#طوبى "جنة طوبى"
#جمان_فريد
#الجزء_الرابع_والثمانين "حرب باردة/حرب النجوم "
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الذكر🌼
قال رجلاً لرسول الله ﷺ، إنَّ شرائع الإسلام قد كثرت عليَّ، فأخبرني بشيءٍ أتشبَّث به؟
قال ﷺ: “لا يزال لسانُك رطبًا من ذكر الله”
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃«وَقُلتُ لَها ترَكتُ النَّومَ ليلاً
وعِشقِي قد غَزانِي فِي مَنامِي
فَقالت لي لأنَّك نِمتَ عصرًا
فَدع عنكَ التَّلاعُبَ بالكَلامِ!»🍃
________________________________________
"احلى مفاجأة زي وجهك"
ضحكت فاتن وقالت:وسع وسع ياملسن خل نمشي نديرلك فطور..
مختار:ااه كم انا محظوظ..
قعدت تضحك ومشت للكوجينه..
وهو مشي بطريقه للصالون وقال..
/في الصالون..
وصل فيه وخشله ومشي طول للمنظومه..
خدي السيديهات اللي عليها وقعد يشوف فيهم..
اختار واحد منهم وحطه في المنظومه وشغلها..
ومشي قعمز وغمض عيونه وعاش مع الحان معزوفة بيتهوفن...
🍃🍃🍃🍃
في الوقت اللي كانت فيه طوبى مقعمزه في باحة الكليه بروحها وهي مغمضه عيونها وتسمع بصوت أحمد العجمي في القرآن...
اللي تلقى فيه هدوء نفسها والسكينه والراحه..
مافي شي يعرف يواسيها زي كلام ربها..ولافي حد يقدر يقويها غير هو..الله..اللي ديما معاها...
فتحت عيونها لما حست بحد قعمز جنبها سكرت الصوت وشافت جنبها وقالت بإبتسامه..
/وينك تأخير..
عبير:اسكتي راحت عليا نومه..
طوبى بنظرات جانبيه..
/سهرانه تشلطي..
ضحكت عبير بخجل..
طوبى ابتسمت بعدين قالت..
/امس كانت فضانية للوشة..
عبير بإبتسامة..
/ربي يكمل ع خير..بيبو..
طوبى:امم..
عبير:بما انكم بديروا عرس وبتحضريه معناها تقدري تجي لعرسي..
ضحكت طوبى وقالت..
/قولي ان شاء الله عبير رفعت عيونها وقالت برجاء..
/إن شاء الله يارب إن شاء الله..
وطوبى تشوفلها وتضحك..
🍃🍃🍃🍃🍃
بعد ساعات خدوها في رحلة السفر..
نزلوا في فندق في مدينة اسمها "آيا نابا"
كانت هي وامينه في غرفه..وهو في غرفة قريبه عليهم..
☘وع سرير واحد رقدوا امينه وصابرين وهما يهدرزوا والنوم في عيونهم..
صابرين بنعس:زعما يرفعنا للبحر المتخلف هداكا..
امينه بضحكه وهي ناعسه..
/حقولوا مايرفضليش طلب..
صابرين:ماك عسوله من يقدر يرفضلك طلب..
ضحكت امينه..وغمضت عيونها..
وصابرين بعدها وحتي هي غرقت في النوم..
🍃لكن هو قعد فايق..
كان قدامه اللاب توب ويتفرج ع فيلم آكشن مرة ينجسم معاه ومرة يسرح في بتفكيره..
شويه قام تليفونه وخش ع الاستديو الصور..
حط ع صورة واخدها لجواز سفر صابرين ركز فيها هلبه وهو يفكر..بعدين ابتسم ونزل التليفون...
ورجع يشوف للاب توب..
/اياه خل نرده لتالي نشوف اللي فاتني..
🍃وفي هالوقت .
كان مختار واقف في بالكونة الشقه وسرحان بتفكيره في لقائه امس بطوبى وشن لازم يصير بعده..
قطع عليه سرحانه صوت بوابة العمارة اللي انفتح..
شافله لقي سيارة آلاء خاشه..ابتسم وخش داخل طول..
🍃درست آلاء في الموقف متاع السيارات للعماره..
نزلت منها ومشت طول خشت..
وصلت في الشقه لقت الباب مفتوح خشت طول..
سمعت صوت اغنيه غربيه..استغربت..
قعدت تبع في الصوت لين وصلت للصالون..
شافت خالها واقف حدا المنظومه وهو يصفق بصوابعه ويغني مع الاغنيه..
وين شافها فتح حضنه..
هي ضحكت ومشتله طول..
حضناته وهو ضمها وقعد يغنيلها في الاغنيه اللي كانت كلماتها معبره عن السعاده..
بعدين بعدها وقعد يرقص ويرقص فيها معاه وهي تضحك من قلبها...
كانت متحشمه منه..لكن هو منطلق ويرقص..
مختار مايبانش عليه سنه وشخصيته جدا جذابه..
وكان يرقص غربي بطريقه حلوة خلت الاء مندهشه فيه وفي نفس الوقت تضحك على حركاته وهو يغنيلها..
شويه خشت عليهم فاتن اللي كانت دير في الغدي..
شافتهم وقعدت تضحك..
وهو لما شافها خلا آلاء ومشالها خداها من يدها وقعد يرقص فيها..
هي في الاول تحشمت من الاء بس بعدين قعدت ترقص معاه..
والزوز كانت حركاتهم متناسقه وهما يرقصوا زي بعض..
الاء تتفرج وهي مصدومه!!
ماكانتش تحساب خالها لهالدرجه منفتح..!
هادي طليقته وجاياته للحوش ويرقص هو وياها والجو الجميل!
شي عمرها ماشافاته الا في المسلسلات والافلام الاجنبيه..
~~~~~~
آلاء؛اني لتوا مش قادرة نستوعب عندنا الحاجات هادي في ليبيا عادي!
اريج؛وعلاش مستغربه خالك عاش عمر برا وهي بروحها لما جتنا فهمتنا انهم صحاب وحتى هي قالت انها عايشه عمرها برا..
طوبى:في عالم تاني غير العالم اللي عايشين حني في هالبلاد حتى حني في عندنا الطبقه المخمليه جماعه الناس المودرن اللي كل شي عندهم عادي..ولما يطلعوا برا يديروا اللي مايقدروش يديروه هني...
الاء بضيق:زعمه عزيز حتى هو هكي!؟
اريج وطوبى شافوا لبعض..
هي مررت نظرها بيناتهم وهي تقول..
/عارفاته عايش عمره برا لكن حسيته مختلف مش عارفه..خايفه يكون احساسي غلط وبعدين ننصدم بالأمر الواقع..
طوبى:هدرزي انتي وياه في الحاجه هادي حقك لازم تعرفي..
الاء سكتت وهي مضايقه ع الآخر..
أريج؛شوفي الراجل يبان رزين ومحترم حتى امه واضح عليها مراة محافظه..
طوبى؛هدا اللي حسيته لما شفتها مش زي عماته ومرت بوه وهو تربى برا مع أمه..
نوعا ماارتاحت آلاء لما سمعت شن قالوا لكن قالت..
/تو نزيد نهدرز عليه ونفهم منه...
🍃🍃🍃🍃🍃
وقدام مطحن عيلة شنيبه..
كانوا ربيع والمهدي واقفين مع بعض ويحكوا عن..
ربيع؛ع راحته يقعد وين مايبي خليه ياخد ع الوضع وبعدين ساهل..
المهدي هز راسه بعدين قال..
/هدرزت عليه وفهمت منه ان الحياة برا مش مريحه ماقدرش ينسجم غادي قالي ياخالي اني كنت نبي نعيش برا لكن مانحسابش العيشه هكي برا ماارتحتش بكل..
ربيع؛وخواته؟
المهدي:قال انسجموا مش زيه هو...
ربيع قعد ساكت وهو يفكر..
ع جية سامي..وقف عليهم وقال..
/السلام عليكم..
الزوز ردوا عليه السلام..
سامي؛شن الامور؟
ردوا بأصوات متقطعه.
/تمام..ماشي الحال..
المهدي:شن حالك انت؟
سامي:الحمد لله..بالله بنسأل ع التارقي ماوصلتوش فيه..
ربيع:للأسف ايه ماوصلناش فيه..
سامي بإستياء؛المعرض يوم عشرين واني عابي ع شغله حيغطي ربع المعرض..وهو عطاني كلمه مايجيش هكي..
المهدي وربيع ماعرفوش شن يقولوا كانوا مستائين اكثر منه..
وفي هاللحظه..
تخش للشارع سيارة تويوتا دبل قابينه لونها اسود..
درست قدام حوش المهدي..
الثلاته قعدوا يشوفولها..
نزل منها واحد..مشي طول للجهة التانيه وفتح الباب..
وينزل التارقي بمساعد القيلا..
رجله اليمين كانت مجبسه وذراعه اليمين كذلك..
وين شافوه التلاته..
انفجعوا المهدي وربيع ومشوله طول..
وسامي انصدم ولحقهم..
وصلوا فيه وربيع قال وهو مصدوم..
/شن هدا!
التارقي بضحكه..
/طريحة باهيه..
المهدي بجديه:تارقي..
عيسى:حادث..
الزوز قعدوا يشوفوله ومازال ملامح الفجعه ع وجوههم ..
عبد القيوم:يارا كنكم!؟ مافي شي حاجه بسيطه..
سامي:حمد لله ع السلامه..
ابتسم عبد القيوم وهو يشوفله من ورا النظارات قال..
/اللوحات اللي تبيهن واتيات..
هو اتفاجئ .
عبد القيوم؛من قبل لنعدي كملت شغلي عليهن..
ربيع بنرفزة:ياراجل لوحات شني بالله عليك..اقسم بالله خاطر عليا نعطيك طريحه نكمل عليك..
المهدي:تبيها..
عبد القيوم ضحك نص ضحكه وقال؛هي تعالوا نرقوا للشقه ونحكوا..تفضل عيسى..
عيسى:مرة تانيه حجي عندي ماندير..
ربيع شاف لعيسى بشك..
عبد القيوم؛عدي مربوحه وبارك الله فيك..
عيسى:عدي انت تربح..ومشي ركب سيارته وخلا عبد القيوم يضحك..
تباعد عن السيارة اللي وخر بيها عيسى وطلع من الشارع..
ربيع شاف للتارقي وقال..
/متأكد انه حادث!..
عبد القيوم بضحكه؛عليك سؤال.
المهدي قعد يشوفله وحتى هو بدي يشك..
وفجأه يسمعوا صوت انثوي يقول ..
"ياناعلي!"
التفتوا كلهم..
وشافوا سيارة باصات مدرسه قدام مطحن جنة..
ونازلات منها زوز نساوين مختمرات ومعاهم سالمين اللي كانت تشوف للتارقي وهي مفجوعه..
ويقدموا راجلها جبريل ومعاهم زوز رجاله لابسين تارقي وكانوا عم عبد القيوم وراجل بنت عمته يقصوا الطريق وهما متوجهين لعبد القيوم اللي قال وهو معصب بعض الشي..
/هلي عيت الطبه..يموتوا كان ماطبوا عليا مرة في عمرهم...
🍃🍃🍃🍃🍃
"عليك فجعة ياربي والله لعند توا نرعش"
فردوس:باهي ربي سلمه..
مطيره؛ايه الحمد لله..
سالمين؛ياروحي اول مرة نشوفه هك قلبي وجعني..
فردوس؛عمته وبنت عمته مسكينات جايات بيفاجئوه وتجيهم هما الفجعه..
سالمين:سليمه خليتها تبكي قريب تهبل..
مطيره بتعاطف:ياروحي..تقول ولدي ربيته مع امي..
سالمين؛ايه والله ولدها واعز من عيالها عندها..
~~~~~~
سليمه ببكي؛طرابلس السودا طرابلس اللي من نهار جيتها ماريت خير..
صفيه بضحكه؛يما قالك الحادث داره برا طرابلس..
سليمه؛تضحكي يلي ماتحسي ماتقولش خوك اللي تبحتي فيه متكسر قدامك..
هو بضحكه قال..
/عمتي من جدك! قولي الحمد لله اللي هذى حدها..
سليمه ببكي؛اه كان طاوعني وتروح معانا ولاترد لبنغازي وتخلي هالغمه..
عبد القيوم؛حرام عليك طرابلس غمه! اسمح مافي ليبيا طرابلس..
شبحتله بربع عين من بين دموعها وهي تهز في راسها..
هو وجهه تغير لونه وانحرج من تلميحها بنظراتها..
اما صفيه كانت تشوفله بإبتسامة بأسف..
والرجاله في المربوعه مقعمزين ومعاهم المهدي وربيع يحكوا في نفس الموضوع...
لين دق باب الشقه..
ناض المهدي وطلع للباب..
فتحه وخدي سفرة الضيافه من محمد ولده وقاله..
/خش سلم..ومشي للمربوعه..
ومحمد خش بعده وسكر الباب...
🍃وفي مخزن حوش لطفي الواعر اللي فوق السطح..
طوبى ببكي:ريت ياخالي ريت مش قتلك..
"مرات حادث حق"
طوبى ببكي:لامش حادث هادي طريحه..
" لكن هدامش أسلوب مختار "
طوبى بغضب:مش مختار الزفت هداكا ردله الطريحه عارفاته بيردها من الاول مش حيخليها تبرد..
"الجالي! نسيته بكل"
طوبى ببكي؛شوف شن جاه من تحت راسي..ومازال مسكر راسه ع الشراكه بعد ما مختار عرفه والله عارفاته ماهو مخليه وحيدير اي شي بش يطلعه من الشارع..ياريت يطلع من قبل مايوصل فيه..
"شن اللي مخليك متأكده ان مختار زبطه"
طوبى خدت نفس وقالت..
/خالي فكر فيها كويس..اللي صار للمطحن كله الغرض منه ينعرف من هو الشريك الحقاني مختار عارف اننا حندوروا من ورا اللي قاعد يصير معانا هو خلاها تبان حرب بش ندوروا من وراها وصار اللي يبيه..
"خوك هدا مش عارف شن نقول عليه "
طوبى مسحت دموعها وقالت..
/المهم توا لازم تفكوا الشراكه في اقرب وقت وماتخلوا حد يعرف انها انفكت يعني حسين ماتوصلوله شي...
"علاش"
طوبى؛خالي لما تجي تو نقعمزوا اني وياك مع جدي ونفهمكم..
"تمام تمام..العشيه ان شاء الله جايين اني ونبيله"
تنهدت طوبى من قلبها بخوف وهي تدعي في نفسها لربي يجعل اخرة اللي قاعد يصير خير...
🍃🍃🍃🍃🍃
مجرد مابان عليها البحر الكبير الواسع..وسمعت صوت امواجه..وشمت ريحته..
سبقتهم تجري لين وصلت للشط..
وقفت وغمضت عيونها وراحت في عالم تاني وهي تتنفس في ريحته..
فاتت من جنبها امينه اللي كانت راميه حذائها ورافعه شويه من سروال لعند الكعب..وصلت في الميه وقفت وبللت رجليها..
وهو مشي وقف قريب ع صابرين شويه وقعد يشوفلها من ورا النظارات وابتسامته ع وجهه..
فتحت صابرين عيونها وهي مبتسمه بحماس بعدين شافت لأمينه وهي واقفه قريبه ع الشط..
ضحكت ومشتلها تجري..وصلت فيها وضربت برجلها الميه وبلتها..
شهقت امينه وقال:يابنت الايه..وردتهالها..
وصابرين تضحك..
وقعدوا الزوز يلعبوا بالميه..وهو يشوفلهم بإبتسامه..
صابرين وهي تحدف في الميه بإيديها..
/نشوف فيهم شادينها في المسلسلات طلع فيها جو..
امينه؛يابنت يامجنونه كفايه..
وقفت صابرين وهي تضحك قالت..
/تعالي نخشوا..
امينه:لاانا مابعرفش اعوم..
صابرين بضحكه؛لكن اني نعرف..
وجت بتخش قدم رضا بسرعه وهو ينادي..
/هييه..وين ماشيه!..
وقفت..والتفتوله الزوز..
رضا وهو عاقد حواجبه؛ولي ولي..تعالي..
صابرين بضجر:علاش جيت معانا علاش ياهم..
امينه تفنص فيها..
هو رفع حاجبه وقال..
/راهو قاعد نساير فيك ماتخلنيش نطلع عن طوري..
امينه:صابرين اسمعي الكلام..
صابرين بعناد؛لا مش سامعه وبنخش..
هو قال:تو كان نطلق لساني نخليك تنتحري غارقه..
امينه التفتت وشبحتله بلوم..
اما هي قالت بإبتسامه مستفزة..
/لامش حنغرق انت تنقذني بعدين..
رفع حواجبه وقلبه بدي يدق بقوة وبسرعه..
اما هي مشت خدت امينه من يدها وقالت..
/تعالي..
امينه بضحكه خوف..
/قلتلك ماعرفش..
صابرين بضحكه؛لالا مش خاشين بنتمشوا بس..
ابتسمت امينه وهي تقول..
/كدا كويس..
وقعدوا يمشوا مع بعض يهدرزوا..
وهو مازال يتبع فيها بعيونه..تنهد من قلبه..بعدين لحقهم وقعد وراهم بمسافه...
🍃🍃🍃🍃🍃
"ياقلبي هالسمحه لاقوة الا بالله عليها بنتي"
طوبى وهي تشوف لسالمين كيف حاضنه جنة وتلاعب فيها قالت..
/مابيتش ندير الحفله لين تجي..
ابتسمت سالمين وهي تشوفلها..
وطوبى بضحكه قالت:فرحانه بجيتك بنطير..
وناضتلها تجري وقعمزت في جنبها ضمتها وباستها..
وسالمين تضحك وهي تقول..
/نجك ليا ياقلبي انتي وهالسمحة هذي العسل..
طوبى قعدت تشوف لبنتها وهي مبتسمه قالت..
/غدوة بنرفعوها لمصور يديرلها جلسة تصوير هالنتفه هادي..
سالمين؛اشيه اشيه..ووين هالمصور هذى ان شاء الله مش بعيد الجو بادي يصقع..
طوبى:لا هني في الشارع عمتي مشتله واتفقت معاه وقالت هديه منها..
سالمين؛تستاهل هالسمحه الله يبارك عليها ويحميها..
بعدين شافت لطوبى وقالت..والله يبارك عليك حتى انتي زايده سماحه..
ابتسمت طوبى وقالت:عيونك الحلوة غاليتي..
سالمين:جايبتلك حاجات سمحات زيوت وكريمات وحاجات طبيعيه انا دايرتهن..
طوبى:قداش ليا ع حاجاتك السمحه هادي..
سالمين بضحكه؛عدي للدار متاعكم في شنطه لونها قهوي تلقيهن فيها..
طوبى ناضت وهي تقول بحماس..
/جري..
ومشت بسرعة طلعت من الدار..
وسالمين معاها بعيونها وهي تضحك..بعدين شافت لجنه وابتسمت من قلبها وعيونها تعبوا دموع...
🍃🍃🍃🍃🍃
وفي مربوعة شقة التارقي..
كانوا الكل موجودين حواليه..
صحابه وعمه ونسيب عمته ولحق عليهم الحاج علي اللي قعمز جنبه وخلا الكل لاهيين بالهدرزة وقاله..
علي:قبل اني نبي نعطيهالك الطريحه..
عبد القيوم شافله وهو يضحك بصدمه..
شافله وقال..
/مش حادث..انت واكل طريحه..
عبد القيوم غير عيونه القدام..
علي:عرفت علاش نبوا نفكوا الشراكه..
شافله مرة تانيه..
وعلي غير عيونه لعبد الله وقاله..
/شن تخبرونا عن الكفره ياحاج عبد الله..
وقعدوا يهدرزوا بعد ماخلا عبد القيوم سرحان ويفكر في قصده من كلامه...
هو عارف ان اللي صارله وراه حد تاني غير مختار..
بس اللي يفكر فيه توا هو النقاش اللي صار بينه وبين طوبى..
هي حاده معاه من قبل..بس هالمرة حدتها كانت زايده بسبب الخوف..ماكانتش تبيه ينضر بسببهم..
غصب عنه فرح مش بإرداته..للحظه كان حيسرح بمشاعره..
لين جي قدام عيونه شكل الجالي يوم ماشافه شاد الفولار النسائي وهو يشم فيه..
تفكر انها مراة ع ذمة راجل...جمد مشاعر وتبدلت حالته..
وخلا تركيزه كله مع هدرزة الموجودين حواليه...
🍃🍃🍃🍃🍃
وع الشط قعدوا يتعشوا في الحوت ومايتبعه..
والزوز منسجمات ويهدرزوا وهو بعيد عنهم ياكل ويشوفلهم..
صابرين:يهبل..
امينه:هو كويس بس اللي بعملوا انا اطعم..
ضحكت صابرين وغيرت عيونها لرضا لقاته لاهي بالماكله..
غيرت نظرها لأمينه وقالت..
/بنسألك..
امينه:عن ايه..
صابرين بشي من الاحراج..
/شن تعرفي عن رضا؟ قصدي عيلته..
امينه:بصراحه ولاحاجه هو حد كتوم قوي ومابيحكيش عن حياتو الشخصيه نهائي .
صابرين:امم..اني سألت من الفضول..لأني سمعت مختار قال بمامعناه ان ظروفنا زي بعض حني وياه..
امينه:شوفي هو في وراه حكايه ساعات لما ابص في عينه اشوف فيهم حزن وساعات قسوة واضح الزمن عدا عليه بقساوتوه وعاش حياة صعبه قوي..
نزلت صابرين عيونها للصحن اللي قدامها وفات عليها شريط حياتها..نزلوا دموعها غصب عنها..وهي مسحتهم طول..
امينه بضيق:مش جايين هنا عشان نعيط..
تنهدت صابرين وشافتلها وقالت..
/خاطري نهدرزلك نبي نحكيلك كل شي عشته ومريت بيه نبي نطلع اللي في قلبي كله..
امينه ابتسمت وقالت..
/طيب نتعشا الاول..كلي يللا..
هزت صابرين راسها وبدت تاكل..
وعيون رضا من بعيد شويه عليهم...
☘☘☘☘☘☘
ع شط البحر..
كانت في حضنها وهي تحكيلها بوجع عن الحياة المرة اللي عاشتها..
صابرين ودموعها ينزلوا..
/تفكرت اخر مرة حطيت فيها راسي ع صدر امي كانت مريضه وقتها مرض الموت..كنت حاسه انها بتخلينا اني وخواتي لهالدنيا الشينه اللي مافيها شي حلو..ماتت امي خلتنا..خلتنا لمرت البو اللي خلت حياتنا جحيم...تنهدت بألم وقالت..بوي كان راجل شخصيته ضعيفه يحن علينا لكن ماقدرش يحمينا من شر مرته...تعرفي كنا نقابلوا في شرها بالعناد والمكر عارفين مصيرنا لكن المهم عندنا وقتها نبردوا قلوبنا..تحملنا هلبه لين مات بوي..لما مات زادت مرت بوي شر ع شرها..بس مروة اختي كانت توقفلها بالمرصاد المهم تحامي علينا..حرمتنا من معاش بوي واللي خلاه بعد موته..خلت مروة تخدم وتصرف علينا..ويدوب كنا قادرين ناكلوا ونشربوا...والحمد لله اللي خلا بوي يدير الحسنه الوحيده في حياته ويكتبلنا الدور الاول من الحوش اني وخواتي كان هدا مكانا كان الشارع..
امينه ودموعها ينزلوا..
/مالكمش قرايب من امك وابوكي؟
صابرين؛خالاتنا كانوا يحنوا علينا مرة مرة وحده فيهم صرفت ع قراية اختي مروة لين تخرجت..بس بعد ماتزوجت مروة معاش قدرت تصرف لكن دبرت لنجاة خدمه..وقعدت نجاة تخدم وتقرا..ولأن اغلب وقتها برا الحوش اني كنت ننجبر نقعد مع مرت بوي..وهي عاد استفردت بيا..خنقنها العبره وقعدت تبكي..
وامينه زادت ضمتها..
صابرين ببكي:ياما ذلتني وهانتني ياما دارت فيا وحتى نجاة ياما شافت منها معاي..مرات لما مايفضلش عندنا فلوس ونبوا ناخدوا منها تخلينا نخدموها بش تعطينا وتقدري تتخيلي مرت البو شن دير لصغار راجلها...
امينه بألم:حسبنا الله ونعم الوكيل..
مسحت صابرين دموعها وقالت..
/بعد ماتخرجت نجاة وخدمت واني خدمت في التمريض مع قرايتي استغنينا عنها وقعدنا في الدور الاول هي في حالها وحني في حالنا ولاكأن في شي يربطنا..حتى اللي زعميتهم خوتنا ولاكأنهم خوتنا ولاحاسبينا خالقين في الدنيا اصلا..
امينه:لاحول ولاقوة الا بالله..
صابرين:بعد ماتزوجت نجاة بكم سنه اني تزوجت..لكن ربي حرمني من نعمة الذريه والراجل اللي كنت واخداته لما عرف طلقني طول..
امينه زادت ضمتها..
صابرين بنبرة باكيه..
/اني قلبي مع الصغار رقيق نحبهم هلبه ربيت صغار خواتي معاهم حبيتهم اكثر من امهاتهم...ااه قداش استاحشت مودي ولد نجاة..هداكا كان وليدي اني..وقعدت تبكي..
وامينه قلبها يتقطع..
صابرين ببكي..
/عارفه روحي في الدنيا عمري ماحنرتاح..شوفي نصارحك ونعترف درت هلبه حاجات تخلي حياتي اسود من السواد هدا علاش مش متأمله نشوف يوم حلو في حياتي..ياريته هداكا خلاني نموت ياريت...
امينه ببكي:ماتقوليش كدا ياحبيبتي..انتي ماتعرفيش ربنا رحيم وحنين قد ايه ..
صابرين بإبتسامة حسرة:لكنه عادل..
سكتت امينه وزادت ضمتها وهي تبكي..
"بكتيها ياوجه النكد"
وقفت صابرين بكي وخرت عن امينه والزوز التفتوا لقوه مقعمز وراهم بمسافه بسيطه..
صابرين بعصبيه؛كنت تتصنت انت!..
هو قال؛نكد عليك اي والله..وحدف عليها شويه من الرمله جت ع شعرها وخدها..
شهقت وقالت بصدمه..
/حي عليه هدا حي!!..
شافتله بحده بعدين جت بتاخد من الرمله بش تحدفه بيها..
هو ناض ووخر كم خطوة وقال..
/جربي ديريها وشوفي شن يصير فيك..
ناضت وقالت:اني نبي نشوف شن يصير فيا..
هو وخر خطوة ولما شافها جاياته تجري.
لف وقعد يجري حتى هو..
وهي تحدف عليه..ومايجيش فيه..وترجع تاخد مرة وتجري وراه وتحدف ومايجيش فيه وتقعد تعيط من الغيظ..
وامينه تضحك من قلبها..
وصلوا قدام الشط مباشرة..
هو لف وقعد يجري للخلف ويقول..
/معاش تعيطي درتي العار
هي بغيظ.؛لابنعيط..وهاه..وقعدت تعيط ع طول رقبتها..
هو طبس وخدي من الرمله المبلوله وحدفها عليها وهو يقول..
/اسكتي يامتخلفه اسكتي..
صابرين شافت لحوايجها اللي جت عليهم الرمله المبلوله قالت بكل غضب..
/والله مامخلصك مني واحد..
وجت بتضرب الميه برجلها بش تبله..تزلق تجي مقعمزة..
وهو ينفجر ضحك...
وامينه ناضتلها تجري وهي تضحك...
هي من الغيظ الشديد معاش عرفت شن دير قعدت تبكي..
وهو يزيد يضحك عليها..
جاته امينه وقالت:ليه كدا..اخص عليك..
رضا وهو يضحك..
/ياربي..ليا سنين ماضحكتش هكي..مش قادر..لا...
وصابرين تزيد تبكي..
امينه انغاضت لغيضها وضربت الميه برجلها جت في وجهه مباشرة..
وينقلب بكي صابرين لضحك..تضحك ودموعها معبيات وجهها..
وهو يحك في عيونه ويقول..
/امينه..انتي ديري فيا هكي!..
امينه بإستعجال؛قومي بسرعه يللا.
ناضت صابرين بسرعه وهي تضحك..
هو شافلهم بعيونه اللي قاعدات يحرقوا فيه من مية البحر وقال..
/وين ماشيات وين!..
ويطلعوا يجروا الزوز هاربات منه وهو لحقهم..
والزوز يلتفتوا يشوفوله كيف يجري ويحك في عيونه ويضحكوا عليه بشماته..
لعند ماكانوا حيخشوا لمكان ع الشط فيه حفله مختلطه..
هو سرع خطواته وجي قدامهم وقفهم..
/للورا در انتي وياها..
صابرين بمزح:خلينا نخشوا نهيجوا..
رضا؛بيجيك كف ينسيك اسمك راهو..
صابرين بإستفزاز:اني بس اللي نعطي كفوف..
ومشت تجري هربا منه...وامينه لحقتها وهي تمشي بشي من التعب وتضحك..
اما هو ضحك بعدين حرك راسه يمين ويسار ولحقهم...
🍃🍃🍃🍃🍃
"صح عشت برا وكنت اغلب وقتي في بيئة مختلطه فيها اشكال والوان..بس تربيت ع الدين والعادات كل شي عندي بحدود..والحمد لله ماارتكبتش كبيره في حياتي ولاحتى موبقة من الموبقات..امي ماقصرتش معاي نهائي"
آلاء:امم..هو واضح باهي..بس مرات هكي في حاجات دير فيها بحسن نيه وتبدا عندك عادي..زي متلا انك تسلم ع النساوين بالخد او بالاحضان وهكي..انحمروا خدودها خجلا من اللي قالاته..
هو بضحكه رد..
"نهائي مافيش منه الشي هدا بكل..وراهو برا يحترموك ويحترموا قناعاتك ومبادئك ويتعاملوا معاك باللي يريحك..صح في ناس متطرفه بس مش كلهم"
آلاء:يعني نطمن ع الاخر..
"ولابعد الآخر"
شدت ضحكتها..
"خل نعطيك معلومه اللي كنت خاطبها قبل استراليه و مش مسلمه وانفصلنا بإحترام والمعزه قاعده ممكن نتصادفوا وتجي تسلم..
آلاء:بالكلام بس حتى سلام باليد لا..
"عيب مانقدرش نخليها ماده يدها كان جت سلمت"
هي بغيره:اني نسلم عليك وعليا..
قعد يضحك..
وهي ابتسمت بعصبيه..
"امم..تعرفي..خاطر في بالي بعد عرس جارتكم نديرلك بيان"
الاء:لااجل الموضوع هدا للسنه الجايه لعطلة نص السنه احسن
"اللي يريحك"
الاء:خلاص توا بنسكر..
تنهد وقعد ساكت..
ابتسمت وقالت..
/تصبح ع خير..
"وانتي من اهله"
سكرت هي الاولى وقعدت تضحك بكتمان..
بعدين ناضت من تحت شجرة الياسمين ومشت خشت للحوش من الكوجينه..
فاتت للدار..وفي الصاله..
كانت طوبى مقعمزه ع الصلايه تقرا في القرآن..
وجنة في قعمازها فايقه وتسمع فيها..
بعد ماكملت..سكرت المصحف وحضناته بقوة وهي مغمضه عيونها...بعدين فتحتهم وقامتهم في جنه..
ابتسمت وزحفت ع ركابها وين وصلت فيها باستها من خدها وهي تقول..نجي بنياتي..
🍃وفي دار المعيشه..
سالمين بغضب:عطه مايطشه ويطشها ياربي..حقرا..
فردوس:اخر مرة ريناه في المطعم قالت فايزة قريب يهبل ع طوبى مانزلش عيونه من عليها..
سالمين:ان شاء الله يودر اكثر ماهو التعبان هذى..ااه ياربي وكان الواحد يعلم بالغيب شويه بس...غمضت عيونها وقالت..استغفر الله العظيم..
فردوس تنهدت وقالت.
/مكتوبلها تعيش اللي عاشاته ربي يخلصها منه ويخليلها بنيتها ويعوضها خير يارب..
سالمين من قلبها..
/امين..لكن لاحظت انها متغيره خير من قبل..
فردوس:تحاول توقف ع رجليها وتعيش حياتها..
سكتوا الزوز وهما يفكروا بعدين قالت فردوس.
/عمي جبريل عند من بايت..
سالمين؛ياحنه عند ولد خال امه مسكه ع البيات في مزرعته..
فردوس؛حسيته مش زي قبل..
تنهدت سالمين وقالت..
/وفاة باتك الله يرحمه تعباته واجد..
نزلوا دموع فردوس وهي تقول..
/الله يرحمه ويغفرله...
🍃🍃🍃🍃🍃
"كذب عليك بلادك خير من اي بلاد تقعد فيها ع الاقل اني هكي نشوف ماانسجمتش"
يزن:نقولك الصراحه وماتزعلش..
محمد حامد؛قول ترا..
يزن؛نعرفك قبل تراجي امتى تسافر..ولما قالوا بيروح قلت اكيد بوه بعته بش ينكد ع عمتي..
محمد قعد ساكت..
يزن:شكله صح!؟
محمد:ايه..لكن لما شفت امي كيف ولت احلى من زمان وخوي يحيى كيف يحب راجلها فتت..اني اصلا درتها سبله بش نروح..اني كنت نبي نروح من قبل ماامي تتزوج مرة تانيه هو ماباش..وبعد ماسمع بيها تزوجت جاني وقالي نخليك تروح لكن بشرط دير ودير..اني قلت باهي بش نروح بس..
يزن؛عمي ربيع راجل كويس هلبه وعمتي متريحه معاه ردبالك توجع امك يامحمد..
محمد بضحكه؛والله حولت الموضوع من راسي صدقني..خلاص فوتنا من الدوة هادي وقولي..تسمع راب..
يزن:بالجو مش هلبه..
محمد:اني نغني راب وعندي اغاني مسجلهم..
ضحك يزن..
محمد؛نسمعك وبعدين احكم..
يزن:على شني باهي!؟
محمد؛ع الدنيا والحياة وحتى البلاد..غير اسمع..
وعطاه السماعه خداها يزن وحطها في وذنه..وشغله محمد اغانيه..
وقعد يزن يسمع..عجبه هلبه الكلام وتفاجأ وهو يقول..
/مليح..
ضحك محمد وهو يهز في رجليه مع الاغنيه..
هدا كله كان ع دروج شقة المهدي..
🍃والمهدي قاعد سهران مع عبد القيوم وربيع وسامي في جنان حوشه..
عمه وراجل بنت عمته طريق السفر تعبتهم رقدوا بكري..
ربيع؛قصدك انت كنت متزوج..
سامي بإبتسامه الم؛ايه..اني ارمل..
المهدي ابتسم بحزن..
عبد القيوم؛سامحني خشيت في خصوصياتك زياده عن اللزوم..
سامي:لا بالعكس اني نحب ندوي عليها بش اللي يسمع يترحم عليها..
كلهم بأصوات متقطعه قالوا..
/الله يرحمها ويغفرلها..
سامي ؛من قبل خمسه سنين..كنت خاطبها وهي مازال ماتخرجتش من الجامعه كنت نراجي فيها تكمل..سبحان الله ربك راد شي تاني.ابتلاها بالمرض الخبيث..
عقد المهدي حواجبه بألم..
سامي؛لما عرفت خبرتني وكانت تبي تفسخ الخطبه لكن اني تمسكت بيها اكثر من قبل..ع قد مادارت بش تخليني نسيبها مابيتش..كيف نسيبها واني مانقدرش نعيش من غيرها!؟ ونتخلى عنها وهي بأمس الحاجه ليا!..كيف نقول نحبها كان بنخليها في ظرف زي هدا..!
تعبوا عيون المهدي بالدموع وعبد القيوم يشوفله..
سامي:اتفقنا مانخبروا حد من اهلي ولامن اهلها لبعد الزواج..وطبعا بعد قدمنا موعد العرس ماليا وماليها فرحوا هلبه ودرته عرس كبير اللي حضره ماينساه..وهي نفس الشي..وبعد الزواج سافرنا بش تبدا رحلة العلاج وحني برا خبرنا الكل..
ربيع:شن كانت ردة فعلهم!؟
سامي بضيق:مانحبش نتفكرها..اني خسرت ماليا لهالسبب كانوا يبوني نطلقها بالسيف..
تنهد ربيع بضيق وهو يشوف في الفراغ..
سامي ودموعه في عيونه..
/كانت اضعف من انها تقاوم المرض ع قد مادرت معاها للأسف كان الحزن مسيطر عليها..ماتت بين ايديا..
في قلب من قلوب الحاضرين انقبض بقوة من اللي سمعه..
والمهدي طول ناض ومشي تباعد عنهم..
عكس سامي اللي غطا عيونه بإيديه وقعد يبكي بصمت قدامهم..
وجنبه ربيع يطبطب ع كتفه..
اما عبد القيوم عيونه كانوا مع المهدي وهو يشوفله بحزن..
🍃🍃🍃🍃🍃
وتاني يوم...
ومن ليبيا...لقبرص..
تحديدا العاصمة نيقوسيا..
كانوا في السيارة اللي اجرها رضا يسوق ويحكيلهم شن بيديروا اليوم كله..
رضا:ياسيدي بن سيد..بنرفعكم لسور فينسيا بعدين للقصر الجمهوري القديم ونوريكم مكان اقامة اول رئيس قبرصي وبعدين بنرفعكم تشوفوا الجامع الكبير ومنه بنمشوا نشوفوا الجدار الاخضر..هدا اللي يفصل اوروبا عن تركيا..
امينه:شوقتني..
هو ابتسم..
صابرين؛والسوق والمطاعم ياانت !؟؟
هو ماباش يرد عليها..
امينه بضحكه:اه من مبارح اتفقنا تاخدنا المول وتودينا للمطعم اللبناني اسمو ايه ياصابرين..
صابرين برفعة حاجب:فانوس..
امينه:ايوه..فانوس..
رضا:واني ع كلامي بس هادوا اخر حاجه..
صابرين بملل:شن بيفوت حصة التاريخ..
شبحلها من المرايه بعدين غير عيونه للطريق..
وامينه التفتتلها وهي تعض في شاربها وتفنص وصابرين ولاع بالها..
شويه هو شغل المنظومه..
اول ماسمعت الاغنيه..ابتسمت كانت لنفس الفنان..
قعدت امينه تصفق وتغني معاه..
ضحكت صابرين وحتى هي بدت تصفق وتغني..
وهو يسمع بصمت..
شويه هما الزوز تحمسوا وقعدوا يغنوا بصوت عالي..
عشقان..دايب دوبان دوبان..
سهران..حيران..فرحان..
خلوه يضحك عليهم ضحكه خفيفه..
🍃وكملوا الطريق وهما بين هدرزة ومناقرة وضحك..
لين وصلوا لوجهتهم..
وبدي رضا بالجوله السياحيه..في البدايه كانت صابرين ماله بس بعدين انسجمت وتحمست وقعدت تسأل فيه وهو يجاوب عليها وامينه تشوفلهم كيف منسجمين مع بعض برغم انهم كانوا عاجبينها بس قلبها كان واجعها ع حالهم..
صابرين؛وقاعدين تركيا واليونان يتعاركوا عليها..
رضا:تستاهل العراك ع خاطرها..
قالها بنبرة خلاها تشوفله ورجعت حست بهداكا الشعور بس هالمرة من غير مغص..
وهو قعد يشوف لعيونها ويقول في نفسه..
"شن داروا فيا مش عارف! كيف هكي خلوني مش عارف مش قادر نقاوم شعوري جيهتها بكل"
هي استاقظت وغيرت عيونها عنه ووجهها محمر من الخجل تباعدت.عنه ومشت وقفت جنب امينه وخلتها بيناتهم..
هو كتم تنهيده كانت حتطلع بعدين قال..
/جعانين!
امينه:انا ع اخري من الجوع..
ابتسم وقال؛هيا..
ومشي وهما لحقوه وصابرين حابسه دموعها بقوة..
🍃تغدوا غداهم...
بعدين رفعهم لمول قبرص...
اول ماخشوا قال..
/خودوا راحتكم...
صابرين بحماس؛هيا منمن..
ومشوا الزوز مع بعض وهما في قمة الحماس..
وهو يراقب فيهم..
لاحظها تحب تجي لحوايج الصغار وتشوف وتختار..
وحتى امينه ركزت عليها وهي تشوفلها بتعاطف..
خدت اكثر من لبسه لمعاذ..ولجوري وحمزة..وصغار مروة حسبتهم..بعدين خدت لروحها..
شويه مشت ناحية الملابس الرجاليه..
هو هني جوه تلخبط بالمرة..فكر انها تبي تاخد حاجه لمختار..
قعدت دور بعيونها..بعدين التفتت شافتله بنظرة غريبه بس هو حاول يفهمها..فهم انها ماتبيشي يشوف شن بتاخد..
مشي طول واختفي من قدام عيونها..
هي رجعت شافت للبضاعه..وعيون امينه معاها...
🍃بعد ماخدوا اللي في خاطرهم..مشوا تعشوا في واحد من مطاعم المول بعد روحوا..
وطول الطريق وهو ساكت..تكلمه امينه يرد بكلمة وقص..
وهي لاحظت ان جوه تغير وحطت في بالها ان مختار اتصل بيه..هي لتوا ماتبيش تفسر علاش يضايق من هالشي وقعدت هاربه من تفسيره...
🍃🍃🍃🍃🍃
ومن قبرص لليبيا في نفس اليوم...
بعد العصر..
كانوا الاحباب مجتمعين في حوش لطفي الواعر بش يحضرول حفله دخول جنة لشهرها الثالث من عمرها..
كلهم في الصاله يستنوا في طلتها هي أمها..
حتى عمة التارقي وبنتها..
سليمه كانت تتعامل معاهم عادي بس في داخلها غصه..
اما صفيه كانت ملهوفه ع شوفة طوبى وجنتها...
🌼وتطلع طوبى وفي حضنها جنتها..
جنة اللي كانت لابسه فستان ابيض مزين وع راسها ربطه شعر مزينه بزهرة اقحوان..
ومامتها لابسه فستان شيفون لونه اشهب..معبي زهور اقحوان صغيره في نص فيه حزام وكمه طويل في اخره مشدود بإيستيك..طالقه شعرها ع طوله ومزيناته بربطه ع راس معبيه زهور اقحوان..
حاطه زينه بسيطه ع وجهها..رسمه للعين ابرزتهم..واحمر شفاه لونه ملفت..
بشرتها موليه نظرة اكثر من قبل..وشعرها يبان حلو بالمرة برغم وجود الشيب..
قبل لتوصل في الصاله..حطت يدها ع راس بنتها قرت عليها..
بعدين قال..هيا سموحتي نخشوا..
وخشوا عليهم..
الانظار كلها توجهت ليهم..وكلها كانت معجبه ومنبهره..
مطيره:الله يبارك..اللهم صل ع النبي..
ضحكت طوبى ومشت طول للتوارق بش تسلم عليهم..
خدت منها غرفه جنه بش تسلم ع راحتها..
سلامها ع صفيه كان حار وصفيه كذلك..
اما سلام سليمه كان عادي لاهو حار لاهو بارد..
وبعدين سلمت ع سميره..ونبيله...وفايزة وبناتها..
بعد السلام خدت جنه ومشت قعمزت جنب صفيه..
طوبى بإبتسامه:إنستينا..
صفيه:الله يأنسك ياسمحه..ترا عطيني هالقمر عطيني..
ضحكت ومدتلها جنه..
سمت بالله وخدتها وقعدت تلعب فيها وتغني عليها وطوبى تشوفلهم وهي تضحك..
وعيون سليمه عليها..لاعارفه تلوم ولد خوها ولاتعذره..وفي نفس الوقت قلبها موجوع عليه..
"ليش ياربي تخلي قلبه يتعلق بحاجه مش نصيبه ياربي..ياربي طلعها من قلبه وكرهه فيها خليه يعيش حياته كيف الناس ياربي"
قعدوا يهدرزوا والهدرزة زادت حلاوة في وجود سالمين مع سميرة الزوز مع مطيره داروا "ترييو"فضيع..مشت التقعميزة في الضحك والبصارة..
وكانت الأجواء حلوة بالمرة...
🍃🍃🍃🍃
في مصور سامي اللي كان عنده التارقي..
سامي وهو يشوف في اللوحات..
/جديات نهنيك ع الموهبه اللي عندك كيف اكتشفتها ونميتها؟
عبد القيوم بإبتسامه..
/القرايه في الجامع هي السبب وانا بصراحه عاشق للخط العربي بكل انواعه..
سامي بإبتسامه:واضح جدا..خلاص موعدنا ان شاء الله يوم 20..
عبد القيوم؛ان شاء الله..
فجأة دق باب المصور..
شافوله...لقوا مطيره خاشة بالكروسه متاع جنه وهي تقول..
/السلام عليكم..
ناضلها سامي وهو يشوف لجنة بإبتسامه قال..
/وعليكم السلام..يااهلا اهلا بالسنفورة..
خشت سميرة وهي تقول بإبتسامه..
/السلام عليكم..
ردوا عليها السلام..
وعيون التارقي ع جنة...سلبت عقله من اول ماشافها بالذات بالاقحوانه المزينه راسها وهو يعشق الاقحوان..
استاقظ لما سمع مطيره تقوله..
/حمد لله ع سلامتك ولدي..
غير نظره عنها وقال بإبتسامه..
/الله يسلمك..
سامي:طلعي الحلوة خل نبدوا..
قربت مطيره من جنة وطلعتها..
اشرلها سامي وقال..
/بري غادي معليشي..نبيك تساعديني..
مطيره؛اكيد..
ومشت وين ماقاللها وهو يجهز في آلة التصوير..
بعد ماكمل تجهيزها ..بدت جلسة التصوير..
وكان الاقحوان حاضر فيها وبقوة..واللقطات اللي خداهم سامي كانوا غاية في الفن والروعه..
والتارقي يتفرج وفي داخله احساس حلو بالمرة تجاه جنة مالاش علاقه بأمها نهائي..
سامي:الله يبارك عليها هاديه ومش متعبه..
مطيره بضحكه؛امها ديما تشرب في اليانسون ..
ضحكوا هو وسميره..
اما التارقي اللي ضايق لما جت سيرة طوبى لهلبه اسباب..
ناض وهو يقول..
/نستأذن حبيبي..
سامي وهو يصور:خود راحتك..
مشي التارقي بمساعدة القيلا وين جي فايت من جنب جنه سرقلها نظرة مع ابتسامه..بعدين طلع من المصور...
🍃ويطلع منه بإتجاه حوش علي الواعر..
ويشوف الجالي واقف ع خوه نضال في القهوة متاعه..
الجالي وين شافه..ابتسم ع جنب ورفع يده وحياه..
نضال استغرب..
رد عبد القيوم نفس الابتسامه وهز راسه بالتحيه..بعدين شاف القدام وهو مكمل طريقه لحوش علي الواعر..
والجالي بنظراته الحاقده معاه..
نضال بإستغراب:كيف صار!..
شافله الجالي وقاله..
/خيركم من يبدا بالسلام وانت تعرف قداش قلبي طيب ويسامح فيسع..المهم زي ماوصيتك..سلام..
ومشي طلع من القهوة بطريقه للحوش...
وين قرب يوصل فيه..التفت عادي..بنظرة عابره شاف مطيره تمشي بكروسه..رد نظره بتركيز وهو يشوفلها وقلبه فر فران..
☘سميره؛وجه السفنزه يشبح هني..
مطيره:والله كان يقرب جاي ماضاله الا ماسحة بيه الكياس..
هو كان حيمشيلهم فعلا بس تراجع في اخر لحظه لأنه عارف مطيره تراجيله فيها..
في الوقت نفسه طلع بوه من الحوش..
سميره؛حي قلبي يامطيره..قلبي حميدا طلع..
مطيره شدت ضحكتها وهي تقول..
/ماضحكنيش في الشارع ياكلبه..
سميره:لكن والله ستايل الراجل اليوم كله ع الاسود عطه حبه قداش جذاب...
مطيره قعدت تضحك بكتمان..
ومحمد شنيبه يسرق في النظر لسميره اللي كانت مغيره طريقة لبسها برغم انه محتشم بس بانت فيه اصغر من سنها ووجهها كان واضح فيه التغيير..
عجباته ع الآخر..
هي يدوب ابتسمتله..وهو لما شاف الابتسامه فتح عيونه ع وسعهم..
وصلوا في الباب..فتحاته مطيره..وخشت بجنه..
وتخش بعدها سميره وتسكره بعد ماتسرق نظرة لمحمد شنيبه اللي راح فيها بكل..
وهدا كله ع عيون نضال اللي هالمرة حياخد الموضوع ع محمل جده وحيكون ضده بقوة لو صار والسبب معروف..
من جهة تانيه الجالي تراجع عن الخشة للحوش ومشي لسيارته ركبها وتحرك طول وهو في قمة الغضب والألم..
🍃🍃🍃🍃🍃🍃
ومرت الساعات..
وتعشوا الضيوف رجاله ونساوين..
وطوبى رقدت بنتها وقعدت تعول مع اللي يعولوا وصفيه حلفت تعاونهم...
سليمه طول ماطوبى تتحرك قدامها وعيونها ماينزلوش من عليها متحسرة بتموت ع خاطر ولد خوها..
وصفيه كذلك..وهما في الكوجينه بعد ماشطبوا..
قعدت تشوف لطوبى وهي تبخ في الكوجينه بمعطر خاص بيها..
تتأمل فيها وهي تفكر في ولد خالها وتقول في نفسها.
"ناعليا عليك وع بختك انت اللي تحبها زي عيونك تقعد متحسر عليها وتنكتب لواحد لاقدرها ولاعرف قيمتها..لااعتراض ياربي"
ابتسمت وقالت..
/ام العيون الحايرة..
التفتت طوبى وقالت بضحكه استغراب..
/ام العيون الحايرة؟
صفيه بإبتسامه:اها سمح اللقب صاح؟
طوبى بضحكه؛واجد..
صفيه؛وحتى انتي سمحه واجد وتستاهلي كل خير..
طوبى بإبتسامه خجل:تسلمي يارب عيونك الحلوة..
صفيه:مافيش بحلاوة عيونك اللي يودرن العقول..
ضحكت طوبى بخجل..
ابتسمت صفيه وقالت..
/معنوياتك شنو؟
تنهدت طوبى وقالت..
/الحمد لله..بفضل الله فوق..
صفيه:ان شاء الله دوم..بس نبي نبه عليك ردي بالك تستسلمي ردي بالك ترديله هالجاحد هذى والله مايستاهل ظفرك...انتي غير تطلقي تلقي من يحطك في عيونه ويسكنه في قلبه لأخر عمره..
طوبى:لالا اني خلاص بالنسبه ليا معاش يهمني شي غير بنتي..
صفيه بضحكه:غير اخلصي ع خير وبعدين نشوفوا الموضوع هذى..هي تعالي نطلعوا للصاله اصوات ضحكهن تسهف..
ابتسمت طوبى وحطت المعطر في مكانه وقالت..
/قدامي..
صفيه بضحكه..
/نجك لي ياام عيون التشاينه..وطلعت..
وطوبى طلعت وراها وهي تضحك...
~~~~~~
"والله مسكت دمعتي بالغصب المراة سمحه واجد ومحترمه وحرة وشخصيتها حلوة وقويه كيف بينساها وهي ديما قدام عيونه يابنتي"
صفيه:امي انتي ناسيه كيف كان يحبها من غير مايشوفها سنين وهو يحلم بيها..انسي انه ينساها..
سليمه بضيق شديد..
/المراة ع ذمة راجل يابنتي..
صفيه بغيظ:حبها قبل ليحلم بيها هالسرافه اللي ينقاله راجلها..ااه عليك بخت كلب كيف هالكلب يعطوه وحده زي طوبى حسني منقهرة بنموت..
سليمه:صار النصيب وخداها وعنده منها بنت لازم ولد خالك يحولها من عقله وقلبه لازم ينساها لازم..
تنهدت صفيه بضيق وقعدت ساكته..
وامها جنبها ذرفت دموع الحزن ع حال ولد خوها صاحب الحظ القليل فهالدنيا..
☘وهو في الوقت كانت يصلي..
برغم الظرف اللي هو فيه صلى القيام بش يرمي حموله ع ربه..ويرجع يستخيره ويطلب منه يقويه بش ويساعده بش يتخطى هالامتحان الصعب..الصعب هلبه...
🍃🍃🍃🍃🍃
وتعدي هالليله..ويطل صبح جديد..
زوار قبرص اليوم مشوا لمدينة اسمها (ليماسول) تاني اكبر مدينه في قبرص..
رضا هالمرة دهور بيهم فيها ورفعهم لأكثر من مكان..وع شواطئ البحر غادي مروا مرور الكرام مانزلوش تفرجوا عليها من رواشن السيارة...وقبل ليروحوا خدوا امينه وصابرين باقة من انواع العسل المشهورة بيه هديكا المدينه...
هاليوم كان بارد لأن رضا فيه كان رسمي جدا وامينه وصابرين مستغربين فيه هلبه..
مجرد وصلوا للفندق طول ركب لغرفته..
صابرين؛واخد عليا وع لساني وهو بارد هلبه مايتأثرش بعدين اني امس ماصارش بيني وبينه تاتش بكل..
امينه بقلق:ان شاء الله خير يابنتي..
وصلوا لغرفتهم وخشولها..
بعد ماخدوا دوش..رقدت امينه طول لأنها تعبت..
لكن صابرين كان مجافيها النوم..
غصب عنها لقت روحها تفكر فيه وتتسائل عن اللي غير حاله..
مضايقها هلبه تعامله اليوم..
حست روحها مستاحشة استفزازه ومنشاوتهم...حست روحها ناقصتها حاجه..ولأول مرة صابرين تحس بهالاحساس..
ناضت قعمزت وهي تقول في نفسها..
"شن اللي قاعد يصير معاي بالزبط!؟...واضح ياصابرين انتي تعودتي عليه وهدا طبيعي زيه زي امينه توالفتوا عايشين مع بعض طبيعي بيصير هكي..صح..هو هدا..تعود فقط لاغير..بس يعني هو خيره اليوم شن جاه محلاه اول وتاني يوم كيف كان علاش اليوم ولى رضا هدا ثقيل دم"
تأففت بعدين ولت رقدت..
وقعدت تتقلب طول الليل وماصدقت جاها النوم..
🍃اما هو فكان سهران ع فيلم رومانسي يحكي عن قصة حب صعبه ومستحيله..لكن نهايتها كانت سعيده..
هو مايفضلش هالنوع من الافلام..يحب افلام الآكشن والجريمه..بس اليوم بالذات لقي روحه منزل هالفيلم ويتفرج عليه بكل حواسه ومافوتش منه لقطه..
لما تم سكر اللاب..اتكى ع السرير وغمض عيونه بألم...
وقعد ع حاله هدا ليه خداه النوم....
🍃وفي ليبيا..تحديدا شارع القهوة...
كانوا عيلة التارقي معزومين في حوش محمود اللي اصر على التارقي وحلف عليهم بالطلاق يجوا يتغدوا عنده..
وهما تحت الاحراج قبلوا العزومه ومشوا..
ويافرحة حنان بيهم اللي وين شافتهم قريب قامتهم من ع الارض..البنت ماقدرتش تشد روحها وسألت عن حال عبد القيوم بطريقة بانت فيها انها خايفه عليه..
ومرت خوها وامها عجبوهم سليمه وبنتها ووين شافوا اللبس الغالي والذهب اللي يبرق في العيون غيروا نظرتهم للموضوع 180درجة..
بس حنان لاهمها فلوس ولاذهب همها الوحيد الجار الاسمراني اللي حسوا عمته وبنتها ان امره يهمها هلبه...
🍃🍃🍃🍃🍃
ويطل اليوم جديد ع ضيوف ع قبرص..
هاليوم كانت الرحلة وسط طبيعة قبرص الخلابه..
تحديدا لجبال اكروس..
عاشوا امينه وصابرين احلى جو مع مجموعه سياح تانيين منهم كانوا عرب..
ومن غادي مشوا لقرية اسمها امودوس...دهوروا في اسواقها وتغدوا من الاكل القبرصي التقليدي...
كان هاليوم بالذات مميز ومختلف..
بس مع هدا حال رضا كان مضايق صابرين لأبعد حد..
طول الطريق وهما مروحين كان تسرقله في النظر من المرايه ملامح وجهه متجهمه طول الوقت...
حاله هدا خلاها رغم عنها تسأله وتعرف خيره..
🍃وهما خاشين للفندق كان ماشي قدامهم..
صابرين قدمتله وامينه تشوفلها لين جت جنبه..
صابرين:ممكن نسألك سؤال..
هو قال بجديه بدون مايشوفلها؛اسألي..
صابرين:خيرك؟
وقف..وهي وقفت وامينه وقفت وراهم تشوفلهم..
رضا بكل قسوة..
/ياريت تخليك في حالك وماتحاوليش تحتكي بيا بأي شكل عاملتك كويس الفترة اللي فاتت من باب الشفقه لاأكثر جاملت بما فيه الكفايه..خلاص..
ومشي وخلاها جامده في مكانها من الصدمه..
وامينه كانت مصدومه اكثر منها ومش فاهمه شي..
جتها وشدتها من يدها وقالت..
/تعالي..
وصابرين مشت معاها وهي مش واعيه لشي تسمع في كلام رضا وخلاص..
لعند ماوصلوا لغرفتهم فتحت امينه الباب دخلتها وخشت بعدها وهي مضايقه من رضا لأبعد حد..
🍃اما هو..
من لما خلاها لعند ماوصل لباب الغرفه متاعه وهو يقنع في قلبه ان اللي داره هو الصح بش مايوجعاش ويلومه..
خش للغرفه...ومجرد ماوصل في السرير..وقف في مكانه وعيونه يشوفوا بدهشه للي فوق السرير...
جاكيت يلتبس في الخريف والشتي لونه رمادي..وشال لونه بيج...
وجنبهم كرت متوسط الحجم كان مطوي..
قدملهم بخطوات بطيئه بعض الشي..
خدي الكرت وفتحه وقعد يقرا..
(عربون شكر..
عربون اعتذار..
عربون صداقه...صابرينا)
غمض عيونها بشده اسفا وخدي نفس عميق وطلعه وحس روحه بتطلع معاه..
فتح عيونه وشاف للهديه متاعها ونظرات عيونها كلها ألم وندم..
🍃وهي في الغرفه كانت راقده وغامه وجهها وتبكي بالعبره..
وامينه مقعمزه حداها وهي تشوفلها بحزن وتقول في نفسها..
"ربنا يسامحك يارضا"...
🍃ورضا مارقدتش غمضة للصبح..ماصدق طلع الصبح..
طول اتصل بأمينه..
☘في تحت في الفندق..
امينه بحده وانفعال: من كثر مابكت كانت حتموت خفت تعمل في نفسها حاجه فضلت سهرانه جنبها لحد مانامت..نسيت انها لسا تعبانه وجايه هنا عشان تتحسن وبعد ماحالها بدا يتحسن حضرتك بكلمتين زي السم رجعت دمرتها تاني..يعني هي كانت عملتلك ايه ضرتك في ايه..انت اللي كنت بتجر شكلها وحاططها في دماغك..يااخي هي مش كويسه عبر الدنيا كلها فيها بس تفضل بشر..ياما شافت وعاشت وتعذبت وتقهرت لغاية ماتهد حيلها..ادوها فرصه تغير من نفسها وحالها شويه يااخي..
هو بإستياء:معاك حق..والله كل كلمة قلتيها في مكانها لكن اني اليومين اللي فاتوا جوي كان ملخبط فيها وفشة الغل جت فيها هي..
بسخريه قالت:اه يعني وانا مفروض اعذرك !
غير عيونه عنها وهو مضايق ع الآخر..
امينه:لو كنت مش عارفه هي ايه بالنسبه ليك كنت سمعتك كلام اقسى من اللي سمعته منك بكثير..ومشت وخلاته وهو يتبع فيها بنظرات المرتبكه...يعني واضح عليه للهالدرجه!...
🍃🍃🍃
ويفوت هداكا اليوم وماتطلعش صابرين من الغرفه نهائي..
ويجي اليوم اللي بعده وتقعد حبيسة الغرفه وامينه معاها داري فيها ومخليتها ع راحتها..
ورضا معاش عرفتله الراحه طريق..بينجن بش يشوفها..ع قد ماحاول في امينه بس تغصب عليها تطلع من الغرفه امينه رفضت رفض تام..
🍃وفي ليبيا..
جي يوم المعرض اللي حضره التارقي وهو قاعد بالجبس..
كلام الزوار ع لوحات خطه ومدحهم وثنائهم وابداء اعجابهم بموهبته اللي اكتسبها برغم انه من عرق اخر خلوا نفسيته بعض الشي تتحسن...
ويقعد موضوع المطحن مدايرله غصة في قلبه..
فكوا الشراكه..وجابله محجوب جزء من المبلغ اللي خسره ع المطحن حلف عليه مش حياخد منه قرش واحد.
اخر همه الفلوس ماكانوا يعنوه في شي اللي كان يعنيه المطحن ووصية الراجل اللي كان عنده بمنزلة الاب..
بس..
المطحن قعد مفتوح للتمويه وخبر فك الشراكه ماطلعش لالحسين ولا حتى عبد الرؤوف وقعد بينهم الاربعه..
علي..المحجوب..طوبى..عبد القيوم....
☘من جهة تانيه روحوا سالمين وراجلها اهل عبد القيوم ع امل اللقاء مرة تانيه في عرس صفاء اللي عزمتهم عليه فايزة..
العرس اللي كانت الاستعدادات ليه قائمه ع قدم وساق...
🍃🍃🍃🍃
اخر يوم في رحلة قبرص اللي رفضت صابرين تمددها...
نزلت كرامة لخاطر امينه وقعمزوا في مطعم الفندق بش يتعشوا...
صابرين كانت ملتزمه الصمت وامينه مش عارف شن دير بش طلعها من حالتها اللي هي فيها...
فجأة..سمعوا صوت الاغنيه الخاصه بأعياد الميلاد..
قعدوا يدوروا بعيونهم في الطاوله اللي اصحابها ليهم هالمناسبه..
ومايندروش الا واحد من العاملين في الفندق حاط ع طاولتهم تورته شكولاته شكلهاحلو بالمرة..
هما لما شافوها مافهموا شي..
امينه قالت:اني يوم ميلادي في شهر مارس..
قامت صابرين تليفونها وشافت التاريخ..غيرت نظرها للتورته ودموعها في عيونها..
ابتسمت امينه وقالت..
/كل سنة وانتي طيبه..
صابرين بصوت مبحوح..
/كنتي تعرفي!؟
امينه:لا والله ابدا ياحبيبتي..
صابرين قعدت ساكته وعيونها غارقات بالدموع اللي نزلوا لما سمعت الاغنيه اللي تحرك في مشاعرها بقوة وتتنرفز منها في نفس الوقت..
"بدي اعرف شو مبكيكي..مني زعلانه براضيكي"
امينه؛بدك تعرف!! يابجاحتك..
ضحكت صابرين من بين دموعها..
امينه بإبتسامه؛نورت الدنيا بضحكتك ياقمر..
ضحكت تاني وهي تمسح في دموعها..
وهو من بعيد يشوفلها في الخفاء بإبتسامه حلوة...
☘☘☘☘☘
قدام الشط المقابل للفندق كانوا مقعمزات ياكلوا من التورته..
صابرين:امم واخيرا استاحشت الحاجات الثقيله هادي اللي تمسح ع كبد..
امينه بضحكه؛بالهنا..
وكملوا ياكلوا..شويه رن تليفون امينه ناضت وهي تقول..
/مكالمة من مصر..وتباعدت عنها..
وهي قاعده غارقه في عشقها للتورته اللي كلها شكولاته وكراميل ومكسرات..
وقفت ماكله لما شمت ريحة عطره وقالت بحده..
/نوض..
هو قال؛الشط للجميع نقعمز وين مانبي..
صابرين؛مش طايقاتك بكل نوض من حداي..
هو قال؛باهي علاش تاكلي فيها اني جايبها راهو..
شبحتله بحده..لقاته يشوف للشط بإبتسامه وحاجبه مرفوع..
صابرين:نكرهك..
شد ضحكتك..
صابرين حطت الصحن اللي فيه الكيكه وناضت بتمشي هو ناض طول سبقها واعترض طريقها وقال..
/شكرا..
هي قعدت تشوفله بحده وعيونها مليانات دموع..
كمل يقول..
/ع الهديه...
صابرين ردت عليه بصفعه حطت فيها غيظها كله. قعد يشوفلها بنظرات خلتها تهرب بعيونها عنه..
هو قال:وحده غيرك دفنتها في مكانها..مشكلتي ماتهونيش عليا ياشعشبونه..
شدت ضحكتها وهي قالبه وجهها عنه..
ابتسم وقال..
/تعرفي..فكرة الصداقه خشت راسي..
شافتله وقالت..
/واني معاش نبيها..
هو قال..مش ع مزاجك..مرة تقولي نبي مرة تقولي لا..العربون اللي ناخده مانرداش..سبق السيف العذل...
صابرين قعدت تشوفله وهي تفكر..
هو رفع حاجبه شويه..
قالت؛المعامله الحقيره اللي ديما تعامل فيا بيها انساها..
هوقال؛بنولوا اصدقاء اكيد الوضع والمعامله حيختلفوا..بس يعني ماتطمعيش مني بهلبه..اني مستحيل نتغير..
هي قالت:حتى اني ع فكره..
هو قال:ايه يعني شني اقتنعتي..
غيرت نظرها للشط وقالت..ايه..
هو مد يده وقال..
/تمام..خل نختموا معاهده الصداقه هادي بالبروتكول المعروف.
شافتله لقاته ماد يده..
دامت النظر ليها للحظات..بعدين غيرت نظرها ليه وصافحاته..
ويشد ع يده بقوة..
هي بوجع:ااه يدي..لاحول...حول توجع والله توجع ااه..
هو يزيد يشد عليها..
صابرين بوجع؛حرام عليك كسرتهالي!
جت امينه تجري فكتها منه وقالت..
/حتخليني اديك بالقلم وش وقفا..
ضحك عليها..
صابرين وهي شاده يدها وتتوجع..
/انكسرت ياامينه..
هو قلدها كيف قالتها بعدين قال..
/جو على صوتها وعياطها..
صابرين قعدت تشوفله بغيظ وهي تتوجع..
امينه بضحكه:خلاص روح لحالك..
هو قال:وين نروح ياللا الدنيا الليل قدامي للفندق يللا..
صابرين وهي شاده يدها..
/خاطري نخنقه..
هو قلدها تاني..
مشت وهي مترفزة وامينه معاها وهي تضحك..
وهو وراهم وكانت في قمة السعاده بالذات بعد ماعرف انهم حيروحوا ومش حيلقوا مختار اللي مسافر لشغل مهم زي ماقاله...
🍀🍀🍀🍀🍀🍀
وتنقضي ايام شهر اكتوبر..ويخش شهر نوفمبر....
اللي عدوا منه حتى هو اربعه ايام..
وفي يوم..5نوفمبر 2018...يبدا عرس صفاء واشرف...
#الحرب_البارده
#طوبى
....يتبع...
