خلف جداره تختبىء انثى

الفصل الثاني عشر

رواية  / خلف جداره تختبىء انثى

الفصل الثاني عشر
الكاتبة Jawhara

_________________

لا يوجد
بيني وبينك نهايه
مازلت أنا بين سطورك
وأنتي خلف حروفي
________________

حيان ..
انتظر  ينتهي العشا ،  ما يمشي  الوكت دحجت بساعة ايدي وانا فكري كله  يم صفية ، البارحه اول مره اشوفها هيج ، الصدك انبهرت بيها رغم ماحجت وياي الا جم جلمة لكن مايخالف الليلة الوعد يصفية  التفتت على الزبير أيده على جتفي ابتسم وضغط جتفي  ..

زبير /  احس بيك تريد تشرد من هينة ، ما ظل شي  والناس  تسير لأهلها !!! 

حيان مبتسم /  افاا منهو كال أنا مستعجل ، خلهم براحتهم الليل أولو يخوي

زبير /  هههه ايييه واضح وچثير انك ما مستعجل ، عجل تعال اكعد هينة ولد عمامنا بعدهم ما سارو لاهلهم

حيان /  يلا اجيت ، اللهم يصبرني على هاليوم الي ما راضي يخلص

ابتسم الزبير ومشى واجى وراه حيان الي كعد بين عمامه وولدهم وهو يعدل بعكاله وغترته البيضا

حيان ،،
ورى ساعة تنفست براحة وسلمت عالباقين وانا اتمشى وياهم  اودعهم وياي اخوتي ، دخلت البيت لاكتني امي والبنوات خواتي ونسوان اخوتي يباركن ويهلهن وكفت سد امي وحظنتها حبيت رأسها وهي توصي بية على صفية ، وانا احرك راسي موافق على كل الي تكولو ، تلفتت ادور وليداتي كبل ساعة جانو عندي يم الزلم ، سالت عليهم واخيتي ميسون كالت يلعبون بالغرفة وية وليداتها  ، عفتهن ورحت اشوفهم اول ما دخلت  كمزو يتراكضون صوبي حظنوني ولميتهم بحنية ودنجت احببهم ، ايابة شكثر احبهم  وليداتي وكطع النفس

حيان بحنية /  ها يبة صكر شتسون انت واخيك

صكر /  يبة نلعب ، هذا سعد ابن عمتي ميسون يدور حزازير وكاعدين نطكطك عليه أنا وحوم

مسحت على رأسه وابتسمتلهم / عجل لا تطنزون عليه بعدو مايعرف صغير يبوك

رد حوم وهو يسحب سعد من أذنه /  فاز بحزورة جنو جني يحجي  ابطنو  ههههه

سعد / خالي حيان كلهن عرفتهن حزورات ولدك

حيان بتشجيع /  كفوو يالذيب

التفتت على ام سعد ( ميسون ) تسألني / ها شبيهم الوليدات ؟

حيان / هذا سعد فاز على وليداتي وجن حوم ما راضي ههههه

يبعد گليبي هو حوم  الزعيم كل حركاتو وسوالفو تنحب

اعترض صكر /  هذا حيال جنو واوي

ردت ميسون وهي تاخذ صكر تحظنو وتحب خده /  يلا باركو لابوكم خل يتسهل لمريتو  لا تبقون تسولفون وتعالو تا تنامون