الجالي لقاته واقف بسيارته بعيد شويه يشوف جيهتهم قالت..
/سحيقه..
طوبى:قتلك مايقدر يدير شي طنشيه..
وركبوا السيارة..
واسكندر مشي ركب سيارته حتى هو..
راجاهم لين طلعوا..وطلع وراهم...والجالي لحقهم بدون ماينتبه لإسكندر..
وقعدوا ورا بعض طول الطريق لين وصلوا لشارع القهوة..
اسكندر ماخشش الشارع بس هما بعد ماخشوا..الجالي خش وراهم...
وفي عز التوتر والاستفزاز..اسكندر كان غامره قلبه الفرحه لأن اريج طلبت مساعدته..والحاجه هادي شجعاته يحاول معاها.مرة تانيه وهو متأمل يتحقق اللي يتمناه...
🍃🍃🍃🍃🍃
نزلوا من السيارات والآء تقول..
/للدوش طول..
وخشت تجري..
اريج؛جحشة تو بتقعد عام..
طوبى وهي تنزل في الأكياس..
/تقعد عينها نسكر عليها السانيسكه ..
جتها اريج وقالت..
/هاتي عنك..وخدت منها الكياس..
طوبى:مش حنقول لا..
ضحكت اريج بعدين قالت..
/كيف ماخفتيش منه ؟
طوبى:من قالك ماخفتش! خفت هلبه لكن مابينتش..
اريج:شن قالك ؟
طوبى بلامبالاة:يفتفت..المهم زي مانبهت عليكم ماتقولوش لحد ..
اريج هزت راسها بالموافقه..
مشت طوبى خشت وهي تقول..
/الله ع النسمه كان نديروا تقعميزة برا في الليل..
اريج:ياريت..
ومشوا الزوز خشوا داخل الحوش..
🍃🍃🍃🍃🍃
"انت كنت متوقع يدير هكي؟"
المحجوب؛كنت متوقع انه بيدير شي ونعترف اني كنت خايف يديرلي حاجه تشوه سمعتي وتخسرني مهنتي نهائي لكن الحمد لله اللي جت هكي..ابتسم وكمل يقول..لكن تعرفي خدمني هلبه باللي داره..
نبيله بإبتسامة استغراب..
/كيف؟
المحجوب:حررني من حاجه كانت مقيدتني زي ماقتلك اني كنت خايف نخسر المنصب بتشويه السمعه ماكانش هامني المنصب نفسه..وهو باللي داره خلصني من اللي كنت خايف منه و عطاني فرصه نكون مع بنات اختي في العلن زي ماكنت معاهم في السر..
نبيله:تعرف حاستهم واخدين منك موقف..
المحجوب:عندهم حق مافيش عليهم ملام هما مايعرفوا شي..
🍃🍃🍃🍃🍃
وهما..
برا في جنان الحوش جهة الكوجينه..
ع شلتات "فراشات خفاف" مفرشات ع حصيرة كانوا مقعمزات يهدرزوا وياكلوا في الجيلاطي اللي كانت دايراته طوبى قبل لتطلع..
غرفه؛صوتهم يعيطوا ولا!؟
اريج:لالا هدا من تليفوني..
مطيره قعدت تشوف لغرفه بإبتسامه..
جنب غرفه آلاء وهي لاهيه بتليفونها تتفرج ع فيديو..
وامها محاديتها كانت تاكل وهي سرحانه..
اما طوبى كانت محطوطه قدامها حصتها وهي بعيونها مع الكرسي اللي كان قريب ع بير الميه ودموعها في عيونها..
شويه آلاء قالت
/عليك بخوت ياناس..نتفرج ع فيديو لأحلام من لقاء ليها مع وفاء الكيلاني تسأل فيها ع الطيارة الخاصه اللي عندها قالتله ليك بروحك..قالت ايه..قالتلها من خداهالك قالتلها راجلي..كان خاطرك تاخدي فيها لفه
تعالي..
غرفه:المراة هادي ينطبق عليه مثل حظ القبايح في السمي لايح..
مطيره؛وخيرك انتي شن ناقصك ؟.
غرفه بضحكه:مش قصدي..لكن احلام هادي كان تشوفيها واقفه مع راجلها تقولي مسحور من غير كلام..
طوبى التفتتلها وقالت..
/نصيبات..
الاء:النصيب الباهي يمشي للشينات ديما استغفرالله..
طوبى:شن فايده استغفر الله اللي قلتيها هادي! ربي قال نحن قسمنا بينهم معيشتهم في الحياة الدنيا..
غرفه:اللهم لااعتراض بس هكي حاجه تخليك تستغربي..
طوبى:هلبه غيرك مستغربين في نصيبك راهو..
ضحكوا..
غرفه؛وخيرني ياحنه شن ناقصني!؟
مطيره بضحكه؛ناقصك عقل..
قلبت غرفه وجهها وعصبت منهم..
طوبى بضحكه؛نبصر عليك ياهوو فكينا من جو الحرج..
غرفه؛اعرفي بشن تبصري مرة تانيه..
طوبى بضحكه:حاضر..اسفه..
مطيرة؛واني مش اسفه..
ضحكوا وغرفه قاعده قالبه وجهها..
الاء:باهي يعني عادي ندعي ربي يعطيني راجل زي راجلها ياناس نبي ندلل نبي نعيش عيشه حلوة زي الناس اللي عايشه..
اريج:انك لاتهدي من احببت..
الاء:خليك في حالك انتي..يعني حرام ندعي ربي بحاجه زي هادي!
طوبى:لامش حرام بالعكس ادعي ربي بكل شي تبيه وفي خاطرك..قوليله ياربي نبي راجل غني يعيشني عيشه كريمه ومرتاحه وين المشكله..
الاء بحماس؛عادي ندعي حتى بالوصف يعني نقول ياربي نبيه قنين وانيق ومهيوب..
طوبى:عادي جدا جدا اللي خاطرك فيه ادعي لربي بيه وأنتي متأكده حيستجيبلك..
الاء بحماس وتفاؤل..
/تعرفي خلتيني نحس بشعور اشبح كيف..
مطيره:توا توا ادعي..
طوبى:ايه صح..
الاء بحماس كبير رفعت عيونها فوق وغمضتهم ورفعت ايديها وهي تقول..
/ياربي ارزقني براجل غني وقنين ومهيوب ويعيشني احلا عيشه وخليه يحبني اكثر من روحه يارب..
كلهم قالوا..
/آمين..
نزلت عيونها وقالت بضحكه وعيونها مدمعات..
/نجكم ليا..
وامها تشوفلها بإبتسامه..
اما اريج لما سمعت اخر جملة قالتها بدي ع وجهها الضيق..
مطيره:ربي يفرحنا بشوفة سدرة وهي مقعمزه وسطنا قي تقعميزة زي هادي..
تعالت اصواتهم وهما من يامنوا ع دعائها..
ورجع خيم عليهم الحزن مع الصمت وهما بين اللي تخونه الدمعه وبين اللي شادها بالقوة..
🍃🍃🍃🍃
وفي الحوش اللي مقابلهم..
في الجنان الواسع من القدام...
كانت في زحمه بين العيله والاقارب وفرقة الحضرة اللي كانوا يتجهزوا بش يبدوا فيها..
🌿عند النساوين داخل..
كانت الصاله مزحومه بيهم واللي يشوف مغليه في وسطهم وهي مقعمزة في وسطهم وتوزع في ابتساماتها وتهدرز يقول هالمرة مش صايبها هم ولافايت من جنبها..
ماغابتش نجاة عن الحضور..ولانسرين اللي جت تحضر قدام الناس وخلاص..
وسط هالزحمه كانت سدرة المهدي موجوده ومش مرتاحه تراجي امتى تروح مع كامله المكان هدا بالنسبه ليها ولى اكثر مكان تفقد فيه الأمان...
🍃🍃🍃🍃
"امتى تم هالليله السودا"
نضال بصوت واطي..
/اسكت يسمعوك يركبوا فيك.
حك عمر فوق فمه وهو شاد ضحكته..
ونضال؛تعرف بنوض نجدب معاهم بش نطلع اللي في خاطري كله..
شبحله عمر وهو يفكر في اللي قاله بعدين شاف جهة الفرقه..
ويخطم من قدامه خوه الجالي وهو شاد تليفونه اللي يرن وطالع بيه برا الحوش...
🍃🍃🍃🍃🍃
"خالي نسانا بكل"
قالت هالجمله فردوس وبنبرة تهكم..
غرفه؛مرته تتصل وتسأل وهو شي شي..
فردوس؛مش حيجي خير من خوته كلهم زي بعض..
طوبى بضيق؛صح مدايرة منه شويه لكن في نفس الوقت عاذراته..
غرفه؛حتى اني مرات نعذر فيه مرات تهدد حتى التهديد..
آلاء:من بيهدده؟
تنهدت طوبى وقعدت ساكته..
فردوس:ومن غيره يعني خالك االغالي..
آلاء:وعلاش بيهدده شن في بيناتهم؟
مطيره؛حاطك محامي عليه بوشرينتا!؟
الاء:مش هكي ياعمتي لكن مايجيش تتهموه بحاجه وانتم مش متأكدين منها ولا؟
شبحتلها طوبى بطرف عينها..
اريج بإنزعاج؛بالله غيرو الموضوع وفكونا..
طوبى:يكون احسن..
الاء شافت لطوبى وهي ساكته..
وفردوس تشوف لبنتها بعدم رضا...
فجأه..
سمعوا اصوات جماعة فرقة الحضرة...
مطيره؛بدي جديب..
غرفه:لاحول ولاقوة الا بالله..
مطيره؛ياريت في كاميرات تصور فيهم وهما يجدبوا بالذات شيباني النحس..
قعدوا يضحكوا..
اما طوبى شافت جهة الحوش وهي تفكر في حاجه متمنيه من الله انها تصير...
🍃والفرقه وحواليها الرجاله الكبار بدت تضرب في طبولها.
والرجاله حواليها باديين يتفاعلوا معاها ومنهم محمد وخوه الكبير طه اللي يقدس في الحاجات هادي...
المهدي كان مقعمز وجنبه نسيبه وكان يتفرج وباين عليه مش راضيه..
ولاراضي خوته نضال وعمر بس مضطرين يسايروا..
لكن..
الجالي اللي خش في اللحظه هادي وكان باين عليه من ملامح وجهه انه في حاله مش طبيعيه..اشبه بحالة الصدمه..
قعد يقدم وهو يشوفلهم شن يديروا..
واصواتهم وحركاتهم في وذانه وبين عيونه..
زاد قدم..وقدم..لين خش معاهم..
لاحظه المهدي وبدي ع وجهه ملامح القلق..
عمر:الجالي!
نضال قعد يشوف لخوه بترقب وخوف..
الجالي وهو واقف معاهم كان يشوف فيهم ويسمع وبس..
مش هما بس اللي يشوف فيهم ويسمعلهم..
كان يشوف قدامه في مشاهد متفرقه متقطعه..
ويتردد لمسامعه كلام قبل بضع دقائق سمعه..
خبر كان بمثابة الصفعه بالنسبه ليه
"والله شن بنقولك ياباش مهندس حولوك من ادارة الشركه"
قعد يتبع فيهم بعيونه وهما باديين يهزوا في روسهم يمين ويسار مع الايقاع والكلام..
بدي تلقائيا يهز في راسه يمين ويسار زيهم شويه شويه..
بوه انتبهله...ركبه الخوف في لحظه..
وخوته يتفرجوا ويترقبوا..
وهو بادي يردد معاهم لما يقولوا..
"هالله..هالله"
وقدام عيونه يمر شريط مشاهد من حياته..
اسوأ واحلى مافيها..
بس اكثر شي كان بين عيونه اللي صار بينه وبين طوبى..
كل مايتفكر شي حلو..يجي قدامه ذكرى سيئه...
تفكر بوه لما قاله..
《 اظن بعد هكي مافيش سبب واحد يخلي شاد في الشيطانه بنت الواعر مراة شوهاتك وشهدرت بيك وافترت عليك مفروض معاش تقعد ع ذمتك..》
وبعد هالكلام تفكر لما استغلت مرضه وقت استنجدت بالناس اللي تسببوله فيه..
تفكر كلامها ليه اليوم...وقهرة قلبه كبرت وين خطر عليه ان مايقدرش يكون زي اي اب يراجي في مولود ليه يكون معاه لحظه بلحظه..
وتسائل..هل حتى لحظة الولادة مش حنحضرها!..
"والله شن بنقولك ياباش مهندس حولوك من ادارة الشركه"
قاعد يخسر..قاعد يخسر وبس..كله شي فاز بيه في حياته قاعد يضيع منه شي ورا التاني...
تسارع ايقاع الحضرة وتسارعت معاه الحركه..
بس هو كانت حركاته اسرع ومبالغ فيها..
نضال تلقائيا ناض وقف..
ومحمد المهدي قعد يوزع في النظرات بينه وبين عمه عمر اللي كان باين عليه القلق وكأنه بدي يفهم قصده لما قال..
"عمك مريض"
اما جده..كان مكمل في الجديب لكنه في قمة القلق..
خوه طه جي للجالي اللي عجبه انسجامه مع الحضره وقعد يجدب معاه وهو يطلع في الصيحات ..
وقعدوا الزوز اكثر من يجدب بقوة مع بعض..
ويزيد يتسارع الايقاع وحركات الجالي تخرج عن السيطره..
وهالشي خلا جماعة الفرقه يديروا علبه دورة وهو يجدب بكل قوة...
محمد شنيبه بقلق:خلاص خلاص..
لكن مايسمع فيه حد..
المهدي ناض وقف وقدم خطوة ورا التانيه وهو يشوف لخوه..
ومحي يراقب في ردود افعالهم كلهم..
في هاللحظه..
الجالي انهك تماما واستهلك الطاقه اللي عنده كلها..
وطاح مغمى عليه...
🍃🍃🍃🍃🍃
"جدب مليح لين طاح ع وجهه"
نجمه؛من الحالة النفسيه راهو لاسحر لاعيني..
الصيد:وارد ووارد يكون مسحور حق..
~~~~~
مغليه ببكي:مش قلتلكم ولدي مش بلاش اشبح شن دايرينله! حسبي الله ونعم الوكيل..
وحده من نساوين العيله قالت..
/نصيحه مني ياوخيتي ارفعوه لشيوخ القرآن والرقيه هادوا اللي يقدروا يعالجوه..
مغليه هزت راسها وهي تبكي..
خديجه ودموعها ينزلوا..
/لكن باهي اللي صار هكي بش ربي طلع الحق ..
ومررت نظرها بين عماتها..
صالحه كانت مضايقه وولد خوه واجعها..
لكن كامله فسرت اللي صار معاه تفسير يشبه تفسير نجمه مرت الصيد..
وكان نفسه تفسير نسرين اللي واجعها خوها والحال اللي وصله..
اما نجاة..فكانت بتموت من الخوف عليه وكان تلقى تحصل فرصه تخليها تشوفه وتطمن عليه..
🍃🍃🍃🍃🍃
"نعم عمتي"
تنهدت كامله وقالت..
/شهاده قدام ربي يابنتي تتحاسبي عليها راك وليه وعندك ولايا..مني الظالم بين خوك ومرته؟
نسرين تنهدت بضيق وقالت..
/مرته ياعمتي تربت قدامي واختها صاحبة عمري بنات اصل وبيتيه ويخافوا ربي..
هزت كامله راسها وقالت..
/اللي يشهدله العيل الصغير بالخير مايكون الا ع خير حق الصغار لايعرفوا يكذبوا ولايجاملوا..
نسرين؛قصدك سدرة؟
كامله:ايه..وراهو حكتلي ع لزة امك ليها...سامحيني يانسرين يابنتي امك من يوم يومها مراة حرفه وواعره وماتنقدر وجابت نسخه احرف منها تساعد فيها الغلط اختك خديجه..ردي بالك يابنتي تمشي في طريق امك واختك راهو ظلم الولايا ويلات يابنتي تلقوه في حياتكم كلها..كان قدرتي تردعيهم اردعيهم وردي بالك تجي معاهم..
ونسرين تسمع فيها وهي تشوف للأرض بإحراج وضيق..
كامله؛ربي يهديهم ويفك بنت الناس من شرهم..
ومشت خشت للحوش من الكوجينه وهي تحوقل..
وخلت نسرين في حالة من الخزي بسبب امها واختها..
🍃🍃🍃🍃🍃
وفي الصاله..
ماكان فيها حد غير محمد شنيبه ومغليه ونجاة واقفه قدامهم..
محمد شنيبه؛معاش في خاطرك شي؟
نجاة:ولاكان في ياعمي عاذراتك لو كنت مكانك ندير مادرت..
هو قال..
/ربي يكملك بعقلك..باهي توا نبيك في موضوع تاني..
نجاة؛ان شاء الله خير؟
هو قال؛خير خير..غير اليوم كلمني ولد اخت الحاجه لطفيه..
رفعت مغليه حاجبها وهي تشوفله..
وهو مكمل يقول..
/وسألت الجمعه اللي فاتت علاش ماجوهاش الصغار..
نجاه:ايه صح كان في ظرف خلاني مانرفعلهاش الصغار..
هو قال؛خلاص غدوة ان شاء الله ارفعيلها الصغار يباتوا عندها..
نجاة؛حاضر..
محمد:وانتي بري لحوش اختك اقعدي عندها لين يروحوا..
انصدمت نجاة من اللي سمعاته..
اول مرة من لما سكنت حداهم يطلب منها طلب زي هدا..
مغليه قعدت تشوفلها بنظرات فيها شي من التشفي..
هزت نجاة راسها بعد مابلعت ريقها وقالت..
/حاضر..
هو قال؛يحضرلك الخير..تقدري تروحي توا تصبحي ع خير..
نجاة:تصبحوا ع خير..
ولفت ومشت بتطلع وملامح الغضب بدت ع وجهها..
بعد ماطلعت من حداهم..
مغليه:صار بينك وبينها تليفونات؟
محمد شنيبه:مني!؟
مغليه:الحاجه لطفيه..
هو قال بإنزعاج.
/تي غير شن تقولي يامراة! ماهو قدامك قلت ولد اختها!
مغليه؛اليوم ولد اختها وغدوة هي!
هو قال...
/تو انتي في شني ولا شني! بري اشقي بهم ولدك..اركبي باتي حداه وردي بالك منه ماتخليشي يديرلنا فضيحه..
هي بضيق:ياروحي عليك ياوليدي..
ناضت وهي تقول...
/محسود والله محسود ولدي عين حاسده اللي دارت فيه هكي..وزادتها عليه الشيطانه بنت الواعر الله لاتوجهلها الخير..
محمد بحده:غير يروحوا اللي عندنا بعدين نتفاهم معاهم...
مشت مغليه بتطلع وهي تقول..
/الله لاتربحهم الله يزيدهم بلي ع بلاويهم..
وطلعت من الصاله..
وهو قال..
/حسبنا الله ونعم الوكيل..وناض ومشي طلع من الصاله..
🍃🍃🍃🍃🍃
"مرض نفسي صابه بعد حبسته"
محمد المهدي وهو مصدوم..
/ماكانش باين عليه بكل؟
المهدي؛كنت صغير وقتها مش واعي زي توا..بعدين توا حالته خير من هداكا الوقت بهلبه..تعالج عن طبيب نفسي لفترة في مصر دله عليه عمك الطاهر الله يرحمه وقعد عايش ع الادويه...
محمد المهدي بضيق.
/معناها حتى انت مشارك معاهم في اللي صار لخالتي طوبى!..
غير المهدي عيونه عن ولده وهو مضايق..
محمد؛مافي حد بريء كلكم حاطين ذنبها في رقبتكم..
المهدي بضيق شديد؛خلاص تربح..
تنهد محمد بقهر..ومسح بيده اليسار ع وجهه وعيونه بعدين نزلها وقال..
/تصبح ع خير..
ونزل من الكرسي لفراشه ورقد..
وخلا بوه عايش حالة تأنيب الضمير اللي مابتش تخليه من لما عرف كل شي صار في طوبى بسبب خوه وعيلته..
🍃🍃🍃🍃
وخوه في جناحه..
منطرح ع الكنبه وامه حداه...
مغليه بألم..
/كيف طاوعت نفسك وحلفت ع المصحف كذب تخسر اخرتك ع خاطر وحده باعاتك بالرخيص ولاقدراتك ولاصاناتك؟
الجالي بملامح متعبه خالطتها الحده..
/اول شي اني اللي ماصنتهاش ولاقدرتها..تاني شي اني ماحلفتش كذب يام..
قعدت تشوفله بعدم فهم..
الجالي:ايه ماحلفتش كذب..بوي قالي احلف ان مافي بينك وبين نجاة شي واني حلفت صادق توا مافيش بيني وبين نجاة شي..
مغليه قعدت تقلب فيها فراسها تبي تصدق وتقنتع بش ترتاح..
والجالي يشوفلها وهو مبتسم بتهكم..
هي قالت بقلق
/زعمه حق هكي ولدي؟
الجالي هز راسه وقال .
/ايه هكي يام هكي..لكن قوليلي من اللي جاب المعلومه هادي لبوي؟
مغليه؛ومن غيرهم عمامك..!
الجالي..
/لوكان هما راهو قال عمامك قالوا ماتكلمش بصيغة المجهول..
مغليه؛اني هدا اللي صار قدامي..
هز الجالي راسه وهو يفكر..
مغليه:بعد تجيب بطلقها وبتاخد منها العيل ولا هكي ناوي انت؟.
حرك راسه بالنفي وقال..
/لا..اني قاعد نبيها ومانبيش نفرط فيها ونبي بنتي تتربى بيناتنا..
مغليه بصدمه..
/قصدك كنت تمشي في بوك!
الجالي:بالزبط..
مغليه بخوف:انت تبي تجلطني..
قعد ساكت وهو يشوف في الفراغ..
هي شبحتله شويه بعدين قالت..
/صايره حاجه تانيه ولا؟
هو شافلها شويه بعدين قال..
/حولوني من منصبي في الشركه..
مغليه بصدمه؛علاش!؟
الجالي بقهر..
/مش معروف..نحس في بوي مامشاش عليه يام..
مغليه:لالا مستحيل..كان بيدير هكي راهو قال بوك يصدق في حد يحلف ع المصحف..
الجالي:باهي مني!
مغليه؛باهي كلمه قوله يشوف الموضوع!
الجالي:لا..نمشي غدوة بروحي نشوفه قبل وكان لقيت في داعي نخبره تو نخبره..
مغليه بحسره..
/والله عين ياولدي والله عين..
وضاماته لحضنها وقعدت تقرا عليه..
وهو سرحان يفكر في كل شي صاير معاه..
🍃🍃🍃🍃🍃🍃
اليوم التالي...
29يوليو..سنة 2018
الساعه 12:00قبل الظهر..
في مكتب مسؤول ما..
الجالي:من حقي نعرف السبب..
؛ياباش مهندس افهم عليا الحكايه بالانتخاب وانت ليك توا في الاداره قريب 6ستة سنين لازم غيره ياخد فرصته..بعدين انت الله يبارك ولى عندك اسم معروف احسن الشركات يطلبوك لإدارتها وين ماتمشي حتلقى الفرص قدامك انت صاحب تصميم ولى عالمي شن يخليك تقعد مدير لشركة تابعه للدوله شن بتحصل منها!
الجالي:ع قولتك معاش يليق بالجالي شنيبه يقعد في مكان زي هدا....
ضحك الراجل نص ضحكه وقعد ساكت..
الجالي تصنع التجاهل وقال..
/باهي نقدر نعرف من بيجي في مكاني!؟
:الى الان ماعنديش معلومه بالخصوص بس المدير الجديد حيستلم الاسبوع الجاي..
هو بإبتسامه غرور قال..
/ان شاء الله يقدر يخافظ ع اللي درته..وناض وهو يقول..يللا نشوفك ع خير .
:موفق باش مهندس..
ابتسم الجالي بتصنع وبمجرد مالف بش يطلع تبدلت ملامح وجهه للغضب وطلع من المكتب...
🍃🍃🍃🍃🍃
"قالوا كان عندهم من ساعه يسأل عن السبب"
مختار وهو يحك في ذقنه..
/وغد..
رضا؛وقالوا سأل من بياخد مكانه بعده وماخداش معلومه..
ضحك بعدين قال..
/هممم...
رضا:هادي حرب مافيهاش شروط لعبة الشطرنج..
مختار:ايه حرب والحرب دير فيها حلفاء هما في الاصل اعدائك لغايه ما بس في الوقت ماتفوتش فرصه الا وتضربهم فيها بدون مايعرفوا ان الضربه جايه منك انت..اما الشطرنج لعبة فيها حرب من نوع تاني..بس..لتوا الرؤيه عندي ضبابيه ومش واضحه..لكن في النهايه النصر حيكون حليفي زي ماتعودت..
رضا؛رد بالك الثقه الزايده تودر صاحبها..
شبحله شويه بعدين اشرله بيده يطلع..
هو هز راسه بالموافقه بعدين مشي طلع...
ناض مختار من مكانه ومشي ناحية طاولة الشطرنج..
وقف عليها..وقعد مركز بعيونه ع قطعة الملك في الفريق المواجه لفريقه..
القطعه البيضا اللي مش معروف لتوا قدامه او مش واضح من تمثل في نظره لعند هاللحظه...
#مالكش_حق
#طوبى
...يتبع...
