طوبى "جنة طوبى"
#جمان_فريد
#الجزء_111"الاوراق المتساقطه/ورقه رحيل"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#الصلاة_على_النبي
أكمل وأجمل وأفضل وأشمل صيغة للصلاة على النبي ﷺ🤎
اللهم صلَّ على محمد وعلى آل محمد
كما صليت على إبراهيم وعلى آل إبراهيم
إنك حميد مجيد،
اللهم بارك على محمد وعلى آل محمد
كما باركت على إبراهيم وعلى آل إبراهيم
إنك حميد مجيد.
🤎صلوا عليه وسلّموا تسليما ﷺ🤎
اللَّهُمَّ صَلِّ وسَلِّمْ وَبَارِكْ عَلَى سَيِّدِنَا مُحَمَّدٍﷺ وَعَلَى آلِهِ وصَحْبِهِ وَسَلِّمْﷺ
#رزقنا_اللــــــــــه_واياكم 🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 ◾️ قالَ ابْنُ القَيِّمِ - رَحِمَهُ اللّٰهُ تَعَالَىٰ - :
" أَنَّهُ سُبْحَانَهُ هَيَّأَ لِعِبَادِهِ الْمُؤْمِنِينَ مَنَازِلَ فِي دَارِ كَرَامَتِهِ لَمْ تَبْلُغْهَا أَعْمَالُهُمْ، وَلَمْ يَكُونُوا بَالِغِيهَا إلَّا بِالْبَلَاءِ وَالْمِحْنَةِ، فَقَيَّضَ لَهُمُ الْأَسْبَابَ الَّتِي تُوصِلُهُمْ إِلَيْهَا مِنَ ابْتِلَائِهِ وَامْتِحَانِهِ، كَمَا وَفَّقَهُمْ لِلْأَعْمَالِ الصَّالِحَةِ الَّتِي هِيَ مِنْ جُمْلَةِ أَسْبَابِ وُصُولِهِمْ إِلَيْهَا" .
📚 [ زَادُ المعَادِ ١٩٨/٣ ].🍃
_______________________________________
في احدى مصحات العاصمه طرابلس..
كان محمد شنيبه ماشي بإتجاه الممر اللي واقف فيه ولده عمر..
وصل فيه وقاله بلهفه وخوف..
/كيف داره الحادث وشن صار فيه توا!؟
عمر بقلق..
/مش عارف شي غير ان واحد صاحبنا يخدم هني بالصدفه شافهم يسعفوا في نضال كلمني طول.
محمد شنيبه؛وينهم اللي اسعفوه!؟
عمر:مش عارف وين مشوا..
بقلق قاله:باهي خوك شن صار فيه توا!؟
مسج ع نص وجهه وهو يمرر في نظره حواليه ويقول..
/والله ياحاج مانعرف لتوا ماجاني حد خبرني بشي..
تنهد محمد شنيبه بقلق وقال..
/لاحول ولاقوة الا بالله..
ويجي اتصال لعمر قام تليفونه شاف الجالي يتصل بيه فتح الخط ورد..
/ايوه..
"شن صار في نضال!؟"
عمر: لتوا مانعرفوا شي..
"في العمليات قصدك"
عمر:ايه..
"لاحول ولاقوة الا بالله..لما تجي تجي مع بعضها"
عقد عمر حواجبه بخوف وقال..
/شن صاير تاني!؟؟
شافله بوه بخوف..
"امك لما سمعت طاحت معاش تحركت"
عمر بصدمه؛كيف!!؟
"اني ماكنتش قاعد وقتها نجاة رفعتها للقدس واني توا كيف خشتيلها"
عمر بخوف:باهي شن صار فيها!؟
"ع كلام نجاه شكلها جلطه "
غمض عمر عيونه وخبط جبهته..
محمد شنيبه بخوف وعصبيه..
/شن في!؟
عمر بألم..
/امي لما سمعت تعبت هلبه ورفعوها للقدس..
خبط محمد شنيبه كفوفه ببعض وقال..
/إنا لله وإنا إليه راجعون..
🍃🍃🍃🍃
وفي مصحة القدس..
طلعت اميمه من حجرة الاطباء بعد ماجهزت نفسها للمرواح..
وهي ماشيه ابتسمت من قلبها لما شافت اسامه واقف اخر الممر يستنى فيها وهو ابتسملها..
وصلت فيه وقالت..
/هيا..
خدي يدها ومشوا مع بعض وهو يقول..
/ياريتك كل يوم تروحي مأخر..
ضحكت بصمت..
وكملوا طريقهم وهما يهدرزوا لعند ماتصادفوا مع الجالي ونجاة جايين..
لاحظت ملامح الخوف والارتباك ع وجوههم استغربت
فاتوا من حداهم من غير مايلاحظوا وجودها وهي مابتش تتكلم عنهم مع راجلها...
🍃🍃🍃🍃
وصل أسامه اميمه وحطها قدام حوش جدها ..
علي الواعر وقتها كيف روح من صلاة العشاء وقف في الباب لما درست سيارة اسامه قدامه..
نزلوا اميمه واسامه..
اميمه طول فتحت باب الحوش وخشت..
واسامه جي للحاج علي سلم علي..
اسامه مد يده وقال بإبتسامه..
/السلام عليكم..شن حالك ياحاج..
صافحه علي الواعر وهو يقول..
/الحمد لله..شن حالك وحال اهلك؟
اسامه:الحمد لله في خير ونعمه..
علي:تفضل تعشى معانا..
اسامه وهو مبتسم..
/مرة تانيه ان شاء الله..
علي:مانعزمش هكي وخلاص..خش قلت..
ضحك اسامه وقال..
/ياودي حاضر مش رادك..
علي ابتسم وقال..
/تفضل تفضل..
اسامه:يزيد فضلك..
خش والحاج علي لحقه وسكر الباب..
🍃في هالأثناء..
اميمه اول ماخشت للحوش توجهت طول لحوش طوبى..
*******
في دار المعيشه..
واقفه ع الباب وهي تمرر في نظرها ع طوبى وغرفه واريج وتحكيلهم..
اميمه:باين في وجوههم الخوف وكانوا يمشوا بسرعه..
اريج بقلق بالغ..
/ترا بالله طوبى اتصلي بأبله سميره..
طوبى وهي تشوفلها بقلق هزت راسها وقامت تليفونها..
غرفه:زعمه مغليه صارتلها مصيبه!
اميمه بضحكه..
/من السحن..
ضحكت غرفه معاها..
طوبى وهي تشوفلهم بإبتسامه حطت التليفون ع وذنها وقالت..
/تو نعرفوا..
نادى الخط تلاته مرات بعدين ردت سميرة..
"ايوه طوبى"
تلاشت ابتسامة طوبى وعقدت حواجبها بخوف لما سمعت نبرة البكاء طالعه من صوت سميرة..
/خير سميرة خيره صوتك هكي!؟
تسارعت دقات قلب اريج وحطت يدها عليه..
وغرفه واميمه تبدلت ملامح وجوهم للقلق..
"اااه ياطوبى ااه تقول ربي كاتب عليا نفقد خوي مرتين..نضال دار حادث ياطوبى"
شافت طوبى لأريج بصدمه بخوف وهي تقول..
/شن صار فيه!؟
اريج بخوف شديد..
/شن في ياطوبى قولي!..
"لتوا مش عارفين شي عمك الحاج محمد قال ماطلعش من العمليات.."
طوبى شدت ع يدها بقوة وقالت بأسف شديد ودموعها في عيونها..
/لاحول ولاقوة الا بالله..ربي ينجيه ويعافيه..
اريج بتوسل وخوف..
/قولي شن في ياطوبى تربحي!
طوبى شافتلها بحزن وقلق وهي تقول..
"نضال داير حادث"
حطت اريج ايديها الزوز ع صدرها وبدت انفاسها تتسارع وانهارت بالبكي..
قربتلها غرفه حاوطتها وهي تقول بخوف..
/اريج!
وسميرة تقول لطوبى..
"شن صارلها اريج"
طوبى ودموعها ينزلوا..
/تبكي ياسميرة..سامحيني بنسكر توا وكان سمعتي شي كلميني بالله عليك..
"باهي يابنتي باهي"
نهت طوبى المكالمه وقربت لأريج وهي تقول..
/في العمليات ياروجه ادعيله حبيبتي..
اريج وهي منهاره..
/حي عليا ياطوبى حي..كان صارت فيه حاجه نموت..
ضمتها طوبى وهي تقول..
/ماتقوليش الدوة هادي ادعيله يااريج..
غرفه قعدت تمسح ع ظهرها وهي تذرف في الدموع..
واميمه مقعمزة قدامها وهي تشوفلها بألم وتمسح في دموعها..
🍃🍃🍃🍃🍃
وخديجه تبكي ع امها بعد ماعرفت شن صار فيها..
/جلطه ياجالي جلطه جلطه في الدماغ تعرف شن معناها هادي!؟
الجالي وهو ضامها وشاد دموعه بقوة قال..
/شن بنقول بس..لاحول ولاقوة الا بالله..
نجاة:ربي يشفيها ويعافيها..خبرتوا المهدي!؟
الجالي:بوي قال خبروه غدوة كان عرف توا بيطلع في الليل والطريق مش امان..
خديجه ببكي:ااه ياربي شن هالمصايب اللي نزلت علينا كل وحده احرف من التانيه..ااه يااميمتي ااه ياوخيي..
ع جية نسرين تجري وهي تبكي وتقول بذعر.
/شن صار في امي!؟
تباعدت خديجه ع الجالي وجت لأختها وهي تقول ببكي..
/جلطه يانسرين..
خبطت نسرين بيدها ع صدرها من الصدمه وخديجه ضمتها بقوة وهي تبكي..
ومن بعيد ربيع نادى الجالي والجالي مشاله ونجاة معاه بعيونها...
🍃🍃🍃🍃
وياما صار في اريج..
فقدت الوعي وفيقوها واستمرت في البكاء وقلبها مفطور من الالم..
🍃وفي حوش الحاج علي..
كانوا هاديه وصفيه يتعاونوا ع عشي نسيبهم وهما يهدرزوا ع الاخبار اللي سمعوها من اميمه..
صفيه بضيق..
/كل ماله قلبي ينغم ماتسمعي كان اللي تغم..
هاديه بقلق..
/والله حتى اني زيك ليا فترة مش مرتاحه بكل..
صفيه:ربي يجيرنا..
هاديه:اللهم آمين..
🍃وروح عبد المطلب وحضر العشي مع بوه ونسيبه ومحور حديثهم كان عن اللي صار لعيلة شنيبه واسامه يسمع وهو مضايق مش طايق يسمع عن اي شي يخص عمر...
🍃🍃🍃🍃🍃
وبعد ماقعد نضال ساعات في غرفة العمليات طلعوه لغرفه العنايه المركزه...
************
محمد شنيبه بخوف..
/شن صارله بالزبط قول كل شي ارجوك!..
الطبيب المسؤول عن حالته..
/هدي روحك ياحاج العمليات اللي درناها لولدك نجحت وللحمد لله..
عمر وهو يتسائل بألم..
/عمليات!؟ الطبيب:صارله تمزق في الفص الايمن للكبد سببله في نزيف داخلي وقفنا النزيف وعالجناه والاصابه التانيه كانت في يده اليسار صارله قطع في معظم اوتار واعصاب اليد..
غمض محمد عيونه بألم..
وعمر قال ولمعة الدموع باينه في عينه..
/شن بيصير ليده يادكتور..
الطبيب:الوضع مش خطير مع العلاج الطبيعي تتحسن إن شاء الله..
عمر:معليشي دكتور نبيك تشرحلي حالته بالتفصيل يعني اللي صارله من ورا الحادث كيف حيأثر عليه القدام..
هز راسه وقال..
/تفضلوا معاي للمكتب..
شاف عمر لبوه شاف ملامح الوجع حاوطه من كتافه وقال..
/وحد الله..ان شاء الله مافي الا كل خير..
وخداه معاها ورافقوا الطبيب لحجرته...
🍃🍃🍃🍃
الصدمه وقعها قوي ع ولاد خوته اللي كانوا موجودين في مباراة دايرينها ولاد الشارع في مكان تاني قي المنطقه..
محمد كاد عقله يطير من راسه يبي يكون في المكان اللي فيه نضال بأي شكل ومالقاش غير عبد القيوم بش يرفعه..
واتصل عبد القيوم بربيع وسأله عن وضع نساباته وعرف منه وين قاعد نضال وتوجه طول بمحمد للمصحه...
🍃🍃🍃🍃
وعيون اريج الباكيه ماعرفلهاش النوم الطريق..
متمدده ع الفراش تبكي بصمت وقلبها موجوع للغايه..
بين عيونها ذكرياتهم الحلوة مع بعض من صغرها لعند اخره مرة شافاته فيها وهو مروح من الجامع قبل ليسيب حوش اهله..
خطرت عليها سميرة لما كلمتها عنه..تخيلت ردة فعله لما سمعها ردها منها..
غمضت عيونها بشده وولت تبكي بالعبره..
وطوبى جنبها تواسي وقلبها متألم ع حالها...
🍃وارجعي ياطوبى خشي في دوامة الشعور بالذنب برغم خلوك من الذنب في اللي صار مع اريج وغيرها🍃
حاولت ع قد ماتقدر تهديها وتقنعها ان الدعاء هو بس اللي حيفيد نضال بالذات في هالوقت من الليل..
اريج بنبرة باكيه؛مانقدرش نصلي عليا العذر..
طوبى:وين المشكله وانتي في مكانك ادعي ودعائك بإذن الله مستجاب..غير صلي ع النبي في اول وفي نصه وفي اخره ولما تختميه كرري دعاء سيدنا يونس..
"لاإله إلا انت سبحانك اني كنت من الظالمين"
🍃وبدت تدعي اريج وهي مقعمزه في مكانها..
استفتحت دعائها بالصلاة ع النبي وبعدين دعت من قلبها لنضال دعت بإنكسار ورجاء وتوسل وصلت ع النبي مرة تانيه..ورجعت دعتله مرة تانيه بنفس الانكسار لعند ماطلعت اللي في قلبها كله وختمت بالصلاة ع النبي وكررت تلاته مرات دعاء ذا النون...
🍃🍃🍃
وتنزل الامطار..وطوبى وهي تصلي في القيام في الصاله تسمع فيها وتدعي في سجودها..
كل دعائها كان لنضال واريج سألت الله يجمعهم ويعطيهم ايام حلوة زي قلوبهم...
🍃🍃🍃🍃🍃
تاني يوم..
الساعه 10:30صباحا...
يوصل المهدي لطرابلس..توجه طول لشارع القهوة حط سدره في حوش اهله بش تقعد مع سميرة ومشي لمصحة القدس يشوف وضع امه قبل...
********
سميرة ببكي..
/ماتحملتش لما سمعت طاحت علينا وقعدت تتشنج نحاسبوها طلع في الروح ع جية نجاة لما شافت حالتها قالتلنا نطلعوها اني وخديجه لسيارتها بش ترفعها للمصحه اللي هني وغادي عرفوا ان جتها جلطه في الدماغ سببتلها شلل نصفي..
سدرة بألم ودموعها..
/لاحول ولاقوة الا بالله..والمسكين نضال قالوا احتمال تقعد ايده فترة مشلوله..
سميره وهي تبكي..
/دعوتها يومها دعوتها باب العرش كان مفتوح ياروحي عليه ياروحي..
سدرة وهي تمسح ف دموعها قالت..
/لاوحول ولاقوة الا بالله...
🍃🍃🍃🍃🍃
"يده انشلت!؟"
فايزة ببكي..
/ايه ياروحي هكي قالتلي نسرين..
اريج وهي تبكي بغضب..
/والله عرفتها لما دعت عليه امه اللي ماعندهاش قلب تستاهل اللي صار فيها..
طوبى بألم:خلاص اهدي اريج.
اريج ببكي..
/كيف نهدا ياطوبى..نار راكبتني نار..كيف بيصير فيه توا شن بيدير لما يعرف اللي صار في يده..
طوبى:راهو مش حتقعد هكي العمر كله تو يديرله جلسات علاج طبيعي وتولي زي قبل بإذن الله..
اريج وتدعي بتوسل..
/يارب يارب..
وفايزة تتبادل في نظرات الحزن مع غرفه وطوبى ع حال اريج...
🍃وحال محمد المهدي ماكانش خير من حالها..
عمر:غير هيا روح معاي والله مانك مستفيد حاجه بقعادك هني..
محمد ودموعه في عيونه قال بنبرة حزن..
/مانقدرش والله مانقدر نروح ونخليه..بالله عليكم خلوني..
عبد القيوم:خليه تو نقعد معاه لين يجي بوه..
تنهد عمر بضيق وقال..
/باهي..بارك الله فيك..
هز عبد القيوم راسه بصمت..
مشي عمر لأخر الممر وين ماكان بوه يراجي فيه خبره ان محمد رفض يروح والتارقي بيقعد معاه لين يجي المهدي ولأنه يعرف عبد القيوم وعنده فيه ثقه روح هو عمر وخلوه معاه...
🍃🍃🍃🍃🍃
"روح بمرتك واختك ماعندهم مايديروا هني"
الجالي:خلاص نروح بيهم ونمشي للمصحه اللي قاعد فيها نضال..
المهدي بضيق..
/دير رايك..
تنهد الجالي بعدين مشي لمرته واخته بش يروح بيهم..
وهما ماشيين تلاقوا مع شخص لما شافه الجالي لون وجهه انخطف..لكن نظرات عيون مرته تبدلت للحقد..
عكسهم اخته اللي لحقت هالشخص بعيونها وهي منبهره بيه بعدين ردتهم القدام وقالت في نفسها..
"ان شاء الله هدا مختار!؟"
🍃ومختار وصل في المهدي..
وقف عليه وقال..
/السلام عليكم..لاباس ع الوالده وخوك نضال..المهدي لما شافه مانطقش بولا كلمه..
قعد يشوفله وبس..
عقد مختار حواجبه وقال..
/مشيت زيارة لحوش اختي لما سمعت منها اللي صار جيت طول..
ومازال المهدي يشوفله وهو ملتزم الصمت..
مختار بإستغراب..
/مهدي!
المهدي تنهد وقال..
/لايوريك باس..
حط مختار يده ع كتف المهدي وقال..
/حاول تكون هادي وتشد حيلك انت مريض قلب الانفعالات الزايده مش باهيه ليك..
هز المهدي راسه بصمت..
نزل مختار وحطها في جيبه وهو يقول..
/في حال احتجتوا لأي شي اني موجود حني عيله وحده يامهدي..
المهدي:بارك الله فيك..
مختار هز راسه بعدين قال...
/قالوا نضال قاعد في مصحة تانيه.
المهدي:ايه..مصحه****** اللي في ****
مختار:عرفتها عرفتها..من قاعد معاه غادي!؟
المهدي:بوي وخوي عمر..
🍃🍃🍃🍃🍃
ويوصل الجالي بعد ماقطع مسافه لابأس بها للمصحة اللي قاعد فيها نضال..
خشلها وتوجه طول للقسم الموجود فيه خوه..
🍃اول ماوصل غادي..وقف في أول الممر وهو يشوف في عبد القيوم مقعمز ع كراسي الانتظار مع ولد خوه..
رفع حاجبه وكمل طريقه بإتجاههم..
وصل فيهم وقال لمحمد..
/قاعد هني انت !؟
شافله عبد القيوم بنظرة امتعاض بعدين ناض وهو يوجه في نظره لمحمد يقوله..
/هي مال انا ماشي ماتبي شي!؟
محمد:بارك الله فيك..
هز عبد القيوم راسه ومشي وهو متجاهل نظرات الجالي اللي كلها كبر وحقد..
محمد شاف لعمه بشي من الريبه وقال..
/نحساب بوي اللي بيجي..
شافله الجالي شويه بعدين قعمز جنبه وقال..
/شن يدير هدا هني!؟
محمد:هو اللي جابني امس..
الجالي بتعجب..
/قصدك قاعد من امس لتوا!!؟
محمد هز راسه بإيجاب وع وجهه باديه ملامح التوتر غير طول الموضوع بسؤاله اللي قال فيه..
/خلوكم تشوفوا حناي!؟
الجالي تنهد بضيق..
/وياريتني ماشفتها..الجلطه كانت قويه لدرجة تسببتلها في شلل..
محمد بأسف شديد..
/والله مامستوعب حاجه من اللي صارت..
الجالي حرك راسه يمين بأسف وهو ساكت..
🍃🍃🍃🍃🍃
"صارلها زي ماصار لبابا قبل"
صفيه:معناها مع العلاج يولي حالها باهي..
اميمه:ع حسب الحالة متاعها ماما..
هاديه بقلق..
/الواحد مايندري ع الدنيا شن داسه في لحظه الولد دار حادث والام انجلطت..
صفيه برجاء وخوف:ربي يجيرنا يارب..
وهاديه وأميمه آمنوا ورا دعائها والخوف اللي في قلبها تسلل لقلوبهم...
🍀🍀🍀🍀🍀
ويعدوا ثلاثه ايام..
في حوش محمد شنيبه التموا الاقارب من جهة محمد ومن جهة مرته مغليه..وحتى اقارب سميره كانوا حاضرين من اول يوم..
هدا غير جيران الشارع اللي كانوا يجوا ويمشوا خلال هالايام الثلاثه..
والجو كان مشحون جدا وتحديدا من جهة خديجه ونجاة اهل مغليه..
اللي يشوفوا في سدرة كيف مسيطره ع الوضع شخصيتها القياديه خلت سميره تعتمد عليها في كل شي..
وطبعا هي توا الكنه الكبيره مرت الولد الكبير اللي يعتبر الكل في الكل بعد بوه...
لكن خديجه ونجاه مش حيتقبلوا هالشي ببساطه...
🍃🍃🍃🍃
طلعت من الصاله متوجهه للكوجينه بش تبدا تجهيز الضيافه لمعارف الحاج محمد اللي جو بنساوينهم من برا العاصمه..
وصلت في الكوجينه وخشتلها..
لقت خديجه ونجاة فيها سابقينها يجهزوا في الضيافه..
سدرة:باهي اللي ريناكم تحركتوا..
التفتت خديجه شافتلها من فوق لتحت..
وسدرة تبادل فيها بنظرات برود..
اما نجاة دايرة روحها لاهيه بالطواسي اللي تحط فيهم ف السفرة...
حطت اخر طاسه وشافت لخديجه وهي ماشيه لباب الكوجينه..
سكراته وقدمت لسدرة وهي تقول..
/لو عندك ذرة دم ماريناكش هني..
سدرة ببرود؛وعلاش!؟
خديجه بنبرة متهكمه..
/ياوقاحتك..وتسألي فوقها!!؟ البلي اللي حني فيه توا كله في جراريك..
سدرة برفعة حواجب..
/بالله!؟
استفز اسلوبها وبرودها خديجه اللي فقدت اعصابها وشدتها من مرفقها بقوة وهي تقول بغضب..
/كان مازال فيك عرق حشم اقلبي وجهك لشقتك وشديها..
ونجاة تتفرج بإستمتاع..
ابتسمت سدرة تهكما وجبدت ذراعها وقالت بتحدي..
/تركبي ولاتنزلي اني كنة العيله توا ولو في حد مفروض يتحشم ع وجهه ويشد مكانه اكيد مش اني..
نجاة ضيقت عيونها وقالت..
/المعنى!؟
شافتلها سدرة وقالت..
/المعنى وصلك هدا علاش تكلمتي وزي مايقولوا صاحب العلة ينخصوه مرافقه..
رفعت سبابتها ومررتها عليهم هي ونظرها قالت..
/اسمعي انتي وياها..فوتوني وماتحطوش روسكم براسي ماتعرفوش شن يطلع مني بعدين..اللي نعرفه واللي انتم تموتوا وتخلوه مدرق نطلعه ونخلي الدنيا تحكي بيه ووقتها صدقوني معاش تقدروا توروا وجوهكم حتى لرواحكم في المرايه..ركزت بالنظر في نجاة وقالت..اكيد وصلك المعنى بزايد ياأخت صابرين...
شافت خديجه لنجاة بارتباك لقتها تشوف لسدرة بخوف ونظرات عيونها الحاده غارقه بالدموع..
سدرة وهي تمرر في نظرها عليهم بكره قالت..
/سقدي روحك انتي وياها..ومشت طلعت من حداهم في حالة من التوتر والخوف...
🍃🍃🍃🍃🍃
التوتر والخوف..
ابرز حالتين يصيبوا اي انسان عادي في حالة الحرب..
ماعدا المقاتلين اللي قدمولها بقوة قلب حاملين ارواحهم ع ايديهم...
🍃في احد المحاور...
كان عبد الرؤوف واقف ومع رفاقه في حالة استراحة محارب..
خلال الفترة الليانضم فيها لجبهة القتال كان القائد اللي يدعم في المحاربين معنويا ويقابل معاهم في الصفوف الأماميه...
🍃حاليا كان يقوم بنفس بالمهمه وهو يغني مع رفاقه من باب الترويح عنهم وتشجيعهم في نفس الوقت..
ودرس جنبهم سيارة عسكريه نزلوا منها زوز ضباط..
واحد فيهم اول مابان عليه عبد الرؤوف وسمع شن يغني ابتسم...
"عادي عادي عادي..قولوا شن تبوا عادي..
قولوا علينا بريوش..قولوا علينا زبادي"
قدملهم وهو يغني..
/خشينا المحاور..كل مرة تاخد تبه..
التفت عبد الرؤوف وشافه..ضحك من قلبه وقال..
/اووو..
قدموا لبعض هو وحسين وحضنوا بعض بقوة..
عبد الرؤوف:بطل..
حسين:شن جابك!؟
تباعدوا عن بعض وحسين شد ذراعه وقاله..
/شن غير رايك!!.
عبد الرؤوف بإبتسامه..
/هدا رايي من الاول ياافندينا وانجبرت نغيره لفترة..
نزل حسين يده وقاله..
/وعيلتك واختك مالهمش غيرك!؟
التفت عبد الرؤوف مرر نظره ع رفاقه وهو يقول..
/اغلبهم مسيبين عائلات وراهم مانيش خيرهم منهم شي..رجع شافله وقال..بعدين اختي عاطيها لراجل حاطها في عيونها وعيلتي عندهم من بيهم..
حسين بضيق:اني قصدي الصغار..
طبطب ع كتف حسين وقال..
"خليتهم لعمهم"
ابتسم حسين بعدين قال..
/مرات هالحرب تاخدنا حني الزوز من يقعدلهم!؟
رفع عبد الرؤوف صبعه فوق وقال..
/ليهم رب كريم..
حسين:سكرت راسك خلاص..
عبد الرؤوف بضحكه..
/ايه بالضبة والمفتاح ع قولة المصاروة..تعال اشرب شاهي تعال..
ابتسم حسين وقال لزميله..
/تعال اشرب شاهي يامطيع...
🍂🍂🍂🍂
وشربوا مع بعض طاسة شاهي احمر وهما يتكلموا عن كل مايخص الحرب والاخبار اللي سمعوها من هني وغادي..
شويه وجي اتصال لحسين من مكان ماوطلبوا حضوره..
حسين بإبتسامه..
/تو ندير عليك طلة تانيه..
عبد الرؤوف بإبتسامه..
/مرحبتين مرحبا..
ضموا بعض وهما يطبطبوا ع ظهور بعض بعدين حسين تباعد ورفع يده وهو يقول..
/نشوفك ع خير..
عبد الرؤوف رفع يده ورد التحيه وهو يقول..
/إن شاءالله...
ومشي حسين مع زميله للسيارة وركبوا..
وتحرك زميله اللي كان يسوق السيارة..
"عادي عادي عادي"
ضحك حسين وقال..
/ربي يحفظه وخلاص..
:شكلكم صحاب هلبه..
حسين بإبتسامه..
/مرات نحس فيه اقربلي من خوي..تصدق بداية تعارفنا ع بعض كانت كلها مشاكل ضاربنا حتى الضرب..
ضحك رفيقه وقاله..
/زي مايقولوا مامحبة الا بعد عداوة..
حسين هز راسه وهو يشوف للطريق بإبتسامه..
وتتباعد السيارة..وتزيد تتباعد..وتتباعد...
وكان الوضع هدوء حذر..
لكن في لحظه..
صوت رزمه اخترق الهدوء وزلزل الارض..
حسين بصدمه..
/وين طاحت هادي!؟
رفيقه بصدمه وأسف..
/لاحول ولاقوة الا بالله!! راحوا التريس..
حسين شافله شويه بعدين قال بنبرة هاديه..
/ولي بيا..
:صل ع النبي وين تبي نولي بيك!.
وزاد السرعه..
فقد حسين اعصابه وهو يقول بصوت عالي..
/ولي بيا...قتلك ولي بيا...
واللي معاه مازال يجري ويتباعد..
وحسين مازل يعيط وهو يقوله..
"ولي بيا" ويشتم فيه ويسب ..
《السلام عليكم ياطيب...
تفضل معاي ياطيب نهدرزوا في القهوة اللي غادي هدرزة عاديه بس...》
جي بين عيونه اول لقاء كان بينهم ومن بعده تمر الذكريات ورا بعضها بمرها وحلوها لعند ماوصلت في اخر لقاء كان قبل دقائق...
"خليتهم لعمهم"
🍂🍂🍂🍂🍂🍂🍂
وماكانش ممكن يصدق حسين ان عبد الرؤوف سيب الدنيا إلا لما يشوفه بعيونه..
🍂خش يجري للمشفى للميداني اللي كان مليان بالقتلى والجرحى..
حسين بذعر..
/وينه..عبد الرؤوف وين!؟
اشر عليه واحد من جماعة عبد الرؤوف اللي سمع باللي صار وجي يشوفه..الراجل كان يبكي..
غير حسين نظره عنه وقعد يقدم بخطوات خايفه لين وصل فيه..
حط يده ع الغطا ورفعه لقي وجهه مغطي بالدم..
غطاه وهو يقول بعدم استيعاب ورفض..
/لالا..ياربي لا..مش هو..مش هو..زيد شوفه مش واضح منه شي وجهه كله دم كيف عرفته قولي كيف!
كل من كان موجود في المشفى وسط ريحة الموت والدم وجهوا انظارهم لحسين اغلبهم تكهن انه يكون خوه من فجعته عليه..
قعد مستمر في رفض اللي شافه واللي حواليه يذكروا فيه بالله وهو مش قادر يصدق..كيف كان واقف يهدرز هو وياه شرب معاه شاهي خلاه يغني ويضحك..
كيف في لحظه تغير كل شي وولى هدا حاله!!؟
غارق بدمه وهو فاقد للحياة..
قعمز ع رووس صوابعه وهو يشوفله لجثته المغطيه وهو يقول ودموعه ينزلوا..
/تي نوض ياراجل نوض وياسرك طروح..مش قلت بتزوجني وفرحي كله عليك..تبي تولي ف كلمتك..!عبدالرؤوف..
طبطبت على ظهره رفيقه اللي كان معاه وهو يقول بألم..
/قول لاإله إله إلاالله..
حسيت بنبرة مخنوقه..
/لاإله إلا الله..قتلك هدا اقربلي من خوي..
وحط ايديه ع وجهه وانهار بالبكي...
وكأنه لأول في مرة في حياته يخش حرب...
وكأنه اول مرة في حياته يشهد موت حد في ساحة الحرب...
#الاوراق_المتساقطه
#طوبى.
....يتبع....
