خلف جداره تختبىء انثى

مقتطف

خلف جداره تختبىء انثى

مقتطف
الكاتبة Jawhara

******************

بصرخة قوية حست كل خلية من جسمها تشظت وهي تسمع صوته يهددها بابنها بعدما رجعت للبيت  وما تلكاها ابنها مثل كل مرة سالت عليه امها كالتلها أبوه أخذه اتصلت بسرعة لأن گلبها نغزها بسبب كلامه البارحة ، وانفتح الخط صاحت ..

تيماء / عبد العزيز انت وين ؟!!

رد بصوت فخم  ..
عبد العزيز  / بالطريق طالع للرطبة

بوادر الانهيار بدت تلوح بأفق روحها المتعبة بعد نقاش عقيم الليلة المضت ..

تيماء / ابني وياك ليش اخذته رجعه ؟!!

عبد العزيز / جنت واضح وياج من حجيت البارحه وانتي شنهو سويتي عفتيني وطلعتي الصبح للدوام ، وشي ثاني لا تكولين ابني ، جود ابني مو بس ابنج
تيماء بصوت تعبان / مثل كل مرة تجي علينا هو يبقى وياك واني اروح للدوام ليش تريد تبعده عني ؟!

عبد العزيز / ساعتين واصل القرية وابني يبقى عندي

صرختها صدعت رأسه واذته  ميريد  يتصرف بهذه الطريقة يخطف ابنه بعمر السنتين وهو يعرفها شكثر  متعلقه بجود  ، التفت على ابنه بالمقعد ومحاوطه بحزام الامان يخاف عليه  و من سمع صوت أمه الواضح انتبه وأشر بيده عالموبايل ..
جود / ممااا مامااا

رد عليه ..
عبد العزيز / تحجي وياها ، جود هذه ماما

بجت وبصوت مليان  عصبية ..

تيماء  / تلعببب باعصابي رجع ابني احسنلك

عبد العزيز بغضب / وخنننك انتي شلون تسمحين لنفسج تحجين هيج وياية

تيماء / خاطف ابني وشلون تريدني احجي ، عبد العزيز رجع ابني اترجاك

عبد العزيز / انتي خبلة اكو اب يخطف ابنو ، أنا اخذته لديرة أهله ابوي يريد يشوفو وانتي راسج ناشف متقبلين اتخطي رجلج الديرة شسويلج أتوسل بيج

تيماء / والله العظيم إذا صار على جود شي أنت وأهلك وعشيرتك اذبكم بالسجن

عبد العزيز / قسم بالله لو بعدني قريب على بغداد ارجع اعلمج شلون تحجين وتهددين ، احمدي ربج أنا بعيد هساع
أنهت الاتصال وكعدت بنعب عالقنفة نزلت راسها ممصدكة الي صار  ، يأخذ ابنها هي تعرف اذا دخل لعائلة حجي حوم متشوفه بعد  !!!