خلف جداره تختبىء انثى

الفصل الرابع عشر

رواية  / خلف جداره تختبىء انثى

الفصل الرابع عشر
الكاتبة Jawhara
__________________

اللهم صل وسلم وبارك على سيدنا ونبينا محمد وعلى اله وصحبه وسلم تسليما كثيرا

__________________

صفية ..
سمعته يخابر وحدة وماخذ راحته بالسوالف وياها يمكن بينهم مشكلة يكللها انتي افهمي ولا تبقين تلحين ، خليت ايدي على صدري احس ضربات گلبي دكاتها زادت وانا اشوفو يبتسم على كلام كالتو  ، يارب ماريد اصير مخدوعه أنا طول عمري باعدة نفسي تا لا اتأذى وجنت خايفة أخطي هالخطوة ماريد اتندم يارب
سحبت الباب وفتحته أكثر وكفت وايدية مجتفتهم على صدري وعيوني عليه انتظره يكمل التفت لجهة الباب فتح عيونه مصدوم ممتوقع يشوفني قفل موبايله بدون مايحجي شي وياها واجى يمشي بخطوات سريعة ونظراته مصوبها علية يريد يتأكد سمعت لا

حيان بشك /  صفية شسوين هينة ماصعدتي للغرفة !؟

خزرته وبقيت ساكته وابتعدت خطوات تا يدخل انطيته ظهري وانا احساس الغبنة متمكن من روحي وكلبي حسيت بيده على جتفي صحت بي بدون ما التفتت ..

صفية بغضب /  ايدك لاااا تحطهاااا على جسمي

عفته وفتت جوة اريد غرفتي ماريد أحد يسمع الي يصير بيناتنا اكيد يجي وراية ما يعوفني بحالي ، صعدت بسرعة وية دخلتي اريد اسد الباب جان بظهري دفعني وسد الباب واجى وعيونو الغضب يشع بيهن مد أيده يريد يحطها على جتفي ابتعدت وخزرته ..

صفية واحساسها بالغبنة يتزايد /  كلتلك لا تحطها على جسمي شنهو احجي أنا ؟!!!

رد بحدة /  انتي عكلج بي شي عليش هالانقلاب الي سويتي تا افهم نوريني !!!

كزيت سنوني ورديت بقرف لأن أفكاري تصورلي اشياء عن حيان ..

صفية /  تريد أكلك السمع والطاعة وانا اسمعك تحجي وية النسوان تتخابر وياهن ، منهي هاي الي تكللها افتهمي ولاتبقين تلحين !!!

رد بكلمتين  / شي مايخصج

صفية  / عجل لا تنتظر مني شي ومن الليلة مالك مرة

ضحك بسخرية وكض فكي بيده ورفع راسي وقرب وجهه نتر بية ..

حيان باستلعان  /  والكلعة شنهو تا تهدديني تروح حرمة تجي بدالها عشرة

دفعت أيده ممصدكة يحجي هيج وياي كلش ضجت ..
صفية /  بينت حقيقتك عاد لو منتظر يمر على زواجنا اسبوعين

حيان بنترة /  انكلعي من وجهي ما لي مزاج اكعد ابررلج

فكيت حلكي مصدومة شبي هذا والله ولا صاحي  ، استغفرت ربي وفتت سحبت الغطا وتلفلفت بي ماريد اشوفو حرك گلبي النذل

،،،
حيان ..
كلش ضجت لأن حجيت عليها ماجنت اريدها تسمعني وانا اخابر هذا شي خاص بية وتعال اكعد بررلها وقنعها وهي واضح قافلة ، وهنوب ضوجتني تكلي لاتنتظرني مالك مرة !! خلتني اعصب وما لزمت لساني وانا اهينها ، تبين انقهرت وراحت نامت  ، غمضت عيوني وأخذت نفس طويل وطلعته وفتت غيرت ملابسي ومددت بفراشي عفتها ما تقربت عليها ادري بيها مانايمة من كضة كتوفها متشنجة ، ورى ساعة. ماجاني نوم لفيت بجسمي عليها تبين نايمه من تنفسها الهادي قربت راسي حبيتها بخدها ، محتاجها كلش وواضح ما ادانيني ، ويمكن إذا طخيت بيها تعوف الغرفة اعرفها نفسها عزيزة ، استغفرت ربي وانا اطلب النوم لأن الأفكار ماتخليني ارتاح ، طلعلتي مشكلة جديدة تريد حل وانا لزوم ما اتاخر بحلها !