■■■■■■■■■■■■■■■■■■■■
❎تنويه❎
بعض احداث اقسام جزء #منازل_القمر صعبة ومرهقه نفسيا
#طوبى "جنة طوبى"
#جمان_فريد
#الجزء_116"منازل القمر"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#تاج_الذكر
لاإله إلا الله وحده لاشريك له له الملك وله الحمد وهو على كل شيء قدير.. 🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 لا أعلم مالذي فعلتهِ بي حتى تسوقني إليك أفكاري رغماً عني🍃
_________________________________________
حطت طاجين الدجاج في فرن الغاز وسكرت عليه وهي حاطه هاتفها ع وذنها تسمع لخوها..بعد ماكمل كلامه قالت..
ايمان بأسف..
/لاحول ولاقوة الا بالله حالها يقطع القلب المراة هادي..
"باهي توا قولي بتمشي ولالا؟"
هزت راسها وقالت..
/نمشي..
"تمام وتي روحك العصر نجي ناخدك من قدام الباب وزي ماوصيتك ماتقوليش لزينب"
ايمان:تمام تمام..سكر توا خل نكمل باقي الحوسه..
"ربي يعاون..سلام"
ايمان:سلام..ونهت المكالمه وهي تقول بأسف..مسكينه هالطوبى...
🍃وطوبى..فهالوقت كانت في حجرتها فالمصحه مقعمزه ع سريرها ولاهيه بالهاتف..
حاطه ع صفحتها "حنة" ناويه تنزل فيها منشور جديد..
موضوع المنشور كان مكتوب في مذكرة الهاتف من مدة طويله وبسبب الظروف اللي مرت بيها اخرت نشره لليوم..
دارتله نسخ ولصق ونشراته...
ع خشة اريج اللي كانت جايبه معاها قهوة من الكافتيريا..
قطعت انسجامها مع اللي دير فيه لما قالتلها..
/قولي من شفت لوطا؟
طوبى:مني!؟
قعمزت اريج ع الكرسي وقالت..
/الدكتورة منيه..
عقدت حواجبها وقالت..
/منيه بنت ابله جميله؟
اريج:ايه..لكن مش هني المفاجأه المفاجأة اني شفتها واقفه ع اميمه..
رفعت طوبى حواجبها تعبيرا عن مفاجئتها باللي سمعاته..
🍃في الدور الاول..
كانت اميمه طالعه مع منيه لحديقه المصحه بناءا ع طلب منيه..
قعمزوا ع وحده من الكراسي الرخاميه واميمه قالت..
/تفضلي..
وخرت منيه شعرها ورا وذنها وقالت بشي من الربكه..
/مش عارفه منين نبدا كلامي..تنهدت وقالت..اني شفتك مرة وحده وفي هديكا المرة خطر عليا نسألك هلبه اسئله بس الوقت ماكانش مناسب وبعد مافاتت المده هادي كلها وصارت فيها هلبه حاجات منهم حاجه متعلقه بمستقبلي لقيت اني لازم نسألك نفس الاسئله اللي خطرت عليا وقتها..
☘حست اميمه ان منيه مرتبكه وملخبطه ومحرجه ومش قادرة ترتب افكارها لهذا حبت تخفف عنها وتسهل عليها لما قالت..
/في بينك انتي وعمر شي!؟ ضحكت وقالت..علاقه حب يعني..
ضمت ايديها لبعض وقالت..
/مش بالزبط..علاقة صداقه مش حب لكن الفترة الاخيرة بدت تتغير وبدي عمر يلمح ع الارتباط الرسمي قصدي الزواج والصراحه..حمحمت ووجهت نظرها القدام بعدين رداته لاميمه وقالت..اني متردده وخايفه ومش قادرة ناخد قرار..اهلي رافضينه وكل اللي حواليا يقولولي فكك منه هدا مالقوش فيه الخير المراة اللي كان يحبها وبنت خاله بتلقيه فيه انتي!؟
شافت اميمه لإيدين منيه وهي تفرك فيهم ببعض بعدين ردت نظرها لوجهها لما سمعتها قالت..
/هو ولد جيرانكم واكيد تعرفيه كويس وقبل كنتي مرته..تنهدت وقالت..يعني لو طلبت نصيحتك بشن تنصحيني!؟
ضحكت اميمه بعدين قالت..
/اني اخر وحده تطلبي نصيحتها لأني معاش نعرف عنه شي سامحيني مانقدرش نساعدك..
فكت منيه ايديها من بعض ووجهت نظرها القدام وع وجهها بدت ملامح الضيق..
اميمه:عندي ليك نصيحه وحده بس..استخيري..
ابتسمت مجامله وهزت راسها مسايرة بعدين شبحت لاميمه وقالت..
/بالله شن حال طوبى انقطعت اخبارها..معاش كلمناها ولاهي كلمتنا...
اميمه:راقده في المصحه..
اختفت ابتسامة منيه..
اميمه بنظره ليها معنى شافت لمنيه وقالتلها..
/قاعده لتوا تعاني من الجالي..
تسارعت دقات قلب منيه خوفا..شافت لعيون اميمه لحظات وهي تحاول ترجم الكلام اللي فيهم ولما فهماته نزلت عيونها تحت وقالت بضيق..
/ربي يكون في عونها..
*********
اميمه بضيق:وجعتني حسيتها طيبه وع نياتها..
اريج:صح هدا علاش نصحتها قبل تفوته عمر هدا..
تنهدت طوبى وقالت..
/مانبيش نظلم عمر لكن في نظري منيه مازال تستاهل احسن من هكي..
اميمه وهي تشوف للفراغ بنظرات ألم قالت..
/هدا علاش حاولت نحذرها..مانبيهاش تشوف اللي شفته..
شافوا اريج وطوبى ملامح الالم ع وجهه اميمه توقعوا اللي خاطر ع بالها في هاللحظه..
🍃الذكرى المؤلمة اللي حتقعد طول عمرها تتفكر فيها...
"بنتك هادي لازم ديرلها حل يابوي"
هادي نسرين تكلم في بوها وهي راقده في دار المعيشه من التعب بسبب الضرب المبرح اللي تلقاته من اختها..
نسرين وهي تبكي..
/شوف وجه سميره شوفه استزرق لون خدها من الكف اللي كلاته..
سميره جنبها كانت تشوف لراجلها بضيق وقلق..
باين ع وجهه ملامح التعب مع الهم خايفه عليه يصير فيه شي..
مسح ع وجهه بعدين رفع عيونه فوق وقال..
/شن داير تحتك ياربي بس!
سميرة بضيق:صل ع النبي يامحمد..
تنهد بقهر وقال..
/اللهم صل وسلم عليه..عقد حواجبه وكمل يقول..غير نطلعوا من مصيبة الجالي بنديرلها حل طول البنت هادي معاش تقعد هكي..
وناض ومشي طلع من حداهم ومرته ناضت وطلعت وراه..
اما نسرين طلعت مرايه من تحت المخده وقعدت تشوف في ملامح وجهها فيها وهي تقول ببكي..
/ياغبارتي كان يشوفني ربيع هكي..شن بنقوله شن بنقوله ياحشايمي!..
🍃الحشايم اللي شهدوا عليها الجارات ولت حديث شارع القهوة..
رقيه شدت التليفون وماخلت بمن اتصلت من نساوين الشارع وخبرتهم باللي صار وحطت لمساتها ع الخبر..
والجارات ماكانوش خير منها حتى ان وحده فيهم تربطها علاقه قويه بأم ربيع طول اتصلت بيها وحكتلها..
وام ربيع بعد مانهت معاها المكالمه اتصلت بولدها..
******
"باهي اني جايك توا نشوفك"
نسرين وهي تحاول تكون عاديه..
/ربيع مش مصدقني!!؟
"لامصدقك غير نبي نطمن"
سكتت نسرين شويه وهي في قمة الضيق بعدين قالت..
/خلاص تعالى العشيه..
"تمام العشيه جايك..سلام.."
ونهي المكالمه وهي نزلت الهاتف وقالت بقهر..
/الله لايسامحك ياخديجه..
🍃🍃🍃🍃
الساعه 5:00عصرا..
بعد ماصلوا طوبى واريج العصر فتحت معاها طوبى موضوع يخص..
🍃طوبى:نبيك تشديها معاي بنعطيك المذكرة اللي كنت نكتب فيها الاقتباسات والشرح متاعهم وانتي تنزلي كل اسبوع تلاثه مناشير..
اريج:علاش انتي بتسيبيها!؟
طوبى:لامش هكي..بس مانعرفش مرات القدام مايكونش عندي مزاج نفتح فيس زي ماصارلي قبل مانبيش عمل الخير هدا ينقطع..واهو نتقاسموا اجره..
ابتسمت اريج وقالت..
/تمام..ايه ع سيرة المذكرة..جبتلك مذكرتك هديكا متاع يومياتك..
بدت ع وجهه طوبى ملامح الالم وهي تتفكر شن دارت في بنتها ع خاطر هالمذكره...
حركت راسها بالرفض وقالت..
/معاش بنكتب فيها تو نشري غيرها..
اريج وهي تشوف لملامح الضيق ع وجه طوبى قالت..
/باهي..
ويدق باب الحجرة..
تنهدت طوبى وقالت..
/ان شاء الله مش زيارة..
اريج مشت فتحت الباب وطوبى تشوفله،تلقائيا ارتسمت ع وجهها ابتسامه حلوة لما شافت اللي خشت عليها..قالت بنبرة حلوة..
"أمينه"
امينه نزلت الكمامه وهي تقول بإبتسامه..
/طوبى ياحبيبتي..
قدمتلها ولما وصلت فيها طبست عليها حضنتها وطوبى ضم فيها بقوة..
امينه:حمد لله ع سلامتك ياحبيبتي..
طوبى:الله يسلمك..
بعدت امينه وهي حاطه يدها ع كتف طوبى وقالت..
/سامحيني تأخرت عليكي بس والله مش بإيدي تعبت كثير عشان اقنع استاذ مختار يخليني ازورك..
هي قالت:ماعليكش لوم حتى لو ماجتيش بكل..
امينه بإبتسامه حب..
/ازيك دلوقتي!؟
طوبى بإبتسامه:الحمد لله كل يوم في تحسن..
امينه:الحمد لله..رن هاتفها عرفت المتصل وقالت بأسف..الاقجم بيستعجلني..ع فكرة بيسلم عليك ويقولك لاباس..
ضحكوا اريج وطوبى..
طبست امينه ع طوبى باستها من خدها بعدين قالت..
خودي بالك من صحتك ياحبيبتي ربنا يشفيك ويعافيك..
طوبى:سلمك ياامونه..
امينه بإبتسامه..
/اشوف وشك بخير..سلام عليكم..ولفت ومشت طلعت بسرعه..
وهماردوا عليها:وعليكم السلام...
مشت اريج سكرت الباب بعدين ولت لطوبى وهي تقول..
/وجهها مريح..
طوبى بإبتسامه:حنينه هلبه وتخش القلب..
ويدق الباب مرة تانيه..
طوبى:ان شاء الله حد حلو زي امينه..
ضحكت اريج ومشت فتحت الباب..
لما شافت طوبى اللي خشت منه بدت ع وجهها ملامح ابتسامه مجامله..
كانت ايمان اخت عدي..سلمت ع اريج بالكلام وصوتها كان مكتوم بالكمامه..
ولما قدمت لطوبى وقفت قريبه عليها نزلت الكمامه وقالت..
/لاباس عليك ياطوبى..
طوبى بإبتسامة مجامله..
/لايوريك باس..
ايمان:اليوم بس سمعت..
هزت طوبى راسها بصمت..
ايمان:شن صارلك بالزبط؟
طوبى:هبوط ضغط وفقر دم مخلطه والحمد لله ع كل حال..
ايمان:يقولوا مضاعفات كورونا..
طوبى:امم..مزبوط..
تنهدت ايمان وقالت..
/قبل بتجي معاي زينب لكن انشغلت بشويه امور..
ابتسمت طوبى وقالت..
/مش مشكله..
حمحمت ايمان وقالت..
/اني عندي خلفيه بالمشاكل اللي صارت معاك وحكيت لصاحبتي الدكتورة مريم وهي قالت تبي تهدرز عليك شويه..
طوبى:حتى اني نبي نهدرز عليها تو نكلمها وناخد منها موعد بعد مانطلع ان شاء الله نمشيلها..
ايمان بإبتسامه..
/كويس هلبه..انتي انسانه قويه وواعيه ياطوبى حتتخطي كل المشاكل اللي صايرة معاك..
طوبى:بعون الله..
ايمان:ونعم بالله..
واريج مكتفيه بالاستماع لحديثهم وهي تراقب في ملامح ايمان كان باين عليها الارتباك..
ايمان بإبتسامه..
/باهي لاباس عليك مرة تانيه..
طوبى:لايوريك باس..سلمي ع ابله زينب وقوليلها قالتلك طوبى ماعليك ملام..
قعدت ايمان تشوف لطوبى بإبتسامة ربكه للحظات..بعدين ضحكت بتوتر وهزت راسها وهي تقول..
/تمام تو نقوللها..سلام..ولفت ومشت طلعت وكأنها هاربه..
🍃وهي ماشيه في الممر قالت في نفسها..
"الله يسامحك ياعدي"..
وصلت في المصعد ركباته ونزلها للدور الاول لما طلعت منه شافت زوز نساوين حست روحها تعرفهم لكن هما ماركزوش عليها مشوا خشوا للمصعد طول وهي تسمع في وحده فيهم تقول..
"اميمه تخدم هني"
كملت طريقها وهي تحاول تتفكرهم لين عرفتهم..
بنات الفاندي..اقبال وسعاد..
وصلت في الباب بتطلع..
لقت واحد واقف مسكر عليها الطريق وهو عاطي بالظهر كان يتكلم هاتفيا عن طريق سماعة "البلوثوث"
قالتله..
/لوسمحت..ياخوي..لو سمحت..
هو التفت شافها جو عيونها في عيونه..
تلقائيا لون وجهها تبدل للأحمر وحست بشعور غريب..
ابتسم وبعدلها وقال..
/تفضلي..
نزلت عيونها ومشت وهي مرتبكه..
رن هاتفها حطت يدها في الشنطه طلعاته وطلعت معاه ورقه مطويه طاحت منها بدون ماتنتبه..
هو شافها مشي بسرعه خداها ولحقها وهو يقول..
/ياابله...لوسمحتي..
سرع خطواته لين جي قدامها وقفها ومدلها الورقه وهو يقول..
/طاحت منك..
هي ابتسمت بإحراج..خدتها منه وقالت..
/شكرا..ومشت طول لسيارة خوها..
🍃وصلت في السيارة فتحتها وركبت وهي متوتره..
عدي وهو يشوف للشاب بعقدة حواجب..
/شن يبي منك هدا!؟
ايمان بربكه:طاحت مني الورقه هادي جابهالي..
هز راسه وشاف القدام وتحرك..
وايمان شافت جهة المصحه بطرف العين لقت الشاب واقف يشوفلها بإبتسامه غيرت عيونها طول وهو تبع السيارة بعيونه لين ادرقت..
☘ع جية سيارة حسين درس قدام المصحه نزل منها وسكرها وخش طول متوجه لنفس الشاب..
وصل فيه مد يده وهو يقول..
/ايمن..كيف الحال..
صافحه ايمن وهو يقول بإبتسامه..
/الحمد لله..
🍃🍃🍃🍃
يتفحص في وجهها المعبي زينه بنظره لاحظ اثار الخدوش اللي حاولت جاهده تخفيهم بالمكياج وهالمحاوله بائت بالفشل..
نسرين بإبتسامه تحاول تخفي بيها توترها..
/خيرك تشبحلي هكي!؟ قاعد مصدق القطاف الفارغ اللي سمعته!؟
عقد حواجبه وقال..
/فوتي توا وبري وتي روحك انتي ويحيى بنروح بيك..
هي بضيق..
/مانقدرش نخلي ماليا في ظرف زي هدا..
ربيع بنبرة فيها شي من الحده..
/بري وتي روحك سقديني..
خافت نسرين ومالقتش قدامها غير انه تسمع كلامه قالتله..
/باهي..
ولفت وخشت للحوش وهو لف وطلع منه وكان مضايق ومعصب جدا..
🍃🍃🍃🍃
وفي حوش الجيران المقابلين..
حوش علي الواعر..
كانوا دايرين تقعميزة في الجنان القدامي..
النساوين..هاديه وصفيه وغرفه ومعاهم رقيه هي تدوي وهما يسمعولها بإندهاش..
غرفه بصدمه:هادي هبلت!
صفيه بإبتسامه تهكميه..
/من زمان مهبوله يابنتي مش بنتي كلت منها طريحة قريب قتلتها وخلتها ترمي..
رقيه بصدمه..
/كيف!؟
هاديه وهي حاطه يدها ع صدرها من الفجعه قالت..
/شن المتوحشة هادي!؟
رقيه:كيف سكتوا عنها ياصفيه!
صفيه تنهدت بضيق وقالت..
/اميمه اللي سكتت عنها ماكانتش تبي دير معاهم مشاكل بش تطلق بسرعه وتفتك منهم..
رقيه وهي مصدومه..
/طلعت مجرمه مرة وحده!
غرفه:زي المصريات متاع الحواري بالزبط..
صفيه؛ كانت دايرة روحها بنت الاكابر وديما خشمها مطنش في السمي...
هاديه:طيح سعدها..
غرفه:واهو ربي فضحها وطلعها ع حقيقتها..
صفيه:اللي يدير يلقى يابنتي اللي زرعاته حصداته..
رقيه؛ايه والله صدقتي كله كله حصداته..هونا محي الدين عايش في العسل مع ارملة خوه..
هما بصدمه قالوا مع بعض..
"شنو..كيف!؟"
رقيه:اولامس مطلعها هي وصغارها للجردينه وع هدرزه وضحك وجو مليح ولدي كان رافع مرته وصغاره غادي شافهم..ضحكت وقالت..قال شافني وماعدلش..
صفيه:شكله خلاص ناوي..
غرفه:كان صار حق شن بيصير فيها خديجه هادي!
صفيه بضحكه..
/قولي لنجمه خبري سميرة قبل ليديرها ولدك بش تاخد احتياطها..
هاديه ضحكت وهي تقول..
/ايه صح مرات تش في الحوش النار...
ضحكوا غرفه ورقيه...
🍃وقعدت رقيه عندهم لقبل المغرب بشويه بعدين روحت..
وبعد صلاة المغرب حطت غرفه العشي ع النار بعدين دارت قهوة وطلعت بيها للجنان وقعمزت برا تراقب في الصغار وهما يلعبوا..
ع خشة عمها للحوش..شاف الصغار يلعبوا ابتسم..غير نظره لغرفه وقال..
/غرفه..
غرفه:عمي تشرب قهوة؟
عبد المطلب:اللي بيدير المليحه مايشاورش..
ابتسمت وصبتله فنجان وهو جاها قعمز جنبها..
مدتله الفنجان وقالت..
/تفضل..
خداه وهو يقول..
/كلمتي طوبى؟
غرفه:ايه اليوم حالها احسن من امس..
هز راسه ورشف من القهوة..
غرفه شافت للصغار وقالت...
/اواب رد بالك طيح جنه..
اواب وهو يدف بجنه في الدرجيحه قال..
"مانطيحاش"
ضحك عبد المطلب بعدين قال..
/ربي يحفظهم..
غرفه بإبتسامه..
/تسلم..
عبد المطلب:بكري الصبح قالي حسين ماشي شور الخمس بيدير دورة ع حوازته وحوازتك..
غرفه:حوازة صغاري مش حوازتي ياعمي..
عبد المطلب بضحكه..
/انتي وصغارك واحد..المهم..قال بترفعي طوبى غادي..
غرفه:ايه بنمشوا غادي كلنا نقعدوا اسبوع عشرة ايام نغيروا جونا..
عبد المطلب:عازمتينا يعني..
غرفه وهي تحاول تشد ضحكتها..
/ايه ياعمي عازمتكم..
ع طلعة هاديه مشتلهم وهي تقول..
/روحت طلوبه..
عبد المطلب:روحت ياغريانيه شن دايرين العشي..
غرفه:بازليا ورز..
عبد المطلب هز راسه وهو يرشف في القهوة..
وجه نظره للباب لما سمعه انفتح..
شاف حسين خاش والصغار اول ماشافوه سيبوا كل شي ومشوله يجروا وهما يقولوا..
"سونا"
هوضحك وقعمز ع رووس صباعه ضمهم كلهم..
عبد المطلب:اللي يشوفهم يقول بوهم..
التفتت هاديه شافت لراجلها بإبتسامه مشاغبه..
غرفه وهي تشوف لحسين والصغار قالت..
/ان شاء الله نشوفوا صغاره مع صغارنا..
شافلها عمها بربع عين..
وهاديه شافت نظرته وشدت ضحكتها..
ناضت غرفه وهي تقول..
/خل نمشي نشوف العشي..
ومشت خشت داخل..
قعمزت هاديه جنب راجلها وقالت..
/شن في فراسك..
عبد المطلب:نوفق راسين في الحلال ونحمي رزق بنت خوي وصغارها..
ضحكت هاديه وهي تحرك في راسها يمين ويسار بعدين شافت لحسين وهو يلعب مع الصغار وهايم في عالمهم..
🍃🍃🍃🍃🍃
"بعد اطلقت هبلت مرة وحده"
سدرة وهي تعطي للمهدي كوباية يانسون قالت..
/مافيش حل غير انكم تزوجوها..
خدي منها الكوبايه وقال بضيق..
/غير نلقوا الجالي بعدين ساهل..
قعدت سدرة ساكته ماتبيش تتكلم عليه لابخير لابشر مراعاة لمشاعر راجلها..
🍃ومن الصالون اللي كانوا مقعمزين فيه لدار سدرة المهدي..
كانت تكلم في تاله عن طريق الارضي..
/ايه بنمشي بيرفعنا محمد.. "بتمشي انتي بس؟"
ابتسمت سدرة وقالت..
/لااني ويزونه غدوة خليك واتيه بكري محمد مايحبش يستنى..
"باهي..امم مافيش اخبار عن عمك!؟"
سدرة بحزن:مافيش..
🍃🍃🍃🍃
الساعه 9:15ليلا..
في وسط السمي قاعد القمر ماسك مكانه لكن نوره بدي بالانحسار جزء بسيط منه ولى مظلم والباقي قاعد منور وبهكي يرجع لمنزلة الاحدب.."الاحدب الثاني"..
🍃"تحسي الجو حلو الليله"
اريج بإبتسامه:ايه..
طوبى بإبتسامه:ترا افتحي الروشن ع وسعه..
اريج ناضت وهي تقول..
/باهي..
ومشت للشباك فتحاته ع وسعه وولت قعمزت..
طوبى بضحكه..
/عطيها الخير سعاد هي وتعليقاتها..
اريج بإبتسامه..
/حتى هي الجالي واكل ع كبدها وشارب..
طوبى:اعوذ بالله منه..
ضيقت اريج عيونها وقالت..
/ايه حقه..حسيت بكري لما قلتي لإيمان ع الكلام اللي توصله لأبله زينب كأنك تبي قاصده حاجه تانيه..
تنهدت وقالت..
/ابله زينب وقفت معاي هلبه ولما نحتاجها تلقاني حتى لما كانت تتصل بيا ومانردش عليها مازعلتش وجت بش تشوفني اما توا شوفي قداش ليا راقده في المصحه ماتفكرتنيش حتى بإتصال..
اريج:باهي شن معناه هدا!؟
طوبى:بعد سمعت منكم باللي داره هداكا بدت تسحب في نفسها هي واهلها من خوفها ع خوها..
اريج:اللي يسمع يقول ميته عليه خوها هدا وانتي ولامعبرتيه..
طوبى:هي تبي تقطع علاقتها بيا بش خوها يصرف نظر عني ويحولني من راسه..
اريج:وهو زاد شبط فيك هالشبيطه..
ضحكت طوبى..
اريج:ينباعوا بالعزى كلهم مع بعضهم ظفرك هلبه في الرجاله كلهم..
ابتسمت طوبى ووجهت نظرها للشباك وع بالها يخطر الشخص الوحيد اللي مش قادرة تسأل عنه..اللي تعودت يكون معاها في كل ازماتها..يعني من باب الجيرة وطيب الأصل المعروف بيه...
🍃وهو ديما معاها قريب ولابعيد..في وسط قلبه مكانها..
يقولوله انساها..اطوي صفحتها..مش ليك...
قلبه العاشق رافض يسلم فيها ويستسلم..ولايمكن يقبل ينساها ويخليها..
هو حاليا يلهي في روحه بالخدمه..موجود مع زملائه في احد المناطق اللي دمرت الحرب فيها خطوط الكهرباء..
كان يخدم كعادته بقلب ورب زي مانقولوا لكن بان ع زملائه اليوم ع غير مايعرفوه..عصبي ومزاجه معكر ومافيش ابتسامه ولو خفيفه ارتسمت ع وجهه طول اليوم..
🍀🍀🍀🍀🍀
وقعد هدا حاله لأيام..انعزل عن الاصدقاء والمعارف وقعد دابه داب شغله يخدم لين يهلك من التعب ويروح لشقته منتهي ويرقد طول..
ماكان في شي مصبره غير الصلاة والقرآن والدعاء..
🍃وحبيبة قلبه بعد ماقضت اسبوع كامل في المصحه طلعت اليوم منها وطول غرفه رفعتها لسيارة عمها عبد المطلب ركبوا فيها هي وياها وهاديه وتحرك بيهم ..
ولحقه حسين بسيارته اللي كان رافع فيها امه واخته واريج والصغار...
🌸🌸🌸🌸
اليوم الخميس..
13اغسطس..2020..
الثالث والعشرين من شهر ذي الحجة..
الساعه 7:30مساءا..
وصلوا سيارات عيله الواعر لمزرعة غرفه وصغارها..
فتح العامل ذو الأصول الافريقيه البوابه وخشوا السيارات ورا بعض..
طوبى من اول ماخشوا للخمس حست بمجموعة مشاعر مختلطه وكلها حلوة..
اول مادرس عمها سيارته نزلت وقعدت توزع في نظرها ع المكان وهي مبتسمه ابتسامه حلوة..
لكن هالابتسامه تكدرت لما سمعت صوت بنتها وهي تنادي في اريج..
التفتت شافتلها لقتها ماشيه تجري لأريج لين وصلت فيها..
خدتها اريج وضمتها ورفعتها في حضنها..
شافت لطوبى قالت بإبتسامه..
/هي نمشوا لماما..
جنة شافت لطوبى بخوف بسرعه حطت وجهها في رقبة اريج وضمتها بقوة..
اريج شافت لطوبى بضيق وحزن..
اما طوبى ارتسمت ع وجهها ابتسامه حزن ودموعها نزلوا..
مافي حد ركز ع اللي صار غير غرفه انوجع قلبها وخافت ع طوبى من تأثير ردة فعل بنتها عليها..
مشتلها طول حاوطتها من كتافها وقالت..
/معليشي تو تنسى..
مسحت طوبى دموعها وقالت..
/كان هي نست اني مش حننسى..
ضمتها غرفه بعدين قالت..
/قولي لاإله الا الله وتعالي معاي..
قالت طوبى من قلبها..
/لاإله الا الله..ومشت مع غرفه..
واريج بعد ماتبعتهم بنظرها غيراته عنهم ومشت بجنه وين مافي النساوين الكبار وباقي الصغار..
وخلت حسين وعبد المطلب وراهم ينزلوا في الحاجات اللي جابوهم معاهم...
🍃🍃🍃🍃
نزل يجري من الدروج وهي طالعه من الكوجينه شافاته انفجعت وقالت..
/خيرك تجري هكي شن في!؟ .
نضال بإستعجال..
/لقوا الجالي لقوه..
وطلع يجري من الحوش..
سميرة بهمس:ياعليك خبارة سودا..
🍃برا..
تلاقى نضال مع المهدي اللي كان جاي يجري من جهة الشقه متاعه..
نضال:ماقالكش وين لقوه؟
المهدي فتح الباب وقال..
/في المستشفى...طلع بسرعه ونضال طلع وراه...
#منازل_القمر
#طوبى
....يتبع...
