طوبي الجزء التاني

الجزء التسعون ( وقد احسن بي )

#طوبى  "جنة طوبى"
#جمان_فريد
#الجزء_التسعون"وقد احسن بي"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
............
قال شَيخ الإسلام #ابن_تَيمِيَة -رحِمَه اللّٰه- :  🎙️
إِذَا نَاجَى العَبدُ ربَّهُ في السَّحَرِ و استَغَاثَ بِهِ و قَالَ :
"يَا حَيُّ يَا قَيُّومُ لَا إِلهَ إلَّا أنتَ بِرَحمَتِكَ أَستَغِيث " أَعطَاهُ اللهُ مِنَ التَّمكِينِ مَا لَا يَعلَمهُ إلَّا اللهُ.
📜 مجموع الفتاوى (242/28) 🍂
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 قويّ التوكل لا يُهزم، والله إذا كلَّف أعان🍃
_______________________________________
يوم الخميس..
10يناير...سنة 2019..
الساعه 9:00صباحا..
من بعد ماصلت الفجر معاش رقدت..
فاقت جنه دارتلها ماتحتاج بعدين خلتها تلعب وهي قعدت جنبها متكيه وتفكر...
بعد تفكير طويل..ناضت من السرير..
حطت مخاد يمين ويسار جنه..ومشت طلعت من الدار متوجهه للجناح..
وصلت في الباب..خدت نفس وقالت همسا..
"لاحول ولاقوة الا بالله"..
وخشت داخل..
لقت السرير فاضي..سمعت صوت ميه جاي من الحمام عرفت انه فيه..
بلعت ريقها ومشت قعمزت ع الكرسي متاع الزيانه وهي متوترة..
ومن التوتر قعدت تفرك في ايديها ببعض..لعند ماسمعت صوت باب الحمام انفتح..
فكت ايديها عن بعض واخفت توترها بمظاهر الثقه والبرود المصطنعه...
بان عليها وهو لابس سروال توته زيتي وتيشرت بني خفيف جدا كم طويل وع جناب الاكمام خط زيتي..
كان ينشف في شعره بالفوطه..لما شافها تفاجئ..
طوبى بملامح وجه متجهمه..
/شن تحس روحك توا..
عقد حواجبه وقال..
/عادي..
وجي ناحية االزيانه..هي طول ناضت وتباعدت..
هو تصنع التجاهل للموقف اللي تكرر هلبه وفي كل مرة يتوجع فيه زياده..
حط الفوطه ع الكرسي..وخدي مشط وقعد يمشط في شعره.
طوبى:وجهك يبان اصفر..كان تمشي نعاين وتاخد دوا خير..
هو قال؛لامش لازم..
طوبى:لكن عيونك مدمعات..
نزل المشط وشافلها وهو يقول..
/من امتى تركزي عليا ولاتشوفي لعيوني وشن فيهم..
تشجعت وقربتله وقفت ع رووس صوابعها قدامه وحطت يدها ع جبهته..
وهو يشوفلها بنظرات عشق حزينه..
طول بعدت وحطت ايديه في بعض وهي تقول..
/مازال دافي..من رأيي تمشي تعاين..
الجالي:هدا كله لله!؟
خدت نفس وقالت..
/اكيد وبعدين ع خاطر بنتي قاعده بيبي مناعتها مش قويه.
غير نظره للزيانه ورجع يمشط في شعره بعصبيه..
طوبى:مرات يكون عندك فيروس تنقله للبنت..
نزل المشط وقال..
/ماعنديش حيل نطلع ونسوق..
طوبى:اني نسوق..
الجالي:وجنه؟
طوبى:نكلم وهيبه تجيها..
حط المشط ع الزيانه ومشي للدولاب..
لما فات من قدامها تباعدت ووخرت لين قربت للباب..
الجالي طلع حوايجه من الدولاب وقال..
/باهي..
هي لفت ومشت عادي..بس زفرت بدون صوت لما تباعدت عن الجناح وخشت لدار جنه..
🍃كلمت المراة بعد نص ساعه كانت في الفيلا..
وهما بعد ماوصلوا طلعوا مع بعض للسياره..
ركبت طوبى وهو ركب جنبها..شغلت السياره وبدت تتحرك..
وهو شغل المنظومه..واتكى ع الكرسي
وبدت تغني فيروز...
☘بعدك على بالي
يا قمر الحلوين
يا سهر بتشرين
يا دهب الغالي
وبعدك على بالي
يا حلو يا مغرور
يا حبق ومنتور
على سطح العالي☘
هو يتأمل فيها ويسمع في الاغنيه
وهي متجاهلاته تماما...قطعت مسافه من الفيلا للعياده وهي ملتزمه الصمت وهو يسمع في فيروز
لما وصلوا غادي
درست السياره ونزلت هي وياه..وخشوا الزوز داخل..
مشوا لقسم الصحه العامه...سجلوا اسمه وقعمز معاها وهما يستنوا
والزوز اللي يشوف حالهم يقول جايين يعزوا...!
نادت الممرضه ع اسمه...ناض ومشي بيخش..
قبل ليخش التفت لقاها تشوف للفراغ..
تنهد وخش..وسكر الباب..
غيرت نظرها لباب الحجره...عدت في نفسها من واحد للعشره..بعدين ناضت ومشت بسرعه
🍃🍃🍃
طلعت من العياده للسيارة طول..
ركبت فيها من جهة الكرسي اللي جنب السواق..
فتحت الدرج وقعدت دور..مالقت شي مهم..
تأففت واستغفرت..بعدين شافت لدرج بين الكراسي ينفتح من فوق..فتحاته..وبدت ع وجهها ملامح اللهفه لما شافت علبة الدوا متاعه ملفوف عليها الوصفه..
طلعتهم طول..حولت فردة قفازها وطلعت تليفونها وحطت ع الكاميرا وصورتهم..
كانت خايفه ومتوتره بس حاولت تغلب مشاعرها هادي بكل قوة..
قعدت تردد في الصلاة ع النبي..لين كملت..ردت كل شي زي ماكان..
بعدين رفعت الجلابيه فوق وطلعت التليفون التاني من جيب سروالها
بعتتله الصور..ومسحتهم من التليفون الاول..
وولت دساته في جيب سروالها...ونزلت الجلابيه..
وهي تردد بخوف؛ياالله..ياحفيظ
شافت للروشن لقاته طالع..
طول رفعت التليفون وحطت ع الواتساب وخشت ع المحادثات وقرباته ليها وبدت تقرا في سورة الطارق..
وصل في الباب فتحه
هي كملت قرايه عادي
تنهد وقعد واقف يراجي فيها لين كملت..بعتت التسجيل..ولبست قفازها
شافتله ونزلت وهي تقول
/شن قالك؟
الجالي:برده مش مستاهله غير اني سايرتك بش نريح بالك..
مابتش ترد عليه ومشت طول لكرسي السواق..
هو ركب..وسكر الباب..وهي ركبت وسكرت الباب..
مدلها ورقة الوصفه وقال..
/كملي جميلك وجيبيه..
طوبى؛ماعندهمش داخل!؟
هو وعيونه يمرروا في نظره عليها..
/لما طلعت ومالقيتش معاش فكرت في شي..
خدت منه الورقه وهي تحرك في راسها يمين ويسار وجت بتنزل..شد يدها وقال...
/مش لازم فوتي..
جبدت يدها وحطت الورقه ع التابلو..وشغلت السيارة..
بعدين تحركت وطلعت من العياده..
وهو رجع شغل فيروز ورجع يتأمل فيها...
🍃🍃🍃🍃🍃
الساعه 12:00قبل الظهر..
في صالون حوش عبد الرؤوف..
عبد الرؤوف وهو يتكلم بيده؛وانتي من جدك جايه تكلميني في حاجه زي هادي!؟ معاش تعرفي خوك!؟..
نبيله؛سامحني وخيي لكن الوحده تتوقع من الرجاله كل شي..
غرفه برفعة حاجب..
/ماينعطاش للرجاله امان اصلا..
عبد الرؤوف هز راسه بوعيد وقال..
/تو نوريك انتي تو تشوفي..
نبيله؛فوق غلطك تهدد فيها.
هو بصدمه:ماشاء الله هادي اختي اللي عابي عليها..طول حكمتي من غير ماتفهمي..
غرفه؛باهي فهمها بش تنصفك..!
هو قعد يشوف لغرفه بحده بعدين قال..
/تمام..مصاحب بدال الوحده تلاته نسكر من هادي نكلم التانيه  ونتلاقى معاهم ونصرف عليهم..ومرات تضرب في دماغي وناخدهم كلهم وانتي اخبطي راسك في الحيط..واشرلها ع الحيط بسبابته وهو يحرك فيها..بعدين ناض خدي تليفونه من ع الطاوله وقال..
/متخلفه..
ومشي طلع من حداهم..
غرفه ودموعها ينزلوا..
/ريتيه يانبيله!..
نبيله بتفكير:في حاجه تانيه مش زي ماانتي فاهمه..
غرفه بإستغراب..
/حاجه تانيه زي شنو؟
نبيله؛مش عارفه بس مش خيانه صدقيني خوي ونعرفه مش ليه الحاجات هادي..
غرفه:باهي انتي فسريلي..الرسايل اللي عنده يكلم في وحده يقوللها..
شن ديري وبعدين يبعتلها يطلع كلميني حي عليا يانبيله كان مايطلع يكلم في مراة متزوجه!.؟
نبيله قعدت ساكته وهي تفكر..
غرفه بخوف:تكلمي يانبيله ماتقعديش ساكته..
نبيله:حولي من راسك حكايه الخيانه هادي مستحيله..
غرفه؛مالاشني!!؟
نبيله؛قلتيلي لما دورتي ع الرقم في الكاشف لقتيه بإسمه..
رشفت غرفه وقالت..
/ايه..
شدت نبيله ذقنها بيدها وهي تفكر..
غرفه؛في شن تفكري ماتقعديش ساكته راهو بنهبل.
نبيله نزلت يدها وقالت..
/زعمه يكلم في طوبى!
غرفه بصدمه؛شني!!!؟..
🍃وعبد الرؤوف في الجنان مقعمز في سيارته يشوف للصور اللي وصلاته من طوبى..
شويه واتصل بواحد صيدلاني يعرفه..
عبد الرؤوف:تسلم حبيبي..اسمع..في صور لدوا بنبعتهولك نبيك تعرفلي شن هو ولمن يعطوه؟
"تمام ابعت"
عبد الرؤوف:لحظه بس..
وسكر عليه..وبعتله الصور...
🍃🍃🍃🍃🍃
وطوبى بعد مادست التليفون في مكانه..
طلعت من االجناح ومشت لدار جنه..خدتها من سريرها وحطتها في القعماز وهي تقول..
/خل ننزلوا نديروا الغدي....
جنه تفاعلت مع امها بلغتها الخاصه..
طوبى خدت القعماز وطلعت وهي تقول..
/ايه..ايه..مالا شنو غدي بنتي هو الاول..
نزلت من الدروج وهي مكمله كلام..
تفاحه كلبوزة زي بنتي..نطبخوها ونهرسوها ونحطوها في صونيتنا الورديه ونوكلوها لجنونتي بكاشيكها الوردي..
وصلت لوطا..وهي تسمع في صوت التلفزيون عالي..
كان متكي في الصاله العربيه ويتفرج ..
خشت للكوجينه وحطت جنه ع الطاوله وكملت هدرزتها عليها..
🍃🍃🍃🍃🍃
ومعتز وهو مروح من المدرسه كان ماشي في طريق تانيه غير طريق الحوش..
"وينك"
معتز:اهو جايك توا..لكن بالله مانطولوش..
"لالا مش مطولين ندير بيك دورة في السياره ونروح بيك"
معتز بقلق:باهي...
نهي المكالمه وكمل طريقه..لين وصل في المكان المقصود وشاف السيارة اللي يدور عليها صاحبها كان واقف قدامه اشرله يجي..وهو مشاله طول...
🍃🍃🍃🍃🍃
خش للمكتب وقعمز وراه وهو يقول..
/والله الواحد قريب يدعي معاش تنزل مطر..
عيسى:استغفر الله بلاد تكرهك في عمرك..
تنهد عبد القيوم بضيق وطلع تليفونه من جيب البالطو..
فتح الفيس بش يغير جو شويه..
شاف عنده مجموعه رسايل معلقه..خش عليهم وشافهم من برا..اغلبها مراسلات من هواة شعر يردوا ع ابيات هو يكتب فيهم..ضيق عيونه لما شاف اسم مكتوب باللغة العربيه بخط مميز..
"سلافه كسابكجي"
رفع جواجبه..بعدين فتح الرساله متاعها
لقاهم مجموعه صور وقبلهم رساله مكتوب فيها
(مرحبا..كيفك..ان شاء الله تكون بخير
هي الصور تبع الورشه..)
هو خش ع الصور..قعد يتفرج عليهم
ابتسم لما تفكر هديكا اللحظات وشعوره كيف كان فيها..
سلافه طلعت معاه في كذا صورة بس مش بروحهم..
اما مع مدربين تانيين او مقعمزه قريبه عليه وهو يتكلم.. حفظ الصور كلهم..ونزلهم ع الفيس وكتب فوقهم باللغه التارقيه وترجمهتها بالعربيه
ليغاس ايمان.."ساكنة فالقلب"
وكتب هاشتاق #ورشة_الخط_العربي_القاهره
طلع من الفيس وحط التليفون ع الطاوله وقال
/مازال في مشوار شور*****
عيسى:هادي اخر التفاني والاخلاص في العمل يقعدوا يحرثوا عليك وخلاص
ضحك عبد القيوم ضحكة خفيفه وخدي تليفونه وناض وهو يقول
/سلامات..
ومشي طلع من المكتب
☘وبعيد عن طرابلس غرب البلاد..للجنوب الشرقي..
الكفره
كانت صفيه في حوش امها مقعمزة في دار المعيشه مشغوله بالفيس..
ويجي قدامها منشور راجلها دايرله مشاركه وكاتب فوقه..
"عبدو ننغ"
خشت ع المنشور وهي مبتسمه بدهشه..
وقعدت دور ع الصور صورة صورة..
فرحت هلبه بولد عمتها..بس في نفس الوقت ركزت ع سلافه في صورة من الصور كانت تشوفله وهي وقتها حست ان نظراتها غريبه..
ضحكت وقالت..
/شني هذى ياولد عمتي!!؟ كنا في العيون الحايره تمينا في الصهباء!؟
ولأنها فضوليه هلبه طول اتصلت بيه...نادى لين فصل..عاودت ونفس الشي ماردش عليها قالت..
/شكله مشغول..لكن ماعنده وين يهرب مني اخرتي نعرف من هي هالصهبا..وقعدت تضحك..
🍃🍃🍃🍃🍃
الساعه 7:00مساءا...
روح عبد الرؤوف للحوش وكان باين ع وجهه ملامح القلق..
خش داخل..شاف ولده مهاب وهو يزحف قعمز وقعد يضحك ويرفع في ايديه..
ابتسم ومشاله رفعه في حضنه وهو يقول..
/شن ياجلمود تنسرف بروحك! وين امك عنك!.
ومشي بيه طول لدار النوم..
لقي غرفه تبدل لأواب وهي تقول..
/صقع ياهمي صقع وانتم ماتحلالكم الخشه كان للحمام..
عبد الرؤوف:سكريه بالمفتاح..
غرفه بإنزعاج؛ننسى..
هو قعمز بمهاب ع السرير وقعد يشوفلها..
وهي بعد مابدلت لاواب حطاته في االحباس..وجت لرؤوف خدت منه ومهاب وحطاته معاه..
بعدين التفتت لرؤوف وقالت..
/مدرق عليا حاجه؟
هو رفع حواجبه وقعد ساكت..
جاته وقعمزت حداه وقالت..
/تتواصل مع طوبى!؟
غير نظره عنها للصغار وهز راسه بإيجاب.
غرفه وعيونها تعبوا دموع..
/قولي شن في بالزبط احكيلي وخلي عندك ثقه فيا والله مانطلع حاجه لحد..
عبد الرؤوف بقلق..
/اختك دبرت لشي واني عاونتها عليه ومش عارف شن عقابه...
غرفه بخوف:احكي رؤوف بالله عليك قلبي بيوقف..
🍃🍃🍃🍃🍃
وطوبى في هالوقت كانت راقده جنب بنتها خدتها غفوه وهي ترقد فيها...
فجأه استاقظت بدون سبب..لمحت الجالي واقف في الباب ويشوفلهم..
هو ماشافش انها فايقه لأن الدار شبه مظلمه الضي اللي خاش من برا خلاها تلاحظه..رجعت غمضت عيونها وقلبها يدق بقوة من الخوف..
لحظات وفتحت عيونها شويه...مالقتاش..
من الخوف فكرت تنوض تسكر الباب بس بعدين تراجعت وقعدت في مكانها تتسائل بخوف وقلق..
"في شن قاعد يفكر"..
🍀🍀🍀🍀🍀
ويمروا تلاته ايام...
والجالي وطوبى ماصارش بينهم اي احتكاك...هو كان يطلع من الحوش الصبح يروح المغرب..وهي في فتره غيابه كانت تحاول تلقى اي شي تاني يوصلها لهدفها لكن دون جدوى..بالذات وانه دار المكتب تقعد مسكره بالمفتاح في غيابه...
غير هكي..تكررت جياته في الليل لدار جنه ووقفته في الباب وهو يتفرج عليهم..حرم على طوبى النوم من الخوف..
واكثر شي مخوفها صمته وهدوئه...
🍃من جهة ثانيه..
صفيه بعد محاولات للإتصال بولد عمتها حصلاته واخيرا..
صفيه بمرح:غبدو ننغ ايسلان...
《عبدو متاعنا شن الاخبار..》
" اجوضغ تابراط ان عمتيّن....ما توليد و عمتين ما تولا و معمر دا اراو نون...
《 تمام بابنت عمتي..شن حالك وحال عمتي ومعمر وولدكم》
صفيه بأبتسامه: كلو ننغ نضوجي..... مايجان...السفر...اد ورشتين...و برتقالات...
《 كلنا كويسين..شنو يا..سفرات وورشات..وبرتقالات...》
" كم مني ايتنت تنيد نك اومسقم!!! يتبات اينين اوادمنم اي يسنن وا ورنيس اد يغرج فولم هرت"
《 انتي وين شفتيهم وانا حاذفك!! اكيد راجلك اللي مايعرف
يدرق عليك شي》
صفيه بضحكه؛مال شنو تبيه مايخبرنيش الشاردة والواردة لازم نعرفها..المهم توا ماتريحنيش بالكلام وقولي..من هذي الصهباء؟
"لاحول ولاقوة الا بالله..اسأليني عن الورشه شن درت فيها امتى سافرت وكم تميت غادي اول مرة نسافر في حياتي راهي!"
صفيه:زيد زيد رواغ زيد..ع كيفك ياسيدي مش مصره..بس بنسألك عن غيرها..ليا مده نتصل بيها رقم مقفل ليها فوق الشهر ماحلتش فيس..صاير معاها شي!؟
تنهد من وسط قلبه وقال..
"ردت للتافه هذكي"
صفيه بصدمه؛شنو!!!؟
"خطف بنتها وخلاها ترد غصب عنها"
صفيه بصدمه؛نعنه داء مايعرفوله دوا يجيه هالكل.ب عرة التريس الحقير..وخرت شعرها للخلف وهي تقول بإنفعال..مش مصدقه..معقول تردله ترد لواحد دار فيها هذى كله!
"مش بيدها ياصفيه..الكبد ياصفيه وانتي ام وتعرفي"
دمعوا عيون صفيه وهي تقول..
/ياعمري عليها..عليك بخت بختها لاحول ولاقوة الا بالله..ودموعها نزلوا وهي تسمع في تنهيد ولد عمتها اللي طالع من قلب محروق..
🍃🍃🍃🍃
15يناير..سنة2019
يوم الثلاثاء...
اليوم هدا جنة تسكر الخمسه شهور وتخش شهرها السادس..
وكل ماتكبر تحلى وتزيد في اللطافه وخفه الدم..
تعلمت تتقلب وتزحف للخلف..وتقعمز...وزادوا شوايخها🌸
توقعت طوبى ان الجالي يحتفل بهاليوم لكن توضحلها بعدين انه نساه..وهي مابتش تفكره..ماعندها علاش تفكره ولاتهتم لوجوده من عدمه في حياتها وحياة بنتها...
🍃وفي حياة اريج والاء اليوم حتبدا قصة جديده..
قصة عوض جميل...ينسي اللي راح..ويخلي الماضي ماضي يقعد في طي النسيان..
اليوم تلبسيتهم..اللي قرروا يديروها في حوش جدهم اللي رعاهم وكبرهم وعوض غياب بوهم ع قد مايقدر..
آلاء ولأول مرة تقتنع بالبساطه في يوم مميز زي هدا فرحتها بعزيز غنتها عن مظاهر السعاده المزيفه...
اما اريج..فكانت تحاول تتعايش مع كونها حتولي لراجل تاني غير نضال..
حقيقة اريج فهاليوم حاسه انها غريبه عن نفسها..مش هي اريج اللي لما انخبطت لنضال وعقد عليها كانت مش عارفه فرحتها وين تحطها..
ندمت..!؟ هي حست بشي من الندم وخافت هلبه تظلم اسكندر..لهدا تمنت لو الزواج يكون بسرعه بس تعرفه اكثر لعل وعسى يمسح نضال من حياتها ومن قلبها..ويطلعه من دمها...
🍃وهو مازال مش عارف شي..كان مشغول في المقهى في متاعه..يتفرج ع مباراة لدوري اجنبي مع الزباين ومنسجم معاها..
وفجأه ينقطع صوت هالانسجام لما يسمع اصوات منبهات السيارات والالعاب الناريه قريب هلبه..
قلبه دق دقه قويه موجعه..
خلاته ينوض ويمشي يوقف في الروشن المطل ع الشارع..
يشوف مجموعة سيارات مدرسه قدام حوش لطفي الواعر..
قعد مركز مع الرجاله اللي ينزلوا من السيارات..
ويجوا عيونه ع اسكندر وهو خاش مع عبد الرؤوف اللي كان يرحب بيهم هو وحسين..
بصوت مخنوق قال..
"خلاص!؟"...
مشي طلع من القهوة وهو مش حاس غير بالنار اللي والعه فيه وقاعده تحرق في كل جزء منه..
خش لحوشهم..ووقف في الجنان وطلع تليفونه واتصل طول بنسرين..
حط تليفونه ع وذنه وهو يرجف من الغيره والغضب..ودموعه ع حافة الجفون..
ردت نسرين وهي تقول..
"ايوه نضال"
نضال بصوت يرجف..
/شن في فحوش لطفي الواعر!؟
تنهدت نسرين وقعدت ساكته..
نضال بعصبيه..
/تكلمي..
"اليوم تلبيسة الاء واريج"
نزل تليفونه وهو قاعد يتحطم من داخل..
مش قادر يستوعب..اريج ولت لغيره..اريج مش حتكون ليه مش نصيبه!نصيب غيره!
اريج نصه التاني..توأم روحه...اللي قلبها انخلق لقلبه..
اللي عمره مالقي روحه في وحده غيرها..ولت لغيره!!!؟
التفت لحوشهم..ومش خش بسرعه..
وصل في الصاله..خشلها..لقي امه منسجمه تتفرج ع التلفزيون..
نضال بألم..
/يام..بنت التاجوري عطوها!
مغليه نقصت الصوت وقعدت تشوفله بقلق..
عاود بنفس نبرة الألم.
/يام اني سيبتها غصب عني..والله مانبي غيرها ولانبي نخليها..لكن ولدك..بغضب كمل يقول..هداكا الاناني التافه  في جرايره هو دمرت حياتي اني!..مالي بيهم..مالي بيه وبالمهدي وعمر..اني وياها يام كنا روح وحده يام لاقدرت نزعلها ولاهي زعلتني كنا متفاهمين مرتاحين قبل لولدك يخربها ويقعد ع تلها..
سكت لما سمع اصوات الزغاريد..
غمض عيونه بشده وبغضب ضرب بقبضة يده مرش باب الصاله كسره...
امه عيطت وناضتله تجري..
والراجل مهما حاول يتمالك دموعه قدام الناس كلها قدام امه في لحظات الضعف يولي طفل..خش حضنها لما ضماته..درق وجهه وقعد يبكي ويقول..
/والله ماكنت نبي نخليها والله..
وهو تمسح ع ظهره ودموعها ينزلوا ورأفة بحال ولدها التزمت الصمت...
ع خشة عمر للحوش..كان عارف باللي صاير من منيه لأن أريج خبرتها لما تلاقت معاها صدفه في مكان العمل..اريج كانت عارفه ان الدوة حتوصل لعمر واكيد حيقول لخوه بش تقهره..
بس اللي صار ان عمر سكت..منه او من غيره في النهايه عرف..
🍃خش عليهم الصاله شاف حالة خوه ضاق صدره..
حط يده ع ظهره وقال..
/نضال..
وخر نضال عن امه وقعد يمسح في دموعه وهو يقول..
/ولدك الجالي من اليوم وبرا غادي لاخوي ولانعرفه..
مغليه؛لاولدي لا هدا خوك مايتعوضش المراة تتعوض..
هو بإنفعال وحرقه قال..
/خوي عندي غيره زوز يغنوني عنه..لكن هي يام لانلقى زيها ولافي حديعوضها يام..حد..
ومشي طلع من حداهم وركب الدروج وعمر لحقه..
مغليه مسحت بإيديها ع وجهها وقالت..
/يوم مغبر هداكا اليوم اللي خلطنا فيه ع هالعيله السودا
🍃🍃🍃🍃🍃
سعاده الاء وهي وسط احبابها عيلة بوها وامها كانت واضحه في عيونها اللي كانوا يضحكوا بروحهم..وام عزيز لاحظت هالشي وفرحت من قلبها...
اما سميره فكانت حاسه بأريج وكأنها مش موجوده..تبتسم بالغصب..ومش باينه فيها الفرحه..وهالشي لالاحظوه خواتها ولاقريباتهم..
جي وقت التلبيس..
عيلة اسكندر هما اول من لبسوا..
اخت اسكندر الكبيره لبستها الدبله..واريج وهي تشوف للدبله تخش لصبعها جي بين عيونها نضال يوم بيانهم..
يوم بيانهم بتفاصيله قاعد يمر قدام عيونها..
تماسكت بكل قوة وتمالكت دمعتها وقعدت تبتسم وتضحك بزيف بش تنسي نفسها قبل كل اللي حواليها ان كام ليها ماضي مش قادرة تطلع منه...
🍃ونضال ليلتها قعد جنب عمر وقعد يواسي ويحاول يقنعه ان هدا نصيب..
ونضال التزم الصمت ورفض يقتنع بأي كلمه سمعها من خوه..
مش مقتنع ان اللي صار فيه نصيب..بل من فعايل البشر...
🍃خوه..
اللي دمر حياتهم وقتل آمالهم ومازال مستمر...
🍃🍃🍃🍃
19يناير...سنة 2019...
يوم السبت...
الساعه 7:30مساءا...
🍃في الدور الأول...
جنه في كروستها تتفرج على اغنيه" الصيصان " اللي كانت  شغاله  ع الشاشه ومندمجه معاها صورة وصوت...
🍃وامها في دور التاني..تحديدا في دار الملابس تتكلم بالتليفون...
"خلاص ياطوبى معاش فيها كيف معاش نقدر نخليك عندك اكثر من هكي المرض اللي عند الجالي خطير هلبه توقعي منه كل شي"
طوبى بقلق..
/باهي كيف نجيه طول ونقوله طلعنا حيشك طول صدقني..
"اعرفي كيف تجيبهاله مليت نبي نطلع ومن هالدوة هادي قلتي اللي تطلبيه يديره ولا خلاص"
طوبى تنهدت بخوف وقالت..
/وبعدين..
"بعد ماتطلعوا حنخشوا الفيلا زايد ناقص ويصير اللي يصير وناخدوا منها تسجيلات الكاميرات ونشوفوا شن داس في هداكا الدولاب..وانتم في المكان اللي بيطلعكم فيه حيجي من ياخدكم منه ويشدوه..غير انتي قوي روحك وخليك هاديه"
طوبى غمضت عيونها وبلعت ريقها بعدين قالت..
/ان شاء الله..
وتسمع باب الجناح انفتح..طول سكرت ع عبد الرؤوف وحطت التليفون في جيب البيجامه وحطت يده فيه..
سمعت صوت خطواته  جاي ناحية حجرة الملابس..
هي دارت روحها تشوف في لبسة من المعلقات..
الجالي:اطلعي..
التفتت وقالت..
/علاش!؟
الجالي بنرفزة:اطلعي قلت..
زاد خوفها..مشت طول طلعت من حداه ومن الجناح كله..
سمعت صوت حنة تعيط نزلت تجري...
🍃🍃🍃
سكتتها وقعدت مقعمزه بيها مقابله التلفزيون...
ع نزلته هو كان مبدل حوايجه..طلع من الفيلا من غير مايتكلم...
تنهدت بخوف وقعدت تفكر كيف بتفتح معاه موضوع الطلعه وهو يبان مش طايق يشوف لوجهها...!.
نزلت عيونها لجنة لقتها راقده...
حطتها ع المندار فوق بطانيتها ولفت بيها..
بعدين خدت الريموت وقعدت تقلب في القنوات...
ويخش الجالي..
قعدت تشوفله وجاي ناحيتها وهو شاد فيه ايديه حاجات..
لما وصل فيها حطهم جنبها..
تذاكر سفر.
طوبى بإستغراب وخوف..
/شني!.
حط ايديه في جيوبه وقال..
/تذاكر سفر ياقلبي..ذهاب بلاعودة..
قعدت تشوفله بصدمه وهي تقول..
/ماعنديش جواز وجنة حتى هي..امتى درتلها اصلا..
الجالي:الموضوع اسهل مماتتصوري لما يكون عندك معارف..حك مقدمة انفه وقال..خوك برا منها المرة هادي صدقا مالاش علاقه
طوبى ناضت وقفت وقالت..
/من ليبيا مانطلعش..وجت بتمشي جبدها من ذراعها وقال..
/بتطلعي غصب عنك..ورجليك فوق راسك..
هي بحده؛مش حطلعني من هني الا جثة ياجالي..
بغضب شديد وصوت عالي..
/سكري فمك سكريه..اسمعي الكلام..ضربها بقبضة يده ع راسها وقال..خير مانكسرلك هدا اللي تسكري فيه..
قعدت تجبد في ذراعها منه وهي تقول بانفعال..
/ياسرك ياسر..ساد لهني وساد خلاص..خليني في حالي خليني مانبيكش قلتها الف مرة مليت واني نعاود فيها معاش نبيك..
شدها من ذراعاتها بقوة وهو يقول..
/مالا مني تبي ياكلبه قولي..تبي حسين ولا..تبي نطلقك بش ياخدك..
هي بغضب:سكر فمك ياحقير ياواطي..الخونه صنعتك مش صنعتي..
هو بغضب؛بتستشرفي عليا توا وانتي وياه شادينكم فوق سطوح حوش بوك.
بكل قوتها جبدت نفسها منه..ونزلت ع وجهه بصفعه كادت طرش وذنه...
طوبى بغضب..
/حني اشرف منك ومن عيلتك اللي ماخلوا عيب ماداروه..
شافلها بنظرات مخيفه....
هي استاقظت للوضع..وخرت خطوة  وجت بتهرب منه..
شدها وصفعها ع وجهها..ولحق بصفعه تانيه وطوبى..تعيط..
وضربها التالته طاحت ع الارض..
طبس جبدها من شعرها ونهضها وهو يجر فيها..
/توا ياكلبه تركبي تلمي الحوايج قدامي..
طوبى بعياط..
/شعري..ااه..
وهو لاعاد يسمع ولايشوف في شي..
قعدت تقاوم فيه لين ضرباته بقفا ايدها ع وجهه ظفرها خش في عينه..طلقها طول..
هي هربت تجري..هو غمض عينه ولحقها وشدها بقوة..
قعدت تضرخ بأعلى حسها..
🍃والجيران يسمعوا...
🍃جميله بقلق بالغ؛يعطيه كسرة ياعطيه موت..
ومنيه تمشي وتجي قدامها وهي ترعش..
🍃🍃🍃
جبدها لين وصل لكنبه الصالون..
حطها عليها وقعد شادها وهو يشوفلها بنظرات مرعبه ويتكلم بنبرة مخيفه..
/ماتبنيش..باهي ع راحتك..لكن ياقلبي كان ماكنتيش ليا مش حتكوني لغيري..
وخدي وساده الكنبه..وهي لما عرفاته شن بيدير..
بصرخة تشق السمي قالت..
"لا"...
🍃🍃🍃
"ووك عليا مش قادرة نتحمل مش قادره نتحمل تسمعي فيها تسمعي!!"
جميله حطت ايديها الزوز ع قلبها وغمضت عيونها بشده وقالت...
/ياربي..قلبي بيوقف.....ووه ياروحي مسكينه..
منيه رفعت راسها فوق وهي ترعش قعدت تدعي...
/ياربي مانقدروا نديرولها شي انت اللي تقدر ياربي
🍃🍃🍃🍃🍃
حط الوساده ع وجهها وهي تقاوم فيه وعقلها يردد كلمتين بس..
"ياحي ياقيوم"..
وفي لحظه حست بقوة رهيبه..خلتها ضرباته برجلها في مكان اوجعه بقوة..وخلاه يوخر عنها..
هي طول ناضت تجري...هاربه للمربوعه..
وهي تجري طاح التليفون..
هو سمع الصوت التفت شافه..
طوبى بسرعه طبست خداته وهربت تجري بأقصى سرعه للمربوعة  وهي تنادي..
"ياحي ياقيوم"
وهو وراها يجري ويصرخ بصوت يرعد..
"ياكلبه"
🍃🍃والجيران برا يسمعوا...
🍃خشت للمربوعه وسكرتها وراها بالمفتاح..
وطول قامت التليفون وهي ترجف..
واتصلت بعبد الرؤوف..
"دايرة تليفون من وراي ياكلبه هو اللي دايرهولك ياحقيره ياوسخه!"
طوبى ببكي وعصبيه..
/رد رد رد..بالله عليك رد..
"اطلعي يلعن اصلك اطلعي اطلعي خير مانكسر الباب اطلعي"
طوبى نزلت التليفون وهي تقول ببكي وانفعال..
/وينك ياعبد الرؤوف وينك..!
فجأه تفكرت رقم اريج كتباته وهي تسمع في خبط الجالي ع الباب..
اتصلت باريج وهي تقول ببكي ورجاءا..
/ردي ارجوك بالله عليك..
وهو مازال يدف في الباب...
نادى الخط مرة..تنين..تلاته في الرابعه"انفتح..
طوبى بإستنجاد..
/تعالولي يااريج بيقتلني تعالولي...
ويتكسر التليفون لأنه شحنه تم..
نزلاته وهي تاخد في انفاسها بصعوبه واستغربت كيف وقف التخبيط فجأه...
قعدت تراجي تسمع صوت اي شي يخترق هالهدوء المخيف..
"تطلعي ولانقتلها"
فتحت عيونها ع وسعهم من الصدمه..
"والله نقتلها..اني خلاص بايع امها كلها..نقتلها ونقتلك ونقتل روحي.."
سمعت صوت بكي جنة..
لوحت التليفون وفتحت الباب..
شافاته شادها وهي تبكي..جتها وخدتها منه...
هو شدها من شعرها وقعد يقول..
/قدامي قدامي..
وطوبى ضامه بنتها بقوة وهي ترعش وتقرا همسا في سورة الفاتحه وتنادي بعدها ياحي ياقيوم..
وجنه في حضنها تبكي..
وصل فيهم لركن في الصاله..دفها قعمزت بهده وهي شاده جنه..وهو قدامها يقول بنبرة مخيفه...
/ناديتي عليهم يجوك ولا..لكن صدقيني وين يوصلوا هني يلقونا جثث هامده..
ومشي يجري للدروج وركب وهو يتفكر في اللي صار معاه زمان...وكل مالها حالته تزيد سود..
طوبى ضمت بنتها وهي تقول ببكي..
/ياالله واثقه فيك..الظن فيك مايخيبش حطلعني منها حطلعنا اني بنتي ومنها يارب..ياربي..
شافاته نازل يجري ولمحت في يده المسدس..
ضمت بنتها خلتها متحاميه بيها..وغمضت عيونها وهي تردد بهمس..
"ياحي ياقيوم"
وصل فيهم وقف وراها وصوب المسدس عليها وبدي يبكي ويقول..
/انتي وصلتينا هني انتي...
وجنة تبكي في حضنها وطوبى مازال مغمضه عيونها وهي ضامتها...
سمعاته كيف سحب...وفي نفس الوقت سمعت صوت تاني...
🍃والجيران اللي طلعوا للشارع سمعوا صوت ضرب نار..
وانحبست الانفاس...

#وقد_أحسن_بي
#طوبى

....يتبع....