■■■■■■■■■■■■■■■■■■■■
❎تنويه❎
بعض احداث اقسام جزء #منازل_القمر صعبة ومرهقه نفسيا
#طوبى "جنة طوبى"
#جمان_فريد
#الجزء_116"منازل القمر"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#تاج_الذكر
لاإله إلا الله وحده لاشريك له له الملك وله الحمد وهو على كل شيء قدير.. 🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 "الأفعال هي التي تؤكد صدق المحبة ، أما الكلام فالجميع فلاسفة".🍃
_________________________________________
"اللي صار معاها تشجنات بسبب انفعال زايد"
غرفه:العيل حالة باهي ماصارله شي؟
الطبيبه:ايه اطمني حاله باهي واموره تمام..
ويجيهم المهدي وهو يمشي بسرعة وكله قلق..
وقف عليهم وقال..
/شن صار؟
غرفه لأنها واخده منه موقف تباعدت وخلاته مع الطبيبة بروحهم..
والطبيبه تبعتها بعيونها بعدين شافتله وجاوباته ع سؤاله
وبعد ماطمناته ع حالة مرته والجنين مشت..
وهو شاف لغرفه كيف مقعمزه ع كرسي مقابلة حجرة سدرة مشالها ووقف عليها بمسافه بسيطه وقال..
/شن صار!؟
ناضت غرفه وبدون ماتشوفله قالت..
/مرتك معاش تقدر تتحمل المشاكل والانفعالات معاش تخليها تجينا..
ومشت طول وخلاته في حاله ضيق شديد واللي صار لخوه ركبه همه جديد فوق همومه..
🍃غرفه بعد ماغادرت القسم اللي كانت في سدرة اتصلت بأريج وطمنتها عن وضعها بعدين توجهت لحسابات المصحة لتدفع حساب قعاد اختها فيها لمدة اسبوع كامل حسب ماطلبوا الاطباء المسؤولين عن حالتها..
وين وصلت غادي واستفسرت عن الحساب اللي اندفع منه في البدايه اجر ليلة وحده خبرها الموظف ان حسابها مدفوع لأسبوع كامل..
🍃غرفه بإستغراب:من دفعه!؟
الموظف وهو يشوف لشاشة قدامه قال..
/حسين عبد المطلب الواعر..
بدت ع وجه غرفه ملامح الأسف وعدم الرضا ماردتش بأكثر من هزة راس وتوجهت بطريقها للقسم اللي قاعده فيه طوبى..
🍃🍃🍃🍃
"امتى صار!؟"
حسين بضيق:امس في الليل..
عبد القيوم من صدمته وخوفه الشديد ماقدرتش يتكلم لو تكلم حيقول كلام ماينقالش..
قعد بس يسمع في حسين وهو يقول بكره..
/الكلب هداكا وين ماهو نجيبه وندير معاه اللي ماداراش محمد شنيبه..
غمض عبد القيوم عيونه وفتحهم وزاد عقد حواجبه وهو يمرر في نظرة قدامه وكله بكل مافيه مشتعل بنار الغضب..
🍃هما الزوز كانوا واقفين قدام المصحة والمهدي شافهم وهو خاش وكان ناوي يرجعلهم بعد مايطمن ع سدرة..
وهدا اللي صار..وتوا طلع من المصحة ومشالهم طول..
وصل فيهم وقال لحسين..
/وين الجالي!؟
شافله عبد القيوم بإستغراب..
اما حسين بتساؤل قال..
/كيف!؟
المهدي قال..
/انت امس هددت وقلت بنفعله ونديرله واليوم الصبح جوه جماعة ملتمين وخطفوه فسرلي!؟
حسين بإبتسامه شماته..
/ايه صح كنت ناويهاله لكن والله لتوا مادرت حاجه ومن ماكان اللي دارها صحة ليه..
غير عبد القيوم نظره للطريق وع وجهه باديه ملامح ابتسامه خفيفه..
المهدي قعد يشوف لحسين بصمت..
حسين ركز عليه وقاله..
/لو اني اللي درته نقولك درته وماتقدر تقول شي..
هز المهدي راسه ولف ومشي خش للمصحه..
حسين وهو مبتسم بإستغراب..
/مني دار هكي!؟
عبد القيوم شافله وقال..
/مرات الخال محجوب.
حسين:ايه والله يديرها وصلت حدها عنده من الوسخ هداكا..
وقام تليفونه واتصل بيه وعبد القيوم جنبه وجه نظره للمبنى المصحة وقلبه وعقله مع روحه اللي قاعده فيها..
🍃ومن قدام حجرتها..
كانوا واقفين غرفه ومختار..
غرفه بإمتعاض:حسين دفع المصاريف..
مختار:اني نبي نطلعها لمصحة خير من هادي..
غرفه:مش لازم..
رفع حاجبه وهو يشوفلها بعدين قال..
/ع راحتكم..اني توا ماشي وغدوة موليلها..
غرفه:مش لازم..
مرر نظره عليها من فوق لتحت ..ابتسم بسخريه ولبس نظاراته ومشي وهي معاه بنظرات كلها ازدراء تقول..
/مشية الحصان لفزان..
ولفت ومشت لباب الحجرة فتحاته وخشت وسكرت الباب وراها..
🍃🍃🍃🍃
"ياغبارة سودا يانهار اسود"
نضال بإنزعاج:خلاص اسكتي..
نسرين بصدمه:كيف تبيني نسكت كيف تعرف وضع خوك كويس متخيل شن بيصير فيه توا شن يديروله اللي خطفوه!!؟
عمر بضيق:ربي يسامحه حتى هو دارها بإيده..
نسرين:قصدك تقول عيلة الواعر داروا فيه هكي!؟
عمر:ومن غيرهم!؟
نضال قعد ساكت وهو يفكر ونسرين خوفها ع خوها مخليها مش قادرة تفكر غير فيه..
اما خديجه اللي كانت واقفه حداهم قلقه وملتزمه الصمت خرجت عن صمتها لما قالت..
"نجاة"
وجهوا الثلاثه انظارهم ليها..
خديجه:قلتوا باعت الشقه وهربت لا وطلبت من صاحب الشقه يجيها يستلمها منها في وقت ماكان في حد فالشقه غير الجالي..نجاة قاعده تنتقم منه واكيد بعتت من يخطفه بش يطلقها غصب عنه..
عمر:تي هو كان ناوي يطلقها..
خديجه:متوقعه وحتى هي توقعت هدا علاش انتقمت منه بالطريقه هادي وهي عارفه كويس انه بعد اللي داراته مش حيطلقها نكاية فيها زي مادار مع طوبى قبل..
نضال بغضب:شن هالعفن اللي دخلناه فينا هدا!..استغفر الله العظيم واتوب اليه..
عمر:يقعد مجرد توقع خل نشوفوا عيلة الواعر قبل..
قعمزت نسرين بهده ع كرسي الصالون وهي تقول بإبتسامه الم واسف..
/قتلك ياخديجه قتلك عقابها مش خير قتلك..
خديجه بتذمر:ايييه علينا..
نضال شاف لخديجه بنظره فيها شي من الكره وقال..
/معاش تنفع الدوة هادي خلاص فات الفوت المهم توا امي ماتخلوهاش تعرف شي..
خديجه غيرت عيونها عنه وع وجهها ملامح المكابرة..
ونسرين شافتله وقالت..
/توا مش بوك وسميرة ماشيين يجيبوا الصغار من لطفيه لما تشوفهم هني مش بتسأل!؟
عمر:تو نتفاهموا شن نقولولها..
🍃مجرد ماوصل خبر لمحمد شنيبه باللي صار مع الجالي واللي داراته نجاة مافكرش غير في صغار طاهر بس ولأنه متعود يكلم فيهم من تليفون حمزة كان عارف انهم عند جدتهم لطفيه طول خدي سميرة وتوجهوا لحوش ولد اختها..
🍃🍃🍃
لطفيه بأسف ودموعها في عيونها..
/الله يرحمك ويسامحك ياطاهر ياولدي ماكنتش نبيها عمري ماارتحتلها ماباش يطاوعني وسكر راسه عليها وهديكا الشيطانه وقفت معاه مكر فيا اني بس لكن ربك في الوجود مايخلي شي واهي نيتها خدمتها..
سميرة بأسف:اني والله مانفكر كان في الصغار اللي بتلحقهم عملة امهم لأخر عمرهم..
لطفيه تنهدت بألم وقالت..
/حسبي الله فيها دنيا واخرة..
سميرة:ايه والله..وخيتي لطفيه نبي نسألك سؤال..
لطفيه قعدت تشوفلها بصمت تراجي فيها تسأل..
سميرة:الصغار كيف بيصير فيهم تبيهم يقعدوا عندك ولاتخليهم يروحوا معانا!؟
لاحظت لطفيه لمعة الدمعه في عيون سميرة وهي تسأل فيها تنهدت وقالت..
/اني مانقدرش نعانيهم بروحي يجوني زيارات عادي لكن يعيشوا عندي صعب والحق هما يبوا حوش جدهم وديما يقولولي انهم مرتاحين غادي وياماحكولي عنك انتي،جوري ومعاذ متعلقين بيك هلبه بالذات معاذ كل شويه يقول نبي نمشي لسيمو..
ضحكت من بين دموعها وهي تقول..
/نجيه ياربي..
ابتسمت لطفيه وقالت..
/مالهمش الا ماليهم مش حيلقوا غيرهم..
☘وودعوا الصغار حناهم لطفيه وروحوا مع جدهم وسميرة اللي فرحت بيهم وفرحوا بيها ماعدا حمزة اللي كان يفكر في امه وعمه..وين مشوا وعلاش قطعوهم مرة وحده من لما مشوا لحوش جدتهم تاني يوم العيد!؟
واجابة هالسؤال كانت عند نضال..
🍃نضال:سافروا الزوز عندهم خدمه ومرات يطولوا فيها..
حمزة:زي سفرتهم هديكا اللي طولت شهور!؟
هز نضال راسه وهو يحاول يخفي ضيقه..
سكت حمزة وغير نظره عن عمه للتليفزيون ونضال يشوفله بنظرات كلها اسف وحزن..
🍃🍃🍃🍃🍃
"اني كنت ناوي نمشي لواحد يعرفه عبد الرؤوف الله يرحمه بش يديرله حل غير كنت نراجي في رد بوه اللي قال بيتفاهم معاه"
حسين بإستغراب..
/من اللي دار فيه هكي!؟
عبد القيوم:مخلوق زي هذى تلقاله اعداء واجدين..
المحجوب:يللا ان شاء الله يفكونا منه مرة وحده..
حسين:ان شاء الله..
المحجوب:مافيش جديد في وضعها!؟
تسارعت دقات قلب عبد القيوم وهو بلهفه مخفيه يراجي في اجابة حسين..
حسين بضيق:لاجديد قاعده راقده وخلاص..
ويرن هاتف عبد القيوم قامه شاف عمه يتصل بيه ضم شفايفه داخل بضيق بعدين قام عيونه وقاللهم..
/انا نستأذن توا..وان شاء الله لاباس..
ردوا عليه بأصوات متقطعه..
/لايوريك باس..صحيت..
قال السلام عليكم وتوجه لسيارته وهما ردوا عليه وعيونهم قعدت معاه لين ركب سيارته وتحرك..
حسن شاف للمحجوب وقال بأسف..
/اميمه قالت مرات تطلع عندها مشكله في القلب..
بدت ع وجه المحجوب ملامح الصدمه والألم وعيونه غزروا بالدموع...
🍃🍃🍃🍃
وتمر الساعات والمهدي يدور ع خوه وللاسف ماوصل لشي وقعد اخر احتمال عنده ان نجاة تكون ورا خطفه لأن الاحتمال الوحيد اللي يفكر فيه حاليا ان مختار يكون ورا اللي صار..
🍃اخر النهار روح بمرته من المصحه وسدرة اللي كانت مع طوبى في مكان واحد مابتش تمشي تشوفها لكن لما سمعت باللي صار للجالي..
☘"سامحني يامهدي..ومن اعمالهم سلط عليهم "
هز المهدي راسه بصمت موافقة لكلامها..
سدرة بضيق:بالله ماتزيد تكدر روحك يامهدي..
المهدي:مهما يدير يقعد خوي ياسدرة مانقدرش نخليه..
غيرت نظرها عنه للفراغ..
شافلها شويه وقال...
/حتى انتي مهما صار ماتخليش ماليك..
بنبرة ألم قالت..
/معاش عندي حيل..
المهدي:فاهم عليك وحاس بيك وقبل لما تكلمنا في الموضوع هدا قتلك رايي ياسدرة..
شافتله بنظرة حزن وخوف وهي تقول..
/مانقدرش..
خدي يدها وشدها بإيديه الزوز وقال..
/خليها ع الله ياسدرة خليها ع الله هو اللي عالم وعارف انتي ماليك ذنب في شي مادرتيش غلط انتي الوحيده اللي ماغلطتيش ياسدرة..
نزلوا دموعها وهي تقول..
/مش هدا اللي مخوفني يامهدي..
ضم شفايفه لداخل بأسف بعدين خداها لقلبه وقعد يمسح ع ظهرها وهي تذرف في دموعها بصمت..
🍃🍃🍃🍃
الساعه 9:00ليلا..
في نص السمي القمر واخد مكانه كان واضح كله من شباك الحجره اللي راقده فيها طوبى..
في جنبها غرفه كانت شاده مصحف وتقرا في القرآن..
وهي تقرا في سورة يس لما تلت آية..
“ وَالْقَمَرَ قَدَّرْنَاهُ مَنَازِلَ حَتَّى عَادَ كَالْعُرْجُونِ الْقَدِيمِ “
🌠وصلت لمسامع طوبى في عز نومها وبدت تشوف في منام تكررت عليها احداثه..
'ضو يشبه البرق يطلع من صدرها ويرقى للسمي وبعدين ينزل القمر ومعاه كواكب ويبدوا يدوروا حواليها..'
فتحت عيونها شافت للقمر من ورا الشباك وهي تشوفله حساته قريب عليها حست وكأنها تسبح في الفضاء حواليه..
في لحظه جي بين عيونها موقف مؤلم لما تفكراته وجعه وصل للروح...
ضربها لبنتها..قرة عينها..روحها التانيه اللي عايشه بيها..اغلى ماتملك في دنيتها..
بدت شويه شويه تستاقظ وتسمع في صوت غرفه وهي تقرا في القرآن..
بشي من البطىء لفت وجهها عن الشباك وهي تبع في الصوت لعند ماجو عيونها ع غرفه..غيرت نظرها عنها وقعدت تمرر فيه ع المكان اللي هي فيه وثبتاته عند الكانيولا..
بلعت ريقها لما شافت كيس التغذيه حست بعطش شديد..
ردت نظرها لغرفه وقالت بصوت مبحوح..
/غرفه..
ماسمعتهاش..
عاودت نادت مرة تانيه وحاولت تعلي صوتها..
/غرفه..
سمعتها قامت عيونها فيها..بلهفه سكرت المصحف وناضت قربت منها وهي تقول..
/بيبو..
يدوب ابتسمت وهي تقول..
/نبي ميه..
هزت غرفه راسها وقالت..
/حاضر..حاضر..
مشت حطت المصحف ع الكرسي بعدين جت لشيش الميه اللي كانوا ع الطاوله..خدت وحده فتحتها وجت لطوبى وهي تقول..
/هي حبيبتي..
قعمزت جنبها وساعدتها بش تكون في وضعيه تساعدها ع الشرب وبدت تشرب فيها شويه شويه لعند مااكتفت طوبى..
رقدتها وسكرت الشيشه وهي تقول..
/شن تحسي توا؟
طوبى بصوت مبحوح..
/شن صارلي؟
غرفه؛اغمى عليك..
طوبى:وجنه!؟
غرفه:ماتخافيش عليها قاعده مع اريج وخالتي هاديه..
طوبى:سدرة عرفت!؟
انجبرت غرفه تكذب في ردها ع خاطرها..
/ايه جت تشوفك لكن كنتي راقده..
بضيق قالت..
/اكيد انفجعت ان شاء الله مايصيرلها شي..
بلعت غرفه ريقها وقالت..
/ماصارلها شي معاش تخافي ع حد خافي ع نفسك بس..
تنهدت طوبى وغمضت عيونها..
غرفه بخوف..
/طوبى خيرك!؟
ردت عليها بصوت ناعس..
/بنرقد..
تنفست غرفه بإرتياح حطت يدها ع راسها وقعدت تمسح عليه بعدين ولت قعمزت تقرا في القرآن..
🍃بعد مرور نص ساعه خشت اميمه ع غرفه سألت عن وضع طوبى وخبرتها باللي صار بعدين خدتها وطلعت بيها للممر وهي تقول..
/قريب عليها مش بعيد تعشي وولي..
غرفه بضيق..
/والله ماعندي نيه في حاجه..
اميمه بحزن..
/كلنا ماعندنا نيه في شي لكن نبوا نلقوا بش نقاوموا..
هزت غرفه راسها بصمت واميمه شدت يدها وقالت..
/وصيت عليها الممرضات ماتخافيش عليها..
☘ومشوا مع بعض لمستراح في المصحه فيه كراسي قعمزوا فيه وبدوا يتعشوا مع بعض..
غرفه:شن هدا كله!؟
اميمه بضحكه:جابه حسين قال مانعرفش غرفه شن تحب.
ضحكت غرفه ضحكة خفيفه وكملت ماكله..
قعدوا ياكلوا بصمت لعند ماقالت غرفه..
/شاغلتني هلبه حكاية قلبها هادي..
اميمه؛بإذن الله تكون مشكله بسيطه..
غرفه:يارب..وبإزدراء كملت تقول..مافيش اخبار عن الحقير هداكا؟
حركت اميمه راسها بالنفي..
غرفه:ان شاء الله معاد يلقوه..وولت تاكل بعصبيه..
اميمه وهي تشوفلها كيف تاكل شدت ضحكتها..
🍃من بعيد شويه وقفوا حسين واسامه..
اسامه وهو مبتسم قال..
/هونا غادي .
حسين:سامحنا بونسيب تعبناك..
اسامه بضحكه:تعبك راحه..ماتبي شي..
حسين:بارك الله فيك..
مشي اسامه وحسين كمل طريقه لأخته وبنت عمه..
وصل فيه وقال..
/صحة..
شافوله اميمه ضحكت وغرفه ابتسمت..
شويه قالت اميمه..
/خود حاجه..
حسين:لاسبقتكم الحمد لله..شاف لغرفه وقال..شن حال طوبى ؟
غرفه بلعت بعدين قالت..
/فاقت بكري شويه هدرزت شويه وشربت ميه وولت رقدت..
حسين:خبرتيها شن صار في الكلب هداكا!؟
غرفه:لالا يدوب هدرزنا سألتني عن بنتها وشن صار معاها..
هز حسين راسه بعدين قال..
/كان نعرف من دار فيه هكي..
غرفه حطت الساندويتش في الكيسه وقالت..
/راجي تو نحاول نعرفلك..
خدت تليفونها من جنبها واميمه تشوفلها وهي تاكل وحسين جنبها مركز مع غرفه وهو عاقد حواجبه..
شويه وحطت الهاتف ع وذنها وهي تقول..
/مش عارفه كيف مافكرتش فيها بكري...ايوه خالتي سميرة السلام عليكم.....الحمد لله......فاقت شويه بكري وولت رقدت..ايه...ان شاء الله...بننشدك خالتي شن صار في هداكا؟
الزوز وهما مركزين معاها لاحظوا كيف بدت ع وجهها ملامح الدهشه..رفعت عيونها فيهم وقالت بدهشه..
/لالا!!..
شافوا حسين واميمه لبعض وفيسع ماردوا انظارهم ليها لما سمعوها تقول بضحكه..
/الله ياربي!!.......سبحانك ياربي سبحانك كيف سلط الشياطين ع بعضهم.......
اميمه وحسين ولوا متشوقين ع الأخر ويراجوا فيها امتى تنهي المكالمه..
غرفه بضحكه:باهي باهي خلاص حتى هكي ساد...ضحكت وقالت..تمام سلام سلام...
نزلت التليفون وهي تقول بضحكه..
/كان نقوللكم شن صار!
مع بعض قالولها وهما متشوقين..
/قولي..!
☘وبدت غرفه تحكيلهم في اللي سمعاته من سميرة اميمه بدت تضحك مرة بدهشه مرة بشماته اماحسين كل شويه يسب في الجالي..
حسين:هادي نهايه الخرتيت اللي زيه..
غرفه بضحكه:الله ياربي قداش انمسح ع قلبي..خل نتصل بأريج نخبرها...
واتصلت بأريج وبدت تحكيلها بحماس وهي تضحك وحسين بكل تركيزه معاها وع وجهه مع عقدة الحواجب ابتسامه..
اميمه جنبه تسمع في غرفه وتضحك وين جت بتقول حاجه لحسين سكتت لما شافت نظراته الغريبه لغرفه..
عقدت حواجبها بإستغراب وشافت لغرفه لقتها منسجمة في المكالمه ردت نظرها لخوها وتأكدت انه منسجم مع غرفه..
ارتسمت ع وجهها ابتسامه استغراب وهي تحاول تفكر في وضع خوها..
نهت غرفه المكالمه وهي تقول بضحكه..
/فضيعه هاديه هي وتعليقاتها..
اميمه بضحكه:كانت حدا اريج!؟
غرفه:ايه..ناضت وهي تقول..عطلت ع طوبى..
اميمه:كملي عشاك..
غرفه:لاخلاص الحمد لله شبعت..صحيت حسين تصبحوا ع خير..
ومشت بسرعه وحسين بعيونه معاها واميمه معاه بعيونها..
تنهد ولف وجهه لأخته لقاها تشوفله بنظرة غريبه بتساؤل قال..
/خيرك!؟
هي بضحكه:شي هي نوض روح بيا..
ناض وهو يقول..
/هي سقدي روحك..
ومشي طول وخلاها ناضت تلم في الحاجات وهي تضحك وتحرك في راسها يمين ويسار...
🍃🍃🍃🍃
"طلعت بايعه الشقه وهو مايعرفش"
عبد القيوم وهو عاقد حواجبه قال..
/مااستغربتش وحده زي هذي دير مااكبر..
ربيع:ماريتش حد في الدنيا جاب لروحه المصايب زي البنادم هدا..
عبد القيوم:ان شاء الله هالمصيبه تاخده وتريحنا..
ربيع بشي من الضيق..
/والله ماعارف شن نقول..واجعتني اخته بكري تكلم فيا وهي تبكي..
احتفظ عبد القيوم بصمته..
ربيع:مش عارف علاش حاس ان هداكا الميكافيلي ليه يد في اللي صار..
عبدالقيوم:مااعتقدش مش اسلوبه..
ربيع وهو يفكر:صح..معناها مافيش غيرها هي اللي دارتها..
عبد القيوم:قتلك هذي دير كل شي..
ربيع:الله يجيرنا ويستر ع ولايانا الموضوع كبير هلبه يمس سمعة العيله كلها..تعرف نخمم في ماليا كان عرفوا شن بيقولوا خايف نديرها معاهم..
عبد القيوم:ديرها معاهم وماتخلي حد يوجعك في هلك..
"زوجتك"..
ضيق ربيع عيونه وقال..
/صاير معاك شي !؟
تنهد وقال..
/دويت معاهم في الموضوع رفضوه بطريقه خلتني نفصل عليهم..
ربيع:هدا المتوقع..
عبد القيوم:عمي عبد الله الوحيد صبا معاي وقال نعدي معاك لخالها ونخطبهالك تنهد وكمل يقول..لكن اهو صار اللي صار..
ربيع:خايف نقول كلمه نخليك تفصل عليا حتى اني..
عبد القيوم:خليها عندك..انا بعد اللي صار معاها زاد اصراري عليها..
ربيع:ماعندي مانقولك كان ربي يقدملك اللي فيه الخير..
🍃ومن مربوعه حوش ربيع لمربوعة حوش شنيبه اللي كان موجود فيها حكيم مع خوت الجالي وبوه..
حكيم بضيق..
/والله حسيت ونبهته هو اللي كان زي عادته واثق من روحه زياده عن اللزوم..
المهدي:يعني تبي تقول ان نجاة هي اللي خطفاته..
حكيم:هي وفي بالي حد تاني..
كلهم قعدوا يشوفوله بإنتباه ومحمد شنيبه قال..
/مني!؟
حكيم:امس تلاقيت اني وياه وحكالي عن موقف صار معاه قالي جاه واحد اسمه عدي محامي وكلمه عن طليقته وهو ماتحملش ضربه..
عقد المهدي حواجبه..
وعمر قال..
/من عدي هدا!؟
حكيم قال:قالي سبق وخطب طليقته قبل..
المهدي:مزبوط..ماقالكش شن كان يبي منه بالزبط!؟
حكيم:قال قالي خلي المراة في حالها كلام زي هكي..
عمر:معناها هو اللي بعت من يخطفه..
محمد شنيبه بأسف وغضب..
/لاحول ولاقوة الا بالله..
ناض المهدي وقال..
/بارك الله فيك ياحكيم..نوض معاي ياعمر..
بوه قاله..
/وين ماشي!؟
المهدي:لعدي..
ومشي طول طلع من المربوعه وعمر لحقه..
حكيم بأسف:ياما حذرته وقتله انت بتفتح علي روحك باب شر بزواجك من بنت الواعر لكن ماسمعش مني..
نضال:باب الشر فتحه ع روحه لما خلط ع اللي اسمها نجاة..
هز محمد شنيبه راسه وقال...
/صدقت ياولدي صدقت..
🍃قال هالجمله بنبرة ندم...بندم ع انه سعي في زواج ولده طاهر منها وندم ع موافقته لمرته مغليه في زواج الجالي من طوبى🍃
🍃🍃
ويتصل المهدي بعدي ويطلب يشوفه وعدي عطاه عنوانه حوش اخته اللي قاعد فيه..
اول ماوصل المهدي غادي لقي عدي في الباب يراجي فيه..
🍃عدي:والله كان بودي نطلع اني اللي دايرها..
عمر قعد يشوفله بكره من فوق لتحت..
المهدي:متأكد!؟
عدي بإبتسامه ساخره..
/والله تمنيت نكون اني اللي دايرها خوك هدا مايبي الا هكي..
عمر شد ذراع المهدي وهو يقول..
/هيا بالله عليك هيا..
هز المهدي راسه وهو يشوف لعدي بعدين مشي مع عمر للسيارة..
وعدي قعد معاهم بنظراته الساخره الشامته لين ركبوا السيارة وتحركوا..
ضحك ضحكه خفيفه وولى خش للحوش...
🍃🍃🍃🍃
وتعدي هالليله ع عيلة شنيبه نهار دموع نسرين ماجفوش وخوته مافيش واحد فيهم قدر يرقد غمضه..
اما بوهم بالسبب التعب النفسي جسمه اجهد والنوم غلبه وسميرة مافارقتاش كل شويه تنوض تشوفه..
لكن في من فكر يستغل اللي صاير لصالحه...
خديجه..
اللي بعد مافكرت بعقلها الخفيف اتصلت بمختار...
🍃ومختار في هالوقت كان مقعمز مع مرته قدام الشاشه للي تعرض في فيلم رومانسي ويدور بينهم حديث شغلهم عنه..
فاتن بضيق:لولا خوفي من العدوى مشيت معاك..
مختار:مكالمة تليفون تأدي الغرض..
تنهدت فاتن بحزن وقالت..
/والله ماتستاهل اللي يصير معاها..
مختار وعيونه ع الشاشه
/نصيبها..
شافتله شويه بعدين غيرت نظرها للشاشه..
ويرن هاتف مختار..
وجهوا انظارهم ليه بعدين هو ناض خداه من ع الطاوله شاف المتصل رقم غريب فتح الخط ورد..
/ايوه..
"مساء الخير مختار الواعر معاي!؟"
رفع حواجبه وشاف لفاتن وقال..
/بصوته ونغمه..
سمع صوت ضحكتها رفع حاجبه اليسار..
وفاتن تشوفله..
مختار:باهي دورك انتي تقولي من معاي!؟
عقدت فاتن حواجبها..
"معاك بنت جيرانكم وحماة اختك خديجة شنيبه"
بعد التليفون وقعد يضحك وهو مسكر فمه بدون صوت..
وفاتن تشوفله بغيره واستغراب..
وقف ضحك ودار روحه عادي ورد التليفون لوذنه يقول..
/تفضلي..
"عارفه روحي فاجئتك وممكن صدمتك وعندك حق لكن اني مجبورة درت هكي ع خاطر خوي"
مختار:خوك!؟
"ايه خوي الجالي اليوم في جماعه خطفوه من قدام شقته"
مختار:صحة ليهم والله صحة ليهم..
معاش سمع حس لخديجه..
مختار:ممكن انتي فكرتي اني وراها لا والله اني خوك هدا لو نبي نديرله شي مش اقل من رصاصه نبعتها لوسط راسه..
سمع صوت الخط فصل ويبدا يضحك ويضحك..
خلا فاتن تضحك معاه وهي مستغربه..
قعمز جنبها وخداها في حضنه وباس راسها بعدين قال..
/ ريحته مليحه شامبوك هدا..
فاتن بضحكه:من كانت تكلم فيك..
هو قال بضحكه..
/وحده متروشقه..
فاتن بضحكه استغراب
/مت..شني!؟
عاود يقوللها في نفس الكلمه وكأنها باللغه الانجليزيه..
/متروشكا..
ضرباته فاتن ع صدره وهي تضحك وهو يضحك معاها..
🍃🍃🍃🍃
تاني يوم..
السادس عشر من شهر ذي الحجه..
6اغسطس..سنة 2020..
فاقت غرفه ع صوت طوبى تنوض فيها سمعت معاها صوت آذان الفجر جاي من جامع المنطقه..
طلبت منها طوبى تساعدها تخش للحمام بش تتوضا للصلاة..
وساعدتها غرفه تخش الحمام وقعدت واقفه قدامه من خوفها عليها..
لحظات وطلعت طوبى ساعدتها غرفه تلبس العبايه بش تصلي بعدين مشت خشت للحمام...
🍃🍃
بعد الصلاة ولت طوبى لسريرها وقعدت تسمع في غرفه وهي تقرا في القرآن..
كان خاطرها تقرا لكن حست بشي يمنع فيها هي وقتها فسراته ع انه تعب..
مجرد ماسمعت آيتين قرتهم غرفه راحت في النوم ومافاقتش الا بعد ساعه ع وجبة الفطور..
غصبت عليها غرفه تاكل وخلتها تكمل السفرة كلها..
🍃طوبى:وانتي!؟
غرفه:شويه تانيه ننزل للكافتيريا ناخد حاجه..
ويدق باب الحجره..
غرفه:تفضل..
انفتح الباب وخشت اميمه وفي يدها اكياس لما شافت طوبى فايقه ضحكت وهي تقول..
/ياصباح الكريب بالنوتيلا..
ابتسمت طوبى..
جتها اميمه سلمت عليها وهي تسأل عن حالها بعدين عطت الكيسه لغرفه..
غرفه:ياوخيتي سلمها بنية عمي..
اميمه قعمزت وهي تقول..
/قولي ياوخيتي سلم ولد عمي..
شافت طوبى لغرفه بإبتسامه..
غرفه بضحكه..
/بنفلسوا بيه خوك هدا مش ساد حساب المصحه هو اللي دافعه..
عقدت طوبى حواجبها وقالت بصوت مبحوح..
/علاش بس!
غرفه:تو نبعتله فلوسه مع اميمه..
اميمه وهي تمرر في نظرها عليهم بإستنكار قالت..
/شن تقولي انتي وياها كأنكم تدووا ع براني ولد عمكم هدا!
غرفه:اني نقدر عليها مصاريف المصحه مافيش داعي يدفعها هو..
طوبى:رديهم رديهم..
غرفه:كان ماخدتهمش اميمه اني نعطيهوله..
اميمه:كان تبي تحصلي هزيبه ديريها..
غرفه بضحكه:واخده ع هزايبه عادي..
يدوب ضحكت طوبى .
اميمه:ياودي افطري افطري وخليني نهدرز مع بيبو..
غرفه بضحكه:قوليلها اخر الاخبار قولي..
اميمه بضحكه:ايه حقه اسمعي اسمعي..
طوبى بإستغراب..
/شني!؟؟
🍃🍃🍃🍃
الساعه 2:30بعد الظهر..
في مكتب المحاماة اللي تملكه نبيله..
كانت غارقه في تفاصيل احدى القضايا اللي حتكون اولى جلساتها الشهر القادم..
خشت عليها السكرتيرة وهي تقول..
/استاذة نبيله..
قامت عيونها فيها..
قالتلها:في وحده برا تبي تشوفك ضروري..
نبيله:وقت استراحه هدا ولا!؟
ردت عليها تقول..
/قلتلها لكن هي اصرت مطت شفايفها بملل وقالت..
/دخليها..
السكريترة مشت وقفت في الباب وهي تشوف برا قالت..
/تفضلي..
وعيون نبيله ع الباب ومجرد ماشافت اللي خشت منه توسعوا ع الإخر بصدمه...
🍃🍃🍃🍃
الساعه 4:30قبل العصر..
بعد فحوصات استمرت لساعات دارتهم طوبى ع قلبها..
في حضور غرفه واميمه شرحلها اخصائي القلب عن حالتها..
الطبيب بشر..
/الحاله اللي عاشها قلبك قبل يوم حالة نادرة نوعا ما يسموها متلازمه القلب المكسور او متلازمة القلب المحطم
(Broken Heart Syndrome)
واضح انك كنتي في اقصى حالات التوتر ومتعرضه لضغط نفسي شديد وعايشه حالة حزن عميقه..
نزلت طوبى عيونها ليدها اللي باين فيها اثر ابرة الكانيولا..
كمل الطبيب يقول..
/الحالة هادي هي حالة تعب مؤقته للقلب اعراضها تشبه اعراض النوبه القلبيه،اللي يصير للجسم ساعتها انه يقعد يفرز في الهرمونات بشكل كبير بالذات الهرمونات اللي تتأثر بالحالة النفسيه للإنسان وهالشي يتعب القلب ويخليه مش قادر يؤدي وظيفته الاساسيه ..نقولك ياطوبى ومش نخوف فيك هذا تحذير يابنتي في ناس ماتوا بعد ماجتهم الحالة هادي حاولي يابنتي تبعدي عن اسباب التعب النفسي اللي عايشه فيه انتي قاعده صغيره والحياة قدامك عيشي وانطلقي فيها وخليها ع الله..
غرفه وهي تسمع في كلام الطبيب قلبها انقبض بقوة ودموعها نزلوا غصب عنها..
واميمه كذلك تألمت هلبه ع طوبى..
رفعت طوبى عيونها في الطبيب وقالت
بعد سمعت اخر جمله قالها..
"ونعم بالله"
🍃طلع من عندها واميمه وغرفه وراه..
اميمه كانت تبي تزيد تفهم منه وضع طوبى..اما غرفه قعمزت برا بش تبكي..ماتبيش تبكي قدام طوبى وتزيد تكدرها..
🍃واميمه بعد خدت اجوبة اسئلتها من الطبيب خلاته يمشي وهي جت بتمشي لغرفه شافت حسين خوها جاي..
وقف عليها وقال..
/شن جو؟
اميمه بضيق..
/تعالى..
مشت بإتجاه غرفه وهو وراها شاف غرفه تبكي انتابه شعور بالخوف..
وصلوا فيها واميمه تقول..
/غرفه الدكتور طمنا الحاله اللي عندها مش دائمه..
غرفه ببكي..
/اني تخيلت لو هديكا الليله قلبها وقف حق..غطت وجهها بإيديها وهي تقول..لاياربي حاجه زي هادي مانقدرش نتحملها..
ضمتها اميمه ودموعها ينزلوا..
حسين بضيق ونفاذ صبر قال..
/فهمونا شن قال الدكتور!؟
🍃شرحتله اميمه كلام الطبيب وهو بعد ماسمعه تألم وتأسف هلبه ع حال طوبى..
غرفه وقفت بكي ومسحت دموعها قامت عيونها في حسين وقالت..
/بالله ياحسين نبي منك حاجه ديرهالي..
حسين:قولي..
غرفه:تعرف الحوازه اللي خداها رؤوف الله يرحمه في الخمس بالله عليك برا شوفها ودير عليها دورة نبي نطلع بطوبى من هني غادي طول نبيها تقعد غادي لين ترتاح نفسيتها..
اميمه:احسن شي..
حسين:حاضر..غدوة من الصبح نكون غادي..
غرفه:سامحني بنتعبك..
حسين بإستنكار:شن تقولي انتي!؟
ناضت وهي تقول..
/راجي شويه..
ومشت بسرعه خشت للحجره وهو بعيونه معاها واميمه شبه عرفت غرفه شن بدير..
لحظات وطلعت غرفه بشنطه جلد سودا متوسطه الحجن مش نسائيه مدتها وقالت..
/خود هادم فلوسك..
هو بإستغراب شديد..
/فلوس شني!؟
غرفه:مصاريف المصحه اللي دفعتهم..
ضرب بظهر يده الشنطه ومشي بعصبيه بدون مايرد عليها..
اميمه:باهي اللي معطاكش بقفا يده ع وجهك..
ضحكت غرفه بقلة حيله ودموعها في عيونها..
اميمه:طوبى قاعده في الحمام؟
تنهدت غرفه بحزن وقالت..
/لا طلعت توتي في روحها للصلاة..
🍃🍃🍃🍃
بعد الصلاة..
قعمزت غرفه قريبه ع طوبى تهدرز عليها..
طوبى:بعد ماعرفت اللي صار للجالي ارتحت شويه..
غرفه:شوفي ربك ياطوبى شن دار فيه ربك مايخلي حق حد..
طوبى:وان شاء الله يخلصني منه مرة وحده..
غرفه:اللهم آمين..
دق باب الحجرة..
طوبى وجهت وجهها ناحية الشباك و غمضت عيونها
غرفه وهي تشوفلها قالت..
/خش..
وينفتح الباب وتخش سدرة..
لما شافتها غرفه تفاجئت..وهي لما شافت طوبى راقده ع السرير دموعها نزلوا..
قربتلها وقالت بنبرة ألم..
/طوبى..
ماجاهاش رد من طوبى ولاكأنها عرفت بوجودها..
غرفه:رقدت..
مدت سدره يدها اللي كانت ترجف وحطتها ع راسها مسحت عليه لحظات وبعدتها قعدت تشوفلها بألم بدون ماتتكلم وغرفه تشوفلها..
مسحت سدرة دموعها ولفت ومشت طلعت من الحجرة وسكرت الباب..
فتحت طوبى عيونها..لما شافتها غرفة تفاجئت.
تنهدت طوبى وقالت..
/ميه..
خدت غرفه شيشه ميه ومدتهالها ناضت قعمزت طوبى وخدتها منها..
🍃برا..
طلعت سدرة للمهدي ورفعت الكمامه اللي كانت منزلتها..
هو ماباش يسالها عن شي خداها من يدها ومشوا مع بعض..
وهما ماشيين شافوا مختار جاي من بعيد..
وقفت سدرة في مكانها وهي تشوفله والمهدي يشوفلها..
ومختار تجاهل وجودهم الزوز فات من جنبهم من غير مايعبرهم..
جبدت سدرة يدها من يد المهدي ولحقاته...
🍃في الحجرة..
مدت طوبى الشيشه لغرفه وقالت..
/تعرفي جي خاطري في سكالوب..
ضحكت غرفه وقالت..
/امس حسين جابهولي عشي خل نزيدوا نتبردوا عليه ونوصيه يجيبلنا بعدين..
ضحكت طوبى..
دق الباب..
شافتله طوبى..
غرفه:من تاني زعمه..علت صوتها وهي تقول..خش..
وينفتح الباب ويخش مختار وتخش بعد سدرة..
سدرة لما شافت طوبى فايقه انصدمت..
اما مختار بإبتسامه واسعه قال..
/تي شن حالك يامرعشتنا..
غيرت طوبى نظرها لغرفه وقالت..
/بنرقد..
وتمددت ع الفراش وعطتهم بالظهر..
تبدلت ملامح الابتسامه ع وجه مختار للتعجب..
اما سدرة بعد مانزلوا دموعها لفت وطلعت من الحجره..
غرفه وهي تشوف لمختار بإمتعاض قالت..
/سكر الباب وراك..
غير نظره لغرفه شويه بعدين هز راسه ورفع الكمامه ومشي طلع من الحجره وسكر الباب...
#منازل_القمر
#طوبى
...يتبع...
