رواية / خلف جداره تختبئ انثى
الفصل الثاني والعشرون والاخير
الكاتبة Jawhara
_______________
منار ،،
استغربت من سيطرة ياسر على انمار ، تمام اني اعرف ابني يحب أبوه وبكل وقت يذكره بس الشي اللي يخليني اقلق اتفاقهم الاثنين ، من خلال كلام ياسر وية انمار تأكدت اكو شي
عدلت كعدتي وعيني عالشارع سالت انمار بصوت قوي / انمار ماما تريد تعرف شنو صاير لا تظم علية شي تمام !!
انمار / بابا يأخذنا لبيتنا نعيش سوى
منار / متاكد ماكو شي ثاني ؟!!!
ياسر بهدوء غريب / عوفي الولد لاتبقين تحققين وياه
منار ردت بدون ما تلتفت عليه / كلامك وياه يدل على شي اريد اعرفه
ياسر / نصل للبيت وتعرفين
منار التفتت باعتراض / شنو عيني ؟! منو يكول اروح وياك
طلعت موبايلها واتصلت بالسايق اللي وصلها لبيت حيان ، حجت وياه يجي يأخذها ، انسحب موبايلها بسرعة وانفقل
ياسر بتهديد / والله إن ما مشيتي عدل لا اخليج تندمين عالساعة اللي شفتيني بيها
تحس بالنار تطلع من راسها متريد ترجع وياه بعد اللي صار بيناتهم ، نست انمار ونست شلون تسيطر على نفسها جدامه عاطت بقهر وهي تهدد بياسر / افضحك بالسيطرات اكللهم خطفني اني وابني والله اخليك ما تسوى فلس
عاطت متوجعه اول ما لطمها بيده على حلكها بقوة اذاها
بجت وهي تشوف أيدها بيها دم بعدما تلمست شفتها ،
ياسر يسوق بسرعة ميريد يوكف بهذا المكان إلى أن وصل للمدينة وكف سيارته على جهة من الشارع التفت عليها
ياسر التفت وبغيض وهو يشوف شفتها وأثر جرح بطرفها / كلتلج لا تستفزيني ، يامرة خفي من طبعج الاكشر هذا
انمار الي جان ساكت طول الوكت رد وبزعل / انت متحب ماما جذبت علية
ياسر تنهد ولف رأسه لابنه / بابا نمور سوالف الكبار لاتتدخل بيها
انمار / چا تضرب ماما واسكت
نتر ياسر بقوة / اييي تسكت لأن امك غلطانة علت صوتها علية وهذا شي عيب
خنس انمار ماحجى من شاف عصبية أبوه ورده عليه
منار ،،
سكتت وعيوني مغوركة دمع متندمة أشد الندم من رجعت ، جريت حسرة وغمضت عيوني ماريد اشوف الطريق اللي رايحين بي
مدري شكد الوقت طلعت ساعتي من الجنطة الوقت ساعة ستة وغربت الشمس من فترة حسيت جسمي تيبس على كعدة وحدة ماتحركت ، لفيت راسي لابني اللي نايم ميدي بروحه يعمري لأن الطريق كولش طويل ، الحمدلله الجو داخل السيارة دافي لأن فاتح تدفئة ياسر بيك
وكف السيارة قرب اسواق عالطريق التفت علية واخيرا حجى بعد صمت طويل
أنت تقرأ
خلف جداره تختبىء انثى
Lãng mạn* في ركن خاص جداً في القلب لم أتعرف عليه إلا عندما أحببتك، أنت تسكن عمق قلبي. ❤️
