خلف جداره تختبىء انثى

الفصل الاحدى عشر

رواية / خلف جداره تختبىء انثى

الفصل الاحدى عشر
الكاتبة Jawhara
_________________

قراءة ممتعة ❤️ استودعتكم الله الذي لا تضيع ودائعه
_________________

عصام ..
بقيت صافن على افياء    موتت روحها من البجي
اخر شي وكفت واني ناوي أهديها لأن بجيها زرف گلبي ، حظنتها ومسحت دموعها بيدي ..

عصام  / اششش هدوء ترى تعبان اريد ارتاح وباجر الصبح ورانا طلعه للمطار

ردت بصوت مختنك والشهكات تتقاطع بصوتها  /  ات متحبني مو

عصام / رجعنا لنفس الموال ، تعاي خل انام تدرين هلكان من التعب بس احط راسي عالمخدة انام

افياء وهي تناشغ /  معلية بيك 

عصرتها بحظني ودنجت راسي عضيتها بخدها صاحت معترضة لأن اذيتها ..

افياء /  ااااي وربي متوحش

عصام / تسناهلين لأن متسمعين كلام

مدت بوزها وهي تنهزم من حظني دخلت الغرفه حضرتلي ملابس اغير  وهي تعاتبني ..

افياء /  حتى ماسالتني شلونه حملي وشلونها صحتي ؟!!!

غيرت ملابسي وعيني عليها اشوف نظرة حزن مرسومة بوجهها. .

عصام من غير نفس  حجى / كلت العندي مايحتاج اعيده

فتحت عيونها بصدمة وصوتها واضح نبرة الخذلان بي ..

افياء /  عبالي تتغلى علية ، يمكن سقف توقعاتي زاد حده !!! معقولة متريد طفل مني ولا مهتم راح تصير اب !!

عصام /  اشششش لا تخليني احجي اشياء تضوجني وتضوجج

افياء ،،
تركت الغرفة وطلعت صاح وراية مارجعت ، كعدت بالصالة وسندت راسي على ظهر القنفة  ولميت جسمي واني افكر باجر شنو راح يصير ، ياخذني لأهله ما ادري شلون اقابلهم  وإذا راح يتقبلوني بحياتهم أو لا
غفيت على هاي الأفكار ماحسيت بالوقت كعدت ضايجه  حلمت وما ارتاحيت ، مدري لأن ما اعرف افسر حلمي إن شاء الله خير

رقبتي توجعني وجسمي مجحل من البرد  لأن ممرتاحة نمت على كعدتي ، تلفتت بالصالة  وعيني راحت على باب الغرفة مسدود ! معقولة مافكدني نايم ميدري بية نمت قريب الساعتين هنا
فتت للغرفة الضوة مطفي هذا صدوك نايم ولا يدري عني  ادور اني متت برد بالصالة مسوية بيها زعلانة وهو ولا درى ، رفعت طرف الغطا وانحشكت وياه يوووه يالدفو ، حطيت راسي على صدره متعمدة وسحبت الغطا على وجهي
، انتبه علية بس ماحجى تمنيت ياخذني بحظنه ويلمني بذراعه اكتفى سحب الغطا من وجهي ، مغمضة عيوني اتخيله يباوع علية جربت افتحهن والله بطرانة اني الرجال نايم مايدري بروحه
حاولت انام طار النوم من عيني إلى وقت متأخر  ،
كعدت الصبح على صوته يريد مني اسويله ريوك