#طوبى "جنة طوبى"
#جمان_فريد
#الجزء_المئة_وواحد"حسابات قديمه"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#فضل_الحمد
قال رسول الله ﷺ:
« إذا قال العبدُ : ( الحمدُ لله كثيراً ) قال الله تعالى :
اكتبوا لعبدي رحمتي كثيراً ».
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃نحن لا نحب الأشخاص صدفة، ولا يمكن لنا أن نعشق أحداً من الوهلة الأولى، نحن نحب الأشخاص لذكرياتهم لتفاصيلهم القديمة ولبعض مواقفهم وأحاديثهم التي لا تشبه أحداً.
لذلك، لا نستطيع نحن الفاشلين في الحب أن نبدأ من جدید، علينا دائماً أن نطلب من الله ممارسة نعمة النسيان على قلوبنا، وأن نستفرغ كل مشاعرنا مرة واحدة دون رحمة
ديستوفيسكي🍃
________________________________________
"هادي حوا اللي حكيتلك عليها"
حواء بإبتسامه:الحمد لله ع سلامتك وربي يزيدك من الشفي..
سدرة بإبتسامه؛الله يسلمك وبارك الله فيك..
حواء شافت لطوبى بإبتسامه وهي تقول..
/طيب فيك..
طوبى بإبتسامه..
/طيب وقتك..
ومشت من حداهم بش تسلم ع الموجودات..
سدرة وهي تشوفلها..
/تبان مراة قويه..
طوبى:اللي قدرت تتخطى هدا كله اكيد تكون قويه ياسدرة..
غيرت سدرة نظرها لطوبى اللي كانت تبع في حواء بنظرها سمعت طوبى قالت كلامها بنبرة فيها شي من الألم وكأنها حاسه اللي تقول فيه وكأنها تتكلم عن نفسها.
ويرجع الشك لقلب وعقل سدرة في قصة زواجها وطلاقها حاسه ان المدرق اكثر من اللي طلعاته.
🍃في هاللحظه يخشوا نبيله وفاتن..
الموجودات لفتت نظرهم فاتن هلبه..إلى جانب جمالها كانت تبان مختلفه في كل شي..
تبعوها بعيونهم لين وقفت ع سدرة ومعاها نبيله..
🌼طوبى:هادي نبيله مرت خالي المحجوب وحماة غرفه في نفس الوقت..
سدرة ضيقت عيونها وهي تشوفلها كانت تحاول تتفكرها..
نبيله بإبتسامه ودموعها في عيونها..
/حمد لله ع سلامتك..ومدت يدها..
صافحتها سدرة وهي تقول برسميه..
/الله يسلمك..
نبيله كان الموقف عندها عادي وضع سدرة معروف ماتنلامش لكن طوبى حست وكأن سدرة مش متقبله نبيله وطول عقلها بدي يفكر ويفكر...
طلقت سدره يد نبيله وقالت لفاتن..
/شن جو فتون..
سلمت عليها فاتن بالخد وهي تقول..
/تمام..شن جوك انتي؟
سدرة:تمام الحمد لله..ترا اوقفي حداي..
طوبى اللي كانت تسلم ع نبيله ركزت عليها وعرفت شن بدير..
اما نبيله كملت سلامها ع باقي الموجودات لكن وقفت وهي تسلم ع عواطف لما سمعت سدرة تقول..
/ياعيلة ترا خليكم معاي شويه..
كلهم وجهوا نظرهم وانتباههم ليها..
سدرة؛نبي نعرفكم ع مرت خوي مختار اسمها فاتن..
بدت ع وجوه الحاضرات ملامح مختلفه..
اللي متفاجئ واللي متعجب...
وزعت فاتن نظرها عليهم بإبتسامه..
وفي من ردها بالسلام وفي من اكتفي بالابتسامه هدا كله كان تحت عيون طوبى...
🍃ومن باب الحوش..
خشت نسرين وتاله سابقتها ع جية فايزة اللي سلمت عليها باليد بعدين قالت..
/تعالي..
نسرين بتوتر:يستر الله..
ومشوا مع بعض للصاله وخشوا ونسرين تقول..
"السلام عليكم"
توجهت الانظار ليها واصحابها يردوا في التحيه..
لكن نسرين شافت لسدرة لقتها تشوفلها بنظرة حزن غارقه في الدموع..
قدمتلها ولما وصلت فيها طبست عليها وحضنتها وهي تبكي..
وسدرة ضمتها وبكت معاها..
الحاضرات كانوا يوزعوا في انظارهم بينهم وبين طوبى اللي بدت ع وجهها ملامح التجهم..
تباعدت نسرين عن سدره وهي تقول بنبرة باكيه..
/حمد لله ع سلامتك..وطبعت قبله ع راسها..
فايزة حطت يدها ع فمها وهي تبكي..
وسدرة تذرف في الدموع بصمت..والحاضرات كلهم تأثروا ماعدا طوبى..
هدت نسرين شويه وتباعدت عن سدرة وهي ترشف بش تكمل سلامها ع الباقي..
وين جت لطوبى مدت يدها وهي تقول..
/شن حالك طوبى
رفعت طوبى عيونها فيها كانت راسمه ع وجهها ابتسامه خفيفه لكن نظرات عيونها كانوا مسببات توتر كبير لنسرين وخلوها تتفكر اللقاء اللي جمعهم في حوش فايزة قبل مرواح سدرة بأسبوعين..
🔺️🔺️في وقت سابق🔺️🔺️
"تعرفي علاش نبيك؟"
نسرين وهي مربعه ايديها وتشوف لطوبى اللي كانت واقفه قدامها بضيق قالت..
/الحق لا..
بملامح وجه ممتعضه ردت عليها تقول..
/اكيد تعرفي ان سدرة بتروح في 11 واكيد عندك خلفيه ع وضعها..اني حكتيلها اللي صار بس قصيت منه حاجات وغيرت حاجات ماتخليهاش تنصدم في صاحبة عمرها وجارتها
"الخاينه"
رمشت نسرين عيونها بسرعه وكأن طوبى صفعتها بكلمتها الأخيره...قلبها وجعها...وصدرها ضاق ع الآخر...
رفعت طوبى حاجبها وكملت تقول..
/ردي بالك تحسابيني سامحتك ولا تحسابي روحك درتي معاي شي شفعلك..اشرت عليها وهي تقول..اساسا انتي سبب كل شي صار..ابديها بسكوتك لعندك ماصورتيلي هداكا الفيديو في عرس صفاء وبعتيه لخوك..انت اللي حرضتيه ع اللي داره بعدين..
نزلت عيونها ودموعها طاحوا منهم..
نزلت طوبى يدها وقالت..
/لو تبيني نرحمك من الدعي عليك ديري اللي بنطلبه منك توا..
رفعت عيونها المدمعه فيها..
طوبى:درتك ساعدتيني ووقفتي معاي بش اطلقت من خوك..خوك اللي بعد ماخداني خطرله يرد ارملة خوه..فاهمه عليا!..
مسحت دموعها وهي تهز في راسها بإيجاب..
طوبى:هدا كله بش مانخليش اختي تحس بالذنب انها عطتني لناس ماتسوى..
نسرين بضيق..
/خلاص ياطوبى..
طوبى بتهكم..
/هدا اقل شي ينقال في حقكم..ع العموم اللي عندي قلته وانتي اختاري ياديري اللي قتلك عليه..يانقعد ندعي عليك لين نموت وصدقيني بعدها مش حتشوفي نهار ابيض..
ومشت من قدامها بتطلع من دار المعيشه وهي تقول بصوت عالي..
"فايزة انتي طلعت"..
طلعت وشويه ولحقتها فايزة بش تسقدها..
ونسرين في الدار تبكي بألم وندم...
خشت عليها فايزة..وقفت جنب الباب وهي تشوفلها بحزن..
وهي تبكي وتقول..
/قلتها لخديجه قلتها اخرتها مش خير اخرتها ندم وايام سود..
وقعدت تبكي بالعبره وخلت قلب فايزة يتوجع عليها قدمتلها وخدت في حضنها ونسرين شدت فيها بقوة وهي منهارة تماما...
🔺️🔺️في الوقت الحاضر🔺️🔺️
جبدت طوبى يدها وهي تقول..
/الحمد لله..
مشت طول نسرين من قدامها وخلتها تحاول تتماسك ع قد ماتقدر بش تبان عاديه قدام اختها..
لكن سدرة وقتها كل تفكيرها كان في صديقتها الراحله..كانت تراجي امتى تخف الزحمه بش تاخد نسرين ع جنب وتعرف منها تفاصيل موتها...
🍃🍃🍃
ومر الوقت..
وسدرة ع كرسيها تسمع في احاديث الجارات اللي اغلبها كانت عن الحرب..القصص اللي تسمع فيهم وجعت قلبها وغماته اكثر ماهو مغموم..
في الوقت نفسه...ركزت ع طوبى اللي تبان دارت مكانه ليها عند اهل الشارع..لاحظت منهم الاحترام والاعجاب بالذات وين جابوا سيرة المدرسه المفتوحه للنازحين..
مش هدا بس اللي لاحظاته سدره على طوبى..من اول ما جت وهي مركزه عليها كيف قاعده دير في المشهد في الحوش مع الجميع..حتى مع عمتها مطيره..
صح هي صاحبة الحوش فعليا..بس رياستها ع الناس اللي فيه ماكانش فيها سيطرة كله بالتفاهم والحب والاحترام..
هالشي فرح سدرة هلبه..خلاها تتأكد ان طوبى مافي شي يقدر يغيرها.. مافي شي يغير جوهرها الغالي..هي هي تقعد طوبى الكبيرة بقلبها وعقلها اللي ديما سابق سنها..
"ترا القيلا طويبه"
طوبى:خيرك!
سدرة بضحكه؛بنخش الحمام..
ضحكت طوبى وعطتها القيلا..
خدتها وناضت وهي تقول..
/خليك في مكانك نعرف طريق الحمام..ومشت وخلت طوبى تضحك عليها...
🍃وهي ماشيه بطريقها للحمام غيرت طريقها للكوجينه بش بتاخد شيشة مية تقرا عليها بش تغتسل بيها تفكرت ان مية الرقيه اللي عندها تمت...
لكن وهي خاشه سمعت هدرزة اميمه وصفاء وهما يغسلوا في الماعين..
صفاء:قالي في الوضع هدا مستحيل نبعتك للجامعه قعدت مكسده ع حمودي والمسلسلات التركيه..
اميمه:ترا قوليلي ع شن تتفرجي نبي مسلسل مليح نكسد عليه وقت البريك في الخدمه..
صفاء:توا نتفرج ع مسلسل مليح قديم شويه بس اول مرة نشوفه رومانسي ع اكشن اسمه***********..
اميمه بضحكه؛زبطته متفرجه عليه..
صفاء بضحكه:باهي ترا قوليلي البطل من يشبه!؟
ضحكت اميمه بعدين قالت..
/المهدي ولا؟!
صفاء هزت راسها وهي تضحك..
اميمه بضحكه؛والله قلتها حتى للبنات زيه حتى في الشخصيه..
صفاء:لكن وليدنا احلى..
ضحكوا الزوز..
"يابنات"
اختفت ضحكاتهم التفتولها طول..
سدرة ودموعها في عيونها..
/ترا شيشه مية النبع..
اميمه هزت راسها ومشت فتحت الدولاب طلعت وحده قربت بيها لسدره وعطتهالها..
خدتها سدره وهي تقول..
/صحيتي..
ومشت طلعت من الكوجينه..
صفاء بضيق:سمعتنا؟
اميمه بأسف؛الباين هكي...
🍃وفي الصاله..
طوبى ماهنهاش خاطرها زي مانقولوا قلقها ع اختها خلاها تنوض تشوفها..
طلعت من الصاله بطريقها للحمام لكن لما جت خاطمه من باب الكوجينه سمعت اميمه تقول..
"خديجة هادي ماريتش احقر منها في حياتي"
وقفت وقربت للباب وهي تسمع في صفاء تقول..
"لا وطلعت قايله لرقيه هي وامها مستحيل نخلوا المهدي ياخد عزوز صحتها وعقلها بالهون"
خشت عليهم وهي تقول بغضب..
/من اللي قالت هكي!؟
فجعتهم بخشتها قعدوا يشوفولها بصدمه..
هي سكرت الباب وقالت..
/قوليلي اللي سمعتيه كله ياصفاء ونبي نعرف من قاله بالزبط...
🍃واللي يحكوا عنها كانت في حوش بوها...
خلت امها في الكوجينه دير في السفنز ومشت لجناح مرت بوها..
هادي كانت فرصتها السانحه لتنفيذ مخططها اللي ليها شهور ماشيه فيه خطوة خطوة...
امها كانت تعرف نصه وباقيه اللي حتنفده توا ماعندهاش بيه علم ..
🍃خططت خديجه هالفترة تخلي امها مادخلش بوها في المشاكل اللي تصير بينها وبين سميره ولما يكون موجود تخلي روحها هاديه وتتعامل مع الوضع بتجاهل..في نفس الوقت هي تحسن علاقتها لحد ما بسميره بطريقه لاتثير الشك..
"علاش ياخديجه لشن تبي توصلي"
"تو يجي وقته وتعرفيه اللي نبي نوصله يام"
ورغم الحاح امها عليها مابتش تقول شي..ومغليه سكتت وهي تراجي بنتها شن بدير عارفتها تهني وحتاخد حقها تالت ومثلت..🍃
وصلت خديجه للجناح فتحاته بهدوء وخشت وردت الباب وراها..
مشت طول للحمام خشتله..شافت لسلة الحوايج..
قدمتلها وخدتها بعد مافتحتها قعدت دور ع مرادها اللي فيسع مالقاته..
رفعت بلوزتها فوق وطلعت من جيب سروالها كيسه سودا..
خدت بيها الحاجه اللي تبيها ولفتها بيها ودستها في حزام السروال..
ردت السله زي ماكانت..ومشت بسرعه طلعت من الحمام...
🍃🍃🍃🍃
طلعت طوبى من الكوجينه وهي معصبه مشت طول بإتجاه الباب وطلعت منه للجنان بش تاخد نفس..
🍃في الكوجينه..
صفاء بقلق:زعمه دير مشكله؟!
اميمه بإستياء:لالا ماتخافيش مادير شي تعرفيها انتي مش متهورة...
🍃هو الكلام اللي سمعاته طوبى من صفاء وصلها لدرجة من الغضب خلتها تفكر تشد نسرين وتحملها رسالة شديدة اللهجة توصلها لأختها لكن في اخر لحظه تراجعت عن هالفكرة متهورة..
بعد ماخدت نفس وطلعاته تلاته مرات..بدت تسبح همسا وهي تشوف لتاله كيف مقعمزة تقرا في كتابها الدارسي..
طوبى:خيرك تقري هني تاله؟
تاله:ابله سميرة قالت خليك هكي بش لما نرن الجرس تفتحي طول..
طوبى:قصدك مشت لحوشها؟
تاله:ايه..
عقدت طوبى حواجبها وهي تفكر...
🍃🍃🍃🍃
"شن ديري هني!؟"
هالسؤال كان من سميرة لخديجه بعد ماخشت لجناحها وشدتها طالعه من الحمام..
حالة خديجه كان يرثى لها..حالة المجرم اللي يقبضوا عليه بالجرم المشهود..
ارتعدت اوصالها...قلبها كاد يوقف من الخوف..صقع جسمها لدرجة حست سنونها بيصطكوا..
كانت جاحظه البصر وهي تشوف بخوف شديد لسميره اللي سألتها للمرة التانيه بصرامه وغضب..
/لأخر مرة نسألك شن ديري هني!؟
ولا كلمه..حتى النفس حست انه معاش يطلع من حالة الخوف اللي سيطرت عليها..
انتفظت فزعا لما سمعت باب الجناح يدق..
هزت سميرة راسها وهي تقول..
/ماتبيش تردي!؟ حاضر..
ومشت فتحت الباب ويخش محمد شنيبه اللي لما شافاته بنته حست الدنيا لفت بيها..
سكرت سميرة الباب وهي تقول..
/ريت بعيونك يامحمد! خشيت الجناح لقيتها طالعه من الحمام اسألها شن كانت دير!؟
نظرات عيون محمد نظرات غضب شديد وخديجه تشوفله وتبلع في ريقها..
سميره:مازال ماتبيش تتكلمي باهي...!
ومشتلها وبدت تفتش بيها حاولت دفها خديجه من خوفها غلبتها سميره..فتشت في جيوبها بعدين الحزام وطلعت من الكيسه..
ومحمد يشوف وهو يفرك في حبات السبحه بسرعه من الغضب والتوتر..
شافت سميرة شن في فالكيسه ضحكت سخريه وقالت..
/زي ماتوقعت!؟ وجهت نظرها ليها وهي تقول..ماارتحتش بكل للجو اللي ديري فيه خليتك ديري ماتبي نبي نشوف لوين بتوصلي وكان بالزبط زي ماتوقعت..اني اصلا طلعت من الحوش وايدي ع قلبي ولما قالتلي اختك من في فالحوش جيت نجري واللي خفت منه صار..تعرفي نقدر نعاقبك بطريقه عقلك مايتخيلهاش نرفعك لمكان معاش تولي منه بكل وهدا حقي ماحد يقدر يلومني لكن ع خاطر بوك وخوتك بنسكت ياخديجه..
بوها بغضب شديد قال..
/انتي شنو!؟ شن طينتك يابنادمه!؟ مش ساد الخراب اللي صار في جرتك مازال ماتبيش تهني روحك! لازدتي تمديتي وصلتي للكفر مرة وحده..لكن تعرفي الحق ع مني ع امك اللي ماعرفتش تربيك..امك هادي البلي كله من تحت راسها..وجاي بيطلع وقفاته سميره لما قالت..لاتربح بالله يامحمد لاتمشيلها ولاتكلمها المراة ماتندري ع شي..كان تندري ماتقعدش في الكوجينه دير فالسفنز...
شاف محمد لبنته بنظرات كره وازدراء بعدين قال..
/هالمرة غير كل مرة..
"لونموت حوشي يحرم عليك تخشيله"
اشر ع الباب وهو يقول..انتلفي اطلعي..
طول هربت وهي تمشي بسرعه وين وصلت في بوها شدها من ذراعها وصفعها بقوة بعدين قال..
/وبالله العظيم نحلف لو تصير حاجه ماضال الا حاطها في راسك ومتبري منك ومخليهم يديروا فيك اللي يبوه..
جبدها وفتح الباب ودفها برا..
هي اللي كانت ترجف مع بعضها هربت تجري من الحوش..
وامها اللي لاهيه بالسفنز ماحست بشي الا لما سمعت باب الحوش تسكر بقوة..
استغربت وبدت تنادي..
/خديجه..خديج..
🍃وسميره في جناحها تحاول تهدي راجلها اللي من الغضب ارتفع ضغطه..
طلعت تجري من الدار للكوجينه بش تجيبله دواه..
شافتها مغليه زاد استغرابها وخافت..
قعدت معاها بعيونها لين طلعت من حداها..لحقتها طول لين وصلت لجناحها..قعدت واقفه في الباب وهي تقول..
/محمد خيرك!؟
جاها صوته الغاضب وهو يقول..
"سكري الباب ياسميرة سكريه"
وتجي سميرة للباب وتسكره في وجهها..
مغليه بغضب وصوت هامس..
/ودرة ليك وليها..بعدين مشت وهي تتسائل..خديجة وين مشت !؟ شكلها هي اللي طلعت!..فتحت عيونها ع وسعهم وهي تقول..ان شاء الله مش واحد من خوتها صارتله حاجه!
ومشت تجري للكوجينه وين مافي تليفونها بش تتصل بيهم..
🍃🍃🍃🍃🍃
آذن المغرب..وحوش الواعر فضي من ضيوفه وقعدوا اهله...
بعد الصلاة..
خشت فاتن لغرفه باركتلها ع المولوده وعطتها الهديه والباقه وغرفه كانت معاها لينه في اسلوبها المرة هادي..
حداهم كانت نبيله اللي شادة بنت خوها وهي فرحانه بيها
فاتن بإبتسامه:بتجي شقرا
نبيله:جينات الواعرين واعره
ضحكوا غرفه وفاتن..
☘وفي الكوجينه..
هاديه ومطيره يتساعدوا ع العشي وهما يهدرزوا ع الجارات واحاديثهم...
☘في الجنان..
كانوا صفيه واميمه واريج وصفاء ومروة وحداهم تاله مقعمزات يهدرزوا ع عرس يوسف وشن وشن بيديروا فيه..
🍃لكن مقابل دار البنات..
كانت طوبى واقفه وهي في قمة القلق والتوتر..تراجي في نتيجة المواجهه بين اختها وصاحبتها...
🍃🍃🍃
ورا باب الدار ..
كانوا واقفات مع بعض..
سدرة مقابله نسرين وفايزة بيناتهم تمرر في نظراتها القلقه عليهم..
سدرة بصوت مخنوق..
/كنا اربعه..وهادي كانت الدار اللي ديما نقعمزوا فيها نهدرزوا نلعبوا نقروا فيها وياما بتوا معاي فيها..نزلوا دموعها وهي تقول..عيشة كانت صاحبتي قبلكم..كانت اختي عيشه اقربلي منكم..دار سري واكثر من يفهم عليا بعد امي..ياما لقينا بعض ووقفنا لبعض..كانت عندي اعز من فردوس هداكا الوقت..لعند ما..مسحت دموعها اللي نزلوا ع فمها وكملت تقول بنبرة مرتعشه..لعند ما خوك فرق بيني وبينها..
اصوات بكاء نسرين وفايزة كانوا هو بس المسموع..نسرين كانت حاسه بالموت حرفيا..
سدرة ببكاء:حكم عليها بالموت نهار خطبها بش يحرقني بيها وينتقم لغروره..خوك قتلها بالبطيء..بصوت عالي وهي تبكي وانفعال قعدت تقول..عيشه ماتت بالعرق يانسرين صاحبتي ماتت بالعرق واني قتلتها معاه قتلتها لما..شهقت بعبرتها وكملت تقول..قتلتها لما جبتها لحوشنا هداكا اليوم اسود وقلتلها وافقي عليه خوديه..كنت انانيه زيه بالزبط مافكرتش فيها مافكرتش فيها بكل..وطلعت منها آه وجع تقسم القلب..
🍃مش هما بس سمعوها كل من في الحوش سمعها...
تأثروا وقعدوا يبكوا بصمت..حتى فاتن..لكن طوبى ماقدرتش تبكي من الخوف..خافت ع اختها من الانفعال الزايد..
سدرة لتوا تعتبر مش متعافيه تماما جسديا ونفسيا قاعده تعبانه...🍃
تبدلت ملامح بكائها للغضب وهي تقول بنبرة غاضبة باكيه..
/قولي لخوك هو اللي ولى عندي ميت ..قوليله نادمه اشد الندم اللي حبيت واحد زيه..قوليله حتى الكره مايستهلاش مني..معاش نبي نعرفه مانعرفش واحد اسمه المهدي..مانعرفاش...وانهارت بالبكي..
نسرين معاش قدرت تتحمل طلعت تجري من الدار..
وكلهم لحقوها بعيونهم...ماعدا طوبى اللي كانت تشوف للدار بخوف وترقب لما معاش سمعت صوت اختها..
"سدرة..سدرة..تعالوا يابنات"..
خشت تجري واميمه ومطيره لحقوها..لقوا سدرة فاقدة الوعي في حضن فايزة...
🍃🍃🍃🍃🍃
نسرين وهي طالعه من حوش طوبى كملت طريقها وهي تبكي وشريط الذكريات التعيسه المؤلمه قاعد يمر قدام عيونها..
مااستاقظتش الا لما سمعت صوت راجلها وهو يعيط بإسمها..
"نسرين"
وقفت في مكانها..شافت جنبها لقت سيارة واقفه..
جاها راجلها يجري خداها في حضنه وقعد يمشي بيها ومش مهتم لحد من خوفه عليها..
ربيع بقلق:خيرك نسرين شن صار معاك!؟
نسرين بنبرة باكيه..
/نبي نروح..
"نسرين"
لما سمعت صوت خوها المهدي تبدلت ملامح وجهها للغضب وقالت..
/روح بيا ياربيع توا..
ربيع شاف للمهدي بإستغراب وقلق وهو يقول..
/حاضر..حاضر..
وخداها ومشي بيها للسيارة..
والمهدي معاهم بعيونه اللي كانت نظراتهم نظرات صدمه..
حالة اخته خلاته يفهم كل شي..يفهم ان شعرة الامل انقطعت وان اللي عاش عمر يتمناه حيقعد حلم بعيد نجوم السمي اقربله منه..
شاف سيارة ربيع وهي ماشيه..بعدين غير نظره لقهوة خوه جو عيونه في عيون محمد ولده اللي كان يشوفله بقلق وحزن..
غير نظره عنه ومشي بطريقه للحوش...
🍃ومن صدمة المهدي للرعشه اللي حصلتها اخته التانيه..
خشت عليها بنتها الكوجينه وتنفجع لما تشوفها ع الارض فاقده الوعي وفي تحتها بقعة دم....
🍃🍃🍃🍃🍃
"شن ياعيوني توا"
مسحت سدرة دموع طوبى وهي تقول..
/حالي باهي ياقلبي والله كويسه..تعالي هني تعالي..وخدتها في حضنها..
غمضت طوبى عيونها وشدت فيها..
مطيره بقلق:متأكده ياسدره..
سدرة:والله ياعمتي كويسه مافيا حاجه..
ع جية فاتن بتليفونها..
/خودي مختار يبي يكلمك..
فتحت طوبى عيونها..
سدرة بضيق؛علاش تقوليله؟
فاتن:غير ردي عليه توا..
خدت سدره التليفون وردت..
/هاه مختار..
"هاه سدرة خيرك شن صارلك؟"
تنهدت بألم وقالت..
/عرفت بوفاة صاحبتي يامختار اللي درقته حتى انت عليا..
"خفنا عليك من ردة الفعل واللي خفنا منه صار"..
نزلوا دموعها وهي تقول..
/الله يرحمها ويغفرلها..ماتخافش انت مافيا شي برا شوف حالك..
"تمام عطيني فاتن"
مدت سدرة التليفون لفاتن خداته وطلعت..
ع خشة صفيه بشيشه ميه مرقيه ووراها فايزة
..عطت صفيه الشيشة لسدرة وقالت..
/اشربي..
خدتها سدرة وطوبى تباعدت عنها بش تشرب براحتها..
بعد ماشربت سدرة قالت لفايزه..
/باتوا عندنا شراده.
بإبتسامه قالت فايزة..
/حاضر..
ابتسمت بحزن وهي تمسح في دموعها..
باستها طوبى من خدها بعدين ضمتها بقوة..
سدرة:قتلتيني..
ضحكوا من وسط دموعهم...
🍃🍃🍃🍃🍃
"اجهاض!!؟"
سميرة؛ايه اجهاض هكي قالي عبد الفتاح..
ابتسام بتعجب..
/ماقالتش انها حامل!..
عواطف:شكلها ماتندريش كان تعرف راهو قداش ليها ناشرتها..
نجمه؛ومرات هي ماتبيش واشبح شن درات بش طيحاته..
عواطف بتخوف:معقوله يام!
نجمه؛شن نسيتي بش جابت ولدها الاخير شن صار بينها وبين خوك..
ابتسام؛صح كلام عمتي..حتى وضعها مع سلفي محي مش تمام..
سميرة:ربي يهدي سرهم وخلاص..
نجمه:هو هدا...هيا سقدوا بالعشي هيا نبي نرقد..
ناضوا الثلاثه طلعوا من حداها..وهي قامت تليفونها واتصلت بمغليه..
☘☘☘☘☘
"والله ياولدي مانعرف طلعت من الحوش من غير ماتقولي"
عمر بنظرات شك حاده..
/بالك انت اشبح شن داير..
ضيق محي الدين عيونه وقال..
/شن قصدك!؟
نضال بإنزعاج:خلاص ياعمر اسكت وانت يامحي فوته مادوراش وبرا شوف مرتك..
رمي محي الدين عمر بنظرة حاده بعدين مشي ومغليه لحقاته...
نضال بعصبيه:خير عمك انت!؟
عمر:يعامل فيها معامله حقيرة ياراجل بعيني شفته يومها في السيارة يهزب فيها..
نضال؛لما تشكي اختك ادخل وبعدين حتى هي ماشاء الله عليها..
سكت عمر وهو يغلي من الغضب..ونضال حاله من حاله بس كان يحاول يحكم عقله...
🍃سمع المهدي باللي صار في خديجة مااهتمش لأمرها نهائي هو توا مش طايق يسمع اسمها..
اما نسرين من لما روحت رقدت وراجلها اللي سمع بوضع اختها ماباش يقطع عليها نومها ويخبرها يبيها ترتاح بعد ماارهقت نفسها بالبكاء الشديد...
🍃🍃🍃🍃
بعد صلاة العشاء..
روحوا فاتن ونبيله وهاديه وصفاء وقعدوا صفية وفايزة وبناويتها...
☘في الصاله فرشوا طوبى وسدرة وفايزة وحداهم جنه اللي كانت ناويه الليله تقيم السهريه..
طارحه العابها وتلعب ومش في عينها النوم..
🌼سدرة وهي تشوفلها بإبتسامه..
/راقدة للمغرب خدت غايتها في النوم..
طوبى:تو بترقد قبل الفجر بساعه..
فايزة بضحكه:جرينه ع قولة جدي علي..
سدرة بضحكه؛مسميها جرانه؟
طوبى بإبتسامه:هدا ماينادي فيها..
ضحكت سدرة..
طوبى:ايه حقه تسلم عليك نجاح الصيد..
سدرة:بنت عمي الصيد!؟
طوبى:ايه قاعدين هي وراجلها وعيلته في العجيلات..
سدرة هزت راسها وهي تقول..
/سلمها وسلم من جاب سلامها..سبحان الله النصيب نجاح تزوجت ودارت صغار..
فايزة؛واختها المسكينه بختها بالهون تزوجت مرة تانيه واطلقت بسرعه..
سدرة بأسف:لاحول ولاقوة الا بالله..
فايزة؛قعدت فترة نفسيتها تاعبه لكن بعدين ولت زي قبل..
سدرة:شن جوها مع صفو؟
فايزة:زي الصاحبات وتموت في حمودي..
ابتسمت طوبى..
سدرة:باهي كويس الحمد لله..ضحكت وقالت..وانتي ماناشبك حد..
ضحكت طوبى..
فايزة:اسكتي بالله قبل الحرب شدها في جرتي واحد من ****** باهي اللي جت الحرب وفكتني منه..
سدرة وهي تضحك..
/باهي طلع من وراها حسنات هالحرب..والمركز شن صار فيه..
تنهدت فايزة وقالت..
/اللي جابولي اخباره قالوا ماوصل فيه شي الله اعلم عاد حق ولاكذب..
طوبى:استودعتيه عندك ربك معاش تخممي فيه خلاص..
فايزة؛ونعم بالله..
🍀وعدت الليله بالهدرزة اللي حاولوا يخففوا بيها عن سدرة شويه من حزنها وجنونه ياما ضحكتهم بحركاتها وهدرزتها..
اما باقي اللي قاعدين في الحوش بين اللي راقد وبين اللي فايق يعاني زي غرفه ومطيره اللي تساعد فيها ع رعاية الصغار...
وما إن جت الساعه تلاته الا وكل من الحوش غارقين في النوم في العميق..
🍃لكن شن يجيب النوم لعيون المهدي..
يبي يعرف شن صار يبي يفهم..يبي يرسى ع بر..حتى هو تعب خلاص ومعاش عنده حيل..
هو حاليا مايبي شي غير انه يوصل رساله عائشه لصاحبتها بس معاش طامع بأكثر من هكي...
☘☘☘☘
ويطلع صبح يوم الجمعه..
كان هادي ورايق بعض الشي في حوش الواعر..
ومشحون وكله توتر في حوش شنيبه..
لامحمد ولاسميره قدروا يتجاوزوا اللي صار..
الحكايه وصلت للسحر...!
🍃اما خديجه اللي كانت حداها امها في حجرتها الخاصه في احدى العيادات..
خديجه بتعب:عركه عاديه بيني اني ومحي يام ع خاطر الحمل مانبيشي..
مغليه بشك:لكن هو ماقالش هكي!
خديجه:تحشم منك..
مغليه:غير قولي يامراة شن دايرلك!؟
خديجه بإنزعاج:والله مادار حاجه يام خلاص..وبدت تبكي..
شدت امها يدها وهي تمسح عليها وتقول بحزن وشفقه..
/خلاص يابنتي خلاص سكتت..
وخديجه تبكي بصمت وفي نفسها تقول..
"الله لايربحك ياسميرة ياحقيرة"
🍃🍃🍃🍃🍃🍃
وبعيد عن ليبيا....
قدام البسفور في اسطنبول المدينه التركيه..
كانوا نجاه والجالي مقعمزين يتفرجوا ع البحر وهما ياكلوا في سندويشات السمك والصمت مسيطر عليها..
شويه وشاف الجالي قطوسه تمشي وتشوفلهم ناض من مكانها ومشالها وعطاها تاكل ونجاه تتفرج عليه..
🍃هو كان يتأمل في القطوسه كيف تاكل وتجي بين عيونه ذكرى بعيده..
لما هربت قطوسه طوبى لحوشهم وخلت صاحبتها تجي دور عليها..
وهو يذكر في هالموقف كان قلبه يدق بقوة..وابتسامه خفيفه باديه ع وجهه..
قام عيونه للبحر..شاف لون عيونها المحير اللي كان غارق فيه..تنهد من قلبه وناض وولى للمقعد..
نجاة:نروحوا؟
الجالي وهو يتفرج ع البحر..
/كان تبي تروحي روحي..
سكتت نجاه ورجعت شافت للبحر بصمت..
هو غير نظره عن البحر وشاف لجهة معينه ابتسم بألم لما تفكر ذكرى حلوة صارت بيناتهم فيها..
تفكر كيف في لحظه جنون رفعه لحضنه وقعد يلف بيها وهي تضحك من قلبها..صوت ضحكتها الحلوة قاعد يسمع فيه..
النتهيده هالمرة كانت بحرقه من الاعماق..
شافتله نجاه وقالت..
/خيرك؟
الجالي:كلمتي الصغار؟
نجاة:امس قاعدين عند جداهم لطفيه..
هز راسه بصمت..
نجاه:نطلب منك طلب
شافلها..
نجاه بنبرة باكيه؛خوديني في حضنك..
اشفق ع حالتها..قربها ليه وقعد يمسح ع ظهرها وهي شدت فيه وبدت تبكي بصمت..
بالنسبه لنجاه توا الجالي اغلي من تملك وماتملك معاش تقدر تتحمل تعيش من غيره ثانيه وحده..
لكن هو كان هايم بعشق ام العيون الحايره ولى عايش ع خاطرها ع امل انها تعطيه فرصه تانيه..وجنة بنتهم مخليه هالأمل عنده كبير هلبه..
..لكن اللي مقطوع منهم الرجاء..!
🍃"يانسرين ماديرليش هكي تكلمي وقولي شن صار"
ربيع بضيق:تكلمي يانسرين ريحي بال خوك..
خدت نفس وقالت بحزم..
/نبيك بعد اللي تسمعه مني تسكر ع موضوع سدرة وتنساها عمرك كله..
لاحظت في عيونه نظرة الم وجعتها..
بحزن قالت:ياخوي سدرة خلاص بعد ماعرفت بموت عيشه مسحاتك من حياتها بكل صاحبتي ونعرفها كويس هالمرة غير كل مرة والله يامهدي والله البنت كارهاتك في عيونها الكره محملاتك ذنب عيشه واللي صار فيها وحملت نفسها حتى هي ذنب..قالتهالي بالحرف الواحد خوك هو اللي ولى ميت عندي..معاش نبي نعرفه..
يسمع فيها وهو يشوف للفراغ بنظرات حزن وألم ولمعة الدموع باينه فيهم..
وربيع بنظره معاه وهو موجوع ع حاله..
نسرين بتوسل:بالله عليك ياوخيي خلاص انساها تربح..
يدوب هز راسه بعدين ناض ومشي بيطلع من الشقه وربيع ناض وراه وخلا نسرين تذرف في دموع الالم والحسرة..
🍃وصل لوطا ومش عارف كيف وصل وطلع من العمارة وربيع وراه..
شاف يده اللي شاد بيها المفتاح ترجف..
قربله خداه منه وشده من ذراعه رفعه للسيارة..ركبه بعدين ركب جنبه..شغل السيارة وتحرك...
في الطريق تكلم المهدي وبدي يطلع اللي في قلبه..
/ماطلبت شي في حياتي غيرها..والله ياربيع خطبتها قريب خمسه ولاسته مرات وهما ردوني..مش عارف علاش!؟ علاش ماكانوش يبوني ناخدها!لهالدرجة مانستاهلهاش!!؟ عطوها للبراني واني اللي تربيت ع ايديهم مابوش يعطوهالي وهما يعرفوا قدرها وقيمتها عندي..وهي ياربيع هي زادت كسرتني لما رخت بيا..رخت بيا وخلتني وعطتني ظهرها..ديما زاهده فيا سدرة ياربيع ديما زاهده فيا..بلع ريقه المر وهو يقول..ياريت قدرت ننساها ياريت والله حاولت ماقدرتش..وصلت لهالعمر وماقدرتش نحب في حياتي شي قدها البنت هادي...اه ياربي اه..هالحب اللي بيخيلني نموت ناقص عمر..ياريت البنادم يقدر يحكم في قلبه ياريت..
ربيع كان يسمع فيه وهو متألم للغايه..ماباش يقاطعه كان يبيه يفضفض مايقعدش كامد في قلبه..
مسح المهدي بإيديه ع وجهه وهو يقول بألم من وسط قلبه..
/اااه ياصاحبي..ااه..اني درتها في عمري حطيت ذنبها وذنب عايشه الله يرحمها في رقبتي..واهو ربي يخلص فيه مني..
نزلت من عينه دمعه مسحها طول..بعدين نزل مرش سيارة وقعد ياخد في النفس..
🍂🍂🍂🍂🍂🍂🍂
فُؤادي بَينَ أَضلاعي غَريبُ
يُنادي مَن يُحِبُّ فَلا يُجيبُ
أَحاطَ بِهِ البَلاءُ فَكُلَّ يَومٍ
تُقارِعُهُ الصَبابَةُ وَالنَحيبُ
لَقَد جَلَبَ البَلاءَ عَلَيَّ قَلبي
فَقَلبي مُذ عَلِمتُ لَهُ جَلوبُ
فَإِن تَكُنِ القُلوبُ كَمِثلِ قَلبي
فَلا كانَت إِذاً تِلكَ القُلوبُ
قيس بن الملوح....
#حسابات_قديمه
#طوبى
...يتبع....
