■■■■■■■■■■■■■■■■■■■■
❎تنويه❎
بعض احداث اقسام جزء #منازل_القمر صعبة ومرهقه نفسيا
#طوبى "جنة طوبى"
#جمان_فريد
#الجزء_116"منازل القمر"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#تاج_الذكر
لاإله إلا الله وحده لاشريك له له الملك وله الحمد وهو على كل شيء قدير.. 🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 تستطيع المرأة جعلك تعتقد أنها سعيدة
وهي عكس ذلك ..وهي تفعل هذا من اجلكَ..لجعلك سعيداً.
انني لا أزال حتى هذا اليوم عاجزاً عن أن أقطع فيها برأي
إن الله وحده قادر على أن يرى عواطفها
ثم إن الإنسان جهاز يبلغ من التعقيد أن المرء
لايستطيع أن يفهم من أمره شيئاً ، و لا سيما اذا كان هذا الانسان إمرأة..
دوستويفسكي🍃
________________________________________
"الله يبارك اجواء حلوة"
غرفه:ايه الحمد لله..
"وين طويبه"
غرفه خشت للحوش من باب الكوجينه وهي تقول..
/هاني ماشيتلها..
"خويله خلوا الدواوير للفرخه اريج"
غرفه بضحكه..
/من بكري حاصله فيهم مع مروة بنت فايزة..
"علموها طيب اهم شي "
غرفه:اهي بدت تتعلم كل مرة حاجه..
وصلت في دار المعيشه خشت وهي تقول..
/طوبى..
🍃طوبى كانت سرحانه ودموعها ينزلوا لما سمعت صوت غرفه يقرب من الدار مسحت دموعها وتظاهرت انها عاديه..🍃
اول ماخشت عليها غرفه وكلمتها ابتسمت وهي تقول..
/فردوس!؟
غرفه قربتلها مدتلها التليفون وهي تقول..
/ايه..
خدت طوبى التليفون وشافت للشاشه وهي تقول..
/دوسه كل سنه وانتي طيبه..
"طويبتي كل عام وانتي بخير حبيتي"
"بيبو حبي كل سنه وانتي طيبه."
طوبى بضحكه..
/كل عام وانتي بخير وين ولدك وين؟
"راجي شويه"
"شن حالك طويبه"
طوبى وهي شاده دموعها بقوة قالت..
/الحمد لله حبيبتي انتم شن حالكم..
"الحمد لله"
"خويله بيبو جيتك"
ضحكت طوبى وهي تقول..
/الله يبارك الله يبارك ع العسل ربي يحفظه وينجيه..
☘طلعت غرفه من حداها وهي مبتسمه مشت بإتجاه الكوجينه شافت نبيله فيها طلع في طواسي الميه المسكرة من الثلاجه..
نبيله لما شافتها قالت..
/خيرها طوبى ماطلعتش!؟
تنهدت غرفه وقالت..
/بالك شويه تانيه وتطلع..
نبيله:وجهها ماعجبنيش حالتها بشكل عام مدهورة هلبه..
غرفه بضيق..
/اكيد حكالك خالي..عاينتها اليومين اللي فاتوا طلع عندها فقر دم وجسمها ضعيف..
نبيله بأسف:لاحول ولاقوة الا بالله..مش عارفه علاش حاسه في شي تاني صاير معاها..
🍃نبيله والمحجوب مايعرفوش بقصة الصور طوبى خافت دخل خالها في مشاكل تانيه وينضر من وراها..🍃
غرفه:اللي صار مش شويه يانبيله وفوقها مرضتها بالكورونا كله خدي فيها حصه..
نبيله:توا لازم ترد بالها ع صحتها وتطلع من الحاله اللي هي فيها عندها بنت محتاجتها..
انوجع قلب غرفه بزياده بعد ماسمعت كلام نبيله الاخير..هزت راسها وقالت..
/ان شاء الله..غير تكمل حوسة العيد تو نلهى بيها..
🍃🍃🍃🍃
"مستغربه فيها هلبه معاش ترد ع اتصالاتي بكل وحتى الرسايل اللي نبعت فيهم تشوفهم ماتردش حتى توا اتصلت بيها ماردتش"
عدي بقلق..
/شن رايك نرفعك غدوة العشيه تشوفيها؟
زينب:لازم نعطيهم علم قبل..
عدي:ماعندكش رقم حد من خواتها؟
زينب:عندي رقم اختها غرفه تو نكلمها..
هز عدي راسه ومشي طلع للجنان وخلا اخته واقفه تشوف للتليفون وهي تفكر في وضع طوبى بقلق..
🍃طوبى المجاهده..اللي قضت اغلب حياتها وهي تجاهد وتقاوم..هي توا تبي تجاهد نفسها وتقاوم مافيها من تعب وضيق وتطلع تشارك عيلتها اجواء العيد..
لبست شاربتها وقفازاتها ع فستان صيفي فضفاض وطلعت للجنان..
سمعت اصوات الهدرزة والحركه توترت لكن كملت طريقها لكرسي بلاستك محطوط قريب من شجرة الليمون..
قعمزت عليه وقعدت تمرر في نظرها ع المكان..
شافت يمينها من بعيد شويه حسين يجهز في الشوايه"منقل الشواء" وخالها محجوب مقعمز مع عمها عبد المطلب ع كراسي بلاستيك يشربوا في الشاهي وياكلوا في الفطيره وحداهم خمسة سقايط معلقه..
غيرت نظرها يسارها جي ع باب الكوجينه الخارجيه بانت عليها صفيه توكل في الصغار ولاد غرفه وجنة بنتها..
ركزت بنظرها ع جنه غرقوا عيونها بالدموع غيرتهم عنها جو ع شجرة الياسمين طاحوا دموعها..
مسحتهم طول لما سمعت غرفه تقول...
"اهي طوبى طلعت وتولها صفرة"
ابتسمت طوبي وهي تشوفلها كيف رافعه سفرة كبيره وماشيه بيها للرجاله قعدت معاها بعيونها لين وصلت في الطاوله حطتها ومشتلهم...
☘غرفه:هي تعالوا افطروا..
ناضوا عمها وخالها وحسين سيب اللي في يده ولحقهم..
غرفه وهي ماشيه..
/عمي..اللي في الصونيه البيضا بالملح بس ليك انت..
عبد المطلب؛باهي باهي..
قعمزوا حوالين الطاوله وغرفه وهي تشوفلهم قالت..
/ماتبوا شي؟!
المحجوب وعبد المطلب..
"صحيتي..لاخلاص"
حسين؛خلينا ناكلوا بعدين نعطيك الحكم..
المحجوب:حكم شنو؟!
غرفه؛بيشوف كان نعرف ندير حاجه في حياتي ولالا!؟
ضحك المحجوب وهو يقول..
/تو ياكل صوابعه وراه زي مايقولوا..
حسين بضحكه:شكار العروس..
المحجوب؛خلاص كول بروحك واحكم..
ضحكت غرفه ومشت وخلتهم ياكلوا وحسين يشوفلها بإبتسامه بعدين قال..
/قبل تحرج فيسع لما حد يتسهوك عليها..
ابتسم المحجوب..
غير حسين نظره عنها جو عيونه في عيون بوه اللي كان ياكل ويشوفله بإبتسامه بعدين قال..
/والله ماكليت زيها ..
نزل حسين عيونه وهو عاقد حواجبه وبدي ياكل..
🍃هدا كله ع عيون طوبى اللي كانت تشوفلهم بإبتسامه..
"جيتك جيتك جيتك"
شافت لاميمه اللي كانت جايتها بسفره مدتهالها وقالت..
/شدي شويه..
خدت طوبى السفرة..
واميمه مشت جابت طاوله صغيره وكرسي بلاستيك..
حطت الطاوله بينها وبين طوبى والكرسي وراها..
خدت السفرة وهي نقول..
/قلايه مش عاديه دارتها غرفه..
حطت السفرة ع الطاوله وقعمزت..
كسرت خبرة ومدتها لطوبى خدتها منها وقالت..
/عيد عليك اسامه؟
اميمه بإبتسامه:من امس لبعد صلاة العيد وهو يعيد..
ابتسمت طوبى وبدت تاكل..
اميمه:ايه حقه بنقولك الدكتور اياد خطب..
طوبى وهي متفاجئة..
/جديات!؟
اميمه بضحكه..
/ايه..خطب وحده تخدم في معمل التحاليل في المصحة عزبا لكن كبيره شويه جو 35ولا 36سنه ومنسجمين مع بعض هلبه..
طوبى:يقولوا نصيب حد ماياخده حد..
اميمه:صح..
قعدوا ياكلوا الزوز وهما ملتزمات الصمت..
بس طوبى هالمرة حست بشي غريب وهي تاكل بدت تشوف في الدنيا حواليها صفرا..حست بدوخه..
بدون ماتلفت الانتباه وقفت ماكله وخدت طاسة العصير وقعدت تشرب منها لحظات واختفي الشعور اللي حست بيه لكن نيتها للاكل انسدت..
اميمه:كولي..
طوبى بمجامله؛ناكل..
ولأنها ماتبيش تسد نية اميمه معاها ولت تاكل شويه شويه لعند ماشبعت اميمه وناضت..
طوبى:ارفعيها خلاص..
اميمه:كملي حصتك..
طوبى:لالا نبي نخلي مكان للشوا..وضحكت ضحكه تخفي توترها..
ابتسمت اميمه وقالت..
/والعصبان حتى هو..
خدت السفرة ومشت بيها للكوجينه..
طوبى من التوتر رجع ضاق صدرها كيف جت بتنوض جاها حسين وهو يقول..
/طوبى شن جو..
شافتله وقالت بإبتسامه مجامله..
/تمام..
وخر الكرسي وقعمز وهو يقول..
/تمام تمام..طلع من جيبه حاجه وحطها ع الطاوله لما شافتها طوبى ضحكت بمفاجأه وقالت..قاعده عندك؟
حسين:امس بالصدفه نقلب في حاجاتي لقيتها..
☘يحكوا ع لعبه صغيره ع هيئة حمامه شرتها طوبى لما كانت تقرا خامس ابتدائي وهدتها لحسين☘..
ضحكت ضحكه خفيفه وخدتها بيدها المغطيه بالقفار وقعدت تتأمل فيها..
فهاللحظه يطلعوا صغار غرفه وجنه معاهم يجروا ورا بعض وجو لحسين..
جنه وهي واقفه جنب كرسي حسين كانت تشوف لأمها وفيها خوف منها..
حسين شافلها قال..
/جنونه شن جو ياعسل..
جنه شافت لحسين وقال..
"تموم"
ضحك حسين وطوبى تشوف لبنتها بإبتسامه شابها شي من ملامح الضيق..
اواب..
"سياته امشوا سياته"
حسين بضحكه:لالا اليوم مافيش سيارة اليوم بنديرلكم مفاجأة..
مهاب قال..
"سور برايز"
حسين بضحكه وهو متفاجئ..
/اياااه..
وطوبى تتفرج عليهم بإبتسامه..
حسين:باهي برا ناديلي ماما..
مهاب..
"باه"..
ومشي يجري للكوجينه الخارجيه..
اواب..
"شن سوربرايز"
حسين:تعرفها بعدين العشيه باهي..
اواب..
"باه"
ع جية غرفه ومهاب يجري قدامها..
وصلوا فيهم وقالت غرفه..
/هاه شن حكمك؟
حسين ابتسم وقال..
/يصير منك..
ضحكت وقالت..
/ياسيدي بارك الله فيك..
طوبى رفعت يدها اللي فيها اللعبه وقالت..
/تتفكريها روفي؟
ركزت غرفه النظر فيها بعدين قالت بإستغراب..
/ياااه وين لقتيها هادي!؟
نزلت طوبى يدها وقالت..
/جابها حسين..
ابتسمت غرفه وقالت..
/قاعده عندك لتوا؟
حسين:بالصدفه لقتيها في شنطه حاجاتي القديمه متفكرة انتي شن درتي لما جابتهالي طوبى..
غرفه بإبتسامه ازدراء..
/قعدت نتسهوك عليها زي البيبي..حطت ايديها ع وذان ولادها وهي تقول..اسكتوا مانبيهمش يعرفوا الماضي العبيط متاعي...
طوبى قعدت تضحك..
فرحت غرفه بضحكتها هلبه..وجنه وهي تشوف في امها تضحك ابتسمت لااراديا..
غرفه:عجباتك يارتيله انتي..عجباتك..وجتها وقعدت ادغدغ فيها وطوبى تضحك من قلبها..
اواب ومهاب قعدوا يضحكوا وجنه تضحك لضحك امها..
☘لكن حسين كان يتأمل في غرفه مش قادر يستوعب ان غرفه اللي قدامه هي نفسها بنت عمه اللي يعرفها كويس☘
وخرت غرفه عن طوبى وقالت..
/خلاص اقلبوا صفحة الماضي اقلبوا ماتشوهونيش قدام صغاري..ولا نقوللكم خل نجبدوا ماضي طوبى قدام بنتها..تتفكر حسين لما كانت تشوش علينا وين تقري فينا اني واميمه..
حسين بإبتسامه..
/مرة نبي قلم مرة نبي كراسه..
غرفه بضحكه:ولا لما كنت تكتب في واجباتك في المطحن كيف تجي تزن عليك بش تلعب معاها..
حسين:نعطي فيها ورقه وقلم والوان ونقوللها ارسميني..
غرفه بضحكه:ولا لما طيرلها تشد كلمه لالا وهي قارنه حواجبها..
حسين؛كانت معانديه درجة اولى..
☘هما يتكلموا وطوبى تشوفلهم لاحظت شي اول مرة تشوفه بين حسين وغرفه..الانسجام☘..
"غرفه تعالي تبلي اللحم"
غرفه بصوت عالي
/هيا هاني جايه.. شافت لحسين وقالت..بالله عينك عليهم حسين..
ولفت ومشت بسرعه للكوجينه وحسين معاها بعيونه حس بشي من الضيق لما مشت..
ناضت طوبى وهي تقول..
/خل بنخش داخل سخنت..
شافلها وهز راسه بصمت وهي مشت خشت داخل وعيون بنتها معاها..
ويرن هاتف حسين..شافوله الصغار..
طلعه من جيبه وشاف المتصل ابتسم وفتح الخط ورد..
/اساروف..
"اساروف..وكل سنه وانت طيب"
حسين بضحكه..
/كل عام وانت بخير ياخمسي..
"ياريتك حتى انت درتها وعيدتوا هنا"
حسين:تبي ندير عليها دورة ونصلح فيها حاجات الفترة اللي فاتت مالقيتش وقت بعد العيد ان شاء الله نلهى بيها..
"إن شاء الله..شن الجو العام؟"
حسين:الحمد لله كل شي تمام..
"باهي الحمد لله.."
حسين:شن حال العيله؟
"منسجمين وعاجبهم الجو الطبيعه هنى سمحه ترد الروح"
حسين:صح..
"بإذن الله ثالت يوم العيد جايبهم لطرابلس وبنديرولكم زيارة"..
حسين:مية مرحب بيك وبيهم..
"تسلم..خلاص نتلاقوا ان شاء الله نخليك توا مع الشوا والعصبان"
حسين بضحكه..
/نشوفك ع خير..اوينا
"السلام عليكم.."
حسين:وعليكم السلام..
🍃🍃🍃🍃🍃
اجواء العيد تختلف من مكان للتاني..وتختلف من عيلة للتانيه..والعيد مع عيلة الصيد في مزرعة محي الدين كان بدايه شرارة الحب بينه وبين ابتسام..
تبادل نظرات وابتسامات..واستعراضات من محي الدين تشبه استعراضات المراهقين للفت النظر لكن استعراضات ابتسام كان فيها شي من الثقل المصطنع هي كانت حريصه ع كسب قلوب العيله اكثر من محي الدين نفسه لأنها عارفاته ولى في الجيب خلاص..
وطبعا صفاء كانت مركزه ع كل حركه وسكنه وفي داخلها تضحك..
اما راما اللي كانت عارفه مافيها اتبعت سياسة التجاهل بالذات وهي تشوف في بوها كيف مهتم بصغار عمها اكثر منهم..
خوها محمد بعد ماقضى فترة في المصحة وشبه تعافى تماما كان موجود معاهم لكن طول الوقت مقعمز وملتزم الصمت ممكن لأن نظرات اللي حواليه كانت غير مريحه ماارتاحش وكان يتمنى يخليهم ويمشي لمكان مايشوفه فيه حد..
🍃وامه اللي قاعده تعيش حالة مراهقه متأخره خف عقلها بالمرة وبدت دير في تصرفات اقل مايقال عنها طايشه..
هي توا ماشيه لخوها المهدي اللي كان واقف ع الشوايه وطلبت منه...
🍃خديجه؛مهدي تعطيني تليفونك بنكلم الصغار غير رصيدي تم..
المهدي بدون مايدقق طلع الهاتف من جيبه ومدهولها..
وهي خداته ومشت تباعدت عنه..
وطبعا ماكانتش تبي تكلم صغارها..خشت ع سجل الاسماء ودارت بحث ع اسم مختار..لقتله رقمين ليبيانا ومدار طول سجلتهم في تليفونها...
بعد ماسجلتهم..دارت اتصال لرقم بنتها راما لكن مش كامل فيسع نهت المكالمه قبل توصل..
مسحت مايدل ع انها خشت ع سجل الأسماء وولت لخوها عطاته هاتفه وخشت للحوش...
🍃ومختار فهالوقت خدي من وقته الثمين دقايق بش يكلم فيهم طوبى..
☘طوبى اللي كانت مقعمزه في دار المعيشه تتفرج ع التلفزيون حاطه ع إحدى القنوات السعوديه اللي تبث في الصلوات من الحرم المكي..
الحرم اللي كان خالي من البشر منظره زاد ضيق قلبها وحزنها وفي نفس الوقت خوفها..
ويجيها اتصال مختار..عقدت حواجبها شافت اسمه ع الشاشه..تنهدت بضيق..وفتحت الخط وردت..
/السلام عليكم..
"وعليكم السلام وكل سنة وانتي طيبه رغم اني الكبير لكن قلت معليشي كان مابدتش عليك هي وعيدت انت ابدا عليها"
طوبى؛كل عام وانت بخير..
"خيره صوتك؟ كنتي راقده!؟"
طوبى:لا..
"اممم..تمام اني مروح تالت يوم العيد تو نجيك ونتفاهموا اهي معاك فاتن"
ابتسمت طوبى..
"طوبى..كل عام وانتي بخير"
طوبى بإبتسامه..
/كل سنه وانت طيبه فتون شن حالك وحال عليوه..
ردت فاتن بضحكه..
"يسلم ع عمته ويعيد عليها"
طوبى بضحكه:العام الجاي ان شاء الله يعيد معانا ويلعب ويجري مع صغار عماته..
"إن شاء الله..شن حال جنونه والعيله"
طوبى:الحمد لله في خير ونعمه..
"الحمد لله..ماحداك حد؟"
طوبى:قاعده بروحي في الدار..
"تمام تو نكلم غرفه ونعيد عليها نتلاقوا تالت يوم العيد ان شاء الله"
طوبى:إن شاء الله..السلام عليكم..
"وعليكم السلام"
نهت طوبى المكالمه بسرعه ماكانتش عندها رغبه تكلم مختار مرة تانيه..رجع احساسها بالنفور منه اللي صار بينها وبين سدرة بسببه..هي ماخدتش منه هو بس موقف..خدت موقف حتى من نفسها من قلبها اللي يخلي في طيبته تغلبه ويدير افعال صح مع الناس الغلط ويندم عليها..
وبرغم قسوة سدرة عليها اللي اول مرة تشوفها منها مازعلتش منها ولاقدرت تحمل في قلبها عليها شي...
🍃🍃🍃
وجي وقت الغدي..
اجتمعوا النساوين في الجنان تحت المظله كل وحده شاده صحن مشاوي وتاكل..
ماعدا صفيه اللي كانت تاكل وتوكل في الصغار..
وحتى مئاب اللي كانت مقعمزه في كرسيها المخصص ترضع في الحليب من المرضعه ومرة مرة تتفرج عليهم..
كانوا ياكلوا ويهدرزوا وطوبى كالعاده مستمعه..
هي من قبل قليلة كلام وتفضل الاستماع لكن هالمرة ماكانتش عندها رغبه في الكلام ولا الاستماع جبرت نفسها تقعمز معاهم وتسايرهم بش ماتشغل بال حد وتفسد عليهم متعة العيد...
🍃🍃🍃
بعد الغدي..
ولعت صفيه النار في المركاب وحطت عليه طنجرة كبيرة فيها ميه وتوابل بيطيبوا فيها العصبان..
بعدين مشت لغرفه تعاون فيها في تنقيب عصبان الكرشه قبل ليحطوه في الطنجرة...
🌸في نفس الوقت كان حسين يجهز في المفاجأه متاعه..
وهو طالع من المربوعه الخارجيه سمع صوت ضحك امه وغرفه شاف القدام لقاهم يتعاونوا وهما يهدرزوا بإنسجام ويضحكوا...
غصب عنه ركز مع غرفه...مش قادر يمنع نفسه من تأملها..
كلامها حركاتها ضحكتها وكأنه عمره ماعرفها قبل..
استغرب في اللي قاعد يصير معاه تسائل في نفسه..
"خيرني!؟شن اللي قاعد يصير معاي!!؟ كله من بوي ومن افكاره المعوجه"..
عقد حواجبه وغير نظره عنها ومشي كمل طريقه..
🍃🍃🍃🍃
مقعمزين تحت شجرة لوز يشوفوا في خوهم الكبير كيف يشوي ومرته واقفه حداه وكل شويه يوكل فيها..
عمر بضحكه:كلينا شوا وصار اللي صار..
نضال؛قريب نصحح وجهي ونمشيلهم..
عمر بإبتسامه:فرحان بيها..
ابتسم نضال بدون مايعلق..
تنهد عمر وشافله وهو يقول ..
/بنتزوج..
شافله نضال وهو عاقد حواجبه..
عمر:خلاص نبي نستقر وندير عيلة وصغار..
نضال:البنت نفسها؟
هز عمر راسه بإيجاب وقال..
/مازال مافتحتش معاها الموضوع قلت نفتحه مع العيله بعدين نقوللها..
نضال:ربي يقدملك اللي فيه خير..
رجع عمر نظره لخوه ومرته خوه وهو يقول..
/آمين...
🍃🍃🍃🍃
"يام حني في عيد راهو مش وقتها الدوة هادي"
جميله بعصبيه:لا وقتها واهو نقولها قدام نساوين خوتك اللي دايرتهم بناتي وخواتك الموضوع اللي فراسك انسيه لو تهبلي يامنيه ماهو صاير منه..
منيه بضيق شديد..
/ماما هادي حياتي واني بس اللي من حقي نختار مني نتزوج..
جميله وزعت نظرها ع كناينها وقالت بنفاذ صبر..
/تفاهموا معاها قبل لنطلع عن طوري..
مرت خوها الكبير قالت..
/باهي بالله عمتي اطلعي لعمي ولولادك وخليهالنا حني تو نتفاهموا معاها..
شافت جميله لبنتها بنظرة غضب بعدين مشت فتحت باب الدار وطلعت وسكراته وراها..
بدت منيه تبكي ومرت خوها الكبير قعمزت جنبها ع السرير وقالت..
/منمن اني مقدرة وضعك وفاهمه اللي تحسي بيه لكن اسمعينا بالعقل وخلي العواطف ع تركينه..عمر هدا مطلق مرتين الاولى كان في بينه وبينها حب والتانيه بنت خاله تعرفي شن دار معاهم الزوز؟
ليومها خشينا ع صفحه بنت خاله وشفنا المناشير اللي منزلتهم ع عيلها اللي مات..
مرت خوها الصغير قالت..
/ليه فوق العامين مطلقها المراة لتوا عايشه في حاله نفسيه..
مرت خوها الكبير قالت. /راهو سألنا ودورنا وراه بنت خاله لليوم تدعي عليهم والمراة الاولى اللي كان واخدها قالوا ضاربها ومسببلها في اجهاض..
وقفت بكي وقالت..
/من قاللكم الدوة هادي!؟
مرت خوها الصغير قالت..
/مافي شي يدرق يامنيه..انتي مش زايده ع ماليك بش يلوحوك هالتلويحه بروحك شاهده ع اللي داره خوه في جارتكم هديكا واضحه العيله كلها ماتنفعش..
مرت خوها الكبير قالت..
/حطي عقلك في راسك يامنيه انتي بنيه قنينه ودكتورة ومن عيلة متسميه شن ناقصك بش تاخدي واحد زي هدا!؟
لوحي عليك دوة الحب والكلام الفاضي لو ينفع الحب راهو قعدت معاه مرته الاولى اللي قصة حبهم قعدت سنين...
🍃الكلام اللي سمعاته منيه توا خلا ترددها اتجاه ارتباطها بعمر يزيد بس كانت تبي شي يخليها تحسم أمرها...
🍃حسم الامر..
الجالي اللي قاعد مع صغار خوه يشويلهم في بالكونة الشقه حسم امره مع نجاه وقرر ينفصل عنها وماحد يعرف بقراره هدا غير صديقه حكيم وكان ناوي ينهي كل شي معاها بعد العيد بش يبدا في تنفيد المخطط متاعه اللي حيجمعه بطوبى وبنتهم جنه...
ونجاه كانت متوقعه هالشي وكأنها تشوف فيه يصير قدامها ومازالت مخلياته ع راحته..
🍃طلعت للبالكونه وهي تقول..
/وين حصتي!؟
مدلها صحن فيه مشاوي خداته وقالت..
/غدوة من الصبح بيجي ولد اخت لطفيه يرفعلها الصغار..
جوري وحمزة قعدوا يشوفوا لأمهم وهما ياكلوا..
الجالي:امتى يروحوا؟
نجاة:حناهم تبيهم يقعدوا عندها اسبوع..
هز راسه بإيجاب وهو يقلب في اسياخ اللحم وهي خلتهم وخشت داخل..
حمزة:عمي؟
الجالي شافله..
حمزه:بعد نروحوا من حوش حناي لطفيه ترفعنا لحوش جدي؟
هز الجالي راسه بالموافقه ونزل نظره للشوايه..
ابتسم حمزه وهو يشوف لاخته جوري وهي ردتله نفس الابتسامه..
ومعاذ حداهم ياكل ويسمع فيهم شن يقولوا ابتسم بفرح لأنه مستاحش سميرة هلبه وقال..
/بنمشوا لسيمو..
ضحكت جوري وقالت..
/مازال مش توا..
معاذ:مازال هلبه ايام!؟
حمزة:مش هلبه هلبه..
معاذ:عادي المهم نمشولها..
ضحك الجالي وهما ضحكوا ع اسلوب كلام معاذ ولد الأربع سنوات...
🍃🍃🍃🍃
"طلعيهم خالتي"
هاديه بإبتسامه؛هي اطلعوا ياعساسيل..
طلعوا اواب ومهاب وجنه مع بعض وهاديه وراهم للجنان من القدام..
وين وصلوا في المكان المقصود بدت ع وجوههم البريئة ملامح المفاجأة..وجنه الجميله حطت ايديها ع خدودها الحلوات وهي تقول..
"وااو"
علت اصوات ضحكات افراد العيله في الجنان ع تعبير جنه..
شويه طلعت وراهم طوبى وتفاجئت زيهم لما شافت الالعاب..
تلاته دراجيح"مراجيح" راكبات في بعض جنب بعض..ولعبه الزلحيبه "الزحليقه"..
قالت بدهشه:امتى صار هدا كله!؟
صفيه بضحكه..
/من بعد الغدي بدي يركب فيهم..
حسين بإبتسامه..
/جايبهم من امس ومخليهم في الحوش التاني..
ابتسمت طوبى..
انطلقوا الصغار وهما يقولوا بحماس..
"العبوا العبوا"..
ضحك حسين ومشالهم وقعد يسأل فيهم شن يبوا يلعب..
وكلهم اختاروا الزلحيبه..
هاديه:هيا اوقفوا بالدور..
تعاركوا اواب ومهاب ع الاول وكل واحد فيهم يقول..
"اني..حول"
حسين:لا عاد مااتفقناش هكي..
غرفه بضحكه:اواب اوقف انت الاول..
بدون اعتراض ولانقاش وقف اواب الاول ومهاب وراه..
هاديه بضحكه:ايوه يامسيطر انت..
صفيه:مايقدروا يقولولها لا ياكبدي بكل..
عبد المطلب:صحة ليك ياغرفه..
غرفه بضحكه:سلمك عمي...
☘حسين يسمع فيهم ويحاول يشغل نفسه مع الصغار يقاوم في رغبته بالنظر ليها..
وطوبى وهي تسمع فيهم كانت تشوف لغرفه بإبتسامه غيرت نظرها عنها وشافت لتاله بنت فايزة لما سمعتها تقول
/نركب الدرجيحه عادي!؟
حسين بإبتسامه:عادي..
طوبى وقتها جي في خاطرها تركب قالت لحسين..
/زعما تحملني عادي؟
كلهم تفاجئوا في طلبها وكانوا بين اللي يضحك وبين المبتسم..
حسين بضحكه:تحملك انطلقي..
مشت بحماس وهي تقول لمروة..
/تعالي دفي بيا مروة..
ضحكت مروة ولحقتها..
وعيون غرفه واميمه تشوف لطوبى بإبتسامة حب..
🍃قعمزت طوبى ع الدرجيحه جنب تاله وبدت مروة دف "تدفع" بيها..
صفيه:اسمع ياحسين حتى اني نبي وحده في الجنان ليا وقت نشطحلك عليها..
كلهم ضحكوا ماعدا عبد المطلب اللي كان يشوفلها بربع عين..
حسين بضحكه:حاضر والله حاضر..
عبد المطلب:انت توا مفروض تفكر دير عيلة ع حالك وتركبلهم دراجيح...
حسين تجاهل كلام بوه دار روحه مايسمعش فيه..
هاديه بضحكه..
/حتى بوك بيخش رابطة زوجوا حسين..
اميمه بضحكه:شن غير رايك!؟
عبد المطلب:لاغيرت رايي ولاشي زيه زيكم انتي وخوك نبيه يستقر..
مطت صفيه شفايفها بإزدراء..
غرفه؛ولايهمك عمي كون هاني عروسته عليا..
قام حسين عيونه فيها وقال..
/انتي اطلعي منها..
ضحكت وقالت..
/ابدا حطيتك في راسي تو نجيبلك وحده تقطر في عيونك الثوم..
ضربتها صفيه ع ذراعها..
تحسساته وهي تضحك واللي حواليها يضحكوا..
عبد المطلب قال..
/لاماتعبيش روحك العروسه واتيه غير يقول باهي بس
ارتفعت درجة حرارته وولت زي درجة غليان المية عقد حواجبه وعيونه ع الصغار قال..
/وين شاهيكم وقهوتكم ؟!
شدوا ضحكاتهم وصفيه قالت..
/هي توا نطلعوهم..
مشت صفيه وغرفه قبل لتلحقها قالت لهاديه..
/عينك عليهم بالله..
ومشت طول..
هاديه شافت لراجلها لقاته يشوف لحسين بإبتسامه فيها مكر فهمت عليه وضحكت بكتمان..
بينما اميمه حست ان كلام بوها فيه من وراه معنى خلا حسين يرتبك ويعصب في نفس الوقت..
🍃وطوبى كانت لاهيه عنهم بالهدرزة مع بنات فايزة..
طوبى:ربي يفتح عليكم..
الزوز قالوا..
"يارب..آمين"
شافت طوبى القدام وكيف جت بتتكلم حست بدوخه مفاجئة قالت لمروة..
/خلاص مروة بننزل..
وقفت مروة دفع..وهي نزلت من الدرجيحه وقاعده فيها الدوخه بدون ماتقول كلمه مشت خشت للحوش وخلت مروة وتاله مستغربين في حالها اللي تغير فجأه..
اما الباقي ماكانش فيهم حد مركز معاهم...
🍃🍃🍃
ويطلعوا الشاهي والقهوة اللي طيبوهم فايزة ونبيله..
شربوا النساوين تحت المظله وحداهم طنجرة العصبان تطبخ وريحته عبت المكان..
والرجاله في المربوعه الخارجيه عبد المطلب وحسين والمحجوب...
🍃هدا كله وطوبى مستمرة في مقاومة مافيها من تعب وتوتر وضيق...
لعند ماجت الساعه التاسعه ليلا...
بعد ماصلت المغرب طلعت تساعدهم في تجهيز سفر العشي..
مررت نظرها ع الجنان بعدين مشت بإتجاه الكوجينه الخارجيه...
طلعت قدامها هاديه بسفرة ماشيه بسرعه بش تمدها لحسين..
قعدت معاها بنظرها لعند ماشافت حسين واخد منها السفره وكملت متابعتها بعيونها لين ولت خشت للكوجينه..
فجأه سمعت صوت طير ماعرفتاش قامت عيونها بتشوفه جو ع القمر اللي وصل لمنزلة الأحدب الاول..
وتحس بشعور غريب مش مفهوم وكأنها حتفقد توازنها وكأن شي فيها تحرك بشكل غريب..
ع طلعة هاديه من الكوجينه وهي رافعه سفرة المشروب سمعت صوت شي طاح ع الارض انفجعت وشافت لمصدر الصوت صرخت بصوت عالي..
"طوبى"
🍃🍃🍃🍃🍃
"سنة حلوة ياجوري سنة حلوة ياصابرينا..
سنة حلوة ياجوري..سنة حلوة ياصابرينا...
هييه طفيتي عليها الشماعي اهي بتعيط هي حليها..
ماتعيطش حبيبة خالتها تو نعرف نسكتها"
🍃هدا مقطع فيديو كانت تتفرج عليه نجاة موجود في حاسبها المحمول كان لذكرى ميلاد جوري الثالثة..
من كم يوم فات عام ع وفاة صابرين...
وللآن نجاة مش قادرة تنسى كيف سمعت خبر وفاتها من امينه..
في وذانها قاعد يتردد كلام صابرين ليها في مكالماتها الاخيرة معاها كيف كانت تعبرلها عن خوفها من مختار وعن احساسها انها حتموت قريب..
نزلت راسها وحطت جبينها ع الطاوله وايديها عليها وانهارت باكيه بدون ماطلع صوت..
بين عيونها تمر الايام الصعبه والحلوة اللي عاشوها مع بعض..
بين عيونها اخر لقاء بيناتهم ونظرة عيون صابرين اللي كانت نظرة وداع وحضنها الأخير اللي وصل لنجاة في وقتها احساس مخيف خلا قلبها ينقبض...
وقفت بكي..ورفعت راسها..مسحت دموعها بقوة..
وبدت تضغط ع ازرار الفيس بوك..
كتبت منشور ونزلاته عن اختها..كانت كلماته مؤلمة جدا..
وخرت ع الطاوله وناضت..
مشت للبالكونه وقفت ع بابها الزجاجي وشافت للقمر بنظرة عين كلها حقد غارقه بالدموع...
🍃🍃🍃🍃
"شن صارلك بالزبط"
طوبى وهي مقعمزه ع فراش في دار المعيشه قالت..
/مش عارفه كيف حسيت بروحي زي اللي فقدت توازني وبعدها معاش حسيت بشي..
اميمه بضيق وقلق..
/هدا كله سببه ضعف جسمك ياطوبى صيامك امس اكبر غلط..
غرفه بضيق وشي من العصبيه..
/ريتي ياطوبى مش قتلك مش باهي ليك تحاليلك كلها طايحة ياطوبى كل شي فيك نازل..
صفيه:تو نديرلها سفرة عشي ونقعمز معاها نوكلها بروحي..
ومشت بسرعه طلعت من الدار..
اميمه:اهتمي بصحتك طوبى..
هزت راسها بدون ماتتكلم..
غرفه بقلق:مش كان نرفعوها خير!؟
طوبى:مش لهالدرجة دوخه عاديه..
غرفه:اسكتي انتي..
ضحكت اميمه وقالت..
/لالا مش لازم تو تتعشى كويس ويولي حالها باهي..
طوبى:هاه سمعتيها شن قالت؟
غرفه حطت سبابتها ع فمها وهي تقول..
/اسكتي اصص مانبيش نسمعلك حس..
اميمه بضحكه:اغنيه هادي..
ضحكت غرفه وبدت تغني وهي ترقص في كتافها..
/اسكتي اصص..مانبيش نسمعلك حس..
وطوبى تضحك وهي تشوفلها بتعب واميمه تضحك معاها..
🍃🍃🍃
"تتهرب واني نعرفها كويس كان قالتلها نمسحك من حياتي معناها خلاص"
نبيله بضيق..
/قسوة قلب هادي وسامحيني فيها تسلط..اللي دير فيه يزيد في الطين بله..
فايزة بأسف:عندك حق وسدرة مع الأسف كان خدت من حد موقف ماتغيراش بسهوله..
سكتت نبيله وهي مضايقه ومعصبه من سدرة...
🍃🍃🍃
مع الساعه 11ليلا..
كلهم كانوا مروحين...
حسين روح بأمه واخته وفايزة وبناتها روحوا..
وهاديه روحت مع راجلها لحوشهم
والمحجوب روح بمرته اللي كانت طول الطريق وهي تتنقد في سدرة بشده...
/المراة متعلقه بيها هلبه اللي دير فيه معاها يدمر فيها اللي يخاف ع حد مايديرش معاه هكي..
المحجوب بضيق..
/وضع سدرة النفسي مش خير من طوبى راهو سدرة لتوا مازال فيها اثار من اللي صار معاها..
نبيله:اني مش شايفه هكي بكل..
تنهد المحجوب وقال..
/بالنسبة ليا مش هامني حد غير طوبى مانيش مخليها وحنقعد واقف في ظهرها طول عمري..
ابتسمت نبيله بعدين قالت..
/ربي مايحرمنا منك..
ابتسم ابتسامه خفيفه بعدين قال..
/غدوة ان شاء الله بنرفعك تتغدي في حوش عمتك وبعد العصر نجيك نرفعك لحوش اختي شدت فيا نتعشوا عندها..
نبيله هزت راسها وهي تقول..
/إن شاء الله...
🍃🍃🍃🍃
وتعدي هالليله وغرفه لما تغفى تفطن مفجوعه وتشوف لطوبى اللي كانت غارقه في النوم...
واريج سهرانه ع الماسنجر مع اختها آلاء تحكيلها ع اللي صار..
(مش مستوعبه..خالتي سدرة دير هكي!)
(والله لتوا حاسه روحي نبي نبكي)
(والله لما قتليلي دارتلها حظر دموعي نزلوا)
(توا زدت خفت ع جنه خفت تزيد تفش غلها فيها)
(ياروحي ان شاء الله لا..افف فرخة اريج تنكدت ع الاخر والمشكله مانقدر نحكي لماما شي)
(ردي بالك ردي بالك تحكيلها)
(يارب تتسهل الامور ونقدروا نجوا زيارة)
(يارب)...
🍃🍃🍃🍃
الحادي عشر من شهر ذي الحجه..
1اغسطس..سنة 2020..
يوم السبت..
ثاني ايام عيد الأضحى...
من الصبح طلع عبد المطلب بمرته لحوش اهلها بيقعدوا غادي يومين..
في نفس الوقت اللي روحوا فيه عيلة الصيد روحوا ع خاطر نجاح اللي جايه تعيد عليهم اليوم..
🍃وحوش طوبى مافيش من يجيه زيارة فهاليوم غير...
غرفه:توا كلمتني وقالت بتجي بعد العصر..
اريج:لازم نفتحوا معاها موضوع الدكتورة النفسيه..
غرفه بشي من الضيق..
/حتى اني فكرت فيها..
اريج:قاعده راقده؟
غرفه؛مابيتش نوضها قلت نخليها ترتاح..
اريج:إن شاء الله ترضى تطلع للمراة بعدين..
غرفه وهي تشوف لجنة كيف تلعب بكراسه وقلم قالت..
/إن شاء الله...
🍃🍃🍃🍃
"رد بالك ع خوتك ولدي"
حمزة:حاضر..
مررت نظرها عليهم بعدين ضمتهم كلهم مع بعض وباست كل حد فيهم ع جبينه..
وخرت عنهم ووقفت ع حيلها وهي تقول..
/هيا انزلوا..
نزل حمزة الاول ووراه جوري شاده في يد اختها..
قعدت معاهم بعيونها لين ادرقوا عنها..
سكرت الباب ومشت طول للبالكونه..
فتحت بابها وطلعت وقفت ع سياجها..
شافتهم طالعين من العمارة متوجهين لسيارة ولد خال بوهم..
ركبوها والسيارة تحركت طول..
نزلوا دموعها..فيسع مسحتهم وولت خشت داخل..
🍃والجالي في هالوقت كان في حوش صاحبه حكيم اللي عزمه يتغدا عنده...
🍃حكيم:تو انت ضامن ان ردة فعل نجاة تكون عاديه!؟
الجالي:هي تفكر دير شي وتشوف شن يصير فيها بعدين زي ماقتلك عارفه ان لولا بوي حكم عليا ماردتيهاش اكيد متوقعه ان نهايتنا للطلاق..
حكيم بنظرات شك..
/باهي بعدين شن ناوي دير!؟
الجالي:بنسكر المكتب مؤقتا لين ندير حل مع ماليا..
حكيم؛وكان درت حل معاهم ورجعت فتحت المكتب شن بدير تاني!؟
الجالي برفعة حاجب..
/بنلهى بحياتي وبنفسي وبس..
حكيم بضحكه..
/وانسى النساوين ومايجي منهم..
ضحك بغمزة وقال..
/نحاول..
حكيم وهو يضحك قال..
/عارفك تحب تجري ورا شقاك..
ابتسم الجالي ابتسامه تخفي الألم وقال..
/عندك حق...
🍃🍃🍃🍃🍃
وبعد العصر يجيب عدي اخته لحوش طوبى ولأن مافيش رجاله في الحوش يومها حطها ومشي...
وللأسف طوبى بعد صلت العصر غطت في نوم عميق ع قد ماحاولت فيها غرفه تنوض ماقدرتش نومها كان ثقيل هلبه..
🍃🍃🍃
"الله المستعان"
غرفه بحزن:نبيك تكلمي اختك تشوف الدكتورة النفسيه اللي تعرفها بالك تجيبيها نهار تشوفها وتهدرز معاها..
زينب بضيق..
/ان شاء الله ان شاء الله..طليقها هدا اكبر مصيبه نزلت عليها ربي يرفعه عنها عاجلا غير آجل..
********
في الطريق..
عدي وهو يسوق قال بعصبيه..
/الحيوان هدا لازم يندارله حد..
زينب بقلق..
/هدي بالله عليك..وسلم وخيي بالله عليك اطلع منها..
عقد حواجبه وقال..
/كيف!؟
زينب بضيق:اني نحبها ونعزها لكن الحق ندمت اللي دليتك عليها مانحسابش بيصير هكي بكل..طليقها هدا مهووس بيها واللي زيه يدير كل شي ارجوك اصرف نظر ع الموضوع مش مستعدين نخسروك..
التزم الصمت مع عدم اقتناعه بكلامها ومع هذا ضايقه هلبه لو هدا موقف اخته زينب كيف بيكون موقف امه!؟..
🍃"لالايفوت موضوعها بكل ويطلعها من راسه مادام وصلت بيهم بيعالجوها بالطب النفسي معناها وضعها متأزم شن داير في عمره ولدي بش يعاني المريضه واختها!؟
زينب بضيق..
/ماتقوليش هكي يام مافي حد ربي عافيه من المرض
ايمان بأسف..
/خسارتها دفعت ثمن اختيارها الغلط لشريك حياتها غالي..
زينب بضيق..
/ربي يفرج عليها..المهم كلمي الدكتورة صاحبتك وخودي منها موعد..
ايمان:ان شاء الله..
وامهم تسمع فيهم وتشوفلهم وهي تفكر في ولدها اللي قلبه حب طوبى وخافت منه يسكر راسه عليها...
🍃🍃🍃
وعدا باقي اليوم..
وطوبى بين خمول ونوم اشتدوا عليها بعد المغرب...
حاولت فيها غرفه وخلتها تاكل بالغصب وعطتها ادويتها وبعد ما صلت العشاء راحت في نوم عميق وجنة عندهامنسية تماما...
🍃🍃🍃🍃
الثاني عشر من ذي الحجة..
2اغسطس..سنة 2020...
ثالث ايام عيد الأضحى...
اول النهار حال طوبى كان كما هو عليه لعند ماسمعت من غرفه ان اهل التارقي جايين بعد العصر..
شعور الحزن اللي حست بيه وقتها ملاها...
وقفت ع المرايه ولأول مرة تركز ع شكلها كيف ولى..
اللي تشوف فيه مش بس تعب وذبول..شافت وجهها وكأنه مطفي..تشوف في لونه رمادي...
مررت يدها عليه ودموعها تنزل..شافت لشعرها..
حطت يدها عليها وفكت ربطته نزل ع طوله لكن ماكانش نفسه شعرها الكثيف الرطب اللي فيه لمعه حلوة..ولى متقصف وخفيف والشيب بدي يبان فيه اكثر من قبل..
حالتها هادي كانت اسوأ من حالتها في فترة غيبوبه سدرة..
ابتسمت تهكما ودموعها مازالوا ينزلوا..
لمت شعرها ومن داخلها كان تسخر من نفسها اللي مازال تفكر في الحاجات هادي..
الحب والمشاعر الحلوة مش ليها..وعمرها ماحتعيشهم..
هي هكي كانت تقول لنفسها ساعتها...
🍃ويجي وقت زيارة التارقي واهله..
استقبل حسين عبد القيوم وباقي رجال عيلته ودخلهم للمربوعه الخارجيه..
وصفيه وغرفه استقبلوا النساوين..
لاحظوا الزوز ان سليمه واختها وكأنهم جايين بالغصب عكس صفيه اللي كانت تسلم بحرارة..
هالشي لاحظاته اريج بعدين لما ضيفوهم في الصاله..
يدوب كانوا يهدرزوا..صفيه كانت اكثر من يتكلم...
لحظات..
وطلعت طوبى وهي لابسه فستان ازرق غامق وشاربه رماديه..
لما شافتها صفيه انصدمت في شكلها كيف راح وجعها قلبها عليها ع الآخر وسلامها عليها كان حار..
وسليمه كذلك وجعتها لما شافت حالتها لكن زادت تأكدت انها مش لولدهم ومستحيل يرضوله ياخدها..
اما اختها الكبيره انفجعت وين شافتها وماصدقتش انها نفسها اللي يبيها ولد خوها..
🍃ماطولوش اكثر من ساعه لأنهم روحوا من الخمس طول لحوش طوبى واكيد لازمهم راحه..
🍃🍃🍃
في الشقة اللي يمتلكها عبد القيوم .
كانوا متمددات قدام المكيف في دار المعيشه..
بريكه:غبارة والله غبارة هي هذي اللي قالب عليها الدنيا رايحه تقول عزوز وتبان مش طبيعيه بكل كأنها مذهوبة شيرة..
صفيه بحزن...
/والله ماكانت هكي ياخالتي واهي امي تقولك..
سليمه؛وضعها هذى خلاني مصرة ع البنية السوريه..
بريكه:مازال هذي التانيه ان شاء الله مانحصلش فيها فجعه حتى هي..
🍃🍃🍃
ويجي اليوم اللي بعده..
يوم الثالث عشر من ذي الحجه..
كان تالت يوم من شهر اغسطس..
مع الساعه 12قبل الظهر..
كان التارقي بعيلته في ضيافة اهل سلافه..
الرجاله استقبلوهم معز ووالده..
والنساوين استقبلوهم ميار وامها مع شاديه وسلافه ولبانه..
وعاد سلافه كانت بكامل اناقتها...
لابسه بلوزه ورديه منظرها راقي وحلو ع بنطلون جينز..رافعه شعرها الاصهب ذيل حصان ومنزله خصلتين ع وجهها ولابسة اكسسورات ناعمه..
سليمه قريب هبلت عليها..وصفيه صدمها جمالها كانت احلى من الصور..
وبريكه رغم عدم تقبلها للموضوع لكنها عجبتها هلبه...
🍃وورتهم سلافه فلاحتها وصاحبتها بطريقه غير مباشرة كانت تعرف فيهم انها ست بيت من الدرجة الاولى وكملت معاها امها اللي ماكانت تعرف شي عن الموضوع لكنها تحب سلافه ومعجبه بيها..
لاحظت بريكه النظام والنظافه متاعهم ورقيهم في التعامل وأدب البنات اللي كان واضح جدا عليهم شبه بدت تتقبل الموضوع..
وسليمه بدت تسأل ع سلافه وتعطي في تلميحات خلت سلافه بطير من الفرح في داخلها وميار فرحتلها هلبه..
لكن شاديه ولبانه كانوا في حالة استغراب..
🍃ويروحوا بعد العصر وسليمه خلت عقلها عندهم تبي تفتح الموضوع مع عبد القيوم قبل ليروحوا اخر الاسبوع..
☘بريكه:الحق ياربي البنت سمحه واجد ومحترمه وامها واختها يبانوا ناس كويسه..
صفيه:تو انتن منكن جد قاعدات تفصلن ع كيفكن ومتوقعات عبد القيوم يلبس..
سليمه بشي من الحده..
/غصب عنه..هذى امانة خوي وامي الله يرحمهم مستحيل نرضاله يعزق روحه في النار..
بريكه؛كنه يابختي شن ناقصه ياخد وحده مطلقه وعندها بنت وعندها مشاكل ووجيج واجد وفوق هكي مافيها ماينشاف! ياخوفي تطلع كاتبتله ياسليمه..
صفيه بضيق ودموعها في عيونها..
/حرام عليك ياخالتي مش لهالدرجة!.
سليمه بحزم..
/انتي اسكتي بكل ومعاش تدوي في الموضوع هذى مش شورك..
صفيه؛تمام بنسكت وبنطلع منها وتو نشوفوا اخرتها كيف تجي...
#منازل_القمر
#طوبى
...يتبع...
