#طوبى "جنة طوبى"
#جمان_فريد
#الجزء_الثاني_والتسعين"العضيد"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
#الدعاء
مَنْ عوَّد لسانه وقلبه سُؤالَ الله في كل أموره ،
والالتجاء إليه في كل ما يقوم به ، والافتقار إليه في كل أحواله ؛ أورَثَه القوة في قلبه ، والبصيرة في شؤونه ،
والثبات في مبادئه ، والانشراح في صدره ،
والتوفيق في حياته ..
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃"أصبحنا لا نلوم الغرباء ،فالمقربين فعلوا الاسوء"🍃
_______________________________________
🍀🍀ويعدي أسبوع🍀🍀
والبحث ع اللي دبر محاولة ق.تل اميمه كان متواصل..
لما دوروا ورا وسام عرفوا انه تزوج وسافر قبل شهرين فاتوا..
اما قصي فسافر قبل اللي صار بيوم واحد وهني اصبحت دائرة الاتهام حواليه هو بس وكان لازم يردوا عليه بطريقه تخليه يبعد عن طريق اميمه نهائيا..
ولأن البلاد شبه معدومه فيها سيادة القانون مافيش غير اتباع طريق تانيه...
اعتقلوا اخ قصي الكبير وخبروا اهله عن سبب اعتقاله..
ولأنه خوه كان صاحب عيله "مراة وصغار" حيكون الوضع مأساوي لو قصي قعد ع جنونه..
واهله وصلوا فيه وخبروه باللي صار..في الاول نكر بس بعدين حاله أمه خلاته يضعف ويعترف ويتعهد انه معاش يجي في طريق اميمه نهائي..
وفي المقابل كان في ليه هو وعيلته تهديد واضح وصريح ان لو نمست شعرة من اميمه عيلته كلها حتتحمل العواقب...
لكن..
ولد الواعر صاحب النفوذ والقوة لما وصله خبر باللي صار استخدم معارفه في الدوله اللي قاعد فيها قصي وخلاهم يردوه للبلاد وعاد اول ماروح تلقوه الحبايب ورفعوه لدار خالته...
🍃🍃🍃🍃
الثلاثاء..
12مارس..سنة 2019..
في مربوعة حوش علي الواعر..
حسين وهو عاقد حواجبه بضيق..
/وصلتني الدوة من واحد نعرفه شاد مكان غادي..
علي الواعر:ولد عمك مش ناوي يخلينا في حالنا..
حسين:اني قتلك انت مانبيش الدوة تطلع لحد خاشين ع فرح مانبوش شوشرة ونكد..
علي:حتى كان قلت شن بيصير!..زي تكلمت زي سكتت واحد لافي من يقدر يردعه ولايرد عليه..
سكت حسين وهو مستاء بشده..
🍃وفي الحوش اللي جنبهم..
تحديدا فوق السطوح في دار الخزين..
في الوقت اللي كانوا فيهم كلهم مشغولين بتجهيزات العرس..
هي كانت مشغوله باللوحه اللي ترسم فيها بإتقان وتآني ليها أيام..
اللوحه هادي اول لوحه تشارك بيها في فعاليه كبيره توصل بيها موهبتها لهلبه ناس..
لاكان غرضها شهره ولاتميز..كل اللي تبيه ان لوحتها تحصل من يشريها وبحقها يساعدوا حد يعاني آلام المرض وعذابه..
حطت ريشة التلوين في مكانها وقعدت تتأمل في اللوحه وهي تشوفلها من اكثر من زاويه ..
شافت لتليفونها وخداته من ع الطاوله وفتحت الصورة..
وقعدت تمرر في نظرها بينها وبين اللوحه..
قربت اكثر من اللوحه عند جبينه تحديدا..عقد الحواجب اللي كانت حاضره مع الابتسامه كان فيها خط ناقص..
ردت التليفون لمكانه وبدت تعدل فيها..
بعدين وخرت خطوه وهي تشوف للوحه ابتسمت بعدين قالت..
/الخلفيه حتكون احلى لو درتها زي شكل السمي كيف كان في الليل فالمزرعه..النجوم..وهو..نبدل القمر بيه هو..
ابتسمت بعدين ضحكت بتعجب وقالت..
/شن قاعده نخترف..ضربت جبهتها وقالت..موليه مش عارفه كيف اني..مش عارفه خيره عقلي مولي هكي يفكر!..
قعدت تشوف للوحه وهي تقول..
/صح زي مايقولوا عنه..جذاب وجنتل ع قولة آلاء..لكن اني...غمضت عيونها بشده بعدين فتحتهم وقالت..استغفر الله..استغفر الله..ياربي مش عارفه خيرني هكي بديت نفكر..ونحس في عقلي مش عليا..!هو اني رسمته هو لأنه يشبه الشي اللي يبوه في المعرض..المعرض عن اصالة الثقافه الليبيه..وهو يمثل الثقافه متاعه في كل شي..لهالسبب بس اني اخترت نرسمه..بس..
سكتت وقت اللي سمعت صوت داخلها يشكك في الكلام اللي تقول فيه..بس هي تجاهلاته..وتجاهلت كل شي فكرت فيه..ورجعت لهت باللوحه...
🍃🍃🍃🍃🍃
يدور بعيونه في المكان بنظرات اعجاب..
وهي تمشي جنبه وتشوفله وتشرحله عن المكان..
سلافه:في من كل الاعمار من عشر سنين ل60 سنه واكبر كمان..حب الخط العربي جمعهن كلن بهالمكان..
عبد القيوم:صراحه تفاجئت واجد ماتوقعتش ان في عندنا ناس مهتمه لهالدرجة...
سلافه بضحكه؛لافي وكثير كمان هلأ رح عرفك عليهن وخلي ملامح التعجب اللي ع وشك تروح..
عبد القيوم رفع حواجبه ونزلهم وهو يمرر في نظره ع المكان ويقول..
/بالعكس..
ضحكت واشرت بيدها القدام وهي تقول..
/تفضل..
ومشي وهي رافقاته وقلبها طاير وسط ضلوعها..
☘عرفاته ع اعضاء النادي اللي كانوا من الجنسين ومن مختلف الاعمار..
وهو كان متفاجئ هلبه...واكثر شي لفت انتباه ركن للأطفال من عمر 7سنوات ل12 سنه كانوا يتعلموا في الخط ع يد ميار صديقة سلافه..
شاف كتاباتهم وفي منهم اذهله من جمال الخط وقوة الموهبه..
ومنهم انتقلوا لمكان في لوحه فاضيه محطوطه ع حامله جنبها محبره وقلم خشبي..
وقفوا حداها وسلافه ربعت ايديها وقالت وهي تشوفله بإبتسامه..
/امم..شو رأيك!؟
عبد القيوم بإبتسامه..
/شي حلو..يفرح..
سلافه:صحيح..بس بتعرف كتير بتمنى يكون في معهد لتعليم الخط تنعمل فيه دورات لطلاب المدارس اللي بدون يحسنوا خطن او اي حدا حابب يتعلم...وبنفس الوقت بيكون مشروع مربح يدخل مصاري..وابتسمت..
عبد القيوم؛فكرة كويسه بس انتي ضامنه يطلع منه مربح كويس؟
سلافه:ايه..في ناس كتير بيعانوا من مش مشكله الخط السيء واللي مو مفهوم..مو بس طلاب المدارس كمان اللي شغلن بيعتمد ع الكتابه بخط الايد..انا عم درس من هدول..
عبد القيوم هز راسه وهويفكر في كلامها
ع جية ميار وهي تقول..
/اهلا وسهلا مرة تانيه بالخطاط التارقي
عبد القيوم:اهلا بيك..
ميار:شن اقتنعت تولي معانا!؟
عبد القيوم؛لالالا..ساد اللي خشيته لعند توا..
سلافه وميار ضحكوا..
بعدين ميار قالت:ايه حقه انت شايف قبل خط سلافه..
سلافه اختفت ابتسامتها وفنصت عيونها بصدمه..
عبد القيوم؛لا.
ميار:ترا وريه حاجه فاجئيه بيها..
سلافه فنصت فيها بعدين ضحكت بإرتباك وقالت..
/اما شو عليكي حكي!؟ شافتله وقالت...مابعرف كيف بيخطرله والله!
عبد القيوم:خلت عندي فضول نشوفك تكتبي..ورينا..
هي حمحمت بعدين قالت:
/ok مافي مشكله..
وقربت من المحبره وهي تقول في نفسها..
"والله لااخنقك ياميار "
وخدت القلم بيدها اليسار حطت راسه في المحبرة بعدين طلعاته وشافت للوحه وبدت تكتب..
عبد القيوم وخر خطوه وربع ايديه وبدي يتفرج وهو عاقد حواجبه بإبتسامه..
وميار مركزه عليه..
وقعدت سلافه تكتب وهي متوترة..
هي خطاطه موهوبه جدا وخطها غايه في الجمال وياما كتبت قدام ناس وماكانش عندها اي مشكله..
بس لان عبد القيوم شخص مميز عندها وتحمله في قلبها مشاعر كانت حاسه بالتوتر والارتباك قدامه بالذات بعد ماعرف عنها ميزة هي تشوف فيها عيب...
كملت كتابه اسم..
"كوكب"
حط القلم والتفتت تشوفله..
هو بإبتسامه قال...
/فعلا فاجئتيني..طلعتي يسروايه وخطك جميل..
ابتسمت من قلبها وقالت..
/شكرا..كلك ذوق..
عبد القيوم؛مش مجامله..انا اول مرة نعرف حد يسراوي لما كنت نسمع عنهم نستغرب او ماكنتش مستوعب كيف حد يستعمل يده اليسار بدل اليمين لكن توا بس راح استغرابي.
ميار شافت لسلافه بأبتسامه..
كان وجهها احمر من الخجل وهي مبتسمه تقول..
/بس يعني بباقي امور الحياه باشتغل باليمين..
عبد القيوم:فهمت..مالاحظتش عليك تستخدمي في اليسار بدل اليمين قبل..
ميار:ع فكرة اللي خلا سلافه تولي خطاطه هو الميزة هادي..
نزلت سلافه عيونها وهي مرتبكه وخجلانه.
هو قال؛تحدي..!
رفعت عيونها وقالت بضحكه ارتباك..
/هيك شي..
"السلام عليكم"
وجهوا انظارهم ناحية الشخص اللي جاهم وقالوا..
/وعليكم السلام..
:ماعرفتني !
عبد القيوم:الحق اول ماشفتك شبهت عليك بس ماقدرتش نذكر كويس..
:انا نذكرك ياسيدي..عبد التواب المشيطي..
ضحك وقال:الله!..متغير واجد ياراجل..وحضنوا بعض..
وميار وسلافه يشوفولهم بإبتسامه..
عبد القيوم:شنو حالك شن اخبارك شن درت في حياتك..
تباعد عنه وصافحه وهو يقول..
/انت اللي شن درت في حياتك بعد عديت لبنغازي نسيت الكفره ومايجي منها..
عبد القيوم:اول عام صح ما جيتش الكفره بعدها تميت نجي كل شهر انت اختفيت قالوا سافر..
:اها سافرت لمصر قريت غادي واشتغلت وبعدها عديت للأردن شغل ومن عام تقريبا رديت لليبيا..
عبد القيوم:باين وراك حكايه طويله شن رايك بعد ماتكمل اللي هنا تجي معاي للشقة متاعي نشربك شاهي ونسهروا كيف ايام زمان..
:قصدك ساكن هنا انت!؟
عبد القيوم بإبتسامه..
/ليا سنه وشوي..
:نقولك عطيني عنوانك وانا نرتب اموري وبعدين نديرلك زياره راني راجل محكوم..
ضحك وقال:اها..كان هك ماعليك ملام...
☘وقعد يوصفله في مكان سكنه..
وسلافه هايمه بنظراتها معاه ومع تفاصيله الكثيرة الحلوة اللي ماينملش من التأمل فيها..
قربت ميار لوذنها وقالت..
/ع قولته ماعليك ملام يالوفا..
شافتلها سلافه من فوق لتحت بغيره..
ميار بضحكه؛خيرك!؟
قلبت سلافه عيونها ورجعت نظرها لعبد القيوم وابتسمت بهويام..
هالابتسامه اختفت بسرعه لما هو شاف ناحيتهم وقال..
/نستأذن توا نشوفكم ع خير..
هزت ميار راسها وهي تقول:
/إن شاء الله مع السلامه..
سلافه بإبتسامه؛خليني وصلك..
عبد القيوم؛مش لازم...السلام عليكم..
ومشي طول...وهي معاه بعيونها لين طلع من المكان..
ميار:شخصيته جديه هلبه..
وسلافه بعد ماسمعت شن قالت ميار ارتسمت ع وجهها ابتسامه حلوة...
🍃🍃🍃🍃🍃
وهو طلع لسيارته طول..
ركب..شغلها وقعد مقعمز فيها وهو يفكر..
"بكرا ماعندي شي...نعدي للمزرعه!؟"
ابتسم وهو كمل حديثه مع نفسه..
"من بعد ماكانوا فيها معاش مشيتلها "..
وطول تحرك بالسيارة متوجه للخمس...
🍀بعد ماقطع مسافه حل عليه الليل وهو واصل للمزرعه..
وبعد ماخشلها نزل من السيارة وهو يمرر في نظره عليها ويقول في نفسه..
"يابختك..وصلت فيك وضميتها وحقيتي ضحكتها وسمعتي صوتها"..
تنهد من قلبه ومشي للحوش..فتح الباب وخش..
فتح الضي..ومرر نظره عليها..
ع المطبخ اللي نظامه بار ولونه كله رمادي..
ع الصالون اللي كان لونه ازرق غامق ووسايدها رماديات..
وهو يتخايل وقفت غادي وقعمزت هني..
ثبت نظره ع دار مفتوحه..
مشي ناحيتها وخش..
الدار هادي كان فيها دار نوم زوجيه وكنبه طويله ودولاب صغير فاضي مافيه شي..
وزيانه...وزوج كامدينو ع جوانب السرير..
ثبت نظره ع واحد منهم شاف شي خلاه يستغرب..
قدم ناحيته لين وصل فيه..
فتح عيونه ع وسعهم بمفاجأه..لما توكه"بكلة" اطفال ومسبحه مغلفه بغلاف وردي مزين بفصوص لونهم وردي لماع..
خداهم..وقعمز ع السرير...التوكه عرفها لجنه كانت ع هيئة فاكهة الكرز...لكن المسبحه!؟
ماتبيش تفكير حتى هي..انتي شايف وحده زيها عندها من قبل..ومدامك لقيتها جنب شي يخص بنتها معناها ليها هي...
دق قلبه بعنف حس وكأنها مسموعه في المكان كله..
يتأمل فيها بنظرات المليانه حب والمشاعر الحلوة اللي في داخلها تحركت بقوة وكأنها عاصفه..
ابتسم من قلبه..وقال..
/عدا فوق اسبوع ومافي حد دوالي عنهن...مسح بإبهامه ع المسبحه وفي باله هديكا الامنيه اللي ماعنداش اغلى منها وقال من وسط قلبه..
"يارب"
🍃🍃🍃🍃🍃
"بالاول عصبت منا كثير بس بعدين بسته عشرين بوسه"
لبانه بضحكه:بتجنن ميار..كمان اليوم رائف كان هون وحكي لبابا عنه وظل عم يمدح فيه قال انه بيشتغل بأمانه وراعاه كثير بحق شغله..
تنهدت وقالت بقلق..
/بتعرفي لبون..حاسه حالي ولأول مرة مو قدرانه سيطر ع قلبي هيك مشاعري اتجاهه منجرفه مو قادرنه اكبحها..وهالشي كتير مخوفني...خايفه بالاخر يطلع قلبه مشغول وفي وحده بحياته..
لبانه بتعاطف:مابعرف شو بدي قلك..بس لما بتحتكي فيه اكثر راح تعرفي هالشي حتما..
سلافه بضيق:يارب لاتخليني انصدم..
لبانه بتعاطف:ياقلبي انتي الله لايكسرلك قلب..
شافتلها بإبتسامه وقالت..
/وانتي ليش عم تسكري القلوب!؟
لبانه بضجر:لاتبلشي سلافه دخيلك..
ضحكت سلافه وقالت..
/والله حرام عليكي نطفتيلوا قلبه للزلمه!..
لبانه بضيق:سكري ع هالسيرة بترجاكي..
وناضت وطلعت من حداها..
سلافه:ايه اهربي اهربي مفكرتيني موكاشفتك!؟ بتحبيه متل مابيحبك بس لو بعرف من شو انتي خايفه...
🍃🍃🍃🍃🍃
"وهادي اخر شنطه"
طوبى بضحكه؛ بتاتك جيش شناطي الله يبارك..
الاء :ومع هدا حاسه في حاجات ناقصه..
طوبى:انتي اللي عينك واسعه.
الاء:خزي قردة..
ضحكت طوبى..
جتها الاء وقفت قدامها وقالت بضيق..
/مضايقني حال اريج مش متحمسه لشي صح تضحك وتهدرز عادي لكن ماحسيتهاش فرحانه زي فرحتي اغلب حاجتها خلتني اني ناخدهم ..
طوبى بقلق..
/هدا اللي كنت خايفه منه.. نقولوا ان شاء الله بعد الزواج يتغير الوضع..تعرف اسكندر عن قرب وتحبه..
آلاء برجاء:يارب..
طوبى:هي تعالي نطلعوا نعاونوهم...
آلاء:نعاون مني اني عروسه ياروحي!
جبدتها طوبى من يدها وقالت..
/لأنك عروسه بنحرثوا عليك..
وطلعتها من الدار والاء تضحك...
🍃🍃🍃🍃🍃
14مارس..سنة 2019
يوم الخميس..
مع العصريات رفعت خديجه بنتها لحوش صاحبتها بحجة انها بتقرا عندها...
وخديجه كانت مطمنه لأنها تعرف البنت وعيلتها وجايبه بنتها لحوشهم اكثر من مرة....
بس هالمرة اهل البنت ماقعدوش في الحوش وخديجه ماعندهاش علم..
طلعوا لمناسبه وهما يعرفوا ان بنتهم بتمشي تحضر عيد ميلاد صاحبتها اللي بديره في احد المولات..
واللي بترفعهم خالة اسماء..
🍃:كتري شويه روح رموش..
راما؛لاهكي ساد مانحبش الاوفر..
وخدت الوشاح وحطاته حط ولفاته حوالين رقبتها وطلعت شويه من قصتها"جمتها"..
:عطيك دعوه في جمالك..
ضحكت راما بغرور..
رن تليفون البنت شافاته وقالت..
/جو هيا هيا..
ومشوا مع بعض طلعوا من الدار ومنها من الحوش بكل..
ركبوا سيارة خالة اسماء وطول تحركت..
اسماء:شن جو صبايا..
"تمام..مليح"
خالة اسماء:قمرات الله يبارك..
الزوز ردوا..
"تسلمي..شكرا"
وراما مركزة ع خالة اسماء قبل كانت تحط في وشاح ع راسها بس توا طالعه من غير حجاب..استغربت..
🍃بعد ماقطعت مسافه مش طويله..
وصلوا للمول..
نزلوا من السيارة وخشوا..وراما كانت خايفه بعض شي..
بس لما تلاقت مع باقي قروبهم راح الخوف وعاشت الاجواء...
في الطاوله المقابله طاولتهم كانوا مقعمزين اصحابهم الشباب..
صاحب اسماء مانزلش عيونه عن راما وهي كانت تسرقله في النظر..
شويه جتهم اسماء سلمت عليهم وجابت صاحبها لخالتها بش تعرفها عليه..
وراما كانت حاسه بشي من الغيره..
🍃🍃🍃🍃
داروا اجواء العيد ميلاد وقعمزوا حوالين الطاولة ياكلوا..
اخت وحده من البنات كانت من عمر خالة اسماء سألتها وهي تقول..
/حولتي الحجاب؟
؛ايه اساسا مش مقتنعه بيه..
:اني لولا خوتي مالبستاش..
:هو هدا المجمتع الذكوري ديما يفرضوا فيه الرجاله قوانينهم وشروطهم..تعرفي خوتك هادم تلقيهم وين يشوفوا وحده مش متحجبه رياقتهم تسيل..
ضحكوا..
راما؛الحجاب الدين فارضه..
خالة اسماء:جيبلي ايه في القرآن فيها كلمة حجاب!؟ وبعدين الحجاب حجاب القلب والدين مكانه القلب حاجه بيني وبين ربي مانوريهاش لحد..
:صح..اصلا مامداير العار توا كان جماعات الملايه والخمار..
خالة اسماء:عار وسكتي خليني ساكته..
وخدت طاسة العصير وشربتها..
وراما تشوفلها وتفكر في كلامها..تنهدت وغيرت نظرها لطاولة الشباب لقت صاحب اسماء يشوفلها بنظرات تبان حلوة بس الخبث اللي فيهم غالب وراما ماتشوفش فيه..
نزل عيون لتليفونه وقعد يكتب..
شويه وصلتها رساله..
رفعت تليفونها وفتحتها..
(الحقيني للدور الاول)
رفعت عيونها بالشويه وشافت لأسماء لقتها مشغوله بالهدرزة مع صاحباتها..غيرت نظرها ليه ويدوب هزت راسها..
هو ابتسم..وشويه وناض مشي..
وراما قعدت شويه بعدين ناضت تقول..
/الحمامات لوطا ولا؟
اسماء شافتلها؛ايه بيبي شن اول مرة تجي؟
ابتسمت راما وقالت..
/قلت نتأكد مرات نسيت..
اسماء:ننزل معاك..
راما:لا خليك بيبي شويه وجايه..
ومشت طول..
اسماء قعدت معاها بعيونها بعدين ردتهم لصاحبتها اللي كلمتها..
🍃ركبت راما للأصنصير..كانت فيه مرايه..
شافت شكلها فيه..جي بين عيونها شكل اسماء وهي شاده يد صاحبها وتحرك في شعرها اللي قصاته جديد قدامه..
مجرد ماوصل المصعد للدور الاول نزلت راما الوشاح..حولاته ومشت طلعت بسرعه من المصعد..
في شي فداخلها ماكانش مرتاح للي دير فيه نهائيا..بس في كان في شي تاني غلبه وسكت صوته...
قعدت تمشي وهي دور..لين شافاته واقف في ممر فاضي يراجي فيها..
مشتله طول..
وهو يشوفلها بإيتسامه ساحره..
وصلت فيه وقالت..
/هاي..
هو قال؛هايات ياعسل..شن هدا!؟
بضحكه قالت:شنو!؟
:جمالك..ااه ياجمالك يافرخة انتي..
ضحكت بعدين قالت..
/جديده ضربة الحاجب..
خدي يدها وحطها ع مكان الضربه وقال..
/انتي تبيها..
سحبت يدها بشي من الخوف وهي تقول..
/اني قلت حلو شكلها ع الولد بس..
:واني درتها ع خاطرك..
🍃وهي تسمع في هالكلام..وتركب فيه ع الشكل الوسيم..وهيئة الشاب ال Cool اللي تشوف فيها قاعده تحس بإنجذاب غير عادي اتجاهه...
والبنات في هالعمر بالذات لما يكونوا زي راما قاعده تخش في عقولهم افكار مشوهه عن الحب وعن مميزات الشباب حتما حتميل للي تفرضه عليها هالافكار اللي تأثرت بيها بشكل كبير..🍃
ابتسمت وقالت..
/امم..لكن جوك مع اسما ولى ينرفز فيا..
هو بضحكه:بديتي تغاري..
راما؛مرات..
:نموت فيها الجكترة متاعك هادي..
قلبت عيونها وهي مبتسمه بغرور..
هو يمرر عليها في نظراته الخبيثه لما شافتله ابتسم وقال..
/اصبري عليا..شويه شويه نسحب روحي ونفوتها بش ماتشك في شي..
تنهدت وقالت؛نشوفوا..توا بنمشي خلاص تو يفقدوني..باي..
ومشت بسرعه هو يلحق فيها بنظراته الوقحه اللي كلها خبث..
🍃وفي نفس المول..
خشوا ربيع ومعاه محمد ولد نسرين ويزن ولد المهدي..
كان جايبهم بش يلعبوا في صالة العاب الكترونيه...
جي لربيع اتصال خلاهم واقفين في مكان معين وتباعد شويه عن الزحمه بش يرد ع المكالمه..
محمد؛البلاد طورت..
ضحك يزن وهو يمرر في نظره ع المكان وقال؛تقول ليك 15سنه برا منها..
فجأه اختفت ضحكته لما شاف بنت عمته واقف قدام الاصنصير..ماصدقش عيونه..قال لمحمد..محمد..هادي راما ولاوحده تشبهها!؟
شاف محمد لوين مايشوف وانصدم حتى هو ..
وراما خشت للمصعد..
شافوا لبعض وهما مصدومين ع الآخر..
🍃وام راما..
مقعمزه في شقة نجاه تشرب عندها فالقهوة..
مش جايتها غلا فيها...جايتها لأن نجاه طلبت منها تجي لأمر ضروري..
☘خديجه:خشي في الموضوع طول وفوتي المقدمات اللي بلامعنى..
نجاه تنهدت وقالت؛باهي..جوري..ماما جوري..
رفعت خديجه حاجبها بإستغراب..
جت جوري تجري وكان باين ع وجهها الخوف..
/نعم ماما..
نجاة:احكي لعمتك اللي حكيتهولي امس..
خديجه عقدت حواجبها بقلق..
جوري ضمت ايديها في بعض وقعدت تفرك فيهم ..
نجاه شدت ذراعها وقوت الشده وهي تقول..
/احكي ماما..
شافت جوري لامها لقت في عيونها نظره تخوف..
خديجه بقلق بالغ وعصبيه..
/تي شن في انتي وياها!؟
شافت جوري لعمتها وقالت..
/مرة ولا..ناداني محمد ولد عمي المهدي..وسألني وين راما..قتله في بحدا الشلال..وخرت شعرها ورا وذنها بتوتر وقالت..ومشالها..واني لحقته..
خديجه بخوف:ايه!؟
جوري:ولقيته يبي يدير لراما حاجات عيب..
حطت خديجه يدها ع فمها بصدمه..
شدت نجاة ع ذراع بنتها بقوة..
البنت توجعت بدون ماطلع صوت وقالت..
/وهي ضرباته وهربت منه..بعدين اني هربت معاش شفت شي..
رخت نجاه يد بنتها وشافت لخديجه وقالت..
/عرفتي توا بنتك علاش معاش جت هني!؟
خديجه بصدمه؛محمد ولد المهدي!!!؟
نجاة:حتى اني ماصدقتش لما سمعت لكن عاد جوري طفله ماعندها علاش بتكذب عليه..
خديجه:اني كنت نأمن عليها معاه اكثر من خوها!!؟ معقوله محمد ولد المهدي يدير هكي مع بنتي!؟..خبطت وجهها بإيديها وهي نقول..حي كان توصل الدوة لعمامها...عمها اشرف قبل ماكانش يبيها تجي هني..طلع عنده حق..عنده حق..
نجاة:اني قلت نحطك في الصورة لأن موضوع زي هدا ماينسكتش عليه..
حطت خديجه يدها ع ركبتها وقعدت تهز فيها..
خطرها كلام المهدي ليها اخر عن صغارها وعن ربايتهم..
رفعت حاجبها وقالت..
/وبوهم طايح يعطي فيا محاضرات ع التربيه!! لكن باهي..
وناضت وهي تمشي بعصبيه جت لجوري خدتها من يدها وقالت..تعالي معاي..
التفتت جوري لامها تشوفلها بخوف..
نجاه فنصت فيها..
لفت وجهها عن امها وهي شاده دموعها..
🍃ومحمد المهدي في هالوقت كان مقعمز حدا جداه وعمته نسرين واخته يهدرز عليهم..
محمد؛خدمت في عطلة نص السنه غادي ولما ولينا القرايه وقفت..
نسرين:السنه هادي شهاده حمودي شد كويس..
محمد:والله شاد بإيديا ورجليا وان شاء الله خير..وضع البلاد مايطمنش ومرات تخش بعضها في أي لحظه..
مغليه؛قالوا بيحلوها سياسيا مش صاير من الحرب..
محمد هز راسه وقال..
/ان شاء الله ياحناي ان شاء الله..
وسدرة تسمع فيهم بصمت..
فجأه سمعوا خديجه وهي تنادي..
"يما"
انفجعت مغليه من الطريقه اللي نادت بيها وقالت..
/يارب سترك..!
وملامح الخوف باديه ع وجوه نسرين وصغار خوها..
وتخش خديجه ومعاها جوري..
خديجه برفعة حاجب وانفعال..
/كويس بكل..تعالى جاي انت! اني واثقه فيك ودايراتك راجل ومأمنه فيك تنوض دير هكي مع بنتي!؟ بنت عمتك شرفك وعرضك!..
كلهم انصدموا..
محمد ناض وقف وهو يقول بصدمه..
/تي غير شن تقولي ياعمتي! شن درتلها بنتك!..
مغليه بخوف:خديجه صلي ع النبي يابنتي وقولي خيرك مع ولد خوك!؟
خديجه بإنفعال:تعرفي يام علاش يما راما حرمت الجيه هني!؟ من عمايل الباشا !
نسرين:شن تخرفي انتي!
خديجه:شن نخرف!؟؟..شافت لجوري وقالت..قولي ياجوري شن شفتي محمد داير لراما..
محمد وسدرة وجهوا نظرات الصدمه لجوري
اللي كانت منزله راسها وهي ترعش من الخوف..
نسرين؛جوري!..
خديجه:قوليلهم ياجوري انك شفتي محمد شاد بنتي ورا الحوش ويديرلها في حاجات مش كويسه..
شهقت مغليه بصدمه..
وسدرة ونسرين شافوا لمحمد وهما مش مستوعبات اللي يسمعوا فيه..
خديجه؛تكلمي ياجوري..
محمد قدم كم خطوة لين وصل في جوري وقال..
/اني ياجوري!اني شفتيني ندير هكي!؟
البنت مش قادره تتحمل لكن في نفس الوقت خوفها من تهديد امها كان مسيطر عليها..
《تعرفي كان مادرتيش هكي قطوستك هادي نقتلها قدامك》
غمضت عيونها بشده وهي تبكي وقالت..
/ايه انت..انت..
خديجه اشرت عليها وهي تشوفلهم وتقول..
/سمعتوها سمعتوا!؟..اهي عيل اللي شافت وتكلمت..شافتله بغضب وقالت..عنده الحق عمها اشرف لما قالي معاش تخليها تمشي لحوش ماليك...ماقالهاش من فراغ اشبح شن شايف عليك!..
تعبوا عيون محمد دموع وابتسم الما وهو يقول.
/ايه صح..اني ماننفعش..ومن اليوم اني معاش بنقعد هني خليتها ليك ولبنتك ..
وشاف لجوري بنظره حزن بعدين مشي طول طلع من الدار..
خديجه بإزدراء:قليل ربايه..
ناضت نسرين ومشت طلعت وراه..
لكن اخته من الغضب الشديد ناضت واندفعت ناحية جوري بتضربها..
شدتها خديجه من كتفها وهي تقول..
/بري غادي..
سدرة شدت كتفها وهي تشوف لعمتها بحقد وعيونها معبيات دموع..بعدين طلعت من حداهم..
وجوري تبكي وهي ترعش..طبست عليها خديجه وضمتها وهي تقول..
/خلاص حبيبتي خلاص..
مغليه بصدمه؛محمد ولد المهدي معقوله!..
خديجه؛مقيوله ياما تحت السواهي دواهي..
🍃برا..
لحقت نسرين ع محمد وشداته وهي تقول..
/حبيبي وين ماشي!؟
محمد:عمتي بالله عليك ردي بالك يوصل شي من اللي صار لبوي نعرفه والله معاد قاعدها وحناي مش ناقصه..
نسرين قعدت تشوفله بألم ودموعها في عيونها..
محمد ابتسم وقال..
/عادي قاعد صغير نتحملها في نفسي لكن بوي وحناي ماعندهمش صحة ياعمتي..
نسرين ودموعها ينزلوا..
/مستحيل نصدق فيك حاجه..
مسح دموعها بعدين باس راسها وقال..
/خشي لسدرة..وصيها ماطلع شي وماتتعاركي مع حد بالله عليك..
وطلقها ومشي طلع من الحوش..
سكر الباب وراه هو حاس الدنيا ضايقه بيه ع الآخر..
سمع صوت باب حوش سدره انفتح..شاف جيهته..
لقي مروة طالعه..سكرت الباب وحطت ايديها في جيوب كبوطها ومشت بطريقها للسوبر ماركت اللي في اخر الشارع...
قلبه زاد وجعه..وضميره اللي مابطلش تأنيب فيه من بعد الحقيقه اللي عرفها من صاحبه مؤيد..قعد يلوم فيه وهو يقوم..
"ذوق من اللي ذاقت منه..وحس باللي حست بيه"
🍃مروة قاعده عايشه حالة الحزن اللي تحاول تخفيها قدام امها وباقي العيله..
مش قادره تستمع بشي ولاتحس بشي من اجواء الفرح..
..وصلت للسوبر ماركت وخشت..
ومشت طول ناحيه رف التسالي..
خدت سله..وبدت تعبي فيها..
شيبس..وكيكات..وشكولاته..ومكسرات..
وقفت قدام الكوكيز قعدت تتفرج عليه..تبي ترجع تحبه زي قبل بس خلاص ولى عندها مربوط بألم معاش تتقبله..
وين جت بتفوته..
"مروة اني اسف"
محمد خدي فازوا "برطمان"شكولاته وقعد يشوفله وهو يقول.
/حكالي مؤيد كل شي..تمنيت لو قدرت نوصل فيه الكلب هداكا..سامحيني مروة بالله عليك..
مشت وخلات بدون ماترد بحرف..
هو تنهد بحزن ورد فازوا الشكولاته لمكانه..ولحقها..
لقاها واقفه ع الكاصه تراجي في الكاشيره تحسبلها حق البضاعه..بعد ماكملت قالتلها ع السعر دفعت مروة وخدت الكيسه ومشت طلعت من السوبر ماركت..
وهو شويه وطلع وراها..
تبعها لين وصلت في حوش لطفي الواعر..دقت الباب وشويه وانفتح وخشت..
غير نظره القدام جو عيونه ع المصور متاع سامي..
شاف عبد القيوم طالع منه هو وسامي يهدرزوا..
قعدوا يشوفله للحظات بعدين توجهله...
🍃🍃🍃🍃🍃
وبعد الزوبعه اللي دارتها خديجه مشت لبنتها بتروح بيها..
طلعت راما من حوش صاحبتها زي ماحطتها بالزبط..
خديجه قعدت ملتزمه الصمت طول الطريق..
اما راما فكانت سرحانه تفكر في صاحب اسماء وحركاته وتصرفاته..
🍃وصلت خديجه للحوش وهي ملتزمه الصمت لعند ماركبوا للشقه..
خديجه؛علاش ماحكتليش اللي صار بينك وبين ولد المهدي!
راما وجهها انخطف لونع وقالت..
/شن صار!
خديجه؛مادسيش عليه جوري بنت عمك حكت ع حقارته معاك قليل الربايه هدا..
فتحت عيونها ع وسعهم بصدمه..
خديجه:مفروض جيتي وحكتيلي طول مش تخلي كلبه زي نجاه هي اللي توصلهالي ونبان قدامها اخر من يعلم..قولي تحرش بيك قبل ولا هادي اول مرة..
راما رفعت حاجبها وقالت..
/قبل شبحات بس..
خديجه بحقد؛المنحط قليل الربايه وبوه طايح ينظر عليا يمشي يربي صغاره قبل بدل مامخليهم سايبين ويجيرلي في جرة حبه الضايع..
ومشت طلعت وخلتها..
سكرت راما وراها الباب وهي تقول بعدم فهم..
/شن اللي صار بالزبط وشن قالت جوري!؟
وقعدت تفكر و وهي تحاول تربط الاحداث..
بس قطع عليها الاتصال اللي جاها..
فتحت شنطتها وطلعت التليفون وشافت المتصل..
رانيا يتصل بك...
ابتسمت ومشت قعمزت ع السرير رجاته لين فصل بعدين بدت تكتب في رساله.
(نهدرزوا في الليل)
شويه ورد عليها..
(تمام ياعسل)
ضحكت وردت تليفونها للشنطه وناضت بش تبدل حوايجها..
🍃🍃🍃🍃🍃
وسدره بكت من القهر والألم لين تعبت ورقدت في دار في حوش عمتها..
طلعت نسرين من حداها وهي تبكي بحزن ع حالهم..
اللي صار اليوم جدد ذكرى وفاة عائشه..
عدت سنة ع موتها..وحال صغارها من بعد حال شتات وحرمان...
حتى المهدي تيتم بعد موت عائشه وبدي تايه مش عارف شن يدير يلايم حياته وقلبه المريض فيه الف وجع ووجع غير اوجاع المرض..
وصلت في الصاله وقعمزت وهي تتفرج ع ولدها يحيى كيف يلعب بألعابه ودموعها قاعده تنزل..
مسحتهم طول بعد ماسمعت باب الحوش انفتح..
وتسمع معاه اصوات ربيع ومحمد ولدها ويزن وهما يهدرزوا..
خدت نفس ورسمت ع وجهها ابتسامه..
خشوا عليها..
ربيع بضحكه:اوو زعامه..شن دار بعد ماطلعنا كملها بكي..
نسرين بضحكه:رفعته لحوش بوي بش يلعب مع سدرة دروخه النوم ورقد..
ربيع جابلها كيسه وقال..
/خودي العشي..
ناضت وخدتها منه..وهو مشي قعمز حدا يحيى يلعب معاه..
الولاد تبعوا نسرين بعيونهم لين خشت الكوجينه لحقوها..
🍃خشوا وراها ومحمد ولدها رد الباب..
نسرين بإستغراب..
/محمد شن دير؟
محمد؛غير اصبري يما..
وقف حدا يزن وقال:احكي.
نسرين بقلق:شن في!؟
يزن بضيق:بكري في المول شفنا راما..
نسرين؛مول!؟
يزن بغضب؛ايه..لابسه لبس ماينفعش وشعرها عريان..
محمد؛حتى اني شفتها معاه يام..
نسرين بصدمه:بالك وحده تشبهها!
يزن بضيق:مانريحش ع راما ياعمتي..
محمد:حتى اني نزبط شكلها حتى بالمكياج..
نسرين حطت يدها ع فمها بعدين مسحت عليه وشافت للباب وقالت..
/خلاص اطلعوا توا وردوا بالكم تعاودوا لحد ردوا بالكم..
الزوز قالوا:حاضر..
ومشوا طلعوا ويزن مضايق ومعصب..
وعمته ترعش من اللي سمعاته..لو كان حق اللي شافوه كارثه!!...
🍃🍃🍃🍃🍃
غطا طنجرة طبيخة المكرونه..
ومشي بيطلع من الكوجينه..سمع صوت جرس الشقه..
توجه للباب..
وصل فيه وفتحه..
المهدي:السلام عليكم..
وخر عبد القيوم وقال:وعليكم السلام..تفضل..
خش المهدي وهو يقول..
/وينه؟
سكر عبد القيوم الباب وقال..
/تعالى..
ومشوا مع بعض لين وصلوا في دار المعيشه..
عبد القيوم:جوا..
ومشي وخلاه..
خش المهدي للدار..
لقي محمد مقعمز سرحان والدمعه نازله من عينه..
المهدي:محمد..
محمد استاقظ ومسح دموعه طول وهو يقول..
/بوي!
قعمز جنبه وقاله:خيرك شن جاك! شن قصة بنقعد عند التارقي فترة هادي!
محمد:لين ترتاح نفسيتي شويه..
المهدي بصرامه:قول شن صاير ياولد ..
محمد بحزن:شي يابوي..غير انت شكلك ناسي امي ليها ايام مسكر موتها العام..
بدت ع وجه المهدي ملامح الألم..
محمد:اليوم هدا مانبيش نتفكره..
المهدي:سامحني..مشاغل الدنيا والمشاكل نسوني..
محمد؛انت اللي سامحني مابيتش نفكرك..
نزل المهدي عيونه وهو مضايق وموجوع..خطر عليه يوم موتها..يوم صعب ماعداش عليه يوم اصعب منه..
محمد؛نقولك شي..امي في الرساله اللي خلتهالي وصتني كان خالتي سدرة فاقت نخليك تاخدها..
قام عيونه في ولده بنظرات دهشه..
محمد بضحكه ودموعه ينزلوا وهو يمسح فيهم قال..
/قالتلي بوك وخالتك سدره اكثر زوز نحبهم في حياتي بعدكم رد بالك تفرقهم كان تلاقوا..
حط المهدي يده ع عيونه وشدهم بقوة..
محمد حط يده ورا رقبته وخداه في حضنه وهو يطبطب عليه..
🍃🍃🍃🍃
والتارقي في الدار التانيه..
كانت لاهي يكتب في اللوحه اللي بيشارك فيها فالمعرض وعقله مع المهدي وولده...
🍀عدت اكثر من نص ساعه..
ماطلعش عبد القيوم من داره الا لما سمع المهدي ينادي عليه..
طلعله..لاحظ انه هرب بعيونه المحمره عنه وهو يتكلم..
المهدي:سامحنا بنتعبوك معانا بيقعد عندك الفتره هادي كان فيها كيف وصله لمدرسته الصبح وهو يدبر بروحه في المرواح..
عبد القيوم بنبرة عتب:ليش تدوي هك يامهدي وكأنك تحكي مع حد غريب..
المهدي شافله وقاله..
/اني الغريب..معاملتك ليا الفترة الاخيره هكي فهمتني..
عبد القيوم؛انا جنبتك الاحراج لأني عارف ان موقفك حيكون صعب..
المهدي:علاش سيبت الشقه من غير ماتعطيني علم..
عبد القيوم؛لأسباب بعيده عنك صدقني..
هز المهدي راسه وقال..
/المهم توا محمد..
عبد القيوم:محمد كيف خوي الصغير وانت عارف..
المهدي هز راسه ومشي..لما فات جنبه طبطب ع كتفه وكمل طريقه للباب.
لحقه عبد القيوم وسقده..بعدين مشي لمحمد..
عبد القيوم:حمادي..
محمد بإبتسامه:نعم..
عبد القيوم؛سبيقه ولاخرز..
محمد بضحكه؛عندك المعكوفه!
عبد القيوم عقد حواجبه بإستغراب وهو يضحك..
🍃🍃🍃🍃🍃
وتعدي هالليله طويله...بالحزن والذكريات المؤلمه..
راقدين حدا بعض في الدار واحد يحكي والتاني يسمع..
عبد القيوم: حكيتلك قبل...امي توفت واني صغير مش واجد واعي شويه نقرا في المدرسه..كانت مريضه...نذكر فيها كيف كانت تتعب قدامي تعذبت واجد لعند ماربك خذى امانته..جفن دموعي من وقتها..ع قد ماصار معاي معاد نزلن..توفت جدتي الله يرحمها بكا قلبي عليها لكن عيوني لا..
محمد المهدي:ماعاينتش ع عيونك؟
عبد القيوم؛عاينت..وقالوا هي حاله نادرة نوعا ما مربوطه بالنفسيه..
محمد:صعبه الحاله هادي صح الراجل المفروض مايبكيش بس الدموع مرة مرة يفرجوا شويه..
عبد االقيوم؛المجتمع اللي عايشين فيه اغبر تفكيره جاهلي..الراجل بشر ومن حقه يبكي من حقه يطلع اللي يحس بيه وقت يفقد حد عزيز.. وين يتعب من هم هالدنيا..وين يثقلن حمول قلبه..
محمد؛انت تحب!؟
عبد القيوم شافله بصدمه..
محمد بضحكه:بصراحه وصلتني شويه معلومات من فوق لفوق..
غير نظره للسقف وقال..
/حرام مافي حاجه تقعد سر في هالبلاد خايف بعدين نلقاها في شريط العاجل متاع الحدث والرسميه..
محمد بضحكه؛انت عاد لامها شرق ع غرب ع جنوب..كان يحطوك مع جماعة التسويه السياسيه توحدها في ربع ساعه..
عبد القيوم قعد يضحك..
محمد بإبتسامه عريضه..
/ماضيعش الموضوع واحكيلي.
شافله عبد القيوم شويه..بعدين جبد المخده من تحت راسه وقال..شن نحكيك!؟..وقعد يخبط وهو يقول..ارقد..ارقد بكرا وراك مدرسه..
محمد وهو يتلقى في الضرب يقول بضحكه..
/غدوة جمعه يادايخ..
عبد القيوم وقف ضرب وقال..
/نسيت بكل..معناها بناخد غايتي في النوم الحمد لله..
محمد بضحكه؛باهي هدرزلي..
عبد القيوم:ع شني ياضايل..
محمد بضحكه؛عن اي شي الا الموضوع هداكا..
عبد القيوم شافله بطرف عينه بعدين عطاه المخده وقال..
/نحكيلك عن الايام اللي تميت فيهن مع خالي..
خدي محمد المخده ورقد عليها وهو يقول..
/ايه احكي..
عبد القيوم برفعه حاجب..
/خالي هذى راقي يعالج في الناس المسحورة والملبوسه..
محمد بحماس:احكي احكي..
🍃وقعد عبد القيوم يحكي عن قصص حالات كان اغلبها مرعب وزادها بأسلوب سرده...ومحمد ولاانهزتله شعره كان يسمع وهو متشوق لين آذن عليهم الفجر بدون مايحسوا..
مشوا للجامع صلوا الفجر...واول ماروحوا ارتموا ع فراشاتهم وراحوا في نوم عميق...
🍃🍃🍃🍃
ونسرين بعد ماصبح الصبح اتصلت بخديجه وقالتلها بتجيها العشيه..وخديجه وافقت ع مضض في بالها بتكلمها عن المشكله اللي صارت..
~~~~~~
خديجه بإنفعال:شن قصتكم مع بنتي انتم! شن تبوا منها كل واحد طالعلي بدوة شكل عليها !
نسرين:اهدي خديجه..بنتك زي بنتي..
خديجه؛لاحبيبتي مش زي بنتك.. اني بنتي قاعده قدام عيني نعرف وين تمشي وين تجي ومن مصاحبه وحتى عائلاتهم..بري دوري بنتك هونا ملوحه في اخر الدنيا ماتندري عليها وين تمشي وين تجي..
ناضت نسرين ودموعها في عيونها..
/والله ماتستاهلي اللي يفكر فيك وفي مصلحتك مانقول غير ربي يستر عليها وخلاص..
ومشت..
خديجه؛ربي يستر ع بناويتك اللي مطلوقات في بلاد اجنبيه لاحسيب ولارقيب..
سمعت صوت باب الشقه انخبط بقوة قالت..
/اجري...! عقابها تسمع في كلام فروخ ع بنتي وجايه تعاود فيه هدا كله يالاش طقينا في صغار هداكا..
ع جية راما من دارها وهي تقول..
/خيرها اصواتكم عاليه! خيرها خالتي روحت!؟
عقدت حواجبها وقالت..
/اني امس وين رفعتك؟
راما؛لحوش صاحبتي..
خديجه؛شن درتوا غادي؟
راما:شن شن درنا غادي!؟ قرينا وهدرزنا وغيرنا جو..
خديجه هزت راسها وهي ساكته..
راما بإنفعال كاذب؛شن في تاني ياماما شن متبليين عليا تاني!؟
خديجه:مافي شي..بري اقري كم بتقري...
راما تأففت بضجر ولفت ومشت لدارها..
خديجه غمضت عيونها وفتحتهم وهي تقول...
/اعوذبالله منهم كلهم..
🍀🍀🍀🍀🍀
ويخش اسبوع عرس آلاء وأريج...
#العضيد
#طوبى
....يتبع...
