#طوبى "جنة طوبى"
#جمان_فريد
#الجزء_108"كانون الثاني/2020"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#فضل_الصلاة_الإبراهيمية
🌼وإذا لزمت الصلاة الابراهيمية واكتفيت بها عن باقي الأذكار فاعلم أنك لزمت أفضل الأذكار وأفضل الدعاء وأفضل العبادات
يكفي أن الصلاة على النبي هي العبادة الوحيدة التي تجعلك في إتصال مباشر مع الله والنبي والملائكة
فأي فضل يعادلها ؟!!🌼 🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃شيء غريب لم أستطع أن أذرف الدمع، لكن روحي كانت تتمزق 🍃
________________________________________
حوش محمد شنيبه..
في دار المعيشه..
كانت مغليه متكيه تتفرج ع الأخبار وخديجه مقعمزه جنبها لاهية بتليفونها..
ع خشة المهدي وهو يقول..
/السلام عليكم..
ردت عليه امه وهي تشوفله واخته وهي لاهية بالتليفون..
/وعليكم السلام..
قعمز وشاف للشاشه لقاهم يتابعوا في اخبار الوباء الجديد..
مغليه:رد بالك ولدي المرض خطير ع اللي عندهم القلب ديما حافظ ع روحك..
حك حاجبه وهو يقول...
/حاضر..يام..نبي ندوي معاك في موضوع..
قامت خديجه عيونها وشافتله..
مغليه ناضت قعمزت وهي تقول بقلق..
/راك تقولي خوك عمر جاه هالمرض!؟
المهدي:لايام مش هكي..وبالمناسبه عمر روح امس وقاعد في مصراته عند واحد صاحبه..
مغليه؛معاش فيها سفر خلاص الوضع برا يخوف..
المهدي؛حتى هو قال هكي..المهم..يام اني بنتزوج..
ابتسمت خديجه وقالت.
/واخيرا فكرت في مصلحتك..
مغليه وهي مبتسمه..
/كويس تهنيني عليك..باهي قولي تبيني اني نخطبلك ولااختك؟
المهدي؛لا اني اخترتها وخديت موافقتها وجيت نعطيك علم..
تعكرت ابتسامة مغليه وشافت لخديجه لما سمعتها تقول..
خديجه وهي مضيقه عيونها بشك:
/من هي!؟
تنهد وقال..
"سدرة المنتهى"
قعدوا يشوفوله بصمت وهو يمرر في نظره بيناتهم...
بعدين تنهد مرة تانيه وقال..
/الموضوع المنتهي بالنسبه ليازي ماقتلك جيت نعطيك علم..
خديجه بعدم استيعاب..
/شن تقول يامهدي!؟ بعقلك انت!؟
المهدي بإنزعاج:انتي خليك ع تركينه بالله..
شافت لأمها بصدمه وهي تفور وتغلي من الغضب..
عقدت مغليه حواجبها وقالت..
/بيعطوك هما بعد اللي صار بينا وبينهم!؟
المهدي؛ هدانصيب يام نصيب مايوقف في وجهه شي مهما كان..
مغليه هزت راسها هي رافعه حاجبها بعدين قالت..
/وين بتسكنها إن شاء الله!؟
المهدي:في الشقه..
خديجه ضحكت بسخريه..
المهدي تجاهلها وقال..
/عارفك مش حتمشي تخطبيها..بنرفع عماتي ونسرين بش يطلبوها..يعز عليا لكن شن بندير الله غالب..
مغليه؛عادي عندك تتزوج من غير رضا امك؟
المهدي:رضاك مفروض في كل شي الا في الحاجه هادي يام..جنيت ع نفسي مرة ومش حنعاودها مرة تانيه سامحيني ..
وناض ومشي طلع من حداهم..وهما معاه بنظراتهم اللي كلها صدمه..
خديجه بعدم استيعاب..
/يام شن هدا!؟ شن اللي قاعد يصير بالزبط!؟
ناضت مغليه من غير ماترد عليها وتوجهت لدار النوم..
🍃وسميره في جناحها اللي فضلت تقعد فيه تحسبا لأي شيء كانت تراجي في ردة فعل اشبه بالعاصفه وهي تدعي..
"يارب سلم سلم"
🍃🍃🍃🍃🍃
"شن شعورك"
هالسؤال كان من فايزة لصديقة عمرها..
تنهدت سدرة وجاوبت تقول..
/مش واضح..مش عارفه بشن نحس بالزبط.
فايزة بإبتسامه..
/طبيعي يصير معاك هكي انتم قصتكم قصه عمرها 25 عام..
سدرة:يااه يافايزة بالفم ساهله تنقال 25 عام..لكن اللي ريناه فيهم يبي 25عام تانيات بش نحكوا عنه..
فايزة:صح..تنهدت بإبتسامه وقالت..انتي توا عيشي اللحظه وبس..تخيلي روحك رجعتي بالسنين 22عام امسحي كل شي من ذاكرتك توا وفكري فيك انتي والمهدي بس..
نزلوا دموع سدرة وهي تقول بإبتسامه ألم..
/ياريت يافايزة ياريت نقدر ندير هكي..
فايزة بضيق..
/نحس فيك مش فرحانه وكأنك مجبورة؟
مسحت دموعها وقالت..
/لالا مش هكي..بس مش قادرة نفرح هديكا الفرحه صعب بعد كل اللي صار من قبل 18عام لليوم صعب تكون فرحتي كامله..
سرحت فايزة وهي تتفكر في اليوم اللي لمتهم فيه سدرة بش تطلب من عائشة توافق ع المهدي..
هداكا اليوم كان من أصعب ايام حياتهم الاربعه مستحيل ينسوه بأدق تفاصيله...
رشفت سدرة وهي تقول..
/ماعندي مانقول توا غير ان شاء الله خير..
شافتلها فايزة وقالت
/إن شاء الله...
🍃🍃🍃🍃🍃
"من الاخير يامغليه اي شي يخص المهدي مانبي حد يوصل فيه وشن مايبي يدير اللي فيها راحته يديرها واني معاه"
مغليه بحمق:اكيد هديكا الشلولحه وراها
قاللها بتهديد وحزم..
/اسمعي جاي..اني كبير العيله هني الشور شوري والكلمه كلمتي وحكمي هو اللي ماشي والمهدي يجي بعدي ع طول كلمته كلمتي وحكمه حكمي وشن مايبي يدير..واللي مش عاجبه اللي قلته توا رجله والباب..
مغليه التزمت الصمت وهي تشوف لراجلها بحده بعدين قالت..
/مالا خلاص اني طالعه منه الحوش هدا..
رفع حواجبه ونزلهم وهو يقول..
/زي ماتبي..
ومشي طلع من حداها وخلاها مشت للدولاب طلعت منه شنطه وهي تقول..
/حوش مش لاقيه فيه قدري مانقعدش فيه..
🍃وكلمي يامغليه الجالي وقوليله يرفعك لحوش خوك وديري ساعة سودا اقلبي فيها الحوش ع اللي فيه..
وسميره في جناحها تسمع فيها وتعلق بإزدراء ع كلامها..
/غير كيف كان متحملك محمد بس..
" خليتهالك واسعة وعريضة..دوم عليك عيلة الواعر واللي يجي منهم"
"يام تعوذي من الشيطان غلط اللي ديري فيه غلط"
"الغلط قعادي هني بعد هداكا اليوم ياخديجه اني اللي نزلت من قيمتي اني"
"غير لا يام تربحي لا"..
سميرة؛شكلها انتلفت..
"حسبي الله ونعم الوكيل في خرابات البيوت العامرة"
سميرة بغيظ:ااه يامرارتي من هالحقيرة ربي يزيدك ع مابيك يالفعة اللفعات"
وتسمع باب دار خديجه ينخبط بالقوة قالت بإزدراء..
/سحيقة..
🍃🍃🍃🍃🍃
"طلعت مع عمي الجالي توا"
تنهد ومسح وجهه بإيديه وهو يقول..
/اخرتها ترضى وتولي امي ونعرفها..
محمد بضيق..
/المهم انت ماتكدرش روحك..
ابتسم ع جنب وحط يده ع كتف ولده وقال..
/مادورش..مسح بيده ع شعر ولده من الخلف بعدين قربه ليه وطبع قبله جبينه..
خدي محمد يده من ورا راسه وباسها..بعدين باس راس بوه وقال..
/ربي يحفظك ويطول في عمرك..
طبطب المهدي ع كتف ولده ومشي طول للدار النوم كان هارب بدموعه عنه..
ومحمد دموعه هربوا منه وقعد يمسح فيهم..
🍃مهما يقعد الامر صعب عليهم لكن زي مايقولوا الحي يبي والميت يبي..وفي النهايه هادي وصية امه🍃
🍃🍃🍃🍃
وسدرة في هديكا الليله رجعت قرت رساله عائشه مرة واتنين وتلاته..
في هلبه اسباب مكدرة فرحتها ومنها احساسها بالذنب تجاه عائشة...
تقرا في رسالتها وتعاود بش تنهي هالاحساس وترتاح منه..
تبي تحمل نفسها هالمرة مسؤولية تنفيد وصية صاحبتها..
🍃صاحبتها الميته ليها مايقارب العامين وبرغم انها خدت الراجل اللي تحبه حتى وان كان بدون ارداتها..
وبرغم انها قبل لتموت وصتها ترجع لحب عمرها وتعيش معاه..
وبرغم ان سدرة مالهاش اي ذنب في أي شي من اللي صار مع عائشه لكن طيب اصلها وعشرتها خلوها تحس توا وكأنها بتخون ذكرى صاحبتها..
وفي وقتنا هدا نلقوا الصاحبه تخون صاحبتها بضمير مرتاح وتخرب حوشها وتاخد منها راجلها وحياتها كلها وتعيش عادي جدا ولاكأنها دايرة حاجه..🍃
🍃🍃🍃🍃🍃
"كيف!!"
الجالي بحده؛وطي صوتك..
نجاه بصدمه؛خيره خوك هدا هبل!؟
لبس الجالي توب البيجامه وقال..
/تكلمي كويس خيرلك وبعدين هادي امور ماتخصناش كل حد حر في حياته..
نجاة بعدم استيعاب..
/قصدك عندك عادي امك تسيب الحوش!؟
شافلها وقال..
/امي تبي تضغط ع المهدي فقط لاغير الحوش مستحيل تسيبه..
ومشي للسرير خشله وهو يقول..
/اطفي الضي..
مشت طفت الضي وهي تفكر بصدمه بالمصيبه اللي حتنزل ع راسها..
عارفه كويس ان الجالي مازال يبي طوبى لكن اللي مطمنها شويه استحالة رجوعها ليه بعد اللي صار بيناتهم..
والخبر اللي سمعاته توا نسف الطمأنينه كلها وخلا ناقوس الخطر يدق عندها..
🍃مشت خشت السرير وهي تشوفله كيف عاطيها بالظهر..
مش قادرة ترقد وهي تتخيل في طوبى ولت لحياتهم من جديد والجالي بش ترجعله يتخلى عنها هي..
"والله لو ديرها ياجالي ندير فيكم اللي مايندار"
والجالي جنبها هايم في عالم الاوهام اللي مخليه سعيده سعادة المدمن لما ياخد جرعة مخدر...
🍃🍃🍃🍃
وطوبى في هالوقت تحت شباكها وضي القمر خاش عليها منه..
كانت تلقي في اخر نظره ع منشور احكام الطهارة اللي جزأته لثلاته..
ونزلت حاليا او جزء منه بعد مانزلاته دعت في نفسها..
"اللهم انفعني وانفع بي اللهم اجعله عملا خالصا لوجهك الكريم"
طلعت من الصفحه وخشت لحسابها الشخصي..
كتبت منشور فيه حتى هو ونزلاته...
( توقيت الله مثالي في كل شيء حتى لو لم نفهم الحكمة في التأخير .🌸💜)
اول من تفاعل مع المنشور سدرة ابتسمت طوبى من قلبها لما قرت تعليقها اللي كتبت فيه..
(ونعم بالله..ربي مايحرمني منك ياقلبي)
تفاعلت مع تعليقها وردت..
(ولامنك ياعمري)
وهلت عليها التعليقات اللي من زينب واللي من عبير صاحبتها واللي من ايمان اخت عدي واقبال اخت ايمن وحتى ابله شروق علقت..
الباقي اكتفوا بالتفاعل بس ومنهم صفيه اللي ليها فترة معاش شاركت منشورات طوبى ولامنشورات عبد القيوم..
كانت تبي ولد خالها يحسم أمره..
🍃ياريته كان ساهل راهو حسمه من زمان🍃
☘☘☘☘☘☘
تاني يوم...
كان عقد قرآن حواء ماقدروش يديروا اي مظهر من مظاهر الاحتفال لكن الشيخ دار وليمه كبيرة للإشهار...
لما جوا اهله يروحوا بيها سلمت ع العيله فردا فردا..
لكن وين وصلت في طوبى ضمتها بقوة..
طوبى وهي شاده دموعها..
/حي عليك ايديا طاحوا واني نمكيج فيك..
ابتسموا اللي حواليهم وهما متأثرين..
تباعدت حواء وهي تقول..
/ربي يسخرلك الأرض ومن عليها ربي يجازيك خير الجزاء ع اللي درتيه معاي ومع صغاري..
مسحت طوبى دموعها وهي تقول لأهل الشيخ..
/بالله روحوا بيها لراجلها فيسع..
ضحكوا وحواء ضحكت معاهم..
هاديه بإبتسامه؛ماتخمميش في الصغار في عيونا
☘بيقعدوا العشرة الأيام الاولى من زواج امهم عند عيلة الواعر☘
حواء بإبتسامه:ربي مايحرمني منكم يارب..
:هيا حواء راجلك يتصل..
نزلت خمارها وهي تقول..
/بالسلامه..
كلهم ردوا عليها بأصوات متقطعه..
"بالسلامه"..
هاديه:ربي يهنيكم...
وخدوا حواء وطلعوا ليها من الحوش..
بعد ماتسكر الباب طوبى قالت..
/استودعها الله..
جتها سدرة خدتها في حضنها..
طوبى ضمتها وهي تقول..
/الفال ليك قريب بإذن الله...
ابتسمت سدرة وهي تفكر في اللقاء اللي حيصير بين جدها ومحمد شنيبه بعد صلاة المغرب...
🍃🍃🍃🍃🍃
"قالت ماتبيش عرس..نهار واحد بس يعقد عليها ويروح بيها رايها ان هالوقت مش وقت فرح"
محمد شنيبه هز راسه وقال..
/عندها حق..عندها حق..
علي:محمد..بعد اللي صار حطيت ايدي في ايدك مرة تانيه وعطيتكم بنت من بناويتي ونوصيك عليها وصيه الله لايسامحك لو مادرتش بيها..سدرة احسبها بنتك يامحمد لو انظلمت انصفها وخودلها حقها..
محمد شنيبه بشي من الضيق والاحراج..
/اللي صار قبل مستحيل يتكرر ياحاج ريح بالك من الناحية هادي..ونقولك طمن قلبك ع الآخر ولدي المهدي لايظلمها ولايرضالها بالظلم..
تنهد وقال..
/إن شاء الله..إن شاء الله..
محمد شنيبه:ع هكي ياحاج اكيد حددتوا موعد قراية الفاتحه..
علي:ايه..في اخر واحد..
محمد:كويس كويس تو نشوف المهدي ونحددوا اليوم غدوة
في الفضانيه إن شاء الله...
🍃🍃🍃🍃🍃
وخبر خطوبة المهدي وسدرة توسعت دائرة الناس اللي علمت بيه من العائله للأصدقاء..
ربيع كان مندهش جدا وفي نفس الوقت فرح لصاحبه فرحة كبيره..محمود اللي يخدم عنده في المطحن فرحته للمهدي كانت اكبر من فرحته بأخته حنان..
سامي ورغم انه مالاش وقت طويل يعرف المهدي لكن قصته اللي عرفها عنه خلاته يفرحله لدرجة هداه تصوير يوم عقد القران...
لكن..
عبد القيوم ماقدرش يفرح..الخبر خوفه...
🍃عبد الرؤوف:والله من سابع المستحيلات..
عبد القيوم وهو يهز في رجله بتوتر وعصبيه..
/مافيش مستحيل ياعبدالرؤوف ياما منهم وصلت بينهم لوين وين وبعدين ردوا لبعضهم..حتى لو كان مش بإرداتها حتلقى روحها مجبورة تردله عشان بنتها..
عبد الرؤوف؛ لالا ياعبدو لا..نعرفها كويس تموت ولاتوليله شن ماكان السبب..
شد ع قبضة يده وقعد يضرب بيها في ركبته ضربات خفيفه وهو يفكر..
عبد الرؤوف:عبد القيوم..حولها من راسك الافكار هادي..
هز راسه وقال..
/إن شاء الله خير...
عبد الرؤوف:إن شاء الله..باهي توا خلينا من الموضوع هدا وقولي شن جوك انت ومختار؟!
عبد القيوم بإنزعاج..
/راك تبدالي في جو ربيع..
عبد الرؤوف:غير دقيقه خليني نستوعب..يعني تتعامل معاه عادي وكأنه مش داير شي!!؟
خدي نفس عميق بعدين قال..
/لو جاني وطنشته ولاتعاملت معاه بأسلوب حاد وسكرتها عليه شن حتكون ردة فعله!؟
سكت عبد الرؤوف شويه بعدين قال..
/باهي في هادي عندك حق..لكن البني آدم هدا حتى مسايرته مصيبه واللي صار معاي من ورا مسايرته خير مثال..
عبد القيوم:لعند هاللحظه ماشفت منه شي غلط..يبان راقي وهادي ودمه خفيف ومتواضع..مانعرفش كان كله مصطنع ولاحقيقي لكن اللي نعرفه في اللحظه اللي يفكر فيها يضر اخته حنصبي في وجهه واللي يصير يصير..
عبد الرؤوف بضحكه تعجب..
/قصدك مازال تسأل مصطنع ولاحقيقي!؟
عبد القيوم: تعرفني عندي فراسة تخليني نعرف الكذاب من الصادق..هو صح كشخص سيء او مش كويس..لكن فيه حاجه خلتني نرتاحله..حاجه شدتني ليه مش عارف شن هي بالزبط..
عبد الرؤوف بأسف..
/للأسف ياعبد القيوم ونقولهالك انت طحت في حفرة مختار..
عبد القيوم بضحكه..
/عليك دراما...انا ماقتلك راجل كويس ماشاء الله عليه انا حكيتلك عن انطباعي عنه بس..
عبد الرؤوف:تمام انت راجل بعقلك وتعرف الصح من الغلط مانقدر نفرض عليك شي..عليا النصيحة بس..ردبالك منه وخليك متفكر لو اخته عرفت انك تتعامل معاه عادي انساها..
عبد القيوم..
/بالعكس من هالناحية مش خايف بكل الحاج علي عنده علم وشافه طالع من عندي وماعلقش نهائي ولاحسيته تغير عليا..
عبد الرؤوف:الحاج علي شي وهي شي تاني..
عبد القيوم بضيق؛لاوالله صدقني حكاية علاقتي بمختار مش حدير مشاكل زي اللي المشاكل اللي حيصيرن بعد مالمهدي ياخد سدرة..
تنهد عبد الرؤوف بعدين مرر نظره ع المكان وقال..
/باهي انت ع شن ناوي !؟..ووجه نظره ليه..
هز راسه وقال..
/اللي ناوي عليه يجي وقته وتعرفه..
عبد الرؤوف عقد حواجبه وهو يشوفله بريبه وقال
/إن شاء الله خير...
🍃وماطولش عبد الرؤوف بعد هالنقاش عند التارقي ..
روح لحوشه ومازال عقله يفكر في نفس الموضوع..
خش ع دار الالعاب بش يشوف ولاده لقاهم قالبين الدنيا..
قلد صوت الاسد كعادته بش ينبههم لوجوده وهما ضحكوا من قلوبهم..
وبدي يلعب معاهم ويغنيلهم وغرفه في الكوجينه دير في العشي وتغني معاهم حتى هي..
"عادي عادي عادي..قولوا شن تبوا عادي
قولوا علينا بريوش..قولوا علينا زبادي"
🍃🍃🍃🍃🍃
"خشينا المحاور كل مرة تاخد كبة"
طوبى بإنزعاج:باهي خلاص فهمنا..
اريج وهي تحط الحليب في الثلاجه قالت بضحكه..
/علقت في راسي ..
طوبى وهي تحرك في الطنجرة..
/الحق تعلق في الراس هي..
ع خشة سدرة وهي تغني..
/عادي عادي عادي..
اريج كملت معاها..
/قولوا شن تبوا عادي قولوا علينا بريوش قولوا علينا زبادي..
طوبى بضحكه؛الجرس يرن..
سدرة؛اكيد مختار..
اريج:ماشيه نفتح..ومشت طلعت من حداهم بسرعه..
طوبى:كان خبرتيه ع التليفون وفكتينا..
سدرة فنصت فيها وهي تقول..
/طوبى!
ضحكت وقالت..
/نبصر خيرك!!
☘☘☘
ويطلعوا لإستقبال مختار اللي جت معاه هالمرة..
لكن لما جت سدرة بتسلم عليه قال..
/كورونا..كورونا...وطلعلها شيشة صغيره فيها كحول وقال..مدي ايديك..
شافتله من فوق لتحت وهي تقول..
/مالا برا والله ماني مسلمه .
وجت لفاتن وضمتها وفاتن حضنتها وهي تضحك..
هو رفع حاجبه وشاف لطوبى..
هي بإبتسامه واسعه قالت.
/بركة ياجامع..
لفت اريج وجهها وهي تضحك بكتمان..
وهو يشوف لطوبى بإمتعاض..
تجاهلاته طوبى ومشت لفاتن سلمت عليها بالأحضان وهي تقول..
/ليك وحشة..
فاتن بإبتسامه..
/ليكم اكثر..
تباعدت طوبى وهي تقول..
/تفضلي تفضلي..
وخدتها وخشت بيها داخل ومعاها اريج وسدرة وخلوا مختار واقف..
هو رفع حواجبه ونزلهم بعدين خش بروحه..
اول ماوصل في الصاله قعد يبخ في الكحول حواليه وهما يشوفوله..
فاتن بضحكه:من لما طلعت الكورونا وهو موسوس..
جي للمكان اللي بيقعمز فيه بخه وقال..
/حرص حرص مش وسواس..وقعمز..
طوبى:هو المفروض حني نخافوا مش انت اللي ماتخلي وين تمشي..
مختار؛لاده كان زمان امور شغلي بديت نمشي فيها عن بعد ومن الحوش معاش بديت نطلع بكل ولولا اصرار سدرة نجي ماكنتش جيت..
طوبى:مش قتلك كان خليتيها ع التليفون خير..
فاتن؛شن ماتبنيش نجي!؟
طوبى:قتلك قبل اسكني سكون كان تبي..
ابتسمت فاتن..
حمحم مختار وبدي يغني..
/عادي عادي عادي..قولوا شن تبوا عادي..
ضحكوا وطوبى تشوفله بإبتسامة امتعاض..
ع خشة جنه وهي تحك في عيونها كيف فايقه من النوم..
لما شافها مختار قال بفرحه..
/قلبي..
جنه فرحت بشوفته فرحة كبيرة لما جت بتمشيله امها شدتها وقالت..
/كورونا كورونا..
مختار؛بطلي استفزاز واطلقي البنت..
وجنة ناداته..
"بابا"..
انوجع قلب امها طلقتها طول وجنة مشتله تجري لين وصلت فيه وضماته وهو ضمها بقوة...
ناضت سدرة وهي تقول..
/بنمشي ندير قهوة..ومشت طلعت بسرعه من حداهم واريج معاها بعيونها...
اما فاتن شافت لطوبى ولاحظت لمعة الدمعه في عيونها..
قعمز مختار جنه ع رجله وقال..
/خدت ع بوها؟
طوبى: جنة تاخد عن اي حد بسرعه يابال بوها..
هز راسه وعيونه ع جنه وهو يمسح ع شعرها..
🍃ويعدوا حوالي ستة دقايق هدرزوا فيها البنات مع فاتن ومختار لهي مع جنه يلاعب فيها ويهدرز عليها..
وبعدين تخش سدرة بسفرة القهوة..
حطتهت قريبه ع فاتن وقعمزت جنبها مدتلها فنجان وقالت..
/تفضلي حبيبتي..
فاتن خداته وقالت..
/يزيد فضلك..
سدرة شافت لمختار وقالت..
/تبي!؟
هو قال..
/No..موقفها ليا مدة..ايه قوليلي شن الموضوع اللي تبيني فيه؟
سدرة؛هو خبر وعزومه في نفس الوقت..
عقد حواجبه بإستغراب...وفاتن مررت نظرها بينها وبينه..
سدرة:غدوة ان شاء الله فضانيتي..
ركزت طوبى ع ملامح وجهه بعد ماسمع الخبر بانت عليه الصدمه..
فاتن وهي متفاجئه..
/جديات!؟
سدرة هزت راسها بإبتسامه..
مختار بصدمه..
/راك تقولي إياد!..
"لا المهدي"..
غير نظره لطوبى بعد ما جاوباته نيابة عن سدرة...
فاتن بضحكه دهشه..
/قولي والله!
سدرة بضحكه..
/والله..
فاتن حطت الفنجان وضمت سدرة وهي تقول..
/مبروك حبيبتي مبروك ربي يتمم ع خير..
سدرة:آمين..
بلع مختار ريقه بعدين ضيق عيونه وقال..
/كأنك خبرتيني بكري شويه!كان راجيتي لبعد الزواج!
وجهوا انظارهم لسدرة وهي قالت..
/رأيك في الموضوع ونعرفه وبعدين كل مانكلمك تقولي مشغول مابيتش نزيد نشغلك..
طوبى:اهي جاباتك هني بش تعطيك علم وتعزمك ع الفضانيه..
مختار؛اني مانبيش عزومه..اني خوها الكبير اول الحاضرين وكلامهم حيكون معاي..
سدرة؛اكيد ماتبيش كلام..لكن من بعد جدي طبعا..
ضيق مختار وهو يشوف لسدرة..
🍃لاحظ انها متغيره هلبه..الامر مش محتاج تفكير مطول واضح رجعتلها الذاكرة..
لكن رجوع الذاكرة لسدرة مايعتبرش مشكله كبيره عنده لأنه خدم ع الفترة اللي ماكانتش فيها موجوده..
اللي يديرله مشكله فعلا هو انه عرف هالشي متأخر يعني مالحقش يسيطر ع طريقة تفكيرها بعد ماتعرف كل شي..
لكن لحظه..
سدرة لو عرفت التفاصيل اللي غايبه عنها واللي حاول هو يغيرها علاش لتوا مادارتش ردة فعل قويه وقطعت علاقتها بيه!؟🍃
رسم ع وجهه ابتسامه وهو يقول..
/مالا شنو..ع العموم مبارك ياستي وربي يكمل ع خير من البدايه قتلك المهدي الوحيد اللي يصلح بيك..
طوبى بتعجب..
/انت قلتلها!؟
ضحكت فاتن واريج تشوف لطوبى وهي شادة ضحكتها..
مختار بإبتسامه..
/ايه..وياريت كنت موجود قبل لياخدك خوه كنت قتلك انه مايناسبكش نهائي ولايليق بيك..
بدت ع وجه سدرة ملامح الضيق..
وملامح اريج تبدلت للحزن وهي تشوف لطوبى..
اما نظرات فاتن لمختار كانت نظرات استياء..
وهو كمل كلامه يقول..
/يللا المهم افتكيتي منه..
طوبى هزت راسها وقالت..
/ع قولتك برغم انه ماكانش بالساهل وانت تعرف..
حاول يحافظ ع ابتسامته ع قد مايقدر وهو يشوفلها..
وسدرة تمرر في نظرها بيناتهم وهي تفكر في القصد من ورا كلام طوبى..زي فاتن بالزبط..
رسمت طوبى ابتسامة تخفي ألم كبير وهي تقول..
/غدوة بيجوا معاهم نساوين فتون نبوك تستقبليهم معانا..
ابتسمت فاتن وهي تقول..
/هكي ولاهكي بنجي إن شاء الله..
طوبى؛وكان يخليك راجلك تباتي بالمرة..
مختار وهو يشوف لجنه كيف تلعب بالدبله متاعه قال..
/مش مشكله..قام عيونه في فاتن وهو يقول بإبتسامه..اقعدي الليله..
ردت عليه فاتن بإبتسامه..
وناضت طوبى وهي تقول..
/خل نوض نشوف العشي دايرين مكرونه بفواكه البحر تاكليها فتون عادي!؟
فاتن بإبتسامه؛نموت فيها..
طوبى بضحكه..
/مليح..ومشت طلعت من حداهم...
مختار شاف لسدرة وقال..
/ايه احكيلنا كيف صار الموضوع بالزبط...
🍃وحكت سدرة لمختار عن التفاصيل وعطاته نبده عن الاتفاق اللي حيصير في الفضانيه...
لكن مابتش تعطيه علم عن اهم شي وهو المكان اللي حيتم فيه عقد القران وهو مافكرش يسأل عنه لأن التاريخ مازال ماتحددش..
🍀🍀🍀🍀🍀🍀
وتعدي الساعات..ساعه ورا ساعة وبلهفة الدنيا كلها كان المهدي يستنى في تاني يوم..
هاليوم اللي قعد سنين وسنين يحلم بيه وبعد مافكر ان الامل فيه مات رجع الله حياه من جديد وقاله كن فيكون..
☘وهدا تقدير وتدبير الله للأمور..مرات في نفسك شي تتمناه وتحاول تحققه بكل الوسائل ومايصيرش منه..
ممكن لأنه مافيشي خيرة ليك..وممكن لأنه وقته مازال ماجاش..
في كل الاحوال ماعليك الا الصبر والتسليم لأمر الله وفي القلب يقين كبير ف ان الخيره فيما اختاره الله🍃
وهدا اللي تفكر فيه سدرة توا الخيرة فيما اختاره الله..
هي لعند هاللحظه مازال مش حاسه بالفرح لكن بدت تحس بالرضا وهدا اهم شي حاليا...
🍃ويطل تاني يوم..
وتجي مطيرة من الصبح كعادتها عبت المكان بهجة وفرح ناشبت سدرة وتناقروا واللي هادي تتسهوك ع التانيه براجلها واللي حواليهم مستمتعين ويضحكوا من قلوبهم..
🍃وسميرة في حوش شنيبه قامت بنفس المهمه كانت تبي هاليوم يكون للمهدي اسعد ايام حياته بدون اي منغصات..
بوه وخوته كانوا فرحانين لفرحته بالذات الجالي اللي كان مبالغ فيها وكأنهم حيجيبوله طوبى وهما مروحين من الفضانيه..
🍃من جهة تانيه كانت خديجه حابسه روحها في دارها ومدايرة اضراب..
وامها قالبتها بكي ونواحات في حوش خوها وخواتها حواليها يحاولوا يواسوها في مصيبتها..
اما نجاة مابتش تتحرك من شقتها كانت طول النهار تحت سيطرة القلق والخوف تفكر.وتفكر..وتفكر...
🍃🍃🍃🍃🍃
بعد العصر..
درسوا سيارات عيلة شنيبه قدام حوش طوبى ..
جو عمام المهدي كلهم وعماته الزوز كامله واللي عايشة في طرابلس ووحده من نساوين عمامه..
ودرس وراهم ربيع اللي جاب معاه نسرين..خشت هي ونساوين عيلتهم..
ومختار وعلي الواعر وعبد المطلب استقبلوا الرجاله ورفعوهم للمربوعه الخارجيه..
🌼🌼🌼🌼🌼
"اللهم بارك اللهم بارك غزاله مصورة ياناس"
سدرة بضحكه؛باهي ياملسنه حولي من قدامي..
وخرت طوبى وهي تضحك..
وسدرة مشت طلعت لأهل المهدي وطوبى وراها..
لما وصلت للصاله زادت سرعة دقات قلبها من التوتر..
سمت بالله في سرها وخشت عليهم وهي تقول..
/السلام عليكم..
نظرات الاعجاب احاطت بيها من كل جانب كبيره لكن مش باين عليها عمرها ولاآثار مرض..جمالها يعرف يزيد ماينقص ع قد ماصار فيها...
يعرفوها كويس وشايفينها قبل وفرحوا لما سمعوا ان ولد خوهم بياخدها...
سلموا عليها سلام حار والابتسامه مافارقتش وجوههم..
بعد السلام..
قعمزت جنب عمتها وبدوا يهدرزوا عليها وهي حست براحه معاهم..
شويه وخشوا عليهم اريج وطوبى بالضيافه...
بدت ع وجه كامله ملامح ابتسامة أسف وهي تشوف لطوبى ع قدماعجبها مظهرها وشكلها ع قد ماوجعها قلبها علي حالها...
🍃وفي المربوعه..
بدوا الرجاله يتكلموا في السبب اللي جايين ع خاطره..
الكلام كان لكبار القعده كلام مقنط زي مانقولوا وكله موزون وفي مكانه...
عبد القيوم كان منجذبلهم هلبه..اما مختار حس بملل رهيب وقعد يستنى فيهم بفارغ الصبر امتى يخلصوا..
☘والمهدي في المطحن مقعمز يراجي فيهم امتى يروحوا ويقولوله تفاهمنا..
🍃محمود وهو يراقب فيه قال بضحكه..
/مش كان مشيت معاهم ياعرفي خيرلك!
شافله المهدي بطرف عينه وهو ساكت..
ضحك بعدين قال..
/لولا العيب راني جبتلك النوبه وخليتها تخبطلك هني تلاته ولااربع ساعات..
ابتسم ع جنب وقاله..
/لما تجيب مراة تانيه ان شاء الله..
فنص محمود وقال..
/لا والعياذ بالله اني راجل موحد..
المهدي؛جبان..
محمود ابتسم تهكما وقال..
/تو نشوفوك بعدين..
بدت ع وجه المهدي ملامح الحده..
محمود استاقظ لنفسه غير نظره عنه ومشي يرتب واحد فرفوف القهوة...
🍃🍃🍃🍃🍃🍃
وبعيد عنهم في احد مناطق العاصمه الآمنه من الحرب..
كانت ميار عازمه سلافه واختها في احد المقاهي العائليه..
🍃سلافه؛لولا حلفانك كنت خليت العزيمه عليي..
ميار:بالله سلافه فكينا منها الدوة هادي..
سلافه بضحكه؛اذا هيك بدك تتحملي بعد ماعطلت سيارتنا رح ضلي تاخدينا وتجيبينا..
ميار بإبتسامه؛ع قلبي زي العسل..
لبانه بإبتسامه؛انا رح دبر حالي لاتاكلي همي..
ميار:لاياحلوة انت بالذات حناكل همك هلبه وليت حماتك خلاص..
ضحكت سلافه..
ولبانه ابتسمت بخجل والتزمت الصمت..
ميار؛ع قولتكم تخنتيها خلاص..عطونا موعد نجوكم فيه..
تنهدت لبانه وقالت..
/اول شي بدي اسألك سؤال..
ميار بإنتباه:اسألي حبيبتي..
لبانه؛فاطمه بنت عمتك بعد كل اللي عملتوا مشان تفرق بينا انا واخوكي كيف هيك بدون مقدمات شالتوا من راسها وراحت انخطبت لغيره!؟
شافت سلافه لميار وهي تراجي في الاجابه..
ميار بضيق:صح في سبب..فاطمه بنت عمتي صح لكن ربايتها غلط في غلط تعودت اللي تبيه تاخده وصلت بيها انها تخش لخوي دار نومه بش تبيله فيها..
بدت ع وجوههم ملامح الصدمه..
ميار؛خوي معاش قدر يسكت عليها اكثر ماسكت فضحها قدام العيله كلها يومها وشهدت معاه بنت اختي لأنها.شافتها وهي خاشه لداره قبل ليروح..مانحكيلكمش شن صار يومها زوبعه بكل معنى الكلمه..معز مشي لخوتها وحرشهم وحطلهم كل شي وطبعا كلت طريحة باهيه وعطوها لأول واحد جي يخطب..
سلافه بصدمه..
/عنجد هي مريضه مفروض يعالجوها بالأول بعدين يزوجوها وحده بهيك عقليه رح.ترجع مطلقه لامحاله..
ميار بلامبالاة؛اخر همي والله..المهم انزاحت من طريق خوي..شافت للبانه وقالت..في هداكا اليوم صارح معز ماما وخواتي بقصته معاك وهما فرحوا هلبه والله العظيم وحتشوفي الشي هدا بعيونك لما يجوا يخطبوك..
تنهدت لبانه وقالت بإبتسامه..
/نحكي مع بابا وماما بالموضوع ونردلكن خبر..
ابتسمت سلافه..
ميار بضحكه؛الحمد لله..خلاص مالا.خليني نكلم عزو نقوله يجي وتهدرزي انتي وياه ع انفراد..
لبانه وهي متفاجئه..
/كيف!؟
ميار؛لازم تتفقوا مع بعض ع راحتكم..
سلافه:مافيها شي رح تقعدوا قراب علينا..
لبانه؛معناتا كنتي بتعرفي!
رقصت سلافه حواجبه وهي مبتسمه..
لبانه بغيظ؛بورجيكي لنرجع ع البيت..
وميار قدامهم تكلم في خوها وهي تسمع فيهم وتضحك..
شويه وخش معز ومعاه وحده من خواته وين جو عيونه ع لبانه ابتسم وغمزلها..
وهي نزلت عيونها وع وجهها ملامح ابتسامة خجل..
جو لطاولتهم وسلمت اخته التانيه عليهم بحرارة بعدين قعمزت معاهم ولبانه ناضت وقعمزت مع معز في الطاوله اللي وراهم..
معز بإبتسامه..
/يامحلا الشامي مع المغربي..
غيرت نظرها عنه وهي تضحك وهو يتأمل فيها بإبتسامة حب..
🍃🍃🍃🍃🍃
وتمت فضانيه المهدي وسدرة ع خير...
وروحوا اهل المهدي وبشروه بوه وخوه نضال ان كل شي تم ع خير وفرحة المهدي لاتكفي لوصفها الكلمات..
اما سدره خشوا بيها الكوجينه وسكروها وبدوا يشتوا باصوات منخفظه..
"ياسدرة نهنوك عليها...قصة حب نجحتي فيها"
وهدا كله كانوا يتفرجوا عليه الاء وفردوس عن طريق مكالمة الفيديو وهما يشاركوا فيهم..
🍃🍃🍃🍃🍃
وفي المربوعه..
ماقعد حد غير المحجوب وعبد الروؤف وعبد القيوم مع علي الواعر..مختار ماقعدش لأنه مشغول...
المحجوب:ربي يتتم ع خير..
علي:آمين..
عبد الرؤوف؛الفال للباقي ان شاء الله..
شافله عبد القيوم..
المحجوب بإبتسامه..
/نفرحوا بصغارك ان شاء الله..
عبد الرؤوف بضحكه؛قبل حسين!؟
المحجوب ضحك وقال..
/عقله هني..
عبد الرؤوف بإبتسامه..
/ان شاء الله تحز عن قريب ونفرحوا بيه والله مامخليه لين نزوجه...
"حاج علي"
تعكرت ابتسامة عبد الرؤوف وهو يشوف للتارقي النبرة اللي كلم بيها الحاج علي خلاته يتوقع شن بيقوله..
علي الواعر وهو يشوف لعبد القيوم..
/نعم..
عبد القيوم؛شن رايك فيا!؟
المحجوب شاف لعبد الرؤوف لقاه يشوف للتارقي بملامح اسف..
علي بإبتسامة استغراب..
/رايي فيك تعرفه ياولدي كويس انت عندي خير من حسين ويوسف..
تنهد عبد القيوم وبلع ريقه بعدين قال..
/معناها عندك فيا ثقه وتشوف فيا راجل تقدر تأمنه ع نفسك..
علي شاف للمحجوب وعبد الرؤوف بعدين رد نظره لعبد القيوم وهو يقول..
/ع نفسي وع عيلتي..
ابتسم عبد القيوم براحه وزاد حماسه وهو يقول..
/يعني لو طلبت بنت من بناتكم تعطوني!؟
بدت ملامح المفاجأه ع وجه المحجوب..
وعبد الرؤوف قعد بنظره ع علي الواعر وهو متوتر..
رفع علي الواعر حواجبه وقال.
/مني منهم ؟!
عبد القيوم خدي نفس وقال..
"بنت الحاج لطفي الله يرحمه"
نزل المحجوب راسه للأرض وبدت ع وجهه ملامح الضيق..
غير علي الواعر نظره عن عبد القيوم وقعد ساكت..
عبد القيوم بإندفاع..
/ماتخافوا من شي..والله حنصونها ونحافظ عليها وبنتها نديرها بنتي ياحاج..
قعد الحاج علي محتفظ بصمته..
وعبد الرؤوف متوتر ع الاخر..
دقات قلب عبد القيوم زادت تسارعت من الخوف صمت الحاج علي غير مريح بلع ريقه وقال..
/حاج علي..!
علي رد نظره ليه وقال..
/مانبيش نخسرك ياولدي..
عبد القيوم بلهفة خوف.. /وليش بتخسرني بالعكس انتم حتسكبوا ولد مش نسيب..والله ياحاج نحطها في عيوني والله نعوضها عن كل شي والله وربي شاهد..
قام المحجوب عيونه فيه..
نبرته صادقه وعيونه باين فيهم الحب..
هني عبد الرؤوف تكلم وقال..
/ماتخافش منه ياحاج مايغلطش غلطتي..
شافله علي شويه بعدين نزل نظره لعكازه وقال..
/سامحني ياولدي مالكش فيها نصيب..
عبد القيوم كان يحس بقلبه قاعد ينجبد من مكانه..
وعلي مكمل يقول..
/انت ياولدي ماناقصك شي راجل بمعنى الكلمه ولد اصل ومتربي صح عندك كل شي يخلي خيرة الناس يعطوك من غير مايفكروا..برا ياولدي شوف وحده تناسبك تقدر معاها ديرعيله وبالك مرتاح..وكان لقيتها اني نمشي نخطبهالك..اما بنتنا ماهيش ليك ياولدي..
المحجوب وعبد الرؤوف كانوا يشوفوا لعبد القيوم اللي قاعد جامد في مكانه وهو مثبت نظره على علي الواعر..
شويه وضم شواربه لداخل بعدين طلعهم وقال بضحكه تهكم..
/اها صح ماهيش ليا..ماتعطوش بنتكم لتارقي هذى اللي تبي تقوله ياحاج علي غير متحشم..
بدت ع وجوه المحجوب وعبد الرؤوف ملامح الصدمه من تفسير التارقي لسبب رفض علي الواعر..
ناض عبد القيوم وقال بنفس الابتسامه...
/سامحني خداني العشم ورفعت عيني فوق واجد..سامحني..
ومشي طلع وهو يشوف في الدنيا سودا قدامه..
ناض عبد الرؤوف طلع وراه بسرعه..
المحجوب شاف لعلي الواعر وقال..
/علاش فسرها هكي!..
شد علي راسه عكازه وقال..
/خليه يفسرها كيف مايبي...
🍃وعبد القيوم طلع من حوشها وهو يمشي بغضب ومايشوف في شي..
كانت حتضربه سيارة صاحبها وقفها في اخر لحظه وهو ولااهتم..
ربيع اللي كان قدام مطعمه..نضال في قهوته..
المهدي اللي كان واقف مع محي الدين قدام المطحن ووارهم محمود..
وغيرهم من ناس الشارع كانوا يشوفوا في حالته وهما متفاجئين ..
ربيع بقلق..
/تارقي!
وعبد القيوم مايسمع في شي غير جمله وحده قالها علي الواعر..
" بنتنا ماهيش ليك ياولدي."
فتح باب سيارته بغضب..ركبها وسكره بقوة..
شغلها وتحرك وهو يحرق في العجل...
عبد الرؤوف اللي كان يشوف فيه..ركب بسرعه لسيارته وطلع وراه..
#كانون_الثاني
#طوبى
...يتبع....
