#طوبى "جنة طوبى"
#جمان_فريد
#الجزء الثامن_والسبعين "حق الرد"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
🌙رمضان مبارك🌧رمضان الدعاء🌙
#الدعاء
📌قال الشيخ ابن باز رحمه الله-:
"الإلحاح وحسن الظن بالله، وعدم اليأس، من أعظم أسباب الإجابة. فعلى المرء أن يلح في الدعاء، ويحسن الظن بالله -عز وجل-، ويعلم أنه حكيم عليم، قد يعجِّلُ الإجابة لحكمة، وقد يؤخِّرُها لحكمة، وقد يعطي السائل خيرًا مما سأل".
[📚فتاوى ابن باز (١٢٢/٢٦)].
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 ” لَقُد صّقِلتُ التَجارُب قَلبيّ حتىٰ باتَ عَقُلاً “🍃
_________________________________________
روحوا المعازيم كلهم..
وقعدوا هما في حالة يرثى لها بعد الفضيحه اللي صارت..
صابرين محبوسه في الدار وهي في حالة صدمه..
ونجاة برا تسمع في النقاش اللي صاير بين مروة وراجلها في دارهم..
🍃"نسيبتي اخت مرتي ام صغاري خالة صغاري تطلع وحده....استغفر الله العظيم "
مروة ببكي؛اكيد يتبلوا عليها صدقني خواتي مش هكي مايدروش هكي..
؛ كانوا ساكنات برواحهم لاحسيب ولاقريب ودايرات مايبو.
مروة بصدمه:من يوم خديتني وانت عارف انهم ساكنات برواحهم شن جد عليك!
:عمايل اختك السود اللي وصلولنا لهالحالة..توا بس عرفت الحاج محمد شنيبه خلا اختك تسكن عنده..
مروة بإنفعال:خلاص عاد راك كثرتها!
هز راسه وهو معصب بعدين قال..
/من الاخير..تبي تقعدي في حوشك وتربي صغارك اختك هادي تطلع من حوش ماتقعدش فيه..
قعدت تشبحله بصدمه وحزن ودموعها يزلوا..
وهو ختم حديثه لما قال.
/وكان ماعجبكش الكلام اطلعي معاها...
🍃نجاة مشت بسرعه للدار اللي فيها صابرين.
خشت عليها وسكرت الباب وهي تقول..
/هداكا هو اللي دارها ولا؟
صابرين قعدت تشوف لأختها بخوف والم ودموعها ينزلوا..
قدمتلها وقالت بغضب..
/عارفه بيدير فيه هكي من الاول!؟
صابرين بصوت مرتجف.
/لالا اني خبرته وقلتله انخطبت وماعدلش بكل..مرات مش هو..
خبطت نجاه بيدها ع فخدها وقالت..
/مالا منو يانهاري الاسود!
صابرين بخوف..
/مرات مرت بوك ماتبنيش نتزوج..
نجاة:وعلاش ان شاء الله!
صابرين رشفت وقالت..
/شن نسيتي انها مستفيده من علاقتي بمختار!
شدت اختها من ذراعها بقوة وقالت..
/لوين واصله علاقتك بيه!؟
صابرين قعدت تشوفلها بنظرات وجع وماتبيش ترد
وهي تزيد تشد عليها..
وينفتح الباب وتخش مروة بغضب سكرت الباب وراها وقالت..
/وطيتوا راسي ومسحتوا بيا بعمايلكم..
قعدوا الزوز يشوفولها بضيق..
مروة وهي تبكي بغضب..
/علاش هكي ديروا علاش..علاش تحشموا فيا وتوطوا في راسي! علاش تخلوا اللي يسوى واللي مايسواش يتشمت فيا.!
امي كانت مراة كويسه والله ماتستاهل يكونوا عندها بناويت زيكم انتم يخلوا في سيرتها تنجاب بالسو..
انتي تتزوجيلي بالسر وبلعناها وقلنا حلال وعم الصغار..لكن انتي ياحقيره شني! طلوع مع الرجاله وركوب سيارات ومشي لشقق..
قدمتلها وهي تقول..ياكلبه..
وصفعتها ع خدها صفعه من قوتها لين يدها وجعتها..
وخرت عنها وقالت بوعيد:
/نعرف شن ندير فيك تو تشوفي...
ومشت طلعت وهي في قمة الغضب وسكرت وراها الباب بقوة..
صابرين بخوف:حي عليا شن بدير فيا!..
نجاه وهي تشوفلها بحده قالت..
/تستاهلي مايجيك جبتيه لروحك..
صابرين ردت عليها بنفس الحده وهي تبكي وتقول..
/شن بديريلي روحك شريفه ماتغلطيش بكل!
نجاة بغضب:ومازال ليك عين تعيطي انتي! مفروض ماتدويش بكل مفروض تموتي..
صابرين قعدت تشوفلها بحزن وهي تبكي..
ونجاه بعد مارمقتها بنظرات كلها غضب وازدراء مشت طلعت عنها بش تشوف صغارها..وخلتها في دوامه خوف وقلق من اللي بيصير فيها بعد هالفضيحه..
🍃🍃🍃🍃🍃
في حوش الصيد..
تحديدا دار عواطف..
عواطف:استغفر الله البنادمه هادي نعرفها من قبل..سامحني ياربي ماتنفعش..
نجمه؛ربي يستر علينا ويجيرنا..
عواطف ؛راهو حتى اختها زيها ومرات احرف..تعرفي يام بديت نشك ان اللي صار بين طوبى الواعر وراجلها هي وراه..
نجمه:لاإله الا الله..حتى اني هكي بديت نفكر بعد اللي سمعته من خالتك رقيه..اصلا جيتها وسكنتها حداهم مش لله في وراها شي..
عواطف قعدت ساكته وهي تفكر شويه بعدين قالت..
/خديجه شن تعلق..
نجمه:شي ماقالت شي.
عواطف بتعجب:غريبه خديجه تقعد ساكته وفي موقف زي هدا!
نجمه؛بالك ماتبيش تدوي قدام راجلها..تنهدت بعدين قالت..احسن درتيها مامشتيش..ربحتي راحتك..خل نمشي نرقد مادام الضي قاعد..
عواطف؛يام ماتنسيش تقولي لبوي..
هزت نجمه راسها بإيجاب ومشت طلعت من الدار...
🍃وفوقهم في شقة ولدها محي الدين..
خديجه:مابتش تقعد عاقله جتها ع راسها اشبح توا من دارها فيها اكيد وحده لافه ع راجلها فضحت بيها..
محي وهو يعدل في المكيف..
/خلاص سكري ع موضوعها الدوة هادي مانحبهاش..
رفعت حاجبها وقالت..
/زي اللي مش راضي فيها!.
التفت عليها وشافلها بنظرة تعجب وقال..
/من جدك تدوي!
خديجه:باهي خيرك حمقت وقعدت تسكت فيا!
هو بشي من الانفعال.
/لان عندي بنت..عندك بنت ياهانم ياللي مستسهله الدوة في اعراض الناس..
هي فهمت قصده وتجاهلاته وحاولت تخفف من انفعاله لما ابتسمت بتعجب وقالت..
/خلاص خلاص هدي..تفجعنا اني وولدك..
شبحلها بإمتعاض بعدين مشي بيطلع حوايج بش يبدل..
هي تبعانه بعيونها بعدين قالت..
/ايه حقه..قول مش شفت غادي!
هو ماردش عليها..
هي قالت:هيا قول مني!..
لو الحوايج اللي طلعهم ع السرير وقال..
/مني!؟
خديجه بإبتسامه براءة مصطنعه...
/تفكر بنت كعبار إبتسام اللي كان يبيها خوك عبد الفتاح..
وجه محي الدين تغير لونه وبان عليه الارتباك لكن قال..
/قصدك اللي كانوا يسكنوا في شارع الاشهب؟شن جابها لنجاة واختها؟
خديجه:ياسيدي قالت بنتها بنت نجاة يعني تقرا مع بنت ابتسام في المدرسه وهما تعرفوا ع بعض عن طريق بناويتهم وتصاحبوا..
هو عقد حواجبه ومشي للسرير خدي حوايجه وقال..
/بندوش..
ومشي طلع من حداها..
ضيقت عيونها وهي تبع فيه بيهم وقعدت تفكر في ردة فعله..
🍃🍃🍃🍃🍃
وتعدي باقي ساعات هالليله..
وصابرين قاعده محبوسه في الدار..ومحبوسه في الصدمه من اللي صار والخوف من مصيرها..
ونجاة اللي تراجي امتى يطلع الصبح بش تروح بصغارها وتهرب من عواقب هالفضيحه اللي سبقتها...
اما مروة اللي عاشت سنين طويله في هدوء بعيده عن مشاكل خواتها...
الانزواء اللي عاشاته مروة بعيد عن حياة خواتها لسنين طويلة تحملت نتيجته اليوم..
فضيحه غيرت نظرة راجلها ليها..وحطت في موقف سيء قدامه..
خافت هلبه من خسارة استقرار حياتها بسببهم لهذا بعد تفكير دام ليله كامله وصلت لنتيجة تخليها تاخد قرار قاسي جدا...
🍃🍃🍃🍃🍃
تاني يوم...الاربعاء..
25يوليو...من سنة 2018..
الساعه 11:00صباحا..
في حوش لطفي الواعر..
طلعت طوبى من الدار وهي تحط في تليفونها في شنطتها..
تلاقت مع فردوس وهي تنشف في الممر..
فردوس:هونا في السياره تراجي فيك..
طوبى هزت راسها وكملت طريقها لين طلعت برا..
لبست الحذاء متاعها وهي تقول بضيق..
/ياربي رحمتك الجو اليوم بكل..
ومشت طول لسيارة أريج..
وصلت فيها وفتحت الباب وركبت وهي تقول..
/ولعي المكيف ولعي..
اريج وهي تطلع بالسيارة من الحوش..
/هيا هي..
وطلعت من الحوش بالسيارة..
🍃وبرا..
كان المهدي واقف ع محمود قدام المطحن يسمع منه..
شاف للسياره لما طلعت من الحوش جو عيونه ع طوبى قعد يتبع في السيارة بعيونه لين درقت بعدين رجع شاف لمحمود وقال..
/ماعنديش مشكله بس نبي نعرف شن المناسبه؟
محمود بإبتسامه:من غير مناسبه نبي نكسبكم ع العشي بس..
المهدي هز راسه وقال:ان شاء الله ان شاء الله..نتلاقوا..
وضرب بيده ع كتف محمود ومشي طول توجه لحوش الصيد..
وصل فيه دق الباب كذا مرة لين فتحله الحاج الصيد رحب بيه ودخله بعدين سكر الباب..
🍃في الوقت اللي درست فيه سيارة تاكسي قدام حوش سدرة..
نزلت منها المراة اللي تخدم مع فايزة بواسطة طوبى.
بعدين مشت للباب الحوش لقاته مردود فتحاته وخشت وسكراته وراها...
🍃ع جية سيارة نجاة اللي وصلت قدام باب القراج..
انفتح وخشت بسيارتها والباب تسكر وراها...
🍃🍃🍃🍃🍃
مقعمزة في الكوجينه متاعها وهي مربعه ايديها وتهز في رجلها بتوتر من الانتظار..
لعند ماسمعت باب حوشها يدق بقوة..
ناضت طول ومشت لدار بناويتها فتحتها وخشت عليهم وقالت..
/مانبيش وحده فيكم تطلع من الدار.
:علاش ماما؟
مروة بإنفعال:اسمعي الكلام وانتي ساكته..
خافوا بناتها والتزموا الصمت..
وهي طلعت وسكرت الباب بعدين مشت بسرعه طلعت للباب اللي قاعد يدق..
وصلت فيه وقالت..
/مني؟
"افتحي"
فتحت الباب طول خشوا زوز من خوتها وواحد منهم يقول..
/وينها الكلبه هيا!؟
مروة سكرت الباب وقالت..
/تعالوا..
هما الزوز مشوا وراها وعيونهم تتفحص في الحوش وجنانه..
دخلتهم داخل بعدين قالت..
/اني مانقدرش عليها بكل هادي تبي تريس فوق راسها..
:توا تفكرتوا ان في وراكم تريس!
مروة مابتش تعلق ع كلامه لكن قالت..
/الفضيحه اللي صارتلي امس في جرتها بيخرب حوشي راجلي مايبيهاش هني انتم اولى بيها خودوها تصرفوا معاها ديروا فيها اللي يعجبكم اني خلاص بالنسبه ليا هادي لاأختي ولانعرفها..
:وينها الكلبه هي وينها!؟
مروة؛راجو شويه..
ومشت طول من حداهم..
هما شافوا لبعض بعدين قال واحد فيهم..
:كان مش من امي والله مانخليها تخشلنا حوش..
:ماتبي الاالذبح..
🍃ومروة خشت ع اختها للدار لقتها ضامه رجليها وتبكي..
قالتلها بعصبيه؛نوضي لمي شلاتيتك واطلعي من حوش..
صابرين برجاءوهي تبكي..
/لايامروة بالله عليك ماديريش فيا هكي وين بنمشي بروحي!
مروة؛بتمشي للمكان اللي تستاهليه نوضي توا توا..
ومشتلها شدتها من ذراعها وجبدتها وهي تنهض فيها بعدين دفتها ع الدولاب وقالت..
/هيا تحركي هيا توا بتطلعي توا..
وصابرين واقفه قدام الدولاب وهي تبكي..
زدات استفزت عصبيه مروة اللي مشت طول للدولاب فتحاته
وطلعت منه شنطه وهي تقول بغضب.
/وطيتي راسي حشمتيني درتيلي العار
ومازال تبيني نشبح في وجهك ونقول اختي..
وقعدت طلع في حوايجها وتحط فيهم في الشنطه وهي تبكي..
وصابرين تشوفلها شن دير وهي تبكي..
وقفت مروة وقعدت تشوف لاختها بحده وهس تقول..
/خمسه دقايق عندك خمسه دقايق بس بعدها مانبيش نشوفك في حوشي..
ومشت طلعت وجبدت الباب وراها..
وخلت اختها تبكي بعبرتها..
🍃ونجاه فهالوقت..
في الشقه طلع في اللحم بش بدير غدي لصغارها وهي تقول..
/ماتعطلش في الدوش ياحمزة..
☘قدام الحمام..
حمزة بصوت عالي؛حاضر..بعدين قال لأخته..كيف بتعرفي؟
جوري:بنخنب تليفون ماما ونكلمها..
حمزة بغضب:تخنبي عينك ديريها نحرش امي..
ومشي خش للحمام وسكر الباب..
وخلا اخته جوري مضايقه وتفكر بقلق ع خالتها اللي شافتها تبكي ومافهمتش شن اللي صار معاها...
🍃وخالتها طلعت من الدار وهي شادة شنطتها وتبكي..
سكتت عن البكي فجأه..
وبدت ع وجهها ملامح الصدمه..
لما شافتهم واقفين يشبحولها بغضب وواحد منهم قالت..
/ياكلبه يابنت...وقال لفظ نابي..
هي بذعر قالت؛لالا..مروة لا بالله عليك ماتخليني ليهم..
جاها واحد فيهم وشدها من وشاحها وجبدها وهو يقول..
/كان خلوك لينا ياكلبه مادرتي اللي درتيه يافا.سده..
وهي تصرخ وتنادي..
/لالا..حول..مروة تعاليلي...ماتخلنيش لسكينه يامروة
ومروة وهي تشوفلهم كانت تقسي في قلبها ع اختها بش ماتتعاطفش معاها حتى شويه..
قعدوا يضربوا وهي تعيط وهي مش هامها شي غير انها تطلع من حوشها..
شافت شنطتها قاعده مشت بسرعه خدتها وطلعت وراهم تجري بيها...
لقتهم بيطلعوا بيها من الحوش..
لوحت الشنطه وقالت..
/خودولها شلاتيتها..
واحد منهم التفت شاف للشنطه خداها..
والتاني يجر في صابرين اللي كانت تبكي بعبرتها لين طلعها من الحوش..وطلع خوه وراها..
مروة مشت بسرعه وسكراته وقعدت واقفه عليه وهي تسمع في صوتها بكاها لين بدي يختفي..
بعدين سمعت بيبان سيارة تسكروا..
وشويه وسمعت صوت السيارة تحركت وتباعدت عنهم...
هني انهارت وقعدت تبكي بألم..
وبناتها واقفات بعيد عليها وهما يشوفولها بخوف ويبكوا بحزن ع خالتهم..
🍃🍃🍃🍃🍃
"فاتوا ثمانيه شهور وتوا انتي في التاسع والحمد لله لكن مازال تبي تردي بالك التحليل عندي كويس نوعا ما واني نبيه يكون ممتاز ياطوبى مادا بيك تجيبي في موعدك حبيبتي"
طوبى هزت راسها وقالت؛ان شاء الله..
الدكتورة بإبتسامه؛خلاص هانت كلهم 3اسابيع وتشرف حنه اللي هبلتنا..
ضحكت طوبى وقالت؛ع خير ان شاء الله..
الدكتورة؛إن شاء الله حبيبتي..
🍃وطلعت طوبى من حجرة الدكتورة متاعها وشعور حلو متكملها قاعده تحس بيه..ممكن يكون شعور الشوق لشوفة قطعه منها من قلبها...كانت تعد في الايام والساعات بش تشوفها بين ايديها..
بس وسط هالمشاعر الحلوة تسلل الخوف وخالطها وخلا ابتسامتها اللي ع وجهها تخفت..
وقعدت تفكر في اللي بيصير بعد تجي جنه..
اللي حتكون رابط قوي بينها وبين الجالي وعيلته...
وهي ماشيه وتفكر...
تلاقت صدفة ببنت عمها..
أميمة اللي لما شافتها تفاجئت ودمعوا عيونها..
كانت ناويه تمشيلها وتتأسف منها بس تراجعت لما لقتها مشت كملت طريقها عادي ولاكأنها شافتها اساسا...
قعدت اميمه تبع في طوبى بعيونها اللي غرقوها الدموع وهي حاسة بوجع في قلبها..
الجرح اللي جي لطوبى منها ماكانش هين..
كان خذلان كبير وهادي ردة الفعل الطبيعيه للشخص المخذول من اقرب الناس ليه اللي ماتوقعش تجي منهم الوجيعه...
طوبى لما تخطت اميمه كانت مضايقه هلبه..بس الموقف اللي صار بينهم اخر مرة جي بين عيونها..
وخلاها في نظرها تتساوى مع الناس اللي طعنت في شرفها وافترت عليها...
بل ممكن هي تكون الاسوأ بينهم كلهم...
🍃وصلت لصالة الانتظار وقعمزت فيها وقعدت تراجي في اريج..
وهي تستنى..جو عيونها ع دكتورة مقعمزة وقدامها ولد صغير جميل الصورة يكلم فيها..هي كانت تسمعله بإهتمام..
مرة تمسح ع خده..ومرة تشد ايديه الزوز وهي تكلم فيه..
شويه جي دكتور هي تعرفه..الدكتور خالد..
واقف قريب عليهم..
ناضت الدكتورة وهي شاده في يد ولدها وقدموله..
هو خدي ولده من يده التانيه وجابه ليه رخي الولد يد امه اللي قعدت ع حالها لحظات بعدين نزلتها وحطتها في جيب البالطو ومشت...
وخالد خدي ولده ومشي بيه من الجهة التانيه...
مشهد رسم ملامح الحسرة والتعاسه ع وجه طوبى وزاد مخاوفها...
🍃🍃🍃🍃🍃
"ياريتك خبرتني قبلها يامهدي "
المهدي:مش براني ياخديجه..الصغار وين؟
خديجه:راما لوطا عند جدودها ومحمد طالع لواحد صاحبه..
المهدي هز راسه بعدين قال؛تعرفيهم صحابه ؟
خديجه؛ولاد المنطقه..
المهدي:محي يعرفهم كويس؟
خديجه بإستغراب:ايه يعرفهم علاش تسأل؟
المهدي:نشوف فيه يروح موخر الفترة هادي ولولد في سنه الشي هدا غلط..
خديجه؛ماهو مايمشيش بعيد قتلك صحابه من المنطقه..
المهدي؛ان شاء الله يكونوا من الشارع نفسه ياخديجه..غلط غلط ولد في عمره يروح بعد الساعه 11 بالذات في وقتنا هدا..
خديجه بشي من الضيق:شن تبيني نقعمزه جنبي يامهدي! هي البنت معاش تنشد في وقتنا هدا!
المهدي؛ماقلتش هكي..خليه يطلع ويخالط لكن وانتي وبوه تعرفوا وين يمشي ومن وين يجي ومن مرافق ياخديجه..اني عندي ولد في عمره مش حابسه في الحوش لكن نعرف صحابه نفر نفر ونعرف وين يمشي ومن وين يجي..ومخليه شاغل وقته بحاجات تنفعه ولو مانفعتاش ماضراش..مدخله نادي كورة..وان شاء الله بندخله معاي الخدمه..الشاهد ياخديجه اشغلوا بحاجه كويسه وتابعوه ماتخلوشي يحس ان مافي حد وراه ويدير مايبي..
خديجه بريبه:شايف عليه شي؟
المهدي تنهد وقال..
/واني شن قاعد نحكي من الصبح مرواحه في نص الليل حاجه ماينسكتش عليها ياخديجه..
سكتت شويه وهي تشوف لخوها بعدين تنهدت بضيق وقالت..
/باهي في الجديد نردوا بالنا اكثر..
المهدي:ماتسايرنيش ياخديجه..اني كلمتك انتي ماكلمتش محي طول لأني عارفه عصبي ومايتفاهمش..
خديجه:والله اللي صايره حاجه يامهدي..
غمض عيونه بنفاد صبر بعدين فتحهم وقال..
/اللهم طولك ياروح يعني الواحد مايقدرش يقولك ردي بالك من صغارك..
هي مابتش تزيد تناقشه اكثر وقالت..
/مش هكي لكن خوفتني وانتي تتكلم هكي..
المهدي:المفروض تخافي واللي يخلف يسلم ياخديجه..
هزت راسها وقالت؛عندك حق..تنهدت بعدين ابتسمت وقالت..
شن تبي تتغدا..
المهدي؛والله كانك عليا شرموله وخبزة شعير ساديني..
ناضت وهي تقول بإبتسامه..
/وخيي يلقى عندي قدره والزايد وشويه فيه..
ومشت طلعت من حداه..
هو بصوت عالي قال..
/ماتعبيش روحك..
"تعبك راحه"
يدوب ابتسم ابتسامه جانبيه لما سمعها شن قالت..
🍃وقريب ع شقتها..
في شقة نجاة..
اللي كانت في دارها..دير في مكالمه هاتفيه...
نجاة بضيق وتوتر..
/والله ماكانت عندي فكرة ولاكنت نعرف حاجه هي صدمتني..
"حصل خير..مدام ماقلتليها شي مافيش مشكله"
نجاه:حتى اني مانبيك تقولي شي عن اللي حكيتهولك ارجوك هما مايبونيش نطلع شي برا ولو كنت نعرف انك تعرفيها وتقربيلها ماحكيت حاجه..
"ماتخافيش نجاه مستحيل ندوي في حاجه زي هادي اني حتى راجلي ماحكيتلاش"
نجاة براحه:ريحتيني الله يريحك بس بنقولك حاجه حماتي هادي مش هوينه وحده شيطانه مايفوتها شي..
"بتعرفيني في خديجه من يومها هكي اصلا اكثر وحده كانت تبي تفرقني عن عبد الفتاح خديجه "
نجاة بتهكم:هدا علاش عايشه هي بش تفرق اي زوز يحبوا بعض..
"لاحول ولاقوة الا بالله..لكن حقه قوليلي مني من خوتها اللي كان واخدك نقصد التاني"
نجاة بضيق؛الجالي..
"الجالي! ياااه..اخر مرة شفته فيها كان يقرا في الاعدادي وليد محترم وطيب هلبه وهادي ع حاله"
ضحكت نجاة ضحكه متهكمه غير مسموعه..
"باهي اللي خدوهاله بعدين قريبته ولامعرفة خديجه؟"
نجاة؛لاقريبته ولامعرفتها..بنت جيرانهم الواعر..
"لالا! من خوات سدره ولابنت خالتي صفيه"
نجاة من فوق نفسها..
/اخت هادي سدرة الصغيره..
"ايه متفكره عندها اخت صغيره اسمها غرفه"
نجاة؛لا اللي نحكي عليها مازال اصغر..
"ايه صح مرة حكالي عبد الفتاح عن المهدي شنيبه وقالي سيباته سدره ع خاطر اختها الصغيره هادي اللي جابتها خالتي وردة في بنغازي"
نجاه وهي تحاول تتمالك اعصابها..
/ايه صح
"غريبه ولامرة حكالي ان عيلة الواعر وعيلة شنيبه تناسبوا"
نجاة بنفاد صبر..
/زي اللي كثرتي دوة عليهم ولا!؟
"سامحيني مش قصدي بس الدوة جابت بعضها..المهم نعاود نقولك ارتاحي من ناحيتي مستحيل تطلع مني حاجه لحد..
نجاه بكذب:والله وحتى اني مش حتطلع مني حاجه لحد..
🍃🍃🍃🍃🍃
الساعه 4:00قبل العصر..
في فيلا عيلة مالك..
كانت فايزة ومعاها المراة اللي تخدم عندها..
يزينوا في فوزيه وربيباتها..
وحداهم مروة تساعد في مناسك في تجهيز نفسها لكسوة خوها..
فوزيه:البنيه دارت الحفله نهار السبت ع خاطر ايجار الصاله..
جيداء وهي تمروح ع وجهها بالمروحه..
/كان قالت رانا عاونها في حقها..
فوزيه؛لا عيب مايجيش..
فايزة:كل حد يدير فرحه ع قد استطاعته..
فوزيه؛ايوه ومايخلي خد يتجمل عليه..
ميساء:انغميت فهالعربي.
فوزيه؛انتي اللي قلتي خاطري فيه..
ميساء خدت نفس وقالت..
/عادي تو نتحمل..
مناسك؛هكي تمام؟
مروة بإبتسامه؛تهبلي..
مناسك بضحكه؛انتي اهبل...
🍃وتعدي ساعه..
ويجوا اقارب العريس من جهة بوه وامه وامه نفسها للفيلا بش بيطلعوا مع بعض لحوش اهل العروس بالكسوة...
ويتلاقوا فوزيه وام ربايبها اللي كانت مش طايقتها..
وفوزيه تتحاشى فيها طول الوقت..
🍃فايزة:ان شاء الله غدوة نكون هني في نفس الوقت..
فوزيه؛والله لولا ظرفك رفعتكم معانا..
فايزة بإبتسامه؛بارك الله فيك في فرح مناسك ان شاء الله..
فوزيه بضحكه؛لاياكبدي قاعده بيبي..
فايزة؛انتي تقولي هكي عامين تانيات ويبدوا يخطبوا فيها...
فجأة سمعوا صوت النوبه تضرب برا..
فوزيه؛شكلهم جو..وقعدت تزغرد..
والنساوين يزغردوا معاها..
ع جية مناسك ومعاها مروة..
وقفت ع فايزة وقالت.
/خالتي خوي قال قوليلهم مايطلعوش توا الشارع مسكر بالسيارات ومعبي رجاله..
مروة؛خلينا لين هما يطلعوا من هني..
فايزة بقلة حيله؛هو هدا ماعندي ماندير...
🍃وشويه وطلعوا النساوين للجنان..
وقعدوا يغنوا ويرقصوا ع النوبه...
وفايزة ومروة واقفات فم الباب الدخلاني يتفرجوا..
مروة؛ماما شوفي امهم كيف تشبحلهم..
فايزة؛حتى هما خي عليهم شادات مرت بوهم بس وهي مش معدلين عليها ع اقل قدام الناس..
وفوزيه ترقص وهي فرحانه من قلبها وربيباتها يرقصوا معاها...
شويه دق باب الحوش وسمعوا حد قال..
"امي"
ردت فوزيه وهي تقول..
/خش حبيبي خش..
وخروا النساوين..
وقدموا امه وفوزيه..
فوزيه وين شافت امه جايه..وخرت وخلتها بروحها لانها الاحق بفرحة ولدها..
ويخش مازن العريس..
لما شاف امه..مد يده وصافحها وسلم عليها بالخد وهو يجامل فيها مجامله قدام الناس..
بعدين طلقها ومشي لفوزيه اللي ماقدرتش تشد دموعها وهي تشوفله بفرحه..
وهو لما وصل فيها ضمها وباسها ع راسها..
🍃مروة؛عندهم الحق لما امهم خلتهم فوزيه هي اللي ربتهم وتعبت عليهم..وراهو ياماما كانت صغيره وقتها..
فايزة تنهدت وقالت..
/الحق ماينلاموش شن ماداروا امهم لازم تحصد اللي زرعاته في قلوبهم..
وكانت امهم منغاضه ومقهورة من فوزيه وخواتها يزيدوا يغلظوا في قلبها عليها..
🍃🍃
بعد ماسلم العريس ع خواته وعماته وخالاته..
مشي طلع...
والنساوين طلعوا بعده للسيارات بس بيمشوا لحوش اهل العروس..
طلعوا معاهم فايزة ومروة والمراة اللي تخدم مع فايزة..
ولما ركبوا السيارة...
؛والله ماتتمني تروحي قداش ليا ع المناسبات اللي هكي..
فايزة؛ربي يسخر وتحضري اعراس وتهيجي فيهم..
شويه رن تليفونها..
قاماته وشافت المتصل بعدين فتحت الخط وقالت..
/ايوه..
"راجو فايزة ماتمشوش ولدي مالك بيطلع وراكم"
فايزة؛ لالا قوليله مايتعبش روحه مازال الدنيا الضاويه..
"هو قال مايروحوش برواحهم في الزحمه وعنده حق راهو"
ابتسمت فايزة وقالت..
/بارك الله فيكم..
"فيك بارك الله حبيبتي..اهو طالع وراكم اللب لابس كاط ابيض مذهب اللهم صل ع النبي"
ضحكت فايزة وهي تشوف لمالك من المرايا كيف ركب سيارته وقالت..
/ايه شفته توا..
"باهي مالا مانعطلش عليك نتلاقوا غدوة ان شاء الله"
فايزة؛ان شاء الله...بالسلامه..
"بالسلامه حبيبه بالسلامه"
سكرت فايزة وهي تقول..
/مالك بيروح بينا..
مروة بضحكه؛حفظتي اسمه..
فايزة ابتسمت بعدين شغلت السيارة وتحركت وهو طلع وراهم..
🍃في الطريق..
كان مالك وهو يسوق ويشوف للسيارة..
يتفكر في المرات اللي شاف فيهم مروة في حوشهم من غير ماتشوفه..
عالقه في عقله بتصرفاتها وملامح وجهها البريئة مع ابتسامتها اللي كانت بطابع طفولي...
تفكر المرة اللي شاف فيها نظرات الخوف في عيونها ضايق هلبه وزاد كره نفسه..
🍃وبعد طول مسافه وصلهم لحوشهم..
ولما جي طالع من الشارع قعد يدور بعيونه ع محمد المهدي بس هالمرة ماكانش موجود..
وطلع من الشارع وهو متحسف لأنه مامارسش هواينه المفضله استفزاز غريمه..
🍃ومحمد في هالوقت كان في ملعب الكورة ومعاه خوه يزن يعلم فيه اللي تعلمه عن كرة القدم ومتأمل فيه ان يكمل الطريق اللي قرر يسيبها بعد ماراحت اكبر داعم ليه واللي من بعدها معاش استطعم شي في هالدنيا..
🍃🍃🍃🍃🍃
"مازالو تلاته اسابيع"
غرفه؛ع جيبتك بنطهروا مهاب واواب..
طوبى بإبتسامه؛ياعمري اني..
مطيره:حقه بنقوللكم حاجه بكري اتصلت بيا نبيله..
غرفه؛باهي والله اللي تفكرت!
مطيره؛قالت كانوا مسافرين..
فردوس بتهكم؛مالا يجددوا في شهر العسل!
مطيره؛ماندريش عليهم المهم اتصلت تنشد وبعتتلكم معاي سلام..
غرفه؛من لما كلمتها ع موضوع طوبى حسيتها جبدت روحها..
طوبى:كلمتيها عليا!
غرفه؛ايه..
فردوس:احسن اصلا دوتها كلها احباط في احباط..
طوبى:شن قالت؟
غرفه؛نفس الدوة اللي يقولو فيها كلهم كان ماعندكش عليه اثباتات ماتستفيدي شي..
سكتت طوبى وع وجهها بدت ملامح الضيق..
مطيره:مافي شي ع ربك صعب بإذن الله تفتك منه وحقها يوصلها...
فردوس؛لكن الحق اني طايرتلي من خالي..
غرفه؛وعلاش ياحنه في شن بيكون خير من خوته وخواته كلهم زي بعض..
آلاء:حتى اني قلتها في بالي الحق..
مطيره؛الله الغني عن الناس كلها يابنات..
طوبى:زي ماقالت عمتي حسبنا الله ونعم الوكيل..حركت يدها للخلف بلامبالاة وقالت..المهم..نبي نطلع ناخد حوايج وحاجات لجنه..
غرفه شافت لآلاء وأريج اللي كانوا يشوفلها بعدين غمزتلهم..
ناضت اريج وطلعت من حداهم..
وطوبى التفتت لغرفه وقالت..
/فيها كيف يطلعنا عبد الرؤوف..
غرفه؛عادي مافيش مشكله حددي انتي يوم ومادوري شي..
ضحكت طوبى وقالت..
/سلمهالي ياربي..
ابتسمت غرفه..
ع خشة اريج وهي رافعه حاجات بين ايديها..
قعدوا يشوفلها بإبتسامه ماعدا طوبى اللي كانت مستغربه..
حطت اريج الحاجات قدامها وقعمزت..
طوبى بدهشه:هدا شنو!؟.
اريج بإبتسامه:هادي حاجه بسيطه مني اني وروفي وللوش لجنونه..
طوبى وهي تشوف للحاجات بدهشه..
/امتى خديتوه هدا كله؟
الاء؛كل وحده فيا وين تروح من خدمتها تخطم ع محلات الاطفال تاخد حاجه ونقعدوا ندسدسوا فيهم وماخليناك تحسي بشي..
غرفه؛اما اني اخر مشية ليا نراجع فيها ع الجرح فات لعبد الرؤوف وخدينا حويشات..
طوبى وتمرر في نظرها عليهم ماقدرتش تتمالك نفسها من شعور الحب والامتنان اللي كانت تحس عليهم.
قالت بنبرة مرتعشه..
/ربي مايحرمني منكم..وغطت بيدها ع وجهها وقعدت تبكي..
مطيره بإنزعاج وهي شاده دموعها بقوة..
/واااك ع سبله..
واريج جت جنبها وضمتها وهي تقول..
/بيبو حني درنا هكي بش تفرحي مش تبكي..
هدت طوبى ومسحت دموعها بعدين تباعدت عن اريج وقالت..
/خلاص خلاص..وضحكت وهي تشوف للحاجات وتقول..ترا شن خديتوا..
🍃وقعدت تشوف معاهم الحاجات اللي خدوها لجنه كانت تظاهر بالفرح..
وقلبها مقهور ومتحسر..
تمنت لو تلقت هالهدايا في ظروف غير هالظروف..
تكون هدايا محبة بس مش جبر خاطر..
تمنت لو كان حظ جنة زي حظ ولاد خالتها وحظ الصغار اللي يجوا في ظروف عاديه وبفرحة كامله...
لكن كل حد ونصيبه في هالدنيا..
ولو في حد مسؤول ع اللي بيصير لجنة في حياتها هما اللي خلوا سبب وجودها ينبنى ع الكذب والخداع...
وياكم في من جنة في هالحياة ذنبهم في رقبة من جني عليهم قبل ليجوا للدنيا ليوم الدين...
🍃🍃🍃🍃🍃🍃
الساعه 9:00ليلا...
في حوش متواضع موجود في اطراف شارع القهوة الكبير..
كانوا في ام وبنتها ومعاهم كنتهم يوتوا لعشي الضيوف..
من قلوبهم يوتوا في سفرة الاكل وسط ارتباك وخوف من ان تكون في حاجه ناقصه ولا مش مزبوطه..
:ها شني حنان خلاص؟
حنان"اخت محمود":لا كله تمام..
امها:الله يعطيكم الصحه..هي يامراة كلمي راجلك يجي يرفع السفرة..
:هيا ياعمتي تو نكلمه هي..
ومشت طلعت من حداهم..
حنان بتوتر:مش ناقصها شي يام ولا؟
:ناقصها بوك وخوك بس..
ع خشة مرت محمود وهي تقول..
/اهو جاي..
وشويه خش عليهم محمود لما شاف السفرة قال..
/الله يبارك..رفعها وقال لاخته..الحقيني بسفرة المشروب..
ومشي طلع بالسفره..
واخته خدت سفرة المشروب وطلعت وراه بيها..
وين قربوا من المربوعه..
حنان بدون ماتنتبه بانت ع الرجاله من جهة معينه
كان مقعمز التارقي وفي جنبه واحد ماشافوهاش..
لكن هي قعدت تشوف لعبد القيوم كيف مقعمز وهو يتكلم...
درق عليها لما خش خوها بالسفره..
وهي طول وخرت والابتسامه ع وجهها وقعدت تسمع فيه شن يقول..
" •• براد شاهي ع الحطب يبيلـه ••
ميعاد راكـــح وين يقصـر ليلـه
•• وهدراز يحكيلي ونا نحكيله ••
انجيبوا حكـاوي مالهـاش نهايه
•• نحكوا سرايب عالزمان وميله ••
وميلـة زماني وكيف صـار معايا
•• في وقت متعود على تدليله ••
اليوم الدلال معـاي تمـاا غايــه
•• ومرات نحكوا عل الغنم واكحيله ••
مع كل طاسـه نسمعوله احكايـه .."
"صح لسانك..سلمت سلمت"
ضحكت ضحكه اعجاب خفيفه..
ع طلعة خوها..اختفت ضحكتها..
خدي منها السفره وقال بصوت هامس..
/بري..
ومشي خش للمربوعه..
وهي تنهدت بإبتسامه بعدين مشت خشت داخل..
🍃🍃🍃🍃🍃
"ومن بيجي كله؟"
راما؛نساوين عمامي كلهم وعمتي نجاح زي كل جمعه..
خديجه ابتسمت بمكر وهي ساكته..
راما؛انتي غدوة بتمشي لحوش جدي محمد ولا؟
خديجه؛لانمشيلهم حتى مع المغرب..الجمعه هادي نبيها في حوش جدك الصيد..
راما بإستغراب؛مش بيجوا عمامك لحوش جدي محمد ع خاطر الحضرة؟
خديجه بإنزعاج؛اي بيجوا غدوة العشيه والحضرة بعد غدوة يعني مازال قاعدين ومبلطين حتى يومين تانيات..
راما بضحكه؛مسخفتني حنينه مغليه..
خديجه تنهدت وقالت..
/ايه والله تصخف ميمتي ربي يكون معاها ع هالغجر..
فجأة سمعوا باب الشقه انفتح وتسكر..
وشويه ويبان عليهم محمد ماشي جهة داره وهو يقول..
/العشي يام.
خديجه؛تعالى هني..
وقف والتفتلها وهو مستغرب..
خديجه؛مازال بتطلع بعدين؟
هو قال؛ايه لقهوة خالي نضال عازم ولاد نعرفهم..
هزت راسها وهي ساكته..
وهو شبحلها بنظرات استغراب للحظات بعدين مشي لداره..
بعد مامشي خديجه قالت لراما..
/جيبيلي تليفوني من الشحن..
ناضت راما ومشت لوين مافي تليفون امها فكاته من الشحن وجتها بيه..
خداته خديجه وطلعت رقم خوها نضال واتصلت بيه بش تتأكد من كلام ولدها..
"ايه قالي بيجيب صحابه يسهروا في القهوة"
خديجه:امم..باهي سلم وخيي نبيك تعرفلي من هما صحابه هادم وخلي عينك عليه باهي..
"حاضر ماتبي شي تاني بنسكر مشغول"
خديجه:لاسلامتك...بالسلامه..
"سلام"
سكرت خديجه وهي تتفكر في كلام المهدي خوها اللي كانت متأكده انه مش من فراغ..
🍃وفي هالوقت..
المهدي تعشا مع جيران ومعارف ليه من الشارع عند محمود مدير المطحن متاعه..
بعد ماكلي حاجته قال..
/صفرة دايمه يامحمود..
محمود؛يدوم عزك يامهدي تعرف هدا كله من دايره!؟
المهدي شبحله بتساؤل..
محمود بإبتسامه؛حنان اختي الصغيره..
المهدي بدهشه خفيفه:الله يبارك..وهي حنان كبرت هكي ماشاء الله!
محمود بضحكه:مافي حد يقعد صغير ياعرفي..
عبد القيوم وهو يسمع فيهم استغرب كلام محمود عن اخته في مجمع رجاله..
المهدي بتساؤل:هي من عمر ولدي محمد ولا؟
محمود ؛لا اكبر منه عامين..
المهدي هز راسه :ايه صح صح..مزبوط..في الجامعه توا؟
محمود؛لاجامعة شني خدت الشهاده التانويه سادها عارفنا ماعندناش بنات يقروا في جامعات ومعاهد..
واحد من صحابه قال:هدا الصح بالذات في وقتنا هدا البنت ماليها الا حوشها سوا كان حوش بوها ولا راجلها مش تنطلق ع حل شعرها في الجامعات والخدمه وتسوق سياره وداعك التريس
وهو يتكلم عبد القيوم عقد حواجبه وهو يشوفله وبدت ع وجهه ملامح الامتعاض..
ومازال مكمل كلامه يقول..
/وفي الاخير تجيبلك مصيبه ع راسك تشقه..
المهدي:بناتنا قروا في الجامعات وخدموا والحمد لله رافعات روسنا..
:هداكا الجيل القديم يامهدي اللي تربى في الوقت الباهي مش زي جيل هالوقت..لاربايه لادين لافي من يحكمهم يديروا مايبوا..لكن تعرفي اني نعيب ع مني!؟ ع راجل يحوي مراة من بنات هالوقت تصغر بيه وطيح قدره وهو مازال شاد فيها..
محمود فنص في صاحبه..
والزوز التانيين وهما يسمعوا فيه شن يقول كانوا يشوفوا للمهدي..
اللي فهم ان صاحب محمود وولد شارعهم يلمح لحاجه مايبيش يقولها صراحة..
نفس اللي فهمه عبد القيوم بالزبط..
قطع محمود استرسال صاحبه لما رفع السفره وقال..
/شويه وجايتكم طاسة خضرا.. لكن عاد مش زي اللي يدير فيها التارقي..
عبد القيوم ابتسم مجامله وقال..
/احسن إن شاء الله..
ابتسم محمود وطلع بالسفره..
وواحد من الموجودين فتح موضوع بعيد عن اللي كانوا يحكوا فيه قصدا..
والمهدي وعبد القيوم شاركوهم الحديث لكن عقولهم قعدت مع كلام صاحب محمود..
🍃🍃🍃🍃🍃
"والله ماني عارف ياولدي معروفك هدا كيف نردهولك"
حسين؛مانبيك تردلي شي ياعمي..نبيك تسامحني بس..
اب حسناء بإستغراب..
/على شني!؟
تنهد حسين وقال..
/ربك مش كاتب نصيب بيني وبين بنتكم سامحني معاش نقدر نكمل في الموضوع...
~~~~~~~
وهو راكب سيارة متوجه بيه لطريق معلوم..
قعد يتفكر كيف حاول معاه بو حسناء بش يرجع عن قراره بس هو قعد ثابت عليه وحاول ع قد مايقدر مايكونش مهين ليهم وليها باللي داره...
قطع عليه سرحانه...صوت بوابه انفتح قدام السيارة اللي كان فيها..
خشت السيارة من هالبوابه لمزرعه كبيره صاحبها كان يستنى فيه...
🍃🍃🍃
ع طاولة خشبيه وسط هالمرزعه..
كانوا مقعمزين الزوز يهدرزوا...
حسين؛استغربت كيف تنازلوا وهما كانوا ناويين يديروا حرب ع خاطرهم..
ابتسم مختار وقال..
/مع الفلوس ماتستغرب شي في وقتنا هدا..في ناس مستعدين يبيعوا والديهم ع خاطر العمله وهما قبضوا بالدولار ..
حسين؛صدقت في الوقت هدا كل شي يصير..
مختار:الاهم من هدا كله ان اعتبارلك رجعلك..
حسين؛ماكنتش فاقده بش يرجعلي ياولد عمي..
مختار بإبتسامه؛تعجبني..وحتعجبني اكثر لما تفكر في نفسك وبس ومعاش دخل روحك في مواضيع لاناقه لك فيها ولاجمل ومايجيك منها الا وجع الراس..
تنهد حسين بضيق وهز راسه موافقا لكلام ولد عمه..
مختار:حاجه تانيه ياولد العم الموضوع هدا مانبي حد يعرف ان ادخلت فيه خليه بيني وبينك لأني عارف العيله الكريمه كيف يفكروا فيا.
حسين؛اني بروحي مانبيش نقول لنفس السبب..
ابتسم مختار وقال:كويس..وتوا قولي ماخاطركش في شوايات قنينات مع هالجو القنين؟
حسين هز راسه وقال..
/هاتوا..
ضحك مختار بعدين قال بصوت عالي...
/العشي يارضا...
وبابتسامه واسعه قعد يشوف لولد عمه وهو يقول..
/آنستني ياحسين..
حسين بإبتسامه مجامله..
/الله يأنسك ياولد عمي..
🍃🍃🍃🍃🍃
وفي حوش محمد بعد ماروحوا وقعدوا التارقي والمهدي..
المهدي:نزبطه المشري يامحمود ونعرف تلقيحه كان يلوح في الدوة..
وعبد القيوم يسمع ويراجي في تفسير محمود..
محمود بشي من التوتر..
/يقطف يامهدي مادوراش عارفه بهبار..
المهدي قعد مركز ع ملامح وجهه بعدين قال..
/ كان غبيتني في المشري مش حتغبيني فيك انت يامحمود المشري شن يقصد بكلامه اللي قاله..
زفر محمود من التوتر وقال..
/والله شن بنقولك يامهدي في دوة والله ماتتعاود..
عبد القيوم بدي يحس ان الكلام ليه علاقه بحوش الواعر..
والدم في عروقه بدي يفور..
المهدي بشي من العصبيه..
/تكلم طول يامحمود تكلم طول...من كان يقصد بكلامه!؟
محمود بضيق..
/خوك الجالي..
شد عبد القيوم ع قبضة يده بقوة..
المهدي وملامح الانفعال بدت ع وجهه..
/علاش يقصد الجالي بالقطاف اللي قاله!
محمود بضيق واحراج..
/من الدوة اللي طلعت الفترة الاخيره اللي شكله ماوصلك منها شي..
عبد القيوم:دوة شني!..
محمود قعد يشوف لعبد القيوم وهو مستثقل يتكلم قدامه..
المهدي بعصبيه..
/تبيني نضربك بش تدوي يامحمود!
محمود تنهد بضيق وقال..
/بعد المشكله اللي صارت بين الجالي وحسين الناس بدت تدوي وتقول في كلام شين في حق بنت الواعر..
غلي الدم في عروق عبد القيوم اللي كان يحاول ع قد مايقدر يضبط نفسه..ومن كتمه للغضب قعد ياكل في شاربه التحتاني من داخل..
اما المهدي اللي كان مصدوم من اللي سمعه رفع يده وقال..
/بس..بس..بس..خلاص معاش تكمل..
بعدين اشر بسبابته عليه وقال بوعيد..
/قول لولد المشري خليت المهدي يفهم عليك تحمل مايجيك منه..
🍃🍃🍃🍃🍃
وطلعوا من عند محمود والصمت مخيم عليهم وكل واحد كان في داخله بركان فاير..
عبد القيوم حاول يشد روحه هلبه بس ماقدرش..
مجرد ماوصلوا للمطحن وقف ووقف المهدي وقال..
/اسمع..
المهدي قعد يشوفله بإستغراب وهو ساكت..
عبد القيوم بغضب..
/حياة الحاج لطفي الله يرحمه وصاني ع بناته وقالي ديرهن كيف خواتك ياعبد القيوم وحتى مع وصيته هذي نقعد مقيد مانقدر ندير شي..واشر عليه وقال..لكن انت تقدر دير..نزل يده وقال..
الناس في الشارع من عمر تعرف حسين وبنات الواعر ومش غريبه عليهم علاقتهم ببعضهم ولو ماكانوش سمعوا شي من حد قريب واجد عليهم لاصدقوا فيهم ولاقالوا عنهم..فاهمني يامهدي!
المهدي فهم قصد عبد القيوم اللي ماكانش محتاج شرح..
عبد القيوم؛ان شاء الله تكون فهمتني يامهدي..ومشي وهو يقول..تصبح ع خير...
والمهدي قعد يتبع فيه بعيونه بعد ماأستفزه باللي قاله...
وفي هاللحظه جي في وذانه صوتها اللي ماسمعاش حد تاني غيره هو وهي تقول..
"طوبى..طوبى يالمهدي"
#حق_الرد
#طوبى
....يتبع.....
