#طوبى "جنة طوبى"
#جمان_فريد
#الجزء_105"كانون الأول/دموع الورد"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#الصلاة_على_النبي
قال السخاوي رحمه الله :
الصلاة على النبيّ ﷺ ، من أبْـرَكِ الأعمال وأفضلها وأكثرها نفعا في الدّين والدّنيا .
القول البديع.أهـ.( ١٠٩) 🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 "عندما يشعر الإنسان بالمحبّة تتغير جودة الأيام في عينيه للأفضل..
تزهو اللحظات، وتتمدد الراحة في كل لحظة..
لا يطلبُ المرء أكثر من هذا..
محبّة صادقة دون حاجة أو دافع .." 🍃
______________________________________
في دار المعيشه..
العرايس تحت ايدين الفنانات في حط الزينه..
اميمه تمكيج فيها طوبى..
وفايزة تمكيج في مطيره..
الحفله اللي بيديروها بسيطه وعائليه بيجيبوا فيها اهل اسامه تلبيسة لأميمه..
وحتكون فمربوعة حوش طوبى الدخلانيه..
غيروا الجلسه متاعها..وحطوا في صدرها زوز كراسي كبار للعرايس..
هالمرة اللي اشرفت ع كل شي يخص الحفله سدرة كانت حريصة كل حرص تخلي الحفله برغم بساطتها حلوة وكل شي فيها ع قولتنا نازك ومنظم..
🍀🍀🍀
وتمر الساعات وبعد المغرب كانوا العرايس جاهزات..
طلة مطيره كانت فخمه بعض الشيء مناسبه لعمرها من جميع النواحي..الفستان..الزينه..والتسريحه..
اما اميمه غيرت فيها طوبى شويه بالمكياج وطلعتها اجمل من المعتاد وزادها جمال الفستان اللي بتلبسه راقي فيه شي من الجرأة ولونه ازرق ملكي...
ويعكس ع لون عيونها اللي اتقنت طوبى في ابرازهم وخلوا اميمه تحفة فنيه سبحان من ابدع في خلقها وعطي الموهبه لمن تفنن في اظهار جمالها...
☘☘☘☘☘
"الله الله الله..قولوا ماشاء الله"
طلعوا العرايس للمربوعه وهما يغنوا عليهم...
طوبى برغم فرحتها بيهم كانت داسه في قلبها حزن كبير ع فراق مطيرة لدرجة انها كانت تتجنب تشوفلها بش ماينزلوش دموع عيونها..
🌸وصلوا بيهم للمربوعه..
دخلوهم وقعمزوهم ع الكراسي وسميرة وفايزة يزغردوا..
"قولوا ياالله عليهم..ياماشاء الله عليهم"
"الله واحد الله عليهم عوينه راك ضريهم"
داروا عليهم دورة وكلموا شوط الشتاوات واريج تصور بكاميرا الفيديو وتغني معاهم..
"ياميرو ياسمح يارشوا عليه الملح"
وهما يردوا وراها بصوت واحد..
ماعداسميرة..كانت تتأمل فيها..في.حيويتها وضحكتها وحلاوة طلتها وبدت من كل قلبها تتمنى فيها لنضال..
☘العجيب انها قبل ماتمنتهاش لخوها هلبه..اسكندر اللي كان راغبها..
لكن توا هي متمينتها لنضال لأنها شافتهم يناسبوا بعض اكثر..ولأنها عارفه كويس ان قلوبهم عند بعض..
اكيد الامر في البدايه وجعها بس بعدين اقتنعت ان كل شي في الدنيا قسمة ونصيب واريج ونضال يستاهلوا يعيشوا سعداء ومش حيكونوا سعداء الا مع بعض☘
"ياميمو ياسمح يارشوا عليه الملح"
شافت طوبى لأريج وغنت..
/العقبه ليها ياالله..العام الجاي إن شاء الله..
قلبت اريج عيونها بملل وهي شادة ضحكتها واللي حواليها يردوا ورا طوبى..
☘☘☘
كملوا شتاوات ورقصوا وعاشوا فرحتهم من قلوبهم وخلوا فرحة العرايس تكبر..
لكن مجرد ماسمعوا اصوات منبهات السيارات قالبه الشارع وقفوا وانتشروا ع حسب توزيع المهام اللي داراته سدرة..
🍃والشارع شبه تسكر..
سيارات اهل شكري وسيارات اهل اسامه...
واللي حط ايده ع منبه الصوت متاع السيارة معاش حولها..
ونزلوا الشباب اللي جايين مع العيلتين بش يديروا الالعاب الناريه..
في ناس من اهل الشارع وقفوا في الرواشن بس يتفرجوا منهم عواطف وسميرة وابتسام..
🍃عواطف بحسرة..
/زعما عوضهم ربي خير ولا بيصير فيهم زي حالاتي!
سميرة؛ندعولهم ربي يهنيهم..وفي النهايه ياعطوفه كل حد في الدنيا مش واخد غير نصيبه وكله خيره..
عواطف:الحمد لله ع كل حال..
ابتسام:قالوا اللي خدي اميمه دكتور واللي خدي مطيره حالته فوق الريح..محظوظات بنات الواعر..
سميرة؛خدوا حظهم ونصيبهم من المواجع سادهم..
مطت ابتسام شفايفها بملل..
عواطف؛شكلهم جايبين نوبه..
سميره:ايه..
☘النوبه كانوا جايبها اسامه..
بدوا الشوط معاهم وتدريجيا قلبوا الشارع وشباب الشارع مع اقارب اسامه قلبوا الدنيا...
علي الواعر طول الوقت يراقب في اسامه شافه كيف واقف يصفق ومبتسم بفرح وع قد ماحاولوا رفض يرقص..
وحفيده حسين اللي خدي اذن نص يوم بش يحضر معاهم كان مركز ع اسامه حتى هو ويراجي يخشوا للمربوعه حوش جده بش ياخد ع جنب ويهدرز عليه...
وطبعا ماكان في حد غايب من الاهل والجيران حتى الاصحاب كانوا حاضرين..زي عدي..زي ايمن لكن من غير عائلاتهم...
☘في نفس الوقت...
استقبلوا صفيه وسدرة وفاتن نساوين العيلتين احلا استقبال ..
اول ماخشوا ام اسامه وخواته وخالاته وعماته وشافوا اميمه انبهروا بيها وامه بطير من فرحتها...
اما هاديه وين خشت مع خواتها وقريباتها وشافت مطيره طلقت زغروده..وخلت باهي نساوين عيلتها يزغردوا معاها..
ومطيره تشوفلهم بإبتسامه..
☘☘☘☘
بعد السلام..وبعد مادخلوا الحاجات اللي جابوها اهل اسامه..اشرت سدرة لأريج..
فهمت اريج الاشاره..خدت دربوكه ومدت وحدة تانيه لصفاء وبدوا يدربكوا ويغنوا...
"مرحبتين اهلا جيتونا..ضيوف غوالي وشرفتونا"
بدت هاديه من اهل العرسان الرد تقول..
"مبروك علينا وعليهم..ناس اعزاز خلطنا بيهم"..
ردوا وراها بيتها..بعدها غنت اختها..
"يامبروك عليه شقيقي..هدا وين زمطته ريقي"
وبعد ردوا وراها شاركت عمة اسامه..
"حصلته ولد متسمي..لا تبكي لاتقولي امي"
ردوا وراها وام اسامه تشوف لأميمه بإبتسامة فرح..
ردت سدرة ع عمة اسامه تقول..
"امه جاباته يوم مطر..اللي حصلها هالقمر"
ابتسمت اميمه لسدرة واللي حواليهم يردوا في البيت..
ردت اخت اسامه...
"مبروك عليك المتعلي..وخي العين ذهب عصملي"
زغردوا نساوين عيله وكلهم ردوا وراها..
هني هاديه انحقمت وغنت ع اميمه..
" غاوي وبروحا يبيها مادلوه الناس عليها"
زغردت فايزة وردوا البيت وراها...
وبعدها غنت وحده من خوات شكري..
"ياقلبي المشغول تهنى..جبناله نقراش الحنه"
ابتسمت مطيره...
وبعد ردوا وراها غنت سدرة..
"عروستنا دلوعة بوها..اصحوا ياناس تبكوها"
ضحكت مطيره..
وهما يردوا في البيت ورا سدرة...
☘واستمرت حرب الخود وهات بالشتاوات لين وقفتهم النوبه لما بدت تضرب الشارع قعدوا يسمعوا فيها..
لكن كان في حديث يدور بين خوات اسامه..
☘"قفطانها يجنن تهبل كيف طالعه فيه نبي سامو يشوفها بيه"
:حتى اني..كان حصل كيف يخش نخلوه يشوفها بيه بعدين تلبس اللي جبناه...
:هو هدا..
وحده فيهم شافت جنه واقفه حدا العرايس تتفرج عليهم قالت..
/الله يبارك زي العسل بنت مني زعما!؟
ع خشة البنات مروة وتاله واريج بالضيافه..شويه وخشت بعدهم طوبى مشت وقفت حدا العرايس وهي تراقب في الوضع جتها جنه شدتها من فستانها طبست عليها رفعتها..
شافوا هدا كله خوات اسامه وقالت وحده فيهم..
/شكلها هادي امها..زعمه من تكون؟
:مش عارفه..
🍃من جهة تانيه هاديه كانت تهدرز مع اختها حتى هي..
هاديه؛هي هادي اصغر وحده فيهم..
:ياروحي عليها تبان صغيره..
تنهدت هاديه بضيق وقالت..
/وجهها وجه هم وحزن..
:شن قصدك؟!
هاديه بضيق؛ قصدي ربي يخيبه ان شاء الله..
شافت اختها لطوبى بأسف بعدين غيرت نظرها لتاله لمال سمعتها قالت ..
"تفضلي"
ابتسمت وخدت منها كلينكس...
🍃🍃🍃🍃🍃
بعد ماتم شوط النوبه خشوا الضيوف لمربوعة حوش علي الواعر..
حسين مشي لأسامه طول قعمزوا مع بعض وبدي يهدرز عليه واسامه كان يتكلم بثقه وراحه تامه..
🍃عبد القيوم؛بحت في حسين كيف مقعمز للراجل.. عبد الرؤوف بضحكه..
/وبش تختم عليه لابسله الصاعقه..
ضحك عبد القيوم نص ضحكة بعدين غير نظره لعدي وقال..
/مش عارف امتى يحل هالبني آدم!؟.
عبد الرؤوف:شكلك ماسمعتش بالتاني..
عقد حواجبه وشافله طول وهو يقول..
/تاني شني!!؟
عبد الرؤوف:ايمن الفاندي حتى هو خطبها..
غير عبد القيوم نظره لأيمن وهو يشوفله بغيره وصدمه..
ايمن مش زي عدي..ايمن عنده القوة والنفوذ اللي ماتخليش في وجهه اي عقبه تمنعه يوصل في طوبى..
عبد الرؤوف لاحظ ان التارقي جوه تعكر بالمرة وملامح وجهه ولت ماتتفسرش خلاه يندم انه خبره فكر يرقع اللي داره لما قال..
/لكن هي رداته وسكرت عليه الطريق..
وللأسف اللي قاله مابدلش حال التارقي قعد مركز بنظره ع ايمن اللي كان مقعمز جنب مختار..
🍃مختار؛في النهايه كله نصيب..
ايمن هز راسه بصمت وهو يغلي من داخل..
غير مختار نظره عنه لعبد القيوم شافله كيف يشبح لأيمن رفع حواجبه ونزلهم بعدين غير نظره لولاد عبد الرؤوف قعد يراقب فيهم كيف يلعبوا..شويه مشوا مع بعض لحسين وقفوا عليه وعطوه لعبة السيارة..
خداها حسين وهو يهدرز ع اسامه عدل البتاريات متاعها بعدين شغلها ومدها لمهاب..
ابتسم بتعجب بعدين غير نظره عنهم وشاف القدام وسرح بتفكيره...
🍃🍃🍃🍃🍃
"امتى صار!؟"
نجاة:ليها اسبوع الدوة هادي ياعمتي من الجمعه اللي فاتت..
مغليه بصدمه؛تكلم فيا ماحكتلي شي..خديجه مادس عليا شي كان صارت حاجه زي هادي تقولي..
نجاة؛والله ياعمتي هدا اللي سمعته من سلفتها..
مغليه بحقد:عطيها سحيقه الفرخه هديكا نشوف في حركاتها لخديجه هاللفعة المسمه..قليلة الرباية..
نجاة:اكيد ماشيه بتعليمات الشيطانه طوبى وخواتها..
مغليه بغل:مالا شنو..عطيهم ماينكد عليهم ياربي..
نجاة؛مايجيهمش نكد هادم ياعمتي اللي زيهم ديما الدنيا واقفه معاهم مايجي الكيد كان ع الباهي..
مغليه بقهرة:حسبي الله ونعم الوكيل فيهم من كبيرهم لصغيرهم..ترا مديلي تليفوني مدي خل نشوف خديجه..
خدت نجاه التليفون من ع الطاوله وعطاته لمغليه..
🍃🍃🍃🍃🍃
وتتعالى اصوات الزغاريد في حوش الشيطانه طوبى ع قولة المسكينه نجاة..بعد ماام اسامه لبست الدبله لأميمه..
ومقابلتهم وحده من خوات اسامه تتراسل معاه..ابتسمت وشافت لامها وهي تلبس في اميمه طقم الذهب اللي جابوه..
وكل ماتلبسها حاجه الحاضرات يزغردوا...
اخر شي سلمت ام اسامه ع اميمه سلام حار وهي تبارك..واميمه طبعت قبله ع جبينها ابتسموا نساوين عيلته لما شافوها..
ام اسامه:تبوسي ع الكعبه حبيبتي..
اميمه بإبتسامه:اجمعين ان شاء الله..
قدمت اخته وقال..
/اميمه ماعندكمش مكان فاضي في الحوش اسامه يبي يشوفك..
سمعتها مطيره وقالت..
/في الصاله..
اميمه شافت لعمتها بصمت..
التفتت مطيره شافت طوبى مشغوله ببنتها نادتها..
قربتلهم طوبى وهي حاضنه جنه قالت..
/نعم عمتي
مطيرة:راجل اميمه يبي يشوفها يخش الصاله عادي ولا؟!
طوبى مررت نظرها عليهم وقالت..
/عادي مافيش مشكله مكان مستخطي مايبان ع حد..
اخته قالت..
/باهي معليشي تورينا من وين نطلعوا بش ندخلوه..
طوبى التفتت وقعد دور في اريج لين شافتها نادت عليها..
☘☘☘
وطلع اريج خوات اسامه بعد لبسوا حجابهم وتوريهم مدخل الحوش..
مشوا الزوز مع بعض للباب فتحوه ووحده فيهم كانت تكلم فيه بالتليفون..
:وينك اسامه؟!
"خشيت الحوش توا"
سكرت عليه ونادت..
/اسامه..
هو حمحم وقال..
/ياالله..
اخته قالت بضحكه..
/مافي حد تعالى..
شويه وبان عليهم ابتسموله والصغيره قالت..
/اللهم صل ع النبي..راجي لين نشوف الطريق..
خشت شافت الممر لقاته فاضي..ولت طلعت ودخلاته ومعاها اختها ومشوا كلهم للصاله..
قعدت معاه اخته الكبيره..والصغيره ولت للمربوعه بش طلع اميمه...
🌸وطلعت اميمه بش تشوف اسامه وهي متوترة ومبتسمه بإرتباك..
وصلوا في الصاله وخشوا..
هو كان واقف ع اخته حاط يد وحده في جيب بنطلونه ويهدرز ع اخته..
اميمه لما شافاته جي بين عيونها موقف عمره 11سنه..
اول مرة تشوف فيها اسامه ..المرة اللي صورلها فيهم شيتات القرايه..وقتها الوحيد اللي برغم خجلها وانطوائها كان يتعامل معاها عادي بدون مايقلل منهاولايحسسها بالإحراج..
انتبه لوجودها..ولما شافها..انقطع عن الدنيا ومافيها
هي من قبل مضيعاته في عيونها..يابال يشوفها وهي بأبهى واجمل صورة زادوا عيونها فتنه..
خواته لاحظوا حالته قالت الكبيره..
/اسامه!
استاقظ..ضحك ومسح ع لحيته بإحراج...
وهي ابتسمت بخجل..
شافوا خواته لبعض عطوا لبعض اشارة وبعدها طلعوا وخلوهم..
اسامه وهو يشوف لأميمه بإبتسامه..
/خيرك بعيده!؟
ضحكت وقدمتله بخطوات خجوله لين وصلت فيه لكن خلت بيناتهم مسافه..
قدم خطوة وراها التانيه وهو يقول..
/مازال بعيده..
ضحكت وقالت بخجل..
/اسامه!
اسامه اطلق العنان لمشاعره ورد عليها يقول..
/ياروح اسامه..ياعيون اسامه..ياحلم عمر اسامه..ياعمره كله اسامه هدا اللي ميت فيك..
اميمه حست روحها بدوخ..من خجلها الشديد ماقدرتش تقيم عيونها فيه..
ضحك وقال..
/تمام..تمام..تو نديروا كنترول..مبروك ..
قامت عيونها وقالت..
/الله يبارك فيك قعد يتأمل في عيونها بحب بعدين قال..
/اني والله لتوا مامصدق حاجه..مد يده ليدها وخداها..شدها وهويقول..تعرفي اميمه..العام اللي فات مش محسوب من عمري..ماحسيتش روحي عايش وقتها صدقيني..اني توا بس ارتدت فيا الروح يااميمه..
تعبوا عيونها بالدموع وهي تشوف في صدق كلامه في عيونه وجعها قلبها عليه..وندمت اشد الندم اللي فضلت عليه واحد تاني...
تنهد وقال..
/اميمه..اني نحبك هلبه..فوق ماتتصوري..
ابتسمت بحزن..
هو ابتسم وقرب منها طبع قبله ع جبينها..تباعد شويه وقاللها
/هادي بس..
وخداها لقلبه وخلاها تسمع جنون نبضاته بيها..
ابتسمت من قلبها وفي نفسها قالت..
"يارب دوم مش يوم"
☘هو هدا الدعاء اللي لازم تدعي بيه وحده مرت بتجربتها..زواجها الأول كان عن حب بس للأسف حب عمره قصير..كان اضعف من انه يواجه العوائق والظروف اضعف من انه يبني عيله ويحقق الاستقرار...
هي توا صح مازال ماتحسش اتجاه اسامه بالحب بس سألت الله يكون عمر حبه طويل بش تقدر تحبه وتكمل عمرها معاه ويعيشوا حياة مستقرة كلها احترام وتعاون ونجاح..هادي اساسات العلاقه الزوجيه الناجحه اللي يقدر الحب يعيش فيها☘
☘☘☘☘
ولبست هاديه مطيرة الدبله وطقم الذهب..
وزغردوا عليها..
وخشت اميمه مرة تانيه وهي لابسه فستان اهل اسامه اللي طلعت فيه جميله وفاتنه كعادتها...
بعد خشتها...داروا شوط دربوكه رقصوا فيه العرايس اللي كانوا فرحانات من قلوبهم...
☘☘☘
وبعد العشي وصلت الحفله لأخرها..
طلعوا اهل اسامه بعد ماسقدوهم بالهدايا والشتاوات..
وبعد طلعتهم...جي وقت طلعة مطيره..
هني كل احبابها حسوا بضيق شديد وهي زيهم بس حاولت تتمالك نفسها وهما تماسكوا ع خاطرها..
لبستها هاديه عباية كاب سودا وغطتها تماما وطلعوها هي وخواتها بسرعه بدون ماتسلم ع حد..
بدوا نساوين العيله يبكوا..لكن طوبى كانت حاسة روحها مش قادرة تاخد نفس..مشت طلعت من حداهم وتوجهت طول لجنان الكوجينه..بدون ماتحس بنفسها طلعت من غير حجاب..
خدت نفس عميق وشويه شويه بدت تبكي..
يمر قدام عيونها شريط حياتها مع عمتها..واللي داراته معاها عمتها اللي كانتلها اكثر من عمة..بعدين خطرت عليها فردوس اللي خلت مكانها..فردوس اللي سندت ظهرها في اصعب اوقاتها..
طوبى كانت تحس اتجاههم شعور يشبه شعور الابن اتجاه امه..
شعور كانت تحس بيه اتجاه سدرة بس..وفي غياب سدرة حساته بقوة مع فردوس ومطيره...
انهارت طوبى بالبكي..وصوت بكاها كان مسموع..
طلعولها اريج وغرفه وصفيه..
صفيه خدتها في حضنها وحاولت تهديها وطوبى بالعبره مابتش تهدا خلت غرفه واريج يبكوا معاها...
اريج من غير شي حاسه روحها فاقده امها هلبه..وطلعة مطيره كانت بالنسبه ليها القشة التي قسمت ظهر البعير..
هدا كله وسدره واقفه في باب الكوجينه تسمع وتشوف وتبكي حتى هي..
🍃في هاللحظه..
خشوا علي الواعر والمحجوب من الباب الفاصل..
كانوا يمشوا عادي لعند ماسمعوا صوت البكي..
قدموا بسرعه لين بانوا عليهم النساوين..
المحجوب وخر..لكن علي قعد واقف يشوفلهم بألم..
هو بروحه حس بالوحشه بعد مامشت وحيدته..
ويخش مختار للحوش..سكر الباب وهو يسمع فيهم يبكوا استغرب...
قدم كم خطوه لين وقف جنب جده..والمحجوب واقف ع تركينه يشوفله..
🍃حالة طوبى خوفت اللي حواليها المراة بدت تبكي بالصوت..
صفيه بخوف:طوبى!..
طلعت فاتن بطاسه مية صبت منها شويه ع ايدها وقعدت تبخ فيها..
غرفه بخوف:حي عليا خيرها!؟
سدرة جمدت ف مكانها وهي تشوف في حالة طوبى..
☘هدا اللي يكبت ويقاوم في مشاعره ويحمل نفسه فوق طاقتها ينهار ع اهون سبب..واللي تتحمل فيه طوبى وتقاوم فيه شي كبير..قاعده تكمد فيه بش تقعد ديما ثابته وقويه..☘
مختار بدون مايشعر لقي روحه ماشيلها..
وصل فيها خداها من صفيه وضمها في حضنه وهو يقول..
/اشش..خلاص خلاص..اهدي..اهدي..وقعد يمسح ع شعرها بحنان..
هما قعدوا يشوفلهم بصمت..
لكن..علي الواعر كانت نظراته كلها الم..وجنبه المحجوب دموعه كانوا ينزلوا..
"شن صار لهدا كله شن صار..!؟ هي طالعه عروسه مفروض توا شادينها دربوكه وتغنوا..ان شاء الله ماطيرش حنتها الاوسدرة في جرتها...هكي هي ولا"..
سمعوا اصوات ضحكاتهم...
حط المحجوب صبعه في فمه وقعد يعض فيه وهو يبكي..
والحاج علي يسمع فيه وهو شاد دموعه بقوة..
🍃بعد مختار طوبى وحط يده ع خدها وقال..
/خلاص هدي..وخشي داخل صقع..
هي كانت منزله عيونها عنه تباعدت ومشت خشت داخل ..
وغرفه واريج وفاتن لحقوها..
مختار شاف لصفيه وقال..
/خشي خالتي صقع...
صفيه كانت تشوف لعمها علي وهو ماشي قالت..
/اكثر حد بيفقدها..
التفت وشاف المحجوب وهو طالع من الحوش رد نظره لصفيه وقال مازحا..
/من قصدك المحجوب!
ضحكت بعصبيه وقالت..
/خزي ع وجهك..ومشت خشت داخل..
لحقها بنظره وهو يضحك لين جو عيونه ع سدره اللي قعدت واقفه..
ابتسم بإستغراب وقال..
/خيرك تشبحيلي هكي!؟
سدرة بألم...
"سامحني"
تبددت ملامح ابتسامته وحلت محلها ملامح التعجب..
شافها كيف لفت ومشت بسرعه..ابتسم بتهكم وقال..
/سامحني..شن بدير الكلمه هادي ياسدرة!؟ لاتقدر ترد اللي فات..ولاتقدر ترد اللي راح..فات الفوت خلاص..
خدي نفس..بعدين مشي قعمز ورا الطاوله ووجه نظره لشجرة الياسمين ونظراته ليها كانت كلها..كره..
🍃🍃🍃🍃🍃
مقعمزه ع السرير تشوفله وهو واقف يعدل في منبه هاتفه..
حطه ع الكامدينو وخش السرير..
نبيله :خيرك ماتقولش مروح من عرس..
تنهد وقال؛مفروض مشيتي..
نبيله:كلموك عليا!؟
هو قال؛سألت عليك طوبى وحسيتها زي اللي حرجت..
نبيله بضيق..
/والله مايهون عليا زعلها..لكن انت تعرفني مانحبش نفرض نفسي ع حد..
المحجوب:ع خاطري غدوة امشي باركي..
تنهدت وقالت..
/حاضر..لكن قولي انت خيرك ملامحك تعيسه هكي!
عطاها بظهرها وقال..
/مافي شي..تصبحي ع خير..وغطا روحه بالورغان..
هي قعدت تشوفله بتفكير..
توقعت انه صار بينه وبين مختار كلام او شاف منه تصرف مؤذي..
لكن ماقدرتش تقتنع بتوقعها هدا حست ان في شي اكبر من هكي..
تمددت ع السرير وتغطت وهي تشوفله والافكار تاخد فيها وتجيب لين جاها النوم ورقدت..
🍃🍃🍃🍃🍃
"المراة نفسيتها تاعبه وحاستها قاعده خايفه من ولدك غير ماتبينش"
محمد شنيبه:صاير شي اني مانعرفاش!؟
سميرة:لامش هدا قصدي..قصدي ان طوبى مش قادره تنسى اللي داره فيها الجالي وخايفاته يديره توا مرة تانيه وعندها حق تخاف بصراحه..
محمد:ماعندكم من شن تخافوا مستحيل يعاود العبيتر اللي داره..وراهو ياسميرة هو متغير هلبه واضح عليه ماعندهم علاش يخافوا منه..
سميرة:مع هكي الاحتياط واجب حميدا..
تنهد وهز راسه وهو يقول..
/طمنيها وقوليلها عمك محمد مايخلي شي من اللي صار يتكرر بكل..
ابتسمت وقالت..
/ربي يحفظك ويسلمك..
ردلها الابتسامه وعقله يفكر في كلامها عن الجالي...
🍃وفي الحوش اللي مجاورهم..
تحديدا جناح صفاء واشرف..
حطت صفاء ولدها في سريره وهي تقول..
/وجعتني هلبه..الله لايربح اللي كان السبب في كسرتها..
اشرف:راك تقوليلي حكيتي شي من اللي صار غادي!؟
التفتت وقالت..
/انت قلت ماتحكيش ولا..معناها ماحكيتش نسمع ف الكلام راهو مش شلولحه..
ضحك وقال:مش قصدي ياودي كنت نبي نطمن بس..تنهد بعدين قال..لكن تعرفي مش عارف علاش حاس ان في شي صار بيناتهم..محي الدين مايروحش لشقته..
قعدت تفكر في كلامه..فتحت عيونها ع وسعهم وقالت..
/زعمه طلقها!!؟
هو بصدمه:معقوله!
صفاء:هدا التفسير الوحيد..
عقد حواجبه بضيق وقال..
/لا ان شاء الله ماوصلتش لهني..
☘ومن الجناح للصالون اللي كانوا مقعمزين فيه سميرة وع الفتاح..
سميرة:ربي يهدي النفوس..
عبد الفتاح؛ان شاء الله..لكن تعرفي غلطه عمره اللي خداها..خداها مصلحه في مصلحه وقعد سنين عايش معاها وهو متحمل غطرستها وتكبر ماليها ماارتاحش معاها بكل..
سميرة؛بصراحه صح هي وحده لاتطاق..لكن مرات توجعني..واعرة ع المراة تعيش مع راجل مايحبهاش..
عبدالفتاح ابتسم وقال..
/لكن اني نحبك..
ضحكت وقالت..
/من دوي عليك انت..
ضحك بعدين قال..
/غدوة بنتسقد من الصبح للزاويه عندي شغل غادي..
سميرة؛بتبات ولابتروح؟!
عبد الفتاح:مش معروف تو نشوف ونقولك..
سميرة؛الطريق امنه ولا؟!
عبد الفتاح؛الطريق اللي بنمشي منها امورها تمام ماتخافيش..
سميرة:تمشي وتجي سالم غانم..
ابتسملها وهو يقول..
/آمين...
🍃🍃🍃🍃🍃
وفي هديكا الليله..سهرت اميمه في دارها وهي تهدرز ع اسامه وطول المكالمه وهي تضحك وقلبها فرحان...
🍃لكن في من بات معاها في نفس الحوش وقلبه مغموم وحاله متكدر...
🍃وفي الحوش اللي مجاورهم..
باتوا بنات عمها مع بنت اختهم برواحهم الليله..
اريج راحت في النوم زي جنه..
عكسهم سدرة وطوبى..كل وحده سهرانه بروحها النوم جفاهم...
سدرة كانت سهرانه مع افكارها..
لكن طوبى مع ع الفيس مع صفحتها اللي فتحتها من فترة وسمتها..
"الحنه"بفتح الحاء...
الصفحة محتواها ديني كانت تنزل فيها فإقتباسات من كتب العلماء اللي قرتهم وتشرح فيه بلغة مبسطه واسلوب يخش القلب..
والاقتباس اللي اختاراته هالمرة كان..
(( أعظم الناس خذلانا من تعلق بغير الله))
العلامة ابن القيم رحمه الله
مدارج السالكين : 1/458.
تكلمت عن اللي يصير مع الانسان لما يتعلق بأي حد او اي شي في الدنيا كيف يتعذب لما يخسره او يريح منه..وصفت عذاب التعلق من التجربه اللي عاشتها..
تعلقها ببوها..بسدرة..ببنتها..حتى تعلقها ببينكا اللي تعبها موتها هلبه..
ماذكرتش هالتفاصيل اكيد بس وصفت احساسها فيهم بأسلوب جدا مؤثر..وفي الاخر تكلمت عن جمال احساس التعلق بالله الدايم الباقي اللي مايخليش قلب تعلق بيه..
هو مايخليش العاصي ع عصيانه يابال القريب منه والمحب ليه..
منشورها تفاعلوا معاها المتابعين القلائل اللي عندها..
وفي من دارها مشاركه ومنهم صفيه بنت عمة عبد القيوم..
🍃عبد القيوم اللي كانت سهران يصلي في القيام ومع كل سجده كان يدعي لله مايخلي حد ياخد منه طوبى ويخليه تكون من نصيبه ..
هو هدا عين العقل..طوبى ملك لمولاها هو اللي بيده امرها مفروض مايطلبها من حد غيره...
ومع هذا..بعد ماكمل صلاة قعد مضايق من الغيره اللي نارها تاكل في قلبه..كان يلقى يدسها في قلبه ومعاش يخلي حد يشوفها...
تمدد ع فراشه وخدي تليفونه وخش ع الفيس..
جت قدامه مشاركه صفيه لمنشور صفحتها..ماكانش عنده علم بيها لذلك تخطاه بدون مايقراه..
شاف بعده منشور لسامي منزل فيه صور عقد القرآن..
قعد يتفرج عليهم بالوحده وين يجوا قدامه صور لأيمن وعدي يفوت فيهم بسرعه..
لين وصل في صور ليه خداهاله سامي وهو يهدرز مع حسين..
ووحده تاني كان لاهي فيها بتليفونه..ابتسم وقال..
/فنان..
بعدين خدي صورته ونزلها وكتب عليها ابيات شعريه..
《رافق اكبار العرف واتبع قولهم.
واشرب نقيع السم كان سقوك..
وابعد ع اللي فارغات عقولهم.
وكب العسل ع الارض كان عطوك.》
ونزله...وتنهال عليه التفاعلات والتعليقات...
طلع من الفيس وحط تليفونه في جنبه لف ع جنبه الايمن وربع ايديه وبدي يقرا في الاذكار....
🍃في الوقت اللي فيه سلافه تتفاعل ع المنشور ب"أحببته"
وتاخد صورته تنزلها في تعليق ومعاها ابيات شعر...
《الشوخه الي تجري الناس عليها
بلاها اكبار وما اكبرنا بيها
من يجهلنا
نظيف صيتنا ديما اكبار بهلنا
وماعمرنا للخايبه دللنا
ولا الصايبه ساعه اخطينا فيها
وماعمرنا في الصاعبات اوحلنا
وجميع من قصدنا حاجته يقضيها
و ما مـن اللي فينا اخطـي و احملنا
و جـانـا يـريـد ارضـاتنـا شـاريهـا
رضـانـا خـذاه و مـا عليـه ابخلنـا
و عـاود علينـا بسيتـه كـافيهــا
و لانـا علـي فعـل الخطـا جـاملنا
.و لانـا مـن اللـي يـزرعـو الكـريها
مـا مـن مـواجـع فـي الخـواطـر شلنا
..و الناس مهمـا تـديـر ماترضيها
الشوخه الي تجري الناس عليها
بلاها كبار اوماكبرنا بيها...
بتشهبك الابيات》
☘اكيد من حبها ليه حبت كل اهتماماته وتأثرت بيهم☘
باهي لكن تعليقها هدا شافاته هلبه عيون..
اولهم معمر راجل صفيه اللي كان مقعمز جنبها ع السرير مشغول بالفيس زيها هي..
ضحك وقال..
/الحقي ولد خالك ولى عبدو فلافل رسمي..
صفيه؛شن تقول!؟
معمر بضحكه..
/خشي ع اخر منشور نزله..
طول شافت لتليفونه وخشت ع اخر منشور اللي دارته مشاركه حتى وكتبت عليه ربي يحفظك بالتارقي..
وتشوف تعليق سلافه انصدمت..
معمر:قريتي اخر جمله!؟
صفيه:مصح وجهها كيف تعلق هكي!؟ اساسا عمري ماحقيت تعليقات صبايا عنده بكل..
معمر:هذي ديما تتفاعل مع مناشيره ليا مده نراقب فيه لكن باهي اللي غير الموجه ماعنده مايدير بالليبيات ونكدهن..
صفيه بنرفزة:عدي عليا غادي مش وقت صماتك بكل..
ضحك..
وهي تقول في نفسها..
"زعم شافاته طوبى!!؟"..
خشت ع حسابها لقاته نشط مطت شفايفها داخل بضيق..
🍃وطوبى فعلا شافت المنشور والتعليق..
انوجعت ودموعها نزلوا..لكن مع هذا حطت راسها ع المخده وبدت تذكر في الله لين جاها النوم ورقدت...
🍃وراما سهرانه مع مصيبتها الكبيرة..
جتها رساله من صاحبها يقول فيها..
(غدوة نبي نشوفك تقولي لا ذنبك ع جنبك)
#كانون_الاول
#طوبى
....يتبع...
