#طوبى "جنة طوبى"
#جمان_فريد
#الجزء_111"الأوراق المتساقطة/ورقة رحيل2"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#الصلاة_على_النبي
أكمل وأجمل وأفضل وأشمل صيغة للصلاة على النبي ﷺ🤎
اللهم صلَّ على محمد وعلى آل محمد
كما صليت على إبراهيم وعلى آل إبراهيم
إنك حميد مجيد،
اللهم بارك على محمد وعلى آل محمد
كما باركت على إبراهيم وعلى آل إبراهيم
إنك حميد مجيد.
🤎صلوا عليه وسلّموا تسليما ﷺ🤎
اللَّهُمَّ صَلِّ وسَلِّمْ وَبَارِكْ عَلَى سَيِّدِنَا مُحَمَّدٍﷺ وَعَلَى آلِهِ وصَحْبِهِ وَسَلِّمْﷺ
🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 " هل ستذكريني بعد الموت..؟
إنني أعرف أنكِ ستفعلين، و لكن الأعوام ستمر، و يبرد قلبك، و يغزو الشتاء روحك.. و سوف تنسيني يا صغيرتي "
دوستويفسكي|🖤🍃
________________________________________
من الباب الخارجي لحجرة المكتب..
خش الاقجم بعد مااذنله مختار بالدخول..
كان مختار مقعمز ورا مكتبه يشرب في مليسا ويسمع في موسيقى كلاسيكيه..وقفها لما دق الاقجم الباب..
وقف الاقجم قدام المكتب وقال..
/صار زي ماتوقعت بالزبط عبد الرؤوف بن موسى توفى في محور ******بعد ماطاح عليهم هو وجماعته قاذف صاروخي..
هز مختار راسه بعدين قال..
/هدا حد عمره..
الأقجم قعد يشوفله وهو ساكت..
ومختار يبادل فيه بنظرات امتعاض..حرك راسه متسائلا بمعنى..
"شني!؟"
ضحك الاقجم وقال..
/نبي نعرف كيف تجي معاك مزبوطه هكي!؟
مختار:مش ديمه تجي معاي مزبوطه والدليل اني كنت مداير خطه بديله لو ماصارش من اللي فكرت فيه..
الاقجم؛باهي اني نبي نعرف كيف عرفت انه حيدير هكي!؟
شاف مختار في الفراغ وهو يقول..
/خبرتي في الحياة خلتني نعرف اللي حواليا كويس ونفهم كيف يفكروا..بالذات عبد الرؤوف..الانسان لما يكون ضعيف اراده ومايقدرش يغير الواقع متاعه يهرب منه لأبعد نقطه..
بانت في عين مختار لمعة الدمعه وهو يتكلم قام عيونه في الاقجم وقال..
/وهو هرب للموت..
هز الاقجم راسه بصمت وهو يفكر في كلام مختار..
تنهد مختار وخبط بإيديه الزوز ع الطاوله خبطه خفيفه بعدين قال..
/برا وتي السيارة بنمشي نقوم بأصعب مهمه يديرها اي حد في المواقف هادي..نبلغ الخبر..
الاقجم هز راسه وقال..
/حاضر..
ومشي طول طلع من الباب الخارجي للمكتب..
شاف مختار لكوب المليسا خداه وشرب ماقعد منه دفعه وحده بعدين خدي تليفونه وحط ع رقم خاله المحجوب واتصل بيه..
🍃🍃🍃🍃🍃
"تحسي الجو ولى ربيعي"
اميمه وهي تشوف للورد الاصفر اللي يطلع مع قرب الربيع قالت..
/مادام الورد هدا بدي يطلع معناها خلاص خش الربيع..
تنهدت طوبى بضيق وقالت..
/واجعني حال غرفه واريج..غرفه بالذات حالها هي وصغارها يقطع القلب..
اميمه:تعرفي ياطوبى رغم ان وضعها صعب صح لكن في رأيي هكي خير..اني شاهده ع اللي صار بينها وبينه من اول ماتزوجوا وضعهم مع بعض من الاول فيه خلل كبير..هي عافرت ع قد ماتقدر بش تستقر في حياتها وللأسف ماقدرتش تحقق هالاستقرار بسبب الماضي..
طوبى:ايوه..الماضي..الماضي خلا عبد الرؤوف مش قادر يحترمها ولايقدرها برغم حبه ليها،وحياة زي هادي صعب تستمر..
اميمه:صدقتي..اني مريت بتجربه تشبهها شويه وانتي شاهده عليها...
طوبى هزت راسها بصمت وهي تفكر بقلق في اللي جاي..
🍃🍃🍃
والمحجوب لما جاه الخبر كان وكأنه صاعقه ونزلت عليه
طلع من مكان شغله وتوجه للحوش وطول الطريق وهو يذرف فالدموع بصمت وقلبه موجوع ع عبد الرؤوف ووجعه يزيد لما يفكر في ردة فعل نبيله..
🍃🍃🍃🍃🍃
نبيله كانت في حوش مقعمزه في مكتبها تخدم ع قضية..
خدمت عليها لمده تلاته ساعات متواصله..صابها الارهاق والتعب..
قامت تليفونها وشافت الساعه بعدين قالت..
/قريب يروح المحجوب..
ناضت من مكانها وهي دير في تمارين لرقبتها ومشت طلعت من المكتب متوجهه للكوجينه..
🍃اول ماوصلت فيها وخشتلها..
خش المحجوب للحوش..كان يتحرك في حركة ثقيله بعض الشي من حمل الخبر اللي جايبه..
سكر الباب ومشي بإتجاه الكوجينه عارفها لما يقرب موعد مرواحه تبدا في تجهيز سفرة غداه..
وصل في الكوجينه..وقف في بابه وهو يشوفلها كيف تسقي الغدي..
بلع ريقه وقال..
/نبيله..
ابتسمت وقالت..
/بكرت شويه اليوم..والتفتت شافتله..
شافت عيونه باين فيهم اثر البكي ولونهم محمر شويه وملامح وجهه ماتتفسرش..
قلبها انقبض..تعكرت ابتسامتها وهي تقول..
/خيره وجهك هكي!؟
قدملها..وقف قدامها..شد ايديها الزوز وهو يمرر في نظره حواليه يفكر كيف بيبدا الكلام..كيف بيوصل الخبر بدون مايصدمها صدمه قويه..
نبيله بدت دقات قلبها تتسارع من الخوف قالتله..
/محجوب..تكلم قول شن في!؟
شاف لعيونها وقال..
/اسف اسف جدا..اضطريت ندرق عليك شي يخص عبد الرؤوف..خوك من حوالي اربعه ايام انضم للقتال في الحرب..
نزلت ايديها وسحبتهم منه بهدوء وهي تشوف لعيونه بنظرات خوف وقالت بنبرة مخنوقه..
"مات!"
نزل المحجوب عيونه وهز راسه بإيجاب..
غيرت عيونها عنه للفراغ..برغم انها سبقاته بتوقع الخبر قبل ليقوله،لما أكد عليه ماقدرتش تتسوعب..
قام المحجوب عيونه فيها وقال..
/أمر الله يانبيله..إنا لله وإنا إليه راجعون..
هزت راسها ونزلاته ومشت طلعت من الكوجينه وهو معاها بعيونه..بعدين طلع وراها ولحقها..
شافها خشت للصالون..
قعمزت ع اقرب كنبه وحطت ايديها ع رجليها وهي تشوف للفراغ بصدمه..
بدت تمسح ع رجليها وانفاسها تتسارع..
قدملها بخوف قعمز قدامها ع رووس صوابعه وهو يقول..
/نبيله حبيبتي..ادعيله..
طاحوا دموعها وهي تقول بصوت مرتجف..
/خوي الصغير هدا..ربيته مع امي..هو ماقعدلي..هو ماقعدلي من عيلتي..علاش يدير هكي علاش!؟ كيف يدير فيا وفي صغاره هكي كيف!!؟..هو قالي مش ماشي هو قال بنقعد ع خاطر صغاري..علاش هكي علاش...
"علاش خلاني بروحي"
وبدت تخبط ع رجليها وهي تبكي وتقول..
"علاش..علاش..علاش"
ناض المحجوب قعمز جنبها وضمها وهو يقول..
/هدا ماكاتب ربي..هادي ساعته وهدا اجله يانبيله..ادعيله يانبيله ادعيله..
ونبيله تبكي بالعبره في حضنه وهي تقول بألم..
/ااه يامبروك ااه..الله يرحمك ويسامحك الله يرحمك ويسامحك هديت ماقعد من حيلي...
زاد ضمها المحجوب اللي ماقدرش يتحكم في دموعه وقلبه مفطور من الحزن..
🍃🍃🍃🍃🍃
"دسوا بنتي عن الصقع دسوا"
هادي غرفه بعد ماغيرت لبنتها حوايجها وزينت راسها بستريتشه لونها وردي غمتها بالبطانيه وضمتها وقعدت تلاعب فيها..
وولادها مع بنت خالتهم..
يلعبوا بألعاب التركيب وهي مرة مرة تراقب فيهم..
🍃برا من دار المعيشه اللي كانت فيها..
كانت طوبى ماشيه مع مختار للمربوعه..
خشولها وهي وقفت وقالت بخوف..
/شن في!؟
نزل الكمامه وحط ايديه في جيوب البالطو وقال..
/عبد الرؤوف راجل اختك توفى..
جمدت طوبى وعيونها جحظوا بصدمه..
هو اللي يمشي يحارب خبر موته متوقع لكن هالتوقع لما يولي واقع مع حد قريب علينا تصديقه في البدايه يكون صعب..
مختار:وصلني الخبر قبل نص ساعه من توا..
بلعت طوبى ريقها اللي كان ينزل في حلقها زي الحنضل وقالت بنبرة مخنوقه..
/متأكد!؟ اللي جابلك الخبر متأكد منه انت!؟
هز راسه وقال..
/للأسف خبر اكيد..
غمضت عيونها بشده ومسحت بإيديها ع وجهها..
فتحت عيونها والدموع طاحوا منهم وهي تقول..
/إنا لله وإنا إليه راجعون..
لفت ومشت بتطلع..وهي ماشيه جت بين عيونها مواقف كان فيهم عبد الرؤوف سندها الوحيد بعد الله لما ساعدها بش تخلص من الجالي في الوقت اللي فيه الراجل اللي مفروض يكون خوها طيحها في ايديه..
تفكرت اخر كلام صار بينها وبينه عن غرفه واخر جمله قالها..
"أنتم اللي سامحوني"
لما وصلت في الباب..
حطت ايديها ع وجهها وانهارت بالبكي قعدت تبكي بالعبرة ومختار واقف يشوفلها بعدم رضا..بعدين قدملها بش يحضنها صدماته بالحركه اللي دارتها دفاته بيدها عنه دفه خفيفه ومشت بسرعه طلعت وهي تبكي..
طلع وراها وهو يبلع في ريقه..وجعاته الحركه اللي دارتها وجعاته بقوة..
خشت للحوش وهي تبكي وهو وراها وتتلقاها اريج اللي كانت طالعه من الصاله..
لما شافتها تبكي انفجعت وقالت..
/خيرك!؟
طوبى ببكي..
/عبد الرؤوف..
شهقت اريج بصدمه وقالت..
/ماتقوليش مات بالله عليك!
انهارت طوبى مرة تانيه..
نزلوا دموع اريج وهي تقول بألم وصدمه..
/الله يرحمه ويسامحه الله يرحمه ويسامحه ماعندي مانقول غير الله يرحمه ويسامحه..
🍃ع جية غرفه من دار المعيشه وهي تقول بفجعه..
/من هو هدا!؟
سكتت طوبى وهي تشوفلها بألم..
واريج حطت يدها ع فمها وقعدت تبكي..
غيرت نظرها عنهم وشافت لمختار..
هو بنظرة بان فيها الأسف قال..
/عظم الله اجرك في راجلك..
سمعت اللي قاله..سمعاته..وكانت متوقعاته...
لكن وين سمعاته تداخلت بداخلها مجموعه من المشاعر خلوا ردة فعلها تبان وكأنها دخول في حالة صدمه..
قعدت واقفه تمرر في نظرها عليهم بس..
طوبى بخوف:غرفه!؟
ضيقت عيونها وقالت..
/مات مات خلاص..معاش في عبد الرؤوف !؟
نزلت اريج عيونها وغمضتهم وهي تبكي بشده..
تقوسوا شفايفها وهي تقول..
/معناها مات خلاص..وبانت ع وجهها ملامح البكي وقعمزت مرة وحده ع الارض وانهارت بالبكي..
جوها طوبى واريج كل وحده فيهم ضمتها وقعدت تبكي معاها وهما يسمعوا فيها تقول..
"ياريتني سمعت كلامك ياسدرة..ياريتني مزقته ولوحته"
اريج ومختار استغربوا الكلام اللي قالاته..
لكن طوبى اللي فهماته قعدت تبكي بعبرتها..
🍃وصوت بكاهم وصل لحوش جدهم..
سمعوه هاديه وصفيه واميمه مشولهم يجروا..
لما وصلوا في باب الحوش وخشوا عليهم..
شافوا حالة البنات شبه فهموا اللي صار..
اميمه بألم؛عبد الرؤوف!
مختار:للأسف..
حطت اميمه يدها ع فمها وقعدت تبكي..
وهاديه بكت معاها لكن صفيه جو عيونها ع الصغار اللي طلعوا وشافوا حالة امهم وباين في عيونهم الخوف..
مشتلهم خدتهم وخدت معاهم جنه وخشت بيهم للدار وسكرت الباب..
مهاب قال..
"ماما "
ضمتهم صفيه لحضنها وهي تقول..
/مافيها شي ماما حبيبي مافيها شي ونزلوا دمعوها بألم واصوات البكي واصله لمسامعها..
🍃ويوصل الخبره لسدرة..
لبست وشاحها وبالطوها كيف مايجي ولبست كندرتها عفاسي ومشت بسرعه طلعت من حوش شيابينها لحوش طوبى..
لحظات ولحقتها سميرة تجري وهي تبكي...
🍃🍃
لما خشوا عليهم لقوا غرفه تبكي بكاء شديد وهي فحضن طوبى..
سدرة ودموعها ينزلوا..
/غرفه..
تباعدت غرفه عن طوبى وقالت لسدرة بألم..
/ياريتني سمعت كلامك يومها ياريتني...
وصلت فيها سدره وقعمزت قدامها وضمتها وقعدوا يبكوا هما الزوز..
وسميرة كانت حاضنه اريج وتبكي هي وياها بالعبره...
🍃هدا كله ومختار واقف في جنان حوش جده ع جده يشوف في ردة فعله بعد ماوصله الخبر وهو متفاجئ..
الحاج علي اول ماسمع تباعد عن مختار وعطاه بالظهر كان باين عليه يدمع ويمسح في دموعه...
هالمشهد مع اصوات البكاء اللي جايه من نساوين عيلته صدماته..
ماتوقعش ردة الفعل هادي بعد اللي صار بينهم وبينه..
الحزن اللي سيطر عليهم كان حزن عيله ع ولدهم مش نسيبهم!!..
اللي شافه مختار توا خلاه يسأل نفسه لو صارت فيه حاجه يوما ما حيحزنوا عليه!!؟
🍃🍃🍃🍃🍃
وانتشر الخبر اللي فجع كل من يحب عبد الرؤوف ع راسهم ربيع وعبد القيوم..كانت علاقتهم بيه قويه وياما تشاركوا الهموم مع البعض..
وزاد المهدي ع مابيه..كان يقدره ويحترمه برغم الخلاف اللي صار بينهم..
لكن شمت الجالي فيه وفرحه..تخلص من وحده من اكبر العقبات اللي كانت واقفه بينه وبين طوبى وتوا يراجي تنزل مصيبه تانيه ترفع مختار وتفضيله طريقه ليها...
🍃🍃🍃🍃🍃
" مادام العزي بيكون في حوشه غرفه لازم تروح وتبدا عدتها غادي"
طوبى قالت هالكلام لسدرة وفايزة اللي كانوا واقفات قدامها..
رشفت سدرة وقالت..
/وتولها حوايجها وحوايج صغارها..
هزت طوبى راسها ومشت بإتجاه الدار..
مسحت سدرة براحتي ايديها ع جبهتها وهي تقول بألم..
/ااه ياربي ياغفور يارحيم..ياغفور يارحيم..
فايزة والدموع ينزلوا من عيونها..
/قدر الله وماشاء فعل الحمد لله ع كل حال..
تنهدت سدرة بحرقه وقالت..
/الحمد لله..الحمد لله...
🍂🍂🍂
لما خبروا غرفه انها لازم تروح لحوشها وتكمل عدتها غادي انعصر قلبها من الألم هي كانت رافضه تولي للحوش هداكا بعد ماطلعت منه ويقدر الله انها توليله لسبب خلاها تتمنى لو ماكانتش خشتله في حياتها نهائي...
🍃جهزولها حوايجها وحوايج صغارها..
ولبست عبايتها وخمارها وعطتها طوبى قفازات من عندها لبستهم..وطلعت بصغارها في سيارة طوبى وخواتها وبنت اختها معاها لحوشها..
🍃اول ماخشتله بصغارها انهارت مرة تانيه..بكت بألم شديد..
وهما يبكوا معاها..والصغار عايشين حالة الحزن مع امهم وفي نفس الوقت كانوا خايفين...
🍃🍃🍃🍃
وتعبا حوش عبد الرؤوف بأهل غرفه والجيران اللي كان اول من جي منهم نجمه وبنتها وكنتها صفاء..
وناض ع نجمه جرحها اللي قاعد جديد وياما بكت مع غرفه وهي تعزي فيها...
🍂🍂🍂🍂
وتوصل سيارة المحجوب اللي كان جايب نبيله نزلها ودخلها للحوش..وتتلقاها سدره اللي طلب منها خالها تطلعلها..
وتحضن سدرة نبيله..نبيله اللي كانت تبكي بصمت وملامح التعب باينه ع وجهها..كانت تحضن فيها سدرة لكن هي من التعب وهدة الحيل ماقدرتش تحضنها..
مشت بيها سدرة ودخلتها للحوش..
وعيون نبيله دور فيه وهي تذرف في الدموع..
🍃اول ماخشت ع المعزيات..
جوها صفيه وهاديه وفايزة..عزوها وهي ع حالها..
بعدين جوها اميمه وطوبى واريج وعزوها..هي كانت دور بعيونها في غرفه مالقتهاش..
شويه بانت عليها وهي جايه من جهة الديار.
لابسه قفطان"فستان" حوش لونه اسود في زخرفه بيضا وشاربه سودا وآثار البكاء باديه ع وجهها..
شافت نبيله ارتسمت ع وجهها ملامح البكاء ومشتلها طول..
ضمتها وهي تقول بحرقه..
"آه"
ونبيله انهارت بالبكي وضمتها بقوة...
بكاهم كان بحرقه وألم شديد..خلوا كل الحاضرات يبكوا معاهم..
طوبى معاش قدرت توقف مشت قعمزت ع كرسي وحطت ايديها ع رجليها وهي منزله راسها وتبكي بالعبرة...
🍂وع المشهد المؤلم خشوا مطيرة وفاتن دموعهم انهمرت وبدوا يبكوا بألم...
🍃🍃🍃🍃
والمشهد كان مؤلم جدا حتى في المستشفى اللي جابولها جثة عبد الرؤوف..
مشوا غادي المهدي والمحجوب ولما وصلوا ..
شافوا حالة حسين..كان مقعمز ضام ايديه في بعض وهو حاطهم ع رجليه ويشوف في الفراغ ودموعه تنزل من عيونه..
قربوله ووقفوا قدامه..حط المحجوب يده ع كتفه وقال..
/حسين..
رفع حسين عيونه فيه وهو ساكت..
المحجوب بألم..
/شن صايرله بالزبط!؟
نزل حسين عيونه وقال بصوت مبحوح..
/راسه..حط يده يسار راسه وقال..من هني محروق..نزل يده وحطها ع عيونه وقعد يبكي بألم..
المهدي بألم..
/لاحول ولاقوة إلا بالله..
المحجوب ودموعه في عيونه..
/اخته تبي تشوفه..
نزل حسين يده وقال بنبرة مخنوقه..
/بالكفن مش حيبان..
المهدي:اللي كانوا معاه كلهم راحو!؟
حسين؛في زوز حالتهم خطيره والباقي كلهم راحو..بألم كمل يقول..كنت معاهم قبلها شربت معاهم الشاهي وهدرزنا خليتهم يغنوا معاه وهو يشجع فيهم..رجع حط يده ع عينه وهو يقول ببكي..
/مش عارف كيف صار بعدين لتوا مش قادر نستوعب..
المهدي وهو يسمع فيه ويشوف فحالته فهم ان علاقة عبد الرؤوف وحسين ماكانتش عاديه..
حسين ضابط في الجيش خش حرب قبل..ياما شاف ومر عليه يعني مفروض مايأثرش فيه اللي صار لهالدرجه..
لكن لأنه اللي راح هالمرة عزيز وغالي تأثر لدرجة خلاته يخلع فيها ثوب الجلافه والقسوة للرجل العسكري وتبان حقيقته رجل حنين ومرهف المشاعر يفيض شعوره بالحزن من قلبه ويطلع للعلن...
🍃🍃🍃🍃🍃
وقداش كان مؤلم لقاء سميرة ونبيله وهي تعزي فيها..
عاشوا نفس الجرح اللي حيقعد لاخر أيام العمر معلم في قلوبهم..
🍃وقداش كان صعب حال فردوس وآلاء بعد ماوصلهم الخبر..بعاد مش قادرين يوصلوا في غرفه ويشاركوها حزنها ويخففوا عنها..
قاعدين يكلموا فيها هاتفيا وهي فدار النوم بكائهم خلاهم يسكتوا عن الكلام لدقائق طوال واريج واقفه مع خالتها تسمع فيهم وهي تبكي معاهم بألم...
🍃🍃🍃🍃🍃
"شن حالك توا"
نضال بصوت متعب بعض الشي..
/الحمد لله..
محمد شنيبه وهو يحاول يخفي ألمه ويشد دموعه ع قد مايقدر قال..
/تقدر توا تحكيلي كيف صار الحادث؟
نضال:حكيت لعمر..
محمد شنيبه..
/معليشي عاودلي نبي نسمع منك..
يدوب ابتسم وقال..
/تحسابني..جيت بننتحر!
محمد بإبتسامه حزن..
/وين نندري عليك قلت مرات وسوسله الشيطان ودارها..
غمض عيونها وفتحهم وهو يقول..
/مايقدرش عليا..
ضحك بوه وقال..
/واضح واضح..
نضال؛بوي..
رد عليه؛نعم!؟
نضال:امي..شن صار..فيها..لما سمعت!؟
محمد؛شن بيصير فيها ياولدي غير البكي والنديب ولولا انك قاعد في قسم الرجال راهي باتت معاك..
يدوب ابتسم وقال..
/باهي امتى نطلع!؟
قاله؛زي ماقال الدكتور بعد 15 يوم..
عقد حواجبه وقال..
/هالدكتور..مش عارف..علاش حاسه مدرق عليا حاجه..لما سألته عن حالتي..حسيته تلخبط..
محمد شنيبه..
/شن بيدرق عليك ياتاعب...
قاطعه نضال وقال:بوي..اني راضي بحكم ربي..شن مايجيني منه راضي..قولي بالله عليك..خلوني نعرف من توا...
تنهد بوه ومسح بيده ع لحيته بعدين قال..
/يدك..بلع ريقه..يدك صار فيها مشكله بسيطه تتعالج مع الوقت..
نضال :كيف يعني!؟ معاش تتحرك!؟
محمد؛مؤقتا ياولدي مش ديما..
غير نضال نظره للحيط اللي مقابله وسرح بتفكيره..
خطر ع باله كلام صديقه اخر مرة قبل ليطلع من عنده بش يروح للحوش..
🍃نضال كان ناوي يروح يومها ويرجع يطلب السماح مرة تانيه من امه ويقنعها تتراجع عن فكرة زواجه من بنت خالته ويطمنها في نفس الوقت انه مش ناوي ياخد اريج..
وطول الطريق كان يفكر في الكلام اللي لازم يقوله لأمه بش يلين قلبها ويقنعها بيه ولأنه انشغل بالتفكير سهي عن الطريق وتطلع قدامه سيارة فجأه وقظه ليها صوت المنبه متاعها حاول يهرب منها وطلع عن الطريق وفقد القدرة على التحكم بسيارته اللي انتهي بيها الامر وهي خاشه في احد اعمده الانارة الخشبيه"بالو" الضي"🍃
ظاهر اللي صار معاه شر لكن هو في هديكا اللحظه كان ع يقين تام انه خير وخير كبير..غير نظره ليده بعدين ابتسم وقال لبوه..
/كفارة ياحاج..
استغرب بوه وهو يشوفله..
رد نضال نظره لبوه وقاله..
/تكفير ذنوب..واللي يجي من ربي ..مرحبتين بيه..
الكلام لما قاله حس بطمأنينه رهيبه بانت في نبرة صوته ووصلت لقلب بوه اللي ابتسم وقال..
/ونعم بالله..
🍃🍃🍃
"ااه ياميمتي ااه غير وين كانت مدسوسه هالايام السود"
هادي خديجه تندب ع حال امها عند راسها وامها وهي راقده ع السرير في دار نومها تسمع فيها بألم وقهر..
وخديجة مكمله في وصلة النديب وهي تقول..
/من قال مغليه الجالي اللي كانت زي جبل يولي هدا حالها الله لايسامح اللي كان السبب الله لايسامحه..
نزلوا دموع مغليه وهي تشوفلها كيف تعدل في الدفايه..
ع خشة نسرين بالدواء مشت لأمها وهي تقول..
/هيا موغي ياعسل جي وقت الدوا...
خديجه قعدت تشوفلها كيف تعاند في امهم بش تعطيها الدواء تنهدت بقهر تنهيده مسموعه ومشت طلعت من الدار..
🍃🍃🍃🍃🍃
رقدت بنتها وحطتها في سريرها ودموعها تنزل..
بعد ماحطتها مشت بتاخد ملايتها بش تصلي العشاء وصلت في الدولاب حطت يدها ع الباب وسحباته بش طلع ملايه صلاة منه...
عيونها جو ع حافة برواز لصورة..مدت يدها ليها وطلعتها مم تحت الحوايج قربتها ليها وهي تتأمل في الصورة اللي صاحبها رحل عن الدنيا اليوم..
كانت لهداكا الشاب اللي غرفاته قبل 10 سنوات...
《في عندي كلمة حاصله داخل كان ماقلتهاش اشبح يصير فيا..عندك علم انك حلوة هلبه احلى وجه نشوفه في حياتي
مانكذبش عليك عرفت بنات قبلك لكن مافيش وحده فيهم زيك فيك براءة هكي زي البنيه الصغيرة وعقلك كبير وقلبك نحس فيه اصفى من الحليب ماتقوليش كيف عرفت واضح من عفويتك وتصرفاتك...》
《نحبك..ونبي نخطبك..تعرفي ان عندي شقه واتيه فوق حوش اماليا وماناقصني شي والحق ياربي انتي وليتي معاي وين مانمشي مش قادر نحولك من تفكيري اقسم بالله حتى النوم ..النوم..والله معاد قادر نرقده..وعد مني ندللك دلال نتحدا راجل في الدنيا يدللة لمراة》
حطت يدها ع فمها وغمضت عيونها وهي تبكي بشدة وفي نفسها تقول..
"ياريت ماعرفتني ولاعرفتك"
ردت الصورة لمكانها وهي تبكي بالعبره..خدت ملاية وسكرت الدولاب ومشت وقفت بإتجاه القبله..
وهي تبكي..
لبست الملايه..
وهي تبكي..
رفعت ايديها وكبرت بصوت يرجف.
وبدت الصلاه ودموعها ماكفوش عن النزول..
ومع اول سجده بدت تدعي بصوت مسموع..
(يارب اغفرله وارحمه..يارب هو حارب بش يدافع عن ناسه ماكانش معتدي ياربي يارب تقبله شهيد وعوضه بالجنه وحورها يارب)...
هالدعاء سمعاته طوبى وهي خاشه عليها بتشوفها..
ولت طلعت وردت الباب وهي تبكي بألم..مشت لدار الصغار خشتلها وسكرت عليها الباب وقعدت تبكي بشدة...
🍃🍃🍃🍃
وولت طلعت غرفه مرة تانيه للصالون ومشت قعمزت جنب نبيله..حطت نبيله يدها ع يد غرفه وغرفه شدت عليها والدموع تسيل...
وعيون سدرة تشوف فيهم بحزن والدموع مغرقتهم..
شويه جت طوبى قعمزت غيرت سدرة نظرها ليها شافت الحزن الشديد اللي بادي في وجهها عيونها تورموا وحمروا من البكي..
غيرت نظرها عنها وهي تفكر قداش عبد الرؤوف مكانته كبيره في قلوبهم رغم اللي صار بيناتهم اكثر تنين خلوها تفهم ان اللي دايره معاهم عبد الرؤوف شي كبير..
جدها اللي نزل دموعه عليه..وطوبى اللي حزنها يبان شديد عليه..
ويقطع عليها تفكيرها اصوات عياط فجعتها..
"ووك علينا ووك..ووك..راح الباهي راح مبروك راح وليدي..نارك نار يامبروك نار"
غرفه اول ماسمعت هالاصوات بدت ع وجهها ملامح الضيق لاإراديا ونبيله ناضت من جنبها وهي تبكي وطلعت من الصالون..
وتتلقى عمتها ريسه وبناتها اللي كانوا يندبوا ويخبطوا ويريشوا..
ضمة عمتها وقعدت تبكي معاها وعمتها مازال تندب..
لميس يخبطوا ويخبشوا في وجوهم ويعيطوا لميس بالذات باينه وكأنها انجنت..
واريج واقفه تشوفلهم بعدم رضا بعدين سيبتهم وخشت للصالون...
🍃وخدتهم بعدين نبيله ودخلتهم لدار المعيشه وقعدوا فيها وهما منهارات تماما،ومااجتمعوش بغرفه ولاشافوها لتاني يوم...قبل الجنازة...
🍂🍂🍂🍂
جابوا ثابوت عبد الرؤوف لحوشه بش تودعه نبيله..
غرفه ماقدرتش تطلع تشوفه ماكانش عندها عزم..
ولا عمته قدرت تشوفه حتى هي..
طلعت نبيله ومعاها سدرة وصلت لباب المربوعه وقعدت واقفه قدامه..
وفي المربوعه جنب ثابوت عبد الرؤوف كان واقف المحجوب..
حطت نبيله يدها ع قلبها اول ماجو عيونها ع التابوت..
قدمتله بخطوات خايفه لين وصلت فيه..
لما شافاته..رفعت وشاحهة بإيديها الزوز وحطاته ع عيونها وهي تقول بحرقه..
"آاه"
والمحجوب ربع ايديه وهو شاد دموعه..
نزلت الوشاح وهي تبكي..بعدين قعمزت ع ركابها وهي تقول..
/حبيبي..ياريتك جيت تسمع في الكلام ياعمري ياريت..
قربت يدها اللي كانت ترجف لخده حطتها عليه وقالت..
/ياروح وخيتك..ربي يريحك عنده يارب..حبيبي..حنقعد ديما نحكي لصغارك عنك مش حنخليهم ينسوك بكل وتو نخليهم يسمعوا الكلام اللي فيه مصلحتهم ومايكونوش زيك..
ورجعت غطت عيونها بالوشاح وهي تبكي بالعبرة..
قربلها المحجوب ونهضها وضمها لحضنه وقعد يمسح عليها بحنان وهي تبكي في حضنه بألم..
شويه وطلعها لسدرة اللي كانت تبكي حتى هي..خدتها وخشت بيها داخل...
🍃🍃🍃🍃
واللي زي عبد الرؤوف حتما حتكون جنازته مهيبه..رغم الخوف من الوباء الا انه جنازته كانت مزحومه بالناس..
اصحاب وجيران قدم واقارب من بعيد وبعض المعارف اصحاب المراكز في البلاد..
🍂🍂🍂🍂
اثناء صلاة الجنازة الوحيد اللي ماقدرش يشد دموعه حسين كانوا ينزلوا منه لاإردايا...
وقعد يذرف في الدموع لعند ماجت لحظه الدفن..
رفعوه هو وعبد القيوم ونزلوه للقبر...
حسين لما طلع منه قعد يشوف لوجه عبد الرؤوف وتجي بين عيونه ملامح ابتسامته لما قاله..
"خليتهم لعمهم"..
قعمز ع رووس صوابعه وحط ايديه ع عيونه وقعد يبكي بصمتواللي حواليه تأثروا بحالته..
وقعد المحجوب ينزل عليه في التراب وهو متألم لأبعد حد وساعدوه ربيع وعبد القيوم اللي يعتبروا اقرب الأصدقاء ليه بعد اسكندر..
🍂وانحط ع قبره الشاهد..
والمعزين بدوا يمشوا بالواحد لعند ماقعدوا المحجوب وربيع وعبد القيوم وحسين اللي قاللهم الحاج علي..
🍃علي الواعر:مازال نبي نقعد حداه شويه..
حسين بصوت مبحوح..
/خلاص اني قاعد معاه توكلوا..
بصمت مشوا المحجوب وربيع وعبد القيوم...
عبد القيوم بألم..
/مازلت مش مصدق..
ربيع ودموعه في عيونه..
/فاجعه اقسم بالله فاجعه..
المحجوب بحزن..
/هدا حال الدنيا كلنا ليها مانقولوا غير الله يرحمه ويغفرله..
هما الزوز قالوا مع بعض..
"الله يرحمه"
🍃وحدا قبر عبد الرؤوف..
كان الحاج علي رافع ايديه ويدعي سرا ومقابله حسين مقعمز ع روس اصابعه وهو رافع ايديه ويدعي ورجعوا نزلوا دموعه...
🍂🍂
وغرفه في دار نومها مسكرة عليها..
مستقبله القبله..تصلي وتدعيله في سجودها ربي يثبته عند السؤال..
وهدا كان حال طوبى وهي في دار الصغار..مقعمزه تدعيله من وسط قلبها...
اما نبيله ركبتها سدرة للشقه بش ترقد في جو فيه شويه من الهدوء بعد ماهلكت من البكي...
في الوقت اللي فيه عمتها وبناتها قاعدات ينوحوا ويندبوا...
🍃🍃🍃🍃
بعد العصر..
تعبت الخيمه بالمعزين والحوش كذلك...
🍃في الصالون... 🍂 كانوا نساوين العيله كلهم موجودات مع المعزين وبنات الجيران هما اللي يعولوا ع الضيافه واللي يشرفوا عليهم فايزة وسميره...
🍃خشت عواطف عواطف بسفرة اللبن ووراها وحده من بنات الجيران بالتمر..
وهي تفرق لما وصلت في ريسة عمة عبد الرؤوف ردتها وهي تقول بحرقه..
/لاعاد نبي شي ولاعاد عندي نيه في حاجه بعد راح وليدي..ااه يامبروك ااه..
لميس بنبرة باكيه..
/شن يبرد ناره يما شن يبردها..
قامت سدرة عيونها فيها..واريج شافت لغرفه..
لقتها منزله عيونها لخاتم التسبيح اللي كانت لابساته وقاعده تذكر في الله بصمت وجنبها نبيله تشوف في الفراغ ودموعها ينزلوا..
شويه شافت لعمتها لما سمعتها قالت..
/جانا يانبيله اسبوع اللي فات..هدرز علينا وضحكنا وهو طالع اضبطني وباس ع راسي..تضبيطته حسيتها تضبيطة حد يودع لكن كذبت روحي..ياناري عليك ياولدي ياناري عليك في هالدنيا ماعندكش زهر..ماكانش مرتاح في حياته والهم ديما باين في وجهه..
بنتها الكبيره..
/ياروحي عليه وع بخته...
لميس ببكي..
/اصلا كانهو مرتاح في حياته شن يرفعه للحرب..
بدت نظرات الموجودات تتوجه لغرفه..كلها نظرات ريبه واتهام..
سدرة واريج ومطيره وصفيه كانوا يغلوا من الغضب..
وهاديه كانت تشوف لريسه وبناتها بنظرة فيها ازدراء..
نبيله برغم انزعاجها ماقدرتش تقول شي ماعندها حيل للكلام..
الوحيده اللي حرقها ماسمعت وشافت وماقدرتش تسكت..
طوبى..
/الله يرحمه ويغفرله كان راجل محرار ومغيار من اول ما بدت الحرب وهو يمنع في روحه بالسيف عنها ع خاطر عويلته لكن حميته وغيرته غلبوه..هو هكي من لما عرفناه هكي راجل فزاع وقلبه كبير لين نموت ماننسى وقفته معاي ولاكيف كان معانا..كانلنا خونا مش نسيبنا الله يرحمه ويسامحه،ان شاء الله يرتاح عند ربي غاديكا الراحه ياخالتي الدنيا عمرها ماكانت دار راحه...
رفعت غرفه عيونها اللي كانوا يذرفوا في الدموع وهي تشوف لطوبى بحب وامتنان..
ونظرات سدرة واريج ليها كانت نظرات فخر..
عكس نظرات نبيله لعمتها وبناتها اللي كانت نظرات ضيق..
ريسة وبناتها بعد كلام طوبى احتفظوا بصمتهم وملامح وجوههم تبين عدم رضاهم..
بالذات ماقعدوا يسمعوا في اللي حواليهم كيف يترحموا ع عبد الرؤوف ويدعوله بسبب كلام طوبى عنه...
🍃🍃🍃🍃🍃
الساعه 12:00منتصف الليل..
في صالة حوش محمد شنيبه..
كانوا نسرين وسميرة مقعمزات يهدرزوا...
نسرين؛لما خشيت حسيت الجو مكهرب شويه..
سميرة:انتي خشيتي بعد الدوة اللي صارت ع طول حتى اني ماحضرتهاش لكن مطيره حكتلي باينه في وجوههم الحرافه..
نسرين؛البنات طول ماهما مقعمزات رافعات الحاجب..
سميرة:ماعجبهمش رد طوبى يبوا يقولوا مايبوا ومايرد عليهم حد صحه ليها عرفت كيف ترد عليهم بأحترام..
نسرين:طوبى عندها شجاعه ادبيه وتعرف كيف ترد عليك وتسكتك لاتعيط ولاتهزب بكل هدوء تعطيك كلمات في الجناب بكل احترام..
سميرة بضحكه..
/شكلك ياما واخده في جنابك..
نسرين قعدت تشوفلها من فوق لتحت بطرف عينها وسميرة تضحك عليها..
"سميرة"
نسرين؛نوضي لراجلك نوضي..
تنهدت سميرة وقالت..
/تصبحي ع خير..
نسرين:قدامك كل خير..
ومشت سميرة طلعت من نسرين وخلت نسرين مع روحها لين سرحت بتفكيرها..
فجأه رن تليفونها قاماته..فتحت الخط وردت..
/ايوه حبيبي..
"ايوه عمري كنتي راقده؟"
نسرين:لامقعمزه في الصاله بروحي نراجي في اتصالك المهم قولي شن جوك توا..
"شن بيكون جوي والله نشوف فيها مظلمه في عيوني وجعني هلبه يانسرين والله من امس لليوم حاس روحي مخنوق"
نسرين بحزن:الله يرحمه ويغفرله..
🍃🍃🍃🍃
"حسين تحسيه متأثر هلبه"
سدرة وهي تتكلم بالتليفون في دار الصغار..
/حكولي عن صحبتهم كانوا صحاب هلبه..
"ايه لاحظت قبل لكن مانحسابش صحبتهم قويه لهالدرجه..حتى الحاج علي متأثر قالوا قعدوا هو وحسين حدا قبره يدعوله"
سدرة بحزن..
/الله يرحمه ويغفرله..مختار ماحضرش ولا!؟
"ايه ماحضرش.."
سكتت سدرة شويه بعدين انهدت بالبكي..
والمهدي تنهد بحرقه وهو يسمع في صوت بكاها..
🍃🍃🍃🍃🍃
"غدوة بنمشي مادخليش فيك"
مختار بحزم:اني قلت لا..تمشي يوم الفرق ساعه من الزمان وتروحي..
فاتن بضيق..
/غلط يامختار غلط..معقوله نمشي زي البرانيه اول يوم نقعد ساعة ونروح واليوم ماتخلنيش نمشي وتبيني نمشي نهار الفرق ونقعد ساعه ونروح كيف يجي هكي بس!؟
مختار تأفف بملل وقال..
/مش خايفه ع عيلك؟
قعدت تشوفله بشي من الخوف..
مختار:الكورونا تودره وتودرك..
فاتن؛لكن ليبيا لتوا مافيهاش كورونا..
ضحك نص ضحكه بتهكم..
فاتن بضيق..
/بتخلي موقفي محرج هلبه قدام ماليك..
مختار رفع حواجبه وقال..
/مختار بيرقد..حط راسه ع المخده وغم روحه بالورغان وقال..مختار رقد..
تأففت بضيق ورقدت حتى هي وعطاته بالظهر...
#اوراق_متساقطه
#طوبى
...يتبع....
