#طوبى "جنة طوبى"
#جمان_فريد
#الجزء_الثالث_والتسعين"خريف"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الصلاة_على_النبي
قال السخاوي رحمه الله :
الصلاة على النبيّ ﷺ ، من أبْـرَكِ الأعمال وأفضلها وأكثرها نفعا في الدّين والدّنيا .
القول البديع.أهـ.( ١٠٩)٦
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃ستصنع منك الايام الصعبة شخصا لايميل ولا ينكسر🍃
___________________________________________
قدمله وهو ينزل في الشنطه من الكوفني"صندوق السيارة"
وصل فيه وقال بنبرة استغراب..
/نضال!
ضحك نضال وقال..
/الزعيم....سكر الصندوق وخداه بالحضن..
المهدي بتعجب..
/كيف صار..
تباعد نضال وقال وهو مبتسم..
/ نهدرزوا داخل..
خدي شنطته وضرب ع غطا الكوفني...
مشت السيارة..وهو مشي لباب حوش اهله..
المهدي مشي للمطحن وصى محمود بعدين روح للحوش..
🍃فهالوقت..
سميره كانت تسقى في طاجين بسبوسه بالعسل"القطر"..
وحداها سدرة متسهفه..
سميرة:خل تشربه وبعدين انتي تحطي المكسرات المرحيه..
سدرة المهدي بحماس:تمام..
سمعوا باب الحوش انفتح..
سدرة:شكله بابا..
سميره قربتلها الطاجين وقالت بإبتسامه..
/هي حطي المكسرات..
فتحت سدرة فازوا "برطمان" المكسرات وخدت منه وبدت تزين في البسبوسه وسميره تتفرج عليها..
"بوي"
لما سمعت الصوت استغربت..
سدرة بإندهاش:صوت عمو نضال..
بدت ع وجه سميره ملامح الضيق..
🍃وفي الصاله..
محمد شنيبه بإستغراب..
/شن روح بيك..
حضنه نضال وهو يقول..
/ماتبنيش نروح؟
المهدي:حتى اني مستغرب انت نويت الهجره..
تباعد نضال عن بوه وقال..
/قعمز ياحاج..
قعمزوا محمد والمهدي وبدي القلق يتسلل لقلوبهم..
نضال بجديه..
/طرابلس جايتها حرب الله اعلم بيها..
محمد عقد حواجبه وقال..
/مادامك عارف شن روح بيك!؟
نضال:تبيني نقعد غادي جوي مليح وانتم هني وسط الدق؟
المهدي؛ع الاقل خليتنا متهنيين عليك انت وخوتك..
نضال؛وانتم من يهنيني عليكم!
محمد بصرامه..
/اسمع لو في بالك موال تطوع وتحارب نقولك من توا انساه طلعه من راسك..
نضال بضحكه:عارفني ماليش فيه يابوي..اني جيت نقعد معاكم تلقى من يعاونكم..
المهدي قعد يشوفله بشك وقلق..
وبوه قال بضيق:والله كان قعدت غادي خيرلك.
نضال طبطب ع ركبة بوه وقال..
/خلاص روحت وصار اللي صار..
ع خشة سدرة جاته تجري وهي تقول..
/عمو..
ضحك وهي وصلت فيه حضناته وهو حضنها..
وتخش بعدها سميره بخطوات مترددة بعض الشي..
شافوها راجلها والمهدي بدت ع وجوههم ملامح الضيق..
سميرة:السلام عليكم..
حاول يحافظ ع ابتسامته وهو يقول..
/وعليكم السلام..
تباعدت عنه سدرة وهي تشوفله بشي من الحزن بعدين قالت..
/قلت معاش بتروح
نضال بضحكه:تي شن ماتبونيش ولاكيف!؟
سدرو بضحكه:مش قصدي مستغربه بس
نضال:ماصارش روحت..
سدرة:حمودي يعرف؟
نضال حرك راسه بالنفي وهو مبتسم
سدره:مفروض قتله هو اول واحد..
نضال:هو وحناك قلت نبي نديرهالهم مفاجأه..وينها حناك؟
شافت سدرة لسميرة وقالت..
/في حوش عمتي خديجه..
نضال هز راسه وهو ساكت..
بوه قاله:اركب دارك تريح توا بعدين ساهل..
ناض نضال:هدا باللي بنديره جعان نوم..خبر محمد يامهدي.
ومشي طلع من الصاله بدون مايشوف لسميرة..
هي ابتسمت ومررت نظرها عليهم تقول..
/شن تبوا غدي!؟
محمد:اللي يطلع من خاطرك..
سميره بإبتسامه؛اني بنديرلك غداك اليوم..
المهدي:لابارك الله فيك..متعود ندير ماكلتي بروحي..
سميرة :من اليوم تعود عليا اني نديرهالك..
سدرة:ايه بابا تعرف طيب كويس.
ضحكوا والمهدي ابتسم بعدين قال..
/بارك الله فيك..
سميرة:تبيلكم هلبه ع ماتحولوا الرسميات لين تكسروا الرقبة..
ومشت طلعت من حداهم وخلتهم يضحكوا..
المهدي رفع حاجبه وقال..
/نقولك حاجه..ياريتك دايرها من زمان..
سدرة بضحكه وهي موسعه عيونها..
/بابا!
ضحك جدها من قلبه..وبوها قعد يمسح ع رقبته من الخلف وهو مبتسم بإحراج..
🍂🍂🍂🍂🍂🍂
ووسط الطبيعه صاحبة الجمال الخلاب..
كان يدهور بيها وهي ع الكرسي المتحرك...والصمت مسيطر عليهم..
لعند ماوقفها في مكان فيه يطل ع بحيرة..
حطها جنب المقعد الخشبي وقعمز عليه..
مختار:حلو الطبيعه هني...اي حد يبي يرتاح من الدنيا وهمها يجيها..شافلها وقال..حتى النمسا في اماكن حلوة تشبه هادي..
هي مركزة بنظرها ع البحيرة ومكتفيه بالصمت..
مختار:تعرفي..لفيت ودرت العالم..مانبيش نقول كله بس مافيش قارة ماعفستش فيها..اللي كنت نحلم بيه كله حققته..
شافلها وقال...خوك ولى من اغنى الاغنياء..لكن..اللي قال مش كل شي ينشرى بفلوس كان صادق..هلبه حاجات ماقدرتش نشريهم بالفلوس..زي كلامك معاي..
تنهدت..
مختار:الدكاترة قالوا انت اكبر محفز ليها ع العلاج..يحسابوه عن حب..ضحك نص ضحكه وغير نظره للبحيرة..
هي شافتله بطرف عينها وجت ع بالها ذكرى من الماضي البعيد..
🍂🍂🍂قبل سنوات🍂🍂🍂
عمر سدرة كان 9سنوات..وهو 14سنة..
راقده في الفراش مريضه ومضايقه ..
وامها تحاول فيها بش تاكل..
سدرة بتعب وعدم رغبه..
/مانبيش يما مانبيش..بعديه عليا ريحته خيي.
وردة بضيق:علاش ياامي..كيف بتصحي هكي قوليلي.
فردوس وهي تتغدا..
/تدلع فوتيها..
وردة:هي ماما ع خاطري اني كولي هادي بس..
ع خشة مختار مروح المدرسه لوح الشنطه ع طول يده وقال..
/الغدي يام..
وردة:نوضي يافردوس حطي لخوك الغدي..
تأففت فردوس وقالت..
/حتى اني نتغدا..
مختار وهو يشوف لسدره..
/قاعده مريضه...وقربلها..
وردة بضيق؛ماتبي تاكل شي..
مختار:نوضي يام نوضي..
ناضت وردة وهي تقول..
/حاول فيها سلم ولدي..خل نمشي نحطلك غداك..
ومشت من حداهم..
مختار:قاعده بطنك..
سدرة حطت يدها ع بطنها وقالت..
/توجع فيا هلبه..
مختار:ماهو انتي ماتاكليش كويس وتاخدي في الدوا هكي هدا علاش بطنك قاعدة توجع فيك..
سدرة بدموع؛مش قادره..
خبطها ع خدها خبطه خفيفه وقال..
/من امتى انتي سحنونه هكي..كان يسمعوا بيك بنات خليفه يتشمتوا فيك..
عقدت حواجبها بغضب..
رفع حاجبه وقال..
/هديكا الوشواشه تقول نيتي بانت فيها..
ضمت شواربها لداخل بغضب..
مختار:ولا بنت الجعفري هدى ولامش عارف من هي حي هديكا قداش بتضحك حي..
فردوس كانت تاكل وهي تشوف لسدرة وشاده ضحكتها..
ناضت سدرة وقالت..
/هات الصفرة..
قربلها السفره وهو يقول..
/ايوه هكي نبيك شن هي النزله المعويه بش تغلب سدرة..
خدت الكاشيك وبدت تاكل بغل..
شاف مختار لفردوس وغمز بعينه..
هي ضحكت بكتمان..
ع جية ورده بسفرة الغدي شافت سدرة وهي تاكل فرحت من قلبها..
🍂🍂🍂🍂🍂🍂
نزلت دمعه من عينها..لفت وجهها عنه وقعدت تمسح فيها..
شافلها وقال..
/مافيش مهرب..مجبورة تتقبلي وتتحملي شوفة وجهي كل يوم..
وجهت وجهها للبحيرة مرة تانيه وقعدت محتفظه بصمتها..
ابتسم ورد نظره للبحيرة بعدين بدي يغني..
🍂راجعين يا هوى راجعين
يا زهرة المساكين
راجعين يا هوى على نار الهوى
راجعين يا هوى راجعين
...تسمع في صوته والذكريات محاصرتها..تداخل في عقلها صوت امها مع صوته ودموعها رجعوا غرقوا عيونها وفاضوا...
وهو مكمل يغني...
منودع زمان منروح لزمان
ينسانا على ارض النسيان
منقول رايحين منكون راجعين
على دار الحب ومش عارفين
آه راجعين يا هوى على نار الهوى
شافلها لقاها قاعده معرضه عنه بس شاف دموعها ينزلوا..
رجع نظره للبحيرة والتزم الصمت...
🍃🍃🍃🍃🍃
"كيف!؟"
هدا حسين يكلم في خوه يوسف هاتفيا وهو متفاجئ باللي خبره بيه..
"هو في الاول ماباش لكن بعدين غير رايه اني مش مستريح وفي نفس الوقت نقول بالك هكي خير"
حسين قعد يفكر بقلق وضيق وهو ساكت..
"جاها اليوم وقعد معاها ساعتين ومشي،امي قالت حسيتها عاديه"..
حسين:كان انت مش فاضي امي لازم تقعد معاهم ماتخليهاش معاه بروحها..
"حتى اني قلتلها هكي..اسمع اني مابيتش نخبر حد غيرك مانبيهمش يخافوا.."
هز حسين راسه وقال..
/حتى اني نقول هكي خير..
"يستر الله..باهي قولي شن الوضع في البلاد"
حسين:مايبشرش بالخير..
تنهد يوسف بعدين قال..
"كان صار من الحرب انت شن موقفك"
حسين:اني توا ضمن الجيش ولو وكلوني بمهمه مش حنوخر هكي تعلمت...
"شن بنقولك..ربي يحفظك وخلاص"
حسين:وهو خير الحافظين..
🍃🍃🍃🍃🍃
"مهاب..لا..مهاب"
عبد الرؤوف بضحكه..
/مش عارف كيف يسمعوا في كلامك هكي..
غرفه:سر المهنه..وخدت ولدها ورفعاته..
عبد الرؤوف:ثقيل عليك الفطاحه..
غرفه بضحكه:الله يبارك على ولدي..
وقعمزت جنبه وعطت ولدها المرضعه..
عبد الرؤوف:شن الايام هادي جوك باهي..
غرفه؛مرة هكي ومرة هكي لكن عادي تمشي..التخميم شاغلني عن الوحم لين معاش نحس بيه..
عبد الرؤوف:في شني تخممي؟.
غرفه بقلق..
/نخمم في وضع سدره..كان تمت علاجها كيف تولي..زي قبل ولاتقعد فيها حاجه مأثرة عليها..نخمم في طوبى هي توا تبان قدامنا كويسه لكن من ورانا شن تحس وفي شن تفكر..وزعمه هداكا يخليها في حالها ولايولي ينغص عليها..نخمم في اريج..خايفه هلبه..خايفه لو صارت حرب يخش فيها اسكندر وهادي حرب..يعني بنت اختي هادي حتقعد طول عمرها تعاني!...تنهدت بضيق وهي تقول..لو تكلمه يارؤوف وتعرف في شن يفكر قوله انت خلاص توا تزوجت ودرت في رقبتك مراة..
عبد الرؤوف وهو يمسح ع شعر ولده قال..
/تو نهدرز عليه..
شافتله شويه وقالت..
/نحمد ربي انك سيبت سريبهم..
شاف لعيونها بصمت..
غرفه مدت يدها لشعره وقعدت تمشي عليه بأصابعها وهي تقول..
/مانخلي شي ياخدك مني..
ابتسم ونزل عيونه لولده وهو يقول..
/امر الله مايقدر حد يرده..
غرفه:ماقلت شي..بس مانخليكش تمشي للنار برجليك لو نكتفك تكتيف..
ضحك وقال..
/اني طايح فيها النار..
ضرباته ع ذراعه وهي وتقول.
/مبردك..مبردك تندم فيا ع كل كلمة حلوة نقولهالك..
شافلها وقال..
/قصدك مانستاهلش..
غرفه بحمقه؛ايه باهي..
ضحك وقال لولده..
/ بوك يستاهل من صبره ع امك مراة تانيه ولا؟
مهاب حول المرضعه وقال..
/اي..
ويضحك عبد الرؤوف من وسط قلبه..
غرفه بغيرة..
/راهو يقول في اي ع ولا وهو مش فاهم شي راهو..
عبد الرؤوف بضحكة استفزاز..
/خلاص ولادي عطوني الضي الاخضر تم..
غرفه بغيظ..
/مالا خش الحرب طريقك زينه ع اللي يخاف عليك مرة تانيه.
هو بضحكه:ناخدهم حور عين بعدين صقع عليك..
خدت المخده من جنبها وضرباته بيها بعدين غمت وجهها بيها وقعدت تبكي..
عبد الرؤوف؛ياهبله..يااهبله..
ومشالها ع ركابها وولده يلحق فيه بعيونه لين شافه قعمز جنبها وحضنها..
عبد الرؤوف:قاعد ع قلبك ياختشه قاعد..
ويجي اواب يزحف وهو كيف نايض من النوم يشوف خوه شاد المرضعه يزحفله بسرعه ويجبدها منه ويرضع هو..
ويبدا مهاب يعيط..
عبد الرؤوف بضحكه؛تي اهي الحرب بدت هني حزيها..
بعدت عنه غرفه وهي تضحك من بين دموعها وخدت مهاب وقعدت تسكت فيه..
واواب يشرب في الحليب ولاع باله وبوه يمرر في نظره عليهم وهو مبتسم...
🍃🍃🍃🍃🍃
في اكثر مكان تحبه وترتاح فيه كانت موجوده تتفنن في الطبخ حلو وحار...
الكوجينه هالمرة كانت اكبر واشرح...والجو الاوروبي طاغي عليها..
بس مع هذا كله لايمكن تتخلى عن سماع برنامجها المفضل اللي ولت تابع فيه عن الطريق النت بدل اثير الراديو..
امينه؛غريبة ياكيف نساني..عجيبه ياكيف نساني..
خشت عليها صابرين وهي تضحك قعدت تقلد فيها كيف تغني ليبي واللهجة المصريه غالبه عليها...
ضحكت امينه..
جبدت صابرين كرسي وقعمزت وهي تقول..
/حتى هني!؟
امينه:ولاممكن استغنى عنه..
ضحكت صابرين بعدين تنهدت وقالت..
/كساد..نبي نطلع ..ندهور نغير جو مليت..
امينه:قلتلك نكلم رضا انتي مارضتيش..
صابرين بنرفزة..
/بيجيب خطيبته عارفاته..
امينه:انا اكلمه اقوله عايزين نخرج لوحدنا..
صابرين بضيق:مانبيش..نبي نطلع بروحي ع رجليا نستكشف المكان مانبي نعبى ع حد..
"كان تفوتي الشارع هدا معاش تعرفي تروحي"
رفعت حاجبها ومابتش ترد عليه..
فات من وراها جبد كرسي وقعمز جنبها..
هي ناضت بعدت عنه الكرسي وقعمزت..
وامينه تراقب بصمت..
عقد حواجبه وقال بإنفعال..
/نبي نعرف علاش تعاملي فيا هكي في شن غلطت معاك!!؟ جاوبيني تكلمي..مش هدا اللي انتي تبيه من الاول!..مش هدا اللي اصريتي عليا نديره!..
شبحتله وقالت..
/واني شن قلت!؟ ماقلت شي ومعاملتي معاك عاديه جدا زي قبل..
رضا:لامش زي قبل..
صابرين:لازي قبل..
رضا:مش زي قبل..
صابرين؛مايجيش ترجع زي قبل انت توا راجل مرتبط..
رضا:خطيبتي انسانه متحضرة ماعندهاش مشكله يكون عندي صديقات..
شافتله بحده من فوق لتحت..
رفع حاجبه وقال..
/خيرك!
غيرت نظرها عليه وناضت بتطلع..
هو سبقها وسكر الباب ووقف قدامه..
وقفت في مكانها وهي تشوفله بحده...
رضا بشي من الانفعال وعيونه كلهم حزن
/رجعي علاقتك بيا زي قبل..صحاب..خليني نصدق اني مش في بالك بش نعرف نطلعك من قلبي..
امينه قعدت تشوفله بحزن..
اما هي بمكابره قالت..
/تمام..انت هكي تبي حاضر..ونبدوها من اليوم..طلعنا عشينا برا وخلي خطيبتك تجي معانا..
بنظرات حاده باين فيهم الحزن قعد يشوفلها بصمت..
وهي تشوفله بكبر وتحدي..
وامينه تمرر في نظراتها الحزينه عليهم..
هز راسه وقال..تمام..
"ونسمعوا لوائل كفوري هالمرة طلب من زيزي الزوبي..."
وكانت الاغنيه..قلبي مشتاق..
قعدوا يسمعوا فيها وعيونهم متلاقيه..وقلوبهم والعه فيها نار الحب اللي كان عقاب ليهم مش نعمة..
هي خايفه تنهار وتبكي قدامه..وهو كان يراجي منها في اشارة..اشارة وحده بس مستعد بعده يدير كل شي بش تكون معاه..
قدمتله وقالت..
/افتح الباب..
بدت ع وجهه ملامح الألم مع الغيظ..وخر عن الباب وفتحه..
وهي طول طلعت..طلع وراها ووقف في مكانه وعيونه معاها لين ركبت للدور التاني واختفت عن انظاره..وتوجه بعدين لداره بقلبه الموجوع...
🍃🍃🍃🍃🍃
الساعه 5:00عصرا..
في الطريق..
اريج بإبتسامه فرح وحماس..
/كذب عليك بلادك بلادك لو شني..
اسكندر بإبتسامه..
/انتي غريبه بجديات..الناس تراجي فرصه بش تطلع منها..
اريج:اني مانرتاحش الا في المكان اللي تربيت فيه وفيه الناس اللي نحبهم..اي مكان فيه اهلي جنه عندي اني..
ابتسم بعدين زاد السرعه..
اريج ضحكت بحماس..
زاد السرعه..
شدت ذراعه وقالت بخوف..
/لااسكندرون ماتتحمسش زياده..
ضحك وخدي يدها وباسها..
اريج؛تي ركز في الطريق يانهاري..
ضحك وهو شاد يدها وقعد يحرك في الدومان بصوابعه..
اريج:يانهاري..شن السواقه هادي!
اسكندر:تبي نوريك كيف نسوق برجليها..
اريج بصدمه:شني!..
هو بثقه؛عادي جدا..
قلبت عيونها ودارت روحها داخت..
وهو يضحك عليها...
🍃🍃🍃🍃🍃
فتح عيونه..مرر نظره حواليه شاف سقف داره وحيوطها..
رجع غمضهم وفتحهم بعدين ناض قعمز..
حول الغطا ونزل رجليه..مسح بإيديه ع وجهه..وناض وقف..
وين جي بيطلع من الدار..سمع صوت منبه سيارة عالي..
غير نظره للروشن بعدين مشاله حول الستار وفتحه..
شاف سيارة تندرا فضيه..مدرسه قدام حوش لطفي الواعر..
نزل منها صاحبها..وشويه نزلت منها هي..
شافها تضحك من قلبها..ضحكتها اللي قلبه يموت عليها..
بعدين شاف شي خلا قلبه مات الف مرة..
شافه شاد يدها وخاش بيها للحوش بعدين سمع اصوات زغاريد..
سكر الروشن بسرعه ونزل الستار..ومسح عيونه بعنف مانع الدموع حتى انها تتجمع في عيونه ومشي بسرعه طلع من الدار..
🍃🍃🍃🍃
ضامتها بقوة وهي تقول بفرح..
/استاحشتك موت ياقريده..
طوبى بضحكه ودموعها في عيونها..
/واني اكثر ياشفشه..بعدتها شويه وقالت..عسل عسل الله يبارك..
واريج تضحك..
فردوس وهي تمسح في دموعها..
/قلتي الاثنين!
خدت امها في حضنها وقالت..
/بلعاني نبي ندير مفاجأه..
مطيره:تبي العض من خشمك مش واتيين ياشنكه حتى لحيمات خروف باهيات مافي..
اريج بضحكه:شن براني يامطمط ياما كلي عندنا حتى القديد..
فردوس:مش كيف يابنتي..
طوبى:مش مشكله توا توا تكلم عمتي حسين يجيب معاه وهو جاي ونديرولهم عشي سمح..
مطيره:هو هدا..وخل نكلم سميره بالمرة..
اريج؛عندها علم وتوا توا كلمها يعني ماتعرفش قبل..
🍃🍃🍃
وسميرة طلعت من جناحها متوجهه للمربوعه بش تخبر راجلها..
ع خشة مغليه للحوش..عطتها نظرة حقد..
سميرة تجاهلتها وكملت طريقها...
مغليه:سحيقه..
"موغي"..
شافاته نازل من الدروج ضحكت بفرح ومشتله..
هو وصل تحت وجاها وضمها وباس راسها..
مغليه:خبرني بوك جيت نجري.
نضال:خيرها خديجه..
مغليه:ماخيرها شي لكن اني مش متحمله القعاد في الحوش.
ع جية سميرة من المربوعه..
مغليه برفعة حاجب..
/كان تباتي غادي بالمرة وتعطينا نفس..
هي تنهدت وشافت لنضال وقالت..
/غداك في الكوشه..ومشت كملت طريقها..
مغليه؛يراجي فيك توكليه!
سميره احتفظت بصمتها لين خشت لجناحها..
غيرت مغليه نظرها لولدها وقالت..
/ريت ياولدي ريت..ريت بوك من جاب ع امك ياريته فكر فيك انت ع الاقل..
نضال:مش مهم..اني طالع بنمشي للنادي متاع محمد نروح بعد المغرب ونهدرزوا..
مغليه:زينه وليدي..
مشي نضال طلع من حداها..
وهي غيرت نظرها للجناح وقالت..
/جاك اللي يطيرك ياشلولح...
🍃🍃🍃🍃🍃
"تبي تطلعي لأي مكان كلميني نرفعك"
صابرين بإبتسامه؛مشكورة ياسمين كلك ذوق..
ياسمين:ولو صابرينه حني عيلة توا واللي يعز ع رضا يعز عليا..
شافت امينه لرضا من المرايه..
صابرين؛تسلمي حبيبتي..
ياسمين؛ياقلبي..شافت لرضا وقالت..حبيبي ارفعنا للمطعم اللي تعشينا فيه اخر مرة..
صابرين حطت يدها ع رقبتها وقعدت تفرك فيها..
رضا؛من عيوني..
ياسمين بضحكه؛يسلمولي..
لفت صابرين وجهها للروشن وهي شاده دموعها بقوة...
🍃🍃🍃
وصلوا للمطعم اللي قال عليه رضا..
خشوله ونفس صابرين كان مسدود عن الحياة كلها مش بس الماكله..
قعمزوا ع طاوله وحده..
وصابرين قعمزت جنب ياسمين مقابله امينه وماكانتش تبي عيونها يغلطوا ويشوفوا لرضا اللي قعمز مقابل خطيبته..
تجاذبوا اطراف الحديث وصابرين كانت قليل ماتتكلم..
اكثر الكلام كان بين ياسمين ورضا اللي قاعد يضغط ع صابرين ويستفز فيها....
وهي حاطه العقده وتشبح القدام وخلاص..
وامينه في وسطهم تراقب وبس..
رضا:اقل شي في حقك..
ياسمين بأبتسامه؛حبيبي انت..
صابرين مررت نظرها ع المكان وهي مش طايقه نفسها..
ويثبت ع حد تفاجئت لما شافاته..
كان مقعمز مع مجموعه رجاله يبانوا شخصيات مهمه..
وهو مربع ايديه وفي وسطهم كان يتفرج عليها بإبتسامه ليه من اول ماخشوا وهو يتأمل فيها..وين شافاته..
ابتسم وغمزلها بعينه..
ابتسمت وشافت لياسمين وقالت..
/خالك هني..
رضا طول التفت يدور فيه لين شافه..
ياسمين بضحكه:الله ع الصدف..رفعت يدها وحياته..وهو رد التحيه بعدين غير نظره لصابرين..
رضا شاف لصابرين بنظرات حاده كلها غيره..
امينه؛ياختي عليه زي القمر..
ضحكوا..
رضا:من امتى تتغزلي علنا هكي!..
امينه بضحكه؛يوه ده زي ابني..
ياسمين:دمك عسل ياامينه..
امينه بإبتسامه:انتي العسل ياحبيبتي يابخت رضا بيكي..
صابرين بإبتسامه؛حق محظوظ رضروض..
ياسمين بإبتسامه:حتى اني محظوظه بيه.. ابتسمت صابرين بإستفزاز وهي تشوفله...
وهو ابتسم غصبا ومن داخل كان قلبه بركان وفاير...
🍃🍃🍃🍃
ويخش نضال للملعب..يقعمز ع المدرجات وهو يتفرج ع محمد كيف يلعب في المباراة التدريبيه..
مرر نظره ع المكان وهو يفكر متسائل بقلق..
ياترى شن حيصير القدام! حيقعد المكان هدا زي ماهو ولايقعد اثر بعد عين!..
تنهد وقال..
/ربي اكفنا شر مافي الغيب..
"عمي"..
شاف يمينه لقي يزن مقعمز حداه..
ضمه وقال؛وينك بكري؟
يزن؛جيت لحوش جدي قالوا راقد..
نضال؛ايه صح من الظهر للعصر..
يزن:فرحت هلبه اللي غيرت رايك محمد خوي فقدك هلبه..
نضال شاف لمحمد وهو يجري في الملعب بإبتسامه..
وشويه وبدي يشجع فيه..
لما شافه محمد من الفرحه تحمس ودار هجمتين سجل فيهم زوز اهداف..ونضال يصفرله ويغنيله..
لين تمت المباراة بفوز فريقه..
نزله نضال يجري من المدرجات وهو يغني..
محمد مهدي ماشاء الله عليه..
محمد مهدي..ماشاء الله عليه..
وصل فيه محمد وهو يضحك وحضنه بقوة..
ونضال ضمه وهو يضحك...
🍃🍃🍃🍃🍃
"عمله ودرناها في عمارنا"
هادي اخت ربيع واقفه في جنان حوشهم مع بنت خالته..
الجمله اللي قالتها سمعتها نسرين وهي خاشه للكوجينه دير في رضاعة ولدها..وسمعت بعدها بنت خالته تقول..
:والله مايستاهل ربيع بجديات ياخد مراة من عيلة زي هادي وفوقها يقعد يعاني في مفرخها..
:اني ع الصغار مش معترضه عارفه وضع خوي..لكن العيله ياوخيتي..فوق المصايب اللي داروها ولد اختها خديجه قالي راجلي مصاحب مردف يجيهم يوميا في حوازة في****** العار كله يديروا فيه غادي..
:غبارة!..
:حوازة عم راجلي غادي الراجل يشكي منهم ومن بلاهم اللي يديروا فيه وراجلي مش غادي بعيونه راه معاهم..
:عليك حظ حظ ربيع...
:والله ماكنا نعرفهم عنهم هدا كله لين ناسبنهم العفن كله اللي كانوا يدرقوا بالبرستيج الكذاب متاعهم..
🍃نسرين معاش تحملت تسمع اكثر طلعت من الكوجينه والصدمه جمدت حتى دموع عيونها.
فكرت تكلم ربيع يجي يروح بيها بس بعدين خافت يدير مشكله خصوصا وان عارف ان اهله معاش ولوا متقبلين نسرين...
بلعت وغصت بصمت وعقله قعد رايح وهي تفكر في المصيبه اللي عرفتها عن ولد اختها...
🍃🍃🍃🍃🍃
"المراة هادي نبي نقتلها قاعد ع شعره..الله يرحمك ياطاهر وخلاص"
محمد بضيق؛طلعت من غادي مانبيش المشاكل عارف بوي قصة زي هادي تخليه يسيب الحوش وحناي الحق وجعني حالها بعد سافرت تعبت هلبه..
نضال بضيق..
/شن دارت بعد خدي بوي..
محمد؛صراحه مش عارف..اللي نعرفه ان مرت جدي مراة كويسه هلبه..ومش كلام بوي عنها هدا هدا كلام يزن وسدرة..
نزل نضال نظره لايديه اللي كان حاطهم ع بعض ع الطاوله..
محمد:مش قصدي نضايقك..نبي نوضحلك الصورة لأن عارف الوضع كويس..
شافله وقال..
/صدقني مافي بالي شي ممكن تستغرب كلامي بس الفترة اللي قعدت فيها بروحي برا خلتني نفكر كويس..نفكر بعقل..
شن استفدت لما فشيت غلي..وشن بنستفيد لو عاديتهم! شن بيتغير..مايتغير شي..ربي رايد شي وصار لو ننقب السمي مامتغيرة حاجه يبيها ربي..تصدق..سألت نفسي..قلت يانضال اما خير..تعيش مرتاحه مع غيرك ولا في الهم والمشاكل معاك!؟ انت ترتاح لو هكي عاشت معاك متنكده وبعيده عن اهلها المتعلقه بيهم!...اكتشفت وقتها ان مش مهم اني نكون مرتاح ولالا همي كله هي تعيش مع حد...شد ع قبضة يده بقوة وقال..يقدر يدير اللي اني ماقدرتش نديره..يعوضها عن حرمانها من بوها..ويكون معاها راجل بمعنى الكلمه.
حط محمد يده ع قبضة يد عمه وقال..
/حتى انت كنت معاها راجل غير الظروف عاكستكم..صح غلطت معاها هلبه..لكن غلطك هدا مايغيرش حقيقة انك حبيتها برجوليه ووقفت معاها..
ابتسم نضال ابتسامه تخفي الالم وقال..
/يللا..ربي يهنيها..خليك مني وخبرني عنك..
ضحك وقال؛مش خير منك والله..
ضحك نضال...وورا هالضحكه قلب قاهراته جروحه...
🍃🍃🍃🍃🍃
تحت شجرة الياسمين كانوا واقفين..
هي تقول وهو يسمع..
اريج:غدوة بدير باهي..وتبيني نحضرها باهي...واني خاطري نحضرها باهي..باهي!
هو بإبتسامه؛باهي..
هي بحماس فتحت عيونها ع وسعهم وقالت..
/معناها تخليني نبات..باهي..
هوقال:لا مش باهي..
ضرباته ع صدره وقالت بنرفزة
/علاش باهي!
اسكندر بحب:مانقدرش ع فراقك..
شدت ياقة قميصه ورمشت عيونها بخجل مصطنع وقالت..
/امم كانا هكي..تجيبني غدوة الصبح وخلاص..
ضحك وقرص انفها بقوة..
هي حطت ع انفها وقالت..
/خلاص خل نخش نقوللها ماصارش..
هو قال بإبتسامه..
/لاصار هالليله وبس..
اريج بضحكه؛ياربي سلمه ونجيه وعليه وخليه..
هو بضحكه:دعاتك سميره..
اريج ضحكت وقالت..
/ايه..بنقولك..ضيقت عيونها وقالت..عادي تجيبلنا شيبسات وحاجات حلوات نكسدوا بيهم..
اسكندر:جيبي بيرو واكتبي ع يدي شن تبي بالزبط..
اريج:خمسه بس..وخشت تجري..
وقلبه راح معاها...
لحظات وطلعت تجري وهي تقول هات يدك..
عطاها يده بدت تكتب عليها وهو يتأمل فيها بنظرات يغزلوا في الحب غزل..
اما هي فكانت مرتاحه معاه وعايشه معاه علاقه صداقه مع الزواج..وفي بالها ان هالصداقه حتما حتطور لحب بعدين..
تبي قلبها العنايدي يتقبل غصب عنه..
اريج:هما هادم..
نزل يده وقال:شويه ويكونوا عندك..
ابتسمت وهي تقول..
Thaks..
🍃🍃🍃🍃🍃
وروح رضا باللي معاه..حط خطيبته في حوش اهلها وروح بأمينه وصابرين..
خشوا الزوز للفيلا من غير مايكلموه..
وهو كمل ليله والغيره تاكل في قلبه ماكله...
🍃🍃🍃🍃🍃
الساعه 12:00بعد منتصف الليل..
في دارهم..
ياكلوا في التسالي وهما يهدرزوا..
اريج:كويس هلبه وطيب ومحترم ع الاخر مرتاحه معاه..
طوبى بإبتسامه:الحمد لله..
اريج:الخيره في اللي اختاره الله واني حاطه الحاجه هادي بين عيوني..
طوبى:كويس خليك ديما هكي..
تنهدت بعدين قالت:صار كلمتوا خالتي سدره..
طوبى ؛ايه..الحمد لله وضعها احسن من قبل..وحكايه فقدان الذاكرة الجزئي معاش ضايقتني بعد ماقريت عنه..مع الوقت حتتفكر كل شي..المهم عندي انها تقبلت وفاة بوي الله يرحمه..
اريج:الله يرحمه ويغفرله حبيبي..باهي قداش مازال تبي للعلاج..
طوبى:لازم تكمل سبعه شهور..مش حترجع زي ماكانت بالزبط بس حيكون وضعها متحسن هلبه..تدوي بطلاقه اكثر وتمشي بالقيلا..
اريج؛يعني تكمل علاج هني!؟
طوبى:اكيد..علاج طبيعي عادي..
اريج هزت راسها وقعدت تاكل..
سكتوا شويه بعدين اريج قالت..
/خايفه من حكاية الحرب..
طوبى:ماكلمكش اسكندر عنها؟
اريج بقلق:نهائي واني من خوفي مادويتش معاه فيها بكل..خايفه هلبه ياطوبى..
طوبى:بإذن الله مايصير الا الخير..ياما خشوا حروب وماصارلهم شي اللي حفظهم توا يحفظهم بعدين..
اريج برجاء:يارب..
🍃🍃🍃🍃🍃
تاني يوم..
الاثنين..
1إبريل..سنة 2019
🍂سويسرا🍂..
ناضت بمساعده الممرضة ووقفت ع الممشى..شدت هي الحدايد اللي حواليه..
وشافت لأخر الممشى.
هو كان واقف مربع ايديه يشوفلها بتحدي وهو يقول..
/شن تراجي!! ولاتبي نجي نساعدك..
عقدت حواجبها بعصبيه..وبدت تخطي بكل قوة..
جهينه وصفيه يراقبوا بترقب..
وهو يشوفلها كيف تخطي ويقول..
/في الشك توصلي فيا..
غمضت عيونها بشدة وهي تقول همسا..
/يارب..
وخطت مرة تانيه..
مختار:اممم..كويس..
خطت الخطوة التالثه وهي تبذل في كل جهدها..
مختار: دكتورة تتوقعي توصل..
جهينه:متأكده..
صفيه؛بالشويه عليها مااتضغطش عليها هكي..
مختار:ايه مازال حالها بالهون..
قامت عيونها وشافتله بغضب..
هو رفع حاجبه وابتسم بتحدي..
ركزت بنظرها عليه وهي تغلي من الغضب..
كانت عندها رغبه تصفعه صفعه طرش وذنه..
رفع حواجبه وهو مبتسم تعجبا بسخريه..
وهي زاد غضبها..
ماكانتش حاسه روحها وهي قاعده تخطي في الخطوه ورا التانيه..لعند ماحست انه بدي يقرب..
نزلت عيونها لرجليها..
هو قال:لالا..
قامت عيونها وشافتله..
اشر بسبابته ع وجهه وقال..
/اشبحيلي هني ركزي معاي بس..
سدرة حست بالتعب..وقفت ونزلت راسها..
صفيه بقلق..
/سادها خلاص..
جهينه:سدرة!؟
اخصائيه العلاج الطبيعي كلمت مختار..
هو قال..
《لن تتوقف انا متأكد》..
/كملي هيا..
قامت عيونها وشافتله..
مختار:هيا...تقدري..هيا..
خدت نفس..ورجعت تمشي مرة..
هو بتشجيع..
/هيا..هيا...ديدش حب الرمان
ضحكوا جهينه وصفيه..
شافتله بإمتعاض..
مختار:انتي تتمرخي انشطي..
خطت خطوة تانيه..
هو بضحكه..
/وتعالى تعالى تعالي..ياحبيب القلب تعالى..
ابتسمت وهي تشوف لرجليها..
والاخصائيه تشوف لمختار بإعجاب..
مختار:هيا..هيا..اهو جي اهو جانا.
وصلت فيه خلاص..
ضمها ورفعها فوق وهو يصيح بفرحة نصر..
واللي حواليه يضحكوا..
سدرة قعدت تضحك بخوف..
وهو يشوفلها بإبتسامه..بعدين مشي بيها للكرسي..
قعمزها عليه وساعدته الممرضه..
جهينه بضحكه؛برافو بجد برافو سدرة..
مختار:ومافيش برافو مختار..وغمزلها..
ابتسمت جهينه بخجل...
الاخصائيه قعدت تصفق وهي تقول باللغه الانجليزيه.
《برافو مختار برافو》
سدرة قلبت عيونها وشافت لصفيه..وصفيه ضحكت..
مختار حيا براسه الاخصائيه وقال..
/Thank you
🍂🍂🍂🍂🍂🍂🍂
ولوا بيها لدارها بعد كملت حصة العلاج اليوم..
مختار:اليومين اللي جايات عندي شغل ضروري مانقدرش نغيب عنه بعدين يومين نجي..وتوا تشاو..وحط يده ع فمه طبع عليها قبله بعدين حياهم بيها ومشي طلع من الدار.
وعيون سدرة معاه..غيرت نظرها لصفيه وقالت..
/تعالي..
جتها صفيه..
ضمتها سدره..
وصفيه حضنها وهي فاهمه ان سدرة ماتبيش مختار يغيب عليها...
🍃🍃🍃🍃🍃
وفي ليبيا..تحديدا العاصمه...
وشارع القهوة..بعد العصر..
كان كل شي جاهز لحفلة ختم جزء عم اللي داروله عشي...
وبدوا البنات اللي تعرفت عليهم طوبى في القروب..وبنات الجيران من اللي يخدموا في المحل يجوا...
واخرهم كانت ابله زينب اللي جابها خوها هالمره..
🍃زينب؛حماس غير منضبط رد بالك..
عدي:نعرف نتصرف انتي تفرجي بس..
ضحكت وقالت.
/وشن جابك هالمرة الحاحي!
عدي:اسكتي اعطي لسانك اجازة..
زينب بضحكه:اهوا الحوش..غيروا بابه..ريت اللي واقفين القدام شويه..الراجل الكبير جدها واللي معاها تقريبا خالها.
عدي ابتسم وقال:تمام انزلي..
ابتسمت وفتحت الباب ونزلت..
دقت الباب..شويه وانفتح وخشت وسكرت وراها الباب..
وعدي حول مفتاح السيارة ونزل منها..سكرها ومشي بإتجاه علي الواعر والمحجوب.. عدي:السلام عليكم..
هما ردوا عليه السلام..
عدي:عدي بو حجر خو معلمة بنتكم القران وفي نفس الوقت كانت تخدم في المدرسه معاها...
علي:عرفتها..اهلا وسهلا..
المحجوب:تشرفنا..
عدي بإبتسامه؛بارك الله فيكم..المهم اختي مدحت في الشارع هلبه واني شفت بعيني انه زي ماقالت عنه بالزبط وفكرت ناخد حوش هني..وبما ان الحاج قديم في الشارع اكيد يعرف كان في حد بيبيع ولاحاجه!؟
علي:اي نعم..اكيد..ع حظك اليوم سبحان الله..جارنا في اخر الشارع من غادي بيحول وعارض حوشه للبيع..
شاف عدي وين ماأشرله الحاج علي وابتسم..
🍃فكرة انه يشري حوش في الشارع مش وارده في باله نهائي..كل مافي الامر انه لقي من وين يخش لعيلة الواعر ويعرفهم شويه عن قرب زي ماعرف بنتهم اللي خدت حيز كبير من تفكيره🍃
#خريف
#طوبى
....يتبع...
