طوبى "جنة طوبى"
#جمان_فريد
#الجزء_الحادب_والثمانين "اساروف "
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
”البسُوا مِعطَف الأذكار لِيقيكم شُرور الإنس والجَان، ودثِّروا أرواحَكُم بالإستغفار لتمحي لكُم ذُنوب اللَّيل والنَّهار، وإن أصابكم ما تَكرهونه فسترضون وتتيقَّنون بأنَّه خير قدَّره لكم ربّكم لأنَّكم قد تحصَّنتُم باللّٰه.“
- ابن كثير...
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃من لم يكن نورًا لنفسه لن تسعفه كل أضواء الكون 🍃
.______________________________________
يوم الجمعه..
24اغسطس..سنة 2018..
🍃 الساعه 9:00صباحا
وبعد الفطور مباشرة..سقدوا عيلة الواعر جبريل ومرته سالمين..
طوبى تماسكت ع قد ماتقدر بش ماتبكيش وتبكي سالمين معاها...وسالمين دارت نفس الشي...
وبعد ماركبت السيارة وتباعدت عن حوش الواعر انهارت بالبكي..وراجلها جنبها يسمع فيها وهو مضايق..
🍃وطوبى بعد ماطلعت مشت طول للدار وسكرتها عليها..
وقعمزت ع السرير اللي كان قريب لسرير بنتها وطلعت حزنهاا المكبوت...
🍃🍃🍃🍃🍃
بس عواطف اللي جت تزور ماليها وتعيد عليهم..
اتقنت وبجدارة دور العروس السعيده وياما حكت شي صار وشي ماصارش عن العيد اللي حضراته في حوش عيله..
امها واختها اقتنعوا وصدقوا..وفرحوا لراحتها اللي بانت عليهم من ضحكتها وطريقة كلامها..
وبعد هدرزة طويله نص نهار عن العيد واجوائه..
نجمه وهي دير في عالة الشاهي..حكتلهم ع جية ابتسام.
🍃عواطف بمفاجأه:صار جابها!
نجاح:غريبه يام امس اتصلت بيك المغرب وماقلتيش..
نجمه:قلت يجوا ونحكيلهم..
عواطف:باهي شن قالتلك شن قلتيها..
نجمه بآنزعاج؛لانقوللها لاتقولي لزيتهم..
نجاح:جديات!
نجمه؛وشن تبوني نقبلهم بعد ماداروها من وراي ولادارولي اعتبار..ولاهي اللي خدت راجل من مرته وقهرتها في عمرها..
عواطف:باهي عبد الفتاح شن قال...
نجمه؛شن بيقول! خداها هي والصغار وروحوا طول..
عواطف:قداش عنده صغار منها؟
نجمه بضيق:وليد وبنيه..
نجاح بعدم استيعاب..
/اني بس نبي نعرف كيف قعدوا ساكتين ومدرقين السنين هادي كلها!
عواطف:بالذات سميرة ياكبدي..
نجاح؛سميره مجبورة تسكت بش ماتحطش روحها في موقف محرج ويهزوا عليها سلفاتها بعدين..لكن الله غالب جي يوم وطلع واللي خافت منه صار..
عواطف:الله لايربح هديكا السوسه..شن درتوا معاها في العيد..
نجمه:اسكتي ساكته..هي وخوك داروا العار يدلع ويدلل ويزازي بيها قدام بوه خوته ولاقال نستحي ولانتحشم..
عواطف:ع خاطر سواد عيونها مالا! ماهو كله خوف ع مصالحه..
نجمه:اني نبيها تشد خاربتها وتريحني من نشافها..
عواطف؛معاش سمعتوا جديد عن مشكله خوها مع بنت الواعر!؟
نجمه:لالالا..
نجاح؛ايه يام نبوا نديروا نهار نمشولهم..
نجمه:انتم شوفوا يوم وقولولي..
عواطف:نشوف الشارف قبل ونرد عليكم..
🍃🍃🍃🍃
في جنان حوش لطفي الواعر..
🍃مطيره بإبتسامة خيبة أمل قالت..
/مشت وخلت وبنتها..
علي الواعر:دير اللي يريحها مانقدروش نلوموا عليها اللي راته من خوك مش شويه..
مطيره:عارفه لكن اميمه لمن خلتها؟
علي:شن لمن خلتها؟ البنت قاعده مع ماليها مش بروحها ونبيك تمشي تقعدي معاها في الحوش..
مطيره قعدت ساكته وماعلقتش..
علي:هي اولى بيك توا..البنت تخدم وتقرا وبتعانيني اني وبوها هلبه عليها وبعدين ماتهونش عليك بنت خوك حتى هي..
مطيره حست بالشفقه والتعاطف مع اميمه وقالت..
/عندك حق..
علي:خلاص الليله تمشي تبات عندها وديري زي مامفروض دير العمه وتصلحي بين بنات خوك ماتخليهمش متقاطعات فهميهم ان ماليهمش غير بعض لميهم ماتوقفيش مع حد ع حد فاهمه!؟..
مطيره هزت راسها وقالت..
/حاضر..
علي:اني ماشي لحوش عمك خلف الله عازمني نتعشى عنده..
مطيره؛نبعتولك عبد الرؤوف يروح بيك؟
علي:وعلاش!!؟ حوشه في الشارع اللي ورانا..
مطيره:لكن بتروح في الليل ومرات ضي يهرب..
علي مشي بإتجاه الباب وهو يقول...
/ماتخمموش فيا خمموا في ارواحكم..
غلبتها الضحكه وهي تقول..
/ربي يعطيك صحيحتك..
واستناته لين يطلع من الحوش بعدين ولت خشت داخل..
🍃برا..
وبعد ماطلع الحاج علي من حوش ولده..تقابل هو وفراس ..
فراس:ع السلامه ياحاج لاباس؟
علي:اووو تونسي..يعيشك يعيشك..امتى روحت؟
ضحك فراس وقال:امس في الليل..
علي:حمد لله ع سلامتك..خالتك مطيره عقبتلك من كل شي عصبان..قديد..وشويه من المعلاق..
ضحك بإحراج وقال:الله يعزها..
علي هز راسه وقال:هي مالا خليني نكمل طريقي..
فراس رفع يده وقال بضحكه..
/في امان الله..
وكمل علي طريقه..ويتلاقى هو وصاحب الورشه ومعاه بلال يصلحوا في سيارة..
علي:السلام عليكم..ربي يعاون..
الزوز ردوا عليه باصوات متقطعه..
"وعليكم السلام..بارك الله فيك.."
وهو ماشي وعيونه يتبعوا في خطواته يسمع حس سيارة جايه شاف القدام..
لقاها سيارة التارقي..
بانت ع وجه ابتسامه من النادر يبان زيها ع وجه علي الواعر صاحب الملامح الحاده الجديه اللي غالبا الابتسامه العاديه ماتغيرهاش..
حس وكأنه شاف ولده لطفي جاي...وسبحان من خلاه يشوف لطفي في غريب بعيد عنهم كل البعد في هلبه حاجات...لكن قريب عليهم بطيب اصله وصفاء نيته واخلاقه العاليه وشهامته..
درس عبد القيوم سيارته ع تركينه ونزل منها ومشي لعلي وهو مبتسم ويقول..
/حاج..
وصل فيه وصافحه وسلم عليه بالخد وهو يقول..
/كل عام وانت بخير..
علي:كل سنة وانت طيب حمد لله ع سلامتك..
تباعد عنه وقعد شاد يده وهو يقول..
/الله يسلمك..كيف حالك؟
علي:الحمد لله في نعمة..كيف حالك انت والناس اللي جيت منهم..
عبد القيوم؛الحمد لله الكل بخير والكل يسلموا عليكم..
علي:الله يسلمهم..
عبد القيوم؛طالع تتمشى؟
علي:لا ماشي لواحد صاحب في الشارع اللي ورانا..
عبد القيوم؛اها..مالا تعالى اركب ..
علي:لالا خليني نبي نطلق رجليا ونشم هوا ربي..
عبد القيوم:براحتك..نتلاقوا في الجامع..
علي:ان شاء الله..هيا برا توكل روح لحوشك وارتاح..
ابتسم عبد القيوم وقال؛حاضر..هي السلام عليكم..
ومشي ولى لسيارته..
وعلي كمل طريقه...
قبل ليركب عبد القيوم لسيارته جو عيونه ع بلال لقاه يشوفله..
عبدالقيوم؛اوو بلال..
ابتسم بلال ورفع يده وحياه وعبد القيوم مشاله بش يعيد عليه..
والشي نفسه صار مع بلال التونسي اللي كان صدره ضايق بكلام يبي يقوله لعبد القيوم لكن التردد والتخوف منعوه..
🍃🍃
وكمل عبد القيوم طريقه لحوشه..
وقبل ليخشله..نزل من سيارته وعيد ع اصحابه..
ربيع اللي كان في مطعمه..المهدي اللي كان في المطحن متاعه ومعاه محمود..
بس سلم من بعيد ع نضال اللي تغير هلبه بعد عركته مع الجالي..ومنه توجه لحوشه...
🍃🍃🍃🍃🍃
ومع الساعه ستة مساءا..
كان اسكندر جايب اخته سميره لحوش لطفي الواعر بش تعيد وفي نفس الوقت تاخد الجواب ع الطلب متاعه..
بس اللي صار لما درس اسكندر سيارته قدام الحوش..
مقابلهم كان محمد شنيبه مقعمز قدام المطحن مع ولده المهدي..
وين نزلت سميره شافت جهتهم جو عيونها عليه وهو كذلك شافها..تفكرها طول لأنها قعدت عالقه في راسها من يومها..
بس تفاجئ وين لقاها جايه لحوش الواعر..
هي غيرت طول عيونه عنه ومشت دقت ع باب الحوش..
واسكندر قعد يراجي فيها لين فتحولها الباب..
واللي فتحه اريج..وين شافها ابتسم لااراديا..
حتى هي شافاته لكن هربت بعيونه عنه..ورحبت بأخته ودخلتها وسكرت الباب..
هو ضحك ضحكه خفيفه..بعدين تحرك لحوش صديقه عبد الرؤوف..
وهذا كله صار ع عيون نضال اللي كان يلحق فيه بنظرات كلها بغض...
🍃🍃🍃🍃🍃
وفي احدى الدول العربيه اللي كانت تقام فيها جنازة صديق مختار وشريكه..والد عزيز..
بعد الدفن...واستقبال المعزين..
اجتمعوا في حوش عيلة الفقيد..
ومن بين الموجودين فاتن اللي كانت صديقه لأرملة المتوفي..
عيون فاتن كانت تراقب في صابرين اللي كانت مقعمزه جنب مختار وتجامل وتساير...وتتصرف وكأنها زوجته..
🍃مختار:هو طلب تدفنوه هني؟
عزيز وملامح التجهم مسيطره ع وجهه..
/ايه قال ادفنوني جنب امي..
مختار هز راسه وهو ساكت..
عزيز:لتوا مش مستوعب طلع من العمليه وكان حاله باهي فاق وكلمنا وضحك معانا..كيف دهورت حالته ووصلت للموت!
مختار:من الاول عطوكم الاحتمال هدا..
عزيز سكت والحزن في عيونه اللي بانت فيهم لمعة الدموع..
مختار:خلاص توا اللي صار صار هدا حد عمره وكلنا ليها..
عزيز بألم:عارف..اني اللي واجعني مش انه مات..اللي واجعني ومدايرلي غصة في قلبي على شني مات..ياريت حاول يصلح..ياريت..
مختار "بدينا بالفلسفه":الله يرحمه..
عزيز:اللهم آمين..
ع جية فاتن اللي وين وصلت في مختار قالت..
/عزيز مرت بوك وضعها مش تمام مش مريح..
وصابرين مركزة معاها..
مختار:برا شوفها وشوف خوتك..
غير عزيز نظره لمرت بوه وخوته الصغار..زاد وجع قلبه..
ناض ومشالهم...
وتقعمز فاتن مكانه...
صابرين رفعت حاجبها تعجبا وهي تشوفلها..
فاتن:معاش نشوفوا فيك ولانسمعوا في صوتك..
مختار:انتي اللي خطيتي فينا العيد هدا..
فاتن؛ماكانتش عندي نيه نحضره هني مع صحباتي جوه احلى..
مختار رفع حاجبه وقال..
/ربي يخليك لصاحباتك..
قربت منه وقالت بصوت منخفض..
/ويخليلك..
بعدين تباعدت..
هو رفع حواجبه الزوز هالمرة تعجبا وشافلها..
وهي غيرت نظرها عنه وقعدت توزع فيه قدامها..
حرك عيونه القدام بعد ماارتسمت ع وجهه ابتسامه خفيفه جدا..
صابرين؛مختار..
شبحلها طول..
صابرين؛حاسه روحي بنرقد عيوني بيتسكروا..
هز راسه بعدين قال؛نوضي..
ناضت وهو ناض بعدها..
وفاتن تشوفلهم بحده..
خدي مختار صابرين من يدها ومشي يسلم ع اهل العزي..
بعدين طلع بيها وهو متجاهل فاتن..
خلاها منغاضه..والغيره تاكل في قلبها..
🍃🍃🍃🍃🍃
في كوجينه حوش لطفي الواعر..
كانت مطيره دير في القهوة تحكي لسميره اللي كانت مقعمزه حداها..
مطيره؛فرق العمر كبير هلبه ياسميره..
سميرة:مامنهم متزوجين وبيناتهم نفس الفرق وعايشين احلى عيشه..
مطيره؛ع قيس عيشة بنت خوي..
سميره:نهارك! تساوي في خوي بهداكا !
مطيره؛مانساوي في حد بحد لكن فرق العمر هلبه وامها سكرت ع الموضوع .
سميره:طز ماخاسرة الا هي..
ضحكت مطيره وقال..
/يبي قص لسانك..
سميرة:وجعني خوي الحق باين عليه حاط عينه عليها وعاجباته..
مطيره؛يجيه خير منها البنيه مش ليه بكل..دلوعه ومايعجبها شي يتعب معاها..قوليله يختار وحده قريبه عليه في العمر وبعقلها..
سميره:يللا نصيبه ع ربي صغيره كبيره اللي قاسمهوله ربي ياخده..
طفت مطيره ع القهوه وقال..
/عليك نور..هدا الكلام اللي ينقال..
ومشت تصب القهوة في الفناجين..
قعدوا ساكتين شويه بعد سميره قالت..
/ايه حقه شفت جاركم راجل العنقروفه..
شهقت مطيره وشافتلها وهي تقول..
/غبر فيك! قصدك شايفك جايتنا..
سميره حركت حواجبها ردا عليها..
مطيره وهي مركزه ع ملامحها؛شن الشبحات هادي!يانهارك يادعوة واخده الموضوع جديات!
سميره:باهي وعلاش لا!؟ راجل ربي عاطيه وعنده مراة مدرهتله كبده علاش مايعيشيش حياته مع مراة فرفوشه تحب الحياة وتحببه فيها..
مطيره جتها وهي تقول..
/ياعطك حبة في لسانك..فوتيه خيرلك وفكينا من بلاهم تو يديرونا باعتينك!
سميره بملل:باهي خلاص اسكتي ماصار شي كلها شبحه ومش كامله يخي..وبعدين اني نبصر بصارة تعرفي بصارتي ماتغبيش فيها..ناضت وقالت..هي جيبي السفره والحقيني طول بش تحضري هزيبة بنت خوك..
ومشت طلعت..
مطيره وهي تبع فيها بعيونها:ياحليلي ياحليلي نعرفها اني مش حتهني روحها...
🍃🍃🍃🍃🍃
الساعه 9:30ليلا..
في مطعم ربيع..
كانوا مقعمزين ع وحده من الطاولات هو وعبد القيوم وهما يتكلموا عن وضع ربيع المادي..
ربيع:اللي مريحني شويه اني سددت اللي عليا من ديون مافي عندي ليه حاجه..
عبد القيوم: احسن شي قول الحمد لله..ياما من الناس كملت عمرها في الحبوس..
ربيع بضيق؛الحمد لله..ماقلت شي..لكن تعب سنين هدا احلى سنين عمري راحت في الخدمه عليهم لين كبرت الشغل ودرت لروحي اسم وكل شي راح في غمضة عين..
عبد القيوم:عندك حق توجع لكن قدر الله وماشاء فعل..
تنهد وقال:ونعم بالله..لكن تعرف اللي صار كله مدبر في حد حفرلي..
عبد القيوم:واضح من البدايه واكيد منافس..
ربيع:ع قد ماحاولت ندور ونتحرى ماقدرت نوصل لشي..
عبد القيوم؛وكل امرك لله ماتعرفش مرات خيرتك فيها فكر تكبر شغلك هنا المشروعات اللي من هالنوع رابحه مليون في الميه بالذات مع واحد عنده خبرة زيك..
ربيع:حاليا ماعندي شي ومانقدر ندير شي..
عبد القيوم:ربيع..راني خوك تبي مني اي شي قولي طول ..
ابتسم ربيع وقال:عارفك ماتقصرش في الوقت الحالي مش مفكر في شي..مرر نظره حواليه وقال..مكتفي باللي عندي..
عبد القيوم؛ربي يباركلك..وكيف ماقتلك يجي في بالك شي تجيني طول..
ربيع بضحكه؛ياسيدي من غير ماتوصي اكيد بنجيك طول مانتحشمش اني..
عبد القيوم؛حتى اني عارفك غير قلت ندير البرتوكول بس..
ضحك ربيع..
وعبد القيوم اكتفي بإبتسامه..
🍃🍃🍃🍃🍃
"اما عمي هدا..مافيش منه امل بكل"
مطيره؛مرض ويجري في الدم مالاش علاج..
فردوس:اني لتوا مصدومه في خالتي صفيه مش قادرة نصدق ان هي نفسها مرت عمي اللي زمان الحنينه الطيبه اللي كانت هي وامي تقول توامه كيف ولت هكي بس..
مطيره؛مافي حد يقعد ع حاله..
فردوس:صدقتي...ايه حقه حسيت صاحبتك واطت عليا عينها..
☘وهما منسجمين في هدرزتهم مع بعض في الكوجينه..
خشت عليهم اريج بتشرب ميه..وهما ماحسوش بيها..
مطيره:طبيعي تحرج شويه بعد رديتي خوها لكن ماتخافيش ماطولش
اريج بفضول؛قصدك ابله سميره خطبت وجده فينا لخوها!؟
مطيره بفجعه؛العفو امتى خشيتي!!؟
فردوس؛ان شاء الله تتصني!
اريج بإرتباك:لالا والله لا خشيت نشرب ميه
مطيره:باهي خلاص مايصير شي كان قلنالها..ياحنه خو خالتك سميره كان حاط عينه ع الاء وقال يبي يخطبها..
اريج وقتها حست بشعور سيء لكن ماكانش مفهوم بالنسبه ليها..
مطيره:وامك قالت لا ع خاطر فرق العمر..
فردوس بتهكم:بري خبريها..
اريج؛من امتى اني هكي يام!..مش حيطلع مني شي..
فردوس:اصلا اختك بروحها ماترضاش..
مطيره؛هديكا تبي تهج وخو سميره قاعده هني صامد..
اريج تهكما:صح..مش من نوعية الاء المفضله..
ومشت فتحت التلاجه وطلعت الشيشه متاع الميه..
فردوس؛يللا اللي فيها الخيره يجيبها ربي..
مطيره؛امين..هي خلي نمشي نوتي روحي ونمشي لحوش جدك..
وناضت ومشت طلعت من الكوجينه..
فردوس:مشناه حوشنا وعمتي مش فيه..
اريج بعد ماشربت ميه قالت..
/اللي يسمعك يقول في قطع الرقبه!..اهيا يام هني تنقزي من فوق السطح تجي في جنانهم...
فردوس بعدم تقبل:مش زي..
وناضت ضم في الكوجينه..
واريج تنهدت بعدين ردت شيشه الميه للثلاجه ومشت طلعت من الكوجينه لدار البنات..
خشتلها..
لقت طوبى لاهيه ببنتها..
والاء تحتها تستشور في شعرها..
مشت قعمزت ع سريرها وهي تتفرج ع آلاء ولاول مرة في حياتها تحس بشعور الغيره ناحية اختها..
سكرت الاء مجفف الشعر..وقعدت تلم في شعرها وتفرد وهي تقول..
/شفتوه كيف ولى..
طوبى شافت لشعرها..
الاء؛زاد طول وتعبا ويلمع لمع..
اريج؛قصدك من الخلطه هديكا؟
الاء؛ايه..مع المداومه عطي نتيجة تجنن تشوفي فيها..
طوبى حطت بنتها في سريرها وهي تقول..
/صح اي خلطه للوجه ولاالشعر مع المداومه تعطي نتيجه حلوة..وقعمزت ع سريرها..
الاء لمت شعرها وهي تقول؛مدام الضي قاعد خل نرقد تحت المكيف قبل ليهرب..
بعد مالمت شعرها..حطت كريمات ترطيب ع وجهها وايديها بعدين خدت تليفونها ومشت طلعت..
اريج؛تعرفي بيبو..اللي زي الاء ديما عندهم حظ في الدنيا..
استغربت كلامها..
اريج؛ماتفكر في حد قد ماتفكر في روحها وراحة بالها كان خشت في كآبه فيسع تطلع منه..كان خسرت حاجه مهما كانت غاليه تزعل عليها شويه وتنساها بعدين للأبد همها الاول راحتها النفسيه..
طوبى ماعلقتش ع كلام اريج لكن قعدت تفكر فيه..
تنهدت اريج بحسره بعدين عطت خالتها بظهرها ورقدت...
وخلتها تفكر في كلامها هلبه..شويه ناضت ومشت وقفت ع المرايه..
حولت بكلة شعرها"التوكه"..
وحطاته ع جنب وقعدت تشوف فيه..كانت لولماته كله مع يعضه يجي خصله غليظه..متقصف شايب..
غيرت نظراتها المتحسره عنه لوجهها..اللي كان شاحب..تحت عيونها هالات سود كبار..ملامح باهته مافيهاش حياة..
تفكرت كلام سالمين ووصايا سالمين..
كلام حلو..محفز اثر فيها بس ماقدرش بحفزها...
التفتت لسرير بنتها والدموع نزلوا من عيونها وهي تقول في نفسها..
"مشنوق وباله في حلوى..توا انتي وليتي ام اخر همك نفسك واول همك بنتك..بنتك اللي حتقعدي تربي فيها بروحك وتحاربي بش تقعد عندك..بالك في كلام فاضي لايقدم ولايأخر"
رجعت لمت شعرها..ومشت قعمزت قريبه ع بنتها..
شغلت تليفونها ع القرآن وحطت السماعات وغمضت عيونها وراحت مع الآيات لين خداها النوم...
🍃🍃🍃🍃🍃
"غبارة مغبره..معقوله!!؟"
اميمه بضيق؛زيك لتوا قاعده مصدومه..وبوي قريب يهبل تعرفي بكري اتصل يوسف يسأل وين رد عليه هزبه ومسح بيه..
مطيره بشفقه؛ياروحي وليدي..
اميمه بألم؛والله ياعمتي من بكري واني ندور بيناتهم نراقب فيه خوف تصيرله حاجه..ونكلم في يوسف ومش قادره نوصل فيه..
مطيرع:سلم بنيتي الهي في قرايتك وخدمتك وماعليك في حد ..امك حتعيش احلى عيشه مع مليونير الغفله..وبوك غير يشد صحته مزبوط يولي يلم الفلوس وياخد عليها..ويوسف برا منغنغ يخدم ويخلص باليورو شن خاصه..قعدتي غير انتي تخممي فيهم..خممي في روحك وفكري في مستقبلك والقلب اللي تقلب..
ضحكت اميمه غصب عنها وقالت..
/ياريتني زيك..
مطيره:لاياعمري مطيره علي الواعر وحده بس..
ضمتها اميمه وقالت..
/استاحشتها موت..
ضمتها مطيره وقعدت طبطب عليها وهي مبتسمه بتعاطف وحب...
🍃🍃🍃🍃🍃
"البنت رافضه ولاامها!؟"
سميره:اللي فهمته الزوز وعمتها قالتلي بروحها البنت مدلعه ومايعجبها شي..
هو استغرب لأن اريج مش باين عليها الوصف اللي سمعه..
سميره؛نشوفوا غيرها وخيي..
اسكندر بضيق:لاغيرها ولاشي..خلاص معاش نبي..
وناض من حداها وخلاها تقول بحزن..
/ افف ماصدقت قال نبي نتزوج الله يسامحك يافردوس انتي وبنتك...
🍃🍃🍃🍃🍃
خشت عليه الدار لقاته كيف جاي بيرقد..
نجاح؛واخيرا رقد قعد يحكيلي ويعاود شن درتوا في البحر لين نفخلي راسي..
ضحك عبد الحفيظ وقال..
/نفاخ كبير قعمزت حداه ع السرير وقالت..
/لاماتقولش عليه هكي..
هو بتعجب ضحك وقالت..
/انتي اللي قلتي..
هي قالت..
/اني نقول لكن انت لا..
قعد يضحك..
وهي قالت:غير اسمع..
هدا ضحك وقال؛نعم؟.
نجاح؛في بالي نعزم خوي عبد الفتاح ومرته التانيه..
هو قال؛هدا حوشك اعزمي اللي تبيه لكن مش خايفه امك كان عرفت تحرج؟
نجاح؛لالا ماتحرجش امي المهم عندها ماتواصلهاش..واني الصراحه فكرت هكي ع خاطر خوي مانبيش يقعد مضايق ومهموم..
عبد الحفيظ؛ماعندكش مشكله في أي يوم تبي اعزميهم..
نجاح:إن شاء الله...
عبد الحفيظ؛هيا تصبحي ع خير اني خلاص..
وعطاها بالظهر ..
هي قالت:قدامك كل خير..
بعدين ناضت خدت المصحف والمسبحه..ومشت طفت الضي وطلعت من الدار..
🍃🍃🍃🍃🍃
"بترقد من توا"
الشارف:تاعب ومرهق الحق مش قادر نحل عيوني..
عواطف بضيق:باهي براحتك..
هو قال؛سامحيني ونعوضوها ان شاء الله ..وغطا نفسه بالشرشاف..
وهي مشت للطاوله الرومانسيه اللي كانت مجهزتها ومدايره فيها كل شي من الفجر..موالح وكيكه ريد فلفت هو قبل قاللها انه يحبها..وقعدت تلم فيهم بالحاجه وترفع للكوجينه..
ودموعها ينزلوا..
بدت شويه شويه تحس انها فاقت من حلم حلو هلبه مالحقتش تعيشه فيسع فاقت منه..
واكثر هاجس مرافقها توا..انها تخسر فرصتها في الامومه..
🍃🍃🍃🍃🍃
ويطلع صبح يوم جديد...
السبت..
25اغسطس من سنة 2018..
في الشركه الهندسيه اللي تحت ادارة نجاة..
كانت مقعمزه تخدم في مكتبها.
فجأة دق باب الحجره..
هي ولاهيه قالت..
/تفضل..
انفتح الباب..رفعت عيونها وشافتله..وتجمد في مكانها..
ويتوسعوا عيونها..وقلبها يبدا يدق بقوة..
الجالي سكر الباب وقال..
/دخلتني منى طول قاعده تشوف في المدير والمكان مكاني..
ونجاه زي التمثال مش قادره ترمش..
قدم وقعمز ع كرسي مقابل المكتب وقال..
/مش جاي نعارك..ولاجاي نبارك..جاي نشوفك وانتي واصله اللي تبيه..تتفكري اول مرة جيتيني هني وكنتي هني في مكاني هدا شن قلتي وانتي تتحدي..جايه تاخدي مكاني
.وصار وخدتيه..بس اي كانت الطريقه اللي وصلتي بيها لهالمكان ماتهمنيش ولاالمكان كله ع بعضه ولى يعنيني في شي..اني توا وليت اكبر من الكرسي هدا ومن المكان كله وماعنديش مشكله من ياخده بعدي..
ولا كلمه قاعدة تشوفله وبس برغم تغير ملامح وجهها للحده والعيون مليانات دموع..
ناض وقال:موفقه باش مهندسه..وان شاء الله تلقي نصيبك..
وضحك بسخريه..بعدين مشي طلع من المكتب وخلاها تبكي قهرا..لكن من غير صوت شهقات وعبرات مكتومه...وقاعده تفتح وتسكر في صوابع ايديها من الانفعال..
🍃وهو بعد ماطلع من الشركه..
توجه بطريقه لمكان ماكانش متمنى يمشيله لكن الظروف حكمت...
🍃مكتب محاماة..
لمحاميه دلاته عليها اخته خديجه..
اسمها امتنان...امتنان نصيرة الرجل بالدرجة الاولى..بس ماعندهاش مشكله تاخد قضيه لمراة مادام حتدفع الاتعاب..
تفكيرها اقل مايقال عنه انه شيطاني..وماتخدمش بالقانون اللي قراته بس..بل عندها اساليب تانيه تخليها تربح اي قضيه صاحبها ظالم او مظلوم مدام حتكسب من وراها..
🍃"الجالي شنيبه جيتك من طرف خديجه شنيبه اختي"
امتنان:امم..خدتلك موعد امس..وحكتلي رؤوس عناوين ع اللي صاير معاك وقالت يبي استشارة فقط لاغير..
هو قال؛مزبوط..
امتنان؛عندك وقت تحكيلي القصه بالتفصيل..
الجالي:اكيد..
امتنان؛نسمع..
🍃🍃🍃🍃🍃
صوت صرخة فرح صدحت في حوش الواعر وكانت من الاء..
لمتهم كلهم عليها
الاء بفرح؛صفيتهم كلهم وبمعدل..ياربي مش مصدقه..
فردوس بإيتسامه؛باهي الحمد لله..
طوبى بإبتسامه؛مبارك للوش ومنها للأحسن ان شاء الله..
اريج بضيق:مازال حني..حاسه روحي بنموت من الخوف..
طوبى:لا الله يبارك شديتي هلبه تصفي بإذن الله..مالا شن نقول اللي مخليتها بالبركه هما 7مواد متأكده اني حنصفي منهم تلاته او اتنين بس..
فردوس:باهي اللي درتيهم اصلا ..
اريج بفجعه؛حيي اماني بعتتلي رساله يارب سترك..
فردوس برجاء:ياربي ياسيدي ياربي ياسيدي..
فتحت اريج الرساله وهما يترقبوا..
فجأه حضنت التليفون وقالت براحه..
/الحمد لله ياربي..صفيتهم كلهم والتراكمي ممتاز..
ضمتها الاء وهي تصيح بفرح..
بعدين ضمتها طوبى وهي تباركلها..
وفردوس قالت بفرح:الحمد لله رب العالمين..شافت لأختها وقالت..قولي للبنات يشوفولك..
طوبى بضحكه احراج:شن بيشوفوا مافي مايشوفوا..
الاء:عرفتيها انتي؟
طوبى:لاوالله..لكن متوقعتها..بكري كلمتني عبير قالتلي تو نشوفلك..ندعي ان شاء الله مخليه خمسه بس مش كلهم..
ويسمعوا صوت رنة تليفونها..
خدت نفس وقالت؛شكلها هي..ولفت ومشت للكوجينه...
اريج؛جيبيه هني..
طوبى؛باهي..
فردوس:يارب اجبر بخاطرها يارب..
الاء واريج؛آمين..ان شاء الله..ياربي..
ع جيتها بالتليفون..فتحت الخط والمايك وقالت..
/السلام عليكم
"وعليكم السلاام بيبو شن جو؟"
طوبى:جو الخوف..هاه شني؟
"امم هو راهو يعتبر انجاز بيبو تعوضي الباقي السمستر الجاي ان شاء الله"
وجه طوبى انخطف لونه وبان عليه الضيق وهي تقول..
/قعدوا خمسه ولا؟
"لا..سته"
غمضت طوبى عيونها بأسف شديد..
واللي حواليها ضايقوا هلبه ع خاطرها..
خدت طوبى نفس وفتحت عيونها وقالت برضا وتسليم..
/اني حاولت ندير جهدي وضغطت ع روحي هلبه لكن قدر الله وماشاء فعل تتعوض ان شاء الله..
"وووه يافرخه ياسوسه انتي فوتيهم طروح السوس"
هما استغربوا كلامها وطوبى انصدمت بكل..
"تي يابنتي صفتيهم كلهم واعلى معدل في القروب متاعنا معدلك انتي."
طلعت من صرخه عدم تصديق وحطت يدها فمها وهي مصدومه..
تشوف بنات اختها يصفقوا بفرح وهجموا عليها حضنوها..
واختها اللي دمعوا عيونها تقول..
/الحمد لله يارب..
اما هي في عز صدمتها كان في حديث يدور في نفسها مع اللي كان المسبب لهالفرحه اللي هي فيها..
"مش مصدقه ياربي كيف هكي!!اني صح تعبت وقريت لكن ماتوقعتش ننجح هكي..ياربي مش عارفه شن نقولك ولاشن نديرلك مش قادره نعبر..اللي انت درتهولي توا دار فيا هلبه ياربي..نحبك نحبك هلبه"
🍃🍃🍃🍃🍃🍃
"كله اوهام من راسها مافيش منها ع ارض الواقع.."
امتنان؛انتي قلت انك ماقصرتش معاها في شي؟
هو قال؛والكل شاهد ماليها قبل ماليا..
امتنان؛هي رفعت عليك دعوة طلاق؟
هو قال:لا..بس اني نفكر نرفع عليه دعوة الرجوع لبيت الطاعه..
امتنان؛مش حتستفيد شي حتخليها ترفع عليك قضيه طلاق تبطل القضيه هادي..
الجالي بضيق:اني نبي بنتي..
امتنان؛بنتك بس..
الجالي:هي وامها..
امتنان:امها متمسكه في الطلاق لو صار ورفعت قضيه طلاق شن حدير؟
الجالي؛حندير المستحيل بش مانطلقهاش ولاننجبر عليها..
امتنان؛فرضا انجبرت..
الجالي؛اني جايك بش تعطيني حل..
هي قالت؛في حال صار في قضيه ووكلتني حتطلع منها رابح وبنتك معاك..بس مادام جاي في استشارة فحنشور عليك انك تتصرف بذكاء وعقلانيه وتخلي الامور تجي لصالحك معاها هي..خليك الفترة هادي مهتم ببنتك مادريش اي مشاكل ماتخلي حد من عيلتك يدير معاها مشاكل لازم تخفف من غضبها اتجاهك وتضغط عليها ببنتكم..ونقولك كيف..اهتمامك ببنتك حتى لو كان من بعيد حيهديها اتجاهك و ممكن يحسسها مع الوقت ان البنت حتحتاج بوها هلبه مستقبلا ممكن تبدا تفكر في مستقبل بنتها وتبديه على كل شي وترضى توليلك..
الجالي:ع هكي نبي وقت..
امتنان؛لو صار وولى بينكم قضايا حتاخد وقت اكثر ممكن 3سنوات..
هو زاد ضايق اكثر واكثر..
امتنان:اسمعي نصيحتي وامشي بيها..وحاول ماتجيبش لروحك شبهات ولامشاكل..
هو فهم عليها وماعلقش..
امتنان بإبتسامه ثقه؛وفي حال صار قضايا..بعدين لكل حادث حديث..
🍃🍃🍃🍃🍃
"حمد لله ع السلامه حمد السلامه"
المريضه ردت بإبتسامه..
/الله يسلمك يادكتورة..
اميمه بإبتسامه:شن حالك توا؟.
:الحمد لله..الحمد لله خير من قبل بوين..
اميمه:الحمد لله..وربي يتمم عليك بالشفاء..
وسام:قبل العمليه كانت تقرا ع مكان الوجع قالت خديتها من الدكتورة اميمه..
ضحكت اميمه بإحراج والمريضه قالت..
/ربي يكثر من امثالك معامله واسلوب ماشاء الله وعارفه شغلك..
وسام كان يتأمل فيها بنظراته الخبيثه وهي محرجه..
بعدين اميمه قالت:تسلمي يارب فالنهايه هدا واجبي..المهم توا بنقولك ع حاجات لازم تمشي عليهم..القولون او البطلن بكل مافيها معده وامعاء والخ..تبي نظام غذائي صحي مافيش باس لو مرة مرة طلعتي عن النظام لكن ما تبدليش النظام الصحي بالعادات السيئه في الماكله..
ركزي ع خضرا والفواكه بالذات الخضراء..الميه ثم الميه ثم الميه..راهو الميه اكثر شي يرفع المناعه..وتساعدع نظافه الاامعاء والمعده..اشربي ميه هلبه وماتشوبيش من اي شي صدقيني كله يهون قدام الالم اللي كنتي تحسي بيه..وفي حاجه تانيه مهمه...
المشي..امشي هلبه..راهو المشي فوائده رهيبه..خير من الرياضه التانيه والجري.. .خلي نصائح هادم اسلوب حياة وبإذن الله حتمشي امورك تمام مع العلاج..
:ان شاء الله دكتورة..
اميمه بإبتسامه لطيفه؛ماتشوفي باس ان شاء الله والحمد لله ع سلامتك وان شاء الله ربي يمتعك بالصحه والعافيه ومعاش تخشي مستشفيات مرة تانيه..
:ان شاء الله..بارك الله فيك ويرحم والديك..
اميمه:والدينا ووالديك ان شاء الله
.السلام عليكم..
ومشت بتطلع ووسام قال..
/السلام عليكم..
وطلع بسرعه لحق ع اميمه..
وصل فيها وقال..
/تعرفي من لما جيت هني مامرتش عليا وحده زيك..
اميمه مابتش ترد قعدت ماشيه في طريقها..
وسام:جديات..ربي يكثر من امثالك بش قطاع الصحه يتغير حاله..
وصلت في المصعد وقفت قدامه وهو جي جنبها..
انفتح الباب وخشت وهو خش بسرعه..
هي ارتبكت وخافت وكانت جايه بتطلع لكن الباب تسكر..
قوت نفسها بش ماتخليشي يحس بخوفها..ضغطت ع زر الدور اللي تبيه..
وسام؛اميمه..
هي بحده:لو سمحت ماتتمداش..
وسام؛انتي عاجبتيني هلبه الحق..
اميمه بإنفعال؛احترم نفسك..
جي بيقرب منها وهو يقول..
/خليني نشرحلك قصدي قبل..
اميمه؛قسما بالله حركه تانيه تشوف مني اللي عمرك ماشفته..
بضحكه قال:زدتي عجبتيني اكثر.
وشد يدها بقوة فكتها وقالت بصوت عالي..
/حول ياحقير..
ويوقف المصعد ويفتح الباب..
وبسرعه تطلع اميمه وهو وراها..
وسام؛شن حلال ع غيري وحرام عليا ولاع خاطر مش دكتور كبير مانحصل شي.
اميمه انصدمت في اللي سمعاته حست بالموت جاها..
وسام؛علاش اطلقتي انتي ماهو كنتي عايشه جوك مع قصي ولما طلعت ريحتك طلعتي من مجموعته وخشيتي مع خالد وحتى هو حطيتيه في جيبك وين تجي عندنا حني تستشرفي..
حست اميمه جسمها كله صقع من اللي تسمع فيه..
زادت سرعه خطواتها لين طلعت برا وهو مازال وراها..
وسام:اسمعي راهو حتى اني نعجبك وجيبي مليان وعندي معارف..عطيني اللي نبيه وخودي مني اللي يخطر ع بالك..
وتوقف في مكانها وتلتفت وتضربه كف..
صوته انسمع في المكان كله..
اميمه بحقد:ياوسخ ياوضيع يافاسد اشكالك انت مش هدا مكانهم يا نجس..
هو بغل قال:تستشرفي عليا ياكلبه..وجاها وكان ناوي يضربها..
ومايندريش علي روحه الا وهو معزوق ع الارض وتنهال عليه الضربات في كل مكان..
عمر وهو يضرب بغله..
/بري..ماتقعديش هني.
هي اللي كانت ترجف بكل مافيها هربت تجري وتباعدت عنهم ووقفت في مكان تقدر تشوفهم منه..
والتمت عليهم المستشفى بالأمن والكل يحزوا..
واميمه تبكي بصدمه من اللي صار واللي قاعد يصير...
🍃🍃🍃🍃
وانشدوا الزوز...وداروا معاهم تحقيق..
وفي من ناس شهدت ان وسام كان يتحرش لفظيا بأميمه..
☘اميمه اللي حست ان معاش في عندها مكان في المستشفى بعد اليوم ...خدت كل شي يعنيها ومشت طلعت من المستشفى...
ركبت سيارتها وتحركت...وعمر اللي كان خايف عليها لحقها...
#اساروف
#طوبى
....يتبع....
