#طوبى "جنة طوبى"
#جمان_فريد
#الجزء_104"الاوراق المتساقطة/ورقة وداع"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#الصلاة_على_النبي
قال السخاوي رحمه الله :
الصلاة على النبيّ ﷺ ، من أبْـرَكِ الأعمال وأفضلها وأكثرها نفعا في الدّين والدّنيا .
القول البديع.أهـ.( ١٠٩)٦
..........
🌿🌿🌿🌿🌿🌿🌿🌿🌿🌿🌿🌿🌿🌿🌿
🍃من روائع محمود درويش:
سَتَنتهِي الحَرْبُ
وَيتَصافَح القادَةُ
وَتَبقَىَ تِلْكَ العَجوزُ تنتَظر ولدَهَا الشَهِيدَ
وَتِلكَ الفتَاةُ تنْتظِرُ زَوجهَا الحَبِيبَ
وأولئك الأطفَالُ يَنتظِرُونَ وَالِدَهُم البطَلَ
لَا أعلَمُ مَنْ بَاعَ الوطَنْ
وَلَكِنَّنِي رأيتُ مَن دَفعَ الثمَنْ🍃
______________________________________
طلعت من الدار وهي لابسة ملاية الصلاة وتليفونها في إيدها..
مشت لدار المعيشه لقت تاله حدا جنة تلعب معاها..
ابتسمت وقالت..
/كان تبي تمشي للخيمه بري توتا وارفعيها معاك..
تاله بإبتسامه:باهي..
طوبى بإبتسامه؛مانوصيكش عليها..
ناضت تاله وخدت جنه رفعتها في حضنها وهي تقول..
/في عيوني..
مشت طوبى بإتجاه الكوجينه وهي تقول بضحكه..
/سلمهم..
وصلت في الكوجينه وخشت..
لقت فايزة واريج ومعاهم حواء يحطوا في حافظات عشي المعازيم في باكوات"علب" كبيرة بش بيرفعوهم لحوش علي الواعر..
مررت نظرها عليهم وقالت..
/اني طالعه شويه لخالي..
اريج:ابله نبيله جت معاه؟!
هزت طوبى راسها ومشت من حداهم..
وهي ماشيه للباب شافت تاله طالعه بجنه وهي تغنيلها..
ابتسمت وكملت طريقها لين طلعت من الحوش وتوجهت للمربوعه الخارجيه..
🍃وصلت فيها وخشت وهي تقول..
/السلام عليكم..
المحجوب بإبتسامه..
/وعليكم السلام..
وصلت فيه طوبى صافحاته باليد وباست راسه بعدين قعمزت جنبه وهي تقول..
/شن جو؟.
تنهد وقال؛ملخبط شويه..جبتها واني خايف يصير موقف مش تمام..
طوبى:هو راهو قبل ماصار شي غير ان سدرة متجاهلتها وحسيتها مش طايقتها لكن ماسمعتش منها كلمه غلط..
المحجوب؛هدا شويه يابنتي لما الواحد يكون موجود في مكان يحس روحه غير مرغوب فيه!صعبه هلبه..
طوبى:معاك..بس هي يعني من مني تاني شافت شي زعلها! عارفه قدرها عندي وعند مرت خوها لاحني ولاغيرنا زعلها في حاجه..
المحجوب:انتي تعرفي نبيله كويس عقلها كبير ماديرش هكي من فراغ..
تنهدت طوبى وقالت..
/بعد تفض زحمة العرس تو نقعمز مع سدرة ونفهم كل شي..
المحجوب:ياريت بش نعرفوا شن قايللها هداكا!
طوبى:إن شاء الله..
شافلها شويه وقال..
/انتي شن جوك ؟
بضحكه قالت..
/عادي زي قبل..مرواحة هداكا التاني ماهمتنيش هلبه..
المحجوب؛ماتهمكش بكل مايقدرش يقرب منك ولايديرلك شي..لكن جنه كيف بديري في وضعها مازال بتخليها تمشي غادي!؟
طوبى:طبعا لا في وجود هديكا نجاة لايمكن نبعتلهم بنتي..
المحجوب:باهي كيف بديري توا؟
طوبى:هو مش حنحرمه يشوف بنته..يشوفها لكن في مكان تاني..ومشي لحوش شنيبه مافيش مداما هديكا غادي..
هز راسه وقال:يستر الله..يصير خير إن شاء الله..ابتسم وقال..اهم شي انتي تقعدي زي ماعرفتك قويه معناوياتك في السمي ..
ضحكت طوبى ضحكه تخفي بيها خوف كبير وقالت..
/إن شاء الله..
🍃في هالوقت..
في حوش شنيبه اللي كان مزحوم بعيلة مغليه...
خشت عليهم نجاه وخوات مغليه وخوتها بالوحده ناضوا يعزوا فيها..
نجاه في هديكا اللحظه كانت تفور وتغلي من الغضب والسبب يرجع لإستقبال صغارها الجاف ليها وتعلقهم الواضح بسميرة لدرجة ان جوري تجرأت وخالفت امر امها لما منعتها تمشي ومشت مع سميره ورفعوا معاهم معاذ
هي كتمت غضبها لأنها عارفه كويس مكانة سميرة عند محمد شنيبه الاصطدام بيها مش لصالحها لذلك قررت ماتتصرفش الا بعد ماتقعمز بروحها وتفكر في الوضع بهدوء وصفاء ذهن وتوصل لطريقة تخليها ترجع اللي خسراته..
☘وهدا نفسه اللي قاعد يدير فيه الجالي بالزبط..
نزل من جناحه وعقله يفكر في اللي ناوي ينفذه حاليا..
وقف لما شاف راما بنت خديجه ماشيه للكوجينه..
ناداها..
"راما"
شافت للدروج ابتسمت وهو نزل ومشالها..وقف عليها مسح ع شعرها وقال..
/تطلعي معاي للجنان نبيك في موضوع..
راما بإبتسامه تعجب:اني!؟
مسح بسبابته ع مقدمة انفها وقال..
/ايه انتي..الحقيني..
خش للكوجينه وهي لحقاته شافاته طلع للجنان طلعت وراه..
مشي بإتجاه الشلال الصناعي وهي تلحق وتفكر بتساؤل في شن يبي يحكي معاها!؟..
وصل في مكان الشلال قعمز حداها..واشرلها تجي تقعمز..
مشت قعمزت وهي تقول..
/شن هو الموضوع؟
تنهد وقال؛اول شي بنسألك صاير شي بين امك ومرت جدك مخليها ماتجيش!؟
راما:مش عارفه خالو..بس شكله صار شي في مرة ماما جت هني لكن ماطولتش روحت وهي مش مزبوطه اني ماسألتهاش وقتها قلت هي تحكي احسن..وفي نفس اليوم ماما تعبت لقيتها في الكوجينه طايحة مغمى عليها..
عقد حواجبه وقال..
/اممم..باهي
