#طوبى "جنة طوبى"
#جمان_فريد
#الجزء_الثالث_والتسعين"خريف"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الصلاة_على_النبي
قال السخاوي رحمه الله :
الصلاة على النبيّ ﷺ ، من أبْـرَكِ الأعمال وأفضلها وأكثرها نفعا في الدّين والدّنيا .
القول البديع.أهـ.( ١٠٩)٦
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃لم أكن ألوح قاصدًا الوداع، كنت أحاول أن أمحو المشهد🍃
_________________________________________
"ايوه ماما"
فردوس وهي شاده تليفونها وتشوف للشاشه..
/ايوه آلاء ماما..
"ماما شن حالكم"
فردوس بضيق:الحمد لله يابنتي الحمد لله..
"ماما شن الوضع !؟"
فردوس بقلق..
/لتوا مافي شي..لكن قالوا بيخشوا خلاص"
"لاحول ولاقوة الا بالله..كلمتوا اريج"
فردوس:لاماكلمتهاش..خفت نكلمها..
"يارب لطفك يارب..يارب مايصير شي..نهاري قاعده عروسة"
نزلوا دموع فردوس وهي تقول بنبرة باكيه..
/الله غالب يابنتي الله غالب..
مطيره:ان شاء الله ماهناك كان الخير تفائلوا خير..تفائلوا..
🍃وفي دار طوبى اللي كانت مسكرتها عليها..
"كلموه توا وطلع طول"
طوبى بقلق:علاش ماجابكش هني!؟
"قالي مش معطل قلت نقعد في الحوش وخلاص"
طوبى سكتت وهي في قمة القلق..
"طوبى..اني بنموت من الخوف ومانبيش نخوف امي معاي"
طوبى قعمزت ع السرير وهي تقول..
/إن شاء الله خير..إن شاء الله مافي كان الخير..
توا بيذن المغرب توضي وصلي وخودي المصحف بعدين ادعي يااريج لينا الدعاء بس ياأريج..
"يارب يارب...حسه آذن المغرب"
طوبى:ايه سمعته توا..خلاص بري ديري اللي قتلك عليه وشن مايصير كلميني طول باهي..
"باهي..سلام"
طوبى:سلام حبيبتي..ونهت المكالمه ونزلت التليفون وهي تشوفله بحزن وخوف..غيرت نظرها لبنتها اللي كانت راقده وقالت..شن بتشوفوا في حياتكم كان حني شفنا هكي!؟
🍃🍃🍃🍃🍃
"ياريتك سمعت كلامي ياولدي وروحت "
عبد القيوم:اللي بيصير ع الناس هنا يصير عليا ولما تجي ساعتي لايردها عني مكان ولاوقت..
"عارف ياعمي لكن ولاتلقوا بأيديكم إلى التهلكه"
عبد القيوم؛ان شاء الله لافي تهلكه ولاشر ويتفاهموا بين بعضهم وتنحز بسرعه..
"يارب ياولدي يارب..ماعندي مانقولك كان افطن لروحك"
عبد القيوم:إن شاء الله ياعمي غير انتم ماتشيلوش همي كيف ماعدت حرب بنغازي تعدي هالحرب..
"الحرب ياولدي عمرها ماعدت ع خير..ربي يهدي النفوس ويحقن الدماء ويلطف بالشعب المسكين"
عبد القيوم؛آمين آمين..
"هي استودعك الله سلم ع الجميع"
عبد القيوم:يوصل حتى انت سلم ع اللي عندك..السلام عليكم..
"وعليكم السلام"..
نهي عبد الله عم عبد القيوم المكالمه وخلاه يكمل طريقه للعمارة..
🍃🍃🍃🍃
ولما وصل لشقته وفتح الباب وخش.
سمع اصوات هدرزة ميز كلهم بما فيهم صوت المهدي..
مشي بإتجاه دار المعيشه وخش وهو يقول..
/السلام عليكم..
لقي مع المهدي ربيع ونضال اللي فاجئاته جيته..
ردوا عليه السلام وهو يقول..
/نضال!...كبيره ياسي!
ضحك نضال وناضله..وصل فيه عبد القيوم وتصافحوا بعدين حضنوا بعض ع السريع..
ولى نضال قعمز في مكانه وعبد القيوم سلم ع الباقي ومشي قعمز جنب ربيع..
عبد القيوم مسح ع حاجبه وقال..
/خلاص اعلنوها..
المهدي:من البدايه كانت واضحه..
ربيع؛الحق اني كنت مكذب لأخر لحظه..
عبد القيوم:لاهي كيف ماقال المهدي واضحه غير نحنا كنا متأملين تصير حاجه تغير الوضع..
المهدي:حسين الواعر شن يحكي؟
عبد القيوم؛قال المعلومات واصلتهم ليها وقت..
ربيع بضيق:الخوف كله من التدخل الاجنبي..
المهدي:هادي اللي يجروا عليها جماعه اللي برا..
نضال:همامش حيدخلوا مباشره..
عبد القيوم اشر عليه وقال..
/عليك نور..من اساسها هك هي..
محمد المهدي؛ماغير حياتنا بتوقف وبتجي ع رووسنا..
عبد القيوم؛قالوها يتعاركن الرياح يجي الكيد ع الصواري..
المهدي:انت بتروح معاي اليوم..
محمد شاف لنضال اللي عطاه اشاره بعيونه مايعترضش..
عبد القيوم؛هك خيرلك يامحمد.
تنهد محمد وقعد ساكت..
عبد القيوم شاف لنضال وقاله..
/انت شن روح بيك؟
نضال؛الحرب ياتارقي..
عبد القيوم تعجبا:مفروض قعدت برا لهالسبب..
نضال:وبنرتاح برا في نظرك وماليا وناسي تحت الدق هني!؟
عبد القيوم؛اقلها طمنوا عليك .
المهدي:نفس الدوة قلنهاله..
ربيع:فيه وجهة نظر كلامه اني لما كنت برا ونسمع عن الحروب اللي صارت السنين اللي فاتوا الليل مانرقده صعبه هلبه راهو..
نضال؛اني غير سمعت انها بتصير ركبت فيا النار..طول رتبت اموري وروحت...
عبد القيوم رفع حواجبه ونزلهم وهو يقول...
/انا هلي سكنولي بالاتصالات يبوني نروح..
المهدي؛كان روحت خيرلك..
ربيع شاف لعبد القيوم..
عبد القيوم بضحكه:اللي بيا بيكم ياخال والعمر واحد..
نضال بضحكه؛ديما نحس فيك عازقها فالساس..
عبد القيوم؛اللي يعيش وحده في الدنيا مايتمسكش بيها واجد الا لوعنده اسباب تانيه خلاته يوعى الصبح ع خاطرها..
نضال والمهدي سرحوا مع كلامه..
اما محمد وربيع كانوا يشوفوله بإبتسامه..
🍃🍃🍃🍃🍃
الاسباب او الاشخاص..
في اللي يتمسك بالحياة ع خاطر ناس يحبها وجودهم مخليه يحب الحياه..او هما محتاجين وجوده..
وفوزيه موت راجل ورفيق حياتها اللي حبها وقدرها وعاشرها بالمعروف..خلاها تحس انها فقدت اهم سبب يخليها تتمسك بالحياة ع خاطره..
من الحزن عليه تعبت وصغارها اللي هما صغار راجلها طلعوا بيها يجروا لاقرب عيادة وهما مش واعيين لشي المهم المراة هادي اللي حلت الحياة في عيونهم وخلتهم يحبوها تقعد موجوده بيناتهم..
ماقعدش في الحوش مع الاقارب غيرمناسك اللي مافارقتهاش مروة..
🍃مناسك ببكي:بالله باتي معاي الليله بالله عليك مروة..
مروة بضيق:غدوة نجيك من الصبح زي اليوم..
مناسك شدت في يدها بقوة وقالت..
/لالا بالله عليك اقعدي الحوش معبي ناس يامروة ماتخافيش.
مروة انوجع قلبها ع حال صاحبتها اللي كانت منهارة ونفسيتها مدمرة..
/باهي تو نقول لماما..
~~~~~~~
فايزة بحزن:خلاص نباتوا الليله وتاله قاعده في حوش جدك..
مروة بقلق:نسمع فيهم يحكوا عن خطاب ماخطاب ومش عارفه شني..
فايزة بضيق:علنوا الحرب وقالوا بيخشوا طرابلس..
مروة تأففت بخوف ومررت نظرها حواليها بصمت..
🍃🍃🍃🍃
"خوتي نادوهم مشوا الزوز"
مالك بعصبيه؛والله ماناقصينهم..ايامنا سود بروحها..
معين:معاش ترتاح البلاد خلاص..
ع جية الدكتورة المسؤوله عن حالة فوزيه..
شافوها وقفت ع خوت مالك الكبار مشولها طول..
عرفوا منها ان حالة فوزيه مش خطيرة وانهم دارولها اللازم وتقدر تروح بعد ساعتين...
🍃وعدوا ساعتين وروحوا بيها...ووين خشت عليهم وشافوها بناتها تمشي ع رجليها ردت فيهم الروح...
🍃🍃🍃🍃🍃
كملت قراية قرآن ودعت لين تعبت من الدعاء..
وقعدت تراجي فيه ع نار..لين سمعت باب الحوش انفتح..
مشتله بسرعه وصلت فيه وضماته بخوف..
هو ضحك وقال:خيرك!..
بعدت عنه وهي شاده ذراعه وقالت بخوف..
/شن يبوا منك؟
ابتسم وقال:تعالي..
خدي يدها ومشي بيها للصالون وهي خوفها زاد اكثر..
حط كيسة جايب فيها عشي ع الطاوله..
وقعمزها وقعمز جنبها وهو شاد يدها..حط عيونه في عيونها وقال..
/زي ماتعرفي اني واحد من الناس البارزة في الجهاز متاعنا..ولازم نكون موجود لما يصير أي طارئ وهادي حرب يعني لايمكن نتخلف عنها..اني نبيك ماتفكريش في شي يخوف..اني خشيت معركة البنيان اللي صار عادي شي عقلك مايتصوراش الموت كان محاديني..كل مرة نقول هادي ساعتي وربي ينجيني..حبيبتي الاعمار بيد ربي..لو كاتبلي نموت..نموت واني حداك..
اريج ودموعها في عيونه شدت ع يده وقالت..
/توا بس بديت نرتاح ونفرح..الساعات اللي غبت فيهم حسيت روحي بنموت فيهم..اسكندر اني تعودت عليك هلبه..
ابتسم وفي عيونه نظرة حزن كان متمني يسمع كلمة تانيه غير كلمة "تعودت عليك"
خداها لقلبه وقال..
/ربك مايفرقنا ان شاء الله ونكملوا العمر مع بعض بنيتي..باس ع راسها ومسح ع شعرها...
وهي كانت متمسكه بيه بقوة وبخوف..
🍃🍃🍃🍃🍃
ملتمين حوالين طاولة العشي..
حطتلهم عشاهم..بعدين حطت للصغار عشاهم وحطت معاذ في حجرها وقعدت توكل فيه .
راجلها كان حاس بيها..حاس بخوفها ع خوها اللي خلا جوها متغير والهم باين في عيونها..
ونضال كان خايف زيها..وجع حالها..لكن خوفه خوها كان كبير..والسبب معروف..ضحكة اريج اللي كانت لإسكندر قاعده بين عيونه..اريج مرتاحه وفرحانه معاه..لو صار فيه شي حتعيش وجع الفقد من جديد وهو اللي يعرف قداش فقد بوها مأثر عليها...
"كولي جوري حبيبتي"
جوري:مانحبش البصل..
سميره حولت البصل من قدامها وقالت..
/كولي توا..
جوري بإبتسامه:شكرا..
سميرة بضحكه وهي تقلد فيها:عفوا..
ابتسمت جوري..
وحمزة ياكل وهو يراقب في سميره..
اللي كانت مغليه تشوفلها بكره..
محمد؛تعشي انتي..
سميره:حاضر خل نعشيهم قبل..
تنهد نضال وهو ياكل..وبوه وامه شافوله..
وسميره لهت مع صغار نجاه وعقلها مابطلش تفكير في خوها..
🍃🍃🍃🍃🍃
وفي حوش اهل مناسك..
كانوا فايزة و مروة مع النساوين اللي يعولوا يد بيد وكأن الميت ليهم..
اغلب الموجودات ركزوا عليهم..واكثرهم مراة خمسينيه انيقه وجميله..عيونها ماسيبوش مروة...
شدت وحده من خوات فوزيه وقالت..
/البنيه اللي لابسه سماوي من تكون؟
:هادي صاحبة مناسك وامها صاحبة فوزيه اختي..
هزت راسها ورجعت نظرها لمروة اللي كانت تفرش في المفارش وين قربت منها قالت..
/حبيبتي..
شافتلها مروة وقالت..
/نعم؟..
:ميه بالله..
مروة؛حاضر..وفرشت المفرش ومشت..
وعيون المراة تلحق فيها لين غابت عنهم..لحظات وولت وفي يدها طاسة ميه مسكرة وجتها بيها وطبست عليها وعطتهالها وهي تقول...
/تفضلي..
والمراة زادت ركزت في تفاصيلها بعدين قالت..
/يزيد فضلك..
ومشت مروة طول..
☘وبعد ماساعدت في حطان سفر العشي..
دارت سفره لمناسك وركبت بيها لدارها..
~~~~~
مروة؛جبتلك العشي بش نتعشوا جميع..
مناسك بصوت مبحوح..
/ماخاطري في شي..
قعمزت حداها وحطت السفره بينهم وهي تقول..
/مش بالخاطر يامناسك..علاش ناكلوا حني بش نعيشوا..
مناسك بألم..
/حاسه الدنيا وقفت يامروة بعد بابا خلاص..
مروة :لامش حتوقف يامناسك مازال ماشيه..مازال في ناس يبوك..امك وخوتك..امك بالذات يامناسك تعرفيها مريضه وتبي من يقويها..
نزلوا دموعها وهي تقول..
/خايفه اهلها يروحوا بيها يامروة..
مروة:شن تقولي انتي! هدا حوشها وانتم صغارها علاش بيروحوا بيها!؟
مناسك بألم:مش امنا يامروة..
مروة:هي في حكم امكم حتى في الشرع...
سكتت مناسك وهي تفكر بقلق..
مروة:معاش تفكري التفكير هدا..سامحيني راهو تفكير غبي..
شافتلها بصمت..
مروة:ياسرك دوة وهيا كولي..وخدت سندويتش ومدتهولها..خودي..
نزلت عيونها للسندويتش ومابتش تاخده..
مروة قسماته بين زوز وقالت..بيني وبينك قسمة خوت..
مناسك وهي تشوفلها..
/مروة بعد يتم العزي بتقاطعيني مرة تانيه!
مروة قعدت تشوفلها بصمت..
مناسك؛قولي..
مروة:تعشي توا..
مناسك:لامش واكله شي لين نعرف مانبيش نتعود عليك مرة تانيه وترجعي تقاطعيني..
مروة:كولي باهي..
مناسك بإصرار:لا لين تجاوبيني..
ابتسمت مروة وقالت..
/لا..
مناسك؛ماتمشيش فيا ولا!؟
مروة:والله لا..اصلا اني كنت نبي نرجع علاقتي بيك بس..
مناسك:مالك انسيه..انسي ان عندي اخ اسمه مالك..
مروة هزت راسها بإبتسامه وقالت..
/كولي..
ضمتها مناسك بقوة..
هي ضحكت وقالت..
/باهي خلاص ياهمي هيا تعشي..
بعدت مناسك وهي مبتسمه وخدت من مروة الخبزة وبدت تاكل..
ومروة تاكل معاها وهي مبتسمه..
☘بعدين حاولت تهدرز عليها هدرزة تغيرلها جوها لين كملوا عشاهم..
بعد العشي صلوا مع بعض..وقروا القرآن..لين نعست مناسك..
رقدت ومروة حداها...قعدت سهرانه تفكر في الحرب..لو صارت كيف بيصير في قرايتهم!؟..
وسهرت مع افكارها فكرة تاخدها وفكرة تجيبها لين خداها النوم ورقدت...
☘☘☘☘☘
فاقوا مع الفجر وصلوا صلاتهم..وقروا قرآن مع بعض..
بعدين طلعوا للكوجينه اللي في الدور التاني..داروا قهوة وولوا للدار..بش يشربوها في بلاكونتها..
☘مناسك؛من هداكا اليوم معاش كلمته بكل هو يبعتلي في رسائل كل يوم لين سخفني لكن اني ماقدرتش نخلف وعدي لماما..
مروة:قعد يبعت مع اخته كل يوم سلامات..
مناسك بإبتسامه تعاطف..
/طيوب ولطيف هلبه..
مروة ابتسمت ورشفت من القهوة وهي تتفرج ع الجنان لين جو عيونها ع قفص العصافير قالت..
/العصافير..زعمه في حد لهي بيهم!؟
مناسك:ننزلوا نشوفوهم!؟
مروة:لالايطلعلنا حد من المربوعه..
مناسك؛من جهة الكوجينه اللي لوطا مش مقابلينهم..
مروة فكرت شويه بعدين هزت راسها بالموافقه..
☘ووسط الهدوء نزلوا الزوز للدور الاول..
كل من في الحوش مازالوا راقدين...
هما طلعوا من جنان الكوجينه..يمشوا وهما رافعات ملايات الصلاه..منظرهم الزوز كان لطيف جدا..
🍃وفي جنان الحوش من القدام..
كانوا معين ومالك مروحين من صلاة الفجر..
مالك معاش سيب الصلاة فالجامع وجر معاه معين اللي معاش فارق الصلاة في الجامع..
مالك:اييه نسينا السكر..خل نمشي نشوف في سيارتي..
ومشي من حداه..
وهو قعمز نص تقعميزة ع حافة النافورة وفي يده طاسة "مكياطه"...
فجأه سمع رفرفه جناح عصفور..شاف لمصدر الصوت..
بانت عليه مروة وهي لابسه ملايه ورديه وشاده قفص العصفور بيد واليد التانيه شاده بيها العصفور..
ابتسمت وقالت..
/صباح الخير عصفيرة..وقرباته ليها وباست راسه..
معين غير نظره عنها طول وهو ياكل في شفه السفلي من التوتر..
ع جية مالك..هو شاف جهة قفص العصفور مرة تانيه مالقاهمش..رجع شاف لصاحبه ومازال ياكل في شفه السفلي مالك مدله السكر وقال..
/ع الحظ لقيت زوز..
خداها منه معين وقال..
/نبي نقولك حاجه..مش عارف كان تفرحك شويه ولالا..
مالك تنهد وقال..
/حتى لو كانت تفرح مش حنحس بيها..
معين حط السكر وحرك بالكاشيك وقال..
/اني نقولك وخلاص..الكاتيوشا..
مالك بإستغراب:
/كاتيوشة شني!؟
ضحك معين وقال..
/قصدي البنت هديكا صاحبة اختك..
مالك؛مني منهم!؟
معين بتعجب..
/كيف!!؟ ع قداش وحده من صاحبات اختك مكبد انت..!؟
مالك بلهفة قلق..
/خيرها!؟
معين:هني..
مالك بعدم فهم..
/وين هني!؟
معين:لاحول ولاقوة الابالله..هني يعني في حوشكم جايه تعزي وشكلها بايته عندكم..لمحتها توا هي واختك حدا قفص العصافير..
مالك بعدم استيعاب..
/تتسهوك!
معين ابتسم؛لاوالله..اولامس شفتها خاشه مع امها شافاتك لما كنتوا تبكوا انت ومازن واضح من عيونها وجعتها..
مالك يسمع في كلام صاحبه وقلبه يدق بقوة..
معين:مش عارف كان كلامي اللي بنقوله توا في مكانه..لكن يقولوا ربك في وسط الشر يدس الخير..مرات ربك قدر هكي لحاجه تفرح تصير بعدين..
مالك يفكر في كلام صاحبه ومتمني من قلبه يكون صح..
معين:عارف مش وقته كلامي..لكن قلت نقولك شي بالك يفرحك ويهون عليك شويه ..
مالك ابتسم بعدين قال..
/عارف نيتك ياعشيري..لكن تعالى هني شن كاتيوشا هادي!..
معين:قتلك قبل لسانها طويل ترد الكلمه بعشرة صواريخ في جرة بعض زي الكاتيوشا..
ضحك مالك..بعدين شرب من المكياطه..
ومعين يشوفله بإبتسامه..
تلاشت ضحكة مالك بعدين تنهد بألم..
معين:شد حيلك وقوي عزمك يابوصاحب امك واختك توا عابيين عليك انت اللي قاعدلهم توا..
مالك:مازال مش مستوعب..في عقلي نقول مسافر وسيوره مروح..
معين:في البدايه ديما صعبه لكن مع الوقت تتعود..جربته الشعور هدا مرتين مع بوي وخوي الكبير الزوز راحوا فجأه..تعرف وقتها شن صار فيا..لكن بعدين تأقلمت وتعودت وعشت..
هز مالك راسه وقال..
/الله يرحمهم..
معين:ويرحم عمي سالم...
مالك:آمين..ورشف من طاسة المكياطه..
🍃🍃🍃🍃🍃
بطلة كاجوال بسيطه كان نازل من الدروج...
وصل للدور الاول متوجه للباب..
وقف في مكانه لما شافها تراجي فيه..
صابرين؛صباح الخير..
هو قال:صباح الخيرات.
تنهدت وقالت..
/بخصوص الموضوع هداكا..اني موافقه..
ابتسم وقال..
/برافو..تو نوصل موافقتك لصاحب الشأن..ايه لحظه..نعطيه رقمك عادي!؟
هزت راسها بالموافقه..
هو بإبتسامه واسعه قال..
/مبروك..ومشي طول للباب فتحه وطلع وسكره وراه..
مشي طول لسيارته ركب وشغلها..وتحرك بيها وطلع من الفيلا..
قطع مسافه قصيرة لين وصل في فندق..
درس قدامه وقام تليفونه ودار اتصال..
/نراجي فيك ياحور العيون..سكر وحط تليفونه قدامه..
استنى لحظات لين انفتح باب السيارة..
ركبت وهي تقول بإبتسامه حماس..
/صباح الخيرات..
هوقال:صباح الفلات..متحمسه هلبه شكله..
فاتن بإبتسامه حماس..
/فوق ماتتصور واخيرا بنتعرف ع سدرة..
ضحك وتحرك بالسيارة...
☘طول الطريق وهما يهدرزوا في اكثر من موضوع اللي حرب كانت من ضمنهم..
وبدون مايحسوا بالطريق لقي مختار نفسه خاش لسويسرا..
شغل منظومة السيارة ع اغاني فيروز..وبدي يغني معاهم..
وفاتن تتأمل فيه بنظرات عيونها اللي يغزلوا في الحب..
مختار:ااه يافيروز..
فاتن:اول مرة نسمعك تغنيلها..
مختار:كنت كارهها وتوا رجعت حبيتها..
ابتسمت فاتن..
مختار:اهو وصلنا..
شافت فاتن القدام..بان عليها المركز وزادت تحمست لشوفة سدرة..
🍃وسدرة فهالوقت كانت كيف خاشه لحصة العلاج الطبيعي..
ومعاها صفيه وإياد..بس هي كانت مضايقه ع الاخر وفاقده الرغبه للعلاج..
مش هي بس..حتى الإخصائيه المشرفه ع علاجها..
جهينه؛جاهزة سدرة؟
كيف جت بتجاوب..
دق الباب..
توجهت انظارهم ليه..
جهينه:تفضل..
انفتح..ويشرق وجه الاخصائيه بإبتسامه فرح..
مختار بنبرة بهجه..
/Good evening
ردت عليه الاخصائيه بكل حماس..
هو رفع حواجبه ونزلهم وابتسملها مجامله..بعدين قال لجهينه..
/شني تراجو فيا شكلكم..اشر ع سدرة وقال...اكيد مابيتيش تبدي من غيري صح..
سدرة اللي كانت فرحانه بجيته بينت العكس وهي تشوفله بأمتعاض..
ضحك بعدين قال.
/جايب معاي ضيفه لطيفه جميله بتموت وتتعرف عليك..
شاف للباب واشر لفاتن تخش..
هدا كله واياد يشوفله بدهشه..
خشت فاتن وهي مبتسمه بشي من الخجل وقالت..
/مساء الخير..
ومشت لصفيه طول سلمت عليها وعيون سدرة تتفحص فيها..
بعد السلام ع صفيه التفتت لسدرة..
بإبتسامه حلوة قالت..
/فاتن..صديقة مختار...
سدره ميلت راسها وهي تشوف لخوها اللي كان مدرق عنها..
مختار غمز واشر براسه ع فاتن..
غيرت سدره نظرها لفاتن وقالت..
/اه...اهلا..
فاتن بإبتسامه..
/وبيك.
والاخصائيه تشوف لفاتن من فوق لتحت..
غير مختار نظره لجهينه بيكلمها جو ع اياد..رفع حواجبه وقال..
/اووه..اسف ماشفتكش..ومشاله وصافحه..
اياد:اهلا..
سحب مختار يده وقال..
/وبيك..شاف لجهينه وقال..شن جوها في العلاج بالسباحه..
جهينه؛ممتازه..
سدرة:هيا..دكتورة..
جهينه كلمت الاخصائيه..
وبمساعده الممرضه..وقفوا سدرة ع الممشى...
قعمزوا فاتن وصفيه ع الكراسي يتفرجوا..
واياد واقف حداهم يراقب في علاقة سدرة بمختار..
فاجئه اللي شافه..حسسه ان علاقتهم ببعض كانت قويه جدا..حس هالشي من تجاوب سدرة معاه...
اما فاتن تأثرت هلبه ووجعها قلبها لما تأكدت ان مختار يحب اخته سدره حب كبير ملبسه ثوب الحقد وقاعد يتجاهل في حقيقته..
دمعوا عيونها لما شافاته كيف ضمها وين وصلت بيه..
بعدين رفعها وقعد يدور بيها وسدرة تضحك..
اياد للحظه حس ان اللي ينقال عن مختار مبالغ فيه لدرجة انه شك في صدقه..لان حب سدره ليه واضح...لو كان انسان سيء زي الوصف ماكانتش تقبلاته تحت اي ظرف..
☘بعد مارفعها وحطها ع الكرسي متاعها..
جاته الاخصائيه وخداته ع جنب..
وعيون فاتن معاها..
صفيه:شن تحسي روحك توا..
سدرة هي داهشه شويه..
/كويسه..
جهينه:هي رجعوها لحجرتها بش ترتاح..
صفيه مشت ورا الكرسي شاداته وقعدت دف بيها..
وجهينه والممرضة معاهم..
اياد لحقهم بعد ماسرق النظر لمختار اللي كان يهدرز ع اخصائيه وابتسامته شاقه وجهه..
وفاتن تشوفلهم ومربعه ايديها وتهز في رجلها..
مختار:Ok.. see you..
شاف لفاتن واشر للباب..
مشت فاتن بتطلع وهي تشوف للآخصائيه من فوق لتحت..
وهو وراها..
☘فاتن؛شن تبي الصفرا هادي..
مختار بإبتسامه غرور..
/معجبه..
فاتن بسخريه:فرحان هلبه..
مختار:ومن يكره قولي..في راجل يكره يشوف البنات حواليه زي النحل ع الورده.
فاتن بسخريه:ياسلام!
مختار بإستفزاز:باهي شن ندير قوليلي شن ندير..كان ربي خلقني قنين..وجذاب...اني شن ذنبي !..
فاتن:باهي اسكت اسكت خير مانحرمك من جاذبيتك للأبد..
قعد يضحك..
وهي ابتسمت بعصبيه...
هدا مختار ضحك وقال..
/وهادي سدرة المنتهى .
فاتن:حتى هي جميله وجذابه وعندها قوة حضور برغم الحاله اللي هي فيها..بس..
مختار:بس شني!؟
فاتن؛حسيتها بعيده عن طوبى..مافيش شبه بيناتهم..طوبى حسيتها تفرق عنها هلبه..
مختار:طوبى شبهي..
فاتن شافتله وهي متفاجئة قالت..
/قصدك حسيت!
مختار:متأخر..حتى نظرتها ليا مش زي نظره سدره..سدرة ماتقدرش درقها حنينها ليا رغم زعلها مني..بس طوبى..نظره عينها قاسيه..
فاتن سكتت وهي تفكر في كلامه...
مختار:خليني من الموضوع هدا..اياد هدا شن جابه!
فاتن بإستغراب:من اياد!
مختار:ايه ماحكيتش عليه قبل..ياستي اياد هدا.....
🍃🍃🍃🍃🍃
ومن بلاد السلام المطلق..
لبلاد الحرب ولت عنوانها....صفة من صفاتها بل ابرزها...
🍃كانت اريج تتوضا لصلاة المغرب في الحمام..
سمعت صوت رزمه..طفت الميه وركزت بسمعها...ماسمعت شي تحساب روحها تتوهم..
رجعت فتحت الميه بتكمل وضوء..سمعت صوت رزم مرة تانيه..
سكرت الميه طول..
فجاه دق باب الحمام..
انفجعت..
"اريج..اطلعي وتي روحك بنرفعك لحوش ماليك"
قلبها يدق بقوة من الخوف..
مشت فتحت الباب وقالت بخوف..
/شن في!؟
قبل جبينها وقال..
/ديري اللي قتلك عليه حبيبتي بسرعه..
سمعوا في هاللحظه صوت رزم..
شدت اريج في ذراعه بقوة وهي تشوفله بخوف..
هو بش يطمنها قال..
/ماتخافيش..هيا بسرعه تعالي..
خداها من يدها ومشي بيها للدار..وشعور الخوف كان غام ع قلبها..
🍃🍃🍃🍃🍃
طوبى بقلق:توا ابله زينب كلمتني قالت القصف حداهم قريب يهبلوا..
مطيره بخوف..
/تسكن في وادي الربيع ولا؟
طوبى بخوف: ايه..
فردوس بقلق شديد..
/ياربي الطف ببنتي يارب..
🍃🍃🍃🍃🍃
ماشي للباب وهو شاد شنطتها وهي وراه..
وصلوا في الباب وقف..
شافلها..وهي تشوفله بألم وخوف..
ابتسم وضمها بقوة وقال عند وذنها..
"نحبك وماحبيتش غيرك في حياتي"..
هي شدت فيه وقعدت تبكي وتقول..
/علاش تقول هكي..
هو بإبتسامه قال..
/ديما نقولك نحبك مش اول مرة..
بعدها عنه وباس جبينها بعدين مسح دموعها وهو يقول..
/ادعيلي بس..
اريج بنبره باكيه..
/ربي مايحرمني منك..
🍃🍃🍃🍃🍃
وطلع بيها من المنطقه اللي هما ساكنين فيها..
كانوا يسمعوا في اصوات الرزم كانت بعيده..
هو كان مضايق ع الاخر..وهي تبكي بصمت وخوف..
🍃🍃🍃
بعد طول مسافه وصل بيها لشارع القهوة..
في المقهى..
كان نضال يتفرج ع الاخبار مع الزباين..لما سمع صوت السياره شاف جيهتها..
لقاه نازل وهي نزلت بعده..شاف وجهها يبكي..طول غير عيونه للشاشه وقلبه موجوع..
معاش شاف جيهتهم نهائي الا لما سمع سيارته تحركت..
رد نظره ليها وقعد معاها بعيونه لين طلعت من الشارع..
وفي هالوقت خطرت ع باله حتى سميره..زاد وجع قلبه...
#خريف
#طوبى
....يتبع....
