طوبى "جنة طوبى"
#جمان_فريد
#الجزء_الحادب_والثمانين "اساروف "
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
”البسُوا مِعطَف الأذكار لِيقيكم شُرور الإنس والجَان، ودثِّروا أرواحَكُم بالإستغفار لتمحي لكُم ذُنوب اللَّيل والنَّهار، وإن أصابكم ما تَكرهونه فسترضون وتتيقَّنون بأنَّه خير قدَّره لكم ربّكم لأنَّكم قد تحصَّنتُم باللّٰه.“
- ابن كثير...
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 فيا ليتني طيرٌ أجاور عشَّها
فيوحشُها بعُدي ويؤنسُها قربي
ويا ليتها قد عشَّشتْ في جوانبي
تغرّدُ في جنبٍ وتمرحُ في جنبِ🍃
________________________________________
يوم عرفه..اعظم واجمل وأسعد ايام الدنيا...
وفي من يشوف فهاليوم فرصه..فرصة للعبد بش يغسل ذنوبه ويتأمل من الله يطهره منها ويخليه كيوم ولدته امه بريء طاهر صفحات سيئاته بيضا وصفحات حسناته مليان...
وهو يوم تحقيق امنيات لامحالة...
☘☘☘☘
في حوش لطفي الواعر اللي كان حالين عليهم ضيوف بيحضروا معاهم العيد كانوا موجودات فايزة وبناتها زي كل عام يصيموا معاهم ويعيدوا معاهم...
وفي هالوقت..الساعه واحد الظهر كانوا النساوين الكبار في الكوجينه يوتوا في الفطور..وحداهم الراديو مفتوح ع قناة فيها درس عن يوم عرفه يسمعوا فيه
اما البنات..
في دار المعيشه..
الاء متعمقه في النوم..واريج تقرا في القرآن..
وصفاء لاهيه بتليفونها..ومروة متكيه وهي تستغفر بخاتم التسبيح..
☘في الدار التانيه..
كانت طوبى تقرا في القرآن من الهاتف جنب بنتها..وحداهم تالا متمدده ع السرير وتتفرج ع طوبى وهي تقرا في القرآن
كانت مركزه عليها كيف مرة مرة توقف قرايه وتبدا تدعي بهمس بعدين ترجع تقرا مرة تانيه لين كملت سورة الأنبياء
كملت قراية ونزلت التليفون وغيرت نظرها لسرير بنتها لقتها فايقه..ابتسمت من قلبها وقعدت ساكته..
تاله؛ابله طوبى..
غيرت طوبى نظرها ليها..
تاله:علاش لما كنتي تقري في القران توقفي شويه وتدعي بعدين تقري مرة تانيه؟
طوبى تنهدت وقالت..
/لما تقري قرآن وتوصلي في ايات فيها دعاء وقفي شويه وادعي بالدعاء هدا..ولما توصلي في ايات فيهم كلام عن الجنة والنار اوقفي وادعي ربي يحطك في الجنة ويبعدك عن النار...
تاله:اممم..
ابتسمت طوبى وهي تشوفلها.
تاله:باهي سؤال تاني..
طوبى بإبتسامه:اسألي..
تاله:كل شي دعيتي لربي بيه تحقق؟
طوبى حست ان السؤال سهل ممتنع..
اجابته سهله بس توضيحها لبنت في عمر عشر سنوات صعب بعض الشي..
مررت نظرها القدام وهي تفكر شويه بعدين قالت..
/مش كل شي..في حاجات دعيت بيها ونراجي فيها تصير..
تاله؛كانا ماصارتش!؟
طوبى:معناها هكي احسن..ربي يعرف اللي يصلحلنا اكثر منا كان ماصار من حاجه دعينا فيها معناها هكي احسن..
تاله ناضت قعمزت وقالت..
/باهي اني عندي حاجه وحده نبيها من ربي مانبيش حاجات تانيه نبي هادي بس..
طوبى:شن هي؟
تاله:نبي يولي عندنا بيبي في الحوش..
ضحكت طوبى بإندهاش ومعاش عرفت شن ترد عليها..
هي بإحراج؛علاش تضحكي! مانبصرش..نبي يولي عندنا بيبي زي مهاب واواب وجنة..
طوبى هدت ضحك وقالت..
/اسفه..لكن علاش توا خطرتلك الحاجه هادي؟
تاله:حلوين البيبيات نبي يكون عندنا بيبي يديرلنا جو مليح في الحوش..
طوبى بضحكه:محلاك ياتاله..
تاله:باهي هادي حاجه مستحيله ولا؟
طوبى سكتت وهي وتشوفلها بنظرات عاجزة عن الاجابه.
تاله بضيق:مستحيل عارفه..
طوبى تنهدت وقالت..
/نقولك حاجه..
تبدلت نظرات تاله الحزينه لنظرات حماس وهي تراجي في وطوبى كملت كلامها..
طوبى:اليوم هدا ربي يحبه هلبه وبعدين بعد العصر ربي حينزل للدنيا متاعنا ويولي قريب علينا هلبه هلبه انتي في هالوقت ادعي وقولي يارب..نبي يولي عندنا بيبي مانعرفش كيف لكن انت تعرف عطينا بيبي ياربي..
تاله:انتي قلتي مستحيله!
طوبى:لاماقلتش مستحيل ماقلت شي بكل.
تاله؛وجهك قال..
طوبى بضحكه؛فوتيه وجهي واسمعي كلامي ديري زي ماقتلك وماتفكريش في كيف خلي كيف هادي لربي بس..
تاله بدت ع وجهها ملامح التفاؤل وهي تقول..
/باهي..
طوبى بإبتسامه:وماتنسيش تدعيلي معاك..
تاله:وعلاش اني ندعيلك انتي ادعي لروحك احسن ولا؟
طوبى:زيادة الخير خيرين..وبعدين انتي صفحتك بيضا عند ربي مافيش حاجه تمنع استجابه الدعاء متاعك..
تاله:باهي شن ندعيلك؟
تعبوا عيون طوبى بالدموع وهي تقول..
/ادعي لخالتك سدرة تنوض من الغيبوبه وتروح..
تاله بإبتسامه؛باهي...
🍃🍃🍃🍃🍃
وجت العشية الذهبيه..
اللي فيها الناس كلها في كل بقعه ع الارض مش بس ع جبل عرفات واقفين لخالقهم ومولاهم الاحد..الصمد...
الذي يقصد كل محب له لينال حبه و ولايته
الذي يدعوه كل محتاج ليعطيه سؤله
الذي يرجع إليه كل مذنب ليتوب عليه...
اللي يسمعهم كلهم في وقت واحد لاتداخل عنده الاصوات ولايعجز عن تمييز اصحاب الحاجات عن بعض ولايمل ولايتعب...
بس صاحب الحاجه يكون عنده اجمل ظن بيه..ويكون متيقن يقين عظيم انه حيستجيب لدعائه ويقضي حاجته من قبل مايبوح بيهم..ويبشر بالاستجابه في الوقت المناسب...
☘زي تاله..اللي كانت ورا الحوش في الجنان رافعه ايديها وتدعي وهي حاسه انه قريب عليها ويشوف ويسمع فيها..
"ياربي اعطينا بيبي..نبي بيبي يخلي حياتي حلوة ياربي اني مانعرفش كيف بتصير حاجه زي هادي لكن انت تعرف عطينا بيبي ياربي..وياربي حاجه تانيه لكن مش ليا لأبله طوبى هي تبي منك تنوض خالتي سدره من الغيبوبه وتروح اني مانعرفش كيف لكن انت تعرف ياربي..استجيب لدعائي ارجوك ياربي ياحبيبي"
☘☘☘☘☘
"رقدت صطوفه"
هادي نجاح تسأل في ولد راجلها اللي كان راقد ع رجلها ..
لما ركزت فيه لقاته راقد بالنوم..
بهدوء حولت راسه وخدت مخده حطتها تحته..بعدين ناضت وهي تشوفله ابتسمت وحطت يدها ع بطنها..ودعت من قلبها..
"يارب تمم حملي على خير ياذاالجلال والاكرام اكرمني بشوفة ولدي سليم معافى يارب وماتخلنيش نفرق بينه وبين خوه يارب..يارب ماتخلنيش نظلم يتيم يارب.."
☘☘☘☘☘
"ياربي..اني مش مرتاحه..وخايفه..مش عارفه علاش حاستها مش حتكمل معاي..خايفه اللي درته قبل يولي عليا صح اني ماآذيت حد بالقصد لكن سكاتي ياربي خرب بيوت وضيع مستقبل ناس مالهاش ذنب..ياربي يارب ساعدني بش نكفر عن ذنوبي وساعد ربيع وفرج همه وعوضه خير من اللي راح منه"
"نسرين"
وخرت من ع روشن الكوجينه ولفت ومشت بتطلع وهي تقول..
/جايه..
☘☘☘☘☘
"ربي ماليش غيرك نأمنه ع بناتي واني حيه ولاميتة ياربي استودعتك بناتي وحالهم وسمعتهم وكل شي يخصهم ياربي فرحني بيهم وطمني عليهم وماتورنيش فيهم مكروه يارب"
"خلاص طاب الحوت طفي عليه يافايزة"
فايزة بإستعجال:هيا هي...
☘☘☘☘☘
"ياربي عطيني القوة والصبر بش نسند امي وعيلتي فهالايام الصعبه معاش نبي شي من الدنيا ياربي غير ان عيلتي تكون بخير وماينقصهم شي ولايحتاجوا لحد يارب.."
بعد ماكملت اريج دعائها..قعدت تستغفر وهي تمرر في نظرها ع الجنان...ثبتاته ع طوبى اللي كانت مقعمزه تحت المظله..
ماكانتش تدعي..كانت تسبح ع اصابعها بس...
☘وبعيد عنهم شويه في الكوجينه الخارجيه..
كانت آلاء تجهز في حلو العيد وهي تدعي..
"يارب ترزقني براجل يعيشني برا هالبلاد احلى عيشه..ياربي نبي نعيش نبي نعيش حياة مرفهه لافيها بهدله ولافقر ولاحاجه..تعبت ياربي..عطيني مانتمنى وريحني يارب"
☘ومنها هي لخالتها اللي بعد ماسبحت الله بقلبها مع لسانها حست بشعور حلو لايوصف..روحانيه عاليه..والايمان كان في اعلى درجاته..
وقفت تسبيح وبدت تدعي..
"ياربي ارحم بوي..عبدك لطفي الواعر يارب..انس وحشته ونور قبره وجازيه عنا خير الجزاء..بوي كان فهالوقت زي اليوم يسعى بش يوفر للمساكين حاجتهم يارب وانت الاعلم ان ماكانش يبي مقابل غير انك تكتبله اجر يارب..يارب خلي اعماله هادي تونسه في قبره وتكون مقبوله منك وتخليه يتنعم في الجنه يارب..وصبر قلبي..صبري ع فراقه لليوم ياربي مش قادرة نصدق.."
سكتت شويه وهي تمسح في دموعها بعدين غمضت عيونها ومن قلبها قالت..
" ياربي يارب..ماتحرمني من بنتي وطلعني من ذمة بوها عاجلا غير آجل"
☘☘☘☘☘
وبعيد عن العاصمة بحوالي 600كيلومتر...
في مدينه مافيش زيها في ليبيا كلها..فريده..عريقه...مدينة ثراث وتاريخ..جوهرة الصحراء..غدامس..
تحديدا في شارع اسمه.."درار"..اللي تسكن فيه عائلة من العائلات الغدامسيه المعروفه..العائله اللي متزوجه منهم عمة عبد القيوم..
حوشها كان زي اي حوش طرازه حديث..كبير...واكثر شي يميزه..
هو النظام المبالغ فيه..والنظافه اللي مافيش زيها..وياريحة الورد المعبيه جناناته...
هو نسخة مصغره عن حوش ام مولاة هالحوش اللي كانت حتى هي نسخة تانيه عن امها...
داخل الحوش..
كانوا ملمومين رجاله ونساوين في اماكن منفصله...
يستنوا في آذان المغرب..
☘في الصاله اللي فيها النساوين..
سليمه:مسكر راسه ع الغلط ومايبيش يسمع للأكبر منه..
مهرة"اختها":مش عيل صغير ياسليمه..
سليمه:لاعيل صغير مادام مش عارف مصلحته عيل صغير..
مهرة:باهي ليش ماتبيش تحكيلي كنه شن داير في شن غلط!؟
تنهدت سليمه بضيق وقعدت ساكته..
وبعيد عليهم شويه كانت صفيه بنتها تسرقلهم في النظر وشبه عارفه عن شني يتكلموا..
🍃🍃🍃🍃🍃
بعد المغرب...
بداية الليل بعد نهار صيفي طويل..
الجو كان لطيف الى حد ما..خلا مختار يدير جلسه في حديقة العمارة متاعه ليه هو وصابرين..وحداهم منقل شواء كبير واقف عليه واحد من الرجاله اللي يخدموا عندهم يشوي في اللحم..
بعيد عنهم بمسافة بسيطه..ورا طاولته وع كرسيه كان مقعمز وهو مربع ايديه ويتفرج عليهم كيف يتبادلوا في الاحاديث بينهم...
ومختار يتكلم براحة وعفويه اكثر من قبل وكانت هالحالة نادر مايشوفوه رجاله عليها..
☘مختار:صابرين انتي لازم يكون عندك طموح..لازم تتعلمي تكبري بروحك وتقوي بروحك وتخلي الناس تحتاجك انتي ماتحتاجي لحد..مستغنيه عن الكل وهما اللي مايقدروش يستغنوا عنك
صابرين بشي من الضيق..
/نتمنى نكون هكي..لكن مش بالساهل نوصل للمرحله
هادي..
مختار:ومن قالك ساهل..مافيش حاجه تجيك في الحياة بالساهل لازم تتعبي..لازم تخدمي..واحيانا لازم تقدمي تنازلات..
بدت ع وجهها ملامح عدم التقبل للجمله الاخيره اللي قالها وهولاحظها وتابع يتكلم بشي من الانفعال والحماس المقصود..
/انتي مريتي بظروف صعبه هلبه وعشتي حياة قاسيه انظلمتي وهانوك وذلوك وحتى كرامتك هدروها وضحوا بيك وتخلوا عنك وخلوك تواجهي مصير اسود بروحك..هدا كله ياصابرين مادار فيك شي..ماخلاكش تفكري تاخد بثارك من الناس ومن الدنيا كلها ومن الحياة نفسها! تعوضي روحك عن اللي راح من عمرك واللي انحرمتي منه!...
اثر فيها كلامه..حرك فيها هلبه مشاعر ابرزها الحقد والانتقام وشريط حياتها كله قعد يفوت قدام عيونها..
هو لاحظ تعابير وجهها ترجمهم صح مع نظراتها وكمل تحريض وهو يقول..
/مريت باللي مريتي بيه وممكن اسوأ..ولما جتني فرصتي لعندي بش نهز الدنيا ونرد الضربات اللي جتني لكل واحد تسببلى في اذى ونال من كرامتي..ماترددش لحظه وقعدت نواصل الليل مع النهار ماخليتش عقلي يبطل تفكير ماخليتاش يرقد..ودرت كل شي كل شي نقدر عليه..بش وصلت للي اني عليه توا..خليت الدنيا كلها تحت رجلي وبإشاره وحده مني نحرك اللي يخطر ع بالك واللي مايخطرش ونخلي ناس متسميه وليها وزنها تجيني راكعه وتتمنى نرضى عليهم..
تحريضه خلاها توصل لأقصى مراحل الانفعال والغضب والحماس في نفس الوقت..خلاها تشوف بعيونها وصفه للي صار معاه وكأنه صار معاها هي..
وماخفاش عليه هالشي اللي كان واضح بقوة في ملامح وجهها بكل تفاصيلهم..
خدي نفس بعدين قال..
/انتي بس خليك معاي..راقبيني وتعلمي واني حنساعدك بش نشوفك زي مانبي واحسن..
ارتخت ملامح وجهها وبدي عليها الامتنان وهي تقول..
/شكرا..
ابتسم وقال:العفو...
ويجيه اتصال..قام تليفونه شاف المتصل..بعدين فتح الخط ورد..نعم...
وهي تشوف لملامح وجهه كيف تبدلت للتجهم مانطقش بكلمه بعد نعم كان يسمع وبس..بعدين نزل التليفون وسكر وحطه ع الطاوله وناض..ومشي خش داخل..
وطبعا ماقدرتش تسأله عن شي..غيرت نظرها عنه لتليفونه اللي قعد ع الطاوله..
ركزت عليه بنظراتها الفضوليه للحظات وهي تفكر...بعدين وبكل جرأة..مدت يدها وخدت التليفون..
وفجأه..بلمح البصر انسحب من يدها..انفجعت..
ورفعت عيونها فوق قدامها..
لقاته هو السواق اللي واخد اكبر من حجمه واقف يشوفلها بنظرات ممتعضه..وفي يده التليفون..
تبدلت ملامح وجهها المفجوعه للحده وهي تشوفله..
بعدين غيرت نظرها ليده اللي فيها التليفون لما حركها ورده لمكانه..
شبحتله..وهو قاعد يشوفلها بنفس النظرات بس هالمرة كان باين فيهم شي من التحذير..ولما تأكد ان تحذيره وصلها..جي بيمشي..
ناضت وقفت قدامه وقالت..
/يجيك يوم ونسقدك مع الباب..
تبدلت ملامح وجهه لإبتسامة مستفزة متهكمه بعدين غير عيونه عنها ومشي وخلاها..
تبعاته بعيونها بنظراتها الحاده..بعدين قعمزت..
ع جية مختار..غيرت طول نظرها القدام..
ورضا يشوفلها بنظرات السخريه..
قعمز قدامها مختار..وشاف لتليفونه..
هي بدت تتوتر وقالت..خيرك!
هو قعد يشوف لتليفونه..
في الاول عقد حواجبه بإستغراب..بعدين رخاهم..ورفعهم فوق..ورجع نزلهم..وغير نظره ليها وقال بإبتسامة واسعه..
/جعتي؟
هي بآبتسامة ارتباك؛هلبه..
قال بنفس الابتسامه؛خسى الجوع..والتفت للشاب اللي واقف ع الشوايه وقال..
/اللي عندك واتي جيبه..
بعدين رجع نظره ليها وابتسم وبدي يغني...
على حسب وداد قلبي يابوي
رح اقول للزين سلامات..سلامات..سلامات
ع حسب وداد قلبي يابوي
ضيعت عليه العمر يابوي
وانا ليا معاه حكايات..حكايات..حكايات..
ع حسب وداد قلبي يابوي..
وهي تسمع بإعجاب...
ورضا والشاب التاني كانوا منسجمين مع صوته واحساسه اللي تعودوا يسمعوهم ويحسوهم بين الفترة والتانيه..
🍃🍃🍃🍃🍃🍃
في جنان كوجينة حوش لطفي الواعر..
كانت طوبى واقفه ع جدها وهي تشوف للخروف اللي خدوه اليوم بش بيبضحوا بيه غدوة غيرت نظرها لجدها وقالت..
/الله يبارك كبير..
علي:المراة اللي قلتي عليها وصلتها الضحيه..
قالت:باهي الحمد لله..وبلال؟
علي:لاالعيد هدا خدي ضحيته بروحه اسباني..
طوبى بإبتسامه:ربي يزيده من فضله..
علي:خلاص الشراكه فكيناها..
طوبى:احسن..الفلوس اللي ينحطوا فيه المطحن اولى بيهم..
علي هز راسه موافقه لكلامها بصمت..
طوبى:جدي بنسألك ع حاجه؟
علي:شني؟
طوبى:حسين منين جاب حق السيارة اللي خداها؟
علي:من حر ماله..
طوبى بتعجب؛قصدك عندها اكثر من حق سيارة زي هادي!
علي تنهد وقال:ولد عمك هدا ديما يتكتم ع احواله وع اللي عنده كل اللي نعرفه ومتأكد منه انه عنده لكن شني ولاقداش مانعرفش..
طوبى؛يللا مش مهم..المهم ان عنده مايتكى عليه القدام..
علي:المشكله في عمك بدي يشك فيه..
طوبى بإستغراب؛يشك فيه كيف يعني؟
علي:ان هو ورا خنبة فلوسه.
طوبى انصدمت وقعدت ساكته..
علي:شكلك شكيتي حتى انتي!
طوبى حمحمت وقالت..
/لامش هكي..بس..مش عارفه الحق شكيت لأن مافي شي طلع عن قصة خنبة الفلوس..استغفر الله مانبيش نحط في ذمتي..لالا حسين مايديرش هكي..
علي:لو تشوفيه بعيونك ردي بالك تصدقي..همي توا في عمك اللي مش ناوي خير فهالعيد مسكر راسه يدوي معاه غدوة ويسأله وعارف بتصير مشكله كبيره..
طوبى بقلق:لا ان شاء الله لا..عيب قدام الراجل نهاري..
علي هز راسه وقال..
/مانيش راقد قبل لنتفاهم معاه..ومشي من قدامها وهو يقول..ماتعطلوش بالطاسه الخضرا..
طوبى:حاضر..ولفت ومشت خشت للكوجينه وهي تفكر..
🍃🍃🍃🍃🍃
"جديده القهوة هذي امي"
مهرة :جابه معاه عبد القيوم من طرابلس..
صفيه؛عاد ساكن في شارع فيه زوز مطاحن وصحابها صحابه..
:شارع قهوة هذى!
صفيه بضحكه؛اها اصلا اسمه شارع القهوة..
:انتم عديتوله طرابلس ياسليمه ولا؟
سليمه وهي تتكلم من فوق نفسها..
/مرتين..
:وقاعد غادي وحده ولاقال ندير رفيقه..
مهره؛مازال لعند تو مايفكرش..
:لكن غلط يامهره راجل يقعد عزابي لعند تو ويتم عايش وحده بعيد عن هله..
صفيه؛اللي يسمعك يقول قاعد في امريكا !
مهره؛مش هكي ياصفيه لازم يكون معاه من يونسه يرد باله منه..
سليمه بضيق؛هو تعود يعيش بروحه..
:لاكان هكي مشكله هو لاعنده ولاخوات لازم يزوج ويدير عويله حرام عليه راه..
صفيه:ياودي من قايللكم ترهبن! مازال صغير كيف سكر التلاتين مازال العمر قدامه ان شاء الله..
مهرة؛وشن صغير اللي عمره تلاتين ياصفيه! مداده عيالهم في المدارس..لاتو بعدين نقعمز نحكي معاه ونعقله..
سليمه؛ان شاء الله تقدري عليه..
وصفيه رشفت من القهوة وهي تمرر في نظراتها الغير راضيه عليهم...
🍃🍃🍃🍃🍃
ومن غدامس للرحيبات..
لعواطف اللي ماكانتش مرتاحه نهائي في حوش راجلها ومن اول ماجت وصدرها ضايق وكل مالها الضيقه تزيد..
ماشافتش من امه وعمته الا كل خير وماسمعت الا الكلام الطيب..
لكن عمته الصغيره كوثر كانت مش مريحتها بأسئلتها ونظراتها..
كوثر:قصدك ضحك عليك..
عواطف بضيق:ماتفاهمناش..
كوثر:لاياحنه ماترقيعهاش ضحك عليك..هلبه زيك ماتصدق يبان عليها الراجل تعطيه اللي فوقها واللي تحتها المهم تتزوج..
عواطف شافت لأم راجلها وحماتها لقتهم الزوز يشوفوا لكوثر بعدم رضا لكن ماقالوش كلمه ولاجربوا يسكتوها..
كوثر:يللا احمدي ربك ليل نهار اللي عوضك بالشارف اشبح وين دايرتيها ولقتيها..
عواطف قعدت محتفظه بصمتها كسرت من خبزة التنور وكلها وفشت غلها وهي تمضغ فيها..
وقعدت كوثر تتكلم وتتكلم وكلامها كله كان سهام مسمومه ماتخطتش عواطف..
وبرغم هدا كله..كانت عواطف تتسائل في نفسها وين ضرتها وعلاش مافي حد جاب سيرتها !!؟
🍃🍃🍃🍃🍃
"نمشي للجامع من السبت للاربعاء وكل جمعه نمشوا لبحر مصراته من الصبح نروحوا في الليل..حنينه كامله طيبه هلبه واللي نبيه ديرهولي..تعرفي تعلم فيا في الطريزة"
جوري:طريزة؟
سدرة المهدي:راجي شويه..وناضت من حداها ومشت خشت داخل..
وحناها مغليه معاها بعيونها تشوف فيها كيف تبان فرحانه ومرتاحه وحتى وزنها زايد..
وهالشي طبعا مافرحهاش..غاظها وقهرها..
غيرت عيونها لسلفتها لما سمعتها تسأل في نجاة وتقول..
/غريبه الحق قاعده صغيره حلوة علاش ماكملتيش حياتك وتزوجتي؟
نجاة؛ولمن نخلي صغاري!؟
:اهو حوش جدودهم يقعدوا معاهم زي توا..
مغليه:واني وين نقدر نعاني صغار فيهم اعمارهم بروحي!
:الله يبارك عليك قاعده بصحتك..
نجاة:عمتي بارك الله فيها مش مقصره لكن اني مانبيش نسيب صغاري..
:خسارتك صغيره وسموحه وعليك العين..
الكلام كان واضح للكل انه تلقيح..كيف مراة صغيره تسكن في حوش عيلة راجلها المتوفي وعنده خوت بين العزري والمتزوج معاها في نفس الحوش!
نجاة:نصيب واني راضيه بنصيبي الحمد لله..
مغليه قعدت تشوف لسلفتها برفعة حاجب وهي تقول..
/كل شي نصيب وحتى كان صار وتزوجت تقعد بنيتنا زي قبل زي تالي..
نجاة:بارك الله فيك عمتي..
وكامله اللي كانت محتفظه بصمتها مركزه بنظرها طول الوقت مع نجاة ونظراتها ليها كانت كلها شك..
🍃🍃🍃🍃🍃
"غدوة بنمشوا للحوازة بنعيدوا غادي مع اصدقاء ليا تو نعرفك عليهم"
صابرين؛ان شاء الله..
مختار؛ردي بالك تتوتري وترتبكي اني معاك..
ابتسمت وهزت راسها بآيجاب..
ومن بعيد شويه رضا عيونها عليهم وماغيرهمش عنهم الا ماندر...
☘بعد ماتمت سهرتهم..وركبت صابرين لجناحها بش ترقد..
قعدوا رضا ومختار في الجنان يهدرزوا..
مختار:اني نعرفها عندها حب فضول كبير قصقاصه زي مايقولوا..
رضا:باهي على شني كانت تبي تقصقص في نظرك!
مختار عقد حواجبه وقال بضحكه..
/علاش مش طايقها لهالدرجه!
رضا:مش هكي..اني وظيفتي هني حمايتك مش بس خدمتك يعني لو حسيت ان في حد مقرب ليك قربه منك حيضرك واجبي نبعده بأي شكل..وانت تعرفني كويس اني نعرف البنادم من نظره..
مختار:تمام..بس مش ع طول الخط حتكون نظرتك صح الا ماتخيب في مرة..وزي مااني واثق فيك مستحيل تخوني هي نفس الشي..
رضا:اسف..لكن ماننحطش في مقارنه معاها..
تنهد مختار بإبتسامه وقال..
/ماتشغلش نفسك بسفاسف الامور وخليك في المهم بس..انفكت الشراكه وانباع المحل..
رضا:شن الخطوه الجايه..
مختار غير نظره للفراغ وقال..
/تو تعرفها قريب خطوة مش متأكد هلبه انها توصلني للي نبيه بس حنحاول..
رضا؛انت لو تكسب اختك الصغيره تضمن الحوش..
مختار قعد ساكت وهو يفكر..
ورضا يشوفله بصمت ويراجي فيه يتكلم..
شويه شبحله مختار وقال..
/تمام..تقدر تمشي..
رضا؛تصبح ع خير..ولف ومشي طلع من حداه وخلاه غارق في التفكير...
وع طاولة الشطرنج القريبه عليه كانت الرقعه فاضيه..والقطع ع جوانبها تراجي امتى ينعاد ترتيبها من اول وجديد..
🍃🍃🍃🍃🍃🍃🍃
21اغسطس سنة 2018
يوم الثلاثاء..
في ساعات الصباح الأولى..
استقبلت طوبى هاليوم وهي تتفكر في بوها وتبكي عليه..اول عيد اضحى من غيره..
ذكرياتها معاه في الاعياد محفورات حفر بتفاصيلهم في ذاكرتها..حتى ع ايام سدرة كانت طوبى اول من يفيق ويعيد عليه هي اللي ديره في فطوره وقهوته بعد يروح من الصلاه..
والفطيره اللي كان يحب يتصبح بيها اول يوم عيد الاضحى هي اللي كانت دير فيها..وتسمع منه ع خاطرها قصائد مدح وشكر وغزل في الفطيره متاعها..
كله هدا توا ولى مجرد ذكريات لايمكن ترجع تنعاش ع الواقع مرة تانيه..
كل شي فيها يبكي..قلبها وروحها قبل عيونها..ألم فضيع كانت تحس بيه في وسط صدرها..الم الفراغ والحزن اللي خلاهم العم لطفي بعد موته..
خشت وهي تجر في خطواتها للحوش متوجهه للدار بش تشوف بنتها..
وصلت للدار وخشت وهي ترشف وتمسح في دموعها..
لين وقفت ع سريرها لقتها فايقه..
يدوب ابتسمت وهي تقول..
/صباح الخيرات مامي..اولك عيد معاي قنوشتي..ان شاء الله كل عام ياروحي..وطبست عليها وقعد تفكلها في القماط..
وبعد فكاته تتفاجئ بحاجه..
ضحكت وقالت..السرة طاحت..
ع خشة فردوس ومعاها سالمين الزوز قالوا مع بعض..
/صباح الخير..
التفتت وهي تضحك وفي يدها الصرة وهي تقول..
/صرتها طاحت!
ضحكوا ببهجة.وقالوا...
/الله يبارك..ماشاء الله سكرت السبوع..
طوبى بإبتسامه فرح؛ايه غدوة يولي عمرها اسبوع..
سالمين وهي واقفه حدا السرير تشوف لجنة قالت..
/عاد بنديرولها اسبوع بكرا ان شاء الله وعليا انا كله..
هما استغربوا..امتى بتوتي حاجات السبوع والدنيا عيد والمحلات مسكره!
هي فهمت عليهم وقالت بضحكه..
/ماسألتنش رواحكن كان بنقعد معاكن اسبوع لين نكر معاي شناطي كبار!؟
فردوس ضحكت وقالت..
/لا والله سألنا ياخالتي لكن ماجاش في بالي بكل اني موتيه للسبوع بش نديروه في وقته..
سالمين:قداش ليا نرجى في ولادة طوبى وفي بالي كل شي وموتياته قبل تجيب بأسبوعين..
طوبى معاش قدرت تتمالك نفسها..ضمت سالمين وقعدت تبكي..
سالمين بإبتسامه ودموعها في عيونها ضمتها وهي تقول..
/راك من ريحة الغوالي حليت عيونك فيا واول عام في عمرك عندي ومعاي بنتي انتي يابيبا..
طوبى ببكي..
/ربي مايحرمني منك يارب..
سالمين:ولامنك ياعيوني...
وفردوس تمرر في نظرها بيناتهم وهي متأثره ودموعها تنزل..
🍃وهالدموع ماوقفتش بكي مع البدايه الفعليه للعيد ووقت الذ..بح..
البنات وعمتهم وحتى سالمين ونبيله اللي جت مع راجلها يحضروا اول عيد معاهم كانوا يبكوا ع لطفي اللي غاب عنهم لأول مرة فهالمناسبه..
وفي عز بكاهم..خشوا صفيه واميمه..
صفيه جت مجبوره..اما اميمه كان خاطرها هلبه تجي لكن كانت محرجه.
وين جت عينها ع طوبى ولقتها مغطيه عيونها وهي منهارة بالبكي وجعها قلبها عليها لكن ماقدرتش تمشيلها طول..
سلموا ع الكل واميمه بدت تبكي من لما بدت تسلم لين وصلت في طوبى اللي كانت مش حاسه بحد..
طبست عليها وباست راسها..
وطوبى ع حالها تبكي..وتردد شويه..
إنا لله وإنا إليه راجعون..
🍃🍃🍃🍃🍃
ومن عروس البحر للؤلؤة الصحراء واجواء العيد في شارع درار..تحديدا حوش العمه مهره..
بعد ماذب..حوا حوالي 7كباش املاح..
عطوا المعاليق للنساوين اللي يلبسوا فيهم بردي شحم ويتبلوا فيهم بش بعدين يعطوهم للرجاله بش يشووا..
وتطلع صفيه بالصونيه الكبيره لعبد القيوم اللي كان يراجي برا..
صفيه:عبدوا اساروف.."السماح"
هو ابتسم ورد عليها:اساروف..
هي قالت:نسورفاك.."مسامح"
خدي منها الصونيه وحطها ع الطاوله وقال..
/نادي امك وخالتك ماعيدتش عليهم..
هي قالت؛حي عليك بيستلموك..
عقد حواجبه بإستغراب وقال:ليش!..
صفيه:امي قاعده واخده منك موقف دووا البارح ع موضوع زواجك العيله كلها يبوك تزوج خايفين عليك من الغربه في طرابلس..وضحكت..
عبد القيوم بضجر..
/ماني عارف كان مازوجتش شن بينقص من عمارهم وكان زوجت شن بيزيد! هل تعلمي ان نفس الموضوع قلبولي راسي بيه امس عمامك وعويلهم..!
صفيه بضحكه؛مطالبات شعبيه..
هو حرك راسه يمين ويسار بعدم رضا ويقول..
/والله حاله..
صفيه ابتسمت وقال..
/شن اخبار عرب طرابلس..
قلبه بدي يدق بقوة بدون مايشوفلها تنهد وقال..
/ملخبطه واجد..
صفيه:ليش شن صار!
شبحلها وقال..
/المدرق بان..
هي بمفاجأة..
/بالله عليك!
عبد القيوم:وصلت للطلاق..
هي بلهفه قالت..
/طلقها؟
حرك راسه بالنفي وقال..
/مايبيش الكلب
هي بغيظ قالت..
/الواطي شن يبي فيها مادام عينه ع غيرها!
هو خدي نفس وقال بضيق..
/بالله سكري ع الموضوع وعدي ناديهم بسرعه..
هي قالت بأسف:حاضر
ومشت خشت داخل..
وهو اللي كانت باينه ع وجهه ملامح الضيق خدي الصونيه ومشي بيها لمكان الرجاله حطها حداهم بعدين ولى مرة تانيه لجهة الكوجينه..
لقي عماته واقفات مع صفيه يراجو فيه..
ابتسم وقال لعمته مهره..
/ الله الله ديد السماح ان شاء الله ازن مكيس "سامحيني ان شاءالله عام الجاي فمكة "
مهره: اسامحككم ولا نش افريع السماحنم..
وكب ع راسها...بعدين جي لعمته سليمه وقال بإبتسامه..
/اساروف..
هي بزعل قالت..
نسورفاك..
هو قال:طلعيها من قلبك بش نحس اليوم عيد حق..
صفيه بضحكه؛بيبدا يلسن..
هو شافلها وقال..
/اقل اقل "عدي عدي"..خشي داخل..
ضحكت..
مهرة بآبتسامه؛هيا عاد ياسليمه يوم عيد راهو..
عبد القيوم وهو يشوفلها قال..
/ تيتهوسكيت! اساروف "سمحة!السماح"
تبدلت ملامح وجهها للحب مع الشفقه وقالت..
/نسورفاك .
هو ضحك وضمها بعدين باس راسها وقال..
/ الفيت نمودنون "كل عام وانتي بخير"
هي ردت.. الفيت نمودنون
عمته مهره قالت..
/اضويغاك هولان عبدو..."استاحشتك واجد"
هو قال..
/والله وانا اكثر..
قالت؛ماتخلي وين تعدي وتقعد بالشهور اقعد عندنا حتى شهر ع الاقل لين نشبعوا منك..
هو قال:ربك يسخر ونجيكم ونتم شهرين مش شهر بس..
هي قالت:ان شاء الله ياربي ومولاي يولي مع عروسه..
ضحكت صفيه..
هو مشي للخلف وقال..
/خل نعدي نشوف شن صار في الكبده..
ولف ومشي بسرعه..
سليمه؛حقيتي بعينك يامهره!
صفيه؛غير كان تخلنه في حاله بس..
ومشت خشت داخل وخلتهم..
مهره؛ان شاء الله ربي يهديه لما فيه خيره وصلاح حاله..
سليمه بضيق:يارب..
ومشت خشت واختها وراها..
🍃🍃🍃🍃🍃
وأجواء العيد مرت ع حوش الواعر والحزن غالب عليها..
وماقدرتش روحانيه هالمناسبه تذوب الجليد اللي بين طوبى وخواتها ومرت عمهم وبنتها..
طوبى بالذات كانت حاسه بجفاء شديد تجاه اميمه حست قلبها قسي من ناحيتها هلبه..ضايقها شعور انها بدت تشوف في اميمه زي الغريبه ومش قادره تتقبلها..
وكان اثر الجرح اللي سبباته اميمه لبنت عمها اللي كانت متأمله فيها خير وللأسف خاب املها...
اما اميمه اللي زاد وجعها قلبها من اللي صار تأكدت ان اللي انكسر مايتصلحش..ولو فيها كيف يتصلح فيبي وقت بش يرجع زي ماكان..
🍃🍃🍃🍃
بعد الغدي..
اميمه كانت واقفه في الممر تراجي في اريج تطلع من الحمام..
طلعت..وهي قدمتلها وقالت..
/معليشي اريج..
اريج؛نعم؟
مدتلها كيسه هدايا وقالت..
/لجنة..
خدت اريج الكيس وقالت..
/تعالي شوفيها..
اميمه ودموعها في عيونها..
/مرات امها ماتبيش..
اريج؛لالا مش لهالدرجه..تعالي..
ومشت..واميمه مشت وراها وهي مضايقه ع الاخر..
وصلت في الدار فتحتها وقالت..
/خشي..
خشت اميمه ومشت طول لسرير جنه.
وقفت عليه..وابتسمت لما شافتها بحب وقالت..
/الله يبارك عليها يبان وزنها كويس..
اريج؛ايه..3كيلو ونص..
اميمه:الله يبارك..نزلوا دموعها ومسحتهم بعدين وخرت وقالت..
/ربي يحفظها ويفرح امها بيها..
اريج:آمين..
اميمه؛صحيتي اريج..
اريج:سلمك..ومعليشي اعذريها مسألة وقت ويرجع كل شي زي ماكان واحسن..
هزت اميمه راسها مسايرة لأريج وقالت..
/سلام توا..
اريج؛بتروحي!
اميمه؛ايه..عندي قرايه..
اريج؛موفقه..
ومشت طلعت اميمه من الدار وتوجهت للصاله شافت لأمها..
امها طول ناضت.سلمت ع سالمين ونبيله ومشت طلعت مع بنتها...
🍃في الكوجينه..
فردوس:مش بيضا عمتي!
مطيره وهي تشوف للخلطه قالت..
/لالاكويسه ..هي ابدوا بالحشو..
ع خشة اريج قالت..
/صفيه واميمه روحوا..
مافي حد اهتم ورد عليها..
تنهدت وغيرت عيونها لطوبى اللي كانت تجهز في السلايط قالتلها..
/بيبو..
التفتت وقالت..
/جنة فاقت؟
اريج؛لالا تعالي نبيك..
طوبى:شويه..مصمصت ايديها ومشت طلعتلها..
اريج مدتلها الكيس وقالت..
/جابتها اميمه لجنة
قعدت طوبى تشوف للكيس للحظات بعدين قالت..
/حطيه في دولابي..
اريج:باهي..
ولت طوبى خشت للكوجينه..واريج مشت للدار...
🍃🍃🍃🍃🍃
واجواء العيد في حوش الصيد..
كانت مشحونه..الكناين كلهم حاضرات بس ماكانش في بينهم كلام ..يشتغلوا ومن فم ساكت..
ماعدا خديجه اللي كانت دايرة روحها تعبانه ومقعمزه حدا راجلها اللي كان يشويه وكل شويه يوكل فيها..
وخوه اشرف كان ع اعصابه..
اما عبد الفتاح كان همه الوحيد امه ترضى عليه وترجع.معاه زي قبل..
وامه..ماتفكر في حد حاليا غير عواطف..اللي لما اتصلت الصبح عيدت عليها حست من صوتها ان مش مرتاحه وقعدت تخمم فيها..
🍃وفعلا عواطف ماكانتش مرتاحه..
من امس لليوم ماشافتش راجلها الا مرة وحده لما عيدت عليه..وزاد استغرابها اكثر من قبل لما ماحضرتش ضرتها حتى يوم العيد..هني حست ان في شي مش مزبوط بس ماقدرت تسأل حد...
🍃🍃🍃🍃
والعيد في زليطن كان ثقيل ع مغليه ونجاة..
خفيف ع المهدي وصغاره اللي قدروا يغيروا جو مع باقي العيله..
🍃لكن وضع نسرين وسط اهل ربيع كان متغير هلبه..
حست انهم يعاملوا فيها بسطحيه واغلب كلامهم لبعض تلقيح
سلفة نسرين؛والله ياعمتي من لما عقد عليها وهو من خير لخير وربي فتحها عليه من اوسع ابوابه.
ام ربيع؛الله يبارك الله يبارك..تنهدت وقالت..مقيوله نواصي وعتب..
ونسرين اللي كانت مشغوله بتتبيل اللحم تسمع فيهم وهي مضايقه ع الآخر 🍃🍃🍃🍃
وفي مكان تاني..في مزرعة من مزارع منطقة عين زارة..
كانوا مجتمعين مجموعه شباب من اصدقاء نضال..
اتفقوا يعيدوا مع بعض ع خاطر عمر..بش يغيروله جوه ويحسنوا نفسيته..
وهو كان نفسيا بعض شي احسن من الايام اللي فاتوا..
🍃لكن صابرين اللي كانت تجامل في نساوين صحاب مختار كانت مفتقده لمة خواتها وصغارهم حواليها..بالذات صغار نجاة اللي كانوا عندها زي صغارها...
🍀🍀🍀🍀🍀
ويعدي اليوم الاول...
ويجي تاني يوم..
22اغسطس سنة 2018...
تزين حوش لطفي الواعر بالزينه اللي جايبتها سالمين..
زي مالبست وتزينت جنة اللي ولت في غاية الجمال بالفستان الابيض المزين بفيونكه ذهبيه من النص..وسريتشا ع الراس لونها ابيض بفيونكة ذهبيه حتى هو..
امها خافت عليها..ومابتش طلعها قبل لتقرا عليها وترقيها..
بعدين طلعت هي وياها...
ولما شافوها..انهالت عليها عبارات الغزل والكلام الحلو..
🌼مطيره؛الله يبارك ع غزالتي الله يبارك اللهم صل ع النبي..
🌼فردوس:عسل وسكر ياوخيتي سلمها..
🌼اريج:الله يبارك عليها عسيسلة بنزمطها..
🌼الاء:ياروحي جميلتي بالله صورة خويله..
طوبى:فكينا من التنزيل..
الاء:غير امتى نزلتلها صورة اني..!
وبدت تاخدلها في الصور ونبيله تقول..
/بطول عمرها ياطوبى ربي يحفظهالك..
طوبى بإبتسامه؛آمين..تسلمي ابله نبيله..
فايزة؛تشوفيها زي ماتبي ان شاء الله..
طوبى:آمين..تسلميلي شراده..
صفاء:بطول عمرها ياربي..
مروة؛ربي يحفظها..
طوبى:سلمهم ياربي..بعدين شافت لتاله لقتها تتأمل في جنه بشغف..ضحكت وين عرفت في شن تفكر..
ع خشة سالمين وهي تبخر في الوشق وتقول..
/الله يبارك على جنونه الله يبارك عسل زي امها..
طوبى بضحكه؛نجك نجك..
ضحكت سالمين وقعدت دور عليهم وتبخر فيهم...
🍃وكان هداكا اليوم عكس اول يوم العيد عندهم..
جميل..اجوائه حلوه..خدوا منه جرعة سعاده نستهم همومهم..
🍀في اليوم نفسه..بعد المغرب كانوا عيلة شنيبه مروحين من زليتن لكن من غير سدرة..
وبعد مرواحهم بشويه جو البناويت برجالتهم بش يعيدوا ع العيله...
☘☘☘
واجواء تاني يوم العيد في غدامس كانت هي نفس الاجواء الحلوة من أول يوم بلمة العيلة الاحباب اللي كان فاقدها عبد القيوم...
🍃وقعدت فاقدتها صابرين هلبه اللي زاد شوفها لصغار اختها نجاة..
🍃🍃🍃🍃
الساعه 11:00ليلا..
كانت صابرين مقعمزة ع كرسي لوح طويل جنب العمارة..
وفي يدها تليفونها..تكتب في رقم اختها نجاه..
بعدين اتصلت بيها..
حطت التليفون ع وذنها وقعدت تراجي فيها ترد..
وردت..
"ايوه"
صابرين بجفاف:عطيني الصغار..
"صابرين!"
صابرين؛مافيش بيني وبينك دوة معليشي عطيني الصغار لو فايقين..
"باهي باهي"
وقعدت تراجي صابرين ع نار لين سمعت صوت جوري..
"خالتو"
نزلوا دموع صابرين وهي تقول..
/ياروح خالتو حبيبتي كل عام وانتي بخير..
"كل سنة وانتي طيبه استاحشتك هلبه"
صابرين بنبرة مرتعشه؛واني اكثر جوجو ياروحي شن حال حموزي ومعاذ؟
"الحمد لله خويله"
صابرين:عطيني حموزي..
"راقد"
صابرين؛باهي ومعاذ؟
"اهو يلعب..عوذي تعالى كلم برينا..برينا اهيا هني في الآلو"
قعد تضحك من وسط دموعها..
"برينا"
صابرين؛ياقلب برينا استاحشتك استاحشك..
"تعالي برينا"
صابرين شدت بكاها بقوه..
"برينا نبي بوب كورن كراميلا"
حطت يدها ع فمها وهي تبكي..
"تعالي برينا تعالي"
صابرين معاش تحملت..سكرت عليه وانهارت بالبكي..
قعدت تبكي بالعبره..وصوت بكاها فهالليل ساكن كان مسموع..
ماوصلش لمسامع مختار اللي كان مش موجود اساسا..
لكن سمعه رضا واستغرب...
طلع من شقته..ومن العمارة كلها..ومشي وهو يتبع في صوت البكي..
لين وصل في المصدر متاعه..
شافها تتفرج ع التليفون وتبكي بالعبره..
وهو يشوفلها بنظرات تبان جامده بعدين مشي وخلاها..
وهي تتفرج ع صور صغار نجاة وتتفكر في ايامها معاهم بالذات معاذ اللي كانت ترعى من ولداته اختها وهو كان متعلق بيها اكثر من امه..
نزلت التليفون وقعدت تشوف للفراغ والدموع ينزلوا زي السيل..
فجأه..حست بحركه جنبها..
شافت يمينها..لفت شيشة ميه مسكره..بعدين غير نظرها لقاته ماشي..قعدت معاه بعيونها لين درق..رجعت شافت للشيشه وهي متعجبه..وين جت بتاخدها تراجعت لما سمعت لعقلها اللي قاللها مرات داير فيها حاجه مخدر او سم او شي يضرها..خافت وناضت طول ومشت تجري بطريقها لباب العماره..خشتلها وركبت تجري لين وصلت في الشقه فتحتها وخشت وسكرت الباب...
وهو في شقته اللي كان تحتها سمع صوت خطواتها السريعه وصوت الباب لما تسكر بقوة توقع هي في شن فكرت وقال..
/غبيه..
🍃🍃🍃🍃🍃🍃
23 اغسطس سنة 2018
يوم الخميس..ثالت ايام العيد..
الساعه 1:25ظهرا..
كان الجالي يمشي في قاعة الواصلين..
خدي شناطيه بعدين توجه طول لبوابة المطار..
طلع منه..ووقف تاكسي...رفعاته لشارع القهوة...
وصلاته لفم باب حوش اهله بالزبط..
نزل منه ونزل شناطيه...وبعد مامشت التاكسي..قعد واقف بشناطيه يشوف لحوش الواعر بنظرات امتعاض فيها شي من الحزن...
"حمد لله ع السلامه باش مهندس"
الجالي شاف لمحمود وقال:الله يسلمك..
محمود:كل سنة وانت طيب..
الجالي؛وانت طيب..المهدي وين؟
محمود؛في الحوش..
الجالي هز راسه بعد لف ومشي للباب..طلع المفتاح وفتحه..ورجع خدي شناطيه وخش للحوش..
وين جي بيسكر الباب شاف لحوش الواعر وقال..
/جايك يابابا وبنشوفك غصب عنهم..
وسكر الباب...
🍃🍃🍃🍃🍃
الساعه 6:30مساءا..
في حوش الحاج علي الواعر..
كان عبد المطلب في داره مقعمز مع حسين بعد صبر مش عارف كيف صبره عن الكلام في امر فرضه عليه الشك فرض ..
☘عبد المطلب:مرتاح في حوشك؟
حسين هز راسه وقال: الحمد لله..هو صح ايجار لكن ارتحت فيه وافتكيت من وجع الراس..
عبد المطلب ضيق عيونه وقال..
/اللي وصلني ان حوشك ملك مش ايجار..
اتفاجئ حسين وقال..
/كيف! من قالك الدوة هادي!؟
عبد المطلب:اللي قالي قالي..
حسين قعد يشوف لبوه بصمت وهو مازال متفاجئ وبدي عليه شي من التوتر..
عبد المطلب:الحوش ملك..وسيارة حقها هداكا الحساب..خدمتك في دولة في هالمده القصيره دارتلك الفلوس هادم كلهم!
حسين بدي يعصب وبان هالشي في رده علي بوه وقال..
/شن مناديني بش نعطيك اقرار ذمة ماليه!؟
عبد المطلب:والله ياولدي كلنا مستغربين مش غير اني جدك وامك واختك..كنت مش لاقي بش تصلح سيارتك فجأه يطلع عندك حوش وتشري سيارة حقها مئات الاولوف!؟
حسين بعصبيه؛ماكنتش نسأل فيك وين دير فالفلوس لما كنت مخلينا عايشين في عدم ولا سألتك علاش مخلينا ساكنين في حوش جدي وانت عندك حوش كبير يسرح فيه الخيل..
عبد المطلب:اني مش هامني انت شن عندك ولانبي نعرف اللي نعرفه من وين بس..
ضيق عيونه بتساؤل وقاله..
/لشني تبي توصل بالزبط؟
عبد المطلب شبحلها للحظات بصمت بعدين قال..
/لتوا مش عارف فلوسي من خنبهم..
قاطعه بضحكه ساخره وقال..
/شاك فيا اني قصدك!
عبد المطلب:اللي خنب الفلوس من الحوش من هني مش غريب..
حسين؛وطلعت اني في الاخير!
عبدالمطلب:مافيش تفسير تاني للخير اللي بان عليك فجأه..
حسين بإيتسامه متهكمه قال..
/طبيعي اللي زيك ياللي يكون مستخسر في صغاره القرش يفكر هكي..في الاول تهمت امي واميمه وتوا جي الدور عليا اني ومرات بعدين يجي دور جدي..
عبد المطلب:ماطولهاش وهي قصيره من وينلك اللي عندك..
ناض حسين وقال بإنفعال؛تو نقولك..
مشي فتح الباب ونادى امه واميمه..
اللي كانوا في الممر واقفات يسمعوا في حسهم وهما في قمة الخوف والقلق..
طول مشوا للدار..وخشوا..
صفيه بقلق:شن في!؟
حسين اشر ع امه وقال..المراة هادي اللي ذليتها وهنتها وضربتها في الشارع وخليت الناس تتفرج عليها وهي مذلوله ولادرت حساب امها مرتك وامك صغارك من اليوم معاش تقعدلك فيه..
اميمه بصدمه؛حسين!
وامه تشوفله بألم ودموعها ينزلوا..
حسين بإنفعال؛صخفت عليك بعد اللي صار فيك شفت حالك تعدل فرحت وقلت ربي هداك لكن اللي زيك انت مافيش منهم رجاء..اني ربي عاطيني ورازقني من زمان هلبه وايام كنت في مصر خدمت فلوسي والحمد لله ربي باركلي فيهم وخلاهم عقارات واملاك في مصر وغيرها..
اميمه وامه انصدموا من اللي سمعوه..
حسين؛كتمت لأني ماكنتش نبي نفتح عيون حد علياوهذا حقي مالقيتش الفلوس في الشارع بش نبزقعهم هني وغادي وع قولتك خليت الخير يبان عليا توا بعد ماقررت نعيش لنفسي ومعاش ندخل في حد لاقريب ولابعيد..اما ع فلوسك اللي انخنبوا منك خود هادي اني نعرف من خنبهم وشن دار بيهم..
عبد المطلب بصدمه..
/مني!؟
حسين بإبتسامه ساخره..
/طليقة يوسف السورية..
حطت صفيه يدها ع خدها وهي مندهشه..
واميمه زادوا توسعوا عيونها من الصدمات المتلاحقه..
حسين؛نصبت عليه وخططت ونفدت ووصلت للي تبيه وهربت..
حط عبد المطلب يده ع صدره وقعد يفرك فيها عليه وهو في حالة صدمة قويه..
حسين؛ربي سلطها عليك بش يعاقبك ويعطيك درس لكن ماأنت بمسمع من في القبور..
اميمه غيرت نظرها لبوها ودموعها عبوا عيونها..
حسين:بالنسبه ليا اني ومن اللحظه هادي لاعاد نبيك ولانعترف بيك والحوش هدا اخر مرة نحط فيه رجلي..غير نظره لأمه وقال..وانتي اختاري يام يتكملي عمرك في القهرة ياتطلعي معاي..شاف لأميمه وقال..والكلام ليك حتى انتي..بنراجي برا ربع ساعه بعدها نمشي ومعاش تشوفوا وجهي..
ومشي طول طلع من حداهم..
صفيه بعد ماكانت تلحق فيه بعيونها غيرت نظرها لراجلها..
شافت اميمه مقعمزه جنبه وهي تفرك في مكان قلبه وتقول..
/خلاص بابا خلاص خدوا سوك..دير غيرهم واكثر منهم..
وامها وهي تشوفلهم مر قدام عيونها شريط حياتها معاه مافيش ذكرى وحده تخليها تتحمل تقعد ماقعد من عمرها مع واحد زيه..وهي اساسا كانت تراجي في الفرصه تجيها بش تطلع من هالحوش وتغير حياتها ومستحيل ضيعها..
مشت طول طلعت من حداهم..
عبد المطلب بتعب:بري الحقي امك بتمشي معاه..
اميمه ودموعها ينزلوا..
/هي حرة مش شادتها..
عبد المطلب نزلوا دموعها ونزل راسه لوطا وقال..
اطلعي وخليني شويه..
مسحت اميمه دموعها وقالت..
/حاضر..
وناضت ومشت طلعت من الدار وقلبها موجوع..
ردت الباب وقعدت واقفه حداه وبدت تبكي بصمت..
☘وامها بعد مالمت حوايجها...
لبست عبايتها وشاربتها ومشت طول لأميمه..
لقتها واقفه في الباب قالت.
/مازال تبي تقعدي هني!؟
اميمه شبحتلها وقالت بصوت مبحوح.
/مانخليش بوي وجدي برواحهم..
صفيه:بوك غدوة يعيش حياته وينكرك وجدك معاش همه حد كان بنات لطفي..
غيرت نظرها عن امها ولااهتمت لكلامها..
صفيه بنرفزة؛اقعدي.
ومشت من حداها بعد مازادت وجع قلبها وكبرت الحزن اللي في داخلها..رجعت تبكي بصمت..لعند ماسمعت باب الحوش انفتح وتسكر..
حطت يدها ع فمها وكتمت صوت بكاها وكمداته وخلت قلبها يبكي دم ع حالها معاها...
🍃🍃🍃🍃🍃
وفي حوش عمها لطفي...
في الصاله..كانوا مقعمزات حدا عالة الشاهي متاع مطيره..
فردوس وبناتها وغرفه وطوبى وسالمين..
سالمين وهي تهدرز علي مطيره وفردوس..كانت مرات تسرق في النظر لطوبى وغرفه وتقارن بيناتهم وتتفكر كيف كانت طوبى قبل وكيف ولت توا وقلبها موجوع عليها..
وغرفه كانت منشغله مع الاء بالفيس يطلعوا من صفحة ويخشوا في صفحة..وكلهم كانوا عن اللبس والمكياج والحاجات التجميليه..
اما اريج كانت تتفرج ع مسلسل فالتلفزيون..
وطوبى اللي كانت حداها بنتها لاهيه بتليفونها وتتصفح..
لين قابلها منشور منزلاته صفيه بن عمة عبد القيوم..
طوبى؛الله يبارك ع عيد عيلة التارقي..
مطيره:صفيه منزلاته؟
طوبى وهي تشوف في الصور:
/ايه..الله يبارك ع الاجواء..والتنسيق والماكله..مامخليين شن دايرين..شافتلهم وقالت..عصبانهم منظره يهبل وغريب شويه..
سالمين:اكيد عصبان الغدامسيه كله لحم وخضرا من غير رز..
فردوس:وشن تجي بنته هدا!؟
سالمين؛الحق ماذقته لكن نعرف ناس ذاقوه وشكروا فيه واجد..
طوبى؛منظره يسهف..شوفيه ومدت التليفون لأريج وقالت..عطيه لأمك..
غرفه:نفخلي راسي رؤوف بغدامس مسهفه التارقي بستورياته...
مطيره:يبي يمشي غادي؟
غرفه؛ايه..قالي يكبروا الصغار الشويه نمشوا غادي..
سالمين بضحكه؛شكلك ماخاطركش!
غرفه؛الحق ايه..
مطيره؛يامهبوله يجوها الاجانب من اقصى الدنيا بش يدهوروا فيها..
غرفه بضحكه:مش عارفه..اني نبي نطلع برا البلاد كلها..
آلاء:عندها حق شن بدير بيها ليبيا درهت كبودنا من العيشه فيها..
غرفه؛كان صار وغيرتله رايه نرفعك معانا..
الاء:احلى روفي في الدنيا كلها..
شافت فردوس لآلاء بعدم رضا بعدين قالت..
/عجبوني كيف عندهم ذوق وكل شي منظم وراقي ع الاخر..
ومدت التليفون لأريج وقالت..اعطي لخالتك..
طوبى وهي تاخد في التليفون من اريج..
/ديما هكي..
فجأة رن تليفون مطيره..طلعاته من تحت المندار المقعمزة عليه لما شافت المتصل ردت طول..
/ايوه بوي.....باهي..نزلت التيلفون وقالت لسالمين...جبريل قالك وتي روحك..
ناضت وقالت..هيا هي..ومشت طلعت من حداهم..
غرفه؛وين ماشيين؟
فردوس؛بيعدوا ع صحابهم في عين زارة..
غرفه هزت راسها بعدين قالت..
/غدوة مروحين ولا؟
هزت فردوس راسها بآيجاب..
وطوبى لما جابوا سيرة مرواح سالمين حست بضيق وغمة...
🍃🍃🍃🍃🍃
"هادي اخر قلة عقلك وتفاهتك"
مغليه بضيق؛ماتزيدهاش ع خوك مش ناقص ماتشوفش في حاله..
الجالي و هو يتكلم بغضب ودموعه ينزلوا...
/هادي بنتي وحقي نشوفها يبوا ولامايبوش..
المهدي:شن بدير يعني بتكمل باقي مسلسل العار متاعك وبتمشي تهد عليهم!
قعد يهز في رجله بعصبيه وهويمسح في دموعه..
نسرين اللي كانت مقعمزه حداهم وواجعها حال خوها قالت..
/شن ماصار يامهدي يقعد بوها..
المهدي:باهي بوها لكن كيف بيشوفها! من اللي بيخليه يجي جهة حياش الواعر بعد اللي داره اخر مرة!؟
مغليه؛يعني كيف لاهو يشوف بنته ولاحني نشوفوها!.
المهدي:والله يام مفروض توقعتوا النتيجه هادي بعد العمايل السود اللي درتوهم..
الجالي:حقي ناخده القانون..
المهدي:خلاص طلقها بش يحكمولك بساعات تشوف فيها بنتك..
هو غير عيونه عنه بنرفزة وعدم رضا...
المهدي:القانون يساعدك تشوفها في هالحاله وحالة تانيه لو كانت في قضية مرفوعه في المحكمه...
شد ذقنه بيده من الغضب وزاد سرعة هزة رجله..
مغليه بألم؛حسبي الله ونعم الوكيل..
نسرين بحزن:باهي حني نمشوا نجيبوها..
وجهوا انظارهم ليها والمهدي قال..
/ومن بيخلينا ناخدوها!؟
نسرين؛مهدي الجالي بوها ومافيش حد ليه حق يحرمه يشوفها..
الجالي قعد يشوف للمهدي ويراجي في رده والمهدي قعد ساكت وماعلقش..
قاله بنبرة حزن قاصد يستجدي بيها عطفه..
/حط نفسك مكاني وحس باللي اني نحس بيه توا..
مغليه برجاء..
/سلم ولدي ساعد خوك تربح..
وهو قاعد محتفظ بصمته ويشوف في الفراغ يفكر في كلامهم..
🍃🍃🍃🍃🍃
"كان مسكونا ع العشا تو ندزلك رساله"
مطيره:باهي..
سالمين:هي بالسلامه توا..
مطيره وهي مبتسمه؛بالسلامه..
وطلعت سالمين للجنان..
اللي كان واقف فيه راجلها مع الحاج علي وهما يهدرزوا..
شافتهم قالت..
/حاج..
جبريل؛هي نستأذنك ياحاج علي نتلاقوا بعدين..
علي هز راسه وقال..
/توكل على الله..
جبريل:السلام عليكم..
علي؛وعليكم السلام..وقعد واقف يراجي فيهم يطلعوا..
🍃وهما مجرد وصلوا للباب..
دق..
استغربوا..وفتح جبريل الباب من غير مايسأل مني..
وبعد مافتحه وشاف اللي وراه..
بدت ع وجوههم هو ومرته ملامح الصدمه...
واللي كان واقف برا الباب وهو مدرق عيونه بنظرات سود لما شافهم ارتسمت ع وجهه ملامح الصدمه حتى هو..
تبدلت ملامح وجه جبريل للغضب وقال..
/حود من ع الباب..
هو طول وبدون تأخر للحظه وخر عن الباب..
طلع جبريل وطلعت بعده سالمين وهي مستاءة لدرجة كبيره..
وهو غير عيونه عنهم وحاول يستجمع نفسه...
عقد حواجبه ورجع دق ع الباب وهو يسمع فصوت حركة عجل سيارة جبريل بعد ماتحركت ولما الصوت تباعد اختفي التوتر..
ع طلعة الحاج علي..لما شافه قال..
/شن جابك انت؟
خدي نفس وقال:جاي نعيد عليكم ونبعد الشيطان ونوصل ماامر الله به ان يوصل..
ابتسم علي الواعر تهكما..
ابتسم معاه وقال:الحوش حوش اختي خود اذنها وتعالى بلغني..
اختفت ابتسامه علي الواعر وحلت محلها ملامح الحده..بعدين قال..خش..
مختار بآبتسامه؛بارك الله فيك..وخش..
سكر علي الباب وقاله؛خليك هني..
مختار هز راسه وقال:ok..ناديلي خواتي بش نعيد عليهم..
علي الواعر وهو يشوفله بحده نادى بغضب..
/مطيره..
رفع مختار حواجبه ونزلهم وهو ساكت..
ع طلعة مطيره..وين شافت مختار وقفت في مكانها...
وهو لما شافها..حول نظاراته..وقعد يشوفلها بنظرات حزن مع ابتسامه وقال..
/عمتي..عاش من شافك..ياعمتي..
غرقوا عيونها بالدموع وقالت لبوها بحده.
/علاش دخل فيه يابوي!
مختار:الله يادنيا الله..من قال مطيره تكره مختار اللي كانت ماتناديه كان ياولدي..
مطيره قعدت تشوفله بإمتعاض وهي شاده دموعها بالسيف..
علي الواعر خبط عكازه ع الارض وقال..
/بري نادي البنات..
مطيره شافت لبوها بضيق.
علي:بري..
لفت ومشت خشت وهي مضايقه..ومختار معاها بعيونه بعدين غيرهم لجده لما قاله..
/قالتلك معاش تجي ولاماقالتش!
مختار:ولو سفوك المل ياحاج ولو سفوك المل..
علي قعد يشوفله بحده وامتعاض وسكت..
🍃داخل..
غرفه بعصبيه:شن يبي جاي! عارفنا بنستقبلوه؟
فردوس بضيق؛والله الواحد ماعارف من وين بيلقاها ليلقاها.
آلاء:في النهايه خوكم وحرام تردوه بعد جاكم يعيد عليكم ولا يابيبو انتي مدينه وتعرفي شن هي صلة الرحم والعفو والاصلاح..
اريج بتهكم؛ماشاء الله من امتى وانتي داعيه!
مطيره بنرفزة؛هيا عاد ع شن رسيتوا!..
ناضت طوبى وقالت:قوليله يدخله للمربوعه اللي داخل..
استغربوا فيها خواتها.
ومطيره هزت راسها بضيق ومشت طلعت..
غرفه؛من جدك!
طوبى:اصبروا شويه بالله عليكم..اريج خليك حدا جنة..
اريج هزت راسها بالموافقه...وطوبى مشت طلعت من الصاله..
غرفه بغضب؛مانيش طالعه..
🍃🍃🍃🍃🍃
في المربوعه..
كانوا مقعمزين الجد وحفيده في صمت تام..
علي كان ع اعصابه..اما مختار اعصابه في ثلاجه..
لين خشوا عليهم فردوس وطوبى والزوز يقولوا..
/السلام عليكم..
هو ناض وقال؛وعليكم السلام..ومد يده وقال..كل سنة وانتم طيبين..
الزوز قعدوا يشبحولها...
وهو مركز ع تعابير وجوههم...
والحاج علي عيونه ع طوبى بس..
قدمت فردوس ويدوب صافحاته ومشت قعمزت جنب جدها..
وهو قعد ماد يده ويشوف لطوبى..
هي خدت نفس بهدوء..بعدين قدمتله..
وصافحاته...وهو بحركة مفاجئه.خداها في حضنه..
هي انصدمت..
وفردوس اتفاجئت..والجد علي زاد عصب وقعد يشد بيده ع العكاز..
طبع قبله ع راس طوبى بعدين قال..
/مبروك عليك المزيوده...
هي حطت يدها ع صدره وبعداته وتباعدت منه وكان يبان ع وجهها انها مفجوعه ومضايقه في نفس الوقت..
هو دار روحه عادي..ابتسم ابتسامه عريضه وقال..
/جبتلها هديه متواضعه..اشر ع الكيس الوردي المتوسط اللي كان محطوط ع الطاوله بعدين قال..اصلا مهما جبتلها شويه عليها..
طوبى لفت ومشت قعمزت جنب اختها وقالت..
/اخر مرة جيت فيها هني ع شني تفاهمنا!
قعمز وقال..
/ماضي وانسيه..اني توا مانبي شي غير اني نشوفكم من فترة للتانيه ونطمن عليكم..
طوبى: من الاخير الحوش هدا محرم عليك..
مختار:طوبى صلي ع النبي وحكمي عقلك وضميرك هل الشي يرضي الله وانتي بنت متدينه وتعرفي ربي كويس! متفقين اني درت اخطاء غير مقصود في السابق بس اعتذرت عنها وحاولت نصلح علاش انتم تحرموا الفرصه اني نعوض اللي راح!..حتسألوا يوم غدوة راهو لان اللي ديروا فيه اسمه قطع ارحام..
علي بنفاد صبر:لااله الا الله..
قاطعه وقال..
/بتقول تبريتوا مني! وهالشي منافي للشرع كان ماتعرفش..
علي الواعر تهكما..
/وليت ابن تيميه ع غفله!من امتى تعرف ربي بش تتكلم عن شرعه..
مختار:تقعد جدي وع عيني وع راسي وليك كل الاحترام والحب..
طوبى؛باهي خلي هدا كله جنب..الحوش حوشي واني حرة نستقبل اللي نبي نستقبله فيه بس..
مختار؛وهاك استقبلتيني..
طوبى:لأني قاعده مراعيه لصلة الرحم اللي بيني وبينك نبي نفهمك بهدوء واحترام لأخر مرة..
مختار:صلي ع النبي..
طوبى بنفاد صبر؛اللهم صل وسلم عليه.. ارجوك ماتجبرنيش نتكلم معاك بطريقه ماتعجب حد..خود اللي جايبه وتفضل اطلع وارجوك معاش تجي جهة الحوش هدا لو شن يصير فينا..
قعد ساكت وهو يشوفلها بنظرات غير مفهومه لكنها كانت تخوف..
علي الواعر؛سمعتها شن قالت!...
غير نظره عن طوبى وضم ايديه لبعض..وشاف للهديه اللي جايبها..وبدوا دموعه ينزلوا دمعه ورا التانيه..
فردوس ماقدرتش تقسي قلبها غصب عنها وجعها عليه.
اما طوبى كانت مشاعرها ملخبطه لاعرفت تشفق عليه..لاعرفت تكذب دموعه..
اللي كان علي واثق ومتأكد انهم دموع تماسيح...
رشف ومسح انفه بعدين ناض ومشي بياخد الهديه..
فقد توازنه وكان حيطيح غير شد في الحيط..
فردوس فز قلبها لكن ماقدرتش تكلمه.
اما هو قعمز وحط راسه بين ايديه وقال.
/معليشي ميه..
ناضت فردوس ومشت طلعت بتجيبهاله..
وعلي حيفقد اعصابه في أي لحظه..
قعد يبكي بصمت..دموعه ينزلوا وهو يرشف..
وطوبى تشوفله..ومازال عايشه في حالة تشتت بين مشاعرها..
ع خشة فردوس بطاسه ميه مدتهاله وقالت..
/خود..
نزل ايديه وخدي نفس ومرر نظره قدامه بعدين شاف للطاسه وخداها وبدي يشرب..
وفردوس واقفه عليه تشوفله بشفقه..
فجأه..
سمعوا صوت الباب الخارجي يدق..
فردوس شافت لجدها وقالت..
/الباب..
رجع دق مرة تانيه..
ناض علي الواعربمساعده عكازه ومشي طلع بيشوف مني..
فردوس:مريض!
هو عطاها الطاسه وقال..
/عندي بداية سكري..
خدت الطاسه وهي تشوفله بحزن..
اما هو ناض..خدي نفس مرة تانيه ومشي بياخد كيسة الهديه..
طوبى ناضت من مكانها بسرعه ومشت طول طلعت من المربوعه..
قعد معاها بعيونه لين طلعت بعدين قال..
/حاولي تخليها تقبلها..
وسيب الهديه ومشي بيطلع من المربوعه..
مشت فردوس للروشن ووقفت عليه بش تشوفه..
وتتفاجئ..
لما جو عيونها ع المهدي ونسرين وهما في الجنان واقفين ع جدها ويتناقشوا معاه..
فردوس بقلق:عليك يوم مبارك!..
ولفت ومشت طلعت من المربوعه...
🍃🍃🍃🍃🍃
في هالاثناء..
درست سيارة عبد الفتاح قدام حوش بوه..
نزل منها..بعدين نزلت ابتسام ونزلت الصغار بنتهم وولدهم..
مشي للباب وفتحه وقال..
/خشوا..
وتخش ابتسام مع صغارها وهي متوتره جدا..
ويخش وراها عبد الفتاح اللي ماكانش حاله خير من حالها ويسكر الباب...
🍃🍃🍃🍃
ضامه بنتها في حضنها وهي تقول بقلق..
/شن يبوا جايين..
مطيره:ماترعشيش روحك خيرك! اكيد جايين يشوفوها ويحطوا عيدها..
قالت؛وعلاش اليوم علاش مش امس!؟
فردوس:فايزة قالت كانوا في زليطن وروحوا امس بعد المغرب..
اريج بقلق:طوبى وجهك اصفر هلبه..!
غرفه:ضغطها هبط خل نمشي نجيبلها جبنة مالحه..ومشت بسرعه من حداهم..
مطيره :نهارك طوبى معقوله هكي!! مانعرفكش خوافه!
طوبى ودموعها ينزلوا..
/وميته خوف من قبل مانجيبها واني نحلم بيهم ياخدوا فيها مني..
فردوس:والله مايقدروا ياخدوها يابنتي..حتى بعد تطلقي تقعد عندك لين تتزوج..
مطيره:طوبى بنتي مش باهي ليك الغشاش راك ترضعي..
ع جية غرفه بالجبنه وطاسه ميه..
طوبى:مانبي شي مانقدر نبلع شي..
غرفه:يغمى عليك يابنتي.
طوبى حركت راسها بالرفض ودموعها ماوقفوش..
🍃🍃🍃🍃
المهدي:كلمتي كلمة ياحاج وانت عارفني كويس..
نسرين برجاء:تقعد معاه سويعه بس ونردوها ياجدي راهو هدا بوها ومن حقه يشوف بنته..
علي بغضب؛وكان يفكر في بنته مايوصلش في امها قدام خلق ربي..
المهدي:والله عندك حق لكن مهما نديروا نركبوا ننزلوا يقعد بوها وليه حق كبير فيها..
علي الواعر:بعد يطلق امها يشوف بأمر المحكمه..
نسرين بضيق:لاحول ولاقوة الا بالله..
المهدي:اليوم بس ياحاج علي الدنيا قاعد عيد وهو ماشافش بنته بكل..لله ياحاج لله..
نسرين بألم:خليناه يبكي بكي عليها..
علي:راهو فكرتوا في هاليوم قبل لتضحكوا ع الناس وتغشوهم..
المهدي شاف لمختار اللي كان واقف معاهم ملتزم الصمت..
بعد ماشافله قال..
/برغم واحد مايستاهلش ظفر اختي ولا ان يكون عنده عيل من الاساس..لكن مايقدر حد يحرمه حقه فيها..
المهدي:ساعه مش طالبين اكثر من ساعه ياحاج..
علي:كان رضت امها اني نرضى..
نسرين:اني نخش نكلمها ياجدي..
علي:بري شوفيها..
مختار:كان قالت باهي بنمشي معاكم..
علي قعد يشوفله من فوق لتحت..والمهدي قال..تفضل مرحبتين بيك..
🍃وتخش نسرين لحوش لطفي..
وتتلاقي هي وبناته اللي مافيش وحده فيهم سلمت عليها..
قعمزت قدام طوبى وقالت..
/ياروحي حبيبة عميمه..
طوبى بحده:شن تبي!
نسرين؛بوها روح يبي يشوفها.
طوبى بفزع؛لالا..لا..
نسرين؛بوها ياطوبى ماتقدريش تحرميها منه حرام عليك اصلا..
طوبى:بعد يطلع والمحكمه تحكمله بساعات زياره يشوفها..
نسرين بضيق؛ياطوبى ماتصعيبهاش والله كلها ساعه ساعه وتجيك..
طوبى بصدمه؛نعم! تبوا ترفعوها!..
نسرين؛تقبلوا يجيكم هني!
طوبى؛ولايخطي خطوه هني!
نسرين؛خلاص ياطوبى نرفعوها وخوك مختار معانا..
طوبى:ماعنديش فيكم ثقه..
نسرين:نحلفولك ع المصحف..
طوبى:زي حلف خوك!
مطيره؛خلاص ياسر رعشتوها..
نسرين برجاء..
/بالله عليك ياطوبى اسالك بالله تخليها تمشي معانا توا راهو بيهبل ع شوفة بنته..حرام عليكم والله حرام..
فردوس:ومش حرام عليكم انتم اللي درتوه فيها! كان في من جاني ع جنة هني انتي..
قعدت تبكي نسرين وهي تقول..
/باهي اني خاينه وحقيره وواطيه ومانستاهلش صحبة سدرة راضيه باللي تقولوه عليا ومعترفه بغلطي ونادمه لين ندم موت ولاشن يصير والله معاد نعاود اللي درته ع قطع رقبتي والله ع قطع رقبتي مانخليك تنظلمي اكثر من انظلمت ولانخليهم يحرموك من بنتك لو وصلت بيا نوقف ضد خوي معاك..غير بس خلينا نرفعوها يشوفها نص ساعه مش ساعه..
اللي حواليها التزموا الصمت وقعدوا يراجوا في قرارها..
وهي تشوف لبنتها بخوف والم ودموعها ينزلوا..
🍃برا..
كانوا واقفين وهما في حالة صمت تام ويراجو..
ع طلعة نسرين ومعاها طوبى وفي حاضنة شنطة بيبي فيها بنتها...
وجهوا انظارهم ليها..
وهي وين وصلت فيهم قالت بنبرة مرتعشه..
/ربي يحرمك صغارك لو حرمتني منها يامهدي..
المهدي:ان شاء الله نفقدهم لو درتها..
هي خدت نفس وطلعاته بخوف..بعدين قدمت لمختار وقالت..
/خليها معاك ولو روحت من غيرها فوق ذنوبك ذنبي ليوم القيامه وان شاء الله دعوتي ماتخطاك..
علي كان مركز بنظره على مختار اللي شاف لاول مرة من لما خش تعابير وجه صادقه بانت عليه..
خوف ع توتر..وتأثر..
مدتله طوبى شنطة جنة..
وهو تلقاها منها..قالتله سمي..
قال طول؛بسم الله..
واستقرت جنة في حضنه وهو يشوفلها...العجيب واللي صار ردة فعل جنه اللي كانت راقده..
ابتسمت..وكانت ابتسامتها واضحه وحلوة..
هو لما شافها صاباته قشعريره وصلت لقلبه..
حاول يطلع من تأثيرها بسرعه لما قال..
/هيا..
ومشي من قدامه وقلب طوبى انخلع من مكانه ولحقها
فتح المهدي الباب وطلع..وطلع مختار وطلعت وراهم نسرين..
طوبى لفت ومشت بسرعه لدار الدروج وركبت فوق السطوح..
وكانت معزوفه ضوء القمر لبتيهوفن توصف الحاله اللي كانت عايشيتها طوبى..
لماوقفت تشوف فيهم وهما رافعين روحها معاهم بعيد عنها..
ومختار اللي كان حامل روحها بين ايديه كان قاعد يسمع فيها وهي تقول...
" خليها معاك ولو روحت من غيرها فوق ذنوبك ذنبي ليوم القيامه وان شاء الله دعوتي ماتخطاك.."
تنهد لا اراديا...لقي روحه واصل في حوش شنيبه..
المهدي فتح الباب وقال..
/تفضل..
هو خش..ونسرين خشت بعده..ويلحقوا عليهم نضال ومحمد المهدي وهما جايين بسرعه من القهوة وخشوا وراهم..
وسكر محمد الباب..
طوبى بنبرة باكيه..
/يارب استودعك اياها ماتحرمني منها يارب..
#اساروف
#طوبى
....يتبع....
