خلف جداره تختبىء انثى

الفصل الرابع

رواية / خلف جداره تختبىء انثى

الفصل الرابع
الكاتبة Jawhara

___________________

في غيابِك
يطرق الشوق قلبِي..
بِوابِل من الحنِينِ..
مَا حيلَتي
والغياب شريعتك
والَانتظار مَذهبِي..
___________________

حيان  /  يمة كبل ماننزل خل اذكرج لا تطرين راوية بالسوالف ماريد صفية تنغث

ام حيان /  يول انت من تريد تتزوج عليش خايف اهجد يم مريتك وريحني وارتاح

حيان / لا بالله ما نصفتيني عجل أظل مكابل وجه راوية  وانا ادري بيها مغثة وغاثة جهالي

حجية حشمة / ايييه مريتك تتحملها عجل تكسر بنت الناس شتهو ذنبها عليش تزوجتها وهساع تحجي عليها ، والله العتب عليك جان من اول تحكمها ترى الفرس من خيالها والمرة من رجالها ( هذا مثل تُعرف جودة الفرس وأصالتها من أصالة فارسها، وكذلك تُعرف أخلاق المرأة ـ زوجة أو ابنة أو أختاً ـ من تصرف وليّ أمرها. )

حيان بغضب مكتوم  / يمة دخيل ربج هاي وانتي تعرفين سوالفها الشينة وية وليداتي وهيج تحجين عجل ألفرس من خيالها هااا وظنج أنا مو  خوش خيال !!!!!

حجية حشمة  بملل / اكول حول حول  يم خالك ابو عزيز طولنا واحنا نسولف ، دحج وليداتك ضاجو

.....

داخل مضيف حجي حوم الذي استقبل أخته ام حيان بالكثير من الاحترام والمحبة فلهذه الاخت معزة خالصة  بگلبه  يفضلها على اخواته الباقيات رغم محبته لهن لكن حجية حشمة لها من الاحترام والحب الكثير

حجي حوم / حياج الله خيتي تعاي هينة عد صفية

مشت وايدها بيد اخوها  دخلو  البيت  وعافو  حيان  وولده وعداي ابن حجي حوم

، ام حيان تريد  تكعد وية صفية ا تحاول بيها عساها  توافق على خطوبة حيان الذي تشغلها من فترة لأن علاقته بزوجته راوية متأزمة وشارفت على الانهيار والسبب هو مامتقبلها لها ولا متقبل تصرفها وية وليداته اللي يعتبرهم  خط احمر ، و ينتقم من اي واحد  يمسهم بسوء وهذا اللي ما حسبت حسابه راوية  علاقتها بالجهال فاشلة

تنهدت وهي تشوف صفية  بنت اخوها  تستقبلها  بكل  طيبتها وأخلاقها احنت راسها وباست رأس وايد عمتها التي احتظنتها ..

حجية حشمة / يگلب عمتج شلونج يبنيتي والله مشتاكتلج چثير يالكاطعة ( معناها منقطعه عن زيارتها )

استحت صفية من نغزة عمتها هي فعلا مقصرة بحقها ما ملتقية بيها من فترة  والسبب حيان اللي  يصر  و كل فترة يطلبها للزواج وهذا شي يخليها  بعيدة عنها محرجة من هذا الحيان  رغم رفضته وبعده متمسك بيها !!
ضيفتها وكعدت بسدها وعيونها  تدعلى ابوها اللي  سند ايديه على عصاته ( باكورة)  ، ساكت ما يحجي   ما يريد الضغط على بنته الا أنه يتمنى أن تتزوج من حيان ، بداخله يكتم سبب تركه لبنته وتزوج  بغيرها ما  يعرف السبب  ، رغم أكثر من مرة يسمع  أخته حشمة تكول ما الكى مثل   صفية  مرية لوليدي  حيان ، ضيك حاجبه  اللي غزاه  الشيب الابيض وهو يسمع حشمة تلح على بنته التي نزلت راسها وسكتت ما حجت ..