خلف جداره تختبىء انثى

الفصل السابع عشر

روايه / خلف جداره تختبىء انثى

الفصل السابع عشر
الكاتبة Jawhara
________________

سبحان الله وبحمده سبحان الله العظيم

________________

حيان ..
صار لها يومين و تعاملها بارد هالصفية الله شكثر عدها شوفة نفس هاي بس سمعتني جبت طاري حرمة هيج عجل إذا شافتها شتسوي  يبوي الله يعين ، أنا ما حاب استقبل هالتاجرة  عندي بس ظرف الشغل الي بيناتنا وهي من زمان تكلي إذا اجي العراق ازوركم هي وابنها الي هوايته الخيل ، عمرو مايتعدى التسع سنوات  ولدها الوحيد من زواجها الي انتهى بالطلاك حسبما سمعت منها  ، اخذت نفس قوي وانا أتأمل الخيل اطارد داخل الحاجر الي مخصصه الها افكر بالوكت الي مر وانا انهي اتصال وياها بعدما  وصفت لسايق ام انمار المنطقة وراسلته عالواتساب  كال نص ساعة واحنا يم بيتك ، التفتت على صوت قيس جا يتمشى بخطوات بطيئة ومبتسم  ضيكت حاجبي وانا اسألو ..

حيان /  شبيك تتبوسم جن عندك سالفة !!

قيس /  تعال وصلو جماعتك

غمزلي بتك عين وانا فهيت ورديت سألته ..

حيان /  مسرع وصولهم عجب ما خابروني !؟

قيس / أنا دحجت بسيارة وكفت بسد البوابة ونزلت حرمة وياها ولد وتكلطو عند الباب كلت هاي الحرمة الي يتعامل ابو صكر وياها اجيت اندهك

حيان بغيض /  واجيت تمشي على بيض ، تتسرسح بمشيتك عليش ما خابرتني تا اطلعلهم  والله انت فاهي !!!

قيس /  عجل رح كبل لا توج نار بين الحريم

حيان /  الله يكفينا شر النار انت منين جبت هالسالفة ؟!!!

قيس /  سمعت امي البارحة تسولف لمرة شامخ هيج بالصدفة

حيان /  اكول خل اروح استقبل ضيوفي بدال هذرة وسوالف

مشى بخطوات سريعة مبتعد عن اخوه الي مبتسم  يعرف حيان روحو بطرف خشمو إذا احد ضايقو

،، اسمع صوت امي بالاستقبال تهلي وترحب بعدني مافايت صاحتني صفية الي طلعت من الهول سحبتني من ايدي وسدت الباب ، دحجت على أيدها الي كاضة ايدي ورفعت عيني بيها  / خير شبيج ؟!!

ردت بصوت ناصي وعصبي ..

صفية /  هساع ارتاحيت من جبتها هينة ، شنهو علاقتك بيها ؟!!! ولا تضحك علية بكلمتين والله شنهو هاي تاجرة اتعامل وياها !!

سحبتها من جتفها وطلعنا لغرفة امي ..

حيان /  انتي شبيج شنهو هالحجي الماصخ !!

كزت على سنونها وردت ..

صفية /  عجل حجايتي ماصخة وشتكول عالحرمة الي وياها صبي جاية تزور وتتضيف عند رجال غريب عليها ، هذه مو عوايدنا حرمة اجول  بالبيوت تتضيف بلا رجلها  والا لا تكون هذه مرتك والصبي ابنك ؟!!!