#طوبى "جنة طوبى"
#جمان_فريد
#الجزء_الخامس_والتسعين"مراد قلبي"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الأذكار
”البسُوا مِعطَف الأذكار لِيقيكم شُرور الإنس والجَان، ودثِّروا أرواحَكُم بالإستغفار لتمحي لكُم ذُنوب اللَّيل والنَّهار، وإن أصابكم ما تَكرهونه فسترضون وتتيقَّنون بأنَّه خير قدَّره لكم ربّكم لأنَّكم قد تحصَّنتُم باللّٰه.“
- ابن كثير.
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 يا ربّ إنا عاشقون وإنّنا رغم
الهوى، نخشى الهوى نخشاكَ
فامنُن علينا بعفةٍ وصلِ الفؤاد
بحبِه، وارحم محبًّا قلبه ناجاكَ.!🍃
_________________________________________
وقدر الله على اريج انها تفقد جنينها في اليوم اللي فقدت فيه بوه..
لما روحوا بيها من العيادة..كانت خاشة في حالة كآبه مخليتها مش قادره تعبر عن حزنها حتى بالدموع..
ساكته وبس..وملامح الحزن والتهجم احتلوا وجهها الجميل..
لما وصلت لحوشها طلبت منهم يدخلوها لدارها ومايقعد معاها حد الا طوبى..
كانت تبي طوبى تقعد حداها وتقرا عليها قرآن لين تريح في النوم..
🍃وطوبى دارت ماتبي وقلبها متفتت من الحزن ع حالها..
بعد ماراحت اريج في النوم..قعمزت طوبى ع الكنبه بروحها وبدت تدعي لله بصوت خافت كله ألم..
/هون عليها..صب ع قلبها الصبر صب يارب..رضيها باللي قدرته عليها يارب..وعوضها كل خير يارب الخير يللي مايجي منك إلا كل خير...
🍃🍃🍃🍃
قعمز ورا سفرة العشي وهو يقول..
ربيع بضيق:حالهم يبكي الحجر..خوه الكبير يبكي عليه بكي..
نسرين بأسف:ربي يصبرهم..
قسم من الخبزة وقال..
/نبيك تمشي تعزي يانسرين..
بدي ع وجه نسرين ملامح عدم التقبل..
تنهد وقال..
/عارف الموقف صعب..لكن ديريها لله وبعدين ع خاطر بوك..شوفي انتي خوك نضال..نضال..اول من مشي غادي وفوق هكي قعد يوصي في بوك ع مرته..
شافتله وهي ساكته..
ربيع:ديريها واكبري في عين بوك يانسرين..
نسرين؛وامي!؟
ربيع؛سامحيني وماتزعليش مني ملاحظ ان ليك فتره مامشتيش لحوش ماليك..مانبيش نخش في تفاصيل ماتخصنيش..بس نبي نوضحلك ان مشيتك للعزي مش حتغير شي..
غيرت عيونها لولدها اللي كان يلعب ع سيارته الكبيره وهي مضايقه..
ربيع شافله وقال بضحكه..
/تسوق العنة يابطشه..وقعد يقلد في صوت السيارة وصوت منبه السيارة ويحيى يقلد فيه..
ونسرين تشوفله بإبتسامه..
🍃🍃🍃🍃🍃
خش نضال للحوش..
ومشي طول يشوف صغار طاهر...
خش لدار خواته قبل خلتها سميره ليهم..
مالقي فيها حد..عقد حواجبه بضيق..ومشي لدار المعيشه..
وقف قدامها وهو يشوف في جوري ومعاذ كيف راقدين بعشوائيه ومافي حد معاهم..
قدملهم وهو معصب..رفع معاذ الأول ومشي بيه للدار..حطه ع سريره..بعدين ولى لجوري رفعها حتى للدار وحطها ع سريرها..غطاهم..وطلع سكر الباب..
توجه للدروج وهو يطلع في تليفونه من جيبه..
خط ع رقم محمد ولد خوه واتصل بيه..
نادى مرة وانفتح الخط..
"ايوه ياعم".
نضال؛السلام عليكم..
"وعليكم السلام"
نضال؛حمزة عندكم؟
"ايه مع محمد ويزن"..
نضال؛سدرة وين؟
"رفعتها توا تبات في حوش عمتي نسرين"
نضال؛احسن مادرت...تمام محمد تصبح ع خير..
"وانت من اهله"..
نهي المكالمه ومشي ركب الدروج..
🍃🍃🍃🍃🍃
ويعدي عليه الليل وهو يقرا في كتابه المفضل اللي مايقدرش يفوت يوم من غير يقراه..
🍃وكملت اريج ليلتها وهي هاربه بالنوم من الوجع والحزن
وطوبى سهرانه حداها...
لكن امها ماقدرتش تخشلها..من بعد اللي صارلها مابطلتش بكي وتحسر علي حالها..
واللي حواليها ع قد ماحاولوا يواسوها مانفعش..
☘المفروض الحزن ينعاش زي ماهو بدون زيادة ولانقصان..لازم يفرغ الانسان حزنه ومايكمداش..بشرط مايكونش فيه اعتراض ع اقدار الله ولايقعد اسير حزنه لين يقضي عليه...☘
🍂🍂🍂🍂🍂🍂🍂🍂
لكن اللي قاعده تعيشه سدرة المنتهى حاليا حاله غريبه..
ماتتصنفش تحت اي اسم..مشاعر مختلطه مخليتها مش فاهمه اللي قاعده تحس بيه تجاه مختار حاليا..
🍃مختار اللي عيشها لحظات حلوة في المكان الساحر اللي قاعدين فيه..
وراها كل شي حلو في هداكا المكان..
كان يحكي واحيانا ترد عليه صفيه وسدرة ماتحكيش الا مع صفيه...
لعند الليل وهو مازال مستمر في ابهار صفيه..وزياده شعور الغرابه في نفس سدره ناحيته..
دارلهم العشي بإيديه اللي كان من الاكل الغربي..
ووكل سدره منه بإيديه..وصفيه كانت مستمعه وهي تاكل مستطعمه بنه زايده في ماكلته..
وهدا كله وسدرة ماتبيش تبينله سعادتها بالاجواء اللي عيشها فيهم وهو ملاحظ ومتجاهل في نفس الوقت...
🍂🍂🍂
وهما راقدات في الدار ع سرير واحد..
سدرة؛مش عارفه..حاسه..اني قاعده موجوعه منه..
صفيه؛واني نشوف فيه يبي يرضيك وخلاص..سدرة انتي ومختار كنتوا زي التواما..
سدرة بحزن؛كنا..بس توا نحس فيه..غريب عني..خوي..لكن مانعرفاش..
صفيه بحيره:صدقيني مش عارفه شن نقول.. حاجه وحده بس اللي نتمناها ان ربي يهديكم لبعض ويبعد الشيطان اللي فرق بينكم..
سكتت سدره وهي تقول في نفسها..
"حتى اني نتمنى..ياريت"
🍃وهو في الدار متاعه..
كان مقعمزة ع سريره يقرا في في روايته المفضله للمرة السابعه..وفي كل مرة يعيش فيها اكثر من اللي قبلها وكأنه يقرا فيها لأول مرة...
🍂🍂🍂🍂🍂
ويطلع ضي نهار جديد..
ويفاجئهم مجددا بأجواء الفطور اللي دارها قدام الكوخ تحت شجره كبيرة مظلله..
فطروا مع بعض وهو مشغل في اللاب توب متاعه اغاني فيروز اللي رجعوا سدره لأحلى سنين عمرها...
☘☘بعد الفطور..
مختار بإستغراب وازدراء..
/اني مش فاهم حاجه وحده اياد هدا انتي كيف ارتبطتي بيه؟
سدرة في نفسها..
"اني بروحي مش فاهمه"
صفيه؛اياد راجل كويس ومحترم وعقله كبير علاش مش عاجبك اني هدا اللي مش فاهماته؟
مختار؛تمام هو كويس..بس مش لسدرة..
شافتله سدره..
مختار:ايه..مش ليك..شوفي انتي شخصيه ملكيه..ماتمشيش مع من ماكان..انتي تبي واحد زيك مساويك في كل شي..
صفيه شافت لسدره..
مختار بضحكه..
/تفكيري حاليا متفتح قيود الراجل الشرقي كلها محولها لهذا بنقولك..انتي مايصلحش بيك الا راجل واحد بس..
"المهدي".
قلب سدرة زادت سرعة دقاته لما انذكر اسم المهدي قدامها..
ومختار لاحظ تأثير هالشي عليها من لون وجهها اللي تغير للأحمر..
صفيه؛المهدي راجل كويس..لكن دار هلبه حاجات..
قاطعها وقال..
/عندي بيها علم..واني نقولك ياسدره الراجل لما يتمكن من قلبه الحب بالذات اللي زي المهدي لما ينجرح ردات فعله تكون قويه وصعبه..
صفيه بشي من التوتر..
/خلاص توا ماينفعش الكلام في الموضوع هدا كل حد شاف نصيبه..
مختار شافلها بصمت للحظات بعدين هز راسه وغير نظره القدام..
وسدرة كانت حاسه برغبة شديده في البكي..
شافت صفيه الدموع في عيونها غيرت نظرها لمختار وقالت..
/وانت علاش طلقت فاتن؟تبانوا متفاهمين..
شافلها بإبتسامه وقال..
/متفاهمين بس ماننفعوش نكونوا زوجين..بشكل عام الزواج نعتبر فيه تقييد مش مقتنع بيه..
قامت سدره عيونها فيه والدموع مازال فيهم..الح ع عقلها سؤال جرييء..الحاحه خلاها تسأله وبكل جرأة..
"حبيت "
حس ببرودة رهيبه سرت في جسده لين وصلت لقلبه اللي حسه وكأنه جمد ومعاش ولى يدق..
لاحظت كيف تأثر..نظرته ليها بعد ماسألاته السؤال كان فيهم حزن غريب..
وصفيه لاحظت وكان عندها فضول تعرف اجابته ع سؤالها..
ابتسم وقال..
/وهلبه..
سدره:امتى؟
مختار ودموعه في عيونه...
/من زمان..زمان هلبه..
سدره؛يعني ليبيه؟
حرك راسه بالنفي..
سدرة؛وين..عرفتها..
ناض ومشي تباعد عنهم...
وهما تبعوه بعيونهم لين اختفي من قدامهم..
ردت صفيه نظرها لسدره وهي متفاجئه..شافت دموعها نازلات ع خدودها...
🍃وهو بعيد عنهم يمسح في دموعه ويغلبوه ويرجعوا ينزلوا..ويمسحهم..وغلبوه مرة تانيه..
حط ايديه في نصه..وقعد يمرر في نظره حواليه ودموعه مابطلوش نزول..
وتجي ع باله ذكرى من الماضي البعيد..
🍂🍂🍂قبل سنوات🍂🍂🍂
"شوف ازاي بقت حلوة..حلوة صح"
هادي مارييت وهي توري فيه منديل حرير طرزت عليه اسمه..
وهو مايشوفش الا فيها هي قال بهيام..
/هلبه..
قامت عيونها لقاته يشوفلها احمروا خدودها خجلا..
مختار من وسط قلبه قال..
"نحبك"
ارتبكت..ونزلت عيونها..
مختار بحب ولهفه:من اول مرة شفتك فيها..نحبك هلبه..وانتي؟
ابتسمت خجلا..
مختار بنفس اللهفه:اني نبيك معاي..نبي نتزوجك..ترضي بيا واني هدا حالي..سألتك قبل وهربتي..وتوا لازم تجاوبي..
جت بتهرب شد يدها بقوة وقال..
/مارييت هادي اخر مرة نسألك فيها..
قامت عيونها فيه بخوف..
مختار:تحبيني!؟
دمعوا عيونها وهي تقول..
/قوي..
ضحك..هستر من الضحك..
هي حطت ايديها ع فمها بخجل وفزع وتقول.
/كفايه..الناس بتبص علينا..
هو بضحكه..
/عاوديها..قصدي قوليها..قولي..بحبك قوي..
ضحكت ومسحت دموعها..بعدين نزلت عيونها وقالت بخجل شديد..
/بحبك..قوي
مختار بفرح وانفعال..
/واني نحبك هلبه هلبه هلبه..نموت فيك..نموت فيك..
قعدت تضحك..
هو بإبتسامه..
/معناها ترضي تتزوجيني!؟
رفعت عيونها وقالت..
/بس مش دلوقتي لسا كمان شويه..
مختار:اكيد لين ندير الحاجه اللي في راسي ونبدوا بعدها حياتنا..
هي قالت..
/تخلص دراسه صح!؟
تعكرت ابتسامته وحمحم بعدين قال..
/لاموضوع القرايه خلاص انسيه مش ليا اني..شفت طريق تاني ليا غيرها..
ابتسمت وقالت..
/مش مشكله..المهم انك تعمل حاجه لنفسك وانا مستعده استناك العمر كله..
مختار بإبتسامه حب..
/ياعمري انتي..
🍂🍂🍂🍂ويرجع من الماضي..
وقفوا دموعه..وحلت محل ملامح البكاء ملامح التجهم لما تفكر اللي صار بعدين وقال..
/عمري ماحنسامحكم لاانتي ولابوك..
🍃🍃🍃🍃🍃🍃
لبست بنتها بلوزة..وربطت الطرفين اللي حوالين الرقبه..ساوتلها سروالها..بعدين خدت الستريتشه وحطتها ع راسها..
خدت العطر..وعطرتها وحطاته حداها..ضمت بنتها وبدت تقرا عليها..وبعد كملت قالت..
/هيا ماماتي نمشوا نشوفوا خالتو روجه..
وناضت بيها..طلعوا من الدار اللي كانوا فيها لدار نوم اريج..
فتحتها وخشت
لقتها مقعمزه ع السرير وقدامها سفرة الفطور زي ماهي..
سكرت الباب وجتها وهي تقول بلغة طفوليه..
/صباح الخير خويله..
رفعت عيونها في جنه لقتها تشوفلها ببراء وهي حاطه صبعها في فمها..ارتسمت ع وجهها ابتسامه عاركت ملامح الحزن ع وجهها..
ابتسمت طوبى وقعمزت ع السرير مقابلتها وهي تقول..
/افطري..
اريج بحزن؛ماعنديش نيه في شي..
نزلت طوبى جنه اللي كانت تعافر فيها بش تنزل بعدين قالت..
/اريج..فاهمه وعارفه اللي تحسي بيه مش ساهل وصعب هلبه..لكن هدا قضاء الله وقدره ربك هكي كاتب والخيره في كل اللي يقدره ربي..
نزلوا دموع اريج وهي تقول..
/باهي كله وجع!؟
طوبى تنهدت وقالت.
/يقولوا تعرف طعم الحلو لما ذوق المر..واني متأكده ان ربي داسلك شي حلو بالمرة ع قد المر اللي شربتيه في حياتك..
اريج بنبرة باكيه.
/شن هو الحلو اللي بيجي بعدين! خلاص معاش في شي يحلا في عيني..
طوبى:طبيعي تقولي هكي توا..اني قلته قبلك لما مات جدك حسيت معاش في شي يفرحني..بعدين صارت وفرحت لما جتني جنه..ومن بعدها برغم كل اللي صار اطلقت من الجالي وخلصت منه..وقلبي يقولي ان مازال في شي حلو بنعيشه..
اريج مسحت دموعها وقالت..
/يارب..انتي بالذات نتمنى نشوفك فرحانه اكتر مانتمنى هالشي لروحي..
شدت يده وقالت بحب..
/واني نفس شي وصدقيني جاياتك ايام حلوة وتو تتفكري كلامي بعدين وتقولي خالتي اللي اكبر مني بعقلها قالتها..
ضحكت اريج ضحكة خفيفه فرحت بيها قلب طوبى هلبه..
قربتلها وباستها من خدودها وع جبينها...
بعدين ولت قعمزت وهي تقول..
/هي افطري..
تنهدت اريج بضيق..
طوبى:ع خاطر امك ياروجه ريحي قلبها عليك شويه..
هزت راسها ودموعها في عيونها..
طوبى خدت خبزة وكسرتها ..غمست في الكبده وقربتها لفمها..
فتحت اريج فمها وكلت بالغصب..
فجأه سمعوا صوت حاجه طاحت..
شافوا الزوز لمصدر الصوت..
لقوا جنه واقفه ع زيانه وجابده المفرش اللي كان عليها وطيحت اللي فوقها...
كانت تشوف بعدم فهم للحاجات اللي طاحت..
وطوبى بفجعه قالت..
/شن درتي ياشنعوبه!..
وناضتلها تجري.
يدوب ضحكت اريج وهي تشوفلهم..بعدين تنهدت بألم...
☘وماطلعتش من عندها طوبى الا بعد مافطرتها كويس..
ومشت طمنت امها عليها..
وبعدين لهت معاهم في العواله ع الناس اللي جايه تعزي..
وقبل الغدي بشويه طلعت اريج وهي لابسه ثوب الحداد ..
كانت تبان متماسكه بعض الشيء..
ناضوها النساوين يعزوا فيها وهي تقبل في العزي ودموعها تنزل بدون صوت..
وامها تشوفلها بألم..نفسها نظرات سميره ليها وهي تتفكر في وصية خوها عليها..
《اسمعيني بالله عليك...كان صار فيا شي خليك معاها ياسميره..قوليلها تسامحني وتشوف حياتها..وصيتي ليك هادي وصية ياسميره..》
نزلوا دموع سميرة بألم وحسرة..وقالت همسا..
/الله يرحمك ويسامحك..
🍃🍃🍃🍃🍃
"لااني مش ماشيه شفتيها امس شن دارتلنا"
نبيله:انتي حره ياعمتي..المهم قالي رؤوف بعد غدوة ان شاء الله بيرفعكم للشقه..
:وصليها لهديكا اللفعه خليها تفرح..
تنهدت نبيله وقالت..
/بالسلامه ياعمتي..ومشت وخلتهم هي ولميس يدعوا ع غرفه..
🍃🍃🍃🍃🍃
في الطريق..
مروح من مكان جاب منه بضاعة للقهوة متاعه..
وقف عند الاشاره الحمراء..
درست جنبه سياره طالع صوت اغنيه مع اصوات ضحك بنات وهدرزه..حتى ريحة عطورهم وصلاته..
هو فوق انه راجل..طبعه اللي يجري في دمه خلاه في لحظه بيضعف ويشوفلهم..
بس في شي تاني قعد يصارع في هالرغبه بقوة...
شد ع دومان السيارة وهو يشوف للإشاره بتوتر يراجي امتى تولي خضرا بش يهرب..
فجأه..
سمع صوت ماهر المعيقلي يقرا..
《وأما من خاف مقام ربه ونهى النفس عن الهوى فإن الجنه هي المأوى》
شاف يمينه..لقي راجل كبير في العمر في السيارة هو اللي مشغل القرآن..
غير نظره القدام وهو يفكر..
"ربي خلاه يدير هكي..من بكري جنبي هدا وين علا الصوت!"
شعور غريب وحلو حس نضال وقتها..زي شعور الطفل لما يبدا يمشي يتعثر وقبل مايطيح امه تشده وتوقفه ويكمل بيها الطريق..ولله المثل الأعلى..
تنهد بإبتسامه خفيفه ع وجهه..شاف الاشاره لقاها خضراء تحرك طول...
🍃🍃🍃🍃
بعد ماقطع مسافه لابأس بها وصل لشارع القهوة..
درس قدام المقهى متاعه ونادى العاملين اللي عنده يدخلوا البضاعه..
ع جية محمد ولد خوه كان بلبس المدرسه وع ظهره الشنطه..
محمد؛السلام عليكم..شنجو..
نضال؛وعليكم السلام..ماشيه..خيرك هدا وين روحت!؟
محمد بضيق:كنا في مستشفى **** اني والاولاد..
نضال بصدمه..
/شن رفعكم غادي!
محمد؛الطريق امنه مافي شي اهو قدامك مافيا شي..
نضال:اخر مره..وضربه ع قفاه وهويقول..ياجحش اخر مرة..
محمد وهو يتحسس في الضربه قال..
/باهي..
نضال:ايه وعلاش مشيتوا!؟
محمد:تعرف ايهاب ولد ****؟
نضال بأسف؛شن صار فيه!؟
محمد:جاته شضيه في ظهره ضربتله النخاع الشوكي انشل شلل رباعي..
نضال بوجع:الله المستعان..إنا لله وإنا إليه راجعون.
محمد:قداش حذرته زمان من اخر الطريق اللي مشي فيه لكن هو عجبوه الفلوس والرياسه..
نضال:بشن نفعوه توا!؟
محمد ضم شفايفه لداخله بأسف بعدين رخاهم..
نضال؛ربي يشفيه وخلاص..المهم بنرفع صغار عمك طاهر لعمتك نسرين يقعدوا عندها الفتره هادي قول لأختك تخف شويه ع البنت..
ابتسم وقال..
/حاضر..
نضال؛تعالى..ومشي للحوش ومحمد لحقه..
🍀🍀🍀🍀🍀
ويعدي هاليوم ع عرب سويسرا بنفس الاجواء الحلوة اللي انعكست ع نفسية سدرة هلبه وهالشي بان في وجهها..
صفيه في هاليومين مسحت في عقلها كل شي سيء عن مختار..وحتى انه شككت في اتهامات العيله ليه امه ورا المشاكل اللي صارت في الفتره الأخيره وبدت تشوف فيه مظلوم فعلا..
اما سدرة قاعده مشاعرها متذبذبه اتجاهه..ومش قادره تحدد موقفها منه...عقلها يبي شي وقلبه مخالفه ومش عارفه من تبع فيهم...!
وفي اخر هاليوم روح بيهم للمركز وودعهم ع امل اللقاء مرة تانيه بعد اسبوع في رحله جديده للنمسا..
🍃🍃🍃🍃
ويجي يوم "فرق السو"...
وتجي نسرين لحوش العزي..كانت متخوفه من ردود الأفعال بعض الشيء..
شافت سميره..مشتلها..
نسرين؛عظم الله اجرك..
شافتلها عرفتها وردت عليها..
/اجرنا واجرك..
وتصافحوا..بعدين طلقتها والتفتت دور ع اريج.
لقتها مقعمزه جنب امها..
مشتلها وقفت عليهم وقالت.
/عظم الله اجركم..
اريج؛اجرنا واجرك..
فردوس:اجرنا واجرك ع الله..
مشت وخلتهم وقعمزت في مكان فاضي وكان واضح عليها التوتر...
شافوها باقي نساوين عيلة الواعر ومافيش وحده فيهم جت جيهتها واولهم طوبى اللي كانت مستاءة منها بسبب عملة الفيديو...
قعدت مقعمزه بروحها وهي تشوف للموجودات..
مرت فايزة من قدامها وهي ماشيه للباب..شويه وخشت ومعاها صفاء وحمواتها وعزوزتها..وتجيهم مروة تسلم عليهم..
قعدت معاهم بعيونها وهما يعزوا في اهل اسكندر وبعدين مرته وامها..
فاتوا من قدام نسرين وقعمزوا..وفايزة متجاهله نسرين تجاهل تام..ضاق صدرها ع الآخر..
شويه شافت طوبى طالعه للباب..بعدين ولت ومعاها زينب اللي مشت طول تعزي في اريج..
اول ماحضنوا بعض اريج انهارت بالبكي..
وزينب قعدت تواسي فيها بكلام من القرآن والسيره وكان اسلوبها حلو اثر في كل الموجودات..
بعدين خدت اريج من يدها ومشوا ومعاهم طوبى خشوا داخل...
تنهدت نسرين وهي تشوفلهم..
غيرت نظرها عنهم للي جت قعمزت جنبها..
سميره:تمشي لحوش ماليك؟
نسرين حركت راسها باالنفي..
سميره بضيق:قلبي واكلني ع صغار الطاهر..
نسرين:قاعدين عندي..
سميرة براحه:ريحتي قلبي الله يريح قلبك..
نسرين؛بوي ماقالكش؟
سميره:جاني امس ووين سألته عنهم ماقاليش عندك..
هزت نسرين راسها وهي ساكته..
سميره:بارك الله فيك اللي جيتي..
نسرين شافتلها شويه وقالت..
/واجبي..
يدوب ابتسمت سميره وناضت من حداها..
لحقتها بعيونها لين شافتها قعمزت حدا خواتها..حست اتجاهه بالراحه وتأكدت من كلام خوتها وصغار خوتها عنها..
🍀🍀🍀🍀🍀🍀
ويعدي من هداكا اليوم اسبوع..
كان اخر اسبوع من شهر شعبان...
وياقداش في ناس تأملت تنتهي الحرب قبل رمضان ويولوا لحياشهم..وفي اللي قاعد في حوش وماوصلتش في الحرب لكن تمنى يعيش اجواء رمضان بدون منغصات..
بس مع الأسف هالأمنيات والآمال كلها راحت..واستمرت الحرب..
🍃الاشتباكات قربت من المنطقه اللي فيها حوش اريج..
لهدا اضطرت مجبره تطلع منه مع اهلها لحوش خالتها طوبى وتكمل العده غادي..
وبسبب تدهور الوضع الأمني ودخول شهر رمضان شبه معاش جاهم حد يعزي...
🍂🍂🍂🍂يوم السبت🍂🍂🍂🍂
🍃4مايو...سنة 2019..🍃
الساعه 5:00عصرا..
في الطريق...
كان اشرف رافع صفاء ومروة لحوش اهل مالك..
🍃وصلوا غادي..
استقبل مازن اشرف..
وصفاء ومروة استقبلوهم مناسك ومرت خوها...
🌼دخلوهم للصاله اللي كانوا فيها ضيوف..
وحده من صديقات جيداء..واخت معين..
..بعد السلام...
قعمزوا..واخت معين ركزت بنظرها ع مروة..
وبدوا يحكوا في موضوع واحد مافيش غيره وهو الحرب..
وانسجمت صفاء في الهدرزة مع اخت مناسك ومرت خوها.
اما اخت معين اللي كانت تراقب في مروة..شافتها كيف خدت مناسك ومشوا مع بإتجاه الكوجينه..
🍃طلعوا منها للجنان..
مروة:تعالي للمدرسه غيري جوك..
مناسك بضيق:قولي عكري جوك..
مروة:ع الاقل نتلاقوا.
تنهدت مناسك وقالت..
/مضايقه يامروة مضايقه هلبه..الهم من كل تركينه الوضع كله غم في غم..
مروة بضيق:عندك حق.
خنقت مناسك العبره وهي تقول.
/مش عارفه كيف بيفوت رمضان هدا وبابا وماما مش معانا..
وقعدت تبكي..
ضمتها مروة وهي تمسح ع ظهرها..
مناسك بنبره باكيه؛لو تشوفي رمضان اللي فات كيف كنا مع بعض..نصه الاول صمناه في تركيا ونصه التاني هني..كان احلا رمضان يعدي عليا في حياتي..دارولي فيه حفلة عيد ميلاد عمري ماننساها..كنت فرحانه هلبه يامروة..كان احلى رمضان..ماتخيلتش بكل ان رمضان اللي بعده حيجي هكي..
مروة بحزن: قدر الله وماشاء فعل..بعدتها شويه وقعدت تمسح في دموعها وهي تقول..حني ساكنين في مناطق بعيده عن الحرب حتى الطريق كويسه مافيها شي..نجو ونمشوا لبعض ونديروا سهريات ونطلعوا حتى لاماكن هني حداكم حلوة هلبه في رمضان..
ارتاحت مناسك بعد سمعت كلام مروة وقالت..
/ان شاء الله مروشتي..
مروة ابتسمت وقالت..
/ايه شن جو عصفيراتي..
مناسك بضحكه..
/تعالي شوفيهم..
ومشوا مع بعض جهة قفص العصافير..
وقفوا حداه..ونزلت مناسك القفص..
فتحاته مروة ودخلت يدها بش تطلعهم..
🍃ع خشة مالك للحوش..
وهو ماشي بإتجاه المربوعه..سمع دوشتهم..وقف في مكانه وشافهم..
لقاهم شادات العصافير وهما يتكلموا ويضحكوا..
ابتسم تلقائيا وهو يشوف في وجوههم تضحك..
وقلبه هدا وين ارتاح بعد مارجعت صداقتهم اقوى من قبل..
تنهد بعدين كمل طريقه...
🍃🍃🍃🍃🍃
"عسل البنيه يام تهبل وحتى اختها عجبتني وجوها حلو"
فهيمه؛ان شاء الله درتي لقطه فيها ثمرة..
بضحكه قالت..
/عيب عاد خديت رقم اختها..
فهيمه:مليح بكل..خل تفوت ايامات رمضان الاولى ع خير ان شاء الله وبعدين نسقوا معاهم ونديرولهم زيارة..
هي قالت بخوف..
/يستر الله من هيروشيما اللي جايبتيه كان عرف ينسفنا كلنا..
فهيمه بلامبالاة..
/معاي اني خط ولوح..
بنتها بضحكه قالت..
/تو نشوفوا...
🍃🍃🍃🍃🍃
"اني مانبيش نضغط عليها وهي فهالوضع بس والله لو تشوفي حاله يوجعك مش ساد اللي هو فيه يخش عليه رمضان ومرته وصغاره مش معاه"
طوبى بضيق:مش عارفه شن نقولك..حاولت فيها هلبه وهي مسكرة راسها..خايفة كان اصريت عليها تفهمني غلط..
نبيله بضيق ودموعها في عيونها..
/خسارة بعد تحسنت علاقتهم وولوا متفاهمين يصير بيناتهم هكي..
طوبى:خشوا بيناتهم بالشر يانبيله..
هزت راسها وقالت..
/صح...هي مالا تصبحي ع خير..
طوبى:قدامك كل خير..
ومشت نبيله طلعت من الحوش..
وطوبى سكرت الباب وراها وهي تفكر بأسف وقلق في حال رؤوف وغرفه..
🍃من جهة كان الاسمر التارقي واقف قدام العمارة اللي فيها شقته مع اب سلافه..."نبيه الكسابكجي"
نبيه:الله يعطيك العافيه ياابني معروفك معنا مو أي حدا بيعملوا..
عبد القيوم:الناس لبعضها ياعمي..وكيف ماقتلك خودوا راحتكم ماتضغطش ع نفسك انا ماعنديش مشكله ابدا..
نبيه:خجلتنا والله..
عبد القيوم بضحكه..
/غير ليش بس..
نبيه:ع الاقل بعطيك اجار..
عبد القيوم؛انت كان تبي مقابل اعزمني ع الفطور في رمضان..
ضحك وقال:مابدا حكي هي ياابني..بس عنجد مابدي ضل بعيلتي في شقتك بلاش..
عبد القيوم:انت تبيني نزعل..
نبيه:والله انا رح ازعل واطلع كمان لو ماقبلت..
تنهد وقال ..
/تمام..ناخد منك 200..
نبيه:شقه مثل هي وبهيك مكان اجارها مو اقل 1000 دينار!
عبد القيوم:شقتي ونبي نأجرها ب200..حر..
ضحك وقاله:طيب ياسيدي متل مابدك..الله يكرمك ياابني.
عبد القيوم بإبتسامه:ويحفظك..بس معليش بنطلب منك طلب..
نبيه:تفضل..
عبد القيوم:نبي ناخد حاجات تخصني..
نبيه بضحكه:لحظه شوي..وتباعد عنه شويه بش يتصل بمرته..
وعبد القيوم قعد واقف في مكانه يراجي فيه..
شويه وجاه وهو يقول..
/تفضل..
ومشوا مع بعض خشوا للعماره..
🍃🍃🍃🍃
في الشقه..
البنات مقعمزات في دار المعيشه يتكلموا بصوت منخفض.
لبانه بقلق:اكيد بدوا يطالعنا..
سلافه:مستحيل..
لبانه:ليش!؟هو كان ناطر بابا يجي..
سلافه:مارح يخلينا نطلع ونحنا ماعندنا مكان تاني نروح عليه..
لبانه:ان شاء الله...
"الله يعطيك العافيه يابني"
سلافه بإبتسامه..
/ماما رح تبلش فيه مدايح وشكر..
ضحكت لبانه..
🍃برا..
شاديه وهي شاده حافظه في يدها مدتها لعبد القيوم وقالت بإبتسامه احراج..
/ماعرفت كيف بدي كافيك ع معروفك ماطلع معي غير اني ذوقك الاكل الشامي..
خداها وهو مبتسم وقال..
/تعبتي روحك والله لانبي مكافأه ولاشكر اللي درته واجب..
شاديه:اللي مثلك بالدنيا قليل يابني اللي عملتوا معنا بيعملوا الاخوات لبعض..
ابتسم راجلها وقال:ايه والله..
عبد القيوم بضحكه؛تمام..رفع يده اللي فيها الحافظه وقال..لكن بنتعبك واجد كان خديت عليه..
نبيه:تعودت عليه قصده..
شاديه بضحكه:فهمت عليه..انت متل امك ابني ادلل شومابدك بطبخلك..
ابتسم وقال..
/يطول في عمرك ويحفظك..مانعطلكمش..تصبحوا ع خير.
شاديه بإبتسامه:وانت من اهله ياابني..
ومشي عبد القيوم ومعاه راجلها يسقد فيه..
شاديه:الله يحفظه ويسعد قلبه..
🍃وفي الدار..
لبانه:تخيلي لو انكم متزوجين..ماما رح تكون حمايه عسل..
سلافه تنهدت من قلبها بهيام..
واختها تضحك عليها..
🍃وهو طلع من عندهم بعد ماخدي شنطه فيها حوايجه واوراقه المهمه...
وتوجه طول لسوبر ماركت كبير مشهور..
خدي منه بضاعه لرمضان بكميات كبيره..وبعدين طلع بيها لشارع القهوة...
وصل قدام حوش علي الواعر..
نزل ودق الباب...
🍃وفي نفس الوقت داخل..
اميمه:جنان الحوش هدا مشرح اكثر..
طوبى:اني نحب جهة الكوجينه متاعه حلوة هلبه..
اميمه:صح..فنصت وقالت..حي نسيت الرز..وخشت تجري..
ضحكت طوبى بعدين قالت لبنتها اللي كانت شادتها..
/جو حلو ولا..
ويدق باب الحوش...
طوبى:هدا جديده روح..هي نمشوا نفتحوله..
ومشت ببنتها للباب وباندفاع وحماس فتحاته ..
وابتسامتها اللي كانت شاقه وجهها بدت تخف شويه شويه..
وهو ثبت ع لقطه..قعد يشوفلها وخلاص..
جنه حركت يدها وهي تحيي فيه..
هو انتبهلها ابتسم بعدين حمحم وقال..
/السلام عليكم..
طوبى نزلت عيونها وقالت..
/وعليكم السلام..
هو قال:الحاج علي قاعد؟.
طوبى؛لامازال ماروحش..
عبد القيوم فرصه وحصلها لازم يستغلها..
/تمام..أا..في بضاعه وحاجات جبتهم للعيله اللي ساكنه جنبكم وبما انك تعرفيهم مافيش مشكله يعني..لو..قصدي حتقبلهم عادي!؟
ارتباك وتوتر..والقلوب صايره فيها حاله..
وجنه تتفرج عليهم وهما منزلين عيونهم عن بعض والحكايه عندهم زي مايقولوا خاشه بعضها..وطبعا هي مش فاهمه ولا حاجه من اللي قاعد يصير..
طوبى ردت عليه بتقول عادي طلعت معاها بصوت ضعيف..
قال:نعم!؟
حمحمت وقالت..عادي..
هو هز راسه وقال..
/تمام..حك مابين حواجبه وقال..تمام..ماتبوا شي!؟
قامت عيونها وشافتله..لقاته يشوف القدام..ابتسمت وقالت..
/بارك الله فيك..
شافلها نزلت عيونها طول..
ابتسم وقال؛فيك بارك الله..غير نظره لجنه وحياها بحركة اليد وقال..باي ياسمحه..
جنه ردتله التحيه..
بإبتسامه قال؛ربي يحفظها..
طوبى:شكرا..ووخرت ع الباب وسكراته..
ضمت جنه ليها وهي مغمضه عيونها وتقول بهمس..
/علاش هكي ولى يصير فيا قدامه ياجنونتي..قولي..
ع طلعة اميمه..سمعت صوت حركة سياره..
وشافت طوبى كيف ضامه جنه قالت بفجعه..
/الجالي!..
شافتلها طوبى بفزع وقالت..
/وينه!..
اميمه بخوف:قصدي من اللي جي بش انتي هكي!!..قصدي لما شفتك متعنقه جنه ومغمضه عيونك وسمعت صوت السيارة خفت!..
تنفست طوبى براحه وقالت..
/رعشتي عظامي..لالا مش هو..
اميمه؛مالا مني!؟
طوبى وهي تحاول دير روحها عاديه..
/هدا..ياربي مني!! التارقي قال يبي جدي..
ابتسمت اميمه وقالت..
/اهااا..
طوبى وهي تحاول تخفي ارتباكها قالت بإستغراب مصطنع..
/علاش طوليتها هكي!؟
كيف جت اميمه بترد يدق الباب..
تنهدت ومشتله وهي تقول...
/مني!؟
"افتحي"
طوبى لجنه بهمس..
/ياريتنا سألنا مني حتى حني مش هدوا ولاتردوا..
خش علي الواعر بعد مافتحتله اميمه..
شاف جنه قال...
/اووو جرينه هني!؟كبيره ياسي..
ضحكوا اميمه وطوبى...
🍃وفي الحوش اللي جنبهم..
طلعت اريج للجنان ومشت للجهة فيها كرسي جدها..
جي بين عيونها يوم موته..مات في وقت زي هالوقت..
في اخر ايام شعبان..نزلوا دموعها بألم..
فجأه سمعت جرس الحوش..
مشت وقفت ورا الباب وقالت..
/مني..
"روجه"..
فتحت الباب طول وهي وراه..
خشت آلاء شافتها..بكت طول وهي تقول..
/ياعمري..
وضموا بعض..وقعدوا يبكوا بالصوت..
وعزيز واقف حدا سيارته هو يسمع فيهم بضيق..
🍃طلعوا امها وعمتها مطيره شافوهم..
فردوس وهي مندهشه:آلاء..ومشت ناحيتهم..
ع جية اميمه وطوبى ومعاها جنه..لما شافوهم كيف حضنوا امهم مع بعض وقعدوا يبكوا معاها..
دموع اميمه نزلت..اما طوبى ضمت بنتها وقعدت تبكي..
طلعت غرفه بعدين وشافتهم قالت ودموعها نزلوا طول..
/آلاء!..
🍃آلاء ببكي..
/حبيبتي شن حالك توا؟
اريج وهي ترشف؛الحمد لله ع كل حال..
الاء وهي وتمسح في دموعها..
/ماما عزيز يبي يعزيك..
اميمه وهي ترشف:جدي في الحوش..
مطيره:الاء اريج تعالوا خشوا...
خدت الاء اختها ومشت بتخش بيها..وصلت في مطيره سلمت عليها بحراره وبكوا مع بعض...وغرفه بعدها..
وبعد خشوا للحوش..سلمت ع اميمه..ووين وصلت في طوبى وحضنتها انهاروا بالبكي مع بعض..
وهما حواليهم يبكوا معاهم..
🍃كلهم كانوا متفكرين الذكرى المؤلمه اللي صارت في ايام زي هادي..ذكرى مهما مر عليهم من ايام صعبه مش حيعيشوا اصعب منها🍃
#مراد_قلبي
#طوبى
....يتبع....
